Oberou ebestel

An Testamant Nevez : eil lodenn – Troet e brezoneg gand « Kenvreuriez ar brezoneg » Eskopti Kemper ha Leon, 1988.

Pennad-kinnig

En eul levr kenta (an trede aviel) e-neus Lukaz diskouezet e-neus Jezuz, dre vertuz ar Spered Santel, saveteet ar bed ha diazezet an lliz war an ebestel a oe karget da brezeg an Aviel beteg penn-pella ar bed.

En eul levr all (Oberou Ebestel), e tiskouez e teu buan an Iliz da greski dre skoazell an heveleb Spered. Diwar skouer testou leun a gred ha dreist-oll diwar labour an ebestel Per ha Paol, an Iliz a zeu da veza savet e kêriadenn ou braz euz an Azia-Izella hag euz Bro-Hres ha dreist-oll e Rom, kêr-benn ar bed roman, e-kreiz ar bed payan.

Oberou ebestel

I ¹ Va levr kenta, Teofil, am eus kontet ennañ kement e-neus greet ha kelennet Jezuz abaoe ar penn-kenta, ² beteg an deiz ma oe pignet d’an Neñv, goude beza roet e gemennadurez, dre ar Spered Santel, d’an ebestel e-noa dibabet. ³ Leun a vuez, e teuas dirazo goude e basion ; ouspenn eur wech e-noa merket dezo kement-se ; e-pad daou ugent devez e-noa en em ziskouezet dirag o daoulagad, ha komzet ganto euz rouantelez Doue. ⁴ E-pad m’edo o preja ganto, e kemennas dezo chom heb kuitaad Jeruzalem, med chom da hortoz eno promesa an Tad, an hini, emezañ, ho-peus klevet ganin : ⁵ « Ar vadeziant en dour e-noa roet Yann, med er Spered Santel eo e vezoh-hwi badezet dizale. »

Jezuz pignet d’an Neñv

⁶ Bodet e oant eta hag e rejont outañ ar goulenn-mañ : « Aotrou, daoust ha bremañ eo deuet ar mare dit da adsevel ar rouantelez evid Israel ? » ⁷ Respont a reas : « N’ho-peus ket da houzoud evid pe da boent eo bet deiziet kement-se gand an Tad en e halloud. ⁸ C’hwi a-vad, a resevo nerz o veza ma tiskenno ennoh ar Spered Santel hag e vezoh testou din e Jeruzalem, dre vro Judea ha Samaria a-bez ha beteg ar penn pella euz ar bed. »

⁹ War gement-se e oe dibradet en êr dirag o daoulagad hag e teuas eur goumoulenn da guzad anezañ ouz o daoulagad. ¹⁰ Hag o veza ma choment c’hoaz da zelled ouz an Neñv, el leh m’oa pignet Jezuz, setu ma tegouezas en o hichenn daou zen gwisket e gwenn ¹¹ hag a lavaras dezo : « Gwazed a Halilea, perag chom da zelled ouz an Neñv ? Jezuz, eñ hag a zo bet tennet diganeoh hag a zo pignet d’an Neñv, a zistroio er memez doare m’ho-peus e weled o vond kuit d’an Neñv.

   An daouzeg abostol

¹² Kuitaad a rejont neuze menez an Olivez, ha distrei da Jeruzalem ; ar menez n’edo ket pell ahano : hed eun deveziad bale d’eun deiz-sabad. ¹³ Pa oent distro, e pignjont d’ar gambr uhel, el leh ma reent o demeurañs. Eno edo Pèr, Jakez hag Andre, Filip ha Tomas, Bertele ha Maze, Jakez mab Alfe, Simon ha Jud, mab da Jakez. ¹⁴ oll, a-unan, e vezent aketuz da bedi gand eun nebeud merhed, en o zouez Mari, mamm Jezuz, ha gand e vreudeur.

   Mazeaz dibabet

¹⁵ En deveziou-ze, Pèr a zavas en e zav e-touez ar vreudeur. Bez-ez oa eno bodet war-dro c’hweh ugent den, hag e lavaras : ¹⁶ « Red e oa kas da benn ar pez e-noa lavaret ar Spered Santel er Skritur Zakr, dre deod David, diwar-benn Judas, deuet da ren ar re o-doa kemeret krog e Jezuz ; ¹⁷ unan ahanom e oa, bet e-noa lod en or zervich. ¹⁸ Hogen an den-se, gand arhant e fallentez, e-noa prenet eun tamm douar ; kouezet eo bet war e benn, hag oa bet digoret dre ar hreiz ha ledet eo bet e vouzellou. ¹⁹ Gouezet mad o-deus kement-se oll dud Jeruzalem, setu perag eo bet anvet an dachenn-se, en o yez, « Hakeldama », da lavared eo « douar ar gwad », ²⁰ rag skrivet eo e levr ar Salmou : » Ra vezo goullo e di, ha den e-bed o chom ennañ » ; ha c’hoaz : « Ra zeuio unan all da gemered e garg ». ²¹ Bez’ ez eus gwazed hag a zo deuet d’on heul, e-pad an oll amzer ma kerze Jezuz en or penn, ²² azaleg badeziant Yann beteg an deiz m’eo bet lamet diganeom. Red eo eta e teufe unan anezo da veza test ganeomp euz e adsao da veo. »

²³ Daou a oe lakeet war ar renk : Josef anvet Barsabas ha lesanvet Justus, ha Mazeaz. ²⁴ Greet e oe neuze ar bedenn-mañ : « Anaoud a rez, Aotrou, kalon an oll, diskouez deom pehini euz an daou-mañ az-peus dibabet ²⁵ evid kemer, er garg a abostol, ar plas e-neus dilezet Judas evid mond d’al leh m’ema ». ²⁶ Tennet e oe d’ar zord ha Mazeaz eo a oe dibabet, hag azaleg neuze e kemeras renk gand an unneg abostol.

Ar Spered Santel o tiskenn war an diskibien.

II ¹ Pa zegouezas deiz ar Pantekost, edont oll bodet asamblez. ² A-greiz peb kreiz e teuas euz an Neñv eun trouz heñvel ouz hini eur gorventenn ; an ti m’edont ennañ a oe karget a-bez gantañ. ³ Neuze e weljont evel teodou tan a en em ranne da blava war beb hini anezo. ⁴ Oll e oent karget euz ar Spered Santel hag e stagjont da gomz e yezou all evel ma roe dezo ar Spered Santel da lavared.

⁵ Hogen e Jeruzalem ez oa o chom Juzevien devod, ginidig euz an oll vroiou a zo dindan an Neñv. ⁶ O veza klevet an trouz-se, eur bobl tud a zegouezas war al leh. Strafuillet e oent, rag peb hini a gleve anezo o komz en e yez dezañ. ⁷ Souezet, estlammet e oent, hag e lavarent : « An dud a zo o komz aze, daoust ha n’int ket oll Galileaned ? ⁸ Penaoz eta eh intent anezo peb hini ahanom e yez e vamm : ⁹ Parted, Meded, Elamitiz, tud euz ar Mezopotamia, euz bro Judea, euz ar Hapadosia, ar Pont, an Azia, ¹⁰ ar Pamfilia, an Ejipt, euz al lodenn euz al Libia a sko war Ziren, Romaned o chom amañ, ¹¹ oll Juzevien koulz ha Prozelited, Kretiz hag Arabed, ni o hlev o tiskleria en or yez burzudou Doue ». ¹² Souezet e oant oll hag e lavarent kenetrezo : « Petra zinifi an dra-mañ ? » ¹³ Lod all a zirolle da c’hoarzin : « Eur hovad gwin dous a zo ganto ! »

¹⁴ Neuze Pèr, hag a oa war al leh gand an unneg, a zavas e vouez hag a zisklerias kement-mañ : « Tud euz ar Judea ha c’hwi hag a zo e Jeruzalem, intentit mad ar pez a dremen ha digorit ho tiskouam da zelaou va homzou ; ¹⁵ Nann ! ar re-mañ n’int ket mezo evel ma kav deoh. N’eo c’hoaz nemed nav eur diouz ar mintin. ¹⁶ Med amañ e tegouez ar pez e-neus lavaret ar profed Joel : en deveziou diweza, eme Doue, e teuin da skuilla va Spered war beb den ; profeded e vezo ho mibien hag ho merhed, ho yaouankizou o-dezo gweledigeziou, hag ho tud koz, soñjou. ¹⁸ Ya, war va zervicherien ha servicherezed, en deveziou-ze, e skuillin va Spered ; profeded a vo anezo. ¹⁹ Burzudou a rin e barr an Neñv ha sinou amañ war an douar : gwad, tan, moged o sevel. ²⁰ E teñvalijenn e troio an heol hag e gwad al loar a-barz ma tegouezo deiz an Aotrou, an deiz-meur, an deiz a hloar. ²¹ Hag e vo salvet an neb a halvo ano an Aotrou.

²² « Juzevien, selaouit ar homzou-mañ : Jezuz a Nazared, an hini e-noa roet Doue da anaoud dre ar miraklou, ar burzudou, ar sinou e-neus greet drezañ en ho touez evel ma ouzoh, ²³ an den-se, hervez ar pez e-noa divizet krenn, hag hervez ar pez a ouie en a-raog, c’hwi ho-peus e roet hag e lazet en eur lakaad tud difeiz d’e staga ouz ar groaz ; ²⁴ med Doue e-neus e zavet a varo da veo, en eur denna anezañ euz poaniou ar maro, rag n’helle ket chom dindañ galloud ar maro ; ²⁵ rag lavared a ra David diwar e benn : Gweled a reen dalhmad an Aotrou dirazoñ ; rag a-zehou din ema, evid mired ouzin da horjella. ²⁶ Setu perag e tride va halon hag e kane laouen va muzellou, ouspenn, va horv a ziskuizo en esper. ²⁷ Rag ne zilezi ket va ene e-touez ar re varo, ha ne lezi ket da vreina da zen santel. ²⁸ Diskouezet az-peus din heñchou ar vuez ha leun e vezin a levenez pa vezin dirazout.

²⁹ « Breudeur, me ’hell lavared deoh gand hardisegez : maro eo an Tad-meur David, sebeliet eo bet, hag amañ c’hoaz ema e vez. ³⁰ Med profed e oa, hag e ouie e-noa Doue greet le da lakaad da azeza war e dron unan euz e lignez hag euz e ouenn. ³¹ Gwelet e-neus en a-raog dasorhidigez ar Hrist, hag anezañ eo e-neus lavaret : n’eo ket bet dilezet e-touez ar re varo ha n’eo ket deuet e gorv da vreina. ³² Jezuz eñ, Doue e-neus e zavet da veo, test om oll a gement-se. ³³ Bet e-neus eta, digand an Tad, ar Spered Santel prometet hag e-neus e strewet evel ma welit ha ma klevit. ³⁴ Rag David, ha n’eo ket, a dra-zur, savet d’an Neñv, a lavar koulskoude : an Aotrou e-neus lavaret d’am Aotrou : azez en tu dehou din, ³⁵ beteg m’am-bo greet euz da enebourien eur skabell evid da dreid. ³⁶ An oll Juzevien a dle gouzoud mad kement-mañ : greet e-neus Doue anezañ Aotrou ha Krist, eñ hag ho-poa staget ouz ar groaz. »

Ar re genta deuet d’ar feiz

³⁷ Strafuillet e oe o halon o kleved ar homzou-se hag e houlennjont ouz Pèr hag an ebestel all : « Petra on-eus-ni da ober ? » ³⁸ Hag e respountas Pèr : « Cheñchit buez, ra vezo badezet peb hini ahanoh en ano Jezuz Krist, evid kaoud ar pardon euz ho pehejou hag ho-pezo ar Spered Santel da zonezon. » ³⁹ Ar bromesa a zo bet greet evidoh hag evid ho pugale hag ivez evid ar re a zo a-bell, ken niveruz ha ma plijo d’an Aotrou Doue o gelver. » ⁴⁰ Kalz traou all a lavare c’hoaz dezo evid rei testeni ha kalon dezo : « Tehit, emezañ, diouz ar ouenn dud diroll-mañ. » ⁴¹ Ar re o doa greet degemer d’e gomzou a oe badezet hag e kreskas euz a dri mil niver ar gristenien. ⁴² Aketuz e talhent mad da gelennadurez an ebestel ha d’an unvaniez, da lid ar bara torret ha d’ar pedennou. ⁴³ An doujañs a greske e kalonou an oll, kalz burzudou ha sinou a veze greet gand an ebestel. ⁴⁴ Ar re oll a oa deuet da gredi a veve unanet hag a lakee o feadra e boutin. ⁴⁵ Gwerza ’reent o leve hag o madou evid lodenna ar priz kenetrezo oll, hervez ezommou peb hini. ⁴⁶ Aketuz e vezent da vond bemdez asamblez d’an Templ. Terri a reent ar bara er gêr ha kemered o frejou e-kreiz al levenez hag a-wir-galon. ⁴⁷ Meuli a reent Doue, deuet mad e oent d’ar bobl a-bez. Hag an Aotrou a lakee da greski bemdez an niver euz ar re a gave ar zilvidigez.

Eun den ampechet pareet en templ

III ¹ Pêr ha Yann a oa o pignad d’an Templ evid ar bedenn deir eur goude kreizteiz ; ² o tougenn edod di eun den a oa ganet ampechet. Bemdez e veze degaset e-kichenn dor an Templ anvet « Dor gaer » evid goulenn an aluzenn digand an dud a antree en Templ. ³ Pa welas Pèr ha Yann oh antreal en Templ e houlennas diganto an aluzenn. ⁴ Pèr neuze, ha Yann ivez, a zellas a-bann outañ hag a lavaras dezañ : » Sell ouzin. » ⁵ An den a zelle piz outo, war hed euz eun dra bennag euz o ferz. ⁶ Pèr a lavaras dezañ : « N’am-eus nag aour, nag arhant, med ar pez am-eus a roan dit : en ano Jezuz Krist, an Nazarean, sav da vale ! » ⁷ Hag o kregi en e zorn dehou, e lakeas anezañ da zevel ; kerkent e starteas e dreid hag e uverniou, ⁸ En eul lamm e oe en e zav hag e valee. Antreal a reas ganto en Templ en eur vale, en eur lammed hag en eur veuli Doue. ⁹ Ar bobl a-bez a welas anezañ o kerzed hag o veuli Doue. ¹⁰ Anavezet e oa, eñ eo, a-dra-zur, a veze dirag « Dor gaer » an Templ o houlenn an aluzenn ; hag e chome an dud souezet maro ha saouzanet gand kement a oa c’hoarvezet gantañ.

Prezegenn Per

¹¹ An den a zalhe tost da Bèr ha da Yann. Ar bobl a-bez estlammet a ziredas en-dro dezo, er porched anvet « Porched Salomon ». ¹² O weled kement-se e lavaras Pèr d’ar bobl : « Juzevien, perag beza souezet gand kement-se, ha perag selled ouzom-ni, evel ma vefe dre on nerz on-unan, pe dre ar pedennou a reom, eo on-eus lakeet an den-mañ da vale ? ¹³ Doue Abraham, Izaag ha Jakob, Doue on tadou, e-neus karget a hloar e zervicher Jezuz, an hini ho-peus c’hwi droug-roet ha nahet dirag Pilat a oa en e zoñj frankiza anezañ. ¹⁴ C’hwi ho-peus nahet an hini santel ha just ha goulennet evidoh frankiz eur muntrer. ¹⁵ Mestr ar vuez, lakeet ganeoh d’ar maro, Doue e-neus e zavet a-douez ar re varo ; test ez om-ni a gement-se. ¹⁶ Dre ar feiz e Ano Jezuz, an Ano-se e-neus kennerzet an den-mañ a welit hag a anavezit. Hag ar feiz ennañ e-neus pareet mad an den-mañ dirazoh oll.

¹⁷ Mad, breudeur ! Sklêr eo din, heb gouzoud deoh petra reeh eo ho-peus greet kement-se, c’hwi hag ar re a zo en ho penn. ¹⁸ En-a-raog e-noa Doue, dre gomzou an oll brofeded, disklêriet e-nefe ar Mesias da houzañv, Doue e-ñeus kaset kement-se da benn. ¹⁹ Neuze ’ta cheñchit buez ha troit ouz Doue evid ma vo lamet ho pehejou. ²⁰ Evel-se e paro an amzer a beoh roet gand an Aotrou, pa zegaso en-dro ar Hrist prometet, Jezuz, an hini a rank beza degemeret en Neñv, beteg ma vo adsavet an oll draou e-neus Doue komzet anezo dre gomzou ar brofeded santel a-wechall. ²² Da genta, Moizez e-neus lavaret : « An Aotrou a lakaio da zevel evidoh a-douez ho preudeur, eur profed eveldon-me, c’hwi a zelaouo anezañ war gement a lavaro deoh ; ²³ ha kement den ha na zelaouo ket ar profed-se a vo tennet kuit euz a-douez ar bobl ; ²⁴ hag an oll brofeded ivez, azaleg Samuel hag ar re a zo deuet war e lerh, o-deus komzet d’o zro evid rei da anaoud an deveziou a zo warnom bremañ.

²⁵ Chwi eo a zo bugale ar brofeded, hag an Emgleo e-neus Doue greet gand ho tadou. ²⁶ Evidoh-c’hwi da genta eo e-neus Doue savet ha kaset e zervicher evid ho penniga, peb hini ahanoh, ma teuit da drei kein d’hoh oberou fall. »

Per ha Yann dirag ar huzul-meur

IV ¹ Pèr ha Yann a oa c’hoaz o komz d’an dud pa zeuas daveto ar veleien gand gouarnour an Templ hag ar Saduseaned, ² eet skuiz ouz o gweled o kelenn ar bobl hag oh embann diwar gomz Jezuz, adsao ar re varo da veo. ³ Lakaad a rejont kregi enno hag o zeurel er prizon beteg antronoz, rag deuet e oa dija an abardaez. ⁴ Kalz euz ar re o-doa klevet ar Gomz a oa deuet d’ar feiz, war-dro pemp mil a oa anezo.

⁵ Antronoz eta eo e oe greet bodadeg gand ar vistri, ar gozidi hag ar skribed a oa e Jeruzalem. ⁶ Bez’ e oa eno Anna ar beleg braz, Kaifas, Jonatan, Aleksandr hag an oll izili euz familhou ar veleien vraz. ⁷ Urz a rojont da zegas dirazo Pèr ha Yann, hag e rejont goulennou outo : « Gand peseurt galloud, pe en ano piou ho-peus c’hwi greet kement-se ? » ⁸ Karget euz ar Spered Santel e lavaras Pèr dezo : ⁹ « Mistri ar bobl ha c’hwi Kozidi, gourhemenn a reer deom hirio, ablamour d’ar vad on-eus greet d’eun den ampechet, diskleria gand piou eo bet pareet an den-se. ¹⁰ Red eo deoh oll ha da bobl Israel a-bez gouzoud eo en ano Jezuz Krist a Nazared, ho-peus c’hwi staget ouz ar groaz ; med savet eo bet gand Doue a-douez ar re varo ; gras dezañ eo ema dirazoh pare, an den-mañ ; ¹¹ Eñ, ar mên ho-peus c’hwi, ar zaverien tiez, taolet kuit, hag a zo deuet da veza ar mên-korn ; ¹² n’eus a zilvidigez dre hini all ebed, rag n’eus ket kinniget d’an dud dindan bolz an Neñv ano all ebed hag a zeufe drezañ hebken ar zilvidigez. » ¹³ Gweled a reent hardisegez Pèr ha Yann, ha mantret e choment rag ma ouient ez oant euz ar re a heulie Jezuz. ¹⁴ Sellent a reent ouz an den pare a oa en e zav dirazo, ha ne gavent netra da lavared. ¹⁵ Urz a rojont d’o has er-mêz euz ar huzul-meur, hag e klaskent gweled kenetrezo petra da ober. ¹⁶ « Petra a raim d’an dud-se, a lavarent kenetrezo, rag anavezet mad eo ar burzud o-deus greet ; eun dra sklêr eo kement-se evid an oll e Jeruzalem. N’hellom ket henn nah. » ¹⁷ Koulskoude, evid mired na z’afe pelloh ar brud e-touez an dud, gourdrouzom anezo evid ma ne gomzint mui euz an ano-se da zen ebed. »

¹⁸ Lakaad a rejont o degas en-dro hag e oe divennet a-grenn outo komz pe gelenn an ano a Jezuz. ¹⁹ Pèr ha Yann avad a respontas dezo : « Ha just eo dirag Doue ho selaou, c’hwi, pe e zelaou eñ, Doue ? Deoh da lavared… ²⁰ Evidom-ni avad ne hellom ket, a-dra-zur, tevel war ar pez on-eus gwelet ha klevet. » ²¹ Gourdrouzet e oent adarre ha lezet da vond, rag ma n’oa kavet netra da damall dezo, med ablamour d’ar bobl e oa, rag an oll a rente gloar da Zoue evid ar pez a oa c’hoarvezet ; ²² rag an den a oa bet pareet evel-se a oa ouspenn daou ugent vloaz.

²³ Eur wech frankizet ez eas Pèr ha Yann da gavoud o henvreudeur ha da gonta dezo kement o-doa klevet gand ar veleien-vraz hag ar gozidi. ²⁴ Goude beza o zelaouet, oll a-unan e savjont o mouez war-zu Doue evel-henn : « Mestr, te eo az-peus krouet an Neñv hag an douar, ar mor ha kement a zo enno ; ²⁵ Te eo az-peus lakeet, dre ar Spered Santel, ar homzou-mañ war muzellou on tad David, da zervicher : Perag ar bayaned o fuc’ha, perag ar poblou oh irienna disterajou ? ²⁶ En em glevet o-deus rouaned an douar hag en em unanet ar vistri evid mond oll asamblez a-eneb an Aotrou, a-eneb an hini oleoet gantañ. »

²⁷ « Ya, en em vodet o-deus e gwirionez er gêr-mañ, Herodez ha Pons-Pilat gand ar bayaned ha poblou Israel, a-eneb Jezuz da zervicher santel, bet oleoet ganit. ²⁸ Evel-se o-deus kaset da benn kement menoz greet gand da zorn ha da volontez. ²⁹ Ha bremañ, Aotrou, bez war evez ouz o gourdrouzou, ha ro tro d’az servicherien da helloud embann da gomz gand hardisegez, ³⁰ oh astenn da zorn evid ma vo greet pareañsou, sinou ha burzudou dre ano Jezuz, da zervicher santel. » ³¹ Pa oe echu ganto o fedenn, e krenas al leh m’edont ennañ. Oll e oent karget euz ar Spered Santel, ha gand hardisegez eh embannent Komz Doue.

Barnabas, Safera, Ananias

³² An niver braz a dud deuet d’ar feiz n’o-doa nemed eur galon hag eun ene. Den ne zoñje dezañ beza perhenn da dra pe dra euz e vadou. Er hontrol eo, kement tra o-doa a veze lakêt e boutin. ³³ Gand galloud braz e roe an ebestel testeni da adsav an Aotrou Jezuz, ha gwelet mad e oant oll. ³⁴ En o zouez n’oa den ezommeg, rag ar re a oa perhenn a dachennou pe a diez a werze anezo, ³⁵ hag a zegase ar priz e-harz treid an ebestel. Ha peb hini en-deze e lod hervez e ezommou. ³⁶ Evel-se Josef, lesanvet Barnabas gand an ebestel, da lavared eo « mab a frealzidigez », eul levit ginidig euz enez Chipr, e-noa eur park. ³⁷ Gwerza ’reas e bark ha degas ar priz anezañ evid e lakaad e-harz treid an ebestel.

V ¹ Eun den anvet Ananias, a-unan gand e bried Safira, a werzas eun tamm leve. ² Kuzad a reas eul lodenn euz ar priz gand asant e wreg, hag e tegasas al lodenn all da veza lakeet e-harz treid an ebestel. ³ Med lavared a reas Pèr : « Ananias, perag e-neus Satan karget da galon ? Gevier az-peus lavaret d’ar Spered Santel : dalhet az-peus ganit eul lodenn euz priz an dachenn ; ⁴ daoust ha diêz oa dit e zelher heb e werza, pe ma werzfez anezañ, ober ar pez a garfes gand ar priz. Penaos az-peus soñjet en da galon ober an taol-se ? N’eo ket d’an dud eo az-peus lavaret gevier, med da Zoue. » ⁵ Pa glevas kement-se e kouezas Ananias hag e rentas e huanadenn ziweza. Aon braz a grogas e kement hini a gleve kement-se. ⁶ Neuze e teuas an dud yaouank da zebelia ar horv ha da gas anezañ ganto evid e zouara.

⁷ War-dro teir eurvez goude-ze, eh antreas ar wreg heb gouzoud petra a oa c’hoarvezet. ⁸ Pèr he galvas : « Lavar din ha kement-mañ eo ho-peus gwerzet an dachenn ? – Ya, emezi, kement-se eo. » ⁹ Penaoz ’ta, eme Bèr, ez oh en em glevet evid tenti Spered an Aotrou ? Setu m’ema e toull an nor treid ar re a zo bet o touara da bried. Emaint o vond da gas ahanout ganto, te ivez. » ¹⁰ Kerkent e kouezas e-harz treid Pèr hag e rentas he huanadenn ziweza. Pa zeuas tre an dud yaouank e kavjont anezi maro ; he has a rejont ganto evid he douara e-kichenn he fried. ¹¹ Aon braz a grogas neuze en Iliz a-bez, hag e kement hini a gleve petra oa c’hoarvezet.

Burzudou an ebestel

¹² Dre zaouarn an ebestel e c’hoarveze kalz sinou ha burzudou greet e-touez ar bobl. Chom a reent oll unanet dindan porched Salomon. ¹³ Den all ebed ne grede mond ganto ha koulskoude ar bobl a veule anezo. ¹⁴ Muioh mui e kreske an dud o-doa feiz en Aotrou, eur bern gwazed hag ivez merhed. ¹⁵ Dond a rejont da zegas ar re glañv war ar blasennou, d’o lakaad war gweleou pe war gravazou evid ma teufe, pa dremenfe Pèr, e skeudenn da vianna da bara war hini pe hini anezo. ¹⁶ Direded a ree ivez eur bern tud euz ar hêriou tro-war-dro da Jeruzalem, ganto tud klañv pe dud gwallgaset gand droug-sperejou hag oll e kavent ar pare.

An ebestel er prizon ha frankizet

¹⁷ Neuze e savas ar beleg braz hag e oll genseurted, a oa euz kostezenn ar Saduseaned, dirollet e oant gand ar gred. ¹⁸ Urz a rojont da gregi en ebestel, hag, a-wel d’an oll, e taoljont anezo er prizon.

¹⁹ Med e-pad an noz e tigoras êl an Aotrou doriou ar prizon evid o degas er-mêz hag e lavaras dezo : ²⁰ « It, ha chomit en Templ hag eno embannit an oll gomzou a Vuez-se. » ²¹ Senti a rejont outañ, ha kerkent ha goulou-deiz ez-ejont d’an Templ da rei o helennadurez.

Pa zegouezas ar beleg braz hag e genseurted, ar re-mañ a halvas ar Huzul-meur ha sened ar Juzevien a-bez, hag e lakadjont kerhed an ebestel er prizon. ²² Med pa zegouesjont war al leh, ar zervicherien ne gavjont ket anezo er prizon. Pa oent dizroet e rentjont kont evel-henn : ²³ « Kavet on-eus ar prizon prennet kloz, ar gwardou war evez dirag an dorojou, med, p’on-eus digoret, n’on-eus kavet den en diabarz. » ²⁴ Pa glevas ar helou-se, Mestr an templ hag ivez ar veleien vraz a yeas en arvar diwar-benn an ebestel, oh houlenn outo o-unan petra hellfe beza degouezet. ²⁵ Mond a reas neuze unan da gemenn dezo : « An dud ho-poa taolet er prizon, setu m’emaint en templ o kelenn ar bobl. » ²⁶ Mond a reas neuze Mestr an templ hag e zervicherien da gerhed an ebestel, med n’eo ket dre forz koulskoude, gand aon na zeufe ar bobl d’o labeza. ²⁷ Degas a rejont anezo dirag ar Huzul-meur, hag ar beleg braz a lavaras dezo : ²⁸ « Divennet or-boa striz ouzoh, emezañ, kelenn an Ano-se, ha padal ho-peus skignet dre Jeruzalem ar gelennadurez-se, hag e fell deoh lakaad da goueza warnom gwad an den-se ! » ²⁹ Med respont a reas Pèr hag an ebestel : « Red eo senti ouz Doue kentoh eged ouz an dud. ³⁰ Doue on tadou e-neus adsavet a-douez ar re varo Jezuz ho-poa-c’hwi lakeet d’ar maro, o staga anezañ ouz ar hoad. ³¹ Hennez eo e-neus Doue uhelleet dre nerz e zorn dehou da veza rener ha Salver, evid ober da Israêl cheñch buez ha kaoud ar pardon euz ar pehejou ; ³² test om a gement-se, ni hag ar Spered Santel roet gand Doue d’ar re a zent outañ. » ³³ Fuloret o kleved kement-se, e soñjent o lakaad d’ar maro.

³⁴ Neuze e savas er Huzul-meur eur Farizian anvet Gamaliel, doktor war al Lezenn ha den a vrud vad e-touez ar bobl a-bez. Ober a reas kas er-mêz, evid eur pennadig, ar re a oa tamallet ³⁵ hag e tisklerias : « Israelited, taolit evez mad ouz ar pez emaoh o vond da ober d’an dud-se ; ³⁶ Nevez ’zo e savas Teudas, gwaz e oa war e veno, dastumet e-noa en-dro dezañ eur pevar hant den bennag ; eñ, e-unan, a zo bet lazet hag ar re oll a oa eet d’e heul a zo eet a-gleiz hag a-zehou ha n’eus chomet netra war e lerh. ³⁷ Goude-ze e savas Judas ar Galilean da vare an niveredigez hag e sachas eur bern tud de heul. Eñ ivez a zo tremenet hag ar re oll o-doa heuliet anezañ a zo eet peb hini en e roud. ³⁸ Neuze eta, m’henn lavar deoh, na vezit ket mui chalet gand an dud-se, lezit anezo da vond. Ma teu o menoz pe o hefridi a-berz an dud, e vo diskaret ; ³⁹ ma teu a-berz Doue, n’helloh ket o diskar. Diwallit da veza o stourm eneb Doue. » A-du ez ejont gantañ.

⁴⁰ Gelver a rejont a-nevez an ebestel ha goude beza o skourjezet ha kemennet dezo chom heb lavared ano Jezuz, e oent lezet da vond. ⁴¹ An ebestel a oe laouen o kuitaad ar Huzul-meur, da veza bet kavet din da houzañv dismegañsou ablamour d’an Ano. ⁴² Bemdez en templ koulz hag en tiez, ne baouezent da gelenn ha da embann kelou mad Jezuz Krist.

Ar seiz avieler

VI ¹ En deiziou-se e kreske niver an diskibien hag e hrosmole ar Hresianed a-eneb an Hebreed, ablamour ma veze greet nebeutoh a stad ouz o intañvezed er zervich pemdezieg. ² An daouzeg a halvas an diskibien d’eur vodadenn veur hag a lavaras dezo : « N’eo ket deread deom dilezel komz Doue evid servicha ouz taol ; ³ klaskit kentoh en ho touez, breudeur, seiz den brudet mad, leun a Spered Santel hag a furnez, ha ni a fizio enno ar garg-se. ⁴ Ni, diouz on tu, en em ouestlo d’ar bedenn ha da zervich ar brezegèrèz. »

⁵ Kement-se a oe kavet mad gand an oll, hag e oe dibabet Stevan, eun den leun a feiz hag euz ar Spered Santel, Filip, Prokor, Nikanor, Timon, Parmenas, ha Nicolas, eur prozelit euz Antiokia. ⁶ Degaset e oent dirag an ebestel a astennas warno o daouarn en eur bedi. ⁷ Kreski a ree komz Doue ha niveruz kenañ e teue da veza an diskibien e Jeruzalem ; ar veleien, eun niver braz anezo, a zuje d’ar feiz.

⁸ Stevan, leun a hraz hag a halloud, a ree burzudou ha sinou souezuz e-touez an dud. ⁹ War gement-se, tud euz eur zinagog anvet ar « Frankized », gand Sireneaniz hag Aleksandriz, tud euz ar Silisia hag euz an Azia a zeuas da dabutal gand Stevan, ¹⁰ Ha peogwir n’hellent ket stourm ouz ar furnez hag ar spered ¹¹ a oa en e gomzou, e touelljont tud da lavared : « Klevet on-eus anezañ o lavared komzou disakr a-eneb Moizez hag a-eneb Doue. » ¹² Atiza a rejont ar bobl, ar gozidi hag ar skribed ha kregi e Stevan dre laer evid e gas dirag ar Huzul-meur. ¹³ Eno e oe degaset testou faoz : « An den-mañ, emezo, ne ra nemed komz a-eneb d’al Leh santel ha d’al Lezenn. ¹⁴ E gwirionez, e glevet on-eus o lavared e vefe gand ar Jezuz-se, an Nazarean, diskaret al Leh santel, cheñchet al lezennou roet deom gand Moizez. » ¹⁵ Ar re oll a oa er Huzul-meur a zelle piz outañ hag a welas e zremm evel dremm eun êl.

Prezegenn Stevan

VII ¹ Ar beleg-braz a houlennas outañ : « Ha gwir eo kement-se ? » ² Stévan a respontas : « Breudeur ha tadou, selaouit : an Doue a hloar a en em ziskouezas d’on tad Abraham en amzer m’edo e bro Mezopotamia a-raog dond da jom da Haran ; ³ hag e lavaras dezañ : « Dilez da vro ha da famill ha kee d’ar vro a ziskouezin dit ». ⁴ Neuze e kuiteas Abraham bro ar Haldeaned hag e teuas da jom da Haran. Ahano, goude maro e dad, Doue a lakeas anezañ da zond d’ar vro-mañ, el leh m’emaoh-c’hwi o chom bremañ. ⁵ Ne roas herez ebed dezañ er vro-mañ, na zoken an disterra tamm douar ; roet e-noa dezañ ar bromesa e vefe ar vro dezañ ha d’e vugale war e lerh, daoust n’e-noa ket Abraham a vugale ; ⁶ hag e komzas Doue evel-henn : « Tud e lignez a vevo war eun douar estren, lakeet e vezint da sklaved ha gwallgaset e-pad pevar hant vloaz. ⁷ Ar vroad hag he do greet sklaved anezo, me, eme Doue, he barno. Goudeze ez aint kuit hag eh adorint ahanon amañ. ⁸ Emgleo an amdroh a oe roet dezo ; setu perag Abraham, deuet da veza tad da Izaag a amdrohas anezañ d’an eizved devez goude e hanedigez ; Izaag, d’e dro, a reas kemend-all da Jakob, ha Jakob d’an daouzeg tad-meur.

⁹ On tadou-meur, dre warizi outañ, a werzas Josef evid e gas d’an Ejipt. Med Doue a oa gantañ. ¹⁰ E denna a reas euz peb dienez, gras ha furnez a roas dezañ dirag Faraon ; roue an Ejipt a lakeas anezañ da houarnour war an Ejipt ha war e diegez a-bez. ¹¹ Hogen, naonegez a c’hoarvezas dre vro Ejipt a-bez hag e bro Kanaan. Braz e oe an dienez ha n’helle mui on tadou pourvei d’o ezommou ; ne gavent ket a voued. ¹² O veza klevet ez oa ed en Ejipt, Jakob a gasas on tadou di evid eur wech kenta ; ¹³ d’an eilved gwech, Josef a roas da anaoud d’e vreudeur piou e oa, hag e ouenn a oe diskleriet d’ar Faraon. ¹⁴ Josef a lakeas neuze mond da gerhad Jakob, e dad ; hag ar gerentiez a-bez, pemzeg ha tri-ugent a oa anezo. ¹⁵ Diskenn a reas Jakob d’an Ejipt, mervel a reas eno, hag on tadou ivez. ¹⁶ Kaset e oent da Zichem ha lakeet er bez e-noa prenet Abraham gand arhant digand bugale Emmor, tad Sichem.

¹⁷ O veza ma tostee ar mare da zeveni ar bromesa touet gand Doue da Abraham, ez eas muioh-mui war gresk ar bobl, en Ejipt. ¹⁸ Beteg ma teuas en Ejipt eur roue all ha n’e-noa ket anavezet Josef. ¹⁹ Dre drubardèrèz ar roue-se a glaskas trabas ouz tud or gouenn. Kement e-noa troet e venoz ouz on tadou ma’z eas beteg ober dezo lakaad er-mêz ar vugale nevez ganet evid mired outo da jom beo. ²⁰ D’ar mare-se eo e oe ganet Moizez, koant e oa dirag Doue. E-pad tri miz e oe savet e ti e dad. ²¹ Ha pa oe dilezet er-mêz, merh Faraon a gemeras anezañ en he zi evel ma vije bet mab dezi. ²² Desket e oe da Voizez oll skianchou an Ejipsianed. Gallouduz e oa en e gomzou hag en e oberou.

²³ Pa oe deuet d’e zaou ugent vloaz echu, e savas c’hoant gantañ da vond da weled e vreudeur, an Israelited. ²⁴ Hag o weled unan anezo gwallgaset, ez eas d’e zivenn, hag evid veñji e vreur gwallgaset e skoas gand an Ejipsiad. ²⁵ Soñjal a ree dezañ rei da intent d’e vreudeur eo dre e zorn eo e teue Doue da zavetei anezo ; med ne gomprenjont ket. ²⁶ Antronoz e oe gwelet o klask lakaad ar peoh etre tud a oa oh en em ganna : « Mignoned, emezañ dezo, c’hwi a zo breudeur, perag ober droug an eil d’egile ? » ²⁷ Med an hini a wallgase e vreur a zistokas Moizez evel-henn : « Piou e-neus da lakeed da vestr ha da varner warnom ? ²⁸ C’hoant az-peus d’am laza evel m’az-peus lazet deh an Ejipsiad ? » ²⁹ War gement-se e tehas Moizez kuit, d’en em denna d’eur vro estren, e bro Vadian hag eno e oe ganet dezañ daou vab.

³⁰ Daou ugent vloaz goudeze e paras eun êl dirazañ e flamm eur vodenn entanet, e goueleh ar menez Sinai. ³¹ Moizez, souezet o weled kement-se a glaskas tostaad da zelled. An Aotrou a roas da gleved e vouez : ³² « Doue da dadou on-me, Doue Abraham, Izaag ha Jakob. » Krena ree Moizez euz e oll izili, ken na grede mui selled. ³³ Neuze e lavar dezañ an Aotrou : « Tenn da zandalennou euz da dreid, douar santel eo al leh m’emaout ; ³⁴ ya, gwelet mad am-eus reuz va fobl en Ejipt, klevet am-eus o hlemm. Diskennet on evid he frankiza. Ha bremañ deus, ma kasin ahanout d’an Ejipt. »

³⁵ Moizez, eñ, an hini o-doa distaolet dre ar homzou-mañ : piou e-neus da lakeet da vestr ha da varner ? Eñ, end-eeun eo a oe kaset gand Doue evid beza o mestr hag o frankiza dre zikour an êl a baras dirazañ er vodenn. ³⁶ Eñ eo e-noa greet dezo kuitaad an Ejipt dre ar burzudou ha sinou greet e bro Ejipt, er mor ruz hag er goueleh e-pad daou ugent vloaz. ³⁷ Eñ, Moizez, eo e-neus lavaret d’an Israelited : « Doue a lakaio da zevel evidoh euz a-douez ho preudeur eur profed eveldon-me ; ³⁸ eñ a oa e-doug ar vodadenn er goueleh gand ho tadou hag an êl a gomze outañ war ar menez Sinai. Eñ eo a resevas komzou a vuez evid o rei deom. ³⁹ On tadou avad ne falvezas ket dezo senti outañ, e gas a rejont diwar o zro ha dre o spered e tistrojont d’an Ejipt, ⁴⁰ rag lavared a rejont da Aaron : « Gra deom doueou da vale en or penn, rag Moizez, eñ hag e-neus greet deom kuitaad an Ejipt, n’ouzom ket petra eo deuet da veza. » ⁴¹ Ober a rejont eul leue, en deiziou-se, ha kinnig eur zakrifis d’ar fals-doueou-se, hag e oe greet laouen gouel braz en enor da oberenn o daouarn. ⁴² Neuze Doue, d’e dro, o lezas d’en em rei da azeuli strollad an Neñvou, evel m’eo skrivet e levr ar brofeded : daoust ha kinniget ho-peus din anevaled e-pad daou ugent vloaz er goueleh ? Douget ho-peus teltennou Molok ha steredenn ho Toue Refan, skeudennou greet ganeoh evid o azeuli. Setu perag me ho harluo en tu all da Vabilon. ⁴⁴ On tadou, er goueleh, o-doa teltenn an test : an hini a gomze ouz Moizez e-noa gourhemennet sevel anezi diwar skouer an Hini e-noa gwelet.

⁴⁵ Goude beza resevet anezi, on tadou, renet gand Jozue, he degasas er vro gounezet war ar bayaned kaset kuit gand Doue en e raog hag e chomas eno beteg amzer David. ⁴⁶ Hemañ a blijas da Zoue hag a glaskas kaoud eun demeurañs da Zoue Jakob. ⁴⁷ Med Salomon eo a zavas eun ti dezañ. ⁴⁸ Ha koulskoude ne vez ket an « Uhel-Meurbed » o chom e tiez savet gand an dud. Evel a lavar ar profed : 49 « An Neñv a zo va zron din, hag an douar eur skabell dindan va zreid. Peseurt ti emaoh o vond da zevel din, eme an Aotrou, hag e peleh e hellin diskuiza ? ⁵⁰ Daoust ha n’eo ket va dorn eo e-neus krouet peb tra ? » ⁵¹ Pennou kalet, diamdroh a galon hag a skouarn, dalhmad oh enebi ouz ar Spered Santel. Par d’ho tadou oh, c’hwi ivez. »

⁵² Pehini euz ar brofeded n’eo ket bet gwallgaset gand ho tadou ? Lazet o-deus zoken ar re a roe da anaoud en a-raog donedigez an Hini Just, an hini, end-eeun, oh bet trubard ha muntrer en e geñver. ⁵³ C’hwi hag a zo bet embannet deoh al Lezenn dre urz an Elez, n’ho-peus ket heuliet anezi.

Stevan labezet

⁵⁴ O kleved kement-se, e skrije o halonou hag o dent a skrigne a-eneb Stevan ; ⁵⁵ med eñ, karget euz ar Spered Santel, o trei e zaoulagad war-zu an Neñv, a welas gloar Doue ha Jezuz en e zav en tu dehou da Zoue. ⁵⁶ « Setu, emezañ ma welan digor an Neñvou, ha Mab an den en e zav en tu dehou da Zoue. » 57 Youhal a-bouez-penn a rejont en eur stouva o diskouarn, hag e sailljont warnañ oll asamblez. ⁵⁸ Sacha a rejont anezañ er-mêz euz kêr ha staga d’e labeza. An testou o-doa lakeet o dillad e-harz treid eur pôtr yaouank anvet Saul. ⁵⁹ E-pad m’edont ouz e labeza e ree Stevan ar bedenn-mañ : « Aotrou Jezuz, digemer va spered. » ⁶⁰ Neuze e plegas e zaoulin hag e youhas forz : « Aotrou, na damall ket dezo er pehed-mañ. » Ha neuze e kouskas er maro.

VIII ¹ Paol, eñ, a oe a-du ganto evid e laza.

Ar gristenien heskinet

En deiz-se, end-eeun, e tarzas a-eneb Iliz Jeruzalem eur gwall heskinèrèz. An oll, nemed an ebestel, en em strewas e mêziou bro Judea ha bro Samaria. ² Tud devod a zebelias Stevan hag a reas kañv braz dezañ. ³ Saul, eñ avad, a zraste an Iliz. Mond a ree en tiez ha sacha er-mêz gwazed ha merhed evid o zeurel er prizon. ⁴ Ar re eta a oa en em dennet kuit a yeas amañ hag ahont en eur embann kelou mad ar Gomz.

Komz Doue e Bro Samaria

⁵ Hag evel-se Filip, diskennet en eur gêr euz bro Samaria, a embanne eno ar Hrist. ⁶ Eur bobl tud, oll a-unan, a grede ar pez a lavare Filip, pa glevent anezañ o komz ha pa welent anezañ oh ober burzudou. ⁷ Kalz a sperejou hudur, en eur youhal forz, a dehe kuit euz an dud a oa en o dalh, ha kalz a dud seizet pe ampechet a gavas ar pare. ⁸ Braz e oe al levenez er gêr-se. ⁹ Hogen, Bez’ e oa dija e kêr eun den anvet Simon, strobineller euz e vicher. Touella a ree pobl Samaria. Den e oa, war e veno, ¹⁰ hag oll, bian ha braz, a fizie ennañ : « An den, emezo, a zo galloud Doue, an hini a anver braz. ». ¹¹ Ma kendalhent evel-se da fizioud ennañ eo en abeg ma vezent pell a oa touellet gand e strobinellou. ¹² Med pa oent deuet da gredi e Filip a roe dezo da anaoud ar Helou-mad euz Rouantélez Doue hag euz ano Jezuz, e resevjont ar vadeziant, gwazed ha merhed. ¹³ Simon, end-eeun, a zeuas ive da gredi, badezet e oe hag e talhe tost da Filip, ken estlammet e oa gand ar sinou hag ar burzudou a wele ober.

¹⁴ An ebestel chomet e Jeruzalem, o veza klevet he-doa ivez bro Samaria degemeret Komz Doue, a gasas dezo Pèr ha Yann. ¹⁵ Pa oent diskennet eno, ar re-mañ a bedas evid ar Samaritaned, evid ma resevfent ar Spered Santel, ¹⁶ rag n’oa ket kouezet ar Spered Santel war hini ebed anezo. N’o-doa resevet nemed ar vadeziant en ano Jezuz. ¹⁷ Astenn a reas eta Pèr ha Yann o dorn warno hag e reseve ar Samaritaned ar Spered Santel.

¹⁸ Simon avad, pa welas an ebestel o rei ar Spered Santel oh astenn o daouarn, a ginnigas dezo arhant : ¹⁹ « Roit ’ta din, emezañ dezo, din-me ivez, ar halloud-se evid ma resevo ar Spered Santel ar re oll a astennin va daouarn warno. » ²⁰ « Ra ’z ay da arhant da fall, eme Bèr dezañ, ha te da heul, evid beza soñjet dit e hellfed prena gand arhant donezon Doue. » ²¹ N’eus na lod, nag hêrez evidout e kement a dremen amañ, rag n’eo ket eeun da galon dirag Doue. ²² Bez keuz eta d’az fallagriez ha ped an Aotrou, ha marteze e vo pardonet dit ar zoñj a zo savet en da galon. ²³ Rag gweled a ran ez out c’hwero-bestl ha liammet er fallagriez. » ²⁴ « Pedit, c’hwi hoh-unan evidon, eme Simon, ma ne zegouezo ket ganin, netra euz ar pez ho-peus lavaret. »

²⁵ Ha neuze e tistroas Pèr ha Yann da Jeruzalem, roet ganto testeni, hag ivez roet da anaoud komz an Aotrou, en eur embann ar Helou mad da veur a gêriadenn euz bro Samaria.

Filip hag ar spazard etiopiad

²⁶ Eun êl d’an Aotrou a lavaras da Filip : « Sav ha kerz war-zu ar hreisteiz, dre an hent a ziskenn euz Jerusalem da vro Gaza ; n’euz den warnañ. ²⁷ Ha kerkent ez eas Filip en hent ; ha setu m’edo o tond eur spazard Etiopiad, den a renk uhel euz tud Kandas, rouanez an Etiopia, merour-meur war he zeñzor. E perhirina oa bet e Jeruzalem ; ²⁸ hag e tistroe d’ar gêr ; azezet en e garr, edo o lenn ar profed Izaiaz. ²⁹ « Tosta, eme ar Spered da Filip, da dizoud ar harr-se. » ³⁰ Filip a redas beteg ar harr ; kleved a reas ar spazard o lenn ar profed Izaiaz, hag e lavaras dezañ : « Ha kompren mad a rez ar pez a lennez ? » ³¹ « Ha penaoz e rafen, ma n’eus den d’am sklerijenna ? » Hag e pedas Filip da azeza en e gichenn. ³² O lenn edo ar pennad-mañ euz ar Skritur-zakr : « Heñvel ouz eun dañvad kaset da veza lazet ; heñvel ouz eun oan mud dirag an hini a zo ouz e douza, evel-se ivez ne zigor ket e henou. ³³ Dre an izel ma oa, eo bet nahet outañ peb justis. E lignez, piou a gonto anezi ? Rag dilamet eo bet e vuez diwar an douar. »

³⁴ Lavaret a reas ar spazard da Filip : « Mar plij, euz piou e komz evel-se ar profed ? Diwar-benn eñ e-unan, pe diwar-benn unan all bennag ? » ³⁵ Filip a gomzas, ha diwar al lennadenn-se e roas dezañ da anaoud kelou mad Jezuz.

³⁶ O vond gand an hent e tegouezjont war eur poull dour. « Sell, eme ar spazard, amañ ez eus dour ; petra virfe ouzin da veza badezet ? » (³⁷) ³⁸ Urz a roas da jom a-zav gand ar harr ; o-daou e tiskennjont en dour, Filip hag ar spazard, ha Filip a vadezas anezañ, ³⁹ Pa oent deuet er-mêz euz an dour, Filip a oe tennet kuit gand Spered an Aotrou hag ar spazard ne welas mui anezañ, med kendelher a reas laouen gand e hent. ⁴⁰ Filip, avad, en em gavas e Azot, hag ahano, en eur embann ar Helou mad dre gement kêr ma ’z ee, e tegouezas e Sezarea.

Saul galvet gand Doue

IX ¹ Saul, ha ne zoñje dalhmad nemed e gourdrouz ha lazèrèz e-keñver diskibien an Aotrou, ² a yeas da houlenn digand ar beleg braz liziri evid ar sinagogou e Damas.

³ Hag o veza m’edo o vond gand e hent, e tostee ouz Damas ; en eun taol, e skedas en-dro dezañ eur sklerijenn deuet euz an Neñv. ⁴ Koueza a reas d’an douar hag e klevas eur vouez o lavared dezañ : « Saul, Saul, perag va heskina ? ». ⁵ « Piou out-te, Aotrou, emezañ ? » – « Jezuz on, an hini a heskinez, ⁶ med, sav en da zav, kee e kêr, hag e vo lavaret dit petra da ober. » ⁷ Ar wazed a ree hent gantañ a oa chomet a-zav, dilavar gand ar spont. Klevet a reent ar vouez, med ne welent den ebed. ⁸ Saul a zavas en e zav diwar an douar ; daoust ma oa digor braz e zaoulagad, ne wele mui netra ebed, hag e oe red rei an dorn dezañ evid antreal e Damas. ⁹ E-pad tri devez e chomas dall, heb eva na debri tamm.

¹⁰ Bez’ ez oa e Damas eun diskibl anvet Ananias. Doue, dre eur weledigez a halvas anezañ : « Ananias ! » – « Setu me, Aotrou, emezañ. » ¹¹ Hag an Aotrou adarre : « Sav ha kerz, emezañ, d’ar ru anvet « Ru eeun » hag e ti Judas, goulenn war-lerh eun den euz Tarz ¹² anvet Saul, rag o pedi ema hag o paouez gweled eun den anvet Ananias o tond davetañ hag oh astenn e zaouarn evid renta dezañ ar gweled. » ¹³ « Aotrou, eme Ananias, klevet am-eus kalz tud o komz diwar-benn an den-se hag o lavared pegement a zroug e-neus greet d’az sent e Jeruzalem, ¹⁴ hag amañ e-neus peb galloud a-berz ar veleien vraz evid chadenna kement hini a en em erbed ouzit. » ¹⁵ « Kee, eme dezañ an Aotrou, rag an den-se a zo eur beñveg dibabet ganin evid kas va hano dirag ar bayaned, ar rouaned ha bugale Israel, ¹⁶ rag me va-unan a ziskouezo dezañ kement e-no da houzañv en abeg d’am ano. » ¹⁷ Ananias a yeas, antreal a reas en ti hag astenn e zaouarn warnañ : « Saul, va breur, emezañ, an Aotrou eo am degas. – Jezuz, eñ, an hini e-noa en em ziskouezet dit war an hent edos o tond gantañ, – evid ma kavi a-nevez ar gweled ha ma vezi karget euz ar Spered Santel. » ¹⁸ Evel kohennou a gouezas raktal euz e zaoulagad hag a-nevez e teuas dezañ ar gweled. Reseo a reas ar vadeziant. ¹⁹ Hag o veza debret, e teuas nerz dezañ.

Prezegerez Saul e Damas

Tremen a reas eur pennad amzer gand diskibien euz Damas. ²⁰ Heb dale muioh, eh embannas er zinagogou eo Jezuz Mab Doue. ²¹ Souezet e chome ar re oll a gleve anezañ ha lavared a reent : « Ha n’eo ket eñ eo a oa en e wasa, e Jeruzalem, a-eneb ar re a bede an ano-se ? Daoust ha n’oa ket deuet amañ netra nemed evid o has chadennet dirag ar veleien vraz ? ²² Med kreski a ree muioh-mui levezon Saul ha lakaad a ree ar Juzevien da devel e Damas, pa ziskoueze sklêr oa Jezuz ar Mesias. ²³ Goude eur pennad mad a amzer eo e teuas ar Juzevien d’en em gleved, evid e lakaad d’ar maro. ²⁴ Saul avad a glevas ano a gement-se. Mond a reent beteg diwall doriou kêr, noz-deiz, evid kaoud tro d’e laza. ²⁵ Med eun nozvez, e ziskibien a gemeras anezañ hag e ziskennas en eur baner a-hed mogeriou kêr.

Saul e Jeruzalem

²⁶ Pa oe erruet e Jeruzalem, Saul a glaske darempredi an diskibien ; med aon o-doa oll razañ, rag n’hellent ket dond da gredi e oa eñ eun diskibl. ²⁷ Neuze Barnabas a gemeras anezañ gantañ, hag e gasas da gavoud an ebestel ; displega ’reas dezo e-noa, war an hent, gwelet an Aotrou, e-noa hemañ komzet outañ, e-noa e Damas prezeget gand hardisegez en ano Jezuz. ²⁸ Azaleg neuze, Paol a zaremprede anezo, ha ganto e kerze dre gêr Jeruzalem. Hardiz e prezege dirag an oll, en ano an Aotrou. ²⁹ Divizoud a ree ivez gand Juzevien hag a gomze Gresianeg ha tabutal ganto, med ar re-mañ a glaske e lakaad d’ar maro. ³⁰ Ar vreudeur, o veza klevet kement-se, a ambrougas anezañ beteg Sezarea hag ahano a lakeas anezañ da vond da Darz. ³¹ An Iliz, dre ar Judea, ar Halilea ha bro Samaria a-bez, a oa eta e peoh ; kreski ha kerzed a ree muioh-mui en doujañs euz a Zoue, gand sikour ar Spered Santel.

Pareans eneaz

³² Pèr hag a veze dalhmad o vond hag o tond, a ziskennas ive e-touez ar zent e Lidda. ³³ Kavoud a reas eno eun den anvet Eneas astennet war eur hravas abaoe eiz vloaz ; seizet e oa. ³⁴ « Eneas, a lavaras Pèr dezañ, Jezuz Krist a ro dit ar pare ; sav ha gra da unan da wele. » ; ha kerkent e savas. ³⁵ O veza gwelet anezañ, ar re oll a oa o chom e Lidda hag e plenenn Saron a droas gand an Aotrou. ³⁶ Bez’ e oa e-touez diskibien Joppe, eur vaouez anvet Tabita (Dorkas e Gresianeg) da lavared eo heizezig ; kalz oberou mad a ree ha mad oa da ober an aluzenn. ³⁷ Ha setu ma kouezas klañv d’ar mare-se hag e varvas. Gwalhet e oe dezi e horv ha savet d’ar gambr-uhel. ³⁸ Hag o veza ma n’edo ket Lidda pell diouz Joppe, an diskibien, klevet ganto edo Pèr e Lidda, a gasas dezañ daou zen da lavared dezañ : « Deus beteg ennom dizale. » ³⁹ Kerkent ez eas Pèr ganto. Pa oe degouezet e oe greet dezañ sevel d’ar gambr uhel ; an oll intañvezed a oa eno o leñva. Diskouez a rejont an dillad, ar mantilli greet gand Dorkas pa oa beo. ⁴⁰ Ober a reas Pèr dezo oll mond er-mêz ; hag eet war e zaoulin e pedas, ha goudeze, troet war-zu ar horv e lavaras : « Tabita, sav ! » Digeri a reas he daoulagad hag o weled Pèr e savas war he hoazez. ⁴¹ Astenn a reas dezi e zorn evid he zikour da zevel ; gelver a reas ar zent hag an intañvezed hag e rentas anezi dezo beo. ⁴² Ar brud a gement-se a redas dre Joppe a-bez ha kalz a dud a gredas e Doue. ⁴³ Chom a reas Pèr eur pennad brao e Joppe e ti eun den anvet Simon, kivijer a vicher.

Korneli e Sezarea

X ¹ Bez’ e oa e Sezarea eun den anvet Korneli, kantener en eur gohortenn greet an « Italian » anezi ; ² eun den devod e oa, leun a zoujañs da Zoue, eñ hag e diegez a-bez ; brokuz e veze e keñver ar Juzevien hag aketuz dalhmad da bedi Doue. ³ Eun deiz, war-dro teir eur goude kreizteiz, e welas sklêr eun êl da Zoue o tond en e di, hag an êl a lavaras dezañ : « Korneli ! » ⁴ Kroget ar spont ennañ, e zaoulagad o para war an êl, e respontas Korneli : « Petra ’zo, Aotrou ? » « Da bedennou ha da vadoberou a zo pignet beteg Doue evid m’e-no eñ, koun ahanout ; ⁵ ha bremañ, kas tud da Joppe, da gerhad eun den anvet Simon, ha lesanvet Pèr ; ⁶ o chom ema e ti eur Simon all, kivijer a vicher, a zo e di war ribl ar mor. » ⁷ Kerkent ha ma oe eet kuit an êl e-noa komzet outañ, Korneli a halvas daou euz e zervicherien hag unan euz e zoudarded, den devod anezañ, abaoe pell a oa dindannañ. ⁸ Konta ’reas dezo kement a oa c’hoarvezet, hag e kasas anezo da Joppe.

⁹ Antronoz, endra m’edont-i en hent ha ma tosteent ouz kêr, war-dro ar hreizteiz, Pèr a oa pignet war leur-doenn an ti da bedi. ¹⁰ Med naon a zeuas dezañ, ha c’hoant da zebri. O pourchas eur pred edod dezañ, pa zegouezas gantañ beza gourzavet. ¹¹ Gweled a ra an Neñv digor, hag eun dra, heñvel ouz eul lienenn vraz, o tiskenn war an douar, a-zistribill ouz he fevar horn, ¹² enni an oll loened pevarzroadeg, hag ar re a stlej war an douar hag ar re a nij en oabl ; ¹³ hag e lavaras eur vouez dezañ : « Alo, Pèr, laz ha debr. » ¹⁴ « Biken, Aotrou, eme Bèr, morse e-doug va buez n’am-eus debret netra hag a ve loudour pe zihlan. » ¹⁵ Med a-nevez, evid an eilved gwech, ar vouez a gomzas dezañ : « Ar pez, emezi, e-neus Doue glanneet, ne da ket, te, da lavared e ve dihlan. » ¹⁶ Teir gwech e c’hoarvezas kement-se, ha raktal e oe savet al lienenn d’an Neñv.

¹⁷ N’oa ket deuet c’hoaz Pèr da intent petra oa ar weledigez e-noa bet, pa zegouezas dirag ar porz-rastell ar re e-noa kaset Korneli. Bet e oant amañ hag ahont o houlenn e pe leh edo Simon o chom. ¹⁸ Staga ’rejont da grial evid gouzoud mad ha Simon, lesanvet Pèr a oa o chom en ti-ze. ¹⁹ Pèr a jome chalet gand ar pez e-noa gwelet. Med ar Spered a lavaras dezañ : « Tri den a zo aze ouz da glask. ; ²⁰ diskenn dioustu, ha kerz en hent ganto, heb nehamant, rag me eo a zegas anezo. » ²¹ Diskenn a reas Pèr da gavoud an dud-se. « Setu, emezañ, me eo an hini a glaskit, da ober petra oh deuet ? » ²² Respont a rejont : « Ar hantener Korneli, eun den just ha leun a zoujañs ouz Doue, den a vrud vad e-touez an oll Juzevien, eun êl santel e-neus lavaret dezañ lakaad ahanout da zond d’e di, evid selaou ar pez az-peus da lavared. » ²³ Neuze Pèr a roas digor dezo ha lojeiz evid an noz.

²⁴ Antronoz, end-eeun, ez eas en hent ganto, ambrouget gand hiniennou euz ar vreudeur a oa e Joppe. ²⁵ D’an eil antronoz e tegouezas e Sezarea. Korneli, diouz e du, a oa ouz o gortoz. Pedet e-noa da zond e gerentiez hag e wella mignoned. Pa zegouezas Pèr, ez eas Komeli en arbenn dezañ, gand doujañs ez eas d’an daoulin dirazañ evid e azeuli. ²⁶ « Sav en da zav », eme Bèr dezañ, hag e sikouras anezañ da zevel, « me kennebeud n’on nemed eun den. » ²⁷ Hag en eur gomz gantañ eh antreas ; o weled neuze an niver braz a dud a oa, ²⁸ e lavaras : « Gouzoud mad a rit eo eun torfed evid eur Juzeo darempredi eun den estren, ha pa ne ve nemed eur pennadig. Med din-me e-neus roet Doue da intent ne dleer ket diskleria den pe zen loudour pe zihlan. ²⁹ Setu perag on deuet amañ dineh, p’ho-peus va galvet da zond. Med bremañ e karfen gouzoud perag ho-peus lavaret din dond. » ³⁰ Respont a reas Korneli : « Tri devez a zo, d’ar mare-mañ end-eeun, da deir eur goude kreisteiz, me a oa er gêr o pedi, ha setu dirazon, en e zav, eun den gwisket gwenn-kann ; ³¹ hag e-neus lavaret din : Selaouet eo bet da bedenn, Korneli, ha da aluzennou a zo ar zoñj anezo dirag Doue ; ³² kas eta unan bennag da Joppe evid pedi Simon lesanvet Pèr da zond amañ ; o chom emañ war ribl ar mor e ti Simon ar hivijer. ³³ Kerkent am-eus lakeet mond da gerhad ahanout hag ez-peus bet ar vadelez da zond. Bremañ eta ni a zo oll amañ dirazout evid selaou ar pez e-neus kemennet dit an Aotrou lavared deom. »

³⁴ Neuze e stagas Pèr da gaozeal hag e lavaras : « e gwirionez, gweled a ran ne ra ket Doue gwelloh da lod eged da lod all, ³⁵ e kement pobl a zo, an neb a zouj dezañ hag a heuill ar justis a zeu mad dezañ. ³⁶ E Gomz e-neus kaset da dud Israel, kelou mad ar peoh deuet dre Jezuz Krist, eñ hag a zo Aotrou war an oll dud. ³⁷ Gouzoud a rit petra c’hoarvezas dre vro Judea a-bez, war-lerh bro Halilea, el leh m’edo d’ar penn kenta goude ar vadeziant prezeget gand Yann ; ³⁸ Jezuz, eñ, ginidig euz Nazared, c’hwi a oar e-neus Doue e zakret dre ar Spered Santel ha roet dezañ galloud. Tremenet e-neus en eur ober vad e peb leh hag o rei ar pare d’ar re oll a oa gwasket gand an droug-spered, rag Doue a oa gantañ. ³⁹ Ni ’zo test euz kement e-neus greet e bro ar Juzevien hag e Jeruzalem ; eñ, an hini o-deus lazet, o staga anezañ ouz ar hoad, ⁴⁰ Doue e-neus e zavet da veo d’an trede deiz, ha roet dezañ ar hras d’en em ziskouez, ⁴¹ n’eo ket d’ar bobl a-bez, med da destou bet dibabet en a-raog gand Doue : deom-ni hag on-eus debret hag evet asamblez gantañ, goude m’oa bet savet a-douez ar re varo. ⁴² Gourhemennet e-neus deom beza test hag embann kement-mañ : eñ eo e-neus Doue lakeet da varner war ar re veo hag ar re varo ; ⁴³ dezañ eo e ro an oll brofeded an testeni-mañ : dre e ano e reseo ar pardon euz e behejou kement hini a laka e feiz ennañ. » ⁴⁴ Pèr a oa c’hoaz o tisplega kement a oa bet c’hoarvezet pa gouezaz ar Spered Santel war ar re oll o-doa selaouet ar Gomz.

⁴⁵ Sebezet e chomas an dud amdrohet a oa deuet da heul Pèr. Evel-se eta, beteg ar bayaned a ziskenne warno bremañ ar Spered Santel. ⁴⁶ Klevet a reent an dud-se o komz e yezou all hag o kanveuli brazder an Aotrou Doue. Pèr a gemeras adarre ar gomz : ⁴⁷ « Daoust ha piou a hellfe mired na ve badezet en dour, ar re-mañ hag o-deus resevet ar Spered Santel eveldom-ni ? » ⁴⁸ Urz a roas d’o badezi en ano Jezuz Krist ; hag int-i neuze a houlennas digantañ chom c’hoaz eun nebeudig deveziou.

Per e Jeruzalem

XI ¹ An ebestel hag ar vreudeur a oa o chom e bro Judea a glevas lavared o-doa ar bayaned resevet d’o zro Komz Doue. ² Pa bignas Pèr da Jeruzalem e savas tabut etre an dud amdrohet hag eñ. ³ « Eet out, emezo, e ti tud diamdrohet ha ganto az-peus debret. » ³ Neuze Pèr a stagas adarre da gonta dezo an traou penn-da-benn : ⁵ « Me a oa e kêr Joppe o pedi, hag am-eus bet eur weledigez : evel eul lienenn vraz a-zistribill ouz he fevar horn o tiskenn euz an Neñv beteg ennon. ⁶ O para warni va daoulagad evid gweled petra oa, am-eus gwelet chatal pevarzroadeg, chatal gouez, ar re a stlej hag ar re a nij en oabl, ⁷ hag am-eus klevet eur vouez o lavared din : Alo, Pèr, laz ha debr. » ⁸ « Biken, Aotrou, emezon, morse em buez netra loudour pe zihlan n’eo bet eet em genou. » ⁹ Eur wech muioh, euz an Neñv, e lavaras ar vouez : « Ar pez e-neus Doue glanneet, ne da ket, te, da lavared eo dihlañ. » ¹⁰ Teir gwech e tegouezas kement-se, hag e oe savet peb tra a-nevez d’an Neñv.

¹¹ D’an ampoent, setu ma tegouezas tri den en ti ma edon, degaset davedon euz Sezarea. ¹² Lavared a reas ar Spered din mond ganto heb nehi. Ar c’hweh breur-mañ a zeuas d’am heul hag ez om antreet e ti an den-se. ¹³ Konta ’reas deom penaoz e-noa gwelet an êl o tond en e di da lavared dezañ : « Kas unan bennag da Joppe da gerhad Simon, lesanvet Pèr ; ¹⁴ eñ a lavaro dit ar homzou a zegaso ar zilvidigez dit ha da oll dud da diegez.

¹⁵ A-veh m’am-boa kemeret ar gaoz ma kouezas warno ar Spered Santel evel m’e-noa greet warnom-ni ivez er penn kenta. ¹⁶ Neuze e teuas din da zoñj ar pez e-noa lavaret an Aotrou : « Yann, emezañ, a vadezas en dour, med c’hwi a vo badezet er Spered Santel. » ¹⁷ Ha m’e-noa greet Doue dezo kenkoulz ha deom-ni, evid beza kredet en Aotrou Jezuz Krist, piou oan-me da helloud enebi ouz Doue ? » ¹⁸ War gement-se e siouleas ar re a oa o selaou hag e rentjont gloar da Zoue. « Setu, emezo, m’e-neus Doue greet d’ar bayaned cheñch buez evid kaoud ar vuez. »

¹⁹ Ar re a oa bet strewet, goude ar freuz savet diwar-benn Stevan, a oa eet beteg ar Fenisia, Chipr hag Antiokia, heb prezeg ar Gomz da zen ebed nemed d’ar Juzevien. ²⁰ Lod anezo koulskoude, ginidig euz Chipr pe Ziren, en em gavet e Antiokia, a brezegas d’ar Hresianed ivez Kelou mad Jezuz an Aotrou. ²¹ Skoazellet e oant gand dorn an Aotrou, hag eun niver braz a dud a zeuas da gredi ha da drei a-du gand an Aotrou.

²² Ano a gement-se a zeuas beteg Iliz Jeruzalem hag e oe kaset Barnabas da Antiokia. ²³ Pa zegouezas eno ha pa welas war al leh, al labour a ree gras Doue, e oe laouen hag e poanias warno da jom, a greiz kalon, fidel d’an Aotrou ; ²⁴ rag eñ e-unan a oa eun den leal, karget euz ar Spered Santel ha leun a feiz. Eun niver braz a dud a zeuas evel-se da gredi en Aotrou. ²⁵ Mond a reas Barnabas goudeze da Dars da glask Saul. ²⁶ E gavoud a reas hag e zegas da Antiokia. Chom a rejont eno da labourad asamblez e-pad bloaz penn-da-benn, ha da gelenn eun niver braz a dud. E kêr Antiokia eo e oe roet evid ar wech kenta an ano a « Gristen » d’an diskibien.

²⁷ D’ar mare-se e teuas profeded euz Jeruzalem da Antiokia. ²⁸ Unan anezo, anvet Agabus, sklerijennet gand ar Spered Santel, a roas da anaoud e tirollfe heb dale war ar bed eun naonegez vraz, ar pez a c’hoarvezas da amzer Glaoda. ²⁹ An diskibien a zivizas neuze kas eur zikour, peb hini hervez ar pez e-noa, d’ar vreudeur a oa o chom e bro Judea. ³ Greet e oa kement-se ; ar zikour a oe kaset, dre zaouarn Barnabas ha Saul, d’ar gozidi.

Heskinerez a-berz Herodez

XII ¹ En amzer-se e teuas Herodez da heskina hiniennou euz an Iliz. ² Lakaad a reas dibenna Jakez, breur Yann. ³ O weled e plije an dra-ze d’ar Juzevien, e lakeas kregi ivez e Pèr. Kement-se a zegouezas e deiziou ar bara-dihoell. ⁴ Lakaad a reas kregi ennañ, e daoler er prizon, ha pevar rummad, a bevar zoudard peb hini, a oe lakeet d’o ziwall. En e zoñj edo degas anezañ dirag ar bobl goude goueliou Pask. ⁵ Pèr a oa eta er prizon. Med an Iliz ne ehane ket da bedi Doue evitañ.

⁶ En noz a-raog ma tlee Herodez e zegas dirag ar bobl, Pèr, staget gand diou chadenn, a oa kousket etre daou zoudard ha gwardou a oa dirag an nor o tiwall ar prizon. ⁷ Ha setu, en eun taol, eh erruas êl an Aotrou hag e oe an toullbah karget a sklerijenn. An êl, o skei Pèr en e gostez, a zihunas anezañ en eur lavared : « Sav buan ! » Hag e kouezas ar chadennou euz e zaouarn. ⁸ « Lak da houriz ha da zandalennou », eme adarre an êl ; ar pez a reas. « Gwisk da vantell, emezañ, ha deus ganin ». ⁹ Pèr a yeas er-mêz d’e heul heb gouzoud e oa gwirion mad ar pez a oa greet gand an êl. Kredi a ree dezañ kaoud eur weledigez. ¹⁰ Treuzi a rejont ar post-gward kenta, hag an eil, hag e tegouezjont dirag an nor-houarn a zigor war kêr ; anezi heh-unan e tigoras dirazo. Mond a rejont er-mêz, ha kerzed beteg penn ar ru hag en eun taol ez eas an êl kuit dioutañ. ¹¹ Neuze e teuas Pèr ennañ e-unan hag e lavaras : » En dro-mañ eh ouzom e-neus Doue degaset e êl ha va zennet a-dre zaouarn Herodez hag euz kement edo ar Juzevien o hortoz. »

¹² Kavoud a reas e hent hag ez eas da di Vari, mamm da Yann, lesanvet Mark ; meur a hini oa eno o pedi. ¹³ Pa skoas ouz an nor-dal, e teuas eur vatez yaouank, heh ano Rode, da zelaou. ¹⁴ Anaoud a reas mouez Pèr, ha dioustu, leun a joa, e-leh digeri an nor, e teuas d’ar red d’an ti da lavared edo Pèr er-mêz e toull an nor. ¹⁵ « Te ’zo sod », emezo oll, med hi a zalhe mort outo ; « Neuze e êl eo », emezo. ¹⁶ Med kendelher a ree Pèr da skei, ha digoret e oe dezañ pelloh. Souezet maro e oent. ¹⁷ Dre eur zin euz e zorn e reas dezo tevel, hag e kontas penaoz e-noa Doue lakeet anezañ da zond er-mêz euz ar prizon. « It, emezañ c’hoaz, da gas ar helou da Jakez ha d’ar vreudeur », ha goude-ze ez eas kuit evid mond d’eul leh all.

¹⁸ Da houlou-deiz e oe trouz braz gand ar zoudarded : « Petra ’hellfe Pèr beza deuet da veza ? » ¹⁹ Herodez a reas ober enklask warnañ, med heb e gavoud. Goulennou a reas ouz ar gwardou hag e roas urz d’o lakaad d’ar maro. Goudeze e tiskennas da Zezarea hag e chomas eno eur pennadig.

²⁰ Eun dizemgleo kasaüz a oa etre Herodez ha tud Tyr ha Sidon. Ar re-mañ en-em glevas evid dond dirazañ. Sikouret gand Blastus, kambellan ar roue, a-du ganto, e houlennjont ar peoh, rag bevañs o bro a zeue euz hini ar roue. ²¹ D’an deiz merket, Herodez, gwisket gantañ e zilhad a roue, a azezas war ar gador-varn, hag e-pad e brezegenn d’an dud, e youhe ar re-mañ dezañ : « Mouez eun doue eo, ha n’eo ket hini eun den. » ²³ Raktal e oe skoet gand eun êl d’an Aotrou en abeg ma n’e-noa ket rentet gloar da Zoue. Mervel a reas, debret gand ar preñved. ²⁴ War gresk ez ee Komz Doue, hag ivez niver ar gristenien. ²⁵ Barnabas ha Saul, greet ganto o zervich, a zistroas euz Jeruzalem o tegas ganto Yann lesanvet Mark.

Paol ha Barnabas

XIII ¹ An Iliz a oa e Antiokia a oa enni profeded ha kelennerien : Barnabas, Simeon, lesanvet Niger, Lusius a Ziren, Manaen, breur mager da Herodez an tetrark, ha Saul. ² Eun devez, endra m’edont gand lidou an Aotrou, hag o yun, e lavaras ar Spered Santel : » Lakit din a-gostez Barnabas ha Saul evid al labour am-eus da fizioud enno. » ³ Neuze, goude beza pedet ha yunet hag astennet warno an daouarn, e lezjont anezo da vond. ⁴ Evel-se, o-daou, kaset e-giz misionerien gand ar Spered Santel, e tiskennjont e Seleusia hag ahano, dre vor, ez ejont da enez Chipr. ⁵ Pa oent degouezet e Salamina, eh embannjont Komz Doue e sinagogou ar Juzevien. Yann a oa ivez asamblez ganto evid o skoazella.

⁶ Treuzi a rejont an enezenn en he-fez beteg Pafos, hag e kavjont eur strobineller, profed war e veno, eur Juzeo e oa, Barjezus e ano, ⁷ unan euz an dud a veze o heulia ar prokonsul Serjius Paolus, hemañ eun den leun a furnez ; pedi a reas Barnabas ha Saul da zond davetañ : c’hoant e-noa kleved komz Doue. ⁸ Med Elimas, ar strobineller, – evel-se e hell beza intentet e ano , a enebe outo hag a glaske distrei ar prokonsul diouz ar feiz. ⁹ Neuze Saul, pe gentoh Paol, karget euz ar Spered Santel, a droas warnañ e zaoulagad, ¹⁰ hag a lavaras dezañ : « Te, korvigellet ma ’z out ha leun a fallagriez, mab an diaoul, enebour touet d’ar justis, ne ehani ket eta da zistresa heñchou eeun an Aotrou ? ¹¹ Ha bremañ, setu dorn Doue a zo warnout. Dall e vezi, hag e-pad eur pennad ne weli ket zoken an heol. » Kerkent e kouezas warnañ damhoulou ha teñvalijenn, hag e troe warnañ e-unan da glask unan bennag d’e vleina. ¹² O veza gwelet kement a oa c’hoarvezet, e teuas ar prokonsul d’ar feiz, ken estlammet oa bet gand kelennadurez an Aotrou.

¹³ Paol hag e dud a lestras e Pafos da baka Perge er Pamfilia. Neuze eo e kuiteas Yann anezo evid distrei da Jeruzalem. ¹⁴ Int-i, o tremen dre Berje, a zegouezas e Antiokia ar Pisidia. Da zeiz ar zabad ez ejont d’ar zinagog hag eh azezjont. ¹⁵ Goude ma oe lennet al Lezenn hag ar brofeded, mistri ar zinagog a gemennas dezo : « Breudeur, m’ho-peus eun dra bennag da lavared d’ar bobl, evid e frealzi, deuit da gaozeal. » ¹⁶ Paol a zavas, a reas eur zin gand e zorn hag a lavaras :

« Tud lsrael, emezañ, ha c’hwi, tud doujuz da Zoue, selaouit ahanon : ¹⁷ Doue or pobl Israel e-noa dibabet on tadou. Lakeet e-noa da greski niver an dud e-pad m’edont o veva e bro Ejipt, ha goudeze, dre nerz e vreh e-neus o zennet euz ar vro-se. ¹⁸ E-pad daou ugent vloaz e-neus maget anezo er goueleh. ¹⁹ Goudeze e-neus distrujet seiz poblad e bro Kanaan ha roet o douarou da dud Israel. ²⁰ Kement-se oll a badas war-dro pevar hant hanter kant vloaz. Goudeze e roas dezo barnerien beteg ar profed Samuel. ²¹ Neuze o-deus goulennet eur roue, ha Doue e-neus roet dezo Saül, mab Kis, eun den euz meuriad Benjamin, a renas e-pad daou ugent vloaz. ²² Goude beza dilamet e garg digantañ, e roas Doue dezo David da roue, ha dezañ eo e-neus roet an testeni-mañ : » Kavet am-eus e David , mab da Jesse, eun den da blijoud din, hag a zento ouzin e peb tra. ». ²³ Eñ eo an hini e-noa Doue prometet dezañ e savje euz e lignez da Israel eur Zalver, Jezuz. ²⁴ A-raog e zonedigez, e-noa Yann embannet eur vadeziant a binijenn evid pobl Israel a-bez, ²⁵ ha pa edo war-nes echui e amzer e lavare : « N’on ket an hini a gred deoh e vefen. Med o tond war va lerc’h emañ an hini n’on ket din da ziskoulma e zandalennou. »

²⁶ Va breudeur, c’hwi, bugale Abraham, hag ar re a zo en o touez, doujuz da Zoue, deom-ni eo bet roet ar helou-se a zilvidigez. ²⁷ Tud Jeruzalem hag o mistri o-deus dianavezet Jezuz, hag o kondaoni anezañ, o-deus sevenet komzou ar brofeded a vez lennet beb sabad. ²⁸ Heb beza kavet gwir abeg ebed evid e lakaad d’ar maro, o-deus goulennet digand Pilat lakaad laza anezañ. ²⁹ Ha p’o-doa sevenet kement a oa bet skrivet diwar e benn, e tiskennjont anezañ diouz ar hoad, d’e lakaad en eur bez. ³⁰ Med Doue e-neus e adsavet a-douez ar re varo. ³¹ Hag e-pad meur a zevez e-neus en em ziskouezet d’ar re a oa pignet asamblez gantañ euz bro Halilea da Jeruzalem, int-i hag a zo bremañ testou dezañ dirag ar bobl.

³² Ni ivez a zegas deoh ar Helou mad-mañ : ar bromesa greet d’on tadou, ³³ e-neus Doue peursevenet evidom-ni o bugale, p’e-neus savet Jezuz a varo da veo, evel m’eo skrivet en eil salm : « Va mab out-te, me hirio am-eus da engehentet », ³⁴ ha m’e-neus Doue e zavet a-douez ar re varo, ne zeuio ket ken da goueza er vreinadurez ; an dra-ze end-eeun eo ar pez e-noa lavaret : « Me a roio deoh traou santel ha sur prometet da Zavid » ; ³⁵ ha setu perag en eul leh all e lavar : « Ne lezi ket da zervicher da houzañv ar vreinadurez ». ³⁶ Rag David, goude beza bet e doug e amzer servicher bolontez Doue, a zo eet e kousk ar maro, lakeet eo bet e-kichenn e dadou, ha gwelet e-neus ar vreinadurez. ³⁷ An hini avad e-neus Doue adsavet da veo, n’e-neus ket gwelet ar vreinadurez.

³⁸ Red eo deoh her gouzoud, breudeur, drezañ eo embannet deoh ar pardon euz ar pehejou, ya, euz an oll behejou ha ne heller ket beza justizet anezo dre Lezenn Voizez ; ³⁹ ennañ avad eo roet a-grenn ar justis da gement hini e-neus feiz. ⁴⁰ Taolit evez eta na zegouezfe ganeoh ar pez a zo bet lavaret gand ar brofeded : ⁴¹ « Sellit, c’hwi, an dud dicheg, bezit souezet ha tehit kuit, rag eun oberenn ez an da ober en hoh amzer na gredfeh ket enni ma vefe kontet deoh. » ⁴² Pa oent eet er-mêz e teujod da bedi Paol ha Barnabas da gomz, da geñver ar zabad war-lerh, diwar an traou-ze. ⁴³ Pa oe eet an dud kuit, eun niver braz a Juzevien hag a brozelited azeulerien Doue a yeas da ambroug Paol ha Barnabas, hag ar re-mañ, dre o homzou, a alie anezo da jom fidel da hras Doue.

⁴⁴ D’ar zabad war-lerh, kêr a-bez, koulz lavared, a zeuas da zelaou Komz an Aotrou. ⁴⁵ O weloud ar bobl tud a oa, e fuloras ar Juzevien ha gwall responchou a rejont da gomzou Paol. ⁴⁶ Hardiseet, Paol ha Barnabas a lavaras neuze : « Deoh-c’hwi da genta, eo e oa da veza kemennet Komz Doue, med peogwir ne fell ket deoh he degemered ha ma kav deoh n’hoh ket din euz ar vuez peurbaduz, ni bremañ a dro war-zu ar bayaned. ⁴⁷ Rag kement-se e-neus gourhemennet deom an Aotrou : « Da lakeet am-eus evid sklerijenna ar bobl, evid ma kasi ar zilvidigez beteg penn ar bed. » ⁴⁸ Pa glevas ar bayaned kement-se, e oent laouen braz hag e rentent gloar da Gomz an Aotrou ; dond a reas d’ar feiz ar re oll a oa merket evid ar vuez peurbaduz. 49 Evel-se Komz Doue en em skigne dre ar vro a-bez.

⁵⁰ Med ar Juzevien a atizas gwragez a renk uhel a adore Doue, hag ivez pennou-meur euz kêr. Lakaad a rejont heskina Paol ha Barnabas, hag o has kuit euz o bro.

Paol ha Barnabas e Ikonium

XIV ¹ En Ikonium e tegouezas kemend-all : mond a reas Paol ha Barnabas da zinagog ar Juzevien. Ken mad e oe o homzou, ma teuas kalz da gredi, Juzevien ha Gresianed. ² Ar re avad euz ar Juzevien a oa chomet heb kredi a lakeas droukrañs da zevel e spered ar bayaned a-eneb ar vreudeur. ³ Koulskoude Paol ha Barnabas a jomas eno eur pennad. Hardiz e oant, rag an Aotrou a roe testeni, o lakaad anezo da ober, dre o daouam, sinou ha burzudou.

⁴ Disunvaniez a zavas etre tud kêr, lod a oa a-du gand ar Juzevien, lod all a-du gand an ebestel. ⁵ Payaned ha Juzevien a en em glevas gand o mistri evid gwallgas ha labeza an ebestel. ⁶ Ar re-mañ, o weled penaoz ez ee an traou, a yeas da glask repu er hêriou euz al Likaonia : Listr, Derbe, ha tro-war-dro. ⁷ Eno ivez eh embannent ar Helou-mad.

⁸ E Listr e oa eun den ha n’helle ket chom war e dreid, ampechet ma ’z oa abaoe m’oa ganet, morse n’e-noa kerzet. ⁹ Eun deiz p’edo o selaou Paol o komz, hemañ a zellas mad outañ, hag o weled e-noa feiz da gaoud ar pare, ¹⁰ e savas e vouez da lavared : « Sav sonn war da dreid ! » Lammed a reas an den, kerzed a ree.

¹¹ O weled ar pez edo Paol o paouez ober, moueziou e Likaoneg a zavas da lavared : « An doueou deuet da veza heñvel ouz tud a zo diskennet en on touez ». ¹² Barnabas a reent « Zeus » anezañ, hag « Hermes » euz Paol, peogwir eo eñ eo a veze o kaozeal. ¹³ Beleg an Doue « Zeus-rak-kêr » a lakeas degas tirvi ha kurunennou dirag doriou kêr, hag a-unan gand ar bobl, e felle dezañ kinnig eur zakrifis. ¹⁴ Pa glevjont kement-se, e rogas an ebestel Paol ha Barnabas o mantilli hag ez ejont a-benn-herr d’an dud en eur grial : ¹⁵ « O ! Oh ober petra emaoh aze ? emezo ; ni a zo tud tonket d’ar maro eveldoh. Ar Helou-mad a zegasom deoh eo ma tilezfeh ar zotoniou-se evid trei ouz an Doue beo, krouer an Neñv, an douar, ar mor ha kement a zo enno. ¹⁶ A-hed ar rummadou e-neuz lezet ar poblou payan da vond gand o hent o-unan, ¹⁷ heb paouez koulskoude da rei testeni dezañ e-unan oh ober vad, o tegas deoh euz an Neñv, glaoeier, amzer frouezuz ; o rei deoh magadurez a-leiz-kov ha levenez a-leiz-kalon. » ¹⁸ A-veh ma hellas ar homzou-se lakaad da zioulaad an dud, ha mired outo da ginnig eur zakrifis.

¹⁹ Neuze e tegouezas Juzevien, o tond euz Antiokia hag Ikonium. Ar re-mañ a zegasas an dud d’o menoz ; labezet e oe Paol ha stlejet er-mêz euz kêr ha dilezet ganto, o soñjal ez oa maro. ²⁰ Med pa oe bodet an diskibien en-dro dezañ, e savas hag eh antreas e kêr. Antronoz gand Barnabas, ez eas da Zerbé. ²¹ Embannet o-doa ar Helou-mad e Derbe, ha greet eun niver braz a ziskibien, ha goude-ze e teujont war o hiz, dre Listr, Ikonium hag Antiokia. ²² Startaad a reent kalon an diskibien hag o alia a reent da zelher mad d’o feiz. « Red eo deom, emezo, gouzañv kalz trubuillou, evid antreal e rouantelez Doue. » ²³ E peb lliz o-doa astennet o daouarn war ar gozidi, ha goude beza pedet ha yunet, o-doa fiziet anezo en Aotrou, an hini o-doa lakeet ennañ o feiz.

²⁴ Treuzi a reont neuze dre vro Pisidia evid mond da vro Pamfilia. ²⁵ Goude beza prezeget ar Gomz e Perjé, e tiskennjont da Atalia. ²⁶ ha mond goudeze dre vor da Antiokia, ahano eo e oant deuet, hag eno e oent bet fiziet e gras Doue evit al labour kaset bremañ da benn. ²⁷ A-veh degouezet, ha bodet ganto an Iliz, o-doa diskleriet dezo kement e-noa Doue greet drezo, ha penaoz o-doa digoret dor ar feiz d’ar bayaned. ²⁸ Tremen a rejont eur pennad amzer gand an diskibien.

Tabut diwar-benn an amdroh

XV ¹ Eun nebeud tud a ziskennas euz ar Judea evid klask kentelia ar vreudeur : « Ma ne fell ket deoh, emezo, beza amdrohet, hervez Lezenn Voizez, n’hellit ket beza salvet ». ² Trouz ha tabut a zavas etre Paol, Barnabas hag int-i. Neuze e oe divizet ez afe Paol ha Barnabas hag eun nebeud re all, beteg Jeruzalem, da houlenn o ali digand an ebestel hag ar gozidi war ar gudenn se. ³ Pourvei a reas lliz Antiokia da gement a oa red evid o beach. Tremen a rejont dre ar Fenisia hag ar Samaria, en eur gonta e troe ar bayaned war-zu Doue, ar pez a lakee kalz a levenez e-touez ar vreudeur. ⁴ Pa oent degouezet e Jeruzalem, e oent degemeret gand an lliz, an ebestel hag ar gozidi, hag e kontjont dezo kement e-noa Doue greet drezo.

⁵ Tud deuet d’ar feiz euz rumm ar Farizianed a zeuas neuze da lavared e ranker amdroha ar bayaned, ha lakaad anezo da heulia Lezenn Voizez. ⁶ An ebestel hag ar gozidi a reas eur vodadenn da studia kenetrezo ar gudenn-se. ⁷ Med o veza ma teue an tabut da drenka, e savas Pèr da lavared : « Breudeur, emezañ, gouzoud a rit eo azaleg ar penn kenta, hag en ho touez, dre an dibab greet gand Doue, o-deus ar broiou payan klevet ganin-me Komz an Aviel, ha greet dezo testeni, o rei dezo, evel deom-ni, ar Spered Santel ; ⁹ heb ober kemm ebed etrezo ha ni, e-neus dre ar feiz, glanneet o halonou. ¹⁰ Neuze ’ta, perag beza dicheg e-keñver Doue, o lakaad war jouk an diskibien, eur yeo ha n’o-deus ket gellet on tadou dougenn, na ni kennebeud ? ¹¹ Eur wech c’hoaz, dre hras an Aotrou Jezuz, her hredi a reom, eo ez om bet salvet eveldo o-unan. » ¹² Sioul e chomas ar vodadenn a-bez, hag e oe selaouet Barnabas ha Paol o tisplega an oll zinou hag ar burzudou greet drezo gand Doue e-touez ar bayaned.

¹³ P’ho-doa ehanet, Jakez a lavaras d’e dro : « Breudeur, selaouit ahanom : ¹⁴ Simeon e-neus displeget deom eo fellet da Zoue azaleg ar penn-kenta, kemered a-douez ar bayaned eur bobl evid e ano ; ¹⁵ kement-se a zegoueze mad gand komzou ar brofeded, rag skrivet eo : goude-ze e teuin da adsevel teltenn David kouezet en he foull. An dismantrou anezi a adsavin hag e lakin anezi en e zav. ¹⁷ Neuze ar peurrest euz an dud a vo war glask euz an Aotrou gand an oll boblou payan a zoug va ano. Setu ar pez a lavar an Aotrou, eñ hag a gas da benn e vennadou ¹⁸ bet anavezet a oll-viskoaz. ¹⁹ D’am zoñj din-me eta ne ve ket mad deom samma ar re euz ar bayaned hag a dro ouz Doue, ²⁰ med skriva da lavared dezo dioueri kement a zeu diwar azeulèrèz ar fals-doueou, an dizonestiz, ar hig chatal mouget hag ar gwad. ²¹ A rumm da rumm e-neus Moizez prezegerien e peb kêriadenn, peogwir e vez lennet da beb sabad er zinagogou. »

²² An ebestel hag ar gozidi a-unan gand an Iliz a-bez a zivizas neuze dibab en o zouez tud da gas da Antiokia asamblez gand Paol ha Barnabas : Jud, lesanvet Barsabas, ha Silas, o-daou galloudeg e-touez ar vreudeur. ²³ Fiziet e oe enno al lizer-mañ : « An ebestel, ar gozidi hag ar vreudeur, d’ar vreudeur deuet a-douez ar bayaned hag a zo o chom e Antiokia, er Siria hag er Silisia, salud deoh ! ²⁴ Klevet on-eus ez eus eet tud euz on touez deom-ni d’ho strafuilla gand o homzou heb beza bet urz ebed euz or perz, hag o-deus evel-se lakeet douetañs en ho spered. ²⁵ Setu perag on-eus divizet, oll a-unan, dibab kannaded da gas davedoh gand or breudeur ker Paol ha Barnabas. ²⁶ Tud int hag o-deus gouestlet o buez da zervich Jezuz Krist on Aotrou. ²⁷ Kas a reom eta Jud ha Silas evid displega deoh dre o homzou ar memez tra. ²⁸ Rag ar Spered Santel ha ni on-eus divizet chom heb lakaad samm all ebed warnoh nemed kement-mañ hag a zo red : ²⁹ chom heb debri kig bet proved d’an idolou, heb eva gwad, heb debri kig chatal bet mouget, heb ober hudurnez. Diwallit ouz kement-se hag e reoh mad. Salud deoh. »

³⁰ Ar re-mañ pa oent digouviet a ziskennas eta da Antiokia, hag eno e oe bodet an dud, evid rei dezo al lizer. ³¹ Laouen e oent, ha nerz-kalon a roe dezo kleved e lenn. ³² Jud ha Silas diouz o zu, peogwir ez oant profeded, a gomzas aliez d’ar vreudeur da gennerza anezo ha d’o skoazella. ³³ E-pad eur pennad e chomjont eno, hag ar vreudeur a gimiadas diouto en eur reketi dezo ar peoh evid distrei war-zu ar re o-doa o degaset. ³⁴ Silas a zivizas chom ha ne ’z eas kuit nemed Jud. ³⁵ Paol ha Barnabas, avad, a jome e Antiokia ; gand meur a hini all e kelennent hag eh embannent kelou mad Komz an Aotrou.

³⁶ Goude eur pennadig amzer e lavaras Paol da Varnabas : « Distroom ’ta da weled ar vreudeur e kement kêr on-eus roet enni da anaoud Komz an Aotrou ; ni a welo e peseurt stad emaint. ³⁷ Barnabas e-noa c’hoant kas ivez ganto Yann, lesanvet Mark. ³⁸ Paol avad ne felle ket dezañ kemered adarre eun den hag e-noa o huiteet er Pamfilia, ha n’e-noa ket eta kemeret perz en o labour. ³⁹ Ken braz e teuas da veza an dizemgleo etrezo ma ’z ejont peb hini diouz e du. Barnabas a gemeras Mark gantañ hag a lestras war-zu enez Chipr. ⁴⁰ Paol avad a gemeras gantañ Silas hag a guiteas, o veza bet fiziet gand ar vreudeur e gras an Aotrou. ⁴¹ En eur vond euz an eil tu d’egile dre vro Siria ha bro Silisia, Paol a gennerze an Ilizou.

Paol, Silas ha Timote

XVI ¹ Degouezoud e reas evel-se e Derbe hag e Listr. Setu ez oa eno eun diskib anvet Timote, e vamm a oa eur Juzevez deuet d’ar feiz, e dad eur Gresian. ² Brud vad e-noa e-touez ar vreudeur e Listr hag e Ikonium. ³ Paol e-noa c’hoant d’her has d’e heul. E gemered a reas, hag eh amdrohas anezañ, rag ar Juzevien a oa o chom en andread-se a ouie oll oa e dad eur Gresian. ⁴ E kement kêriadenn a veze gwelet ganto, Paol ha Silas a roe da anaoud ar reolennou bet divizet gand an ebestel ha kozidi Jeruzalem, hag e houlennent ma vefe sentet outo. ⁵ Startaad a ree eta muioh-mui ar feiz en Ilizou, hag e kreske an niver anezo euz an eil devez d’egile.

⁶ Treuzi a rejont ar Frijia ha bro ar Halated, rag miret oa bet outo, gand ar Spered Santel, mond da embann ar Gomz en Azia. ⁷ Pa oent degouezet war harzou ar Misia ; e klaskjont mond da Vitinia, med ar Spered Santel n’o lezas ket d’henn ober. ⁸ Treuzi a rejont neuze bro Misia ha diskenn e Troas. ⁹·Eun nozvez, Paol e-noe eur weledigez. Dirazañ, en e zav, ez oa eur Makedoniad hag a aspede anezañ : « Treuz d’ar Makedonia, deus war or zikour. ». ¹⁰ War-lerh ar weledigez e-noa bet Paol, on-eus raktal klasket an tu da vond d’ar Makedonia, rag kredi stard a reem e-noa Doue or galvet da vond di da embann ar Helou mad.

¹¹ O veza lestret e Troas on-eus skoet war eeun da Zamotras, hag antronoz da Neapolis ; ¹² ahano ez om eet da Filip, brasa kêr a oa e bro Makedonia, trevadenn roman. Chomet om eno eur pennad amzer. ¹³ Da zeiz ar zabad ez om eet er-mêz euz kêr, evid mond war ribl eur ster beteg eul leh a zoñje deom beza eul leh a bedenn. Eet war on azez, on eus komzet ouz ar merhed a oa eno bodet. ¹⁴ Unan anezo anvet Lidia, eur varhadourez moug euz kêr Tiatir hag a adore dija Doue, a zelaoue gand evez, rag an Aotrou e-noa digoret he halon evid ma vefe war evez ouz komzou Paol. ¹⁵ Pa oent bet badezet, hi ha tud he zi, e pedas ahanom evelhen : « peogwir ho-peus kredet am-eus feiz en Aotrou, deuit d’am zi da loja. » Red e oe deom senti outi.

¹⁶ Eun deiz m’edom o vond d’ar bedenn, eur vatez yaouank, e dalh eur spered a zivinèrèz a zeuas en arbenn deom ; dre he oraklou e houneze arhant braz d’he mistri. ¹⁷ Atao e veze war ol lerh da Baol ha deom-ni hag e youhe : « Ar wazed-mañ a zo servicherien d’an Doue uhel-meurbed, diskouez a reont deoh hent ar zilvidigez ». ¹⁸ E-pad meur a zevez e reas evel-se. Hegaset ganti, a-benn ar fin, Paol a zistroas war-zu enni hag a lavaras d’ar spered : « En ano Jezuz Krist, me a gemenn dit : deus er-mêz euz ar vaouez-mañ ». Ha raktal ez eas ar spered er-mêz.

¹⁹ He mistri avad, o weled o vond da fall ar fiziañs o-doa da hounid arhant, a bakas peg e Paol hag e Silas, hag o hasas ganto war ar blasenn vraz dirag mistri braz kêr. ²⁰ Ha dirag ar bretored e lavarjont : « Ar wazed-mañ a zo o lakaad trouz en or hêr, Juzevien int. ²¹ Alia ’reont heulia reolennou a vuez ha ne hellom ket, ni Romaned ma ’z om, na degemered, nag heulia. » ²² Hag e tirollas ar bobl a-eneb dezo. Ar bretored a lakeas diframma o dilhad diwarno hag o skourjeza. ²³ Goude beza roet kalz taoliou dezo, e taoljont anezo er prizon. Greet e oe d’ar gwardou teurel evez outo. ²⁴ Ha peogwir e-noa resevet an urz-se, e taolas anezo en toull donna, o zreid stardet e pejou koad.

²⁵ War-dro hanter-noz, Paol ha Silas a oa o pedi hag o kana meuleudi da Zoue hag ar brizonidi all a oa ouz o zelaou. ²⁶ A greiz toud e oe eur seurt krén-douar, ma vrallas diazezou an ti-gward. Digeri a reas kerkent an oll dorojou ha terri Iiammou ar brizonidi. ²⁷ O veza dihunet, ar gward a welas digor dorojou ar prizon, kavoud a ree dezañ oa tehet ar brizonidi. Tenna ’reas e gleze ; o vond d’en em Iaza edo. ²⁸ Med Paol a zavas e vouez da grial dezañ : « Na ra droug ebed dit da-unan rag oll emaom amañ. » ²⁹ Ar gward a houlennas goulou hag a yeas a-benn-herr en toullbah, hag en eur grena euz e oll izili, eh en em daolas e-harz treid Paol ha Silas. ³⁰ O has a reas er-mêz hag e houlennas outo : « Aotrounez, petra am-eus da ober evid beza salvet ? » ³¹ Respont a rejont dezañ : « Bez feiz en Aotrou Jezuz hag e vezi salvet, te ha da dud. » ³² Neuze e rojont da anaoud Komz Doue dezañ ha d’ar re all a oa o chom en e di. ³³ D’an eur-ze, end-eeun, e-kreiz an noz, ar gward o hasas da walhi o gouliou, ha goudeze, heb dale pelloh, e resevas ar vadeziant, eñ hag oll e dud. ³⁴ Pedi a reas goudeze Paol ha Silas da vond d’e di ; eur pred a bourchasas dezo, hag eñ hag e famill a oe laouen asamblez o veza kredet e Doue.

³⁵ Pa deuas an deiz, ar bretored a gasas liktored da lavared d’ar gward : « Laosk an dud-se da vond. » ³⁶ Ar gward a roas kement-mañ da anaoud da Baol : « Ar bretored a gemenn din rei deoh ho frankiz ; it eta er-mêz ha kerzit e peoh. »

³⁷ Paol avad a lavaras : « Lakeet o-deus or skourjeza dirag an oll heb barnedigez ebed, ni hag a zo sitoyan Rom, taolet o-deus ahanom er prizon, ha bremañ e fell dezo or has er-mêz dre guz ; n’ez aio ket an traou evel-se ; n’o-deus nemed dond o-unan d’or frankiza. » ³⁸ Al liktored a yeas da lavared kement-se d’ar bretored ; ar re-mañ a grogas aon enno o kleved ez oant sitoyaned roman. ³⁹ Dond a rejont da houlenn beza didamallet ; o frankiza a rejont, en eur bedi anezo da guitaad ar gêr. ⁴⁰ Pa oant deuet er-mêz euz ar prizon, Paol ha Silas a yeas da Lidia ; gweled a rejont ar vreudeur evid rei kalon dezo. Hag ez ejont adarre pelloh.

Diesteriou e Salonika

XVII ¹ O veza tremenet dre Amfipolis hag Apollonia, e tegouezjont e Tesalonika, el leh m’o doa ar Juzevien eur zinagog. ² Evel m’oa boazet d’henn ober, Paol a yeas d’o havoud hag e-pad tri devez sabad diouz renk, e tivizas ganto ; ³ o tisplega ar Skrituriou e tiskoueze e oa red d’ar Mesiaz gouzañv ha sevel a-douez ar re varo, « hag, emezañ ar Mesiaz eo Jezuz, an hini end-eeun a embannan deoh. » ⁴ Lod euz ar Juzevien a zeuas da gredi, desevet gand Paol ha Silas, hag eveldo ivez kalz a Hresianed, prozelited hag eun niver braz a verhed a renk uhel.

⁵ Med ar Juzevien leun a gred, a zavas diwar plasennou kêr, eur vandenn hailloned da lakaad trouz da zevel e-touez ar bobl, ha dizurz e kêr. Mond a rejont neuze da di Jason, da glask Paol ha Silas a felle dezo degas dirag ar bobl. ⁶ O veza ma n’o-doa ket o havet, e tegasjont ganto Jason hag hiniennou euz ar vreudeur dirag ar bolitarked : « Amañ ema, emezo, en eur youhal forz, ar re o-deus lakeet freuz dre ar bed a-bez, ⁷ ha Jason e-neus roet degemer dezo ; ar re-ze a ya oll a-eneb urziou an impalaer ; lavared a reont ez eus eur roue all : Jezuz. ⁸ Strafuillet e oe ar bobl hag ivez ar bolitarked o kleved kement-all, ⁹ hag e oe red da Jason ha d’ar re all rei kred dezo a-raog o lezel da vond kuit.

¹⁰ Kerkent, e-kreiz an noz, e reas ar vreudeur dezo kuitaad evid mond da Bere. Pa oent degouezet ez ejont da zinagog ar Juzevien. ¹¹ Ar re-mañ, sevennoh eged tud Tesalonika, a zegemeras ar Gomz gand kalz a volontez vad ha bemdez e sellent piz er Skrituriou evid gweled hag evel-se edo an traou e gwirionez. ¹² Kalz anezo a zeuas da gredi hag ivez Gresianezed a renk uhel hag eun nebeud mad a wazed. ¹³ Med kerkent ha ma klevas Juzevien Tesalonika edo Paol e Bere ivez oh embann Komz Doue, e tegouezjont evid lakaad freuz ha fourgas eno ivez e-touez ar bobl. ¹⁴ Raktal ar vreudeur a lakeas Paol da vond kuit beteg ar mor, endra ma chome eno Silas ha Timote. ¹⁵ Ar re a oa oh ambroug Paol a yeas beteg Atena ha goudeze e teujont en-dro gand urz da lavared da Zilas ha da Dimote dond beteg ennañ kenta ma hellfent.

¹⁶ E-pad m’edo Paol ouz o gortoz e Atena, e-noe eur galonad o weled ar gêr-se gouestled d’ar fals-doueed. ¹⁷ Divizoud a ree eta er zinagog gand ar Juzevien hag ar prozelited, ha bemdez,. war al leur-gêr, gand ar re a zegoueze gantañ. ¹⁸ Dond a ree zoken filozofed, epikourianed ha stoisianed da gaozeal gantañ. Lod a lavare : « Petra e-neus c’hoant da lavared ar chaoker-se ? », ha lod all : « Hennez a dle beza prezeger doueed estren ». Paol, gwir eo, a brezege Jezuz hag an adsao da veo. ¹⁹ Kroget e oe ennañ d’e gas dirag an « Areopaj » – « Ha gouzoud a hellfem, emezo, petra eo ar gelennadurez nevez a zisplegez ? ²⁰ Rag hegaset om gand da gomzou iskiz hag e fell deom eta gouzoud petra dalvezont ? » ²¹ Red eo henn lavared : an oll dud euz Atena ha kement estren a oa o chom eno ne reent euz o amzer nemed konta pe zelaou ar heleier nevesa.

²² Paol, en e zav e-kreiz an Areopaj, a lavaras : « Ateniz, emezañ, d’am zoñj din-me, c’hwi ho-peus, evel pa lavarfen, re a relijion. ²³ Dre ma ’z an gand ruiou kêr e welan ho savaduriou sakr, ha zoken eun aoter skrivet warnañ « d’an Doue dianav ». An Doue a enorit eta heb e anaoud, me a zo o vond d’e gemenn deoh. ²⁴ An Doue e-neus krouet ar bed ha kement a zo ennañ, eñ, mestr an Neñv hag an douar, n’ema ket o chom e templou savet gand an dud ; ²⁵ Evid e zervich n’e-neus ket ezomm kennebeud euz daouarn tud, evel m’e-nefe ezomm euz tra pe dra, eñ hag a ro d’an oll buez, lusk hag an oll draou all. ²⁶ Diwar eun den hebken e-neus krouet an oll boblou, evid pobla an douar a-bez, merket e-neus dezo da be vare dond hag e peleh beva, ²⁷ evid klask Doue, ha marteze zoken e hellfent e gavoud dre zastorn eñ ha n’ema ket e gwirionez pell diouz peb hini ahanom, ²⁸ rag ennañ on-eus bezañs, lusk ha buez., evel m’o-deus lavaret hiniennou euz ho parzed, rag ni a zo ivez euz e ouenn dezañ. ²⁹ Neuze ’ta, peogwir ez om euz gouenn Doue, ne dleom ket soñjal e vefe an doueelez heñvel ouz aour, arhant pe varbr kizellet hervez ijin ha faltazi an den.

³⁰ Ha Doue bremañ, heb delher kont euz an amzer ma oent dianaoudeg, a embann d’an dud o-deus oll hag e peb leh da jeñch buez. ³¹ Rag merket e-neus an deiz ma teuio da varn ar bed gand justis, dre an hini e-neus dibabet. An asur a gement-se e-neus roet d’an oll o sevel anezañ a-douez ar re varo. ³² O kleved ano euz adsao ar re varo, lod a reas goap, lod all a lavaras : « Ni da glevo war gement-se eun dro all bennag ». ³³ Evel-se eo e kuiteas Paol anezo. ³⁴ Lod koulskoude a jomas gantañ hag a zeuas d’ar feiz, evel Denez an Areopajad, hag eur vaouez anvet Damaris, ha re all c’hoaz ganto.

Diazezadur ar feiz e ker Gorint

XVIII ¹ Pa guiteas Atena, Paol a yeas da Gorint. ² Eno e tegouezas gand eur Juzeo anvet Akuila, ginidig euz ar Pont, hag e bried Prisilla, nevez deuet euz Rom, rag Glaoda e-noa kemennet d’an oll Juzevien o-doa da guitaad Rom. Paol o darempredas, ³ ha peogwir e-noa ar memez micher, – teltennerien e oant, – e teuas da jom ganto ha da labourad asamblez. ⁴ Da geñver peb sabad e tivize er zinagog hag e klaske degas d’ar feiz Juzevien ha Gresianed.

⁵ Med pa oe degouezet Silas ha Timote, deuet euz ar Makedonia, Paol ne reas mui nemed prezeg o tiskleria fraez dirag ar Juzevien e oa Jezuz ar Mesiaz. ⁶ Med ar re-mañ a zislavare hag a valloze ha setu perag Paol a hejas e zilhad hag a Iavaras dezo : « Ra gouezo ho kwad war ho penn ! Direbech on, hiviziken ez in daved ar bayaned ». ⁷ En eur vond kuit ez eas e ti eur prozelit anvet Titius Justus, a oa e di e-kichenn ar zinagog. ⁸ Krispus, rener ar zinagog, a gredas en Aotrou ha gantañ e oll dud ; hag eun niver braz a Gorintianed o selaou Paol, a zeuas d’ar feiz hag a oe badezet. ⁹ Eun nozvez, en eur weledigez, an Aotrou a lavaras da Baol : « Bez dineh, kendalh da brezeg, arabad dit tevel, ¹⁰ rag me a zo ganit ha den na grogo ennout evid ober droug dit, rag eun niver braz a dud er gêr-mañ a zo galvet da veza din. » ¹¹ E-pad bloaz hanter e chomas Paol eno dalhmad o prezeg Komz Doue.

Paol dirag ar prokonsul Gallion

¹² D’ar mare m’edo Gallion prokonsul en Akaia, e savas an oll Juzevien a-eneb Paol, hag e tegasjont anezañ dirag al lez-varn : ¹³ « An den-mañ, emezo, a zegas an dud da zervicha Doue en eun doare ha n’eo ket hervez al Lezenn ». ¹⁴· Paol a oa o vond da respont, pa lavaras Gallion d’ar Juzevien : « Ma vije bet ano euz eur gwall daol bennag, pe euz eun dra mezuz, am-befe degemeret ho klemm deoh, Juzevien, evel just. ¹⁵ Med peogwir e sav trouz etrezoh diwar-benn kelennadurez, geriou, diwar ho Lezenn deoh, an dra-ze a zell ouzoh. Ne fell ket din barn war draou evel-se. ¹⁶ Hag e kasas anezo er-mêz euz al lez-varn. ¹⁷ Neuze e teuas an oll da gregi e Sosten, rener ar zinagog. Kanna ’reJont anezañ dirag al lez-varn. Gallion avad ne gemeras tamm perz ebed e kement-se. ¹⁸ Paol a jomas c’hoaz eur pennad mad a amzer, e Korint ; goudeze e kuiteas ar vreudeur hag e kemeras al lestr evid mond d’ar Siria. Prisilla hag Akuila a oa asamblez gantañ. Eur gouestl e-noa greet ; setu perag e-noa lakeet touza e vleo e Sankrea.

Paol distro da Antiokia

¹⁹ Degouezoud a rejont e Efez. Eno e kimiadas diouz e genvreudeur. Eñ avat a yeas d’ar zinagog hag e tivizas gand ar Juzevien. ²⁰ Goulennet e oe digantañ chom pelloh ganto, med ne asantas ket. ²¹ O huitaad a reas en ur lavared dezo : « Distrei a rin c’hoaz davedoh, mar plij gand Doue ». E Efez e lestras, ²² evid mond da zouara e Sezarea, pignad a reas da zaludi an lliz hag e tiskennas da Antiokia, ²³ el leh ma chomas eur pennad amzer. Goudeze ez eas adarre en hent hag e welas bro Galatia ha bro Frijia an eil goude eben evid kalonekaad an oll ziskibien. ²⁴ Eur Juzeo, anvet Apollos, ginidig euz Aleksandria, a oa degouezet e Efez ; eun den helavar e oa ha gwizieg war ar Skrituriou. ²⁵ Desket oa bet dezañ Hent an Aotrou, ha gand eur galon virvidig e prezege hag e kelenne heb fazi war gement a zelle ouz Jezuz, daoust ma ne anaveze nemed badeziant Yann. ²⁶ Gand hardisegez e stagas da brezeg er zinagog med p’o devoa e glevet Prisilla hag Akilaz a gemeras anezañ en e bart-e-unan evid diskouez dezañ sklerroh c’hoaz Hent Doue. ²⁷ Hag o veza m’edo en e zoñj mond da Akaia, ar pez a gavas mad ar vreudeur, ar re-mañ a skrivas d’an diskibien evid ma rafent eun degemer mad dezañ. Pa oe degouezet, e oe, dre hras Doue eur zikour vad evid an dud fidel, ²⁸ rag galloud e lavariou a zeue a-benn euz ar Juzevien dirag an oll, pa zeue dre ar Skrituriou da ziskouez oa Jezuz ar Mesias.

Diskibien Yann Vadezour e Efez

XIX ¹ E-pad m’edo Apollos e Korint eo e tegouezas Paol e Efez. Tremenet e-noa dre horre ar vro. Kavoud a reas eno eun nebeud diskibien, ² hag e houlennas outo : « Ha resevet ho-peus ar Spered Santel pa oah deuet d’ar feiz ? » – « Med, emezo dezañ, n’on-eus ket klevet zoken ober ano euz Spered Santel. » ³·Goulenn a reas Paol : « Peseurt badeziant ho-peus eta resevet ? » – « Badeziant Yann », emezo. ⁴ Ha Paol adarre : « Eur vadeziant evid cheñch buez eo a roe Yann, eñ a houlenne digand ar bobl kredi en hini a zeufe war e lerh, da lavared eo e Jezuz. » ⁵ E zelaou a rejont, hag e oent badezet en ano an Aotrou Jezuz. ⁶ Astenn a reas Paol e zorn warno, hag ar Spered Santel a ziskennas warno. Staga rejont da gomz e yezou ha da brofedi. ⁷ Bez’ ez oa anezo oll eun daouzeg gwaz bennag.

⁸ Mond a reas Paol d’ar zinagog, hag e-pad tri miz, gand hardisegez e tivizas diwar-benn Rouantelez Doue. Dalhmad e veze o klask degas d’ar feiz ar re anezo a veze ouz e zelaou. ⁹ Hag o veza ma teue eun nebeud anezo da galedi ha ma choment diskredig ha ma’z eent beteg gwall-gomz euz an Hent dirag an dud, Paol o dilezas hag e kemeras e ziskibien en o fart-o-unan evid divizoud ganto bemdez e ti-skol Tirannos. ¹⁰ Daou vloavez e padas an traou evel-se, ken na hellas pobl an Azia a-bez, Juzevien ha Gresianed, kleved Komz an Aotrou.

¹¹ Ober a ree Doue dre zaouarn Paol burzudou dibaod, ¹² ken na veze kemeret, evid o lakaad d’ar re glañv, mouchouerou ha lienajou o devoa stoket ouz e gorv. An dud-se neuze a gave ar pare, hag an droug sperejou a yee kuit. ¹³ Argaserien diaoulou, Juzeo, o vond hag o tond dre ar vro, a stagas, d’o zro, da hervel, war ar re o-doa droug sperejou, ano an Aotrou Jezuz. Lavared a reent : « Me ho ped dre ar Jezuz-se embannet gand Paol. » ¹⁴ Seiz mab d’eur beleg Juzeo, anvet Seva, a glaske ober evel-se. ¹⁵ An droug spered a respontas dezo : « Jezuz, me anavez anezañ, goûd a ouzon piou eo Paol, med piou oh-c’hwi ? » ¹⁶ Hag e saillas warno ken feulz an den dalhet gand an droug spered ma reas e vestr dezo oll, ha ma rankjont tehet euz an ti en noaz ha goloet a houliou. ¹⁷ An oll dud, e kêr Efez, Juzevien ha Gresianed, a glevas ano euz ar pez a oa c’hoarvezet, aon a groge enno oll, hag e oe meulet brazder an Aotrou Jezuz. ¹⁸ Kalz euz ar re o-devoa kredet a zeue da anzav a vouez uhel o zroiou fall. ¹⁹ Eun niver braz a dud, en em roet d’an achantouriez, a reas eur bern gand o leoriou evid o devi dirag an oll. Pa oe greet ar gont e oe gwelet ez oa anezo talvoudegez hanter kant mil pez arhant. ²⁰ Evel-se, dre halloud an Aotrou, e teue ar Gomz da greski ha da greñvaad.

²¹ Diwar gement-se Paol a zivizas, er Spered, mond da Jeruzalem o tremen dre ar Makedonia hag an Akaia. Lavared a ree : pa vezin bet du-ze, e vo red din c’hoaz mond da Rom. ²² Kas a reas d’ar Makedonia daou euz e skoazellerien, Timote hag Erast. Eñ a-vad, a jomas eur pennadig en Azia.

²³ D’ar mare-se eo e savas freuz braz awalh diwar-benn an Hent ; ²⁴ rag eun orfebour, anvet Demetrius, a ree templou arhant da Artemiz, hag evel-se e lakee artizaned da gaoud gounidou braz. ²⁵ Boda a reas an artizaned hag ar re o-doa eur vicher damheñvel, hag e lavaras : « Her gouzoud a rit, gwazed, mard emaom en on êz eo ablamour d’al labour-se, ²⁶ hogen, gweled a rit pe gleved, n’eo ket hebken e Efez, med dre goulz lavared an Azia a-bez, e teu ar Paol-se da lakaad esmae en eur bern tud, o rei dezo da gredi, evel ma lavar, n’eo ket doueou an doueou a zeu euz a dre on daouarn. ²⁷ N’eo ket hebken or micher eo a zo e riskl da veza taolet diskred warni, med templ an doueez vraz Artemiz a hellfe ivez beza dilezet ha buan awalh diskaret euz ar renk uhel, azeulet ma ’z eo e-touez an dud oll a zo en Azia ha dre ar bed a-bez ». ²⁸ Ar homzou-se a lakeas an dud da fulori ha ne ehanent ket da youhal : « Braz eo Artemiz Efez ! » ²⁹ Ar freuz en em skignas dre gêr a-bez, hag an dud a yeas diwar-herr, ha niveruz kenañ d’an teatr ;·en eur vond, e oe skrapet Kaius hag Aristark, kompagnuned da Baol. ³⁰ Greet mad e-noa Paol e zoñj da vond d’ar vodadenn, med ne oe ket lezet gand an diskibien. ³¹ Aziarked euz e Vignoned, lod anezo, a lakeas ivez e zizalia da riskla mond d’an teatr.

³² Peb hini evel-just a youhe, med n’oa ket daou o youhal ar memez tra, dizurz a zavas er vodadenn ; an darn vrasa zoken ne ouient ket perag e oant bodet. ³³ Euz a greiz an engroez, e kemennas tud da Aleksandr petra c’hoarveze, hag eñ, poulzet gand ar Juzevien, a ziskouezas gand e zorn e felle dezañ diskleria e venoz dirag an oll. ³⁴ Pa oe gouezet e oa Juzeo e stagas an oll da youhal asamblez e-pad tost da ziv eur : « Braz eo Artemiz Efez ! » ³⁵ Ar sekretour a zeuas a-benn da lakaad ar bobl da zioulaad. « Efezianed, emezañ, ha bez e vefe unan bennag ha ne ouesfe ket eo kêr Efez, kêr zantel an Artemiz vraz ha kêr an delwenn kouezet euz an Neñv ? ³⁶ Peogwir eo sklêr ar respont, eo red deoh sioulaad ha diwall da fazia war an hent da gemer. ³⁷ Degaset ho-peus amañ tud ha n’o-deus greet netra disakr ebed, na komzet dizoujuz a-eneb on doueez. ³⁸ Ma sav trouz etre hini pe hini ha Demetrius hag ar vicherourien a ya de heul, breujou a zo, prokonsuled a zo, n’eus nemed mond dirag al lez-varn. ³⁹ Ha ma klaskit eun dra all bennag, e vezo gwelet kement-se en eur vodadenn lezenneg. ⁴⁰ E riskl emaom da veza tamallet da lakaad dispah ablamour d’or bodadenn greet ganeom hirio, rag n’eus abeg ebed da helloud diskleria or boa eun digarez vad evid ober ar vodadenn-mañ ha n’or befe da renta kont anezi, ne hellfem ket henn ober ». War-ze e tigouvias an dud.

Euz Efez da Droaz dre ar Gres hag ar Makedonia

XX ¹ Echu ar freuz, e lakeas Paol e ziskibien da zond hag e kennerzas anezo. Goudeze e kimiadas diouto hag ez eas en hent da vond d’ar Vakedonia. ² Goude beza tremenet dre ar broiou-se, e kemeras kalz a amzer evid kennerza ar vreudeur hag en em gavas er Grès. Tri miz e chomas eno. ³ Pa oe deuet ar poent dezañ da dreuzi ar mor evid mond d’ar Siria, en abeg ma’z oa Juzevien oh irienna a-eneb dezañ e tivizas distrei en-dro dre ar Vakedonia. ⁴ Ambrouget e oe gand Sopatros, mab Pirrus euz Bere, Aristark ha Sekundus euz an Desalonika, Gaius euz Bere ha Timote, hag ivez Trichika ha Trofima euz rann-vro an Azia. ⁵ Ar re-mañ hag a oa eet en or raog o-doa or gortozet e Troaz. ⁶ Ni avad, on-eus kuiteet Filip goude deiziou ar bara-dihoell hag on-eus lestret evid degouezoud ganto pemp devez goudeze, hag eno om chomet e-pad eur zizun.

Dasorhidigez Eutika e Troaz

⁷ D’an deiz kenta euz ar zizun, pa oam bodet evid terri ar bara, Paol hag a dlee kuitaad antronoz, a zivizas gand ar vreudeur ; astennet e-noa e gomz beteg war-dro hanter-noz ; ⁸ n’eo ket lampou a ree diouer er gambr uhel, el leh m’edom bodet. ⁹ Eur pôtr yaouank azezet war rizenn ar prenest en em roas da gousked-mort, endra ma kendalhe Paol da zivizoud. En e gousk e kouezas euz an trede estaj, ha pa oe klasket e zevel, ez oa maro. ¹⁰ Diskenn a reas neuze Paol, a-benn-herr ez eas davetañ hag e kemeras anezañ etre e zivreh. « Arabad eo deoh strafuilla, beo eo ». ¹¹· Pignet en-dro, Paol a dorras ar bara, debri a reas ha delher da brezeg beteg goulou-deiz ; ha neuze ez eas kuit. ¹² Ar pôtr avad a oe degaset beo d’ar gêr, ar pez a oe eur frealzidigez vraz.

Euz Troaz da Vilet

¹³ Ni a yeas kuit a-raog ar re all, hag on-eus lestret evid mond da Asos, e Ieh m’or-boa da gemered Paol, greet gantañ ar menoz da zond eno war e droad. ¹⁴ Pa oe en em gavet ganeom e Asos, ni on-eus e zegemeret er bourz evid mond da Vitilèn. ¹⁵ Ahano ez om eet antronoz, dre vor, beteg beza dirag Kio ; d’an eil antronoz on-eus treuzet war-zu Samos, ha peder eur war’n ugent diwezatoh, goude eun ehan e Trogilion, ez om degouezet e Milet. ¹⁶ Paol e-noa divizet tremen dirag Efez, gand aon da goll amzer en Azia ; n’e-noa ken mall nemed da erruoud e Jeruzalem, ma ve posubl, evid gouel ar Pantekost.

¹⁷ Euz Milet, Paol a halvas da zond davetañ kozidi lliz Efez. ¹⁸ Pa oent digouezet e lavaras dezo : « Goûd a ouzoh petra eo bet va darempredou ganeoh abaoe m’on degouezet en Azia. ¹⁹ Servichet am-eus an Aotrou gand eur galon izel, e-kreiz an daerou hag an trubuillou deuet din dre droiou-kamm ar Juzevien. ²⁰ N’on bet morse lezireg war gement a helle ober vad deoh, er hontrol eo, prezeget am-eus, kelennet am-eus, koulz dirag an oll hag en ho tiez. ²¹ An testeni a roen a halve ar Juzevien koulz hag ar bayaned da jeñch buez, da drei ouz Doue ha da gaoud feiz e Jezuz an Aotrou. ²² Ha bremañ me, dalhet gand ar Spered, a zo en hent da vond da Jeruzalem. N’ouzon ket petra zeuin eno da veza. ²³ Med, n’eus forz penaoz, ar Spered Santel a gemenn din, euz an eil gêr d’eben, ez eus chadennou ha trubuill ouz va gortoz. ²⁴ Va buez va-unan, n’he-deus evidon talvoudegez ebed, klask a ran kas da benn va redadenn hag ar zervich bet fiziet ennon gand Jezuz an Aotrou : rei testeni da Aviel gras Doue. ²⁵ Hiviziken, her gouzoud mad a ran, ne weloh mui va dremm, c’hwi oll hag am-eus tremenet en ho touez en eur embann ar Rouantelez. ²⁶ Setu perag e hellan rei hirio an testeni-mañ : divlamm on euz gwad an oll. ²⁷ Morse n’on ket bet lezireg ; er hontrol eo, mennad Doue en e bez am-eus roet deoh da anaoud.

²⁸ Evesait warnoh hoh-unan ha war an dud a zo fiziet ennoh ; evito e-neus ar Spered Santel greet ahanoh episkobed evid beza pastored Iliz Doue, dasprenet gantañ dre e wad e-unan. ²⁹ Gouzoud mad a ran e teuio en ho touez bleizi kriz pa vezin eet kuit, ha n’o-do damant ebed d’an dropell. ³⁰ Euz ho touez zoken e savo tud, dezo komzou fallagr evid sacha ganto diskibien d’o heul. ³¹ Bezit war evez eta, dalhit soñj n’am-eus ehanet, noz-deiz e-pad tri bloaz, gand daerou, da guzulia peb hini ahanoh. ³² Ha bremañ e fizian ahanoh e Doue hag e komz e hras, gouest da zevel an Iliz ha da rei o hêrez d’ar re oll a zo santeleet. ³³ N’am-eus c’hoanteet nag arhant nag aour, na dilhad den ebed. ³⁴ An daouarn-mañ, her gouzoud a rit hoh-unan, o-deus pourveet da va ezommou ha da re va hompagnuned. ³⁵ Henn diskouezet am-eus deoh dalhmad eo evel-se, o poania, eo e tleer dond war zikour an dud dinerz ha delher soñj euz ar homzou e-noa lavaret an Aotrou e-unan : « Brasoh levenez a vez o rei eged o reseo ». ³⁶ Goude ar homzou-se, ez eas war e zaoulin, asamblez ganto oll, hag e pedas. ³⁷ An oll neuze a zirollas da ouela, hag ez eent a-dro-vriad gand Paol evid pokad dezañ. ³⁸ Glaharet e oant dreist oll ablamour m’o-doa e glevet o lavared ne welfent mui e zremm. Goudeze e oe ambrouget beteg al lestr.

Paol o pignad da Jeruzalem

XXI ¹ P’or-boa gellet en em ziframma diouto ha mond en donvor, on-eus skoet eeun da Gos hag antronoz da Rod, hag ahano da Vatara. ² O veza kavet eul lestr a oa war-nes loh da vond da Fenikia, ez om savet er bourz hag ez om eet er mor ³ Pa oem degouezet dirag enez Chipr e lezjom an enezenn e babourz evid ober hent war-zu ar Siria hag on-eus douaret e Tir, rag eno eo e-noa al lestr da ziskarga e lestrad marhadourez. ⁴ Seiz devez e oam chomet eno, rag diskibien or-boa kavet eno. Poulzet gand ar Spered Santel e lavare ar re-mañ da Baol chom heb pignad da Jeruzalem. ⁵ Pa oe echu ganeom on amzer da jom eno, ez om eet en hent hag e-keid ha ma ’z eem, e teuent oll d’on heul, gwragez ha bugale zoken, beteg er-mêz euz kêr. Eno, daoulinet war an aod, on-eus pedet. ⁶ P’or-boa kimiadet diouto, ez om savet er vag hag int-i a zo distroet d’ar gêr.

⁷ Ni avad on-eus treuzet ar mor azaleg Tir hag a zo degouezet e Ptolemais, hag eno, goude beza saludet ar vreudeur, ez om chomet eun devez asamblez ganto. ⁸ Antronoz ez ejom adarre en hent hag eh errujom e Sezarea. Mond a rejom da di Filip, an avieler, unan euz ar seiz, hag ez om chomet eno. ⁹ Peder merc’h e-noa, gwerhezed ha profedezed anezo. ¹⁰ E-pad an deveziou niveruz or-boa tremenet eno, e tegouezas eur profed anvet Agabus a oa o tond euz bro Judea. ¹¹ Dond a reas d’or havoud ha kemered gouriz Paol, liamma ’reas ganti e dreid e-unan hag e zaouarn hag e tisklerias : « Setu petra lavar ar Spered : An den a zo ar houriz-mañ dezañ, setu aze penaoz e vo staget gand ar Juzevien ha lakeet etre daouarn ar bayaned. ¹² O kleved kement-se, ni hag ar vreudeur euz kêr a bedas stard Paol da jom heb pignad da Jeruzalem. ¹³ Neuze e respontas deom : « Perag e ouelit hag e rannit din va halon ? Prest on-me, n’eo ket hebken da veza liammet med da vervel e Jeruzalem evid ano Jezuz an Aotrou ». ¹⁴ Ha peogwir n’hellem ket kaoud e asant, n’on-eus ket pouezet muioh warnañ : « Ra vo greet bolontez an Aotrou, a lavarem ». ¹⁵ E dibenn an deveziou-se, on eus greet or pourchasou hag ez om pignet da Jeruzalem. ¹⁶ Diskibien euz Sezarea, o vond di ivez asamblez ganeom, o-deus or haset da loja da di Mnason, ginidig euz enez Chipr, eun diskibl euz an deiziou kenta.

Paol ha Jakez e Jeruzalem

¹⁷ Pa zegouezjom e Jeruzalem e oe greet deom eun degemer laouen gand ar vreudeur. ¹⁸ Antronoz ez eas Paol ha ni da di Jakez ; ar gozidi a oa oll eno ivez. ¹⁹ P’e-noa o zaludet e tisplegas dre ar munut kement e-noa greet Doue e-touez ar bayaned dre e zervich. ²⁰ Ar re a oa o selaou a rentas gloar da Zoue hag a lavaras da Baol : « Gweled a hellez, breur, ez eus a vilierou tud fidel e-touez ar Juzevien, hag oll emaint stard a-du gand al Lezenn, ²¹ Hogen, goûd a ouzom ar vrud a red diwar da benn : o teski emaout d’ar Juzevien a zo o veva e-touez ar bayaned, dilezel Moizez. Lavared a rez dezo chom heb amdroha ar vugale hag heb heulia ar reolennou. ²² Petra da ober ? A dra-zur e klevint emaout amañ. ²³ Gra eta ar pez emaom o vond da lavared dit : pevar den on-eus amañ dalhet gand eur ouestl ; ²⁴ kemer anezo ganit, bez glanneet asamblez ganto ha kemer ar mizou war da gont evid ma hellint lakaad touza o bleo hag eh intento an oll ne dalv netra ar pez o-deus klevet diwar da benn hag e chomez, te ivez, fidel d’al Lezenn. ²⁵ Evid ar bayaned deuet da gredi, ni on-eus skrivet dezo ar pez on-eus divizet : en em vired euz ar hig bet kinniget e sakrifisou payan, euz ar gwad, ar hig bet mouget hag an hudurnez ». ²⁶ En deiz warlerh e kemeras Paol gantañ ar wazed-se hag o kregi gand lidou ar hlanedigez, ez eas asamblez ganto d’an Templ evid lavared pe da zeiz, pa vo echu o hlanedigez, e vo kinniget ar brovadenn evid peb-hini anezo.

²⁷ Ar seiz devez a oa o vond da echui pa zeuas Juzevien an Azia, hag o-doa e welet en Templ, da hisa ar bobl a-bez a-eneb dezañ, hag e pakjont krog ennañ. ²⁸ Youhal a reent, « Tud Israel, sikour deom ! Hemañ eo an hini a stourm a-eneb or pobl, al Lezenn hag al leh-mañ, dre ar gelennadurez a ro e peb leh ha da beb den. Degaset e-neus Gresianed zoken en Templ ha disakreet evel-se al leh santel-mañ ». ²⁹ Rag e welet o-doa, e kêr, asamblez gand Trofim a Efez hag e soñje dezo e-noa Paol e zegaset en Templ. ³⁰ Kêr a-bez en em zavas, hag an dud en em vodas niveruz kenañ. Kroget e oe e Paol hag e oe stlejet er-mêz euz an templ, hag serret an dorojou raktal. ³¹ O klask e laza edod, pa zeuas ar helou-mañ da gomandant ar gohortenn : birvill a zo e Jeruzalem a-bez. ³² Raktal e vodas soudarded ha kantenerien hag e lakeas sailla war ar bobl. Pa oe gwelet ar homandant hag ar zoudarded e oe ehanet da skei gand Paol. ³³ Neuze e tosteas outañ ar homandant, e krogas ennañ hag e roas urz d’e jadenna gand diou jadenn, ha goudeze e klaskas gouzoud piou e oa ha petra e-noa greet. ³⁴ Med e-kreiz ar bobl, peb hini a youhe, hemañ eun dra, egile eun dra all. Ha peogwir ar homandant ne helle ket, ablamour d’ar jolori, gouzoud frêz ar pez a oa c’hoarvezet, e houlennas kas Paol er hastell-kreñv. ³⁵ Pa oe degouezet hemañ war dereziou ar skalier e oe red d’ar zoudarded dougen anezañ, ken dirollet oa ar bobl, ³⁶ rag ar bobl a-bez a yee d’e heul en eur youhal : « d’ar maro ! » ³⁷ D’ar mare m’edod war-nes e lakaad da vond er hastell-kreñv, e lavaras Paol d’ar homandant : « ha posubl e ve din lavared eur ger dit ? » – « Te oar Gresianeg ? a respontas eñ. ³⁸ N’eo ket te eta eo an Ejipsiad e-neus lakeet en deveziou-mañ pevar mil forban d’en em zevel ha da vond d’ar goueleh ? » ³⁹ » Me, eme Baol, a zo eur Juzeo, euz Tarz, er Silisia, sitoian euz eur gêr ha n’eo ket brud a vank dezi, lez ahanon da gomz d’ar bobl ». ⁴⁰ Aotreet e oe, ha Paol, en e zav war ar skalierou, a reas sin d’ar bobl gand e zorn. Sioul e chomas an oll, hag e komzas dezo en Hebreeg.

Paol o komz d’ar juzevien

XXII ¹ « Breudeur ha tadou, selaouit eta a pez am-eus da lavared deoh evid en em zivenn ». ² Sioulaad a reas c’hoaz an dud pa oe klevet Paol o komz dezo en Hebreeg : ³ « Juzeo on, ganet e Tarz, er Silisia, med amañ, er gêr-mañ, on bet savet, hag am-eus, desket e-harz treid Gamaliel, en eun doare striz, Lezenn on Tadou. Leun a feulz e oan evid Doue, evel ma’z oh oll hirio. ⁴ Heskinet am-eus an Hent-se, lakeet am-eus chadenna ha teurel er prizon gwazed ha merhed. ⁵ Ar beleg braz ha kuzul ar pennou-meur a-bez a hell beza test : diganto o-unan am-boa bet liziri evid or breudeur pa oan eet da Zamas evid degas da Jeruzalem, chadennet, ar re a oa, du-ze, ma vefent kastizet.

⁶ Kendelher a reen eta gand va hent ha tostaad ouz Damas pa ’zeuas a daol trumm, war-dro kreizteiz, eur sklerijenn vraz o tond euz an Neñv da skedi en-dro din. ⁷ Koueza a ris d’an douar hag e klevis eur vouez o lavared din : « Saul ! Saul ! perag am heskinez ? » ⁸ « Piou out ? » eme-ve, hag ar vouez adarre : « Me eo Jezuz an Nazarean, me eo a heskinez ». ⁹ Ar re a oa ganin a welas mad ar sklerijenn, med ne glevjont ket ar vouez a gomze ouzin. ¹⁰ Me a houlennas : « Petra am-eus da ober, Aotrou ? ». Hag e respontas an Aotrou din : « Sav en da zav ha kee da Zamas, hag eno e vo lavaret dit kement tra a zo merket dit da ober ». ¹¹ Med o veza ma ne welen netra diwar goust sked ar sklerijenn-se, on bet renet gand dorn va henvreudeur evid mond da Zamas. ¹² Bez e oa eno eun den devod, anvet Ananias, sentuz ouz al Lezenn, brud vad dezañ e-touez ar Juzevien : eno edo o chom. ¹³ Dond a reas d’am havoud, ha neuze e lavaras din : « Saul, va breur, ra zeuio dit en-dro ar gweled », ha kerkent e teuas din ar gweled, hag e welis anezañ. ¹⁴ Lavared a reas din : « Doue on tadou e-neus da zibabet evid anaoud e volontez, gweled an Hini just ha kleved e vouez dezañ. ¹⁵ Te a vezo test dezañ dirag an oll dud euz kement az-pezo gwelet ha klevet. ¹⁶ Perag gortoz pelloh ? Alo ! Reseo ar vadeziant, ha bez glanneet euz da behejou en eur bedi e Ano ».

¹⁷ Pa oen distroet da Jeruzalem, e-pad m’edon o pedi en templ, e tegouezas ganin beza gourzavet ; ¹⁸ hag e welis an Aotrou ; lavared a reas din : « Kuita buan Jeruzalem, rag ne zegemerint ket an testeni a roi din ». ¹⁹ « Med, Aotrou », eme-ve, « gouzoud mad a reont eo me eo a yee er zinagogou, evid lakaad teurel er prizon ha skourjeza ar re a gred ennout. ²⁰ Ha pa oe skuillet gwad Stevan, eun test dit, me ivez a oa eno, a-du edon gand ar vuntrerien hag o tiwall o dilhad ». ²¹ Med lavared a reas din : « kerz, rag war-zu ar poblou payan pell-pell e kasin ahanout ».

²² Ar juzevien hag o-doa selaouet Paol beteg ar homzou-se, a stagas neuze da youhal forz : « Ra vo dilamet diwar an douar eur seurt den. Ne dle ket chom beo ». ²³ Hag o veza ma youhent, ha ma hejent o mantilli, ha ma taolent poultrenn en êr, ²⁴ komandant ar gohortenn a lakeas kas Paol er hastell-kreñv hag e vourrevia gand ar fouet evid gouzoud frêz perag ar youhadennou-se a eneb dezañ. ²⁵ Pa edod o vond da astenn anezañ evid e skourjeza, e lavaras Paol d’ar hantener a oa diouz servich : « eur sitoian roman ha n’eo ket bet barnet zoken, daoust hag aotre ho-peus d’e skourjeza » ? ²⁶ O veza klevet kement-se, ar hantener a yeas da gavoud komandant ar gohortenn evid rei kement-se dezañ da houzoud : « Petra edos o vond da ober, rag an den a zo sitoian roman ». ²⁷ Ar homandant a zistroas da houlenn ouz Paol : « Lavar din ha gwir eo ez out sitoian roman ? – Ya, eme Baol ». ²⁸ Ar homandant a lavaras c’hoaz : « Me, emezañ, am-eus ranket rei eur yalhad vad evid kaoud ar gwir-se. Ha me, eme Baol, am-eus anezañ abaoe m’on ganet ». ²⁹ Ar re a oa o vond d’e vourrevia a lezas anezañ raktal. Ar homandant a oa kroget aon ennañ, o houzoud e-noa dalhet en ereou eur sitoian roman. ³⁰ Antronoz, komandant ar gohortenn a c’hoanteas gouzoud heb douetañs ebed a betra oa tamellet Paol gand ar Juzevien, urz a roas da zijadenna anezañ ha da voda ar veleien vraz gand ar Huzul-meur a-bez ha diskenn Paol da vond dirazo.

Paol dirag ar Sanedrin

XXIII ¹ Paol, e zaoulagad o para war ar Sanedrin, a zisklerias : « Breudeur, beteg-henn am-eus renet va buez dirag Doue gand eur goustiañs direbech ». ² Med ar beleg meur Ananias a roas urz d’e skoazellerien da skei gantañ war e henou. Ha Paol dezañ neuze : ³ « Te eo a zo o vond da veza skoet gand Doue, moger gwennet, azezet out evid va bam hervez al Lezenn hag en desped d’al Lezenn e roez urz da skei ganin ». ⁴ « Taol evez, eme dezañ ar skoazellerien, gwall gomz a rez da veleg-meur Doue ». ⁵ « Ne ouien ket, breudeur, eme Baol, e oa eñ ar beleg-meur, rag skrivet eo : ne wallgomzi ket a-eneb mestr da bobl.

⁶ Goud a ouie ez oa dirazañ diou gostezenn hini ar Saduseaned hag hini ar Farizianed, neuze e youhas e-kreiz ar Huzul-meur : « Breudeur, farizian on, mab da farizianed ; ablamour d’am esperañs en adsao ar re varo da veo eo ez on degaset dirag al lezvarn ». ⁷ A-veh m’e-noa echu da ziskleria kement-se, ma savas dizemgleo etre Farizianed ha Saduseaned hag e oe disparti etre an dud. ⁸ Hervez ar Saduseaned, n’eus nag adsao da veo, nag elez, na spered, e-leh ar Farizianed a gelenn ez eus anezo. ⁹ Neuze e savas eur pez karnach. Hiniennou euz ar skribed diouz kostezenn ar Farizianed a zavas hag a zisklerias stard : « Ne gavom netra da rebech d’an den-mañ… ha m’e-nije komzet eur spered outañ pe eun êl ¹⁰ Hag o veza ma ’z ee an traou gwasoh gwaz, ar homandant, gand aon na ve draillet Paol ganto, a roas urz d’ar zoudarded da ziskenn evid e denna euz o zouez hag e gas a-nevez d’ar hastell-kreñv. ¹¹ En noz war-lerh, an Aotrou a zeuas dirag Paol hag a lavaras dezañ : « Dalh mad ! rag emaout o paouez rei din testeni e Jeruzalem hag e ranki rei din ivez testeni e Rom.

¹² Pa oe deuet an deiz, ar Juzevien a iriennas hag a douas chom heb debri nag eva ken n’o-defe lazet Paol. ¹³ Ouspenn daou ugent e oant o kemered perz en irienn-se. ¹⁴ Mond a rejont da weled ar veleien vraz hag ar gozidi hag e lavarjont dezo : « Touet on-eus, dre eul le meur, chom heb kemered tamm a-raog beza lazet Paol. ¹⁵ Neuze, diouz ho tu, a-unan gand ar Huzul-meur, kinnigit d’ar homandant e zegas deoh war zigarez ober gwelloh enklask war e gont, ha ni a zo prest d’e laza a-raog ma vo degouezet ». ¹⁶ Med mab c’hoar Paol a glevas ano euz ar stign edont oh antella ; mond a reas d’ar hastell-kreñv, antreal a reas e-barz ha rei kelou da Baol. ¹⁷ Gelver a reas Paol unan euz ar hantenerien ha lavared dezañ : « Kas ar pôtr yaouank-mañ d’ar homandant, eun dra bennag e-neus da lavared dezañ ». ¹⁸ Ar hantener a gemeras anezañ gantañ hag e gas d’ar homandant. « Ar prizoniad Paol, emezañ, e-neus va galvet, ha goulennet diganin degas dit ar pôtr yaouank-mañ ; eun dra bennag e-neus da lavared dit ». ¹⁹ Ar homandant a grogas en e zorn hag a yeas gantañ a gostez hag a houlennas outañ : « Petra az-peus da lavared din ? » ²⁰ « Ar Juzevien, eme dezañ ar pôtr yaouank, a zo en em glevet evid goulenn diganit degas Paol warhoaz dirag ar Sanedrin, war zigarez ober sklerroh enklask diwar e benn. ²¹ Gand a ri, arabad dit fizioud enno ; ouspenn daou ugent e vezint, kuzet evid e spia ; touet o-deus chom heb dibri nag eva ken n’o-dezo e lazet ; prest int bremañ, ne hortozont nemed da asant ». ²² Ar homandant a zigouvias ar pôtr yaouank ; « Na lavar da zen ebed, a gemennas dezañ’ ez-peus diskuillet din an irienn-se.

Paol kaset da Zezarea

²³ Gelver a reas neuze daou euz ar gantenerien, hag e lavaras dezo : « Grit ma vo prest da vond da Zezarea, kerkent ha nav eur diouz an noz, daou hant soudard, deg marheg ha tri-ugent ha daou hant skoazeller ; ²⁴ ra vo prest kezeg ivez evid kas Paol yah ha dibistig da Felisius ar gouarnour. ²⁵ Skriva ’reas eul lizer, kement-mañ a lavaras : ²⁶ Klaodius Lisias, d’ar gouarnour mad meurbed, salud ! ²⁷ Ar Juzevien o-doa kroget en den a gasan dit hag edont o vond d’e laza pa c’hoarvezis gand soudarded evid e denna diganto, rag edon o paouez kleved ez oa eur sitoian roman. ²⁸ Felloud a ree din gouzoud a betra e oa tamallet, setu perag am-eus lakeet e zegas dirag ar Huzul meur. ²⁹ Gweled am-euz ez oa tamallet dezañ e zizemgleo e-keñver traou euz o feiz, med heb na vefe netra hag a dalfe ar maro pe ar chadennou. ³⁰ Kemennet eo bet din edod o pourchas eur gwall daol a-eneb an den-se. Kas a ran anezañ dit en eur gemenn d’e damallerien o-doa da zougenn klemm dirazout a-eneb dezañ. Salud !

³¹ Ar zoudarded a reas ar pez a oa bet gourhemennet dezo, hag e-pad an noz e kasjont Paol da Antipatris ; ³² Antronoz, ar zoudarded a lezas ar varheien da gendelher asamblez gantañ hag a zeuas war o giz d’ar hreñv-leh. ³³ Kerkent ha ma oent degouezet e Sezarea, ar varheien a roas al lizer d’ar gouarnour hag a zegasas Paol dirazañ. ³⁴ Ar gouarnour a lennas al lizer hag a houlennas euz peseurt rann-vro ez oa ginidig. Pa glevas ez oa euz ar Silisia : ³⁵ « Me zelaouo ahanout, emezañ, pa vo degouezet amañ ivez ar re a zo ouz da damall ». Hag e roas urz da zelher anezañ e pretordi Herodez.

Prezegenn Tertullus

XXIV ¹ Pemp devez goudeze e tiskennas ar beleg braz Ananias gand kozidi hag eun alvokad anvet Tertullus. Dougenn a rejont klemm dirag ar gouarnour a-eneb Paol. ² Hemañ a oe galvet da zond, ha Tertullus a stagas evel-hen gand e damallou : « A drugarez dit ha da gement az-peus bet ar vadelez da adreiza evid ar bobl-mañ, eo e hellom beva e peoh. ³ E peb leh hag e peb amzer, Felisius mad meurbed, gand leun a anaoudegez e resevom ar madoberou-se. ⁴ Evid mired na jomin re bell da derri dit da benn, va frezegenn a vo berr. Bez, mar plij, ar vadelez da zelaou anezi gand da lealded brudet mad. ⁵ Deuet om da houzoud ez oa an den-se eur vosenn o lakaad freuz ha reuz e-touez oll Juzevien ar bed, eur penn-stourmer eo euz rann-gredenn an Nazareaned. ⁶ Klasket e-neuz zoken disakra an Templ, ha neuze on-eus lakeet harz warnañ. ⁸ Te hello, da-unan, oh ober goulennou outañ, gweled eo gwir an oll rebechou a reom dezañ. ⁹ Ar Juzevien a gavas mad e gomzou hag a lavaras edo an traou evel-se.

Prezegenn Paol dirag ar gouarnour

¹⁰ Ar gouarnour, gand eur zin, a bedas Paol da gaozeal. Paol a lavaras : « Goud a ouzon e lakeez ar justis da ren en or bro abaoe kalz a vloaveziou a zo. A galon vad eta ez an d’en em zidamall. ¹¹ Ez eo dit her gouzoud, n’eus ket ouspenn daouzeg devez abaoe m’on pignet da Jeruzalem, evid adori. ¹² Ha, nag en Templ, nag er zinagogou, nag e kêr n’e-neus kavet den ahanon o tabutal gand unan pe unan pe o lakaad freuz e-touez an dud. ¹³ An dud-mañ n’int ket gouest, tamm ebed, da ziskouez eo gwir an tamallou a reont din bremañ. ¹⁴ Setu amañ ar pez a anzavañ dit : e servich Doue on tadou emaon hervez an Hent a zo, diouz o zoñj dezo, eur rann-gredenn. Me ’gred e kement a zo skrivet el Lezenn hag er Brofeded. ¹⁵ An esperañs-mañ am-eus e Doue, hag ar re-mañ ivez a hortoz kemend-all, e vo eun adsao da veo evid ar re just hag evid ar beherien, ¹⁶ ha setu perag e klaskan, me ivez, delher dalhmad va houstiañs direbech dirag Doue ha dirag an dud. ¹⁷ Deuet e oan en-dro goude kalz a vloaveziou da zegas aluzennou ha provou da dud va bro, ¹⁸ Neuze eo e oen kavet en Templ e dibenn va glanidigez, n’oa nag engroez, na freuz… ¹⁹ Eun nebeud Juzevien euz an Azia hebken… Ar re-ze eo a dlefe beza deuet dirazout evid tamall ahanon, m’o-doa da vianna eun dra bennag da rebech din. ²⁰ Pe neuze, n’o-deus ar re-mañ nemed lavared peseurt taol fall o-deus kavet pa oen galvet dirag ar sanedrin, ²¹ daoust hag e ve kement-mañ, am-boa youhet euz va zav en o-zouez : « ablamour da adsao ar re varo eo e teuan hirio dirazoh evid beza barnet ? » ²² Felisius hag a ouie mad-tre kement a zell ouz an Hent a apellas : « Me varno an dra-mañ, emezañ, pa vo diskennet amañ ar homandant Lisias ». ²³ Urz a roas d’ar hantener da zelher Paol er prizon, med da veza mad outañ heb mired ouz hini ebed euz e dud da renta servich dezañ.

Paol er prizon

²⁴ Eun nebeud deveziou goudeze, Felisius en em gavas asamblez gand Druzilla e bried, eur Juzevez anezi. Gelver a reas davetañ Paol, hag e selaouas anezañ : o komz euz ar feiz er Hrist Jezuz. ²⁵ Med o veza ma troe o divizou war-zu ar justis, ar gwall youlou da reiza hag ar varnedigez da zond, Felisius, kroget aon ennañ, a lavaras da Baol : « Evid an dro-mañ en em denn kuit, me da halvo a-nevez eun dro all. » ²⁶ Kendelher a ree koulskoude da esperoud e rofe Paol arhant dezañ, ha setu perag e lakee anezañ da zond d’e weled, aliez awalh zoken. ²⁷ Daou vloaz goudeze, war-lerh Felisius e teuas Portius Festus hag hemañ, c’hoant dezañ plijoud d’ar Juzevien, a lezas Paol er prizon.

Paol dirag Festus. Apell da Zezar

XXV ¹ Tri devez goude beza degouezet en e rann-vro, e pignas Festus euz Sezarea da Jeruzalem. ² Ar veleien vraz ha pennou braz ar Juzevien a zeuas dirazañ da zougen klemm a-eneb Paol. ³ Dre drubardèrez e pedont hag e houlennont e-nefe ar vadelez da zegas Paol da Jeruzalem, med e gwirionez o zoñj a oa evel-se kavoud tro da ober eur gwall daol evid e laza e-pad e veach. ⁴ Festus a-vad a respontas eo e Sezarea edo Paol er prizon, hag ouspenn, n’eus forz penaoz, eñ a oa war-nez kuitaad. ⁵ « Ar re ahanoh eta, emezañ c’hoaz, hag o-defe da weled war gement-se, n’o-deus nemed diskenn asamblez ganin da Zezarea, ha ma ’z eus en den-se tra-pe-dra ha na vefe ket eeun, dezo da zougen klemm a-eneb dezañ ».

⁶ Festus ne jomas ket ganto ouspenn eun eiz pe zeg devez. Eur wech diskennet da Zezarea, ez eas, antronoz, d’al lézvarn hag e roas urz da zegas Paol. ⁷ Pa oe erruet Paol, ar Juzevien, diskennet euz Jeruzalem, en-dro dezañ, a reas dezañ eur bern tamallou grevuz, med n’oa anezo nemed tamallou goullo. ⁸ Paol a gendalhe d’en em zivenn : « N’am-eus greet torfed ebed, nag a-eneb Lezenn ar Juzevien, nag a-eneb an Templ, nag a-eneb an Impalaer ». ⁹ Gand ar c’hoant da veza deuet mad d’ar Juzevien, Festus a ginnigas kement-mañ da Baol : « A-du emaout da zevel da Jeruzalem evid ma vo barnet da brozez eno dirazon ? » ¹⁰ Med Paol a respontas : « Dirag lézvarn an impalaer emaon, aze eta eo e tlean beza barnet. Ar Juzevien, n’am-eus greet droug ebed dezo, her gouzoud a rez da-unan. ¹¹ Ma ’z on kabluz e gwirionez, m’am-eus greet eun torfed bennag, din a varo, ne fell ket din tehed rag ar maro, med ma n’ez-euz nemed tamallou goullo gand ar re-mañ, n’e-neus den gwir d’am lakaad etre o daouarn. Ober a ran galv d’an Impalaer. ¹² Festus a houlennas neuze o ali digand e guzulerien hag a respontas : « Greet az-peus galv d’an Impalaer, mond a ri dirag an Impalaer ».

Paol dirag Agripa

¹³ Eun nebeud deveziou goudeze, ar roue Agrippa ha Berenis, deuet da zaludi Festus, a zegouezas e Sezarea. ¹⁴ Ha peogwir e taleent eno eur pennad, Festus a gomzas d’ar roue diwar-benn Paol. « Amañ, emezañ, ez-eus eun den bet dalhet er prizon gand Felisius. ¹⁵ E-pad m’edon e Jeruzalem, ar veleien vraz ha kozidi ar Juzevien a zo deuet d’am havoud da zougenn klemm a-eneb dezañ ha goulenn ma ve kondaonet. ¹⁶ Respontet am-eus dezo n’oa ket kustum ar Romaned da rei eun den tamallet heb na vefe bet lakeet dirag e damallerien ha roet tro dezañ d’en em zivenn a-eneb an tamallou greet dezañ. ¹⁷ En em gavet int eta amañ, hag heb dale tamm, antronoz end-eeun, am-eus kemeret plas el lézvarn ha roet urz da zegas an den-se. ¹⁸ Pa oant bodet en-dro dezañ, an damallerien n’o-deus kavet da damall dezañ netra euz an traou grevuz edon o hortoz. ¹⁹ N’o-doa da rebech dezañ, n’ouzon ket petra diwar-benn o hredennou dezo ha dreist oll diwar-benn eun den anvet Jezuz hag a zo maro, med hervez Paol a zo beo atao. ²⁰ O veza ma ne ouien ket penaoz dirouestla ar gudenn-se, am-eus kinniget dezañ mond da Jeruzalem evid beza barnet eno war gement-se, ²¹ Med Paol e-neus greet galv da varnedigez e veurded an Impalaer, ha me am-eus roet urz d’e zelher er prizon beteg ma vo kaset dirag an Impalaer ». ²² Neuze e lavaras Agripa da Festus : « Me am-eus c’hoant d’am zro kleved an den-se ». « Kerkent ha warhoaz e klevi anezañ », a oe respontet dezañ.

²³ Antronoz e tegouezas Agripa ha Berenis, digoradur ganto ; antreal a rejont e sal al lézvarn, ganto ofiserien euz ar re uhella ha pennou braz kêr. Festus a roas urz da zegas Paol hag hemañ a oe degaset. ²⁴ Festus a lavaras : « Roue Agripa, ha c’hwi oll hag a zo ganeom, gweled a rit an den-mañ ; pobl Israel a-bez a zo deuet d’am gweled diwar e benn, e Jeruzalem ha beteg amañ, en eur grial ne helled ket e lezel da veva pelloh. ²⁵ Evidon-me, n’am-eus kavet er pez e-neus greet netra evid e varn d’ar maro, med peogwir n’am-eus netra resis da skriva diwar e benn d’ar mestr meur, am-eus e zegaset : dirazoh, dirazout-te dreist-oll, roue Agripa, evid ma hellin skriva dezañ war-lerh ar breudou-mañ. ²⁷ Diskiant e ve, d’am zoñj din, kas eur prizonier heb na ve diskleriet an tamallou greet dezañ.

Prezegenn Paol dirag Agripa

XXVI ¹ Agripa a lavaras da Baol : « Aotre az-peus da zivenn da gaoz ». ² Neuze Paol a astennas e zorn hag evid en em zivenn a lavaras : « Eüruz on, Roue Agripa, da gaoud tro hirio d’en em zivenn dirazout euz an oll damallou ³ savet a-eneb din gand ar Juzevien, rag te a anavez mad o boazamañchou ha kement a zo leh a dabut etrezo. Bez eta ar vadelez d’am zelaou gand pasianted. ⁴ Azaleg va yaouankiz, al lodenn genta euz va buez, am-eus tremenet e Jeruzalem, e-touez tud va bro, an oll Juzevien a anavez anezi. ⁵ Abaoe pell ’zo e ouzont hag e hellont rei testeni a gement-se, da vianna ma fell dezo, am-eus bevet hervez ar pez strisa euz or relijion, e-giz farizian, ⁶ ha bremañ on degaset dirag al lézvarn, en abeg m’am-eus esperañs er bromesa greet gand Doue d’on tadou, ⁷ ar bromesa ema heb ehan, noz-deiz, dre o fedennou, an daouzeg meuriad, o hortoz ma vefe sevenet. En abeg d’an Esperañs-se eo, o Roue, ez on tamallet gand ar Juzevien. ⁸ Perag e soñjer en ho touez n’heller ket kredi e teu Doue da adsevel ar re varo ?

⁹ Evidon-me, a grede din, oa va dever stourm ar pez ma hellen ouz ano Jezuz an Nazarean. ¹⁰ Hag an dra-ze eo am-eus greet e Jeruzalem ; me va-unan am-eus taolet er prizon eun niver braz a zent, dre ar galloud roet din gand ar veleien vraz, hag am-eus roet va mouez evid o has d’ar maro. ¹¹ En eur vond dre an oll zinagogou, ne ehanen ket da vernia warno kastiz war gastiz, evid o lakaad da vallozi, hag e va gwasa kounnar e reden war o lerh beteg ar hêriou estren. ¹² Eun deiz edon war hent Damas, peb galloud ha peb kemennadurez am-boa bet digand ar veleien vraz ; ¹³ en hent edon, o Roue, pa welis o tond euz an Neñv, skedusoh eged an heol eur sklerijenn hag a hronnas ahanon-me hag ar re a ree hent ganin. ¹⁴ Oll ez-om kouezet d’an douar hag e klevis eur vouez o lavared din : « Saul ! Saul ! Perag e teuez d’am heskina ? Kalet eo dit rebarbi ouz ar broud. » ¹⁵ « Piou out, Aotrou ? » eme-ve. Hag an Aotrou a-nevez : « Jezuz on, me eo a heskinez ; ¹⁶ sav dres war da dreid, sed-amañ perag am-eus en em ziskouezet dit : te a zervicho da dest euz ar weledigez ahanon emaout o paouez kaoud hag euz ar re all az-pezo c’hoaz. ¹⁷ Da ziwall a ran dija diouz ar bobl ha diouz ar bayaned. War-zu enno eo e kasan ahanout ¹⁸ evid digeri dezo o daoulagad, o distrei euz an deñvalijenn d’ar sklerijenn, euz galloud Satan da Zoue, evid m’o dezo ar pardon euz o fehejou ha perz en hêrez gand ar zent dre ar feiz ennon. »

¹⁹ Azaleg neuze n’on ket bet difiziuz ouz ar weledigez-se deuet euz an Neñv. ²⁰ Er hontrol eo, prezeget am-eus da genta da dud Damas ha da dud Jeruzalem, e bro Judea a-bez, ha goudeze d’ar poblou payan am-eus roet da anaoud e oa red dezo cheñch buez hag en em drei ouz Doue, en eur jeñch an oberou. ²¹ Kement-se eo ar penn-kaoz m’o-deus ar Juzevien kroget ennon, pa edon en Templ, ha klasket va laza. ²² Gand nerz Doue ouz va diwalL beteg henn e kendalhan eta da rei testeni dirag ar re vian hag ar re vraz. Ar brofeded ha Moizez o-doa diouganet ar pez a dlee erruoud ; ne lavaran ket muioh. ²³ Ar Hrist e-neus gouzañvet, hag eñ, ar henta da veza savet a-douez ar re varo, a dlee embann ar sklerijenn d’ar Bobl ha d’ar bayaned. »

²⁴ Aze e oa degouezet Paol gand e brezegenn pa lavaras Festus a vouez kreñv : « Na te a zo diskiant, Paol, gand da oll zeskadurez emaout o koll da benn. » ²⁵ « N’on ket diskiant, Festus enoruz », eme Baol, « da gleved e roan komzou a wirionez hag a skiant vad. ²⁶ Ar roue emaon o komz outañ gand hardisegez a anavez mad, a-dra-zur, an traou-se hag e kredan stard ne jom netra dianav evitañ, rag n’eo ket en eur horn douar bennag kuz ha distro eo bet degouezet an traou-se. ²⁷ Ha kredi a rez er brofeded, roue Agripa ? Me oar e kredez enno. » ²⁸ Neuze e lavaras Agripa da Baol : « C’hoaz eun nebeud hag e ri din da gredi az-peus greet eur hristen. » ²⁹ « C’hoaz eun nebeud pe galz », eme Baol, « plijet gand Doue e teufes, n’eo ket te hebken med ar re oll a zo hirio ouz va zelaou heñvel poch ouzin-me,…heb ar jadennou a zougan ! » ³⁰ Ar roue a zavas hag ivez ar gouarnour ha Berenis hag ar re o oa azezet en-dro dezo. ³¹ En eur guitaad, e komzent kenetrezo : « An den-se », emezo, « ne ra netra din a varo pe a jadennou. » ³² Agripa neuze da Festus : « An den-se a vije gellet frankiza paneved m’e-neus greet galv d’an Impalaer. »

En hent da vond da Rom

XXVII ¹ Goude ma oe bet divizet on lestra evid mond d’an Italia, e oe fiziet Paol hag eun nebeud prizonidi all en eur hantener anvet Julius euz kohortenn Aogusta. ² Pignet om neuze e bourz eul lestr euz Adramision war-nez loh da vond war-zu aochou an Azia, hag ez om eet er mor. Bez’ ez oa ganeom eur Makedonian euz Tesalonika, Aristark e ano. ³ Antronoz, e-pad eun ehan e Sidon, Julius, hag a oa hegarad e-keñver Paol, a roas aotre dezañ da vond da weled e vignoned ha da gaoud sikour diganto. ⁴ Ahano, eet er mor adarre, on-eus greet hent e gwasked enezenn Chipr, rag avel a-eneb or-boa. ⁵ Neuze e treuzjom ar mor a sko war ar Silisia hag ar Pamfilia, hag on-eus dilestret e Mir, el Lisia. ⁶ Ar hantener a gavas eno eul lestr euz Aleksandria a oa o vond d’an Italia hag a lakeas ahanom da zevel er bourz. ⁷ E-pad eun nebeud deveziou ez ejom gouestadig, ha n’eo ket heb poan e tegouezjom dirag Knid, hag o veza m’or boa avel a-benn on-eus tremenet izelloh eged enez Kreta, troet war-zu ar beg douar Salmone ⁸ ha p’or-boa tremenet dirazañ e tegouezjom en eul leh anvet Porziou-mad tost da gêr Lasaia.

⁹ Med eur pennad mad a amzer a oa tremenet ; mond er mor a zeue bremañ da veza riskluz, peogwir oa tremenet amzer ar yun. Paol a c’hoanteas lavared e zoñj : ¹⁰ « Mignoned, emezañ dezo, kavoud a ra din e tegouezo gaou braz o vond er mor, ha n’eo ket hebken gand al lestr hag al lestrad, med ivez ganeom-ni. ¹¹ Ar hantener, koulskoude, e-noa muioh a fiziañs er habitenn hag e kannad ar paramantour eged er pez a gemenne Paol. ¹² Ha peogwir n’oa ket ar porz euz ar re wella evid goañvi, an darn vrasa a oa a-du da zistrei er mor, gweled e vefe hag e hellfed tizoud Feniz, eur porz euz enez Kreta troet d’ar mervent ha d’ar walarn, ha goañvi eno.

Ar wall amzer

¹³ Eun êzennig a oa savet da c’hweza euz ar hreizteiz hag e soñje dezo e hellfent dond a-benn da zeveni o mennad ; an eor a oe savet hag e klaskjont mond a-hed aochou enez Greta. ¹⁴ Med raktal, koulz lavared, e tirollas warno, o tond euz an enezenn, eur gorventenn, an hini a anver « Eurakillon ». ¹⁵ Al lestr a yeas gand an avel, heb gelloud herzel outi, hag o lezel da vond ez eem gand red ar mor. ¹⁶ Gand tiz e tremenjom en izel d’eun enezennig anvet Klaoda, gellet on-eus koulskoude gand poan suja ar vagig. ¹⁷ P’or-boa savet anezi e rajom ar pez a hellem gand ar pez or-boa : kelhia al lestr gand kerdin, ha gand aon da vond da ober peñse war ar Sirtenn, lezel da gas an eor neuñv hag on-eus kendalhet evel-se da vond gand red ar mor. ¹⁸ Antronoz peogwir e kendalhem da veza gwall hejet gand ar wall-amzer e oe taolet fred er-mêz. ¹⁹ Ha d’an trede deiz, ar vartoloded gand o daouarn o-unan a ziskaras ar herdin. ²⁰ Abaoe meur a zevez ne veze gwelet nag heol, na steredenn. Ar gorventenn a bade ken gwaz ha biskoaz. Kollet or-boa peb fiziañs da veza saveteet. ²¹ N’or-boa debret netra, pell a oa, pa zeuas Paol en e zav en o zouez da lavared dezo : « Gweled a rit, va mignoned, red e vefe bet deoh va zelaou : chom en enez Kreta kuit da gaoud ar gaou hag ar hollou on-eus bet. ²² Med bremañ e pedan ahanoh da jom kaloneg, rag hini ebed ahanoh ne gollo amañ e vuez, al lestr hebken a vo kollet ; ²³ en noz-mañ, end-eeun, eun êl d’an Aotrou, an hini a zervichan a zo deuet dirazon, ²⁴ hag e-neus lavaret din : « bez dienkrez, Paol, mond dirag an Impalaer a rankez ha Doue a ro dit dre hraz ivez buez ar re oll a zo war vor ganit ». ²⁵ Bezit kaloneg eta, mignoned, fiziañs am-eus e Doue, an traou a yelo evel m’eo bet lavaret din ». ²⁶ Steki a rankom war eun enezenn.

²⁷ D’ar pevarzegved nozvez, ha ni kaset ha degaset gand youl ar mor Adriantel, war-dro hanter-noz, ar vartoloded a zeuas douetañs dezo, edom o tostaad ouz an douar en eun tu bennag ; ²⁸ teurel a rejont ar zond hag e kavjont ugent gourhedad ; eet eun tammig pelloh e sondjont adarre hag e kavjont pemzeg, ²⁹ Gand aon da veza taolet war eur garreg bennag e taoljont er mor peder eor ar penn-adreñv ; mall braz o-doa da weled an deiz o tond. ³⁰ Med, war zigarez delher al lestr war an eoriou a-raog, ar vartoloded a glaske tehed euz al lestr hag a lakee ar vagig er mor. ³¹ Paol a lavaras neuze d’ar hantener ha d’ar zoudarded : « Ma ne jom ket an dud-se er bourz, c’hwi ne helloh ket beza saveteet. » ³² Neuze ar zoudarded o deus trohet kerdin ar vagig ha lezet anezi da vond. ³³ Da hortoz an deiz, Paol a alias an oll da zebri, « Setu, emezañ, ar pevarzegved devez m’emaoh en anken, war yun, ³⁴ kredit ahanon, debrit bremañ, evid ho silvidigez eo an dra-ze. Eur wech c’hoaz, hini ebed ahanoh ne gollo eur vlevenn euz e benn. » ³⁵ War gement-se e kemeras bara hag en em roas da zebri. ³⁶ An oll neuze, deuet nerz kalon dezo adarre, a zebras d’o zro. ³⁷ Daou hant c’hwezeg ha tri ugent a oa ahanom en oll er bourz ³⁸ P’o-doa torret o naon ; evid skañvaad ar vag e oe taolet ar gwiniz er mor.

³⁹ Pa oe deuet an deiz, ar vartoloded ne anavezjont ket an douar, med gweled a rejont eun aod gand eur riblennad trêz, hag e tivizjont ma ve posubl dezo mond da steki eno. ⁴⁰ Neuze o-deus lezet an eoriou da vond dre ar penn-a-raog, endra ma oe distaget ereou ar sturiou a-dreñv. Sevel a rejont neuze ar mizan-ballouin hag o-deus skoet war-zu an aod. ⁴¹ Med steki a rejont en eun drêzenn, al lestr a jomas sanket eno, ar penn-a-raog speg en trêz, e-keid ha ma oe distammet an diadreñv gand an tonnou. ⁴² Ar zoudarded a deuas dezo ar zoñj da laza ar brizonidi, gand aon na zeufent da dehed war neuñv. ⁴³ Med ar hantener, c’hoant dezañ savetei Paol, a viras outo da zeveni o mennad ; d’ar re a ouie neuñv e roas urz da lammed en dour da genta ha da vond en douar. ⁴⁴ Ar re all her grafe war bleñch pe goatachou all euz ar vag. Hag evel-se eo e tegouezjont oll en douar yah ha dibistig.

Paol en enez Malt

XXVIII ¹ Pa oem e savete, on-eus gouezet oa Malt ano an enezenn. ² Tud ar vro a zo bet hegarad evidom, evel ral a gaver. Greet o-doa eun tan braz ha pedet ahanom da dostaad outañ, rag deuet oa ar glao da goueza ha yen oa an amzer. ³ Paol e-noa dastumed eur vriad keuneud sêh, hag edo o teurel ar heuneud en tan pa grogas en e zorn eun naer a oa tehet a-raog ar gwrez. ⁴ P’o-doa gwelet al loen-stlej a istribill ouz e zorn, tud ar vro a lavare kenetrezo : « Heb douetañs ebed an den-se a zo eun torfedour, saveteet eo bet euz ar mor, med justis Doue ne lez ket anezañ da veva. » ⁵ Paol avad a hejas an naer en tan ha n’e-noe diêzamant ebed. ⁶ Int-i a oa o hortoz gweled anezañ o koeñvi pe o koueza maro-mik ; med goude beza gortozet hir amzer ha gwelet ne zegoueze gantañ droug ebed, e cheñchjont soñj hag e lavarjont : « Eun Doue eo. »

⁷ Demdost ahano ez oa douarou a oa d’an den a renk uhella a oa en enezenn, e ano Publius ; on degemeret e-noa ha roet repu deom, en eun doare hegarad e-pad tri devez. ⁸ E dad a oa d’ar mare-se war e wele, klañv gand an derzienn hag ar red-korv. Paol a yeas d’e weled, ha dre ar bedenn hag oh astenn warnañ e zaouarn e pareas anezañ. ⁹ Goudeze e teuas beteg ennañ oll glanvourien all an enezenn hag e oent pareet ivez. ¹⁰ Enoriou a beb seurt o-deus greet deom ha pa oem eet adarre er mor, o-doa pourveet d’on ezommou.

Euz enezenn Malt da Rom

¹¹ Tri miz diwezatoh eo ez om eet adarre er mor e bourz eul lestr euz Aleksandria, e arouez a oa an « Dioskoured », goañvet e-noa en enezenn. ¹² Dilestr a rejom e Sirakouz, evid tri devez ehan. ¹³ Ahano, en eur vond a-héd bord an douar, eh errujom e Reggio. Antronoz e c’hwezas an avel euz ar su hag e daou zeveziad e tegouezjom e Pouzol. ¹⁴ Eno e kavjom breudeur a bedas ahanom da dremen eur zizunvez ganto. Setu aze penaoz ez om eet da Rom. ¹⁵ Euz ar gêr-se e teuas en arbenn deom, beteg forum Appius hag an deir davarn, ar vreudeur o-doa klevet ez oam degouezet. Ouz o gweled, Paol a rentas gloar da Zoue. Fiziañs a zeuas dezañ en-dro. ¹⁶ Pa oem en em gavet e Rom e oe roet aotre da Baol da jom en e di e-unan gand eur zoudard evid e ziwall. ¹⁷ Tri devez war-lerh e pedas ar pennou braz euz ar Juzevien da zond davetañ. Pa oent degouezet e lavaras dezo : « Va breudeur, me, daoust n’am-eus greet netra a-eneb ar bobl, nag a-eneb al lezennou deuet deom digand on Tadou, a zo er prizon abaoe m’on bet lakeet e Jeruzalem etre daouarn ar Romaned. ¹⁸ Goude beza greet goulennou ouzin, e felle dezo rei din va frankiz, o veza ma n’oa netra war va hont hag a veritfe ar maro. ¹⁹ Med peogwir edo ar Juzevien a-eneb din, am-eus ranket gelver an Impalaer da varner, n’eo ket avad m’am-befe bet difiziañs euz tud va bro ; ²⁰ setu perag am-eus goulennet ho kweled ha komz ganeoh, rag ablamour da Esperañs Israel eo e tougan ar chadennou-mañ ». ²¹ « Evidom-ni, emezo dezañ, n’on-eus resevet lizer ebed euz bro Judea diwar da benn ; hini ebed euz ar vreudeur a zegoueze amañ n’e-neus komzet deom euz eur skrid pe eur helou bennag a vefe fall evidout. ²² Med goulenn a reom a-vad klevoud ahanout o tisplega, te, da-unan, ar pez a zo en da zoñj, rag evid ar pez a zell ouz da dreuz-kredenn, ni a oar e kav avel a-benn dirazi e peb leh ».

²³ Deiziet e oe ar vodadenn, hag e teujont niverusoh c’hoaz d’al leh m’edo o loja. Dre e gomzou e rente testeni da rouantelez Doue, hag euz ar mintin beteg an noz e klaskas o degas d’ar feiz en eur gomz euz Jezuz azaleg lezenn Voizez hag ar brofeded. ²⁴ Lod a oe desevet gand ar pez a lavare, lod all ne felle ket dezo kredi. ²⁵ Pa zeuas ar mare dezo da vond kuit, n’oant ket deuet c’hoaz d’en em gleved Paol ne lavaras netra muioh, nemed an dra-mañ : « Pegen gwir eo komzou ar Spered Santel pa lavare d’on Tadou dre ar profed Izaias :

²⁶ Kee da gavoud ar bobl-se ha lavar dezi :
Kaer ho-po kleved, ne intentoh ket
Kaer ho-po selled, ne weloh ket
²⁷ Rag kaledet eo kalon an dud er vro-se,
Pounner-glev int deuet da veza,
Mouchet o-deus o daoulagad,
Evid chom heb gweled gand o daoulagad
Heb kleved gand o diskouarn
Heb intent gand o halon
Heb trei ouz Doue,
Ha me a roio dezo ar pare. »

²⁸ Red eo deoh gouzoud eo d’ar bayaned eo bet kaset ar zilvidigez. Int-i a zelaouo ²⁹ Diwar ar C’homzou-ze, ez a ar Juzevien kuit, en eur rendael etrezo. ³⁰ E-pad daou vloaz penn-da-benn e vevas Paol evel-se, diwar e goust e-unan hag e roe degemer da gement-hini a zeue d’e gavoud. ³¹ Embann a ree rouantelez Doue, gand hardisegez ha gand frankiz e kelenne kement a zelle ouz Jezuz Krist an Aotrou.