An Testamant Nevez : eil lodenn – Troet e brezoneg gand « Kenvreuriez ar brezoneg » Eskopti Kemper ha Leon, 1988.

 

Pennad-kinnig

Al lizer-mañ a zo bet skrivet, evel al lizer d’ar Gorintianed, evid oll gristenien an Azia-Izella. Displega a ra mister an Iliz, korv ha pried ar Hrist : en Iliz, Juzevien ha payaned, beteg neuze enebourien touet, a zeu d’en em unani en eun Den Nevez hebken :ar Hrist. Rag hiviziken, dre furnez doueel ar Hrist hag e garantez divuzul, ar bayaned int-i ivez o-deus lod er bennoziou doueel en o fez.

 

Lizer d’an Efezianed

I ¹ Paol, abostol Jezuz Krist dre volontez Doue, d’an dud santel, fidel e Jezuz Krist : ² deoh gras ha peoh, a-berz Doue an Tad ha Jezuz Krist an Aotrou.

 Eur hras divent

³ Meulet ra vezo Doue, Tad or Zalver Jezuz Krist, e-neus skuillet warnom, euz lein an neñvou, peb bennoz speredel en Aotrou Krist. ⁴ On dibabet e-neus ennañ, araog ma oa krouet ar bed, evid beza dirazañ santel ha direbech er garantez. ⁵ En araog e-neus divizet ober ahanom bugale perhennet dre Jezuz Krist, setu ar pez a zo plijet d’e volontez : ⁶ ma vo meulet e hloar hag ar hras roet deom brokuz en e Vab muia-karet. ⁷ Ennañ, dre e wad, ez om dasprenet hag on-eus ar pardon euz or pehejou, ken puill eo e hras ⁸ roet deorn brokuz gantañ, e stumm peb furnez ha peb skiant, ⁹ o tiskleria deom ar mister euz e volontez divizet gantañ en e vadelez, ¹⁰ evid urzia an amzeriou diweza, o suja ar bed a-bez d’an Aotrou Krist, kement a zo en nenvou ha kement a zo war an douar. ¹¹ Ennañ ivez oñ-eus bet ol lod : hervez an hini a ra e peb tra e volontez, ez om bet dibabet en araog ¹² evid ma vefem-ni -evid meuleudi e hloar-ar re o-deus en araog lakeet o fiziañs e Doue. ¹³ Ennañ c’hoaz ho-peus klevet komz ar wirionez, Aviel ar zilvidigez, ha lakeet ennañ ho feiz, c’hwi hag a zo bet merket gand siell ar Spered prometet, ¹⁴ a zo an arrez euz on heritach, evid silvidigez ar bobl dasprenet evid meuli e hloar.

 Ar bedenn evid kaoud sklerijenn

¹⁵ Setu perag, me ivez, abaoe m’am-eus klevet ano euz ho feiz er Zalver Jezuz, hag euz ho karantez evid ar zent oll, ¹⁶ ne baouezan ket da drugarekaad ablamour deoh,pa zoñjan ennoh em fedennou. ¹⁷ Plijet gand Doue or Zalver Jezuz Krist, an Tad a zo dezañ ar hloar, rei deoh eur spered a furnez, da ziskuill anezañ deoh, da ober deoh e anaoud da vad ; ¹⁸ ra zigoro ho kalon d’e sklerijenn, evid ober deoh gouzoud peseurt esperañs a zeu deoh diwar e halvadenn, peseurt teñzor eo e hloar, hag an hêrez lodennet gantañ etrezoh hag ar zent ;

¹⁹ pegen braz eo bet e halloud diskouezet en or heñver deom-ni an dud a feiz, e nerz, e oll halloud ²⁰ o lakeet e-neus da labourad en Aotrou Krist, p’e-neus e zavet a-douez ar re varo, hag e lakeet da azeza a zehou dezañ en neñvou, ²¹ kalz uhelloh eged peb beli, peb galloud, peb domani, peb mestroniez, n’eus forz pe ano o-defe, n’eo ket hebken er bed a-vremañ, med ivez er bed da zond. ²² Ya, lakeet e-neus pep tra dindan e dreid, roet e-neus anezañ da veza ar penn euz an Iliz e gorv, a zo hi leunder an Hini a zo peurleuniet gand Doue e-unan.

 Euz ar maro d’ar vuez

II ¹ C’hwi hag a oa maro ablamour d’ho faziou ha d’ar pehejou, ² a reeh gwechall, pa ’z eeh da heul doue ar bed-mañ, ar priñs a zo o ren etre an neñv hag an douar, ar spered a zo bremañ oh oberia e-touez an dud disent, ³ Ni a oa anezo, ni oll ivez a en em leze da vond da youlou on natur-den, o plega d’e dechou fall hag ez oam dre natur heñvel ouz ar re all tonket d’ar gounnar. ⁴ Doue avad, leun a druez ablamour d’ar garantez dreist e-neus evidom, ⁵ d’ar mare m’oam maro dre or pehejou, e-neus buezekeet ahanom a-unan gand ar Hrist -dre hras eo ez oh salvet- a-unan gantañ e-neus on adsavet da veo hag on lakeet da azeza en neñvou, e Jezuz Krist.

⁷ Dre e vadelez evidom eta, e Jezuz Krist, eo fellet dezañ diskouez evid an amzeriou da zond eo e hras pinvidig-mor a vadelez en or heñver, e Jezuz Krist. ⁸ rag gand ar hras eo ez oh salvet, dre ar feiz ; n’eo tamm ebed drezoh hoh unan, an donezon euz a Zoue eo. ⁹ Kement-se ne zeu ket diwar an oberou, evid ma ne zeuio nikun da lorha gantañ. ¹⁰ Rag eñ eo e-neus greet ahanom, e-neus or hrouet e Jezuz Krist evid an oberou mad, bet en araog, pourchaset gand Doue evid ma rafem anezo.

 Oll unanet er Hrist

¹¹ Dalhit soñj eta, c’hwi hag a zouge gwechall en ho korv sin ar bayaned, c’hwi hag a veze greet diamdrohet ahanoh, gand ar re a gav dezo beza amdrohet, en abeg d’an amdroh greet dezo gand dorn an den. ¹² Dalhit soñj ez oah d’ar mare-se heb Mesiaz, en diavez da bobl Israel heb lod ebed e emgleviou ar bromesa, heb esperañs ebed, heb Doue ebed er bed. ¹³ Bremañ avad e Jezuz Krist, c’hwi hag a oa gwechall pell a zo degaset da dost dre wad ar Hrist ¹⁴ rag eñ eo or peoh, eñ hag e-neus lakeet an daou rummad en unan hebken ; en e gorv e-neus diskaret moger an disparti : ar gasoni. ¹⁵ Torret e-neus al Lezenn hag he gourhemennou gand o reolennou. Evel se eo fellet dezañ ober ennañ eun den nevez anezo o-daou Juzeo ha payan o lakaad ar peoh, ¹⁶ o lakaad anezo o-daou d’en em gleved gand Doue en eur horv hebken, dre ar groaz e-neus lazet ar gasoni. ¹⁷ Deuet eo da embann ar peoh deoh, c’hwi, hag a oa pell hag ar peoh d’ar re a oa tost. ¹⁸ Gras dezañ eo on-eus, an eil hag egile, darempred gand an Tad en eur Spered hebken. ¹⁹ Evel-se eta n’hoh mui tud estren na tremenidi, c’hwi a zo kenvroidi d’ar zent, hag euz famill Doue. ²⁰ Plas a zo bet roet deoh er zavadur a zo diazezet war an Ebestel hag ar Brofeded, ha war Jezuz Krist e-unan egiz meñ korn. ²¹ Ennañ peb savadur a vez renket hag a zav beteg eun templ santel en Aotrou. ₂₂ Ennañ c’hwi ivez a zo renket asamblez er zavadur evid dond da veza eun demeurañs da Zoue dre ar Spered.

 Paol, den mister Doue

III ¹ Setu perag, me Paol, prizoniad Jezuz Krist evidoh-hwi ar bayaned, ² m’ho-peus da vianna klevet ano euz ar hras roet din gand Doue evidoh, evid kas da benn ar pez e-noa divizet, ³ penaoz dre eur weladenn on deuet da anaoud ar mister, evel m’am-eus henn lavaret e berr-gomzou.

⁴ Evel-se, ouz va lenn, e hellit gouzoud pebez anaoudegez am-eus euz mister ar Hrist ; ⁵ ar mister-se n’oa ket bet diskuillet da rummadou tud an amzer dremenet, evel m’ema o paouez beza greet bremañ dre ar Spered d’e Ebestel santel ha d’ar Brofeded : ⁶ ar bayaned a zo kenlodeg en heritach, kenlodeg er Horv kenlodeg er bromesa e Jezuz Krist dre an Aviel.

⁷ Greet eo bet ahanon ar ministr a gement-se dre zonezon ar hras roet din gand Doue dre nerz e halloud. ⁸ Me an disterra hini a zo e-touez ar Zent,am-eus bet ar hras-se da embann d’ar bayaned e-neus ar Hrist eur binvidigez a n’hell ket beza dirouestlet, ⁹ ha diskouez sklêr penaoz e kas Doue da benn ar mister miret kuzet ennañ a oll viskoaz, eñ krouer ar bed a-bez. ¹⁰ Hiviziken eta beli ha gallouduziou en neñvou a anavez dre an Iliz liez furmou furnez Doue ¹¹ hervez ar mennad peurbadel e-neus kaset da benn e Jezuz Krist on Aotrou. ¹² Er Hrist on-eus, dre or feiz ennañ, ar frankiz da dostaad leun a fiziañs. ¹³ Setu perag, na zeuit ket, me ho ped, da fallgaloni en abeg d’an trubuillou a houzañvan evidoh, ho kloar int. ¹⁴ Setu perag e plegan va daoulin dirag Doue an Tad. ¹⁵ Anezañ e tenn peb famill e ano, en neñv ha war an douar. ¹⁶ Ra blijo gantañ, hervez sked e hloar ; ho kennerzi dre e Spered evid ma vo kreñveet ennoh an den a-ziabarz, ¹⁷ ha ma vo ar Hrist dre ar feiz oh ober e zemeurañs en ho kalonou deoh gwriziennet er garantez ha diazezet warni, ¹⁸ evid ma vezoh gouest evel-se da intent gand an oll zent petra eo al ledander, an hirder, an uhelder, an donder… ¹⁹ ha da anaoud karantez ar Hrist a zo dreist peb anaoudegez, evid m’ho pezo a-founn beteg reseo a-bez leunder Doue. ²⁰ D’an hini a hell dre e halloud oh oberia ennom, ober muioh, kalz muioh eged a houlennom hag a zoñjom, ²¹ dezañ ar hloar en Iliz hag e Jezuz Krist a rummad da rummad, a gantved da gantvejou. Amen.

 Sevel korv ar Hrist en unaniez

IV ¹ Hoh alia a ran eta en Aotrou, me hag a zo prizoniad, renit ho puez hervez ar halvadenn ho-peus bet ; ² izel a galon ha leun a zouster, gand pasianted, en em houzañvit an eil egile er garantez ; ³ lakit ho poan da zerhel unvaniez ar spered dre liamm ar peoh. ⁴ Eur horv hebken a zo, eur Spered hebken, evel-se ivez ez oh galvet d’eun esperañs hebken, ⁵ eun Aotrou heb-ken, eur feiz hebken, eur vadeziant hebken, 6 eun Doue hebken ha Tad d’an oll, a ra e labour dre an oll, hag a jom en oll. ⁷ Da beb hini ahanom koulskoude eo bet roet ar hras hervez donezon ar Hrist. ⁸ Ahano ar Gomz-mañ : « Pignet d’an uhel, e-neus greet prizonidi, ha roet donezonou d’an dud ».

⁹ Pignet eo ! Petra eo an dra-ze ? Kement-mañ, diskennet eo beteg an traoñ war an douar. ¹⁰ An hini a zo diskennet a zo ivez an hini a zo pignet uhelloh eged an oll neñvou evid leunia ar bed a-bez ¹¹ hag eñ eo e-neus greet Ebestel euz lod, profeded euz lod all, avielerien euz lod all c’hoaz, hag euz lod erfin pastored ha kelennerien ¹² evid ma vo ar zent e stad da ober ar vinistrerez evid diorrenn korv ar Hrist, ¹³ beteg ma tegouezim oll asamblez e unaniez ar feiz hag en anaoudegez euz Mab Doue e stad eun den greet, deuet da vent ar Hrist en e wella. ¹⁴ Evel-se ne vezim ket mui bugale hejet ha dihejet, kaset ha degaset gand peb avel a gelennadurez, touellet gand tud korvigellet d’on lakaad da fazia. ¹⁵ Med o veva en eur garantez gwirion e kreskim e peb doare war-zu an hini a zo ar penn :ar Hrist. ¹⁶ Ar horv a-bez, kenaozet ha kennerzed gand an oll liammou a zegas dezañ magadurez hervez al labour merket da beb ezel, a deu dre ar Hrist da greski evid en em ober er garantez.

 Gwechall ha breman

¹⁷ Se tu amañ eta ar pez a lavaran hag an testeni a roan en Aotrou : na vevit mui evel ar bayaned gand o zoñjou goullo, ¹⁸ beuzet o spered en deñvalijenn, n’o-deus perz ebed e buez Doue, dizesk ma ’z int ha kaledet o halon ; ¹⁹ diskiant ma ’z int, o-deus en em roet d’an hudurnez beteg en em rei d’eul loustoni diroll. ²⁰ C’hwi avad, n’eo ket evel-se ho-peus desket ar Hrist, ²¹ da vianna mar deo anezañ e gwirionez eo ho-peus klevet ano, mar deo eñ eo a zo bet desket deoh, hervez ar wirionez a zo e Jezuz : ²² red eo deoh en em zizober euz ho puez tremenet, dilemel diwarnoh an den koz a zeu da vreina er c’hoantegeziou touelluz. ²³ Red eo deoh beza renevezet gand eur spered a jeñch ho kalon ²⁴ ha gwiska an den nevez krouet hervez Doue er justis hag er zantelez a zeu euz ar wirionez.

²⁵ Setu eta ma’z oh dieubet euz ar gevier : ra lavaro peb hini ar wirionez d’e nesa, rag izili om an eil d’egile. ²⁶ Ma ’zeus droug ennoh ? Na behit ket. Arabad ez afe an heol da guzad war ho kounnar. ²⁷ Na roit ket ennoh krog d’an diaoul. ²⁸ An hini a laere, dezañ paouez da laerez : kentoh kemered ar boan da labourad gand e zaouarn en eun doare onest, evid kaoud peadra da ranna gand an den ezommeg. ²⁹ Komz noazuz ebed ne dle dond diwar ho muzellou, med, diouz red, eur gomz vad bennag, gouest da skoueria ha da rei eur hras bennag d’ar re a glev anezi. ³⁰ Na hlaharit ket ar Spered Santel, e verk dezañ e-neus Doue lakeet warnoh evel eur ziell evid deiz ar frankizadur. ³¹ Komzou treñk, froudennou, kounnar, dismegansou, na vo ano ebed mui a gement-se kenetrezoh, na kennebeud tamm fallagriez ebed. ³² Bezit madelezuz an eil e-keñver egile, bezit kalon vad. Pardonit an eil d’egile evel m’e-neus Doue pardonet deoh er Hrist.

 Skoueriou an Aotrou Doue

V ¹ Kemerit skouer diwar Doue, peogwir ez oh bugale karet gantañ. ² Bevit er garantez, evel m’e-neus ar Hrist or haret, hag en em roet evidom da Zoue en eur brovadenn hag eur zakrifis plijuz da Zoue. ³ Euz orged, hudurnez, n’eus forz e peseurt doare e vefent, euz skraperez, na vo ano ebed zoken en ho touez, evel ma tere da dud santel, ⁴ nag euz loustoni, diotachou, farserez –kement-se n’eo ket deread – med kentoh en em roit d’ar bedenn a drugarez. ⁵ Rag, intentit mad, n’e-n eus an orgeder, nag an den a ra hudurnez nag ar skraper -eun azeuler falsdoueou a zo anezañ- da gaoud perz e rouantelez ar Hrist, rouantelez Doue. ⁶ Arabad da zen touella gand komzou goullo, an dra-ze eo a denn kounnar Doue war an dud disent, ⁷ na vezit ket kenlodeg ganto.

⁸ Gwechall ez oah teñvalijenn, bremañ avad ez oh sklerijenn en Aotrou Krist ; bevit evel bugale ar sklerijenn, ⁹ rag frouez ar·sklerijenn eo peb madelez, peb justis, peb gwirionez. ¹⁰ Gwelit mad petra ’blij d’an Aotrou. ¹¹ Arabad deoh kenlabourad evid oberou difrouez an deñvalijenn, diskuillit anezo kentoh. ¹² Ar pez a ra an dud-se e kuz, mez eo zoken hel lavared. ¹³ Med kement a vez diskuillet a vez diskouezet gand ar sklerijenn, ¹⁴ rag sklerijenn eo ar pez a zo diskouezet, setu perag e vez lavaret :

Dihun ’ta te hag a zo kousket,
sav a-douez ar re varo,
ha warnout ar Hrist a skedo.

¹⁵ Taolit evez ouz ho toare beva, n’eo ket evel tud diskiant, med evel tud fur, ¹⁶ o lakaad da dalvezoud ar mare-mañ, rag fall eo an amzer a vevom. ¹⁷ Na vezit ket diskiant eta, med intentit mad petra eo bolontez Doue. ¹⁸ Arabad deoh beza mezo, kement-se a zoug d’ar vuez diroll, bezit avad leun a Spered Santel : ¹⁹ Lavarit asamblez salmou, imnou, ha kantikou speredel, kanit meulit an Aotrou a greiz kalon. ²⁰ E peb amzer, da beb degouez, lavarit bennoz da Zoue an Tad en ano Jezuz Krist on Aotrou.

 An darempredou nevez

²¹ C’hwi hag ho-peus doujañs evid ar Hrist, sujit an eil d’egile. ²² Gwragez, sujit d’ho pried, evel d’or Zalver, ²³ rag ar gwaz a zo ar penn evid ar vaouez, evel m’eo ar Hrist ar penn evid an Iliz, hag ar Zalver evid he horv. ²⁴ Med evel ma suj an Iliz d’ar Hr.ist, ra zujo ar merhed e peb tra d’o gwazed. ²⁵ C’hwi, gwazed, karit ho kwragez, evel m’e-neus an Aotrou Krist karet an Iliz, ha m’e-neus en em roet eviti, ²⁶ evid he zantellaad en eur walhi anezi gand dour ar vadeziant hag ar Gomz, ²⁷ hag evid lakaad dirazañ an Iliz leun a hloar, warni na si, na rouvenn, na netra evel-se, med santel ha divlam. ²⁸ Evel-se ivez e tle ar gwaz kared e bried evel e gorv dezañ e-unan ; an neb a gar e bried, en em gar e-unan, ²⁹ rag morse ne zeuas den da gaoud kas ouz e gorv, er hontrol eo, e vaga a ra ha kemer soursi anezañ ; evel-se e ra an Aotrou Krist evid e Iliz, ³⁰ rag ni a zo izili euz e gorv. ³¹ Setu perag e kuitaio ar gwaz e dad hag e vamm evid en em staga ouz e bried, ha ne vezint o-daou nemed eur horv hebken. ³² Braz eo ar mister-se, lavared a ran eo hennez mister ar Hrist hag an lliz. ³³ N’eus forz, peb hini ahanoh, evid ar pez a zell outañ, a dle kared e wreg eveldañ e-unan, hag ar wreg a dle douja d’he gwaz.

VI ¹ Bugale, sentit ouz ho kerent en Aotrou, an dra-ze a zo just. ² « Da dad, da vamm a enori », setu aze ar gourhemenn kenta, bet staget outañ eur bromesa : ³ « evid m’az po eürusted ha buez hir war an douar ». ⁴ C’hwi, tadou, arabad deoh hegasi ho pugale, med diorrennit anezo hervez an urz vad ha kenteliou an Aotrou. ⁵ C’hwi, sklaved, sentit ouz ho mistri euz an douar-mañ gand doujañs, en eur grena, eeun a galon, evel ouz ar Hrist, n’eo ket ablamour m’emaoh dirag an dud, evel ma vijeh o klask plijoud dezo, med evel sklaved d’ar Hrist, aketuz da ober bolontez Doue. ⁷ Grit, a volontez vad ho servich, evel pa vijeh e servich an Aotrou, ha n’eo ket e servich an dud. ⁸ Her gouzoud a rit, ar vad e-no greet peb hini, sklav pe frank e ve, a gavo e zigoll a-berz an Aotrou ; ⁹ ha c’hwi, mistri, grit kemend-all en o heñver. Na hourdrouzit ket : c’hwi a oar, evidoh hag evito ar mestr a zo en neñv, ha dirazañ den ne vo espernet.

 Ar stourmad evid ar feiz

¹⁰ A hend-all, tennit ho nerz euz nerz oll-halloudeg an Aotrou. ¹¹ Gwiskit armou Doue evid beza e stad da zerhel penn da droiou-pleg an diaoul, ¹² rag n’eo ket ouz an den on-eus da stourm, med ouz gallouduziou, beli ha domaniez ar bed a deñvalijenn-mañ, ouz sperejou an droug a zo en oablou. ¹³ Gwiskit eta arm Doue evid gelloud, d’an deiz fall, enebi ha chom en ho sav, o veza greet kement a oa red. ¹⁴ En ho sav, eta, ouz ho targreiz gouriz ar wirionez, gwisket ganeoh skoed ar justis, en ho treid boutou al lañs evid embann aviel ar peoh. ¹⁵ Kemerit dreist-oll skoed ar feiz, gantañ e helloh mouga oll virou entanet an diaoul ; ¹⁷ resevit erfin tok-brezel ar zilvidigez, hag ar hleze speredel, da lavared eo Komz Doue. ¹⁸ Ra zeuio ar Spered d’ober deoh pedi e peb doare, ha goulenn da beb mare ; implijit ho peilladegou da bedi dalhmad evid an oll zent ¹⁹ hag evidon-me ivez. Ra vo ar Gomz war ho muzellou evid embann gand hardisegez mister an Aviel, ²⁰ ez on anezañ ar hannad en ereou ; gand ma vo posubl din eo, evel m’eo dleet din henn ober, embann anezañ gand hardisegez.

 Kemennadurez

²¹ Felloud a ra din e ouijeh, c’hwi ivez, e peseurt stad emaon, ar pez aran. Tichik va breur karet, eur ministr gwirion en Aotrou, a roio deoh an oll geleier. ²² E gas a ran deoh a-ratoz, evid lavared deoh e peseurt stad emaom hag evid ho frealzi. ²³ Peoh d’ar vreudeur, karantez ha feiz a-berz Doue an Tad ha Jezuz Krist an Aotrou. ²⁴ Ra vo ar hras gand ar re oll o-deus evid or Zalver

Jesus Krist eur garantez divarvel.