An Testamant Nevez : eil lodenn – Troet e brezoneg gand « Kenvreuriez ar brezoneg » Eskopti Kemper ha Leon, 1988.

PER I.
Pennad-kinnig

Euz a Rom moarvad ha nebeud amzer araog e varo eo e skriv Pèr da gristenien Azia-Izella, heskinet d’ar mare-se. Goulenn a ra diganto trugarekaad Doue da veza roet dezo eur vuez nevez dre ar feiz hag ar vadeziant ha da veza o galvet da reseo hêrez an neñv, an hêrez-se ha n’eo an heskièrèz nemed ar bromesa anezañ.

Displega a ra dezo ar menoziou brasa euz kelennadurez an Ebestel ; alia anezo da ren eur vuez kristen, santel penn-da-benn ha da ziwall ouz ar fals-kredennou.

Kenta lizer sant Pèr

Saludou ha trugarez

I. ¹ Pèr, abostol Jezuz Krist, d’an dud dibabet a zo, evid eur pennad, o veva evel tud estren en Diaspora, er Pont, er Galatia, er Hapadosia, en Azia hag er Bitinia, ² dibabet hervez menoz Doue an Tad dre ar zantelez a zeu euz ar Spered evid senti ouz Jezuz Krist ha kaoud perz er grasou sparfet warnañ gand e wad ; ra zeuio a-fonn deoh ar hras hag ar peoh. ³ Bennoz da Zoue, Tad an Aotrou Jezuz Krist ; en e drugarez vraz e-neus or ganet a-nevez dre adsao Or Zalver Jezuz Krist a-douez ar re varo, evid eun esperañs veo ; ⁴ evid eun hêrez ha ne hell na breina, na beza saotret, na beza gweñvet, eun hêrez miret evidoh en neñvou. ⁵ C’hwi a zo diwallet gand galloud Doue dre ar feiz evid ar zilvidigez a zo prest da veza diskouezet da fin an amzeriou. ⁶ O soñjal e kement-se e tridit gand al levenez, daoust m’eo red deoh c’hoaz, e-pad eun nebeud amzer, beza glaharet gand trubuillou a beb seurt, ⁷ evid ma teuio an dalvoudegez amprouet euz ho feiz – kalz priziusoh eged an aour a ya da fall hag a vez koulskoude amprouet dre an tan – da zegas meuleudi, gloar hag enor p’en em ziskouezo Jezuz Krist.

⁸ Eñ, hag a garit heb beza e welet, eñ hag a gredit ennañ heb e weled bremañ c’hoaz. ⁹ Tridal a rit gand eul levenez vraz meurbed, o veza gounezet ar zilvidigez evid hoh eneou da briz euz ho feiz. ¹⁰ Ar zilvidigez-se, ar brofeded o-deus enklasket hag enklasket piz, ha profedet diwarbenn ar hras a dle beza roet deoh. ¹¹ Klask a reent gouzoud e pe-seurt amzer hag e pe-seurt degouez e ree ano anezo Spered ar Hrist a oa enno hag a verke en araog peseurt poaniou e-nefe ar Hrist da houzañv hag ar hloar a zeufe da heul.

Beva en eun doare santel

¹² Roet e oe dezo da anaoud, n’oa ket evito, med evidoh-c’hwi, evid ar gemennadurez-se o-deus bremañ prezegerien an Aviel embannet deoh dre ar Spered Santel degaset euz an neñv, eur gemennadurez o-deus c’hoant an êlez sellet outi. ¹³ Setu perag bezit prest a spered evid ar zervich ; bezit war evez ha lakit hoh oll esperañs er hras a dle beza roet p’en em ziskouezo Jezuz Krist. ¹⁴ Evel bugale zentus na vevit mui hervez ar youlou a-wechall, pa oah diouizieg. ¹⁵ Med evel m’eo santel an hini e-neus ho kalvet, c’hwi ivez bezit santel en hoh oll doareou-beva. ¹⁶ Rag skrivet eo : bezit santel, rag me a zo santel.

¹⁷ Ha ma roit an ano a Dad d’an hini a varn peb hini hervez e oberou, heb ober gwelloh da hini pe hini, bevit en doujañs e-pad amzer hoh harlu, ¹⁸ oh ouzoud n’eo ket gand traou a ya da get : arhant pe aour, eo ez oh bet frankizet euz eun doare beva didalvez deuet deoh da hêrez digand ho tadou, ¹⁹ med gand eur gwad priziuz, hini eun oan disi ha dinamm, gwad ar Hrist, ²⁰ a zo bet dibabet araog krouidigez ar bed, ha roet deoh da anaoud splann en amzeriou diweza, ablamour deoh. ²¹ Drezañ e kredit e Doue, e-neus e zavet a-douez ar re varo, ha roet dezañ gloar e doare ma kav ho feiz hag hoh esperañs harp e Doue. ²² Glanneet ho-peus hoh eneou o senti ouz ar wirionez evid beva er garantez a vreur heb pilpouzèrèz. En em garit an eil egile heb fallgaloni, gand eur galon hlan.

²³ C’hwi hag a zo bet engehentet endro n’eo ket diwar eun hadenn vreinuz, med diwar gomz beo ha peurbaduz an Aotrou Doue ; ²⁴ rag heñvel ouz ar yeotenn eo ar horv, heñvel ouz bleunienn ar yeotenn eo e hloar ; ar yeotenn a zizeh hag he bleunienn a gouez ; ²⁵ med padout a ra da viken Komz an Aotrou. Hogen ar Gomz-se eo an Aviel a zo bet embannet deoh.

Ar men beo

II. ¹ Taolit eta pell diouzoh peb falloni, peb gwidre, peb seurt pilpouzèrèz, avi ha drouk-prezegèrèz. ² Evel buga1e nevez-ganet, c’hoantait léz digemmesk ar wirionez, ma kreskoh drezañ evid ar zilvidigez ³ m’ho-peus tañveet madelez Doue. ⁴ O tostaad outañ, ar mên beo taolet a gostez gand an dud, med dibabet ha priziuz dirag Doue, ⁵ eo oh bet savet, c’hwi ivez evel mein beo da veza eun ti speredel evid ober ahanoh eur gumuniez santel a veleien, evid kinnig sakrifisou speredel, plijuz da Zoue dre Jezuz Krist. ⁶ Rag kavet e vez er Skritur : Setu ma lakan e Sion eur mên-korn euz an dibab, a briz braz, hag an neb a laka ennañ e fiziañs n’e-no ket a vez. ⁷ Deoh eta an dud a feiz, an enor ; evid an dud difeiz a-vad, ar mên taolet a-gostez gand ar zaverien a zo deuet da veza mên-korn, ⁸ med ivez eur mên skoill, eur roh hag a laka da goueza. Mond a reont da skei outi dre ma ne gredont ket er gomz ha kement-se eo a zo bet tonket deoh.

Beza servicherien da Zoue

⁹ Med c’hwi a zo ar ouenn zibabet, ar gumuniez santel a veleienn, ar vroad santel, ar bobl e-neus Doue perhennet evid embann burzudou an hini e-neus ho kalvet euz an deñvalijenn d’e sklerijenn estlammuz ; ¹⁰ c’hwi ha n’oah ket eur bobl, hag a zo bremañ pobl Doue, c’hwi ha n’ho-poa ket kavet a drugarez hag ho-peus bremañ kavet trugarez.

¹¹ Va re muia-karet, me ho ped stard evel tremenidi ha tud estren d’en em vired ouz youlou fall ar horv, a ra brezel d’an ene. ¹² Renit eur vuez vad e-touez ar bayaned, evid ma teufent, sklerijennet gand hoh oberou mad, da veuli Doue da zeiz e zonedigez war ar poent end-eeun ma tamallont ahanoh e gaou evel torfedourien. ¹³ Ablamour d’an Aotrou, doujit da gement urz savet gand an dud, pe d’ar Roue, e-giz an uhella rener, ¹⁴ pe d’ar houarnerien degaset gantañ evid kastiza an dorfedourien hag evid meuli an dud a ra ar mad.

¹⁵ Rag bolontez Doue eo e teufeh,oh ober ar mad, da lakaad da devel an dud dizesk ha diskiant. ¹⁶ Bevit evel tud frank heb lakaad ho frankiz evel eur ouel da guzad ho fallagriez, med bevit evel servicherien da Zoue. ¹⁷ Enorit an oll, karit ho preudeur, doujit da Zoue, enorit ar roue. ¹⁸ C’hwi servicherien, sujit gand ar vrasa doujañs d’ho mistri, n’eo ket hebken ouz ar re a zo mad ha jentil, med ivez ouz ar re a zo kintuz, ¹⁹ rag eur hras eo gouzañv, dre zoujañs evid Doue, poaniou hag a houzañver a-eneb peb gwir.

²⁰ Evid gwir, peseurt gloar a zo o houzañv taoliou, m’ho-peus greet an droug ? Med ma houzañvit gand pasianted, goude beza greet ar mad, kement-se a zo eur hras dirag Doue. ²¹ Hogen, evid an dra-ze eo ez oh bet galvet, rag ar Hrist ivez e-neus gouzañvet evidoh, o lezel eur skouer ganeoh evid ma valefeh war e roudou, ²² eñ ha n’e-neus ket pehet ha n’eus bet en e henou gaou ebed, eñ, dismegañset ha ne zismegañse ket ; en e boaniou ne hourdrouze ket, med a lakee e fiziañs en Hini a varn gand lealded. ²³ Eñ hag e-neus douget en e gorv e-unan, or pehejou war ar hoad, ²⁴ evid ma varfem d’or pehejou ha ma vevfem evid ar justis ; eñ hag o-deus e houliou pareet ahanoh ; ²⁵ rag dianket e oah, evel denved, med bremañ ez oh troet ouz ar pastor, diwaller hoh eneou.

Beza kristen e stad ar brieedelez

III. ¹ Kenkoulz all c’hwi, ar gwragez, doujit d’ho pried, evel-se, ma ’zeus lod ha ne fell ket dezo kredi er Gomz, e vezint gounezet, heb ar gomz, gand buez o gwragez, ² o weled ho puez glan ha leun a zoujañs. ³ -Ho kened n’eo ket en diavêz eo e tle beza : bleo plansonet, braoigou aour, dillad kran ; ⁴ med ra vezo he lufr kuzet er galon, kened divreinuz eur spered dous hag habask, setu ar pez e-neus priz braz dirag Doue. ⁵ Evel-se eo eh en em fiche gwechall ar merhed santel, a lakee o fiziañs e Doue, doujuz ma vezent d’o friejou. ⁶ Evel-se Sara a zente ouz Abraham, heh Aotrou a ree anezañ ; merhed dezi ez oh deuet da veza, oh ober ar mad hag o vired na zeufe aon ebed d’o touella.

Kement a zo red evid beva asamblez

⁷ Diouz ho tu, c’hwi ive, gwazed, er vuez a renit asamblez a ouezo eo kizidikoh ar merhed. Bezit doujañs evito rag koulz ha c’hwi o-deus perz er hras a ro ar vuez. Evel-se ne zeuio netra d’hoh hegasi en ho pedennou. ⁸ Erfin, c’hwi oll, en em glevit kenetrezoh, leun a drugarez, a garantez-vreur, a druez, a izelded. ⁹ Na rentit ket droug evid droug, dismegañs evid dismegañs, med bennigit, rag evid an dra-ze eo ez oh bet galvet, evid kaoud ar vennoz da hêrèz. Rag ¹⁰ « an hini a fell dezañ kared ar vuez ha gweled deiziou eüruz a dle mired e deod diouz an droug hag e vuzellou diouz ar komzou faoz ; ¹¹ trei kein d’an droug hag ober ar mad, klask ar peoh ha kendelher ganti. ¹² rag daoulagad an Aotrou a bar war an dud just, hag e skouarn a zo digor d’e bedenn, med dremm Doue a dro a-eneb ar re a ra an droug ».

Fizians e-kreiz an trubuillou

¹³ Ha piou a raio droug deoh ma kemerit preder gand ar mad ? ¹⁴ Gwelloh c’hoaz, m’ho pefe tro da houzañv evid ar justis, na c’hwi a zo eüruz ; n’ho-pet ket aon rag an dud, na vezit ket strafuillet. ¹⁵ Med bennigit ar Hrist an Aotrou en ho kalonou. Bezit prest atao da renta kont euz ho esperañs, med gand douster ha resped euz an esperañs a zo ennoh dirag kement hini her goulenn diganeoh ; ¹⁶ med kement-se gand eur goustiañs eeun, evid ma vo, war ar pez end-eeun a rebechont deoh e gaou goloet a vez ar re a gav abeg er vuez vad a renit en Aotrou Krist. ¹⁷ Med gwelloh eo gouzañv oh ober ar mad, mar deo bolontez Doue, eged oh ober an droug.

¹⁸ Rag ar Hrist ivez a zo maro eur wech evid ar pehejou, eñ, an hini dibeh, evid ar beherien, evid o hinnig da Zoue ; eñ, bet lakeet d’ar maro en e gorv, med rentet d’ar vuez dre ar Spered. ¹⁹ Neuze eo eet da brezeg d’an eneou dalhet er prizon zoken, ²⁰ o-doa disentet gwechall pa gemere pasianted doue heh amzer, en deiziou Noe, pa edod oh ober an arh a oe saveteet enni eun nebeud a dud, seiz anezo, a-dreuz an dour. ²¹ Ar skeudenn e oa euz ar vadeziant a ra deoh bremañ beza salvet, n’eo ket o lemel sklabez ar horv, med o ouestla da Zoue eur goustiañs vad dre adsao Jezuz Krist, ²² a zo a zehou da Zoue, eet d’an neñv hag a zuj dezañ an êlez, ar briñzêleziou hag ar galloudegeziou.

Chench buez

IV. ¹ Peogwir e-neus gouzañvet Jezuz Krist en e gorv, c’hwi ivez, kredit stard kement-mañ : an neb e-neus bet da houzañv en e gorv e-neus troet kein d’ar pehed, ² evid beva an nemorant euz e vuez douarel, n’eo mui hervez youlou an dud, med hervez bolontez Doue. ³ Awalh eo a-vad beza greet en amzer dremenet, bolontez ar bayaned, o veva en dizurziou, er youlou fall, en dirollèrèz, an evadegou hag en azeulidigez mezuz ar fals-doueou ; ⁴ war gement-se e kavont iskiz ne redfeh mui ganto da glask an heveleb dirollèrèz a hadaliez, hag e tismegañsont ahanoh. ⁵ Med da renta kont o-dezo d’an hini a zo prest da varn ar re veo hag ar re varo.

⁶ Setu perag, gwir eo, eo bet embannet ar Helou Mad d’ar re varo zoken, evid ma vevfent hervez Doue dre ar Spered, int-i hag a zo barnet er horv hervez an dud. ⁷ Tost eo an termen evid peb tra ; bezit dalhmad e karantez an eil evid egile, rag ar garantez a zilam eun niver braz a behejou. ⁹ Roit heb klemm degemer an eil d’egile. ¹⁰ Ra zeuio peb hini hervez an donezon e-neus bet, d’en em lakaad an eil e servich egile, evel merourien vad gras Doue a zo dezi liesseurt a frouez. ¹¹ Ma komz unan bennag, ra vo evid embann komzou Doue ; m’e-neus unan bennag eur zervich en e garg, ra zervicho gand an nerz a ro Doue evid ma vo, e peb tra, dre Jezuz Krist, rentet gloar da Zoue, eñ hag a zo dezañ gloar hag Aotroniez evid an oll gantvejou. Amen !

¹² Va re muia-karet, arabad deoh beza souezet gand an tan-gwall bet elumet en ho touez evid amproui ahanoh evel ma vije aze eun dra divoaz. ¹³ Med e kement ha m’ho-peus perz e poaniou ar Hrist, bezit laouen evid beza er joa hag el levenez pa vezo diskouezet e hloar. ¹⁴ Ma vezit dismegañset ablamour da ano ar Hrist, eüruz oh c’hwi, rag ar Spered a hloar, Spered Doue a blav warnoh. ¹⁵ Arabad eo e-nefe hini ebed ahanoh da houzañv e-giz muntrer, laer, torfedour pe flatrer. ¹⁶ Mar deo e-giz kristen a-vad, arabad eo dezañ kaoud mez a gement-se, ra gano meuleudi da Zoue ablamour d’an ano-se.

¹⁷ Rag deuet eo ar mare ma vo digoret ar varnedigez dre zemeurañs Doue, ha ma stager ganeom-ni da genta, pe-seurt finvez e vo evid ar re na zentont ket ouz Aviel Doue. ¹⁸ Ha m’eo diêz d’an den just beza salvet, penaoz e vo kont gand an den difeiz, ar peher ? ¹⁹ Evel-se eta, ra zeuio ar re a houzañv hervez bolontez Doue da fizioud o eneou er Hrouer fidel, oh ober ar mad.

Kemered preder gand an dropell

V. ¹ Alia a ran eta ar gozidi a zo en ho touez, me eur hoziad eveldo ha test euz poaniou ar Hrist, me hag am-eus perz er hloar a zo o vond da veza diskouezet : ² evesait ouz tropell Doue fiziet ennoh, ouz e ren n’eo ket dre heg, med dre gaer, hervez Doue, n’eo ket gand eur volontez-gounid direiz, med a galon vad. ³ N’it ket da ober ho mestr war ar re a zo degouezet ganeoh da lod, med deuit da veza skouer an tropell ; ⁴ ha p’en em ziskouezo ar Pastor-meur, c’hwi a resevo ar gurunenn a hloar ha na zeu ket da weñvi. ⁵ Evel-se ivez, c’hwi yaouañkizou, sujit d’ar gozidi hag oll kenetrezoh, bezit izel a galon, rag « Doue a zalh penn d’an den lorhuz hag a ro e hras d’an den izel a galon ». ⁶ Bezit eta izel a galon dindan dorn gallouduz Doue, ma ’h uhellaio ahanoh pa zeuio ar mare ⁷ Dizammit warnañ hoh oll enkreziou, rag eñ e-unan a semer preder ganeoh. ⁸ Na vezit ket troet da eva, bezit war evez, hoh enebour, an diaoul, evel eul leon o yudal, a zo war ho tro o klask unan bennag da lonka. ⁹ Stourmit stard outañ dre ar feiz, o houzoud o-deus ho preudeur, strewet dre ar bed, da houzañv ar memez poaniou. ¹⁰ Doue an oll hrasou e-neus ho kalvet d’e hloar peurbadel er Hrist ; goude m’ho pezo bet da houzañv e-pad eun nebeud amzer hoh adasavo, eñ e-unan ; eñ ho startaio, ho kennerzo, a roio deoh beza divrall. ¹¹ Dezañ an Aotroniez da virviken. Amen !

¹² Skrivet am-eus deoh an nebeud geriou-mañ gand sikour Silvan a zo evidon eur breur feal, evid ho kennerza ha renta testeni deoh ez oh unanet e gwir hras Doue. ¹³ Kumuniez an dud dibabet a zo e babilon ho salud, hag ivez Mark va mab. ¹⁴ Roit ar zalud an eil d’egile dre eur pok a vreur. Peoh deoh-c’hwi oll a zo er Hrist.