An Testamant Nevez : eil lodenn – Troet e brezoneg gand « Kenvreuriez ar brezoneg » Eskopti Kemper ha Leon, 1988.

 

DISKULIADUR.
Pennad-kinnig

Heskinèrèz a sko war an Azia-Izella ; moarvad e amzer an impalaer Domisian, war-dro ar bloavez 96. Yann a zo harluet e enezenn Patmos. Poueza a ra war ar red da ren eur vuez virvidig ha da jom stard er feiz. Doue e-neus bepred gwaranted d’ar Juzevien dre ar brofeded, d’ar gristenien dre an Aviel, o-defe an treh war o enebourien, ma chomfe ar bobl fidel dezañ. E meur a weledigez e tegas an Aotrou da zoñj da Yann an asurañs-se. Distrujet e-neus an Aotrou Jeruzalem, he-deus lakeet ar Mesias d’ar maro hag heskinet ar gristenien. Eun deiz a zeuio e treho war impalaerez Rom a ra brezel d’ar Hrist ha d’an Iliz ; en amzeriou diweza erfin, e treho war ar galloudureziou dastumet gand Satan evid eur stourmad diweza a-eneb an Iliz hag a-eneb Doue. Goude m’e-no trehet war e enebourien da vad, goude m’e-no trehet war ar maro e-unan, dre e adsao da veo, an Aotrou a roio lod d’an Iliz, e bried, en e rouantelez a beoh hag a eürusted barfed. Da hortoz, e-kreiz an trubuillou, ar Pried ne ehan da lavared : « O ! Ya ! Deus, Aotrou Jezuz ! »

 

Diskuliadur sant Yann

Ano al levr

I ¹ Doue a roas an diskuliadur-se, evid diskouez d’e zervicherien ar pez a dlee c’hoarvezoud diwezatoh. Henn roet e-neus da anaoud dre e êl da Yann e zervicher. ² Hemañ e-neus roet testeni, ez oa Komz Doue ha testeni Jezuz Krist kement e-noa gwelet. ³ Eüruz an hini a lenn, hag ar re a zelaou komzou ar brofediez, hag a vir ar pez a zo skrivet enni, rag tost eo ar poent.

Liziri d’ar seiz Iliz

⁴ Yann, d’ar seiz Iliz a zo en Azia : gras deoh ha peoh a-berz an Hini a zo, a zo bet hag a zeu, a-berz ar seiz spered a zo dirag an tron, ⁵ hag a-berz Jezuz Krist an test leal, ar henta ganet a-douez ar re varo ha mestr rouaned an douar : ⁶ d’an hini e-neus or haret, or frankizet euz or pehejou dre e wad, hag e-neus greet ahanom eur rouantelez beleien evid Doue e Dad ; dezañ gloar ha galloud da virviken. Amen ! 7 Setu m’ema o tond, a-dreuz ar goabrennou, ha kement lagad a welo anezañ, ar re o-deus toullet anezañ zoken : hirvoudi a ray oll veuriadou an douar ablamour dezañ. Ya ! Amen ! 8 Me a zo an Alfa hag an Omega, eme an Aotrou Doue, an Hini a zo, a zo bet hag a zeu, an oll halloudeg.

Ar weledigez

⁹·Me Yann, ho preur hag ho kenseurt en drubuill, er rouantelez hag er basianted e Jezuz, me a oa en Enez Patmoz, ablamour da Gomz Doue ha da desteni Jezuz. ¹⁰ E dalh ar Spered edon, da Zeiz an Aotrou, a-dreñv kein din, e klevis eur vouez kreñv evel hini eun drompill, a lavare : « Ar pez a welez, skriv anezañ en eul levr, ha kas anezañ d’ar seiz Iliz : Efez, Smirn, Pergam, Tiatir, Sard, Filadelfi ha Laodise ». ¹² Distrei a ris evid selled ouz ar vouez a gomze ouzin, hag, o tistrei, e welis seiz kantolor aour, unan damheñvel ouz eur mab-den, gwisket gantañ eur zae hir, gourizet gand eur houriz aour. ¹⁴ E benn hag e vleo a oa gwenn evel gloan gwenn, evel erh, e zaoulagad evel flamm-tan beo, ¹⁵ e dreid a oa heñvel ouz arem a briz braz, evel nêteet dre an teuzlestr, hag e vouez heñvel ouz mouez an doureier braz. ¹⁶ En e zorn dehou ez oa gantañ seiz steredenn, hag euz e henou e teue eur hleze lemm a zaou droh ; e zremm a oa evel an heol pa sked e-kreiz e nerz.

¹⁷ Ouz e weled, e koueziz evel maro e-harz e dreid, med lakaad a reas e zorn dehou warnon en eur lavared : « Arabad eo dit kaoud aon, emezañ, me a zo ar henta hag an diweza, ¹⁸·an Hini beo, maro on bet ha setu me beo da virviken ; em herz ema alhweziou ar maro hag an iferniou. ¹⁹ Skriv eta ar pez az-peus gwelet hag ar pez a dle degouezoud goude-ze, ²⁰ ha setu mister ar seiz steredenn az-peus gwelet em dorn dehou hag ar seiz kantolor aour : Ar seiz steredenn eo êlez ar seiz Iliz.

Da Iliz Efez

II ¹ Da êl an Iliz a zo e Efez skriv : kement-mañ a lavar an hini a zo ar seiz steredenn en e zorn dehou, hag a gerz e-kreiz ar seiz kantolor aour. ² Anaoud a ran da oberou, da boan ha da basianted, gouzoud a ran n’hellez ket gouzañv an dud fallagr. Amprouet az-peus ar re a lavar beza ebestel, ha n’ez int ket, ha kavet az-peus ez oant gaouiad. ³ Pasianted az-peus : da houzañv az-peus bet ablamour d’am Ano, ha n’out ket bet fallgalonet.

⁴ Med da rebech dit am-eus beza kollet da garantez kenta. ⁵ Dalh soñj eta a beleh ez out kouezet, bez keuz, ha gra an oberou kenta, a-hend-all me a zeu dit, hag e tennin da gantolor euz e blas ma ne zistroez ket. ⁶ An dra-mañ koulskoude a zo mad evidout : heug az-peus euz oberou an Nikolaided. ⁷ An neb e-neus diskouarn, ra zelaouo ar pez a lavar ar Spered d’an Ilizou. D’an treher, e roin da zebri euz eur wezenn a zo e baradoz Doue.

Smirn

⁸ Da êl an Iliz a zo e Smirn skriv : kement-mañ a lavar ar Henta hag an Diweza, an Hini a zo bet maro, med a zo distroet d’ar vuez : ⁹ Anaoud a ran da drubuill ha da baourentez – med pinvidig out – ar falstamallou greet gand ar re a zo Juzevien war o meno, ar pez n’int ket, n’int nemed eur zinagog da Zatan. ¹⁰ Arabad eo dit kaoud aon rag ar pez emaout o vond da houzañv. Setu m’ema an diaoul o vond da deurel er prizon lod ahanoh evid hoh amproui, ha deg devez e pado ho trubuill. Bez fidel beteg ar maro hag e roin dit ar gurunenn a vuez.

¹¹ An neb e-neus diskouarn, ra zelaouo ar pez a lavar ar Spered d’an Ilizou ; an treher ne vo ket gwallet gand an eil maro.

Pergam

¹² Da êl an Iliz a zo e Pergam skriv : kement mañ a lavar an hini e-neus ar hleze lemm a zaou dremm. ¹³ Goûd a ouzon e peleh emaout o chom, eno eo ema tron Satan. Med delher a rez d’am Ano, n’az-peus ket nahet va feiz, zoken da geñver amzer Antipas, test fidel din, lakeet d’ar maro du-ze, e leh m’ema Satan o chom. ¹⁴ Med eun nebeud rebechou am-eus da ober dit : du-ze ez euz lod hag a ya da heul kelennadurez ar Balaam-se a guzulias da Valak stegna eur pej da vugale Israel evid isa anezo da zebri kig bet kinniget d’an doueou-faoz, hag en em rei d’ar zerhèrèz. ¹⁵Ganeoh ez euz ivez lod hag a heuill kelennadurez an Nikolaided. ¹⁶ Distro eta, a-hend-all e teuin dit dizale, hag e stourmin outo gand ar hleze euz va genou.

¹⁷ An neb e-neus diskouam, ra zelaouo ar pez a lavar ar Spered d’an Ilizou. D’an treher e roin ar mann kuzet. Eur mên gwenn a roin dezañ hag engravet er mên, eun ano nevez dianavezet gand an oll, nemed gand an hini a reseo anezañ.

Tiatir

¹⁸ Da êl an Iliz a zo e Tiatir skriv : kement-mañ a lavar Mab Doue, an Hini a zo e zaoulagad heñvel ouz tan-flamm, hag e dreid heñvel ouz arem priziuz : ¹⁹ Anaoud a ran da oberou, da garantez, da feiz, da zervich ha da basianted, ar re ziweza euz da oberou a zo niverusoh eged ar re genta. ²⁰ Med da rebech dit am-eus, e houzañvez Jezabel, ar vaouez-se hag a lavar beza profedez, a laka da vond da goll va zervicherien, o kelenn dezo debri kig bet kinniget d’an doueou faoz, ²¹ roet am-eus amzer dezi da zistrei, med ne fell ket dezi distrei euz he zerhèrèz. ²² Setu ma taolan anezi, hi hag ar re a ra avoultriez ganti, war eur gwele a glañvour, nemed ha distrei a rafent diouz o oberou. ²³ D’he bugale e roin taol ar maro hag e ouezo an oll Ilizou ez on an hini a anavez kement a dremen er galon hag er spered.

²⁴ Deoh-hwi a-vad e lavaran, c’hwi hag a zo e Tiatir, c’hwi oll ha na heuillit ket ar gelennadurez-se, ha n’ho-peus ket anavezet « donderiou Satan » evel ma lavaront. Ne lakan samm all ebed warnoh, ²⁵ nemed dalhit mad d’ar pez ho-peus, beteg ma teuin. ²⁶ An treher, an hini a vir beteg penn va oberou, a roin dezañ galloud war an oll vroadou, ²⁷ hag e reno anezo-war ar peuri gand eur wialenn houarn, evel ma vez torret al listri-pri, ²⁸ evel m’am-eus, me ivez, resevet galloud war gement-se digand va Zad, hag e roin dezañ ar steredenn vintin. ²⁹ An neb e-neus diskouarn ra zelaouo ar pez a lavar ar Spered d’an Ilizou.

Sard

III ¹ Da êl an Iliz a zo e Sard skriv : kement-mañ a lavar an Hini e-neus ar seiz spered a Zoue hag ar seiz steredenn : anaoud a ran da oberou, brud az-peus da veza beo hag ez out maro. ²·Bez war evez : kennerz ar pez a jom hag a zo o vond da vervel, rag ne gav ket din e vefe peurvad da oberou dirag Doue. ³ Dalh soñj eta euz ar pez az-peus resevet ha klevet, mir anezañ ha distro. Ma ne vezez ket war evez, e teuin evel eul laer heb na oufez da bed eur e teuin davedout. ⁴ Koulskoude e Sard az-peus eun nebeud tud ha n’o-deus ket kaillaret o dillad. Va ambroug a raint, gwisket e gwenn, rag din int a gement-se. ⁵·Evel-se an treher a zougo dillad gwenn, ne lamin ket kuit e ano euz al levr a vuez, ha me en em zisklerio a-du gantañ dirag va Zad hag an êlez. ⁶·An neb e-neus diskouarn, dezañ kleved ar pez a lavar ar Spered d’an Ilizou.

Filadelfi

⁷ Da êl an Iliz a zo e Filadelfi skriv : kement-mañ a lavar ar Zantel hag ar Gwirion, an Hini a zalh alhwez David : eñ a zigor, ha den ne zerro, eñ a zerr, ha den ne hell digeri. ⁸ Anaoud a ran da oberou, ha setu m’am-eus lakeet dirazout eun nor zigor ha n’hell den he zerri. Nebeud a nerz az-peus ha koulskoude az-peus miret va Homz ha n’az-peus ket dinahet va Ano. ⁹ Ha setu ma roan dit tud euz sinagog Satan, euz ar re a lavar beza Juzevien, ha n’int ket, rag gevier a lavaront. Setu ma lakin anezo da zond ha da stoui e-harz da dreid hag e ouezint am-eus da garet. ¹⁰ Peogwir az-peus miret ar Gomz euz va fasianted, me ivez a viro ahanout da eur an amprouenn a zirollo war an oll dud, evid amproui ar re a zo o chom war an douar. ¹¹ Dizale e teuin. Dalh mad d’ar pez az-peus, ma ne zeuio den da denna diganit da gurunenn. ¹² An treher a rin anezañ eur golonenn e Templ Doue, ha biken mui ne zeuio er mêz, ha warnañ e skrivin ano kêr va Doue, ar Jeruzalem nevez, a ziskenn euz an neñv a-gichenn Doue, ha va ano nevez. ¹³ An neb e-neus diskouarn, dezañ selaou ar pez a lavar ar Spered d’an Ilizou.

Laodise

¹⁴ Da êl an Iliz a zo e Laodise skriv : kement-mañ a lavar an Amen, an test feal ha gwirion, ar penn kenta euz ar grouidigez greet gand Doue : ¹⁵ anaoud a ran da oberou, n’out na yen na tomm. Ma vijes bet yen pe domm eo ! ¹⁶ med peogwir ez out klouar ha n’ez out na yen na tomm, ez an da zistaoler ahanout euz va genou ; ¹⁷ peogwir e lavarez : « pinvidig on, pinvidikeet on, n’am-eus ezomm a netra », ha n’ouzout ket ez out eur paour-kêz, din a druez, paour, dall ha noaz, ¹⁸ eh alian ahanout da brena diganin aour nêteet dre an tan, evid dit pinvidikaad ha dillad gwenn d’en em wiska, ma n’az-po ket a vez da veza gwelet en noaz, hag eul louzou evid da zaoulagad ma weli sklêr adarre. ¹⁹ Me, kement hini a garan a vez difaziet ha reizet ganin. Bez greduz eta ha distro. ²⁰ Setu m’emaon e toull an nor, hag e skoan. Ma klev hini pe hini va mouez, ha ma tigor an nor, ez in en e di, hag e tebrin koan gantañ hag eñ ganin-me. ²¹ An treher, me a roio dezañ azeza war va zron, evel m’am-eus me ivez trehet, ha ma ’z on eet da azeza gand va Zad war e dron. ²² An neb e-neus diskouarn, ra zelaouo ar pez a lavar ar Spered d’an Ilizou.

Ar seiz siell

IV ¹ Goude-ze e welis kement-mañ : eun nor a oa digor en neñv, hag ar vouez am-boa klevet da genta o komz ouzin, evel eun drompill, a lavaras : « pign amañ hag e tiskouezin dit ar pez a dle degouezoud da houde ». ² Kerkent e oen gourzavet gand ar Spered ha setu m’oa savet eun tron en neñv ha war an tron unan war e azez. ³ An hini a oa azezet e-noa lufr eur mên-yalp hag agatenn, killet e oa an tron gand eur helh a skede evel lufr emrodenn. ⁴ Endro d’an tron e oa pevar dron war ’n ugent, hag azezet war an troniou-ze e oa kozidi, pevar war ’n ugent anezo, gwisket e gwenn ha war o fenn kurunennou aour. ⁵ Euz an tron e tarze luhed, moueziou ha kurunou ; seiz lamp leskidig a zeve dirag an tron, ar re-ze eo ar seiz spered a Zoue. ⁶ Dirag an tron e oa eur mor splann, mein-strink a vefe lavaret. E-kreiz an tron hag endro dezañ pevar loen goloet a lagadou en a-raog hag en a-dreñv. ⁷ Ar henta heñvel ouz eul leon, an eil heñvel ouz eun taro yaouank, an trede dezañ evel dremm eun den, hag ar pevare heñvel ouz eun erer o·nijal.

⁸ Hag ar pevar loen o-doa, peb hini anezo, c’hweh askell, goloet e oant a lagadou tro war-dro dezo hag en diabarz. Ne ehanent ket, noz-deiz, da embann : « santel, santel, santel an Aotrou Doue oll halloudeg, an hini a oa, a zo hag a zeu ». ⁹ Ha bewech ma rent al loened gloar, enor ha trugarez d’an hini a zo azezet war an tron, d’an hini a vev da virviken, ¹⁰ ar pevar goziad war ’n ugent a stou dirag an hini a zo azezet war an tron, adori a reont an hini a vev da virviken hag e taolont o hurunennou dirag an tron en eur lavared : « Din out, Te, on Aotrou hag on Doue da reseo gloar, enor ha galloud, rag Te eo a grouas peb tra, fellet eo ganit e vefe anezo hag e oent krouet ».

Al levr hag an Oan

V ¹ Hag e welis : e dorn dehou an hini a oa azezet war an tron, eul levr rollet, skrivet en diabarz hag en diavêz anezañ, siellet gand seiz siell, ² hag e welis eun êl gallouduz oh embann a vouez kreñv : « Piou a zo din da zigeri al levr ha da derri ar ziellou ? » ³ Med den, nag en neñv na war an douar n’e-noa galloud da zigeri al levr na da zelled ennañ. ⁴ Glaharet e oan en abeg ma ne oe kavet den din da zigeri al levr na da zelled ennañ. ⁵ Med unan euz ar gozidi a lavaras din : « Arabad eo dit gouela, setu m’e-neus trehet al leon euz meuriad Juda, ar greskenn euz David, digeri a ray al levr hag e zeiz siell ».

⁶ Neuze e welis : e-kreiz an tron hag ar pevar loen, e-touez ar gozidi, eun oan en e zav, lidlazet da weled. Seiz korn e-noa ha seiz lagad, a zo ar seiz spered a Zoue kaset dre ar bed a-bez. ⁷ Tostaad a reas da reseo al levr euz dorn dehou an hini a oa azezet war an tron. ⁸ Ha p’e-noa resevet al levr, ar pevar loen hag ar pevar goziad war ’n-ugent a stouas dirag an Oan. Peb hini e-noa eun delenn hag eur hanaf aour leun a louzou c’hwez-vad ; pedennou ar zent eo ar re-mañ.

⁹ Eur hantig nevez a ganent : « Din out da reseo al levr ha da derri ar ziellou anezañ, rag lidlazet out bet, ha dasprenet az-peus evid Doue, dre da wad, tud euz peb meuriad, peb yez, pobl ha broad. ¹⁰ Greet az-peus anezo, evid on Doue, eur rouantelez ha beleien, ha ren a raint war an douar ». ¹¹ Neuze e welis : hag e klevis mouez êlez niveruz endro d’an tron, d’al loened ha d’ar gozidi, miliadou ha miliadou anezo. ¹² Hag eh embannent a vouez uhel : « Din eo an Oan lidlazet da reseo galloud, pinvidigez ha furnez, nerz, enor, gloar ha meuleudi. » ¹³ Hag an oll grouadurien a zo en neñv, war an douar, dindan an douar ha war ar mor, ha kement tra a zo enno, me o hlevas oh embann :« D’an hini a zo azezet war an tron ha d’an Oan, meuleudi, enor, gloar, galloud da virviken ». ¹⁴ Hag ar pevar loen e lavare amen, hag ar gozidi a stouas hag a adoras.

Ar c’hweh siell kenta digoret

VI ¹ Neuze e welis : pa zigoras an Oan ar genta euz ar seiz siell, e klevis ar henta euz ar pevar loen o youhal gand eur vouez kreñv heñvel ouz ar gurun : « Deus ».² Hag e welis : eur marh gwenn e oa. An hini a oa war e gein a oa eur wareg gantañ, eur gurunenn a oe roet dezañ hag ez eas e-giz eun treher, evid trehi. ³ Pa zigoras an eil siell e klevis an eil loen o lavared : « Deus ». ⁴ Neuze e oe gwelet eur marh ruz-tan. An hini a oa war e gein, e oe roet dezañ galloud da skrapa ar peoh diwar an douar, evid ma hellfed en em laza. Eur mell kleze a oe roet dezañ. ⁵ Pa zigoras an trede siell, e klevis an trede loen o lavared : « Deus ». Hag e welis eur marh du ; an hini a oa war e gein e-noa eur valañs en e zorn. ⁶ Hag e klevis evel eur vouez e-touez ar pevar loen hag a lavare : « Eur muzuliad ed evid eun diner, ha tri vuzuliad heiz evid eun diner, an eoul avad hag ar gwin, arabad eo dit touch outo ».

⁷ Pa zigoras ar pederved siell, e klevis ar pevare loen o lavared : « Deus ». ⁸ Hag e welis : eur marh glaz e oa. An hini a oa war e gein a vez greet an « Ankou » anezañ hag an Iferniou a oa ouz e heul. Roet e oe dezañ galloud war ar palefarz euz an douar, evid laza dre ar hleze, an naonegez, ar vosenn, ha dre loened gouez an douar.

⁹ Pa zigoras ar pemped siell e welis, dindan an aoter, eneou ar re a oa bet lazet en abeg da Gomz Doue ha d’an testeni o-doa roet. ¹⁰ A vouez uhel e youhent : « Beteg peur, Mestr santel ha gwirion, e hortozi evid barn ha goulenn kont euz or gwad digand tud an douar ? » ¹¹ Neuze e oe roet da beb hini eur zae wenn, hag e oe lavaret dezo kemered c’hoaz eun tammig pasianted, beteg ma vefe klok an niver euz o henseurted a oa diouz servich hag euz o breudeur a dlee bez a lakeet d’ar maro eveldo.

¹² Hag e welis : pa zigoras ar c’hwehved siell e tegouezas eur gwall grendouar, du e teuas an heol da veza evel eul lienenn reun, hag al loar a-bez evel gwad. ¹³ Stered an neñv a gouezas war an douar evel fiez glaz eur wezenn fiez hejet gand ar gwall-amzer. ¹⁴ An oabl en em dennas kuit evel eul levr rollet, an oll veneziou hag an oll enezennou a oe kaset euz o flas. ¹⁵ Rouaned an douar, an dud a renk uhel, an ofiserien-veur, an dud pinvidig, ar re halloudeg, oll, sklaved ha tud frank a yeas da guzad er heviou hag e reier ar meneziou. ¹⁶ Lavared a reent d’ar meneziou ha d’ar reier : « Kouezit warnom, kuzit ahanom ouz dremm an hini a zo azezet war an tron, ouz kounnar an Oan, ¹⁷ rag deuet eo Deiz braz o hounnar, ha piou a hell chom en e zav ? »

An Iliz, pobl Doue

VII ¹ Goudeze e welis pevar êl en o zav e pevar horn an douar ; herzel a reent ouz ar pevar avel euz an douar evid ma ne zeufe avel ebed da c’hweza war an douar, war ar mor na war gwezenn ebed, ² hag e welis eun êl all o sevel diouz kostez ar zav-heol, siell an Doue beo a oa gantañ, a vouez uhel e youhas d’ar pevar êl o-doa resevet galloud da ober gaou ouz an douar hag ouz ar mor : « Na rit ket a haou ouz an douar nag ouz ar mor, nag ouz ar gwez, ken na vo bet merket ganeom war dal servicherien on Doue». ⁴ Hag e klevis ped a oa merket gand ar ziell : kant pevar mil ha daou ugent merket gand ar ziell euz oll veuriadou bugale Israel, ⁵ euz meuriad Juda, daouzeg mil merket gand ar ziell ; euz meuriad Ruben, daouzeg mil ; euz meuriad Gad, daouzeg mil ; ⁶ euz meuriad Aser, daouzeg mil ; euz meuriad Neftali, daouzeg mil ; euz meuriad Manasse, daouzeg mil ; ⁷ euz meuriad Simeon, daouzeg mil ; euz meuriad Levi, daouzeg mil ; euz meuriad Izakar, daouzeg mil ; ⁸ euz meuriad Zabulon, daouzeg mil ; euz meuriad Josef, daouzeg mil ; euz meuriad Benjamin daouzeg mil merket gand ar ziell.

⁹ Goudeze e welis eun niver braz a dud, n’helle den o honta, euz kement bro, kement rumm, kement pobl ha kement yez a zo, oll en o zav dirag tron Doue ha dirag an Oan, dillad gwenn ganto ha skourrou palmez en o daouarn, ¹⁰ hag e savent uhel o mouez da lavared : « Ar zilvidigez a zo d’on Doue, azezet war an tron, ha d’an Oan ». ¹¹ Hag an oll êlez bodet endro d’an tron, d’ar gozidi ha d’ar pevar loen, a stouas beteg an douar dirag an tron evid adori Doue en eur lavared : ¹² « Amen, bennoz ha gloar, furnez ha trugarez, enor, galloud ha nerz d’on Doue da virviken. Amen ! »

¹³ Unan euz ar gozidi, neuze, a lavaras din : « Ar re-ze, dillad gwenn ganto, piou int hag a beleh int deuet ? » ¹⁴ Ha me a respontas : « Va Aotrou, c’hwi a oar ». Lavared a reas din : « Ar re-ze a zeu euz an drubuill vraz, gwalhet o-deus o dillad, ha kannet anezo e gwad an Oan. 15 Setu perag emaint dirag tron Doue, ouz e zervicha noz-deiz, en e zantual, hag an hini a zo azezet war an tron a roio goudor dezo en e deltenn. ¹⁶ N’o-devo mui naon, n’o-devo mui sehed, ne vezint ket mui skoet gand an heol hag an dommder, ¹⁷ rag an Oan, an hini a zo e-kreiz an tron, a vo o fastor, ren a ray anezo daved feunteuniou dour a vuez ha Doue a zeho an oll daerou euz o daoulagad.

Ar seizved siell

VIII ¹ Pa zigoras ar seizved siell, e oe sioulder en neñv, e-pad war-dro eun hanter-eur. ² Hag e welis ar seiz êl a en em zalh en o zav dirag Doue, roet e oe dezo seiz trompill. ³ Eun êl all a zeuas d’en em lakaad en e zav e-kichenn an Aoter, gantañ eun ezañsouer aour, roet e oe dezañ e-leiz a louzeier c’hwez-vad da ginnig gand pedennou an oll zent war an aoter aour a zo dirag an tron. ⁴ Hag euz dorn an êl e savas eur moged fronduz, dirag Doue gand pedennou ar zent. ⁵ An êl a gemeras an ezañsouer, e gargas a dan euz an aoter, hag e taolas anezañ war an douar, hag e oe neuze tarziou-kurun, moueziou, luhed hag eur hren-douar.

Ar c’hweh trompill genta

⁶ Ar seiz êl a oa ganto seiz trompill, en em lakeas e-taill da zeni ganto. ⁷ Ar henta a lakeas e drompill da zeni : kazarh ha tan, mesket a wad, a c’hoarvezas hag e oent stlapet war an douar ; an drederenn euz an douar a flammas, an drederenn euz ar gwez a flammas ha kement glasvez a flammas. ⁸ An eil a lakeas e drompill da zeni, hag e vije bet lavaret e oa stlapet er mor eur menez braz entanet. E gwad e troas an drederenn euz ar mor. ⁹ An drederenn euz ar grouadurien a veve er mor a varvas, hag an drederenn euz al listri a oe distrujet. ¹⁰ An trede êl a lakeas e drompill da zeni, hag e kouezas euz an neñv eur steredenn vraz meurbed, entanet evel eun torchad ; koueza a reas war an drederenn euz ar steriou ha war eien an doureier. ¹¹ Ar steredenn a oa « Huelenn-c’hwero » he ano, an drederenn euz an dour a zeuas da veza huelenn-c’hwero, hag e varvas kalz a dud ablamour d’an dour deuet da veza c’hwero. ¹² Ar pevare a zonas gand e drompill : hag e oe skoet an drederenn euz an heol, an drederenn euz al loar, hag an drederenn euz ar stered, teñvalaad a rejont euz an drederenn euz o sked, an deiz a gollas an drederenn euz e sklerder hag an noz kemend-all. ¹³ Neuze e welis hag e klevis eun erer, o nijal e lein an neñv, o lavared a vouez kreñv : « Siwaz, siwaz, siwaz ! » da dud an douar ablamour da zonèrèz trompillou an tri êl a zo o vond da zeni.

Ar pemped trompill

IX ¹ Ar pemped êl a lakeas e drompill da zeni, hag e welis eur steredenn stlapet euz an neñv war an douar, hag e oe roet dezi alhwez puñs an islong. ² Digeri a reas puñs an islong, hag anezañ e savas eur vogedenn heñvel ouz hini eur fornez vraz, teñvalaad a reas an heol hag an oabl. ³ Hag euz ar vogedenn-se e teuas killeienn-raden d’en em skigna war an douar. Hag e oe roet dezo galloud heñvel ouz hini kruged an douar. ⁴ Divennet e oa outo ober gaou ouz yeot an douar, ouz glasvezenn ebed, ouz gwezenn ebed, med netra nemed ouz an dud ha na zougont ket siell Doue war o zal. ⁵ Aotreet e oent, n’eo ket d’o lakaad d’ar maro, med d’o heskina e-pad pemp miz, hag o heskin a zo heñvel ouz heskin ar grug pa flemm an den. ⁶ En deiziou-se an dud a glasko ar maro ha n’he havint ket, c’hoant o-dezo da vervel, med ar maro a deho diouto.

⁷ Ar hilleienn-raden o-doa doare kezeg harnezet evid an emgann, war o fenn e tougent evel kurunennou aour, hag o dremm a oa heñvel ouz dremmou tud, ⁸ o bleo heñvel ouz bleo merhed, hag o dent heñvel ouz dent al loened. ⁹ Da weled, e oant harnezet gand houarn, ha trouz o eskell a oa heñvel ouz trouz kirri stlejet gand e-leiz a gezeg, o redeg d’an emgann. ¹⁰ Lostou o-deus, heñvel ouz re ar gruged daredou outo, en o lost ema o galloud da noazoud d’an dud e-pad pemp miz. ¹¹ Da roue, o-deus êl an islong. Abaddon eo e ano en Hebreeg hag Appolluon e Gresianeg. ¹² Tremenet eo ar gwalleur kenta, setu o tond war e lerh daou walleur all.

¹³ Ar c’hwehved êl a lakeas e drompill da zeni, hag e klevis eur vouez o tond euz pevar horn an aoter aour a zo dirag Doue ; ¹⁴ lavared a ree d’ar c’hwehved êl, an hini a oa an drompill gantañ : « Diliamm ar pevar êl a zo chadennet war ar ster Eufrad ». ¹⁵ Diliammet e oe ar pevar êl, prest evid an eur, an deiz, ar miz hag ar bloaz, da lakaad d’ar maro an drederenn euz an dud. ¹⁶ Ar zoudarded war varh a oa anezo daouzeg miliad a zegmiliad. Kleved a ris an niver anezo. ¹⁷ Evel-se e welis e va gweledigez ar hezeg hag ar varheien ganto harnez tan, iasint ha soufr. Pennou ar hezeg a oa evel pennou leoned hag o genou a zistaole tan, moged ha soufr.

¹⁸ Dre an teir walenn-se : an tan, ar moged hag ar soufr, distaolet euz o genou, e oe lazet an drederenn euz an dud, ¹⁹ rag galloud ar hezeg a zo en o genou koulz hag en o lost, rag heñvel ouz naered eo o lostou ; pennou o-deus ha ganto e hellont noazoud. ²⁰ Evid ar peurrest euz an dud, ar re n’oant ket lazet dre ar gwalinier-se, ne zavas ket a geuz ganto da oberou o daouarn, kendelher a rejont da adori an diaouled, an idolou aour pe arhant, arem, mein pe goad, ha n’int ket evid gweled, kleved na kerzed. ²¹ Ne zistrojent ket euz o lazèrèz, nag euz o zorsèrèz, euz o zerhèrèz, euz o laeroñsi.

An êl hag al leorig

X ¹ Hag e welis eun êl gallouduz o tiskenn euz an neñv, gwisket gand eur goumoulenn, e dal killet a hloar, e zremm heñvel ouz an heol hag e dreid heñvel ouz kolonennou tan. ² Eul leorig digor a oa gantañ en e zorn, e droad dehou a lakeas war ar mor, e droad kleiz war an douar. ³ Youhal a reas a vouez kreñv evel ma yud eul leon. Goude m’e-noa youhet, e roas ar seiz kurun o moueziou da gleved. ⁴ P’o-doa tregernet ar seiz kurun, edon o vond da skriva, hag e klevis eur vouez o lavared din euz an neñv : « Dalh kuzet ganit kemennadurez ar seiz kurun, na skriv ket anezi ». ⁵ Hag an êl am-boa gwelet en e zav war ar mor ha war an douar a zavas e zorn dehou warzu an neñv, ⁶ hag e touas dre an hini a zo beo da virviken, hag e-neus krouet an neñv ha kement a zo ennañ, ar mor ha kement a zo ennañ : « Ne vo dale ebed mui », ⁷ med en deiziou ma vo klevet ar seizved êl, pa stago da zeni gand an drompill, neuze e vo sevenet mister Doue, evel m’e-noa embannet anezañ d’ar brofeded e zervicherien.

⁸ Hag ar vouez am-boa klevet o tond euz an neñv a gomzas ouzin a-nevez, hag a lavaras : « Kee da gemer al levr digor e dorn an êl a zo en e zav war ar mor ha war an douar ». ⁹ Mond a ris war-zu an êl hag e bedi da rei din al levr bian. Lavared a reas din : « Kemer ha debr anezañ, c’hwero e vo evid da vouzellou, med en da henou e vo dous evel ar mel ». ¹⁰ Neuze e kemeris al levr bian euz dorn an êl, hag e tebris anezañ. Em genou e oa dous evel ar mel, med p’am-boa e zebret e teuas va bouzellou da veza c’hwero. ¹¹ Hag e oe lavaret din : « Red eo dit profedi a-nevez war eun niver braz a boblou, broiou, yezou ha rouanteleziou ».

An daou dest

XI ¹ Neuze e oe roet din eur gorzenn evel eur vaz-muzulier, hag e oe lavaret din : « Sav, kemer ar muzul euz Templ Doue hag euz an aoter hag euz ar re a zo eno oh adori. ² Med al leurenn a-ziavêz an Templ, lez anezi a-gostez, na gemer ket ar muzul anezi, rag roet eo bet d’ar poblou payan a vreso ar gêr zantel e-pad daou viz ha daou ugent, ³ ha, d’am daou dest me a raio dezo profedi, gwisket gand seier e-pad daouzeg kant devez ha tri-ugent ». ⁴ Bez ez int an diou olivezenn hag an daou gantolor a zo en o zav dirag Aotrou an douar. ⁵ Ma klask unan bennag noazoud dezo, e teu eun tan euz o genou hag a bulluh o enebourien. Ya, ma klaskfe unan bennag noazoud dezo, evel-se e vefe red dezañ mervel. ⁶ Galloud o-deus da zerri an neñv, ha glao ebed ne gouezo e-pad deveziou o frofediez, galloud o-deus da drei an dour e gwad, ha da lakaad gwalinier da skei an douar, ken aliez ha ma karint.

⁷ Med p’o dezo echu da rei testeni, an euzvil a zav euz an islong a raio brezel dezo, a hounezo warno hag o lakaio d’ar maro. ⁸ O horvou a jomo war leurgêr ar gêr vraz, a anver dre barabolenn Sodom hag Ejipt, el leh, end-eeun, ma oe bet staget o Aotrou ouz ar groaz. ⁹ Euz poblou, rummadou, yezou ha broiou e teuor da zelled ouz o horvou, e-pad tri devez hanter, hag heb bezia anezo. ¹⁰ An dud a zo o chom war an douar a vo laouen diwar o fenn, er joa e vezint, donezonou a roint an eil d’egile, rag an daou brofed-se o-doa greet dezo e-leiz a drubuillou.

¹¹ Med goude an tri devez-hanter-se eur spered a vuez deuet euz Doue a antreas enno, hag e savjont en o zav. Neuze e kouezas eur spont braz war ar re a oa o selled outo. ¹² Kleved a rejont eur vouez kreñv, deuet euz an neñv, o lavared dezo : « Pignit amañ ». Pignad a rejont d’an neñv en eur goabrenn, dirag daoulagad o enebourien. ¹³ D’an ampoent e c’hoarvezas eur gwall zarvoud ; an degved euz kêr a gouezas en e boull, ha seiz mil den a oe lazet er gwall-zarvoud-se. Spontet oll, ar re a oa chomet beo, a rentas gloar da Zoue an neñv.

¹⁴ Tremenet eo an eil gwaleur, ne zale ket an trede da zond.

Ar seizved trompill

¹⁵ Ar seizved êl a roas da gleved e drompill. Bez’ e oa moueziou kreñv en neñv hag a lavare : « Deuet eo rouantelez ar bed d’on Aotrou ha d’e Grist. Ren a ray da virvikent ». ¹⁶ Ar pevar goziad war’n-ugent a zo dirag Doue azezet war o zron a gouezas, o dremm d’an douar, da adori Doue en eur lavared : ¹⁷ « Da drugarekaad a reom Aotrou Doue oll halloudeg, Te a zo hag a oa, peogwir az-peus diskouezet pegen braz eo da halloud, ha diazezet da rouantelez. ¹⁸ Ar poblou payan a zo e kounnar, med da gounnar dit eo a zo deuet. Deuet eo ar mare da varn ar re varo, da zigoll ar brofeded, da zervicherien, ar zent hag ar re a zouj da Ano, bian ha braz, ha da zistruj ar re a zistruj an douar.

¹⁹ Ha templ Doue en neñv a zigoras hag e teuas war wel en e dempl Arh an emgleo ; neuze e c’hoarvezas luhed, moueziou, kurunou, eur hren-douar hag eur barrad kazarh.

Ar vaouez hag an aerouant

XII ¹ Eur zin vraz a oe gwelet en neñv : eur vaouez, an heol ouz he gwiska al loar dindan he zreid, hag eur gurunenn a zaouzeg steredenn war he fenn. ² Dougêrêz eo ha youhal a ra, gwasket gand poan ar gwilioudi. ³ Eur zin all a oe gwelet en neñv : eun aerouant braz, ruz-tan, seiz penn ha deg korn dezañ, ha war e bennou seiz taledenn. ⁴ E lost, hag a skube an drederenn euz stered an neñv, a stlapas anezo war an douar. Chom a reas an aerouant dirag ar vaouez war-nez gwilioudi, evid lonka ar hrouadur kerkent ha ma vefe ganet. ⁵ Lakaad a reas eur mab er bed, eur paotr, an hini a dle beza pastor an oll boblou payan gand eur wialenn houarn, hag e oe tennet kuit ar bugel ha douget daved Doue ha daved e dron. ⁶ Hag ar vaouez a dehas kuit, d’ar goueleh, el leh m’he-deus eur plas renket eviti gand Doue, evid ma vefe maget e-pad mil daou hant devez ha tri ugent.

⁷ Hag e c’hoarvezas eun emgann en neñv, Mikêl hag e êlez a stourmas a-eneb an aerouant, hag an aerouant hag e êlez a stourmas ivez. ⁸ Med ne zeuas ket an treh gantañ, ha ne oe ket mui a blas evito en neñv. ⁹ Stlapet e oe ar mell aerouant, ar zarpant koz, an hini a anved an diaoul ha satan, toueller ar bed a-bez. Stlapet e oe war an douar hag e êlez gantañ. ¹⁰ Hag e klevis en neñv eur vouez kreñv o lavared : « Bremañ e c’hoarvez amzer ar zilvidigez, ar halloud hag ar rouantelez euz on Doue, hag amzer galloud e Grist, rag stlapet eo bet d’an traoñ tamaller or breudeur, an hini o zamalle noz-deiz dirag on Doue. ¹¹ Med int-i o-deus bet an treh warnañ dre wad an Oan, ha dre e Gomz, m’o-deus rentet testeni anezi, rag disprizet o-deus o buez beteg mervel. ¹² Setu perag bezit leun a levenez, c’hwi an neñvou, ha c’hwi hag a zo o chom enno. Med siwaz deoh, c’hwi an douar hag ar mor, rag an diaoul a zo diskennet davedoh, fuloret oll, o houzoud e chom gantañ nebeud a amzer ».

¹³ An aerouant, pa welas e oa bet stlapet war an douar, en em lakeas da redeg warlerh ar vaouez he-doa lakeet ar paotr er bed. ¹⁴ Med diou askell an erer braz a oe roet d’ar vaouez evid nijal d’ar goueleh, d’al leh miret eviti, evid beza maget eno, pell diouz ar zarpant e-pad eur pennad, pennadou hag eun hanter pennad. ¹⁵ Neuze ar zarpant a zistaolas euz e henou evel eur steriad dour warlerh ar vaouez evid ma vefe kaset gand red an dour. ¹⁶ Med an douar a zeuas war zikour ar vaouez, an douar a zigoras hag a lonkas ar steriad distaolet gand an aerouant. ¹⁷ Fuloret a-eneb ar vaouez, an aerouant a droas da stourm a-eneb ar peurrest euz he bugale, ar re a vir gourhemennou Doue hag a zalh da desteni Jezuz. ¹⁸ Goudeze eh en em lakeas war drêzenn ar mor.

An daou loen

XIII ¹ Neuze e welis o sevel euz ar mor eun euzvil a zeg korn ha seiz penn. War e gerniel deg talgenn, ha war e bennou anoiou a vlasfemèrèz. ² An euzvil a welis a oa heñvel ouz eul loupard, e baviou heñvel ouz re an arz, hag e heol heñvel ouz geol eul leon, hag an aerouant a roas dezañ e nerz, e dron hag eur halloud braz meurbed. ³ Unan euz ar pennou a oa evel ma vije bet skoet gand taol ar maro, med e hloaz marvuz a oe pareet. Bamet, ar bed a-bez a yeas da heul an euzvil. ⁴ Adori a rejont an aerouant ablamour m’e-noa roet galloud d’an euzvil, hag adori a rejont an euzvil en eur lavared : « Piou a zo par d’an euzvil, ha piou a hell stourm outañ ? » ⁵ Eur henou a oe roet dezañ evid lavared traou balh ha blasfemou. Galloud a oe roet dezañ da labourad e-pad daou viz ha daou ugent. ⁶ Digeri a reas e henou da doui Doue, da doui e ano, e deltenn hag ar re a oa o demeurañs en neñv. ⁷ Aotreet e oe da ober brezel d’ar zent ha da gaoud an treh warno. Roet e oe dezañ galloud war beb rummad, peb pobl, peb yez ha peb bro. 8 E adori a raint ar re oll a zo o chom war an douar, ar re ha n’eo ket skrivet o ano abaoe ar penn kenta euz ar bed e levr a vuez an Oan lidlazet. ⁹ An neb e-neus diskouarn dezañ kleved : ¹⁰ an neb a zo tonket da veza prizoniet a vo prizoniet, an neb a zo tonket da veza lazet gand ar hleze, a rank beza lazet gand ar hleze. Aze ema pasianted ha feiz ar zent.

¹¹ Neuze e welis o sevel euz an douar eun euzvil all. Daou gorn e-noa evel eun oan, med komz a ree evel eun aerouant. ¹² Oberia a ra gand oll halloud an euzvil kenta, dirag e zaoulagad, hag e ra d’an douar ha d’an dud a zo war an douar adori an euzvil kenta, bet pareet dezañ e houli marvuz. ¹³ Ober a ra burzudou braz, beteg lakaad an tan da ziskenn euz an neñv war an douar a wel d’an oll. ¹⁴ Touella a ra an dud war an douar gand ar burzudou roet dezañ da ober dirag lagad an euzvil, o lavared d’ar re a zo war an douar sevel eur skeudenn en enor d’an euzvil gloazet gand ar hleze, hag e-neus adkavet e vuez. ¹⁵ Roet e oe dezañ galloud da rei buez d’ar skeudenn euz an euzvil, e-doare ma helle ar skeudenn komz ha lakaad d’ar maro an neb na adorfe ket skeudenn an euzvil. ¹⁶ Lakaad a ree an oll, bian ha braz, pinvidig ha paour, tud frank ha sklaved da reseo eur merk war o dorn pe war o zal. ¹⁷ Ha den ne hello na prena, na gwerza, ma ne zoug ket ar merk, ano an euzvil pe niverenn e ano. D’an hini a zo digor e spered, gweled petra’ dalvez niverenn an euzvil. ¹⁸ Amañ ema ar skiant : an hini e-neus eur spered lemm, ra gonto niverenn an euzvil, eun niverenn a zen eo, hag an niverenn eo c’hweh kant c’hweh ha tri ugent (666).

An Oan hag an dud dasprenet

XIV ¹ Hag e welis : an Oan a oa en e zav war menez Sion, ha gantañ ar re o-doa e ano hag ano e Dad skrivet war o zal, kant pevar mil ha daou ugent a oa anezo. ² Hag e klevis eur vouez o tond euz an neñv, heñvel ouz mouez douriou braz, heñvel ouz kroz eun taol-kurun pounner, hag ar vouez a glevis a oa heñvel ouz sonadenn telennerien o c’hoari war o zelennou, ³ hag e kanent eur hantig nevez dirag an tron ha dirag ar pevar loen hag ar gozidi, ha n’helle den deski ar hantig-se, nemed ar hant pevar mil ha daou ugent bet dasprenet euz an douar. ⁴ Ar re-ze eo ar re n’int ket bet saotret gand merhed, rag gwerh int. Da heul an Oan ez eont da gement leh ma ’z a. Dasprenet int bet a-douez an dud evid beza al lodenn genta kinniget da Zoue ha d’an Oan. ⁵ N’eus bet morse gaou ebed war o muzellou, direbech int.

Ar varnedigez

⁶ Hag e welis eun êl all o nijal e lein an neñv. Eun Aviel peurbaduz e-noa da embann d’ar re a oa o chom war an douar, da beb bro, da beb meuriad, yez ha pobl. ⁷ Lavared a ree a vouez kreñv : « Doujit Doue, rentit gloar dezañ, rag deuet eo amzer ar varnedigez, adorit krouer an neñv, an douar, ar mor hag eien an douriou » ; ⁸ hag unan all, eun eil êl a zeuas war e lerh hag a lavaras : « Kouezet eo Babilon, ar gêr vraz, hi hag he-deus skuillet puill war an oll boblou gwin e zerhèrèz kounnaret ».

⁹ Hag unan all, eun trede êl, a zeuas war o-lerh, ha, kreñv e vouez, a lavaras : « ma ’h ador unan bennag an euzvil hag e skeudenn, ha ma reseo ar merk anezañ war e dal pe war e zorn, ¹⁰ hennez a evo, eñ ivez, gwin kounnar Doue, skuillet digemmesk e hanaf e gounnar. Da houzañv e-no poaniou an tan hag ar soufr dirag an êlez santel ha dirag an Oan. ¹¹ Ar moged euz o foaniou a zav a gantved da gantved ha n’o-deus repu ebed, na deiz na noz, ar re a ador an euzvil, na kement hini a reseo ar merk euz e ano. ¹² Deuet eo ar mare da jom stard, evid ar zent a vir gourhemennou Doue hag ar feiz e Jezuz. ¹³ Hag e klevis eur vouez o lavared euz an neñv : « skriv : eüruz, azaleg bremañ, ar re a zo maro en Aotrou : ya, eme ar Spered, dezo eo diskuiza euz o foaniou, rag o oberou a ya d’o heul ».

Eost ha mendem

¹⁴ Hag e welis : eur goabrenn wenn e oa, ha war ar goabrenn ez oa, war e azez, eur doare mab-den, eur gurunenn aour war e benn hag en e zorn eur falz lemm. ¹⁵ Goudeze, eun êl all a zeuas er mêz euz an templ, hag en eur youhal a vouez uhel d’an hini a oa en e azez war ar goabrenn : « Taol da falz, gra an eost, deuet eo amzer an eost, dare eo eost an douar ». ¹⁷ Eun êl all a zeuas er mêz euz templ an neñv, en e zorn ez oa ive eur falz lemm. ¹⁸ Hag eun êl all a zeuas er mêz euz an aoter. Galloud e-noa war an tan ; gand eur vouez kreñv e krias d’an hini a oa gantañ ar falz lemm : « Taol da falz lemm ha mendem ar blokajou euz gwinienn an douar, rag dare eo e rejin ». ¹⁹ Hag an êl a daolas e falz war an douar, mendem a reas ar winienn euz an douar, hag ar vendem a oe taolet e beol vraz kounnar Doue. ²⁰ Breset e oe ar veolad er mêz euz kêr, anezi e teuas gwad a zavas beteg gwestenn ar hezeg war eul ledander a vil c’hweh kant « stad ».

Ar seiz êl hag ar walinier ziweza

XV ¹ Hag e welis en neñv eur zin all braz ha souezuz : seiz êl; ganto seiz gwalenn, ar re ziweza, rag ganto e vo sevenet kounnar Doue. ² Hag e welis, heñvel ouz eur mor mên-strink mesket gand tan. En o zav war ar mor, ar re o-doa bet an treh war an euzvil, war e skeudenn ha war niverenn e ano, ganto ez oa telennou, ³ hag e kanent kantig Moizez, servicher Doue, ha kantig an Oan : Braz hag estlammuz, emezo, eo da Oberou, Aotrou Doue oll halloudeg Roue ar poblou, ⁴ Piou n’e-nefe ket a zoujañs, Aotrou, ha na rentfe ket gloar d’az Ano ? Rag Te, hebken, a zo santel. An oll boblou a zeuio hag a stouo dirazout rag sklêr eo bet diskouezet da varnedigeziou.

⁵ Goudeze e welis : an templ, ennañ teltenn an testeni a zigoras en neñv. ⁶ Hag ar seiz êl, ar re a oa ganto ar seiz gwalenn, a zeuas er mêz euz an templ ; gwisket e oant gand lin glan-lugernuz, gourizou aour o-doa endro d’o dargreiz. ⁷ Unan euz ar pevar loen a roas seiz hanaf aour d’ar seiz êl, hanafou leun euz kounnar Doue a vev a gantvejou da gantvejou. ⁸ Leun-voged e oe an templ, ablamour da hloar Doue ha d’e halloud, ha n’helle den mond en templ a-barz ma vefe peurzevenet seiz gwalenn ar seiz êl.

Ar seiz hanaf

XVI ¹ Hag e klevis eur vouez kreñv o lavared euz an templ d’ar seiz êl : « It, ha skuillit war an douar ar seiz hanaf euz kounnar Doue ». ² Mond a reas ar henta da skuilla e hanaf war an douar, eur gwall houli noazuz a skoas ar re a zouge merk an euzvil hag a stoue dirag e skeudenn. ³ An eil a skuillas e hanaf war ar mor, ar mor a zeuas da veza evel gwad unan maro, hag e varvas kement tra e-noa er mor eur c’hwezadenn a vuez. ⁴ An trede a skuillas e hanaf war ar steriou ha war eien an doureier ; trei a rejont e gwad. ⁵ Hag e klevis êl an doureier o lavared : « Just out, Te hag a zo, hag a zo bet, ar Zant, peogwir az-peus barnet evel-se, ⁶ rag gwad ar zent hag ar brofeded o-deus skuillet, ha gwad ivez az-peus roet dezo da eva. ⁷ Mad a zo greet dezo ». Hag e klevis an aoter o lavared : « Ya, Aotrou Doue oll halloudeg, gwirion ha just eo da varnedigeziou ».

⁸·Ar pevare a skuillas e hanaf war an heol, hag e oe roet dezañ galloud da zevi an dud en tan. ⁹ Hag an dud a oe devet gand eun dommder vraz. Mallozi a rejont ano Doue e-neus galloud war ar gwalinier-se, med ne zeujont ket da zistrei evid renta gloar dezañ. ¹⁰ Ar pemped a skuillas e hanaf war dron an euzvil ; e rouantelez a oe beuzet en deñvalijenn ; gand ar boan, an dud a jaoke war o zeod. ¹¹ Mallozi Doue an neñv a rejont, en abeg d’o foaniou ha d’o gouliou, med ne zeuas ket a geuz dezo d’o oberou.

¹² Ar c’hwehved·a skuillas e hanaf war ar stêr vraz Eufrad, dizehet e oe evid digeri hent d’ar rouaned a zeu euz ar zav-heol. ¹³ Neuze, euz geol an aerouant, euz geol an euzvil, ha geol ar fals-profed, e welis o tond er-mêz tri spered hudur heñvel ouz gweskleved, ¹⁴ rag bez ez int sperejou diaouleg, ober a reont burzudou ha mond da gaoud rouaned ar bed a-bez d’o boda evid an emgann a vo da zeiz braz an Doue oll halloudeg. ¹⁵ Setu ma teuan evel eul laer. Eüruz an hini a veill, hag a zalh e zillad ; evel-se n’e-no ket da vond en noaz na da gaoud mez dirag an dud. ¹⁶ Bodet e oent ganto en eul leh anvet, en hebreeg, Harmagedon.

¹⁷ Ar seizved a skuillas e hanaf en êr, hag euz an templ e teuas, o tond euz an tron, eur vouez kreñv da lavared : « Degouezet eo ». ¹⁸ Neuze e oe luhed, moueziou, kurunou ha ken braz kren-douar ma ne oa bet biskoaz kemend-all abaoe m’ema an den war an douar. ¹⁹ E teir lodenn e torras ar gêr vraz, hag ar hêriou dre ar broiou a gouezas en o foull. Neuze Doue a zeuas da zoñj dezañ euz Babilon, ar gêr vraz, evid rei dezi an hanaf a vourbouill enni gwin e gounnar. ²⁰ Hag e tehas an oll inizi, hag ar meneziou ne oe mui anezo. ²¹ Karzarhennou ken pounner ha talanchou a gouezas euz an neñv war an dud, ar re-mañ a vallozas Doue, en abeg d’ar walenn gazarh, rag eur walenn skrijuz e oa, ma ’z eus unan.

Barnedigez ar zerh-vraz

XVII ¹ Dond a reas unan euz ar seiz êl a oa ganto ar seiz hanaf, hag e komzas ouzin evel-henn : « Deus, hag e tiskouezin dit, penaoz eo barnet ar zerh vraz a zo o chom war ribl ar moriou don. ² Ganti o-deus serhet rouaned an douar, ha mezvet eo bet tud an douar gand gwin he zerhèrèz. ³ Neuze e oen kaset a spered d’ar goueleh hag e welis eur vaouez azezet war eun euzvil ruz-tan goloet a anoiou a vlasfemèrèz, seiz penn e-noa ha deg korn. ⁴ Ar vaouez gwisket e moug ha ruz-tan a sked warni aour, mein priziuz, ha perlez. En he dorn eun hanaf aour leun a draou euzuz, saotradurez he zerhèrèz. ⁵ He zal a oa skrivet warnañ eun ano, eur mister : Babilon ar vraz, mammenn ar zerhed hag an traou euzuz euz an douar. ⁶ Hag e welis ar vaouez mezvet gand gwad ar zent ha gwad testou Jezuz. Sabatuet e oen ouz he gweled. ⁷ Neuze e lavaras din an êl : « Perag beza sabatuet ? Me a lavaro dit mister ar vaouez ha mister an euzvil a zougen anezi hag e-neus seiz penn ha deg korn. ⁸ An euzvil az-peus gwelet a zo bet anezañ, med n’eus ket mui ; o vond da zevel euz an islong ema, evid mond da goll tud an douar, ar re n’eo ket skrivet o ano war roll ar vuez azaleg krouidigez ar bed, a vo souezet o weled an euzvil, rag bez e oa anezañ ha n’eus ket mui, med distrei a ray. ⁹ Amañ ema deuet ar mare da gaoud ar spered sklerijennet gand ar furnez : ar seiz penn eo ar seiz menez, el leh m’ema ar vaouez o chom, bez ez int ivez seiz roue. ¹⁰ Pemp anezo a zo kouezet, ar c’hwehved a zo o ren, n’eo ket deuet c’hoaz, med pa zeuio ne jomo nemed eun nebeudig amzer. ¹¹ An euzvil a oa anezañ ha n’eus ket mui, eñ ivez a zo eun eizved roue. Unan euz ar seiz eo, hag ez a da goll.

¹² An deg korn az-peus gwelet a zo deg roue ha n’o-deus ket c’hoaz resevet o roueelez, med e-pad eun eur o dezo galloud a roue asamblez gand an euzvil. ¹³ Ar re-ze ne glaskont nemed eun dra : lakaad o nerz hag o galloud e servich an euzvil, ¹⁴ brezel a raint d’an Oan hag an Oan a dreho warno, rag bez ez eo Aotrou an Aotronez, roue ar rouaned, ha gantañ ivez an dud galvet, an dud dibabet, an dud fidel a dreho. ¹⁵ An doureier az-peus gwelet, emezañ adarre, el leh m’ema ar zerh o chom, a zo poblou, berniou tud, broiou ha yezou.

¹⁶·An deg korn az-peus gwelet, hag an euzvil, o-dezo kas ouz ar zerh, heh-unan e vo lezet ganto hag en noaz, debri a raint he horv, en tan e tevint anezi. ¹⁷ Rag Doue e-neus lakeet en o halon ober e ziviz dezañ, eur memez diviz : lakaad o roueelez e servich an euzvil beteg ma vo sevenet komzou Doue. ¹⁸ Hag ar vaouez az-peus gwelet eo ar gêr vraz a ren war rouaned an douar.

Distruj Babilon

XVIII ¹·Goudeze e welis eun êl all o tiskenn euz an neñv. Braz e oa e halloud, ha gand e hloar e oe sklerijennet an douar. ²·Youhal a reas a vouez kreñv : « Kouezet eo ! Kouezet eo ! Babilon ar gêr vraz deuet eo da veza eun demeurañs evid an diaouled, eun toull kuz evid an oll sperejou hudur, toull kuz an oll laboused hudur hag euzuz, ³ rag d’an oll boblou he-deus roet da eva gwin he hounnar a zerhèrèz, ha rouaned an douar o-deus serhet ganti, ha marhadourien an douar a zo savet da binvidig diwar he fompadou direol. ⁴ Hag e klevis eur vouez all o lavared euz an neñv : « It er mêz euz ar gêr-se, o va fobl, gand aon da gemered perz en he fehejou, ha da gaoud lod er gwalinier a zo da zegouezoud ganti, ⁵ rag berniet eo he fehejou beteg an neñv, ha Doue e-neus dalhet soñj euz he dizurziou. ⁶ Rentit dezi hervez ar pez he-deus greet d’ar re all, grit dezi an hanter muioh eged n’he-deus greet. En hanaf ma kemmeske ennañ he gwin, kemmeskit dezi an hanter muioh. ⁷ Grit dezi kaoud kement a boan, ha kaoud kement a gañv ha m’he-deus en em blijet el lorh hag er pompadou, peogwir e lavar-hi en he halon : « Rouanez on, war va zron, ha n’on ket intañvez, biken ne vezin e kañv ». ⁸·Setu perag e teuio warni, en eun devez hebken, ar gwalinier pourchaset eviti : maro, kañv, naonegez, pulluhet e vo dre an tan, rag gallouduz eo an Aotrou Doue e-neus he barnet.

⁹ Neuze e ouelo, hag e hirvoudo war he hont rouaned an douar o-deus kemeret perz en he zerhèrèz hag en he fompadou pa welint moged an tan-gwall lakeet enni. ¹⁰ Ne dostaint ket gand aon rag he foan, hag e lavarint : « Siwaz ! Siwaz ! Babilon ar gêr vraz, ar halloudeg, eun eur a zo bet awalh evid barn ahanout ». ¹¹ Marhadourien an douar a ouel hag a ra kañv dezi, rag ne bren den ebed mui o lestrajou : ¹² lestrajou aour hag arhant, mein-briziuz ha perlez, lin, moug, koad c’hwez-vad, traou dent olifant, koad priziuz, arem, houarn pe varbr, ¹³ kanell, amon, louzeier c’hwez-vad, mir, ezañs, gwin, eoul, bleud fin ha gwiniz, ejened, deñved, kezeg ha kirri, sklaved ha prizonidi. ¹⁴ Ar gounid a c’hoantee da galon a zo eet pell diouzit, kement tra flour ha splann a zo kollet evidout. Biken mui ne vezint kavet endro. ¹⁵ Ar varhadourien bet pinvidikeet ganti ne dostaint ket gand aon rag he foan, en eur ouela hag o hirvoudi e lavarint : ¹⁶ « Allaz ! allaz ! Ar gêr vraz, gwisket e lin, e moug ha ruz-tan, an aour o skedi warni, hag ar vein-briziuz hag ar perlez, ¹⁷ eun eur a zo bet awalh evid kas da netra kement a dalvoudegez ».

Peb loman, peb merdead en andreou-se, peb martolod hag ar re a denn o boued euz ar mor ne dostaent ket, ¹⁸ hag e youhent o weled ar voged o sevel euz ar gêr o tevi, hag e lavarent : « Peseurt kêr a oa par d’ar gêr vraz ? » ¹⁹ Poultrenn a daolent war o fenn hag e youhent en eur ouela hag o hirvoudi « ar gêr vraz pinvidig-mor, he-doa pinvidikeet ar re oll o-doa listri war ar mor, eun eur a zo bet·awalh evid he gwasta ».

²⁰ Bez laouen an neñv ha c’hwi ivez ar zent, an ebestel, ar brofeded, rag Doue e-neus roet deoh a-eneb dezi eur varnedigez just.

²¹ Eun êl gallouduz a grogas neuze en eur mên, evel eur mên-milin pounner, hag a stlapas anezañ er mor en eur lavared : « Gand kemend-all a feulsted e vo stlapet Babilon ar gêr vraz. Ne vo ket kavet mui ». ²² Ennout ne vo ket klevet mui kan an delennerien, nag hini ar vuzikerien, ar fleüterien, an drompillerien ; artizan ebed euz micher ebed, ne vo kavet ennout, trouz mên-milin ebed ne vo klevet ennout ; ²³ ne skedo mui ennout sklerijenn lamp ebed, mouez ar gwaz nevez hag e vreg ne vo mui klevet ennout, peogwir da varhadourien a oa ar pennou braz euz an douar, peogwir da zorsèrèz he-deus touellet an oll boblou, peogwir ennout eo bet kavet gwad ar brofeded, ar zent, ar re oll a zo bet lazet war an douar.

Trehadenn hag eured an Oan

XIX ¹ Goudeze e klevis evel safar eur mor a dud hag a lavare e barr an neñv : « Allelouia ! d’on Doue eo ar zilvidigez, ar hloar hag ar galloud, ² rag re wir ha just eo e varnedigez : barnet e-neus ar zerh vraz he-deus kontammet an douar gand he zerhèrèz veñjet e-neus warni gwad e zervicherien ». ³ Hag adarre e lavarjont : « Allelouia ! hag ar moged anezi a zav a gantvejou da gantvejou ». ⁴ Hag ar pevar goziad war’n ugent hag ar pevar loen a stouas da adori an Doue a oa azezet war an tron hag e lavarjont : « Amen, Allelouia ! »

⁵ Neuze, o tond euz an tron, eur vouez a lavare : « Meulit on Doue, c’hwi oll e zervicherien, c’hwi, bian ha braz, hag a zouj anezañ ». ⁶ Hag e klevis evel safar eur mor a dud, evel kroz ar moriou don hag evel talmou kurun pounner. Lavared a reent : « Allelouia » rag staget e-neus da ren on Aotrou, on Doue oll halloudeg. ⁷ Bezom laouen, leun a levenez, meulom anezañ, rag degouezet eo eured an Oan ; en em fichet he-deus he bried. ⁸ Gwisket eo bet gand lin fin, skeduz ha glan, rag al lin eo oberou just ar zent.

⁹ Hag e lavaras din : « Skriv : eüruz ar re zo pedet da vañvez eured an Oan », hag e lavaras din c’hoaz : « Ar re-ze a zo komzou gwirion a-berz Doue ». ¹⁰ Neuze e stouis e-harz e dreid d’e adori ; med lavared a reas din : « Arabad eo dit henn ober, me a zo kenzervicher ganit ha gand da vreudeur a vir testeni Jezuz. Doue eo a dleez adori, hag testeni Jezuz eo ar Spered a brofediez ».

Treh ar Mesiaz

¹¹ Neuze e welis an neñv digor : eur marh gwenn e oa ; an hini a zo war e gein a zo e ano : Fidel ha Gwirion. Barn ha stourm a ra gand justis. ¹² E zaoulagad a zo flamm-tan, war e benn ez eus talgennou e-leiz, ha skrivet warnañ eun ano ha n’eus nemetañ ouz e anaoud. 13 Eur vantell trempet er gwad a zo ouz e wiska, e ano eo : Komz Doue. ¹⁴ Armeadou an neñv, gwisket gand lin gwenn ha glan, a heulie anezañ war gezeg gwenn. ¹⁵ Eur hleze lemm a zeu er-méz euz e henou evid skei gan tan ar broadou. Eñ, e-unan, gand eur wialenn houarn a reno anezo war ar peuri, bresa a ray, e-unan, ar veol a vourbouill enni gwin kounnar on Doue oll halloudeg. ¹⁶ War e vantell ha war e vorzed e toug eun ano skrivet : Roue ar rouaned, hag Aotrou an Aotrounez.

¹⁷ Neuze e welis eun êl en e zav e-barz an heol. A vouez uhel e youhas d’an oll laboused a nije uhel en oabl : « Deuit d’en em voda evid bañvez braz Doue, ¹⁸ evid debri kig ar rouaned, kig an ofiserien, kig an dud galloudeg, kig ar hezeg hag ar re a vez war o hein, kig an oll dud, frank pe sklav, bian ha bras ». ¹⁹ Hag e welis an euzvil ha rouaned an douar hag o armeadou bodet evid stourm ouz ar marheg hag e armead. ²⁰ Paket e oe an euzvil ha gantañ ar falsprofed, e-noa dre ar burzudou greet gantañ dirag an euzvil, touellet ar re o-doa resevet merk an euzvil hag adoret e skeudenn. O-daou e oent taolet ez-veo el lennad tan : eul lennad soufr entanet. ²¹ Ar re all a oe lazet gand ar hleze a zeue euz genou ar marheg, hag an oll laboused o devoa o gwalh euz o hig.

Eur miliad bloaveziou

XX ¹ Neuze e welis eun êl o tiskenn euz an neñv, en e zorn e oa gantañ alhwez an islong hag eur jadenn bounner. ² Paka krog a reas en aerouant, ar zarpant a-wechall, an diaoul ha Satan eo, hag e chadennas anezañ evid eur miliad bloaveziou. ³ En islong e taolas anezañ, ha prenna ha siella warnañ evid ma chomfe heb touella an dud beteg ma vefe echu ar miliad bloaveziou. Goudeze e tle beza frankizet evid eun nebeud amzer. ⁴ Hag e welis troniou. Ar re a zeuas da azeza warno, e oe roet dezo galloud da varn. Hag e welis ivez eneou ar re a oa bet dibennet en abeg da desteni Jezuz ha da Gomz Doue hag ar re n’o-doa ket adoret an euzvil nag e skeudenn ha n’o doa ket resevet ar merk na war o zal na war o dorn. Dond a rejont d’ar vuez ha ren gand ar Hrist e-pad eur miliad bloaveziou. ⁵ Ar peurrest euz ar re varo, ne zeujont ket d’ar vuez araog fin ar miliad bloaveziou. Hennez eo an adsao kenta da veo. ⁶ Eüruz ha santel ar re o-deus perz en adsao kenta da veo. N’e-neus krog ebed enno an eil maro. Beleien Doue hag ar Hrist e vezint, ha gantañ e renint e-pad ar miliad bloaveziou.

An drehadenn hag ar varn

⁷ Pa vo eet da benn ar miliad bloaveziou, e vo frankizet Satan euz e brizon. ⁸ Hag ez ay da douella ar poblou a zo dre bevar horn an douar, Gog ha Magog, o boda a ray evid an emgann, ken niveruz int ha trêzennou ar mor. ⁹ Dond a rejont war ar vro a-bez, kelhiet e oe tachenn ar zent hag ar gêr vuia-karet. Med eun tan a ziskennas euz an neñv hag a lonkas anezo. ¹⁰ Hag an diaoul, o zoueller, a oe stlapet el lenn a dan hag a zoufr, e-kichenn an euzvil hag ar fals-profed. Poaniou o dezo da houzañv ; noz-deiz, da virviken. ¹¹ Neuze e welis eun tron gwenn ha braz hag an hini a oa azezet warnañ : dirazañ e tehas an douar hag an neñv heb lezel roud ebed war o lerh. ¹² Hag e welis ar re varo, ar re vraz hag ar re vian, en o zav dirag an tron, hag e oe digoret leoriou. Eul levr all a oe digoret, levr ar vuez, hag ar re varo a oe barnet hervez o oberou, hervez ar pez a oa skrivet el leoriou. ¹³ Ar mor a rentas ar re varo dalhet ennañ, ar Maro hag an Iferniou ar re varo dalhet ganto, hag e oe barnet peb hini hervez e oberou. ¹⁴ Neuze ar Maro hag an Iferniou a oe stlapet e lenn a dan. Al Lenn a dan, setu aze an eil maro. ¹⁵ Ha kement hini ne oe ket kavet e ano skrivet el levr a vuez a oe stlapet el lenn a dan.

Neñvou nevez ha douar nevez

XXI ¹ Hag e welis : eun neñv nevez e oa, hag eun douar nevez, rag an neñv kenta hag an douar kenta a oa eet da get, hag ar mor n’eus mui anezañ. ² Ar gêr zantel, ar Jeruzalem nevez, a welis o tiskenn euz an neñv a-gichenn Doue, kempennet evel eur plah-nevez en em fichet evid he gwaz. Hag e klevis eur vouez kreñv o tond euz an tron hag a lavare : « Setu amañ demeurañs Doue gand an dud, chom a ray ganto. Int-i a vo e bobl hag eñ a vo « An Doue a zo ganto ». ⁴ Seha a ray an daerou euz o daoulagad, ar maro ne vo mui anezañ ; ne vo mui na kañv, na klemm, na poan, rag ar bed kenta a zo eet da get.

⁵ Hag an hini a zo azezet war an tron a lavaras : « Setu ma ran nevez-flamm peb tra » hag e lavaras : « Skriv : sur ha gwirion eo ar homzou-se ». ⁶ Hag e lavaras din : « Greet eo peb tra, an Alfa hag an Omega on, ar penn kenta hag ar penn diweza ; d’an neb e-neus sehed e roin, evid netra, euz eienenn an dour a vuez. ⁷ An treher a resevo kement-se da hêrez ; me a vo e Zoue hag eñ a vo va mab. ⁸ An dud laosk a-vad, an dud difeiz, ar re ziroll, ar vuntrerien, an dud hudur, ar zorzerien, an azeulerien fals-doueou hag ar gaouiaded, e lenn an tan hag ar soufr ema o lod ; hennez eo an eil maro.

Ar Jeruzalem nevez

⁹ Neuze e teuas unan euz ar seiz êl, ar re a oa ganto ar seiz hanaf leun euz ar seiz gwalenn ziweza hag e lavaras din : « Deus, ma tiskouezin dit ar plah nevez, pried an Oan ». ¹⁰ Va dougenn a reas a spered war eur menez braz hag uhel, hag e tikouezas din ar gêr zantel, Jeruzalem, o tiskenn euz an neñv a-gichenn Doue. ¹¹ Skedi a ree euz gloar Doue e-unan. Tenna a ree he sked d’eur mên priziuz heñvel ouz eur mên-yalp treuz-weluz evel strink. ¹² Mogeriou braz hag uhel he-doa gand daouzeg dor ; e toull an noriou ez oa daouzeg êl, hag anoiou skrivet, anoiou an daouzeg meuriad euz bugale Israel. ¹³ Diouz kostez ar zav-heol ez oa teir dor, diouz kostez an hanter-noz teir dor, diouz kostez ar hreisteiz teir dor, diouz kostez ar huz-heol teir dor. ¹⁴ Mogeriou kêr a oa savet war daouzeg diazez, skrivet warno daouzeg ano, anoiou daouzeg abostol an Oan. ¹⁵ An hini a gomze ouzin e-noa eur gorzenn aour e-giz muzul, evid muzula ar gêr, he doriou hag he mogeriou-divenn. ¹⁶ Pevar-horneg e oa ar gêr, keid-ha-keid a-dreuz hag a-hed. He muzula a reas gand e gorzenn : daouzeg mil stad a ree, keid-ha-keid e oa a-dreuz, a hed hag a uhelder. ¹⁷ Muzula a reas ar mogeriou-divenn : kant pevar troatad ha daou ugent o-doa hervez muzul an dud implijet gand an êl. ¹⁸ Ar mogeriou-divenn a zo e mên-yalp ; aour pur, heñvel ouz strink pur eo ar gêr. ¹⁹ Diazezou mogeriou kêr a zo kinklet gand mein briziuz a beb seurt. An diazez kenta a zo mein-yalp ; an eil mein-safir ; an trede kalkedon ; ar pevare emrodez ; ²⁰ ar pemped sardoniz ; ar c’hwehved agatenn ; ar seizved aourven ; an eizved beril ; an naved topaz ; an degved mein-glaz aour ; an unnegved sirken ; an daouzegved ametist.

²¹·An daouzeg dor a zo daouzeg perlezenn. Peb dor, en he fez, n’oa anezi nemed eur berlezenn aour pur ; heñvel ouz strink sklêr oa al leur-gêr. ²² Templ ebed n’am-eus gwelet e kêr, rag templ kêr eo an Aotrou Doue oll halloudeg hag an Oan. ²³ Ar gêr, n’he-deus ezomm nag euz an heol, nag euz al loar evid he sklerijenna, rag gloar Doue eo a sklerijenn anezi hag an Oan eo ar goulou. ²⁴·Ar poblou payan a gerzo ouz he sklerijenn, ha rouaned an douar a zegaso dezi o gloar. ²⁵ He dorojou ne vezint ket serret war an deiz, rag el leh-se ne vo noz ebed ken. 26 Degaset e vo di gloar hag enor ar poblou payan.

XXII ¹ Hag e tiskouezas din eur stêr dour a vuez, skeduz evel strink, a darze euz tron Doue hag an Oan. ²·E-kreiz al leur-gêr, hag etre diou vrehenn ar stêr, ez eus eur wezenn a vuez, a daole daouzeg gwech he frouez, beb miz e roe frouez ; he deliou a vez implijet evid rei ar pare d’ar poblou payan. ³ Ne vo malloz ebed ken. Tron Doue hag an Oan a vo enni, hag e zervicherien a adoro anezañ : ⁴ gweled a raint e zremm hag e ano a vo war o zal. ⁵·Ne vo noz ebed ken, n’e-no den ezomm euz sklerijenn ar goulou, nag euz sklerijenn an heol, rag an Aotrou Doue a skuillo warno e sklerijenn ; ren a raint da virviken.

⁶·Neuze e lavaras din : « Sur ha gwirion eo ar homzou-ze. An Aotrou, Doue sperejou ar brofeded, e-neus kaset e êl evid diskouez d’e zervicherien ar pez a dle degouezoud dizale ; ⁷ setu, me a zeuio dizale. Eüruz an neb a vir ar homzou profedet el levr-mañ. ⁸ Me, Yann, am-eus klevet ha gwelet kement-se, me a zo servicher evidout hag evid da vreudeur ar brofeded, hag evid ar re a vir komzou al levr-mañ. Doue a dleez adori. ¹⁰ Neuze e lavaras din : « Na zalh ket kuzet ar homzou profedet el levr-mañ, rag tost eo ar poent. ¹¹ Ra gendalho an den disleal en dislealded, an den hudur en hudurnez, med ra gresko an den just er justis hag ar zant er zantelez. ¹² Setu ma teuan dizale, ha va gopr a zo ganin, evid rei da beb hini hervez e labour. ¹³ Bez ez on an Alfa hag an Omega, ar penn kenta hag ar penn diweza. ¹⁴ Eüruz ar re a walh o zae evid kaoud gwir war gwezenn ar vuez hag antreal e kêr dre an noriou. ¹⁵ Er mêz, ar chas, ar zorserien, an dud gadal, ar vuntrerien, an azeulerien doueou-faoz, ha kement hini a zo troet gand ar gevier pe a zo gaouiad. ¹⁶ Me Jezuz, am-eus kaset va êl da rei deoh an testeni-se, diwarbenn an Ilizou, me a zo gwrizienn a lignez David, ar steredenn-vintin lugernuz. ¹⁷ Ar Spered hag ar plah-nevez a lavar : « Deus », an neb a glev, ra lavaro : « Deus », an neb e-neus sehed ra zeuio, an neb e-neuz c’hoant ra gemero dour a vuez evid netra. ¹⁸ Test on evid kement hini a glev ar homzou profedet el levr-mañ. Ma teu unan bennag da lavared tra-pe-dra ouzpenn, Doue a lakaio da greski dezañ ar gwalinier a zo bet ano anezo el levr-mañ. ¹⁹ Ma teu unan bennag da denna kuit tra-pe-dra euz ar homzou profedet el levr-mañ, Doue a denno kuit e lod euz ar wezenn a vuez hag euz ar gêr zantel, a zo ano anezo el levr-mañ.

²⁰ An hini a desteni kement-mañ a lavar : ya, dond a rin heb dale. ²¹ Amen, amen, Aotrou Jezuz. Gras an Aotrou Jezuz ra vezo ganeoh oll !