Pevare sizunvez amzer Fask (A)

Euz ar 30 a viz Ebrel d’ar 6 a viz Mae 2023

Pevare sul Fask

Yn 10, 1-10

Komz a ree Jezuz evel-henn d’ar Farizianed :

¹ — « E gwirionez, e gwirionez, e lavaran deoh : an hini ne d-a ket e kraou an deñved dre an nor, med a bign dre eul leh all, hennez zo eul laer hag eur skraper.

² « An hini a ya dre an nor eo pastor an deñved. ³ Digeri a ra ar porzier dezañ, ha selaou a ra an deñved e vouez. An deñved a zo dezañ, a vez galvet gantañ pep hini dre e ano, hag e lak anezo da vond er-mêz. ⁴ P’e-neus kaset e oll deñved er-mêz, e kerz en o-raog, hag ez eont d’e heul, rag anavezoud a reont e vouez.

⁵ « Ne d-aint ket da heul eun dén diavêz, med tehed a raint pell dioutañ, rag ne anavezont ket mouez an dud diavêz ».

⁶ Setu ar barabolenn lavaret gand Jezuz d’ar Farizianed, med ne gomprenjont ket ar péz e-noa c’hoant lavared dezo.

⁷ Abalamour da-ze, e lavaras Jezuz dezo adarre :

— « E gwirionez, e gwirionez, e lavaran deoh : Me eo dor an deñved. ⁸ Laeron ha skraperien eo ar re oll a zo deuet em-raog ; med an deñved n’o-deus ket selaouet anezo.

⁹ « Bez’ ez on-me an nor : ma ’z eus unan o vond tre en eur dremen drezon-me, e vo salvet ; bez’ e hello mond ha dond, hag e kavo peuri. ¹⁰ Ne zeu al laer a-vad nemed evid laerez, laza ha distruja. Deuet on-me evid rei ar vuhez d’an deñved, ar vuhez e-leiz ».

Lun 1a a viz mae : Dedi iliz-veur Sant Kaourintin
Gouel en eskopti Kemper ha Leon

Mz 16, 13-19

¹³ Deuet Jezuz e korn-bro Sezare-Filip, e houlennas ouz e ziskibien :

— « Piou eo Mab an dén, diouz ar péz a lavar an dud ? »

¹⁴ Respont a rejont :

— « Evid lod eo Yann-Vadezour, evid re all, Elïaz, evid re all c’hoaz, Jeremïaz pe unan euz ar brofeted ».

¹⁵–« Ha c’hwi, emezañ dezo, petra a lavarit ? Evidoh, piou ez on-me ? »

¹⁶ Neuze, e respontas Simon-Pér en eur lavared :

— « Te eo ar Hrist, Mab an Doue beo-buezeg ! »

¹⁷ Respont a reas Jezuz gand ar homzou-mañ :

— « Eüruz out, Simon, mab da Yonaz, rag n’eo ket ar horv nag ar gwad eo o-deus roet dit da anaoud an dra-ze, med va Zad hag a zo en neñv. ¹⁸ Ha me a lavar dit : te zo roh, ha war ar roh-ze e savin va Iliz, ha ne vo ket galloud ar Maro treh dezi. ¹⁹ Rei a rin dit alhweziou Rouantèlèz an Neñv : kement az-po liammet war an douar, a vo liammet en neñv, ha kement az-po diliammet war an douar, a vo diliammet en neñv ».

Lun

Yn 10, 1-10

Komz a ree Jezuz evel-henn d’ar Farizianed :

¹ — « E gwirionez, e gwirionez, e lavaran deoh : an hini ne d-a ket e kraou an deñved dre an nor, med a bign dre eul leh all, hennez zo eul laer hag eur skraper.

² « An hini a ya dre an nor eo pastor an deñved. ³ Digeri a ra ar porzier dezañ, ha selaou a ra an deñved e vouez. An deñved a zo dezañ, a vez galvet gantañ pep hini dre e ano, hag e lak anezo da vond er-mêz. ⁴ P’e-neus kaset e oll deñved er-mêz, e kerz en o-raog, hag ez eont d’e heul, rag anavezoud a reont e vouez.

⁵ « Ne d-aint ket da heul eun dén diavêz, med tehed a raint pell dioutañ, rag ne anavezont ket mouez an dud diavêz ».

⁶ Setu ar barabolenn lavaret gand Jezuz d’ar Farizianed, med ne gomprenjont ket ar péz e-noa c’hoant lavared dezo.

⁷ Abalamour da-ze, e lavaras Jezuz dezo adarre :

— « E gwirionez, e gwirionez, e lavaran deoh : Me eo dor an deñved. ⁸ Laeron ha skraperien eo ar re oll a zo deuet em-raog ; med an deñved n’o-deus ket selaouet anezo.

⁹ « Bez’ ez on-me an nor : ma ’z eus unan o vond tre en eur dremen drezon-me, e vo salvet ; bez’ e hello mond ha dond, hag e kavo peuri. ¹⁰ Ne zeu al laer a-vad nemed evid laerez, laza ha distruja. Deuet on-me evid rei ar vuhez d’an deñved, ar vuhez e-leiz ».

Meurz

Yn 10, 22-30

²² Digouezoud a reas gouel Dedi an Templ, e Jeruzalem. Ar goañv e oa. ²³ Mond ha dond a ree Jezuz en Templ, dindan porched Salomon. ²⁴ En em voda a reas ar Juzevien en-dro dezañ, hag e lavarjont :

— « Beteg pe vare e laoski ahanom en arvar ? Ma ’z out-te ar Hrist, lavar deom frêz ».

²⁵ Respont a reas Jezuz dezo :

— « Lavaret em-eus deoh, ha ne gredit ket. An oberou a ran-me en ano va Zad, setu ar péz a ro testeni din. ²⁶  Med c’hwi, ne gredit ket ahanon peogwir n’oh ket euz va deñved. ²⁷ Va deñved a zelaou va mouez ; anavezoud a ran-me anezo, hag e teuont d’am heul. ²⁸ Rei a ran dezo ar vuhez peurbaduz : ne d-aint biken da goll, ha dén e-béd ne ziframmo anezo euz va dorn. ²⁹ Va Zad,hag e-neus roet anezo din, zo brasoh eged an oll, ha dén ne hell diframma anezo euz dorn an Tad.

³⁰ « An Tad ha me n’om nemed unan ».

Merher 3 a viz mae
Sant Filip ha sant Jakez, ebestel. Gouel

Yn 14, 6-14

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

⁶— « Bez ez on-me an hent, ar wirionez hag ar vuhez. N’ez a dén d’an Tad, nemed drezon-me.

⁷ « Peogwir eh anavezit ahanon, eh anavezit ive va Zad. Diwar-vremañ eh anavezit anezañ, hag ho-peus gwelet anezañ ».

⁸ Neuze, e lavaras Filip dezañ :

— « Aotrou, diskouez deom an Tad, hag e vo kement-se tra-walh evidom ».

⁹ Hag e lavaras Jezuz dezañ :

— « Keid-all zo emaon asamblez ganeoh, ha ne anavezez ket ahanon, Filip ?

An hini a wél ahanon, a wél an Tad. Penaoz e hellez-te lavared : « Diskouez deom an Tad ? » ¹⁰ Ha ne gredez ket emaon en Tad hag an Tad ennon ? Ar homzou a lavaran deoh, n’eo ket ahanon va-unan eo e lavaran anezo. An Tad, Eñ hag a zo ennon, a ra e oberou dezañ e-unan.

¹¹ « Kredit ahanon : Me a zo en Tad hag an Tad a zo ennon ; ha ma ne gredit ket ar péz a lavaran, kredit abalamour d’an oberou-ze.

¹² « Ya, e gwirionez, e lavaran deoh kement-mañ : piou bennag a gréd ennon a raio, eñ ive, an oberou a ran, ha re vrasoh zokén, peogwir ez an da gaoud va Zad.

¹³ « Ober a rin kement a houlennot em ano, hag evel-se, e vo roet gloar d’an Tad dre ar Mab. ¹⁴  Ma houlennit eun dra bennag em ano, e roin anezañ deoh ».

Yaou

Yn 13, 16-20

Goude beza gwalhet treid e ziskibien, e komzas Jezuz evel-henn :

¹⁶ « E gwirionez, e gwirionez, e lavaran deoh : n’eo ket ar zervicher brasoh eged e vestr, nag ar hannad brasoh eged an hini e-neus kaset anezañ.

¹⁷ « O houzoud kement-se, e vezot eüruz, ma reot evel-se.

¹⁸ « N’eo ket ahanoh oll eo e komzan. Bez’ e ouezan-me pe re am-eus dibabet, med red eo d’ar Skritur dond da wir : « An hini a zebre ar bara ganin e-neus savet e zeul a-eneb din ».

¹⁹ « Kement-se a lavaran deoh bremañ, a-raog ma tigouezo, evid ma kredot « Ez On-me », pa zigouezo.

²⁰ « E gwirionez, e gwirionez, e lavaran deoh : piou bennag a zigemer an hini a gasan, a zigemer ahanon me va-unan ; hag an hini a zigemer ahanon, a zigemer an hini on bet kaset gantañ ».

Gwener

Yn 14, 1-6

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

¹ « Na laoskit ket ho kalon da veza strafuillet : kredi a rit e Doue, kredit ennon-me ive.

² « E ti va Zad, ez eus meur a zemeurañs. Ma ne vije ket bet evel-se, daoust ha lavaret em-bije deoh : « Mond a ran da bourchas deoh eur plas » ? ³ Ha pa vin eet da bourchas deoh eur plas, e teuin en-dro da gemer ahanoh ganin, evid ma vezot, c’hwi ive, el leh m’emaon-me. ⁴ Evid mond d’al leh ma ’z an, eh anavezit an hent ».

⁵ Lavared a reas Tomaz dezañ :

— « Aotrou, n’ouzom ket da beleh emaout o vond. Penaoz e hellfem anavezoud an hent ? »

⁶ Respont a reas Jezuz dezañ :

— « Bez’ ez on-me an Hent, ar Wirionez hag ar Vuhez ; n’ez a dén d’an Tad, nemed drezon-me ».

Sadorn

Yn 14, 7-14

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

⁷ « Peogwir eh anavezit ahanon, eh anavezot ive va Zad. A-vremañ, eh anavezit anezañ, hag ho-peus gwelet anezañ ».

⁸ Lavared a reas Filip dezañ :

— « Aotrou, diskouez deom an Tad, hag ez eo tra-walh evidom ».

⁹ Respont a reas Jezuz dezañ :

— « Keid-all zo emaon ganeoh, ha ne anavezez ket ahanon, Filip ? An hini a wél ahanon a wél an Tad. Penaoz e hellez lavared : « Diskouez deom an Tad ? »

¹⁰ « Ha ne gredez ket eta emaon en Tad hag ema an Tad ennon ? Ar homzou a lavaran deoh, n’eo ket ahanon va-unan eo e lavaran anezo. An Tad, hag a zo ennon, a ra e oberou dezañ e-unan.

¹¹ « Kredit ahanon : Me zo en Tad hag an Tad a zo ennon ; ma ne gredit ket ennon, kredit da vihanna abalamour d’an oberou o-unan.

¹² « E gwironez, e gwirionez, e lavaran deoh : an hini a gréd ennon a raio an oberou a ran. Ober a raio reou brasoh zokén, peogwir ez an da gaoud va Zad. ¹³ Ha kement tra a houlennot em ano, e rin anezañ, hag evel-se e vo roet gloar d’an Tad dre ar Mab. ¹⁴ Pa houlennot eun dra bennag em ano, e rin-me anezañ ».