Pemped sizunvez war ar bloaz (A)

Euz ar 5 d’an 11 a viz C’hwevrer 2023

Pemped sul war ar bloaz

Mz 5, 13-16 (A)

Bodet e ziskibien en-dro da Jezuz war ar menez, e lavare dezo :

¹³ « Bez’ ez oh-c’hwi holen an douar. Med ma teu an holen da goll e vlaz, gand petra e vo roet dezañ en-dro ? N’eo mui mad da netra : taolet e vez er-mêz hag e vez breset gand treid an dud.

¹⁴ « Bez’ ez oh-c’hwi sklêrijenn ar béd. Eur gêr savet war gern eur menez ne hell ket beza kuzet.

¹⁵ « Ne vez ket enaouet eul lamp evid beza lakeet dindan an armel. Lakeet e vez war eur hantolor hag e skéd neuze da rei sklêrijenn d’an oll re a zo en ti.

¹⁶ « Evel-se, ra skedo ho sklêrijenn dirag an dud : neuze, o weled an oberou mad a rit, e rentint gloar d’ho Tad hag a zo en Neñv ».

Lun

Mk 6, 53-56

⁵³ Goude beza treizet al lenn beteg Jenezared, e tiskennas Jezuz hag e ziskibien euz ar vag. ⁵⁴ Raktal, e oe anavezet Jezuz gand an dud. ⁵⁵ Mond a rejont dre ar vro a-béz, ha digas ar re glañv war o hravaz, e kement leh ma klevent en em gave Jezuz.

⁵⁶ E kement leh ma ’z ee : kêriadennou, kêriou, tiegeziou, e veze lakeet ar re glañv war ar plasennou. Pedi a reent Jezuz da lezel anezo da douch ouz e vantell, ha pa ne vefe nemed ar vevenn anezi. Ha kement hini a douche outi a veze pareet.

Meurz

Mk 7, 1-13

¹ Deuet euz Jeruzalem, en em vodas Farizianed hag eun nebeud Skribed en-dro da Jezuz.

² Gweled a reont lod euz e ziskibien o trebi o fréd gand o daouarn dihlan, da lavared eo : heb beza bet gwalhet ganto.

³ Derhel a ra ar Farizianed hag an oll Juzevien zokén, da voaziou deuet dezo euz o zadou-koz, ha ne zrebont ket ma ne vez ket bet gwalhet mad o daouarn ganto. ⁴ O tistrei d’ar gêr euz plasenn ar marhad, ne zrebont ket ma n’o-deus ket strinket dour warno o-unan, ha meur a voazamañt all c’hoaz a heuliont deuet dezo a-berz o zadou-koz, pa vez kont da walhi kanafennou, podou, listri-arem.

⁵ Goulenn a ra eta, ar Farizianed hag ar Skribed ouz Jezuz :

— « Perag ne heuill ket da ziskibien giziou on tadou-koz ? Kemer a reont o frejou gand o daouarn dihlan ».

⁶ Respont a reas Jezuz dezo :

— « Re vad e-neus Izaïaz greet e brofet diwar ho penn, tud faoz ahanoh, evel m’eo skrivet :

« Enori a ra ar bobl-mañ ahanon,
« diwar bég he muzellou eo avad ;
« ema o halon pell diouzin.
⁷ « N’o-deus priz e-béd al lidou a reont en enor din,
« rag o helennadurez n’eus anezi,
« nemed reolennou-tud.

⁸ « Lakaad a rit, a gostez, c’hwi ive, gourhemennou Doue, evid mired boazamañchou an dud ».

Hag e lavaras dezo ouspenn :

⁹— « Torret e vez ganeoh Lezenn Doue evid mired ho poazamañchou koz.

¹⁰ Ar wirionnez a oa gand Moïzez p’e-neus lavaret :

— « Da dad ha da vamm a enori ».

Ha c’hoaz :

« An hini a vallozo e dad pe e vamm : ra vo kaset d’ar maro ».

¹¹ Hag e lavarit-c’hwi : « Ma lavar unan bennag d’e dad pe d’e vamm : Ar zikouriou am-befe gellet rei deoh zo « korban », da lavared eo « donezon sakr », ¹² c’hwi a ro aotre dezañ da jom heb ober netra evid e dad pe e vamm. ¹³ Hag evel-se, e kasit da netra komz Doue, gand ar boazamañchou koz a virit a rumm da rumm. Hag e-leiz a draou all a rit euz ar seurt-se.

Merher

Mk 7, 14-23

¹⁴ Gervel a reas Jezuz an dud ha pedi anezo da dostaad outañ, hag e lavaras dezo :

— « C’hwi oll, selaouit ahanon, hag intentit mad. ¹⁵ N’eo ket ar péz a zo er-mêz euz an dén, hag a ya ennañ, a hell lakaad anezañ da veza dihlan. Med ar péz a zeu er-mêz euz an dén, setu ar péz a ra dezañ beza dihlan ».

(¹⁶)¹⁷ Pa oe eet Jezuz tre en ti, pell diouz an dud, e reas e ziskibien goulennou outañ diwar-benn ar barabolenn-ze. ¹⁸ Neuze e lavaras dezo :

— « Ha c’hwi ive a vefe ’ta berr a spered ? Ha ne ouezit ket n’eus netra a gement a ya e-barz an dén a hellfe lakaad anezañ dihlan, ¹⁹ rag an dra-ze ne d-a ket en e galon, med en e gov, da veza distaolet er foz ».

Hag evel-se, e tisklêrie Jezuz e oa glan kement boued a zo. ²⁰ Hag e lavare :

— « Ar péz a zeu euz an dén, setu ar péz a vez louzet an dén gantañ. ²¹ Rag euz diabarz an dén, euz e galon eo e teu dezañ ar zoñj da ober an droug : ar vuhez diroll, al laeronsi, ar muntrèrèz, ²² an avoultriez, ar c’hoantègèz direiz, ar fallagriez, an tromplèrèz, an hudurnez, an avi, an droug-komz, an ourgouill, ar follentez dall. ²³ Dond a ra an oll draou fall-ze euz an diabarz, hag e reont d’an dén beza dihlan ».

Yaou

Mk 7, 24-30

²⁴ En amzer-ze, ez eas Jezuz beteg harzou Tir ha Sidon. Eet tre en eun ti, n’e-noa ket c’hoant e vefe gouezet. Med ne hellas ket chom kuzet.

²⁵ Rag, kerkent, e klevas eur vaouez ano anezañ : bez’ e oa he merh dalhet gand eur spered hudur ; dond a reas d’en em daoler e-harz e dreid.

²⁶ Bez’ e oa ar vaouez-se eur bayanez, Siro-Fenisianez a ouenn, hag e pede Jezuz da gas kuit an droug-spered euz he merh. ²⁷ Lavared a reas Jezuz :

— « Lez da genta ar vugale da gaoud o gwalh, rag n’eo ket deread kemer bara ar vugale da daoler anezañ d’ar chas bihan ».

²⁸ Med hi da respont :

— « Gwir eo Aotrou, ar chas bihan, dindan an daol, e vez debret bruzun ar vugale ganto ! ».

²⁹ Neuze, e lavaras Jezuz dezi :

— « Abalamour d’ar gomz-se, kee : eet eo an droug-spered er-mêz euz da verh ».

³⁰ Distrei a reas ar vaouez d’ar gêr, hag e kavas ar hrouadur astennet war ar gwele : eet e oa an droug-spered er mêz euz he merh.

Gwener

Mk 7, 31-37

³¹ Kuiteet gand Jezuz bro-Dir, e tremenas dre gêr Zidon hag ez eas war-zu mor Galilea, ha mond e kreiz douarou an Dégkêr.

³² Eno e oe digaset dezañ eun dén bouzar ha besteod, hag e oe goulennet digantañ astenn e zaouarn warnañ.

³³ Mond a reas Jezuz gantañ a-gostez, o pellad diouz an dud, lakaad e vizied en e ziskouarn, hag euz e grañch war e deod.

³⁴ Goude-ze, savet e zaoulagad gantañ war-zu an neñv, e hirvoudas, hag e lavaras dezañ :

— « Effeta ! »  da lavared eo : « Digor ! »

³⁵ Kerkent e oe digoret e ziskouarn, distagellet e deod, hag e komze frêz. ³⁶ Neuze, e tivennas Jezuz outo ranna gêr e-béd da zén. Med seul-vui e tivenne, seul-vui eh embannent ar helou.

³⁷ Estlammet dreist-muzul e oa an dud, hag e lavarent :

— « Mad eo bet greet pep tra gantañ : rei a ra ar hleved d’ar re vouzar, hag ar prezeg d’ar re vud ».

Sadorn

Mk 8, 1-10

¹ En deiziou-ze, o veza ma oa adarre e-leiz a dud, ha ma n’o-doa netra da zebri, e halvas Jezuz e ziskibien da zond d’e gaoud, hag e lavaras dezo :

² — « Truez am-eus ouz an dud-se, rag tri devez ’so dija m’emaint ganin, ha n’o-deus netra da zebri. ³ Ma kasan anezo d’ar gêr war yun, e teuint da zempla en hent ; ha lod anezo a zo deuet euz a bell ».

⁴ Respont a reas e ziskibien dezañ :

— « E peleh ’ta e vo kavet tra-walh a vara evito, amañ, en dezert ? »

⁵ Goulenn a reas Jezuz outo :

— « Péd baraenn zo ganeoh ? »

— « Seiz », emezo.

⁶ Neuze, e roas urz d’an dud da azeza war an douar. Goude-ze, kemeret gantañ ar zeiz baraenn e lavaras eur bedenn a drugarez, hag e torras anezo, ha rei d’e ziskibien da veza ingalet etre an dud ; ha e oent ingalet.

⁷ Bez’ e oa ive ganto eun nebeud peskedigou ; benniga a reas Jezuz anezo, ha lakaad da veza ingalet etre an dud ive. ⁸ Debri a rejont, hag o-doe bet o gwalh. Dastumet e oe an tammou a jome en dilerh : peadra da garga seiz panerad.

⁹ Bez’ e oa avad eur pevar mil bennag a dud anezo. Goude-ze, e pedas Jezuz anezo da vond kuit.

¹⁰ Raktal e savas Jezuz er vag asamblez gand e ziskibien, hag ez eas da dolead Dalmanouta.