- Le Diocèse
- L’agenda
- Les étapes de la vie
- Prier et célébrer
- Échanger et agir
- Foi et culture bretonne
- Évènements diocésains
- Jubilé 2025
- Orientations diocésaines 2025
- Petites fraternités chrétiennes locales
- Pentecôte 2025
Euz ar 17 d’an 23 a viz C’hwevrer 2024
— 20 Bez’ e oa eun nebeud Gresianed e-touez an dud deuet da Jeruzalem evid adori da geñver ar gouel. 21 Dond a rejont da gaoud Filip, hag a oa euz Betsaïda e Bro-Halilea, da houlenn outañ :
— « Aotrou, kared a rafem gweled Jezuz ».
22 Mond a reas Filip da lavared da Andre, hag o-daou ez ejont da gaoud Jezuz.
23 Respont a reas Jezuz evel-henn :
— « Deuet eo an eur ma rañk Mab an Dén reseo e hloar.
24 « E gwirionez, e gwirionez e lavaran deoh : ma ne varv ket ar hreunenn winiz taolet en douar, e chom e-unan. Ma varv a-vad, e toug frouez e-leiz.
25 « Koll a raio e vuhez an neb a gar anezi ; an neb avad a zispriz anezi er béd-mañ, a viro anezi evid ar vuhez peurbaduz.
26 « Ra zeuio d’am heul piou bennag e-neus c’hoant servicha ahanon, hag el leh ma vin, e vo ive va zervicher. Enoret e vo gand va Zad an hini a vo servicher din.
27 « Strafuillet on bremañ. Petra a lavarin ? Tad, savete ahanon euz an eur mañ ? Ha koulskoude evid an eur-mañ end-eün eo ez on deuet. Tad, ro gloar d’az ano ! »
28 Dond a reas neuze eur vouez euz an Neñv : « Gloar am-eus roet dezañ, hag ober a rin c’hoaz ».
29 Eno e oa e-leiz a dud : kleved o-doa ar vouez, hag e lavarent e oa bet eun tarz-kurun. Med lavared a ree lod all :
— « Eun êl eo e-neus komzet outañ ».
30 Komz a reas Jezuz a-nevez :
— « N’eo ket evidon eo deuet ar vouez-se, med evidoh-c’hwi. Bremañ eo ez a ar béd da veza barnet.
31 « Bremañ e vo taolet er mêz Mestr ar béd.
32 « Ha me pa vin savet uhel diouz an douar, e sachin an oll war-zu ennon ».
33 Kement-se a lavare evid rei da intent peseurt maro e-noa da houzañv.
12 Lavared a ree Jezuz d’ar Juzevien :
— « Me eo sklêrijenn ar béd. An hini a zeuio d’am heul ne gerzo ket en deñvalijenn, med bez’ e-no sklêrijenn ar Vuhez ».
13 War-ze, e lavaras ar Farizianed dezañ :
— « Rei a rez testeni dit da unan ; n’eo ket gwirion da desteni ».
14 Respont a reas Jezuz dezo :
— « Ya, rei a ran testeni din-me va-unan, ha koulskoude eo gwirion va zesteni, rag gouzoud a ran euz peleh on deuet ha da beleh ez an ; e-leh c’hwi, n’ouzoh ket a beleh e teuan, na da beleh ez an.
15 « Barn a rit-c’hwi hervez doare an dud. Ne varnan-me dén.
16 « Ha, ma teu din barn, gwirion eo va barnedigez, rag n’emaon ket va-unan : ganin ema an Tad, e-neus kaset ahanon.
17 « Hogen, skrivet eo en ho Lezenn eo gwirion testeni daou zén.
18 « Rei a ran-me testeni din va-unan, hag e ro an Tad e-neus kaset ahanon testeni din ive ».
19 Lavared a ree ar Farizianed dezañ :
— « E peleh ema da Dad ? »
Respont a reas Jezuz :
— « Ne anavezit na me, na va Zad. Ma ’h anavezfeh ahanon, eh anavezfeh ive va Zad ».
20 Lavared a reas Jezuz ar homzou-ze pa oa o kelenn en Templ, e tu an Teñzor. Ha ne dapas dén krog ennañ, rag ne oa ket deuet e eur c’hoaz.
16 Tad eo bet Jakob da Jozef, pried Mari, an hini a zo bet mamm da Jezuz anvet ar Hrist.
18 Evel-henn en em gavas ganedigez Jezuz-Krist : dimezet e oa Mari, e vamm, da Jozef, med a-barz m’o-doa bevet asamblez, e c’hoarvezas ganti beza dougéréz, dre vertuz ar Spered-Santel.
19 Jozef, he fried, dén just anezañ, pa ne felle ket dezañ he dizenori, a lakeas en e benn dispartia diouti dre guz.
20 Trei a ree ar zoñjou-ze en e spered, pa zeuas eun êl d’an Aotrou da bara dirazañ e-kreiz e gousk, hag e lavaras dezañ :
— « Jozef, mab da Zavid, arabad dit kaoud aon o kemer Mari da bried en da di, rag euz ar Spered-Santel eo ar vuhez a zo diwanet enni.
21 « Genel a raio eur mab. Rei a ri dezañ an ano a Jezuz (da lavared eo : Salvi a ra an Aotrou), rag eñ eo a zalvo e bobl euz he fehejou ».
24 Goude beza savet euz e gousk, e reas Jozef evel m’e-noa lavaret dezañ Êl an Aotrou.
41 Bep ploaz, ez ee tud Jezuz da Jeruzalem, da geñver gouel Pask.
42 Deuet Jezuz d’e zaouzeg vloaz, ez ejont da Jeruzalem, evel kustum, evid ar gouel.
43 Pa oe echu ar gouel, ez ejont gand an hent war-zu ar gêr. Med chom a reas o mab Jezuz e Jeruzalem, hep gouzoud d’e dud.
44 Dre ma kredent edo gand ar re all euz ar gompagnunez, e rejont evel-se eun deveziad hent, araog klask war e lerh e-touez o herentiez hag o anaoudègèz. 45 Pa ne gavent ket anezañ, e teujont war o hiz da Jeruzalem, evid klask anezañ.
46 A-benn tri devez, e kavjont anezañ en Templ, azezet e-kreiz an Doktored, o selaou anezo hag oh ober goulennou outo. 47 Souezet e chome kement hini a gleve anezañ gand e spered hag ar respontou a ree.
48 Sebezet e oe e dud o weled anezañ, hag e lavaras e vamm dezañ :
— « Va mab, perag beza greet deom kement-se ? Setu ma oa da dad ha me, leun a enkrez, o klask war da lerh ».
49 Lavared a reas dezo :
— « Perag beza klasket ahanon ? Ha ne ouieh ket, eo red din beza e ti va Zad ? »
50 Med ne intentjont ket ar péz a lavare dezo.
51 Mond a reas Jezuz ganto, evid distrei da Nazared, hag e veze dalhmad sentuz outo.
31 Lavared a ree Jezuz d’ar Juzevien o-doa kredet ennañ :
— « Ma chomit fidel d’am Homz, ez oh, e gwirionez, diskibien din ; 32 neuze, eh anavezot ar wirionez, hag ho-po ar frankiz digand ar wirionez ».
33 Respont a rejont dezañ :
— « Bez’ ez om-ni euz lignez Abraham, ha n’om bet biskoaz sklaved da zén e-béd. Penaoz eta e hellez lavared : Dond a reot da veza tud libr ? »
34 Respont a reas Jezuz dezo :
— « E gwirionez, e gwirionez, e lavaran deoh : piou bennag en em daol er pehed a zo sklav d’ar pehed.
35 « Ne jom ket eur sklav e-barz an tiad ; ar mab avad, a jom ennañ da viken.
36 « Ma vez roet eta ar frankiz deoh gand ar Mab, e viot libr da vad.
37 « Gouzoud a ran ez oh euz lignez Abraham, ha koulskoude emaoh o klask lakaad ahanon da vervel, peogwir ne ’z a ket va Homz beteg ennoh.
38 « Lavared a ran ar péz am-eus gwelet gand va Zad, hag e rit-c’hwi ive ar péz ho-peus klevet digand ho tad ».
39 Respont a rejont dezañ :
— « Abraham eo on tad-ni ».
Ha Jezuz dezo :
— « Ma vefeh bugale da Abraham, neuze e rafeh oberou Abraham. 40 Ha bremañ, e klaskit laza ahanon, me hag am-eus lavaret deoh ar wirionez am-eus klevet digand Doue : kement-se n’e-neus ket greet Abraham. 41 Med ober a rit-c’hwi oberou ho tad ».
Respont a rejont dezañ :
— « N’om ket ganet diwar ganedigez vil ! N’on-eus nemed eun Tad : Doue ».
42 Respont a reas Jezuz dezo :
— « Ma vije bet Doue ho Tad, ho-pije karet ahanon, rag euz Doue eo ez on ganet, hag anezañ e teuan. N’on ket deuet ahanon va-unan ; Eñ eo e-neus kaset ahanon.
Lavared a ree Jezuz d’ar Juzevien :
51 « E gwirionez, e gwirionez, e lavaran deoh : Ma chom unan bennag fidel d’am Homz, ne welo biken ar maro ».
52 Lavared a reas ar Juzevien dezañ :
— « Gweled-mad a reom bremañ ez out dalhet gand an droug-spered ! Maro eo Abraham, ar brofeted ive, hag e lavarez-te : Ma chom unan bennag fidel d’am Homz, ne welo biken ar maro.
53 « Daoust ha brasoh ez out eged on tad Abraham ? Maro eo, ha maro ive ar brofeted. Piou ’ta a gav dit, ez out ? »
54 Respont a reas Jezuz :
— « Ma tennan gloar ahanon-me va-unan, va gloar n’eo netra ; va Zad eo a ro gloar din, Eñ hag a rit ho Toue anezañ, petra bennag ma ne anavezit ket anezañ.
55 « Me avad, a anavez anezañ, ha ma lavaran n’anavezan ket anezañ, e vin eur gaouiad, eveldoh-c’hwi. Med anaoud a ran anezañ, hag e choman fidel d’e Gomz.
56 « Tridal gand joa e-neus greet Abraham ho tad, gand an esper da weled va deiz.
Gwelet eo bet gantañ, hag ez eo bet karget a levenez ».
57 Lavared a reas ar Juzevien dezañ neuze :
— « Te, ha n’out ket hanter-kant vloaz c’hoaz, hag ez-peus gwelet Abraham ! »
58 Respont a reas Jezuz dezo :
— « E gwirionez, e gwirionez, e lavaran deoh : a-raog ma oa bet euz Abraham, EZ ON-ME ».
59 Kemer a rejont mein neuze, evid stlepel outañ. Med en em denna a reas Jezuz, hag ez eas er-mêz euz an Templ.
31 Mond a reas adarre ar Juzevien da gerhad mein, da veinata Jezuz.
32 Neuze e komzas Jezuz outo :
— « Oberou kaer o tond a-berz va Zad am-eus greet dirazoh dreist-muzul. Evid pehini euz an oberou-ze, e klaskit meinata ahanon ? »
33 Respont a reas ar Juzevien dezañ :
— « N’eo ket evid eun oberenn gaer e klaskom meinata ahanout ; dre ma vlasfemez eo : rag n’out nemed eun dén, hag e rez Doue ahanout ».
34 Respont a reas Jezuz dezo :
— « Daoust ha n’eo ket skrivet en ho Lezenn : Lavaret em-eus : bez’ ez oh doueed ?
35 « Neuze, ar re m’eo bet kaset beteg enno Komz Doue, e ra doueed anezo al Lezenn ; ha ne hell ket ar Skritur beza torret.
36 « Ahanta ! D’an hini a zo bet sakret gand an Tad, ha bet kaset er béd gantañ, e lavarit dezañ : Blasfemi a rez, peogwir em-eus lavaret : Bez’ ez on Mab Doue ».
37 « Ma ne ran ket oberou va Zad, chomit hep kredi ennon.
38 « Med ma ran anezo, ha pa jomfeh hep kredi ennon, kredit en oberou-ze.
En doare-ze e ouezot, hag eh anavezot muioh-mui, ema an Tad ennon, hag emaon-me en Tad ».
39 Klask a reent neuze, eur wech c’hoaz, tapoud krog ennañ, med tehed a reas a dre o daouarn.
40 Distrei a reas Jezuz en tu all d’ar Jordan, el leh m’e-noa Yann-Vadezour kroget da vadezi, hag e chomas eno.
41 Dond a reas e-leiz a dud d’e gaoud, en eur lavared :
— « Yann, gwir eo, n’e-neus greet burzud e-béd, med re wir e oa kement e-neus lavaret diwar-benn an dén-mañ ».
42 Hag eno, e oe stank ar re a gredas ennañ.
Pa oe deuet Lazar beo euz ar béz, 45 e teuas Juzevien da weled Mari : gweled a reas kalz euz ar re-mañ ar péz e-noa greet Jezuz, hag e kredjont ennañ. 46 Med mond a reas reou all da gaoud ar Farizianed, ha da gonta dezo petra e-noa greet Jezuz.
47 Bodet ar Huzul-Meur gand ar Veleien-Vraz hag ar Farizianed, e lavarent :
— « Petra a hellom ober ? Ober a ra an dén-se kalz burzudou. 48 Ma talhom da lezel anezañ da ober, e kredo an oll ennañ, hag e teuio ar Romaned da zistruja hag ol Leh santel hag or broad ».
49 Neuze, e lavaras unan anezo, Kaïfaz, hag a oa Beleg-Braz er bloavez-se :
— « Ne ouzoh diouz netra ! 50 Ne lakit ket ho soñj zokén e kement-mañ : ez eo gwelloh ganeoh e varvfe eun dén hepkén evid ar bobl, hag evel-se ne ’z aio ket ar vroad da goll en he-féz ».
51 N’eo ket anezañ e-unan e teue ar péz a lavare, med o veza ma oa Beleg-Meur er bloavez-se, e tiouganas e rañke Jezuz mervel evid ar vroad. 52 Ha n’eo ket hepkén evid ar vroad, med evid boda en eun tropellad hepkén, oll vugale Doue strewet.
53 Diwar an deiz-se, e oa greet e zoñj gand ar Huzul-Meur kas Jezuz d’ar maro.
54 Setu perag e chome Jezuz heb mond amañ hag a-hont war-wél d’ar Juzevien. Mond a reas kuit d’eun tolead tost d’an dezert, er gêr a Efraïm, ma chomas enni gand e ziskibien.
55 Tost e oa gouel Pask ar Juzevien, hag e teuas da Jeruzalem e-leiz a dud euz ar hornad-se, dezo da veza glaneet araog ar Pask. 56 Klask a reent war lerh Jezuz ; hag en Templ, e lavarent kenetrezo :
— « Petra a zoñj deoh ? Ha dond a raio d’ar gouel ?
57 Urziou o-doa roet Priñsed ar veleien hag ar Farizianed : an neb a ouezfe e peleh e oa Jezuz, dezañ dond da ziskuilla anezañ, evid ma vefe tapet krog ennañ.
Attention, vous utilisez un navigateur peu sûr !