Euz an 13 d’an 19 a viz Eost 2023
22 Raktal goude m’e-noa Jezuz roet da zrebi d’an dud en dezert, e reas d’e ziskibien sevel er vag, ha mond en e-raog en tu all d’ar mor, e-keid ha ma vefe Eñ o lakaad an dud da vond kuit.
23 Kaset kuit an dud gantañ, e savas Jezuz war ar menez, en e bart e-unan, evid pedi. Deuet an abardaez, e oa eno e-unan-penn.
24 Bez’ e oa ar vag eur pennad mad dija euz an aot, gwall-hejet gand an tonnou, rag a-benn e oa an avel.
25 War-dro fin an noz, e teuas Jezuz war-zu e ziskibien en eur vale war ar mor. 26 O weled anezañ o vale war ar mor, e oe strafuillet an diskibien. « Eur spéz eo » emezo. Hag e stagjont da youhal gand ar spont. 27 Med kerkent, e komzas Jezuz outo :
— « Ho-pet fiziañs, me an hini eo ! N’ho-pet ket aon ! »
28 Neuze e lavaras Pèr :
— « Aotrou, mar d-eo te an hini eo, ro urz din da vond beteg ennout war an dour ».
29 — « Deus » eme Jezuz.
Diskenn a reas Pèr euz ar vag, ha bale war an dour da vond beteg Jezuz. 30 Med gand an avel greñv a oa savet, e krogas aon ennañ ; hag o veza ma oa kroget da ziskenn en dour, e youhas :
— « Aotrou, savete ahanon ! »
31 Kerkent eh astennas Jezuz e zorn, e tapas krog ennañ en eur lavared da Bèr :
— « Dén laosk en da feiz, perag ez-peus bet douetañs ? »
32 Ha pa oent savet er vag, e torras an avel. 33 Neuze ar re a oa er vag, e stouas dirazañ en eur lavared :
— « E gwirionez, ez out-te Mab Doue ! »
22 Pa oa Jezuz asamblez gand an diskibien bodet e Bro-Halilea, e lavaras dezo :
— « Bez’ ema Mab an Dén o vond da veza lakeet etre daouarn an dud ; 23 lazet e vo ganto, ha d’an trede deiz e savo a varo da veo ».
Glaharet braz e oent o kleved kement-se.
24 Pa oant o tigouezoud e Kafarnaom, e teuas paotred a zastum an daou drakm evid an Templ da gaoud Pèr, hag e lavarjont dezañ :
— Paeet e vez an daou drakm gand ho mestr, neketa ? »
25 — « Ya ’vad », emezañ.
Pa oe digouezet Pèr en ti, e stagas Jezuz da gomz da genta, o lavared :
— « Petra eo da zoñj, Simon ? Rouaned an douar, diwar goust piou e savont gwiriou pe taillou ? Diwar goust o bugale pe diwar goust an dud all ? »
26 — « Diwar goust an dud all », emezañ.
— « Neuze ’ta, eme Jezuz, o-deus ar vugale diskarg anezo ? 27 Koulskoude evid ma ne vo ket gwall-skweriet an dud-se, kerz d’ar mor, taol an higenn, kemer ar pesk kenta a grogo, ha digor e henou. Kavoud a ri ennañ eur péz a bevar drakm. Kemer anezañ ha ro anezañ evidon hag evidout-te ».
1 Tostaad a reas an diskibien ouz Jezuz, hag e lavarjont dezañ :
— « Piou ’ta eo ar brasa e Rouantèlèz Doue ? »
2 Neuze, e halvas Jezuz eur bugelig ; lakaad a reas anezañ dirazo, 3 hag e tiskêrias :
— « E gwirionez, e lavaran deoh : ma ne jeñchit ket evid dond da veza heñvel ouz ar vugale, ne ’z eot ket e Rouantèlèz Doue. 4 Med an hini en em lakaio izel evel ar bugel-mañ, hennez eo ar brasa e Rouantèlèz Doue. 5 Hag an hini a zigemer, em ano, eur bugel evel hemañ, a zigemer ahanon me va-unan.
10 « Diwallit da zisprizoud hini e-béd euz ar re vihan-mañ, rag, lavared a ran deoh : ema o êlez en Neñvou o daoulagad o para dalhmad war va Zad hag a zo en Neñvou ».
12 « Petra a zoñjit euz kement-mañ ? M’e-neus eun dén kant dañvadez, ha ma teu unan anezo da zianka, daoust ha ne laosko ket an naonteg-ha-pevar-ugent all war ar menez, evid mond war glask an hini a zo dianket ?
13 « Ha ma teu a-benn da gaoud anezi en-dro, e gwirionez, e lavaran deoh : muioh a joa e-neus diwar-benn honnez, eged diwar-benn an naonteg-ha-pevar-ugent ha n’int ket bet dianket.
14 « Evel-se, ne fell ket d’ho Tad a zo en Neñv e vefe kollet hini e-béd euz ar re vihan-mañ.
39 En amzer-ze, ez eas Mari buan en hent war-zu bro ar meneziou, d’eur gêr a Vro-Judea.
40 Mond a reas e-barz ti Zakarïaz, ha saludi Elizabed.
41 Kerkent ha ma klevas Elizabed salud Mari, e tridas he hrouadur en he hreiz, hag e oe karget Elizabed euz ar Spered-Santel. 42 Sevel a reas he mouez ha lavared :
— « Benniget out dreist an oll gwragez, ha benniget ar frouez euz da gorv. 43 Hag a beleh e teu din kement-mañ : Mamm va Aotrou o tond beteg ennon ? 44 Rag, kerkent ha m’he-deus da vouez skoet va diskouarn, e-neus va hrouadur tridet em hreiz gand al levenez. 45 Eüruz an hini he-deus kredet e vo sevenet ar homzou lavaret dezi a-berz an Aotrou Doue ».
46 Renta a reas Mari d’he zro gloar d’an Aotrou Doue, en eur lavared :
— « Kana a ra va ene meuleudi d’an Aotrou, 47 ha tridal a ra va spered e Doue va Zalver, 48 abalamour m’e-neus taolet e zellou war e zervichéréz dister.
« Diwar vremañ, e lavaro an oll dud, a rumm da rumm, ez on eüruz, 49 ken kaer eo ar burzudou e-neus greet evidon an Oll-Halloudeg, rag santel eo e ano.
50 « Skuilla a ra e vadèlèz, a rummad da rummad, war ar re a zouj dezañ.
51 « Diskouez a ra nerz e vreh, ha kas kuit an dud, lorh ganto en o halon.
52 « Diskar a ra ar rouaned diwar o zrôn, ha sevel uhel an dud izel.
53 « Rei a ra o gwalh d’ar re o-deus naon, ar re binvidig avad, e kas kuit hep netra.
54 « Rei a ra e skoazell da Izrael e vuia-karet, dre ma dalh soñj euz e vadèlèz ; 55 evel m’e-noa prometet d’on tadou-koz, e-keñver Abraham hag e lignez da viken ».
56 Chom a reas Mari neuze gand Elizabed war-dro tri miz, ha goude-ze e tistroas d’ar gêr.
21 Tostaad a reas Pèr ouz Jezuz evid goulenn outañ :
— « Aotrou, péd kwech, ma teu d’am breur mankoud ouzin, e rañkan pardoni dezañ ? Beteg seiz kwech ? »
22 Respont a reas Jezuz :
— « Ne lavaran ket dit beteg seiz kwech, med beteg deg-ha-tri-ugent kwech seiz kwech.
23 « Rag e gwirionez, heñvel eo Rouantèlèz an Neñvou ouz eur roue hag a fellas dezañ urzia e gonchou gand e zervicherien.
24 « Kroget e oa da urzia e gonchou, pa oe digaset dirazañ eun dén hag a oa dleour dezañ a zég mil talant.
25 « O veza ma n’e-noa ket hemañ peadra da baea e zle, e roas ar mestr urz da werza anezañ, e wrég hag e vugale ha kement e-noa, evid kaoud evel-se an diskarg euz e zle.
26 « Neuze, en em daolet ar zervicher e-harz e dreid, eh aspede e vestr en eur lavared :
— « Bez pasianted ganin, hag e paein kement a zlean dit ».
27 « Kroget an druez er mestr, e lezas e zervicher da vond kuit en eur rei dezañ an diskarg euz e zle.
28 « Med, a-boan eet er-mêz, e kavas hemañ unan euz e gompagnuned-labour, hag a oa dleour dezañ euz a gant diner. Tapoud a reas krog ennañ, ha gwaska war e houzoug beteg beza prést da vouga anezañ, en eur lavared :
— « Paee da zle ! »
29 « Neuze, en em daolas ar zervicher e-harz e dreid en eur aspedi anezañ :
— « Bez pasianted ganin, hag e paein dit va dle en e-béz ».
30 « Egile a-vad, ne fellas ket dezañ. Mond a reas da lakaad taoler anezañ er prizon, beteg m’e-nefe paeet e zle.
31 « O weled kement-se, e oe glaharet braz ar zervicherien all, hag e teujont da gonta d’o mestr kement a oa bet c’hoarvezet.
32 « Neuze, e lakeas e vestr gervel anezañ, hag e lavaras dezañ :
— « Servicher fallagr, kement ha ma oas dleour din, am-eus roet-me an diskarg anezañ dit, o veza m’az-poa aspedet ahanon. 33 Daoust ha ne oa ket réd dit d’az-tro kaoud truez ouz da gompagnun, evel m’am-eus bet-me truez ouzit ? »
34 « Ha fuloret braz, e lakeas ar mestr anezañ etre daouarn ar vourrevien, beteg m’e-nefe paeet e zle penn-da-benn.
35 « Evel-se, e raio en ho-keñver va Zad hag a zo en Neñv, ma ne bardonit ket pep hini ahanoh d’e vreur, a-greiz ho kalon ».
19 1 P’e-noa Jezuz echu ar prezegennou-ze, e kuiteas Bro-Halilea hag ez eas da Vro-Judea, en tu all d’ar Jordan.
3 Tostaad a reas Farizianed ouz Jezuz evid paka anezañ en e gomzou ; goulenn a rejont outañ :
— « Daoust hag aotreet eo ar gwaz da gas e wrég kuit, diwar bep seurt digarez ?
4 Respont a reas Jezuz :
— « Daoust ha n’ho-peus ket lennet ? Er penn kenta, e reas Doue anezo gwaz ha maouez, ha lavaret : 5 « Rag-se, e kuitaio ar gwaz e dad hag e vamm, hag en em stago ouz e wrég, hag e teuint o-daou da veza eur horv kepkén ». 6 Evel-se, n’eus ket mui daou anezo, med eur horv kepkén. Arabad d’an dén eta dispartia ar péz a zo bet unanet gand Doue ».
7 Respont a reas ar Farizianed dezañ :
— « Perag eta, e-neus Moïzez roet urz da rei eur paper a dorr-dimezi, pa gaser kuit ar wrég ? »
8 Respont a reas Jezuz dezo :
— « Abalamour d’ar haledet m’eo ho kalon, e-neus Moizez roet an aotre deoh da gas kuit ho kwragez. Med er penn kenta, ne oa ket evel-se.
9 « Lavared a ran deoh avad : Kement hini a gas kuit e wrég, – nemed e vefe eur falz-dimezi, – hag a gemer unan all, a ra avoultriez ».
10 Lavared a reas an diskibien dezañ :
— « Mar d-ema evel-se stad ar gwaz e-keñver e wrég, eo gwelloh chom dizimez ».
11 Respont a reas dezo :
— « N’eo ket an oll a intent kement-se, med hepkén ar re a zo roet dezo da intent.
12 « Bez’ ez eus tud ha ne zimezont ket, rag ne hellont ket, o veza m’int bet ganet evel-se gand o mamm. Bez’ ez eus re all ha ne hellont ket dimezi, rag mahagnet int bet gand an dud. Ha bez’ ez eus re all hag a zo chomet dizimez abalamour da Rouantèlèz Doue. An hini a hell intent, ra intento ! ».
13 Digaset e oe bugale da Jezuz, dezañ da astenn e zaouarn warno gand eur bedenn. Med kaset e oent buan diwar e dro gand an diskibien.
14 Lavared a reas Jezuz :
— « Laoskit ’ta ar vugale, na virit ket outo da zond d’am haoud, rag d’ar re a zo heñvel outo eo Rouantèlèz Doue ».
15 Ha goude beza astennet warno e zaouarn, ez eas kuit ahano.
Attention, vous utilisez un navigateur peu sûr !