Kenta sizunvez warn-ugent war ar bloaz (B)

Euz ar 25 d’an 31 a viz Eost 2024

Kenta sul warn-ugent war ar bloaz

Yn 6, 60-69 (B)

Lavaret e-noa Jezuz e sinagogenn Kafarnaom : An hini a zebr va horv hag a év va gwad, e-neus ar vuhez peurbaduz.

⁶⁰ Goude beza klevet kement-se, e lavaras kalz euz e ziskibien :

— « Kaled eo ar gomz-se da gleved, ha piou a hell selaou anezi ? »

⁶¹ Gouzoud a ree Jezuz ennañ e-unan, e oa e ziskibien o hrosmolad diwar e benn.

Lavared a reas dezo :

— « Feuket oh gand kement-se ? ⁶² Ha pa welot Mab an Dén o sevel d’al leh ma oa a-ziaraog ?

⁶³ « Ar spered eo a ro buhez, ar horv ne dalv da netra. Spered ha buhez eo ar homzou am-eus lavaret deoh.

⁶⁴ « Bez’ ez eus a-vad, tud en ho-touez, ha ne gredont ket ».

Rag gouzoud a ouie Jezuz abaoe ar penn kenta pere e oa ar re diskredig, ha piou a oa da werza anezañ.

⁶⁵ Hag e lavaras dezo c’hoaz :

— « Abalamour da-ze, em-eus lavaret deoh ne hell dén dond d’am haoud nemed ha roet e vefe bet dezañ dond gand va Zad ».

⁶⁶ Diwar neuze, ez eas kalz euz e ziskibien war o hiz, en eur jom heb mond d’e heul.

⁶⁷ Neuze e lavaras Jezuz d’an Daouzeg :

— « Daoust ha c’hwi ive ho-peus c’hoant mond kuit ? ».

⁶⁸ Respont a reas Simon-Pèr dezañ :

— « Aotrou, da gaoud piou ez afem ? Ganit ema komzou ar vuhez peurbaduz. ⁶⁹ Kredi a reom-ni, ha gouzoud a reom ez out Sant Doue ».

Lun

Mz 23, 13-22

Lavared a ree Jezuz :

¹³ « Gwaz-a-ze deoh Skribed ha Farizianed faoz, c’hwi hag a zo prennet ganeoh dor Rouantèlèz Doue ouz an dud : c’hwi hoh-unan ne ’z it ket e-barz, ha ne laoskit ket da vond e-barz ar re a gar.

¹⁵ « Gwaz-a-ze deoh Skribed ha Farizianed faoz, c’hwi hag a réd ar mor hag an douar evid gounid unan hepkén d’ho falz-kredennou, ha pa ho-peus gounezet unan bennag, e rit anezañ eur mab-ivern diou wech gwasoh egedoh.

¹⁶ « Gwaz-a-ze deoh, blenierien zall hag a lavar : Ma vez touet dre ar Zantual, ne gont ket kement-se, med ma vez touet dre aour ar Zantual, e vezer dalhet. ¹⁷ Tud diboell ha dall, petra a zo dreist egile : an aour ? pe ar Zantual a ra d’an aour-ze beza sakr ?

¹⁸ « Lavared a rit c’hoaz : Ma vez greet eul le-douet dre an aoter, ne gont ket kement-se, med ma vez greet eul le-douet dre ar brovadenn lakeet war an aoter, e vezer dalhet. ¹⁹ Tud dall, petra a zo dreist egile : ar brovadenn ? pe an aoter a ra d’ar brovadenn-ze beza sakr ?

²⁰ « An néb eta a ra eul le-douet dre an aoter, dre an aoter ha dre gement a zo warni eo e ra e le-douet. ²¹ An néb a ra eul le-douet dre ar Zantual, dre ar Zantual ha dre an Hini a zo o chom ennañ eo e ra e le-douet. ²² Hag an néb a ra eul le-douet dre an neñv, dre drôn Doue, ha dre an Hini a zo azezet war an trôn-ze eo e ra e le-douet ».

Meurz

Mz 23, 23-26

Lavared a ree Jezuz :

²³ « Gwaz-a-ze deoh, Skribed ha Farizianed faoz, c’hwi hag a bae an deog war ar vent, ar fanouill hag ar houmin, e-keid ha ma rit fae war ar péz a zo ar pouezusa el Lezenn : ar justis, an drugarez hag al lealded. Setu ar péz e oa réd ober heb lezel a-gostez ar peurest. ²⁴ Blenierien zall : diwall a rit da lonka eur huibuenn, e-keid ha ma lonkit eur hañval !

²⁵ « Gwaz-a-ze deoh Skribed ha Farizianed faoz, c’hwi hag a gempenn an diavêz euz ar werenn hag euz ar plad, e-keid ha ma ’z eo leun an diabarz euz frouez al laeronsi hag al lontègèz. ²⁶ Farizian dall ! Kempenn da genta diabarz ar werenn evid ma teuio an diavêz da veza nêt ive ».

Merher

Mz 23, 27-32

Lavared a ree Jezuz :

²⁷ « Gwaz-a-ze deoh, Skribed ha Farizianed faoz ! C’hwi hag a zo heñvel ouz beziou gwennet gand lêz-raz : kaer ez int da weled diouz an diavêz, med en diabarz, ez int leun a eskern tud varo hag a bep seurt loustoni.

²⁸ « Evel-se ive, diouz an diavêz, ez oh, evid an dud, tud just da weled ; en diabarz avad, ez oh leun a falsentez hag a fallagriez.

²⁹ Gwaz-a-ze deoh, Skribed ha Farizianed faoz, c’hwi hag a zav beziou ar brofeted, hag a laka kinkladuriou en-dro da veziou an dud just. ³⁰ Hag e lavarit : « Ma vefem bet war an douar en amzer on tadou-koz, n’or-befe ket kemeret perz ganto da skuill gwad ar brofeted ». ³¹ Evel-se, e tougit testeni a-eneb deoh hoh-unan : bugale oh d’ar re o-deus lazet ar brofeted. ³² Dalhit da ober gwasoh eged ar péz o-deus greet ho takou-koz ! ».

Yaou 29 a viz Eost
Gouel Merzerenti Yann-Vadezour

Mk 6, 17-29

¹⁷ Kaset e oa bet tud gand ar roue Herodez da dapoud krog e Yann-Vadezour, ha chadenna anezañ er prizon, abalamour da Herodiadez : deuet e oa houmañ da veza gwrég da Herodez daoust ha ma oa pried d’e vreur Filip. ¹⁸ Lavared a ree Yann da Herodez : « N’az-peus ket ar gwir da zelher ganit gwrég da vreur ».

¹⁹ Kasoni he-doa eta Herodiadez outañ, hag he-doa c’hoant da gas anezañ d’ar maro, med ne helle ket, ²⁰ rag aon e-noa Herodez ouz Yann, o houzoud e oa eun dén just ha santel ; difenn a ree anezañ. P’e-neze klevet anezañ, e veze nehet braz, ha koulskoude e plije dezañ selaou anezañ.

²¹ Med digouezoud a reas eun dro vad, pa roas Herodez, da geñver e zeiz-ha-bloaz, eur bañvez d’e dud e karg, d’e ofïserien ha d’an dud a reñk uhel euz Bro-Halilea.

²² Dond a reas merh Herodiadez da zañsal, hag e plijas da Herodez ha d’e gouvidi. Neuze, e lavaras ar roue d’ar plah yaouank :

— « Goulenn diganin ar péz a gerez, hag e roin dit ».

²³ Hag e touas dezi :

— « Kement a houlenni diganin, a roin dit, ha pa vefe an hanter euz va rouantèlèz ».

²⁴ Mond a reas ar plah er-mêz, hag e lavaras d’he mamm :

— « Petra a houlennin ? »

Respont a reas hi :

— « Penn Yann, ar Badezour ».

²⁵ Gand mall, e tistroas ar plah yaouank da gaoud ar roue, hag e lavaras dezañ :

— « Felloud a ra din, e rofez din dioustu, war eur plad, penn Yann-Vadezour ».

²⁶ Rannet braz e oe kalon Herodez, med abalamour d’e le ha d’e gouvidi, ne fellas ket dezañ nah he goulenn outi.

²⁷ Dioustu, e kasas ar roue eur gward, gand an urz da zigas penn Yann. Mond a reas ar gward da zibenna Yann en e brizon. ²⁸ Digas a reas ar penn war eur plad, rei anezañ d’ar plah yaouank, hag ar plah yaouank a roas anezañ d’he mamm.

²⁹ Pa glevas diskibien Yann ar helou-ze, e teujont da gemer e gorv, hag e lakejont anezañ en eur béz.

Gwener

Mz 25, 1-13

Komz a ree Jezuz d’e ziskibien diwar-benn e zonedigez ; lavared a ree ar barabolenn-mañ :

¹ « Heñvel e vo Rouantèlèz Doue ouz dég plah yaouank pedet d’eur préd-eured, ha kemeret ganto lampeier evid mond da ziambroug an dén-nevez.

² « Pemp anezo a oa dizoursi, ha pemp a oa fur. ³ Gand ar pemp dizoursi e oa eet o lampeier, med n’o-doa ket kaset eoul ganto. ⁴ Gand ar re fur avad e oa eet eoul e-barz podouigou, war eun dro gand o lampeier.

⁵ « O veza ma oa dale gand an dén-nevez, e teujont oll da voredi ha da gousked.

⁶ E-kreiz an noz, e savas eur hopadenn :

— « Setu an dén-nevez ! Kit er-mêz da ziambroug anezañ ! »

⁷ « Neuze, e tihunas an oll blahed yaouank, hag e krogjont da gempenn o lampeier. ⁸ Goulenn a reas ar re zizoursi digant ar re fur :

— « Roit deom ’ta euz hoh eoul, rag ema on lampeier-ni o vervel ».

⁹ « Respont a reas ar re fur dezo :

— « Ne raim ket, rag ne vefe biken tra-walh evidom hag evidoh. Kit kentoh da brena evidoh da di ar varhadourien ».

¹⁰ « En-dra ma oant o vond da brena, e tigouezas an dén-nevez. Ar re a oa prést a yeas tre gantañ er zal-eured, hag e oe serret an nor. ¹¹ Diwezatoh, e teuas ive ar plahed all, hag e lavarjont :

— « Aotrou ! Aotrou ! digor deom ! »

¹² « Med respont a reas dezo :

— « E gwirionez, e lavaran deoh : ne anavezan ket ahanoh ».

¹³ « Bezit war evéz eta, rag ne ouezit nag an deiz nag an eur ».

Sadorn

Mz 25, 14-30

Komz a ree Jezuz d’e ziskibien diwar-benn e zonedigez ; lavared a ree ar barabolenn-mañ :

¹⁴ « Bez’ e vo kont evel gand eun dén o vond da bell-bro : gelver a reas e zervicherien, hag fizioud e vadou enno.

¹⁵ « Da unan, e roas pemp talant, da unan all, daou, d’an trede, unan hepkén ; da bep hini diouz e ampartiz. Hag e kuiteas ar vro.

¹⁶ « Raktal, an hini a oa bet roet dezañ pemp talant a yeas da lakaad anezo da dalvezoud, hag e hounezas pemp all. ¹⁷ Evel-se ive, an hini e-noa bet daou dalant a hounezas daou all. ¹⁸ Med an hini n’e-noa bet nemed unan a yeas da ober eun toull en douar, hag e kuzas ennañ arhant e vestr.

¹⁹ « Pell amzer goude-ze, e teuas en-dro mestr ar zervicherien-ze, hag e reas e gonchou ganto.

²⁰ « Tostaad a reas an hini e-noa bet pemp talant, hag e kinnigas pemp talant all, en eur lavared :

— « Mestr, pemp talant az-poa fiziet ennon, setu pemp all gounezet ganin ».

²¹ « Lavared a reas e vestr dezañ :

— « Mad-tre, servicher mad ha féal. Féal out bet war nebeud a dra ; fizioud a rin kalz ennout. Deus da gemer perz e levenez da vestr ».

²² « Tostaad a reas ive an hini e-noa bet daou dalant, hag e lavaras :

— « Mestr, daou dalant az-poa fiziet ennon, setu daou all gounezet ganin ».

²³ « Lavared a reas e vestr dezañ :

— « Mad-tre, servicher mad ha féal. Féal out bet war nebeud a dra ; fizioud a rin kalz ennout. Deus da gemer perz e levenez da vestr ».

²⁴ « Tostaad a reas ive an hini e-noa bet eun talant hepkén, hag e lavaras :

— « Mestr, gouzoud a reen ez out eur rust a zén : eosti a rez el leh ma n’ez-peus ket hadet, ha dastum el leh ma n’ez-peus ket strewet greun. ²⁵ Aon zo kroget ennon, hag ez on eet da guzad da dalant en douar. Setu-eñ amañ. Bez’ ez-peus ar péz a zo dit ».

²⁶ Respont a reas e vestr dezañ :

— « Servicher fall ha lezireg. Gouzoud a ouiez eh eostan el leh ma n’em-eus ket hadet, hag e tastuman ar greun el leh ma n’eo ket bet strewet ganin. ²⁷ Neuze e oa réd dit lakaad va arhant en eun ti-bank ; hag o tond en-dro, em-befe kavet va feadra gand an interest diwarnañ.

²⁸ Lamit eta digantan e dalant, ha roit anezañ d’an hini e-neus dég. ²⁹ Rag an hini e-neus, e vo roet dezañ c’hoaz, hag e-no kalz ; med an hini n’e-neus netra, e vo lamet digantañ ar péz e-neus zokén. ³⁰ Evid ar zervicher didalvez-man, stlapit anezañ er-mêz, en deñvalijenn. Eno, e vo daelou ha skrignadeg dent ».