Eil sizunvez war ar bloaz

Eil sizunvez war ar bloaz

Euz an 20 d’ar 26 a viz Genver 2019

Eil sul war ar bloaz (c)

Yn 2, 1-11

1 Bez’ e oa eun eured e Kana-Halilea, hag e oa mamm Jezuz eno.

2 Pedet e oa bet Jezuz ive d’al lein-eured, hag e ziskibien gantañ.

3 Deuet e oa ar gwin da vankoud da vad ; lavared a reas mamm Jezuz dezañ :

— « N’o-deus mui a win ».

4 Respont a reas Jezuz dezi :

— « Petra a glaskez, maouez ? N’eo ket deuet va eur, c’hoaz ».

5 Lavared a reas e vamm d’ar zervicherien :

— « Grit kement a lavaro deoh ».

6 Bez’ e oa eno c’hweh lestr-mein, a zerviche d’ar Juzevien d’en em walhi hervez al Lezenn, hag e pep hini anezo ez ee daou pe dri vuzuliad.

7 Lavared a reas Jezuz d’ar zervicherien :

— « Kargit al listri-ze a zour ». Ha leunia anezo a rejont beteg ar bord.

8 Lavared a reas dezo :

— « Tennit bremañ, ha kasit d’an ostiz ». Kas a rejont dezañ.

9 Tañva a reas an ostiz an dour troet e gwin. Ne ouie ket euz peleh e teue ar gwin-ze ; ar zervicherien avad, o-doa tennet an dour a ouie mad.

Gervel a reas neuze an ostiz an dén-nevez, hag e lavaras dezañ :

10 — « Gand an oll e vez lakeet war an daol ar gwin mad da genta, ha pa vez tommet d’ar pennou, an hini disterroh. Te avad, az-peus dalhet ar gwin mad beteg bremañ ».

11 Hennez eo bet ar burzud kenta greet gand Jezuz. Bez’ e oa e Kana-Halilea. Diskouez a reas e hloar, hag e kredas e ziskibien ennañ.

Lun

Mk 2, 18-22

18 Eun devez ma oa diskibien Yann hag ar Farizianed oh ober yun, e teuas tud da houlenn ouz Jezuz :

— « Perag ne yun ket da ziskibien dit-te, evel ma ra diskibien Yann ha re ar Farizianed ? »

19 Respont a reas Jezuz :

— « Daoust ha deread eo da gompagnuned an dén-nevez ober yun e-keid ha m’ema ganto ? Keid ha m’ema an dén-nevez ganto, n’eus tu e-béd dezo da ober yun.

20 « Dond a raio eun amzer a-vad, ma vo lamet an dén-nevez diganto ; en deiz-se e raint yun.

21 « Ne zeu dén e-béd da beñselia eur gwiskamant koz gand eun tamm peñsel nevez ; a-hend-all, e sach ar peñsel nevez war an danvez koz hag e rog anezañ gwasoh.

22 « Pe c’hoaz, ne laka dén e-béd gwin nevez e seier-lèr koz. A-hend-all, gand ar gwin e teu ar zeier-lèr da darza ; kollet e vez ar gwin koulz hag ar zeier-lèr. Evid gwin nevez, seier-lèr nevez ».

Meurz

Mk 2, 23-28

23 Eun devez sabat, e oa Jezuz o vond dre barkajou gwiniz. Ha dre ma’z eent, e kutuille e ziskibien pennou éd. 24 Lavared a ree ar Farizianed :

— « Sell ’ta petra ema da ziskibien oh ober da zeiz ar zabat ! Eun dra difennet ».

25 Respont a reas Jezuz dezo :

— « Ha n’ho-peus ket lennet morse ar pez a reas David, pa oa en diénéz ha naon dezañ, ha d’an dud a oa gantañ ?

26 Mond a reas e ti Doue, en amzer ha ma oa Abiatar ar Beleg-Braz : drebi a reas baraennou ar hinnig, ha n’eus nemed ar veleien hag o-deus urz da zrebi anezo, hag e roas ive d’ar re a oa gantañ ».

27 Lavared a ree Jezuz dezo c’hoaz :

— « Greet eo bet ar zabat evid an dud, ha n’eo ket an dud evid ar zabat ; 28 Abalamour da-ze, eo Mab an Dén mestr war ar zabat zokén ».

Merher

Mk 3, 1-6

1 Eur wech, ez eas Jezuz en eur zinagogenn. Bez’ e oa eno eun dén, dezañ eun dorn dizehet.

2 War evez e oa an dud o klask gouzoud hag-eñ e rafe ar pare da zeiz ar zabat ; evid kaoud digarez da damall anezañ.

3 Lavared a reas Jezuz d’an dén dizeh e zorn :

— « Sao en da zav, amañ dirag an oll ».

4 Neuze, e lavaras d’an dud :

— « Hag aotre a zo d’eun deiz sabat da ober ar mad, pe da ober an droug ? da zavetei e vuhez da unan bennag, pe da laza anezañ ? »

Chom a reent sioul avad.

5 Neuze, o taoler warno eur zell a gounnar, e oe poaniet gand ar hriz ma oa o halon, hag e lavaras d’an dén :

— « Astenn da zorn ».

Henn astenn a reas, hag e teuas ar pare d’e zorn.

6 Eur wech eet er-mêz, en em glevas ar Farizianed gand ar re a-du gand Herodez a-eneb Jezuz, evid klask an tu da lakaad anezañ d’ar maro.

Yaou

Mk 3, 7-12

7 En em denna a reas Jezuz gand e ziskibien war bord ar mor. Deuet e oa d’e heul tud e-leiz euz Bro-Halilea, euz Bro-Judea ive, 8 hag euz Jeruzalem. Euz Bro-Idumea hag euz an tu all d’ar Jordan, euz tro-war-droiou Tir ha Sidon ive e teuas tud e-leiz beteg ennañ, diwar ar vrud euz kement a ree.

9 Goulenn a reas Jezuz digand e ziskibien delher eur vag prést evitañ, rag kement a dud a oa ma oa gwasket ganto. 10 Ken stank e oa an dud e-noa pareet, m’en em daole warnañ, evid touch outañ, ar re a oa taget gand kleñved pe gleñved.

11 Pa welent anezañ, en em daole ar sperejou hudur, e-harz e dreid, hag e youhent :

— « Mab Doue out ».

12 Med urz a roe dezo groñs da jom heb lakaad anezañ da veza anavezet gand dén e-béd.

Gwener 25 à viz Genver

Konversion Sant Paol, abostol, Gouel

Mk 16, 15-18 (25 a viz genver)

15 Savet Jezuz a varo da veo, e lavaras d’an unneg abostol :

— « It dre ar béd a-béz, embannit ar Helou Mad d’an oll dud.

16 Salvet e vo an hini a gredo hag a vo badezet.

Kondaonet e vo an hini a zinaho kredi.

17 Setu amañ ar zinou burzuduz a vo da heul ar re o-devo kredet : dre va ano, e kasint kuit an droug-sperejou ; yezou nevez a gomzint ; tapoud krog a raint en naered ; 18 ha ma’h evont eun ampoezon marvel bennag, ne raio droug e-béd dezo ; astenn a raint o daouarn war ar re glañv, hag e vo pareet ar re-mañ ».

Sadorn

Mk 3, 20-21

20 Dond a reas Jezuz d’ar gêr, hag adarre e oa leun a dud war e dro, ken na helle dén drebri eun tamm bara zokén.

21 Pa glevas tud e famill kement-se, e teujont beteg ennañ evid kas anezañ ganto, rag lavared a reent : « Kollet eo e benn gantañ ».

Evangile du jour / Aviel an deiz

  • Eil sizunvez war ar bloaz +

    Eil sizunvez war ar bloaz

    Euz an 20 d’ar 26 a viz Genver 2019

    Eil sul war ar bloaz (c)

    Lire la suite...
  • Pevare sizunvez war ar bloaz +

    Pevare sizunvez war ar bloaz

    Euz an 3 d’an 9 a viz C’hwevrer 2019

    Pevare sul war bloaz

    Lk 4,

    Lire la suite...
  • 1