Salm 144

(Heb. 145)

Da veuli a ran, Tad,
Aotrou an neñv hag an douar !

1 Da veuli a rin, va Doue ha va Roue,
Ha benniga da Ano da virviken.

2 Bemdez e lavarin bennoz dit,
Hag e veulin da Ano da virviken.
3 Braz eo an Aotrou, ha din-meurbed da veza meulet,
E vraster a zo divuzul.

4 A rumm da rumm e vo brudet da oberou,
Ha kontet da daoliou-kaer.
5 Azlavared a rin istor da vurzudou,
Da enor, da c’hloar ha da splannder.

6 Lavaret e vo galloud da vurzudou,
Hag e kontin da daoliou-kaer.
7 Brud-vad da vadelez a vezo prezeget,
Ha youhet en enor d’az justis.

8 Leun a druez ha trugarezuz eo an Aotrou,
gouestad da gounnari, ha leun a vadelez.
9 Mad eo an Aotrou evid an oll,
Leun a deneridigez e-keñver e oll oberou.

           *

Harpa ’ra an Aotrou an oll re a gouez,
ha sevel an oll re zammet.

10 Da veuli a ra, Aotrou, da oll oberou,
Ha da oll vignoned a vennigo ahanout.
11 Gloar da rouantelez a lavarint,
Euz da c’halloud e komzint,

12 O tisplega d’an dud da daoliou-kaer,
Ha gloar enoruz da rouantelez !
13 Da rouantelez ’zo eur rouantelez ’vid an oll gantvejou,
Ha da vestroniez evid an oll rummadou.

Gwirionez eo an Aotrou en e oll gomzou,
Fealded en e oll oberou.
14 Harp a ro An Aotrou d’an oll re a gouez,
Ha sevel a ra ar re a bleg.

15 Daoulagad an oll warzu ennout a c’hortoz,
Ha Te a ro dezo o boued e poent.
16 Digeri a rez da zorn,
Hag e roez o gwalc’h da bep tra veo a garez.

17 Just eo an Aotrou en e oll henchou,
Feal en e oll oberou.
18 Tost emañ an Aotrou ouz an olt re a bed anezañ,
A bed anezañ e gwirionez.

19 O mennad a ro d’ar re a zouj anezañ,
Kleved a ra o galv ha savetei anezo.
20 Diwall a ra an Aotrou ar re a gar anezañ,
Med an oll re fallagr a zistrujo.

21 Ra lavaro va genou meuleudiou an Aotrou,
E Ano santel, ra vo meulet gand pep tra veo,
           da virviken !

« Dre e vadelez evidom eta, e Jezuz Krist, eo fellet dezañ diskouez evid an amzeriou da zond, eo e c’hras pinvidig-mor a vadelez en or c’heñver, e Jezuz Krist. » (Ef. 2,7)