Oberou ebestel

An Testamant Nevez : eil lodenn – Troet e brezoneg gand « Kenvreuriez ar brezoneg » Eskopti Kemper ha Leon, 1988.

 

Pennad-kinnig

En eul levr kenta (an trede aviel) e-neus Lukaz diskouezet e-neus Jezuz, dre vertuz ar Spered Santel, saveteet ar bed ha diazezet an lliz war an ebestel a oe karget da brezeg an Aviel beteg penn-pella ar bed.

En eul levr all (Oberou Ebestel), e tiskouez e teu buan an Iliz da greski dre skoazell an heveleb Spered. Diwar skouer testou leun a gred ha dreist-oll diwar labour an ebestel Per ha Paol, an Iliz a zeu da veza savet e kêriadenn ou braz euz an Azia-Izella hag euz Bro-Hres ha dreist-oll e Rom, kêr-benn ar bed roman, e-kreiz ar bed payan.

 

Oberou ebestel

 

I 1 Va levr kenta, Teofil, am eus kontet ennañ kement e-neus greet ha kelennet Jezuz abaoe ar penn-kenta, 2 beteg an deiz ma oe pignet d’an Neñv, goude beza roet e gemennadurez, dre ar Spered Santel, d’an ebestel e-noa dibabet. 3 Leun a vuez, e teuas dirazo goude e basion ; ouspenn eur wech e-noa merket dezo kement-se ; e-pad daou ugent devez e-noa en em ziskouezet dirag o daoulagad, ha komzet ganto euz rouantelez Doue. 4 E-pad m’edo o preja ganto, e kemennas dezo chom heb kuitaad Jeruzalem, med chom da hortoz eno promesa an Tad, an hini, emezañ, ho-peus klevet ganin : 5 « Ar vadeziant en dour e-noa roet Yann, med er Spered Santel eo e vezoh-hwi badezet dizale. »

   Jezuz pignet d’an Neñv

6 Bodet e oant eta hag e rejont outañ ar goulenn-mañ : « Aotrou, daoust ha bremañ eo deuet ar mare dit da adsevel ar rouantelez evid Israel ? » 7 Respont a reas : « N’ho-peus ket da houzoud evid pe da boent eo bet deiziet kement-se gand an Tad en e halloud. 8 C’hwi a-vad, a resevo nerz o veza ma tiskenno ennoh ar Spered Santel hag e vezoh testou din e Jeruzalem, dre vro Judea ha Samaria a-bez ha beteg ar penn pella euz ar bed. »

9 War gement-se e oe dibradet en êr dirag o daoulagad hag e teuas eur goumoulenn da guzad anezañ ouz o daoulagad. 10 Hag o veza ma choment c’hoaz da zelled ouz an Neñv, el leh m’oa pignet Jezuz, setu ma tegouezas en o hichenn daou zen gwisket e gwenn 11 hag a lavaras dezo : « Gwazed a Halilea, perag chom da zelled ouz an Neñv ? Jezuz, eñ hag a zo bet tennet diganeoh hag a zo pignet d’an Neñv, a zistroio er memez doare m’ho-peus e weled o vond kuit d’an Neñv.

   An daouzeg abostol

12 Kuitaad a rejont neuze menez an Olivez, ha distrei da Jeruzalem ; ar menez n’edo ket pell ahano : hed eun deveziad bale d’eun deiz-sabad. 13 Pa oent distro, e pignjont d’ar gambr uhel, el leh ma reent o demeurañs. Eno edo Pèr, Jakez hag Andre, Filip ha Tomas, Bertele ha Maze, Jakez mab Alfe, Simon ha Jud, mab da Jakez. 14 oll, a-unan, e vezent aketuz da bedi gand eun nebeud merhed, en o zouez Mari, mamm Jezuz, ha gand e vreudeur.

   Mazeaz dibabet

15 En deveziou-ze, Pèr a zavas en e zav e-touez ar vreudeur. Bez-ez oa eno bodet war-dro c’hweh ugent den, hag e lavaras : 16 « Red e oa kas da benn ar pez e-noa lavaret ar Spered Santel er Skritur Zakr, dre deod David, diwar-benn Judas, deuet da ren ar re o-doa kemeret krog e Jezuz ; 17 unan ahanom e oa, bet e-noa lod en or zervich. 18 Hogen an den-se, gand arhant e fallentez, e-noa prenet eun tamm douar ; kouezet eo bet war e benn, hag oa bet digoret dre ar hreiz ha ledet eo bet e vouzellou. 19 Gouezet mad o-deus kement-se oll dud Jeruzalem, setu perag eo bet anvet an dachenn-se, en o yez, « Hakeldama », da lavared eo « douar ar gwad », 20 rag skrivet eo e levr ar Salmou : » Ra vezo goullo e di, ha den e-bed o chom ennañ » ; ha c’hoaz : « Ra zeuio unan all da gemered e garg ». 21 Bez’ ez eus gwazed hag a zo deuet d’on heul, e-pad an oll amzer ma kerze Jezuz en or penn, 22 azaleg badeziant Yann beteg an deiz m’eo bet lamet diganeom. Red eo eta e teufe unan anezo da veza test ganeomp euz e adsao da veo. »

23 Daou a oe lakeet war ar renk : Josef anvet Barsabas ha lesanvet Justus, ha Mazeaz. 24 Greet e oe neuze ar bedenn-mañ : « Anaoud a rez, Aotrou, kalon an oll, diskouez deom pehini euz an daou-mañ az-peus dibabet 25 evid kemer, er garg a abostol, ar plas e-neus dilezet Judas evid mond d’al leh m’ema ». 26 Tennet e oe d’ar zord ha Mazeaz eo a oe dibabet, hag azaleg neuze e kemeras renk gand an unneg abostol.

Ar Spered Santel o tiskenn war an diskibien.

II 1 Pa zegouezas deiz ar Pantekost, edont oll bodet asamblez. 2 A-greiz peb kreiz e teuas euz an Neñv eun trouz heñvel ouz hini eur gorventenn ; an ti m’edont ennañ a oe karget a-bez gantañ. 3 Neuze e weljont evel teodou tan a en em ranne da blava war beb hini anezo. 4 Oll e oent karget euz ar Spered Santel hag e stagjont da gomz e yezou all evel ma roe dezo ar Spered Santel da lavared.

5 Hogen e Jeruzalem ez oa o chom Juzevien devod, ginidig euz an oll vroiou a zo dindan an Neñv. 6 O veza klevet an trouz-se, eur bobl tud a zegouezas war al leh. Strafuillet e oent, rag peb hini a gleve anezo o komz en e yez dezañ. 7 Souezet, estlammet e oent, hag e lavarent : « An dud a zo o komz aze, daoust ha n’int ket oll Galileaned ? 8 Penaoz eta eh intent anezo peb hini ahanom e yez e vamm : 9 Parted, Meded, Elamitiz, tud euz ar Mezopotamia, euz bro Judea, euz ar Hapadosia, ar Pont, an Azia, 10 ar Pamfilia, an Ejipt, euz al lodenn euz al Libia a sko war Ziren, Romaned o chom amañ, 11 oll Juzevien koulz ha Prozelited, Kretiz hag Arabed, ni o hlev o tiskleria en or yez burzudou Doue ». 12 Souezet e oant oll hag e lavarent kenetrezo : « Petra zinifi an dra-mañ ? » 13 Lod all a zirolle da c’hoarzin : « Eur hovad gwin dous a zo ganto ! »

14 Neuze Pèr, hag a oa war al leh gand an unneg, a zavas e vouez hag a zisklerias kement-mañ : « Tud euz ar Judea ha c’hwi hag a zo e Jeruzalem, intentit mad ar pez a dremen ha digorit ho tiskouam da zelaou va homzou ; 15 Nann ! ar re-mañ n’int ket mezo evel ma kav deoh. N’eo c’hoaz nemed nav eur diouz ar mintin. 16 Med amañ e tegouez ar pez e-neus lavaret ar profed Joel : en deveziou diweza, eme Doue, e teuin da skuilla va Spered war beb den ; profeded e vezo ho mibien hag ho merhed, ho yaouankizou o-dezo gweledigeziou, hag ho tud koz, soñjou. 18 Ya, war va zervicherien ha servicherezed, en deveziou-ze, e skuillin va Spered ; profeded a vo anezo. 19 Burzudou a rin e barr an Neñv ha sinou amañ war an douar : gwad, tan, moged o sevel. 20 E teñvalijenn e troio an heol hag e gwad al loar a-barz ma tegouezo deiz an Aotrou, an deiz-meur, an deiz a hloar. 21 Hag e vo salvet an neb a halvo ano an Aotrou.

22 « Juzevien, selaouit ar homzou-mañ : Jezuz a Nazared, an hini e-noa roet Doue da anaoud dre ar miraklou, ar burzudou, ar sinou e-neus greet drezañ en ho touez evel ma ouzoh, 23 an den-se, hervez ar pez e-noa divizet krenn, hag hervez ar pez a ouie en a-raog, c’hwi ho-peus e roet hag e lazet en eur lakaad tud difeiz d’e staga ouz ar groaz ; 24 med Doue e-neus e zavet a varo da veo, en eur denna anezañ euz poaniou ar maro, rag n’helle ket chom dindañ galloud ar maro ; 25 rag lavared a ra David diwar e benn : Gweled a reen dalhmad an Aotrou dirazoñ ; rag a-zehou din ema, evid mired ouzin da horjella. 26 Setu perag e tride va halon hag e kane laouen va muzellou, ouspenn, va horv a ziskuizo en esper. 27 Rag ne zilezi ket va ene e-touez ar re varo, ha ne lezi ket da vreina da zen santel. 28 Diskouezet az-peus din heñchou ar vuez ha leun e vezin a levenez pa vezin dirazout.

29 « Breudeur, me ’hell lavared deoh gand hardisegez : maro eo an Tad-meur David, sebeliet eo bet, hag amañ c’hoaz ema e vez. 30 Med profed e oa, hag e ouie e-noa Doue greet le da lakaad da azeza war e dron unan euz e lignez hag euz e ouenn. 31 Gwelet e-neus en a-raog dasorhidigez ar Hrist, hag anezañ eo e-neus lavaret : n’eo ket bet dilezet e-touez ar re varo ha n’eo ket deuet e gorv da vreina. 32 Jezuz eñ, Doue e-neus e zavet da veo, test om oll a gement-se. 33 Bet e-neus eta, digand an Tad, ar Spered Santel prometet hag e-neus e strewet evel ma welit ha ma klevit. 34 Rag David, ha n’eo ket, a dra-zur, savet d’an Neñv, a lavar koulskoude : an Aotrou e-neus lavaret d’am Aotrou : azez en tu dehou din, 35 beteg m’am-bo greet euz da enebourien eur skabell evid da dreid. 36 An oll Juzevien a dle gouzoud mad kement-mañ : greet e-neus Doue anezañ Aotrou ha Krist, eñ hag ho-poa staget ouz ar groaz. »

Ar re genta deuet d’ar feiz

37 Strafuillet e oe o halon o kleved ar homzou-se hag e houlennjont ouz Pèr hag an ebestel all : « Petra on-eus-ni da ober ? » 38 Hag e respountas Pèr : « Cheñchit buez, ra vezo badezet peb hini ahanoh en ano Jezuz Krist, evid kaoud ar pardon euz ho pehejou hag ho-pezo ar Spered Santel da zonezon. » 39 Ar bromesa a zo bet greet evidoh hag evid ho pugale hag ivez evid ar re a zo a-bell, ken niveruz ha ma plijo d’an Aotrou Doue o gelver. » 40 Kalz traou all a lavare c’hoaz dezo evid rei testeni ha kalon dezo : « Tehit, emezañ, diouz ar ouenn dud diroll-mañ. » 41 Ar re o doa greet degemer d’e gomzou a oe badezet hag e kreskas euz a dri mil niver ar gristenien. 42 Aketuz e talhent mad da gelennadurez an ebestel ha d’an unvaniez, da lid ar bara torret ha d’ar pedennou. 43 An doujañs a greske e kalonou an oll, kalz burzudou ha sinou a veze greet gand an ebestel. 44 Ar re oll a oa deuet da gredi a veve unanet hag a lakee o feadra e boutin. 45 Gwerza ’reent o leve hag o madou evid lodenna ar priz kenetrezo oll, hervez ezommou peb hini. 46 Aketuz e vezent da vond bemdez asamblez d’an Templ. Terri a reent ar bara er gêr ha kemered o frejou e-kreiz al levenez hag a-wir-galon. 47 Meuli a reent Doue, deuet mad e oent d’ar bobl a-bez. Hag an Aotrou a lakee da greski bemdez an niver euz ar re a gave ar zilvidigez.

Eun den ampechet pareet en templ

III 1 Pêr ha Yann a oa o pignad d’an Templ evid ar bedenn deir eur goude kreizteiz ; 2 o tougenn edod di eun den a oa ganet ampechet. Bemdez e veze degaset e-kichenn dor an Templ anvet « Dor gaer » evid goulenn an aluzenn digand an dud a antree en Templ. 3 Pa welas Pèr ha Yann oh antreal en Templ e houlennas diganto an aluzenn. 4 Pèr neuze, ha Yann ivez, a zellas a-bann outañ hag a lavaras dezañ : » Sell ouzin. » 5 An den a zelle piz outo, war hed euz eun dra bennag euz o ferz. 6 Pèr a lavaras dezañ : « N’am-eus nag aour, nag arhant, med ar pez am-eus a roan dit : en ano Jezuz Krist, an Nazarean, sav da vale ! » 7 Hag o kregi en e zorn dehou, e lakeas anezañ da zevel ; kerkent e starteas e dreid hag e uverniou, 8 En eul lamm e oe en e zav hag e valee. Antreal a reas ganto en Templ en eur vale, en eur lammed hag en eur veuli Doue. 9 Ar bobl a-bez a welas anezañ o kerzed hag o veuli Doue. 10 Anavezet e oa, eñ eo, a-dra-zur, a veze dirag « Dor gaer » an Templ o houlenn an aluzenn ; hag e chome an dud souezet maro ha saouzanet gand kement a oa c’hoarvezet gantañ.

Prezegenn Per

11 An den a zalhe tost da Bèr ha da Yann. Ar bobl a-bez estlammet a ziredas en-dro dezo, er porched anvet « Porched Salomon ». 12 O weled kement-se e lavaras Pèr d’ar bobl : « Juzevien, perag beza souezet gand kement-se, ha perag selled ouzom-ni, evel ma vefe dre on nerz on-unan, pe dre ar pedennou a reom, eo on-eus lakeet an den-mañ da vale ? 13 Doue Abraham, Izaag ha Jakob, Doue on tadou, e-neus karget a hloar e zervicher Jezuz, an hini ho-peus c’hwi droug-roet ha nahet dirag Pilat a oa en e zoñj frankiza anezañ. 14 C’hwi ho-peus nahet an hini santel ha just ha goulennet evidoh frankiz eur muntrer. 15 Mestr ar vuez, lakeet ganeoh d’ar maro, Doue e-neus e zavet a-douez ar re varo ; test ez om-ni a gement-se. 16 Dre ar feiz e Ano Jezuz, an Ano-se e-neus kennerzet an den-mañ a welit hag a anavezit. Hag ar feiz ennañ e-neus pareet mad an den-mañ dirazoh oll.

17 Mad, breudeur ! Sklêr eo din, heb gouzoud deoh petra reeh eo ho-peus greet kement-se, c’hwi hag ar re a zo en ho penn. 18 En-a-raog e-noa Doue, dre gomzou an oll brofeded, disklêriet e-nefe ar Mesias da houzañv, Doue e-ñeus kaset kement-se da benn. 19 Neuze ’ta cheñchit buez ha troit ouz Doue evid ma vo lamet ho pehejou. 20 Evel-se e paro an amzer a beoh roet gand an Aotrou, pa zegaso en-dro ar Hrist prometet, Jezuz, an hini a rank beza degemeret en Neñv, beteg ma vo adsavet an oll draou e-neus Doue komzet anezo dre gomzou ar brofeded santel a-wechall. 22 Da genta, Moizez e-neus lavaret : « An Aotrou a lakaio da zevel evidoh a-douez ho preudeur, eur profed eveldon-me, c’hwi a zelaouo anezañ war gement a lavaro deoh ; 23 ha kement den ha na zelaouo ket ar profed-se a vo tennet kuit euz a-douez ar bobl ; 24 hag an oll brofeded ivez, azaleg Samuel hag ar re a zo deuet war e lerh, o-deus komzet d’o zro evid rei da anaoud an deveziou a zo warnom bremañ.

25 Chwi eo a zo bugale ar brofeded, hag an Emgleo e-neus Doue greet gand ho tadou. 26 Evidoh-c’hwi da genta eo e-neus Doue savet ha kaset e zervicher evid ho penniga, peb hini ahanoh, ma teuit da drei kein d’hoh oberou fall. »

Per ha Yann dirag ar huzul-meur

IV 1 Pèr ha Yann a oa c’hoaz o komz d’an dud pa zeuas daveto ar veleien gand gouarnour an Templ hag ar Saduseaned, 2 eet skuiz ouz o gweled o kelenn ar bobl hag oh embann diwar gomz Jezuz, adsao ar re varo da veo. 3 Lakaad a rejont kregi enno hag o zeurel er prizon beteg antronoz, rag deuet e oa dija an abardaez. 4 Kalz euz ar re o-doa klevet ar Gomz a oa deuet d’ar feiz, war-dro pemp mil a oa anezo.

5 Antronoz eta eo e oe greet bodadeg gand ar vistri, ar gozidi hag ar skribed a oa e Jeruzalem. 6 Bez’ e oa eno Anna ar beleg braz, Kaifas, Jonatan, Aleksandr hag an oll izili euz familhou ar veleien vraz. 7 Urz a rojont da zegas dirazo Pèr ha Yann, hag e rejont goulennou outo : « Gand peseurt galloud, pe en ano piou ho-peus c’hwi greet kement-se ? » 8 Karget euz ar Spered Santel e lavaras Pèr dezo : 9 « Mistri ar bobl ha c’hwi Kozidi, gourhemenn a reer deom hirio, ablamour d’ar vad on-eus greet d’eun den ampechet, diskleria gand piou eo bet pareet an den-se. 10 Red eo deoh oll ha da bobl Israel a-bez gouzoud eo en ano Jezuz Krist a Nazared, ho-peus c’hwi staget ouz ar groaz ; med savet eo bet gand Doue a-douez ar re varo ; gras dezañ eo ema dirazoh pare, an den-mañ ; 11 Eñ, ar mên ho-peus c’hwi, ar zaverien tiez, taolet kuit, hag a zo deuet da veza ar mên-korn ; 12 n’eus a zilvidigez dre hini all ebed, rag n’eus ket kinniget d’an dud dindan bolz an Neñv ano all ebed hag a zeufe drezañ hebken ar zilvidigez. » 13 Gweled a reent hardisegez Pèr ha Yann, ha mantret e choment rag ma ouient ez oant euz ar re a heulie Jezuz. 14 Sellent a reent ouz an den pare a oa en e zav dirazo, ha ne gavent netra da lavared. 15 Urz a rojont d’o has er-mêz euz ar huzul-meur, hag e klaskent gweled kenetrezo petra da ober. 16 « Petra a raim d’an dud-se, a lavarent kenetrezo, rag anavezet mad eo ar burzud o-deus greet ; eun dra sklêr eo kement-se evid an oll e Jeruzalem. N’hellom ket henn nah. » 17 Koulskoude, evid mired na z’afe pelloh ar brud e-touez an dud, gourdrouzom anezo evid ma ne gomzint mui euz an ano-se da zen ebed. »

18 Lakaad a rejont o degas en-dro hag e oe divennet a-grenn outo komz pe gelenn an ano a Jezuz. 19 Pèr ha Yann avad a respontas dezo : « Ha just eo dirag Doue ho selaou, c’hwi, pe e zelaou eñ, Doue ? Deoh da lavared... 20 Evidom-ni avad ne hellom ket, a-dra-zur, tevel war ar pez on-eus gwelet ha klevet. » 21 Gourdrouzet e oent adarre ha lezet da vond, rag ma n’oa kavet netra da damall dezo, med ablamour d’ar bobl e oa, rag an oll a rente gloar da Zoue evid ar pez a oa c’hoarvezet ; 22 rag an den a oa bet pareet evel-se a oa ouspenn daou ugent vloaz.

23 Eur wech frankizet ez eas Pèr ha Yann da gavoud o henvreudeur ha da gonta dezo kement o-doa klevet gand ar veleien-vraz hag ar gozidi. 24 Goude beza o zelaouet, oll a-unan e savjont o mouez war-zu Doue evel-henn : « Mestr, te eo az-peus krouet an Neñv hag an douar, ar mor ha kement a zo enno ; 25 Te eo az-peus lakeet, dre ar Spered Santel, ar homzou-mañ war muzellou on tad David, da zervicher : Perag ar bayaned o fuc’ha, perag ar poblou oh irienna disterajou ? 26 En em glevet o-deus rouaned an douar hag en em unanet ar vistri evid mond oll asamblez a-eneb an Aotrou, a-eneb an hini oleoet gantañ. »

27 « Ya, en em vodet o-deus e gwirionez er gêr-mañ, Herodez ha Pons-Pilat gand ar bayaned ha poblou Israel, a-eneb Jezuz da zervicher santel, bet oleoet ganit. 28 Evel-se o-deus kaset da benn kement menoz greet gand da zorn ha da volontez. 29 Ha bremañ, Aotrou, bez war evez ouz o gourdrouzou, ha ro tro d’az servicherien da helloud embann da gomz gand hardisegez, 30 oh astenn da zorn evid ma vo greet pareañsou, sinou ha burzudou dre ano Jezuz, da zervicher santel. » 31 Pa oe echu ganto o fedenn, e krenas al leh m’edont ennañ. Oll e oent karget euz ar Spered Santel, ha gand hardisegez eh embannent Komz Doue.

Barnabas, Safera, Ananias

32 An niver braz a dud deuet d’ar feiz n’o-doa nemed eur galon hag eun ene. Den ne zoñje dezañ beza perhenn da dra pe dra euz e vadou. Er hontrol eo, kement tra o-doa a veze lakêt e boutin. 33 Gand galloud braz e roe an ebestel testeni da adsav an Aotrou Jezuz, ha gwelet mad e oant oll. 34 En o zouez n’oa den ezommeg, rag ar re a oa perhenn a dachennou pe a diez a werze anezo, 35 hag a zegase ar priz e-harz treid an ebestel. Ha peb hini en-deze e lod hervez e ezommou. 36 Evel-se Josef, lesanvet Barnabas gand an ebestel, da lavared eo « mab a frealzidigez », eul levit ginidig euz enez Chipr, e-noa eur park. 37 Gwerza ’reas e bark ha degas ar priz anezañ evid e lakaad e-harz treid an ebestel.

V 1 Eun den anvet Ananias, a-unan gand e bried Safira, a werzas eun tamm leve. 2 Kuzad a reas eul lodenn euz ar priz gand asant e wreg, hag e tegasas al lodenn all da veza lakeet e-harz treid an ebestel. 3 Med lavared a reas Pèr : « Ananias, perag e-neus Satan karget da galon ? Gevier az-peus lavaret d’ar Spered Santel : dalhet az-peus ganit eul lodenn euz priz an dachenn ; 4 daoust ha diêz oa dit e zelher heb e werza, pe ma werzfez anezañ, ober ar pez a garfes gand ar priz. Penaos az-peus soñjet en da galon ober an taol-se ? N’eo ket d’an dud eo az-peus lavaret gevier, med da Zoue. » 5 Pa glevas kement-se e kouezas Ananias hag e rentas e huanadenn ziweza. Aon braz a grogas e kement hini a gleve kement-se. 6 Neuze e teuas an dud yaouank da zebelia ar horv ha da gas anezañ ganto evid e zouara.

7 War-dro teir eurvez goude-ze, eh antreas ar wreg heb gouzoud petra a oa c’hoarvezet. 8 Pèr he galvas : « Lavar din ha kement-mañ eo ho-peus gwerzet an dachenn ? – Ya, emezi, kement-se eo. » 9 Penaoz ’ta, eme Bèr, ez oh en em glevet evid tenti Spered an Aotrou ? Setu m’ema e toull an nor treid ar re a zo bet o touara da bried. Emaint o vond da gas ahanout ganto, te ivez. » 10 Kerkent e kouezas e-harz treid Pèr hag e rentas he huanadenn ziweza. Pa zeuas tre an dud yaouank e kavjont anezi maro ; he has a rejont ganto evid he douara e-kichenn he fried. 11 Aon braz a grogas neuze en Iliz a-bez, hag e kement hini a gleve petra oa c’hoarvezet.

Burzudou an ebestel

12 Dre zaouarn an ebestel e c’hoarveze kalz sinou ha burzudou greet e-touez ar bobl. Chom a reent oll unanet dindan porched Salomon. 13 Den all ebed ne grede mond ganto ha koulskoude ar bobl a veule anezo. 14 Muioh mui e kreske an dud o-doa feiz en Aotrou, eur bern gwazed hag ivez merhed. 15 Dond a rejont da zegas ar re glañv war ar blasennou, d’o lakaad war gweleou pe war gravazou evid ma teufe, pa dremenfe Pèr, e skeudenn da vianna da bara war hini pe hini anezo. 16 Direded a ree ivez eur bern tud euz ar hêriou tro-war-dro da Jeruzalem, ganto tud klañv pe dud gwallgaset gand droug-sperejou hag oll e kavent ar pare.

An ebestel er prizon ha frankizet

17 Neuze e savas ar beleg braz hag e oll genseurted, a oa euz kostezenn ar Saduseaned, dirollet e oant gand ar gred. 18 Urz a rojont da gregi en ebestel, hag, a-wel d’an oll, e taoljont anezo er prizon.

19 Med e-pad an noz e tigoras êl an Aotrou doriou ar prizon evid o degas er-mêz hag e lavaras dezo : 20 « It, ha chomit en Templ hag eno embannit an oll gomzou a Vuez-se. » 21 Senti a rejont outañ, ha kerkent ha goulou-deiz ez-ejont d’an Templ da rei o helennadurez.

Pa zegouezas ar beleg braz hag e genseurted, ar re-mañ a halvas ar Huzul-meur ha sened ar Juzevien a-bez, hag e lakadjont kerhed an ebestel er prizon. 22 Med pa zegouesjont war al leh, ar zervicherien ne gavjont ket anezo er prizon. Pa oent dizroet e rentjont kont evel-henn : 23 « Kavet on-eus ar prizon prennet kloz, ar gwardou war evez dirag an dorojou, med, p’on-eus digoret, n’on-eus kavet den en diabarz. » 24 Pa glevas ar helou-se, Mestr an templ hag ivez ar veleien vraz a yeas en arvar diwar-benn an ebestel, oh houlenn outo o-unan petra hellfe beza degouezet. 25 Mond a reas neuze unan da gemenn dezo : « An dud ho-poa taolet er prizon, setu m’emaint en templ o kelenn ar bobl. » 26 Mond a reas neuze Mestr an templ hag e zervicherien da gerhed an ebestel, med n’eo ket dre forz koulskoude, gand aon na zeufe ar bobl d’o labeza. 27 Degas a rejont anezo dirag ar Huzul-meur, hag ar beleg braz a lavaras dezo : 28 « Divennet or-boa striz ouzoh, emezañ, kelenn an Ano-se, ha padal ho-peus skignet dre Jeruzalem ar gelennadurez-se, hag e fell deoh lakaad da goueza warnom gwad an den-se ! » 29 Med respont a reas Pèr hag an ebestel : « Red eo senti ouz Doue kentoh eged ouz an dud. 30 Doue on tadou e-neus adsavet a-douez ar re varo Jezuz ho-poa-c’hwi lakeet d’ar maro, o staga anezañ ouz ar hoad. 31 Hennez eo e-neus Doue uhelleet dre nerz e zorn dehou da veza rener ha Salver, evid ober da Israêl cheñch buez ha kaoud ar pardon euz ar pehejou ; 32 test om a gement-se, ni hag ar Spered Santel roet gand Doue d’ar re a zent outañ. » 33 Fuloret o kleved kement-se, e soñjent o lakaad d’ar maro.

34 Neuze e savas er Huzul-meur eur Farizian anvet Gamaliel, doktor war al Lezenn ha den a vrud vad e-touez ar bobl a-bez. Ober a reas kas er-mêz, evid eur pennadig, ar re a oa tamallet 35 hag e tisklerias : « Israelited, taolit evez mad ouz ar pez emaoh o vond da ober d’an dud-se ; 36 Nevez ’zo e savas Teudas, gwaz e oa war e veno, dastumet e-noa en-dro dezañ eur pevar hant den bennag ; eñ, e-unan, a zo bet lazet hag ar re oll a oa eet d’e heul a zo eet a-gleiz hag a-zehou ha n’eus chomet netra war e lerh. 37 Goude-ze e savas Judas ar Galilean da vare an niveredigez hag e sachas eur bern tud de heul. Eñ ivez a zo tremenet hag ar re oll o-doa heuliet anezañ a zo eet peb hini en e roud. 38 Neuze eta, m’henn lavar deoh, na vezit ket mui chalet gand an dud-se, lezit anezo da vond. Ma teu o menoz pe o hefridi a-berz an dud, e vo diskaret ; 39 ma teu a-berz Doue, n’helloh ket o diskar. Diwallit da veza o stourm eneb Doue. » A-du ez ejont gantañ.

40 Gelver a rejont a-nevez an ebestel ha goude beza o skourjezet ha kemennet dezo chom heb lavared ano Jezuz, e oent lezet da vond. 41 An ebestel a oe laouen o kuitaad ar Huzul-meur, da veza bet kavet din da houzañv dismegañsou ablamour d’an Ano. 42 Bemdez en templ koulz hag en tiez, ne baouezent da gelenn ha da embann kelou mad Jezuz Krist.

Ar seiz avieler

VI 1 En deiziou-se e kreske niver an diskibien hag e hrosmole ar Hresianed a-eneb an Hebreed, ablamour ma veze greet nebeutoh a stad ouz o intañvezed er zervich pemdezieg. 2 An daouzeg a halvas an diskibien d’eur vodadenn veur hag a lavaras dezo : « N’eo ket deread deom dilezel komz Doue evid servicha ouz taol ; 3 klaskit kentoh en ho touez, breudeur, seiz den brudet mad, leun a Spered Santel hag a furnez, ha ni a fizio enno ar garg-se. 4 Ni, diouz on tu, en em ouestlo d’ar bedenn ha da zervich ar brezegèrèz. »

5 Kement-se a oe kavet mad gand an oll, hag e oe dibabet Stevan, eun den leun a feiz hag euz ar Spered Santel, Filip, Prokor, Nikanor, Timon, Parmenas, ha Nicolas, eur prozelit euz Antiokia. 6 Degaset e oent dirag an ebestel a astennas warno o daouarn en eur bedi. 7 Kreski a ree komz Doue ha niveruz kenañ e teue da veza an diskibien e Jeruzalem ; ar veleien, eun niver braz anezo, a zuje d’ar feiz.

8 Stevan, leun a hraz hag a halloud, a ree burzudou ha sinou souezuz e-touez an dud. 9 War gement-se, tud euz eur zinagog anvet ar « Frankized », gand Sireneaniz hag Aleksandriz, tud euz ar Silisia hag euz an Azia a zeuas da dabutal gand Stevan, 10 Ha peogwir n’hellent ket stourm ouz ar furnez hag ar spered 11 a oa en e gomzou, e touelljont tud da lavared : « Klevet on-eus anezañ o lavared komzou disakr a-eneb Moizez hag a-eneb Doue. » 12 Atiza a rejont ar bobl, ar gozidi hag ar skribed ha kregi e Stevan dre laer evid e gas dirag ar Huzul-meur. 13 Eno e oe degaset testou faoz : « An den-mañ, emezo, ne ra nemed komz a-eneb d’al Leh santel ha d’al Lezenn. 14 E gwirionez, e glevet on-eus o lavared e vefe gand ar Jezuz-se, an Nazarean, diskaret al Leh santel, cheñchet al lezennou roet deom gand Moizez. » 15 Ar re oll a oa er Huzul-meur a zelle piz outañ hag a welas e zremm evel dremm eun êl.

Prezegenn Stevan

VII 1 Ar beleg-braz a houlennas outañ : « Ha gwir eo kement-se ? » 2 Stévan a respontas : « Breudeur ha tadou, selaouit : an Doue a hloar a en em ziskouezas d’on tad Abraham en amzer m’edo e bro Mezopotamia a-raog dond da jom da Haran ; 3 hag e lavaras dezañ : « Dilez da vro ha da famill ha kee d’ar vro a ziskouezin dit ». 4 Neuze e kuiteas Abraham bro ar Haldeaned hag e teuas da jom da Haran. Ahano, goude maro e dad, Doue a lakeas anezañ da zond d’ar vro-mañ, el leh m’emaoh-c’hwi o chom bremañ. 5 Ne roas herez ebed dezañ er vro-mañ, na zoken an disterra tamm douar ; roet e-noa dezañ ar bromesa e vefe ar vro dezañ ha d’e vugale war e lerh, daoust n’e-noa ket Abraham a vugale ; 6 hag e komzas Doue evel-henn : « Tud e lignez a vevo war eun douar estren, lakeet e vezint da sklaved ha gwallgaset e-pad pevar hant vloaz. 7 Ar vroad hag he do greet sklaved anezo, me, eme Doue, he barno. Goudeze ez aint kuit hag eh adorint ahanon amañ. 8 Emgleo an amdroh a oe roet dezo ; setu perag Abraham, deuet da veza tad da Izaag a amdrohas anezañ d’an eizved devez goude e hanedigez ; Izaag, d’e dro, a reas kemend-all da Jakob, ha Jakob d’an daouzeg tad-meur.

9 On tadou-meur, dre warizi outañ, a werzas Josef evid e gas d’an Ejipt. Med Doue a oa gantañ. 10 E denna a reas euz peb dienez, gras ha furnez a roas dezañ dirag Faraon ; roue an Ejipt a lakeas anezañ da houarnour war an Ejipt ha war e diegez a-bez. 11 Hogen, naonegez a c’hoarvezas dre vro Ejipt a-bez hag e bro Kanaan. Braz e oe an dienez ha n’helle mui on tadou pourvei d’o ezommou ; ne gavent ket a voued. 12 O veza klevet ez oa ed en Ejipt, Jakob a gasas on tadou di evid eur wech kenta ; 13 d’an eilved gwech, Josef a roas da anaoud d’e vreudeur piou e oa, hag e ouenn a oe diskleriet d’ar Faraon. 14 Josef a lakeas neuze mond da gerhad Jakob, e dad ; hag ar gerentiez a-bez, pemzeg ha tri-ugent a oa anezo. 15 Diskenn a reas Jakob d’an Ejipt, mervel a reas eno, hag on tadou ivez. 16 Kaset e oent da Zichem ha lakeet er bez e-noa prenet Abraham gand arhant digand bugale Emmor, tad Sichem.

17 O veza ma tostee ar mare da zeveni ar bromesa touet gand Doue da Abraham, ez eas muioh-mui war gresk ar bobl, en Ejipt. 18 Beteg ma teuas en Ejipt eur roue all ha n’e-noa ket anavezet Josef. 19 Dre drubardèrèz ar roue-se a glaskas trabas ouz tud or gouenn. Kement e-noa troet e venoz ouz on tadou ma’z eas beteg ober dezo lakaad er-mêz ar vugale nevez ganet evid mired outo da jom beo. 20 D’ar mare-se eo e oe ganet Moizez, koant e oa dirag Doue. E-pad tri miz e oe savet e ti e dad. 21 Ha pa oe dilezet er-mêz, merh Faraon a gemeras anezañ en he zi evel ma vije bet mab dezi. 22 Desket e oe da Voizez oll skianchou an Ejipsianed. Gallouduz e oa en e gomzou hag en e oberou.

23 Pa oe deuet d’e zaou ugent vloaz echu, e savas c’hoant gantañ da vond da weled e vreudeur, an Israelited. 24 Hag o weled unan anezo gwallgaset, ez eas d’e zivenn, hag evid veñji e vreur gwallgaset e skoas gand an Ejipsiad. 25 Soñjal a ree dezañ rei da intent d’e vreudeur eo dre e zorn eo e teue Doue da zavetei anezo ; med ne gomprenjont ket. 26 Antronoz e oe gwelet o klask lakaad ar peoh etre tud a oa oh en em ganna : « Mignoned, emezañ dezo, c’hwi a zo breudeur, perag ober droug an eil d’egile ? » 27 Med an hini a wallgase e vreur a zistokas Moizez evel-henn : « Piou e-neus da lakeed da vestr ha da varner warnom ? 28 C’hoant az-peus d’am laza evel m’az-peus lazet deh an Ejipsiad ? » 29 War gement-se e tehas Moizez kuit, d’en em denna d’eur vro estren, e bro Vadian hag eno e oe ganet dezañ daou vab.

30 Daou ugent vloaz goudeze e paras eun êl dirazañ e flamm eur vodenn entanet, e goueleh ar menez Sinai. 31 Moizez, souezet o weled kement-se a glaskas tostaad da zelled. An Aotrou a roas da gleved e vouez : 32 « Doue da dadou on-me, Doue Abraham, Izaag ha Jakob. » Krena ree Moizez euz e oll izili, ken na grede mui selled. 33 Neuze e lavar dezañ an Aotrou : « Tenn da zandalennou euz da dreid, douar santel eo al leh m’emaout ; 34 ya, gwelet mad am-eus reuz va fobl en Ejipt, klevet am-eus o hlemm. Diskennet on evid he frankiza. Ha bremañ deus, ma kasin ahanout d’an Ejipt. »

35 Moizez, eñ, an hini o-doa distaolet dre ar homzou-mañ : piou e-neus da lakeet da vestr ha da varner ? Eñ, end-eeun eo a oe kaset gand Doue evid beza o mestr hag o frankiza dre zikour an êl a baras dirazañ er vodenn. 36 Eñ eo e-noa greet dezo kuitaad an Ejipt dre ar burzudou ha sinou greet e bro Ejipt, er mor ruz hag er goueleh e-pad daou ugent vloaz. 37 Eñ, Moizez, eo e-neus lavaret d’an Israelited : « Doue a lakaio da zevel evidoh euz a-douez ho preudeur eur profed eveldon-me ; 38 eñ a oa e-doug ar vodadenn er goueleh gand ho tadou hag an êl a gomze outañ war ar menez Sinai. Eñ eo a resevas komzou a vuez evid o rei deom. 39 On tadou avad ne falvezas ket dezo senti outañ, e gas a rejont diwar o zro ha dre o spered e tistrojont d’an Ejipt, 40 rag lavared a rejont da Aaron : « Gra deom doueou da vale en or penn, rag Moizez, eñ hag e-neus greet deom kuitaad an Ejipt, n’ouzom ket petra eo deuet da veza. » 41 Ober a rejont eul leue, en deiziou-se, ha kinnig eur zakrifis d’ar fals-doueou-se, hag e oe greet laouen gouel braz en enor da oberenn o daouarn. 42 Neuze Doue, d’e dro, o lezas d’en em rei da azeuli strollad an Neñvou, evel m’eo skrivet e levr ar brofeded : daoust ha kinniget ho-peus din anevaled e-pad daou ugent vloaz er goueleh ? Douget ho-peus teltennou Molok ha steredenn ho Toue Refan, skeudennou greet ganeoh evid o azeuli. Setu perag me ho harluo en tu all da Vabilon. 44 On tadou, er goueleh, o-doa teltenn an test : an hini a gomze ouz Moizez e-noa gourhemennet sevel anezi diwar skouer an Hini e-noa gwelet.

45 Goude beza resevet anezi, on tadou, renet gand Jozue, he degasas er vro gounezet war ar bayaned kaset kuit gand Doue en e raog hag e chomas eno beteg amzer David. 46 Hemañ a blijas da Zoue hag a glaskas kaoud eun demeurañs da Zoue Jakob. 47 Med Salomon eo a zavas eun ti dezañ. 48 Ha koulskoude ne vez ket an « Uhel-Meurbed » o chom e tiez savet gand an dud. Evel a lavar ar profed : 49 « An Neñv a zo va zron din, hag an douar eur skabell dindan va zreid. Peseurt ti emaoh o vond da zevel din, eme an Aotrou, hag e peleh e hellin diskuiza ? 50 Daoust ha n’eo ket va dorn eo e-neus krouet peb tra ? » 51 Pennou kalet, diamdroh a galon hag a skouarn, dalhmad oh enebi ouz ar Spered Santel. Par d’ho tadou oh, c’hwi ivez. »

52 Pehini euz ar brofeded n’eo ket bet gwallgaset gand ho tadou ? Lazet o-deus zoken ar re a roe da anaoud en a-raog donedigez an Hini Just, an hini, end-eeun, oh bet trubard ha muntrer en e geñver. 53 C’hwi hag a zo bet embannet deoh al Lezenn dre urz an Elez, n’ho-peus ket heuliet anezi.

Stevan labezet

54 O kleved kement-se, e skrije o halonou hag o dent a skrigne a-eneb Stevan ; 55 med eñ, karget euz ar Spered Santel, o trei e zaoulagad war-zu an Neñv, a welas gloar Doue ha Jezuz en e zav en tu dehou da Zoue. 56 « Setu, emezañ ma welan digor an Neñvou, ha Mab an den en e zav en tu dehou da Zoue. » 57 Youhal a-bouez-penn a rejont en eur stouva o diskouarn, hag e sailljont warnañ oll asamblez. 58 Sacha a rejont anezañ er-mêz euz kêr ha staga d’e labeza. An testou o-doa lakeet o dillad e-harz treid eur pôtr yaouank anvet Saul. 59 E-pad m’edont ouz e labeza e ree Stevan ar bedenn-mañ : « Aotrou Jezuz, digemer va spered. » 60 Neuze e plegas e zaoulin hag e youhas forz : « Aotrou, na damall ket dezo er pehed-mañ. » Ha neuze e kouskas er maro.

VIII 1 Paol, eñ, a oe a-du ganto evid e laza.

Ar gristenien heskinet

En deiz-se, end-eeun, e tarzas a-eneb Iliz Jeruzalem eur gwall heskinèrèz. An oll, nemed an ebestel, en em strewas e mêziou bro Judea ha bro Samaria. 2 Tud devod a zebelias Stevan hag a reas kañv braz dezañ. 3 Saul, eñ avad, a zraste an Iliz. Mond a ree en tiez ha sacha er-mêz gwazed ha merhed evid o zeurel er prizon. 4 Ar re eta a oa en em dennet kuit a yeas amañ hag ahont en eur embann kelou mad ar Gomz.

Komz Doue e Bro Samaria

5 Hag evel-se Filip, diskennet en eur gêr euz bro Samaria, a embanne eno ar Hrist. 6 Eur bobl tud, oll a-unan, a grede ar pez a lavare Filip, pa glevent anezañ o komz ha pa welent anezañ oh ober burzudou. 7 Kalz a sperejou hudur, en eur youhal forz, a dehe kuit euz an dud a oa en o dalh, ha kalz a dud seizet pe ampechet a gavas ar pare. 8 Braz e oe al levenez er gêr-se. 9 Hogen, Bez’ e oa dija e kêr eun den anvet Simon, strobineller euz e vicher. Touella a ree pobl Samaria. Den e oa, war e veno, 10 hag oll, bian ha braz, a fizie ennañ : « An den, emezo, a zo galloud Doue, an hini a anver braz. ». 11 Ma kendalhent evel-se da fizioud ennañ eo en abeg ma vezent pell a oa touellet gand e strobinellou. 12 Med pa oent deuet da gredi e Filip a roe dezo da anaoud ar Helou-mad euz Rouantélez Doue hag euz ano Jezuz, e resevjont ar vadeziant, gwazed ha merhed. 13 Simon, end-eeun, a zeuas ive da gredi, badezet e oe hag e talhe tost da Filip, ken estlammet e oa gand ar sinou hag ar burzudou a wele ober.

14 An ebestel chomet e Jeruzalem, o veza klevet he-doa ivez bro Samaria degemeret Komz Doue, a gasas dezo Pèr ha Yann. 15 Pa oent diskennet eno, ar re-mañ a bedas evid ar Samaritaned, evid ma resevfent ar Spered Santel, 16 rag n’oa ket kouezet ar Spered Santel war hini ebed anezo. N’o-doa resevet nemed ar vadeziant en ano Jezuz. 17 Astenn a reas eta Pèr ha Yann o dorn warno hag e reseve ar Samaritaned ar Spered Santel.

18 Simon avad, pa welas an ebestel o rei ar Spered Santel oh astenn o daouarn, a ginnigas dezo arhant : 19 « Roit ’ta din, emezañ dezo, din-me ivez, ar halloud-se evid ma resevo ar Spered Santel ar re oll a astennin va daouarn warno. » 20 « Ra ’z ay da arhant da fall, eme Bèr dezañ, ha te da heul, evid beza soñjet dit e hellfed prena gand arhant donezon Doue. » 21 N’eus na lod, nag hêrez evidout e kement a dremen amañ, rag n’eo ket eeun da galon dirag Doue. 22 Bez keuz eta d’az fallagriez ha ped an Aotrou, ha marteze e vo pardonet dit ar zoñj a zo savet en da galon. 23 Rag gweled a ran ez out c’hwero-bestl ha liammet er fallagriez. » 24 « Pedit, c’hwi hoh-unan evidon, eme Simon, ma ne zegouezo ket ganin, netra euz ar pez ho-peus lavaret. »

25 Ha neuze e tistroas Pèr ha Yann da Jeruzalem, roet ganto testeni, hag ivez roet da anaoud komz an Aotrou, en eur embann ar Helou mad da veur a gêriadenn euz bro Samaria.

Filip hag ar spazard etiopiad

26 Eun êl d’an Aotrou a lavaras da Filip : « Sav ha kerz war-zu ar hreisteiz, dre an hent a ziskenn euz Jerusalem da vro Gaza ; n’euz den warnañ. 27 Ha kerkent ez eas Filip en hent ; ha setu m’edo o tond eur spazard Etiopiad, den a renk uhel euz tud Kandas, rouanez an Etiopia, merour-meur war he zeñzor. E perhirina oa bet e Jeruzalem ; 28 hag e tistroe d’ar gêr ; azezet en e garr, edo o lenn ar profed Izaiaz. 29 « Tosta, eme ar Spered da Filip, da dizoud ar harr-se. » 30 Filip a redas beteg ar harr ; kleved a reas ar spazard o lenn ar profed Izaiaz, hag e lavaras dezañ : « Ha kompren mad a rez ar pez a lennez ? » 31 « Ha penaoz e rafen, ma n’eus den d’am sklerijenna ? » Hag e pedas Filip da azeza en e gichenn. 32 O lenn edo ar pennad-mañ euz ar Skritur-zakr : « Heñvel ouz eun dañvad kaset da veza lazet ; heñvel ouz eun oan mud dirag an hini a zo ouz e douza, evel-se ivez ne zigor ket e henou. 33 Dre an izel ma oa, eo bet nahet outañ peb justis. E lignez, piou a gonto anezi ? Rag dilamet eo bet e vuez diwar an douar. »

34 Lavaret a reas ar spazard da Filip : « Mar plij, euz piou e komz evel-se ar profed ? Diwar-benn eñ e-unan, pe diwar-benn unan all bennag ? » 35 Filip a gomzas, ha diwar al lennadenn-se e roas dezañ da anaoud kelou mad Jezuz.

36 O vond gand an hent e tegouezjont war eur poull dour. « Sell, eme ar spazard, amañ ez eus dour ; petra virfe ouzin da veza badezet ? » (37) 38 Urz a roas da jom a-zav gand ar harr ; o-daou e tiskennjont en dour, Filip hag ar spazard, ha Filip a vadezas anezañ, 39 Pa oent deuet er-mêz euz an dour, Filip a oe tennet kuit gand Spered an Aotrou hag ar spazard ne welas mui anezañ, med kendelher a reas laouen gand e hent. 40 Filip, avad, en em gavas e Azot, hag ahano, en eur embann ar Helou mad dre gement kêr ma ’z ee, e tegouezas e Sezarea.

Saul galvet gand Doue

IX 1 Saul, ha ne zoñje dalhmad nemed e gourdrouz ha lazèrèz e-keñver diskibien an Aotrou, 2 a yeas da houlenn digand ar beleg braz liziri evid ar sinagogou e Damas.

3 Hag o veza m'edo o vond gand e hent, e tostee ouz Damas ; en eun taol, e skedas en-dro dezañ eur sklerijenn deuet euz an Neñv. 4 Koueza a reas d’an douar hag e klevas eur vouez o lavared dezañ : « Saul, Saul, perag va heskina ? ». 5 « Piou out-te, Aotrou, emezañ ? » – « Jezuz on, an hini a heskinez, 6 med, sav en da zav, kee e kêr, hag e vo lavaret dit petra da ober. » 7 Ar wazed a ree hent gantañ a oa chomet a-zav, dilavar gand ar spont. Klevet a reent ar vouez, med ne welent den ebed. 8 Saul a zavas en e zav diwar an douar ; daoust ma oa digor braz e zaoulagad, ne wele mui netra ebed, hag e oe red rei an dorn dezañ evid antreal e Damas. 9 E-pad tri devez e chomas dall, heb eva na debri tamm.

10 Bez’ ez oa e Damas eun diskibl anvet Ananias. Doue, dre eur weledigez a halvas anezañ : « Ananias ! » – « Setu me, Aotrou, emezañ. » 11 Hag an Aotrou adarre : « Sav ha kerz, emezañ, d’ar ru anvet « Ru eeun » hag e ti Judas, goulenn war-lerh eun den euz Tarz 12 anvet Saul, rag o pedi ema hag o paouez gweled eun den anvet Ananias o tond davetañ hag oh astenn e zaouarn evid renta dezañ ar gweled. » 13 « Aotrou, eme Ananias, klevet am-eus kalz tud o komz diwar-benn an den-se hag o lavared pegement a zroug e-neus greet d’az sent e Jeruzalem, 14 hag amañ e-neus peb galloud a-berz ar veleien vraz evid chadenna kement hini a en em erbed ouzit. » 15 « Kee, eme dezañ an Aotrou, rag an den-se a zo eur beñveg dibabet ganin evid kas va hano dirag ar bayaned, ar rouaned ha bugale Israel, 16 rag me va-unan a ziskouezo dezañ kement e-no da houzañv en abeg d’am ano. » 17 Ananias a yeas, antreal a reas en ti hag astenn e zaouarn warnañ : « Saul, va breur, emezañ, an Aotrou eo am degas. – Jezuz, eñ, an hini e-noa en em ziskouezet dit war an hent edos o tond gantañ, – evid ma kavi a-nevez ar gweled ha ma vezi karget euz ar Spered Santel. » 18 Evel kohennou a gouezas raktal euz e zaoulagad hag a-nevez e teuas dezañ ar gweled. Reseo a reas ar vadeziant. 19 Hag o veza debret, e teuas nerz dezañ.

Prezegerez Saul e Damas

Tremen a reas eur pennad amzer gand diskibien euz Damas. 20 Heb dale muioh, eh embannas er zinagogou eo Jezuz Mab Doue. 21 Souezet e chome ar re oll a gleve anezañ ha lavared a reent : « Ha n’eo ket eñ eo a oa en e wasa, e Jeruzalem, a-eneb ar re a bede an ano-se ? Daoust ha n’oa ket deuet amañ netra nemed evid o has chadennet dirag ar veleien vraz ? 22 Med kreski a ree muioh-mui levezon Saul ha lakaad a ree ar Juzevien da devel e Damas, pa ziskoueze sklêr oa Jezuz ar Mesias. 23 Goude eur pennad mad a amzer eo e teuas ar Juzevien d’en em gleved, evid e lakaad d’ar maro. 24 Saul avad a glevas ano a gement-se. Mond a reent beteg diwall doriou kêr, noz-deiz, evid kaoud tro d’e laza. 25 Med eun nozvez, e ziskibien a gemeras anezañ hag e ziskennas en eur baner a-hed mogeriou kêr.

Saul e Jeruzalem

26 Pa oe erruet e Jeruzalem, Saul a glaske darempredi an diskibien ; med aon o-doa oll razañ, rag n’hellent ket dond da gredi e oa eñ eun diskibl. 27 Neuze Barnabas a gemeras anezañ gantañ, hag e gasas da gavoud an ebestel ; displega ’reas dezo e-noa, war an hent, gwelet an Aotrou, e-noa hemañ komzet outañ, e-noa e Damas prezeget gand hardisegez en ano Jezuz. 28 Azaleg neuze, Paol a zaremprede anezo, ha ganto e kerze dre gêr Jeruzalem. Hardiz e prezege dirag an oll, en ano an Aotrou. 29 Divizoud a ree ivez gand Juzevien hag a gomze Gresianeg ha tabutal ganto, med ar re-mañ a glaske e lakaad d’ar maro. 30 Ar vreudeur, o veza klevet kement-se, a ambrougas anezañ beteg Sezarea hag ahano a lakeas anezañ da vond da Darz. 31 An Iliz, dre ar Judea, ar Halilea ha bro Samaria a-bez, a oa eta e peoh ; kreski ha kerzed a ree muioh-mui en doujañs euz a Zoue, gand sikour ar Spered Santel.

Pareans eneaz

32 Pèr hag a veze dalhmad o vond hag o tond, a ziskennas ive e-touez ar zent e Lidda. 33 Kavoud a reas eno eun den anvet Eneas astennet war eur hravas abaoe eiz vloaz ; seizet e oa. 34 « Eneas, a lavaras Pèr dezañ, Jezuz Krist a ro dit ar pare ; sav ha gra da unan da wele. » ; ha kerkent e savas. 35 O veza gwelet anezañ, ar re oll a oa o chom e Lidda hag e plenenn Saron a droas gand an Aotrou. 36 Bez’ e oa e-touez diskibien Joppe, eur vaouez anvet Tabita (Dorkas e Gresianeg) da lavared eo heizezig ; kalz oberou mad a ree ha mad oa da ober an aluzenn. 37 Ha setu ma kouezas klañv d’ar mare-se hag e varvas. Gwalhet e oe dezi e horv ha savet d’ar gambr-uhel. 38 Hag o veza ma n’edo ket Lidda pell diouz Joppe, an diskibien, klevet ganto edo Pèr e Lidda, a gasas dezañ daou zen da lavared dezañ : « Deus beteg ennom dizale. » 39 Kerkent ez eas Pèr ganto. Pa oe degouezet e oe greet dezañ sevel d’ar gambr uhel ; an oll intañvezed a oa eno o leñva. Diskouez a rejont an dillad, ar mantilli greet gand Dorkas pa oa beo. 40 Ober a reas Pèr dezo oll mond er-mêz ; hag eet war e zaoulin e pedas, ha goudeze, troet war-zu ar horv e lavaras : « Tabita, sav ! » Digeri a reas he daoulagad hag o weled Pèr e savas war he hoazez. 41 Astenn a reas dezi e zorn evid he zikour da zevel ; gelver a reas ar zent hag an intañvezed hag e rentas anezi dezo beo. 42 Ar brud a gement-se a redas dre Joppe a-bez ha kalz a dud a gredas e Doue. 43 Chom a reas Pèr eur pennad brao e Joppe e ti eun den anvet Simon, kivijer a vicher.

Korneli e Sezarea

X 1 Bez’ e oa e Sezarea eun den anvet Korneli, kantener en eur gohortenn greet an « Italian » anezi ; 2 eun den devod e oa, leun a zoujañs da Zoue, eñ hag e diegez a-bez ; brokuz e veze e keñver ar Juzevien hag aketuz dalhmad da bedi Doue. 3 Eun deiz, war-dro teir eur goude kreizteiz, e welas sklêr eun êl da Zoue o tond en e di, hag an êl a lavaras dezañ : « Korneli ! » 4 Kroget ar spont ennañ, e zaoulagad o para war an êl, e respontas Korneli : « Petra ’zo, Aotrou ? » « Da bedennou ha da vadoberou a zo pignet beteg Doue evid m’e-no eñ, koun ahanout ; 5 ha bremañ, kas tud da Joppe, da gerhad eun den anvet Simon, ha lesanvet Pèr ; 6 o chom ema e ti eur Simon all, kivijer a vicher, a zo e di war ribl ar mor. » 7 Kerkent ha ma oe eet kuit an êl e-noa komzet outañ, Korneli a halvas daou euz e zervicherien hag unan euz e zoudarded, den devod anezañ, abaoe pell a oa dindannañ. 8 Konta ’reas dezo kement a oa c’hoarvezet, hag e kasas anezo da Joppe.

9 Antronoz, endra m’edont-i en hent ha ma tosteent ouz kêr, war-dro ar hreizteiz, Pèr a oa pignet war leur-doenn an ti da bedi. 10 Med naon a zeuas dezañ, ha c’hoant da zebri. O pourchas eur pred edod dezañ, pa zegouezas gantañ beza gourzavet. 11 Gweled a ra an Neñv digor, hag eun dra, heñvel ouz eul lienenn vraz, o tiskenn war an douar, a-zistribill ouz he fevar horn, 12 enni an oll loened pevarzroadeg, hag ar re a stlej war an douar hag ar re a nij en oabl ; 13 hag e lavaras eur vouez dezañ : « Alo, Pèr, laz ha debr. » 14 « Biken, Aotrou, eme Bèr, morse e-doug va buez n’am-eus debret netra hag a ve loudour pe zihlan. » 15 Med a-nevez, evid an eilved gwech, ar vouez a gomzas dezañ : « Ar pez, emezi, e-neus Doue glanneet, ne da ket, te, da lavared e ve dihlan. » 16 Teir gwech e c’hoarvezas kement-se, ha raktal e oe savet al lienenn d’an Neñv.

17 N’oa ket deuet c’hoaz Pèr da intent petra oa ar weledigez e-noa bet, pa zegouezas dirag ar porz-rastell ar re e-noa kaset Korneli. Bet e oant amañ hag ahont o houlenn e pe leh edo Simon o chom. 18 Staga ’rejont da grial evid gouzoud mad ha Simon, lesanvet Pèr a oa o chom en ti-ze. 19 Pèr a jome chalet gand ar pez e-noa gwelet. Med ar Spered a lavaras dezañ : « Tri den a zo aze ouz da glask. ; 20 diskenn dioustu, ha kerz en hent ganto, heb nehamant, rag me eo a zegas anezo. » 21 Diskenn a reas Pèr da gavoud an dud-se. « Setu, emezañ, me eo an hini a glaskit, da ober petra oh deuet ? » 22 Respont a rejont : « Ar hantener Korneli, eun den just ha leun a zoujañs ouz Doue, den a vrud vad e-touez an oll Juzevien, eun êl santel e-neus lavaret dezañ lakaad ahanout da zond d’e di, evid selaou ar pez az-peus da lavared. » 23 Neuze Pèr a roas digor dezo ha lojeiz evid an noz.

24 Antronoz, end-eeun, ez eas en hent ganto, ambrouget gand hiniennou euz ar vreudeur a oa e Joppe. 25 D’an eil antronoz e tegouezas e Sezarea. Korneli, diouz e du, a oa ouz o gortoz. Pedet e-noa da zond e gerentiez hag e wella mignoned. Pa zegouezas Pèr, ez eas Komeli en arbenn dezañ, gand doujañs ez eas d’an daoulin dirazañ evid e azeuli. 26 « Sav en da zav », eme Bèr dezañ, hag e sikouras anezañ da zevel, « me kennebeud n’on nemed eun den. » 27 Hag en eur gomz gantañ eh antreas ; o weled neuze an niver braz a dud a oa, 28 e lavaras : « Gouzoud mad a rit eo eun torfed evid eur Juzeo darempredi eun den estren, ha pa ne ve nemed eur pennadig. Med din-me e-neus roet Doue da intent ne dleer ket diskleria den pe zen loudour pe zihlan. 29 Setu perag on deuet amañ dineh, p’ho-peus va galvet da zond. Med bremañ e karfen gouzoud perag ho-peus lavaret din dond. » 30 Respont a reas Korneli : « Tri devez a zo, d’ar mare-mañ end-eeun, da deir eur goude kreisteiz, me a oa er gêr o pedi, ha setu dirazon, en e zav, eun den gwisket gwenn-kann ; 31 hag e-neus lavaret din : Selaouet eo bet da bedenn, Korneli, ha da aluzennou a zo ar zoñj anezo dirag Doue ; 32 kas eta unan bennag da Joppe evid pedi Simon lesanvet Pèr da zond amañ ; o chom emañ war ribl ar mor e ti Simon ar hivijer. 33 Kerkent am-eus lakeet mond da gerhad ahanout hag ez-peus bet ar vadelez da zond. Bremañ eta ni a zo oll amañ dirazout evid selaou ar pez e-neus kemennet dit an Aotrou lavared deom. »

34 Neuze e stagas Pèr da gaozeal hag e lavaras : « e gwirionez, gweled a ran ne ra ket Doue gwelloh da lod eged da lod all, 35 e kement pobl a zo, an neb a zouj dezañ hag a heuill ar justis a zeu mad dezañ. 36 E Gomz e-neus kaset da dud Israel, kelou mad ar peoh deuet dre Jezuz Krist, eñ hag a zo Aotrou war an oll dud. 37 Gouzoud a rit petra c’hoarvezas dre vro Judea a-bez, war-lerh bro Halilea, el leh m’edo d’ar penn kenta goude ar vadeziant prezeget gand Yann ; 38 Jezuz, eñ, ginidig euz Nazared, c’hwi a oar e-neus Doue e zakret dre ar Spered Santel ha roet dezañ galloud. Tremenet e-neus en eur ober vad e peb leh hag o rei ar pare d’ar re oll a oa gwasket gand an droug-spered, rag Doue a oa gantañ. 39 Ni ’zo test euz kement e-neus greet e bro ar Juzevien hag e Jeruzalem ; eñ, an hini o-deus lazet, o staga anezañ ouz ar hoad, 40 Doue e-neus e zavet da veo d’an trede deiz, ha roet dezañ ar hras d’en em ziskouez, 41 n’eo ket d’ar bobl a-bez, med da destou bet dibabet en a-raog gand Doue : deom-ni hag on-eus debret hag evet asamblez gantañ, goude m’oa bet savet a-douez ar re varo. 42 Gourhemennet e-neus deom beza test hag embann kement-mañ : eñ eo e-neus Doue lakeet da varner war ar re veo hag ar re varo ; 43 dezañ eo e ro an oll brofeded an testeni-mañ : dre e ano e reseo ar pardon euz e behejou kement hini a laka e feiz ennañ. » 44 Pèr a oa c’hoaz o tisplega kement a oa bet c’hoarvezet pa gouezaz ar Spered Santel war ar re oll o-doa selaouet ar Gomz.

45 Sebezet e chomas an dud amdrohet a oa deuet da heul Pèr. Evel-se eta, beteg ar bayaned a ziskenne warno bremañ ar Spered Santel. 46 Klevet a reent an dud-se o komz e yezou all hag o kanveuli brazder an Aotrou Doue. Pèr a gemeras adarre ar gomz : 47 « Daoust ha piou a hellfe mired na ve badezet en dour, ar re-mañ hag o-deus resevet ar Spered Santel eveldom-ni ? » 48 Urz a roas d’o badezi en ano Jezuz Krist ; hag int-i neuze a houlennas digantañ chom c’hoaz eun nebeudig deveziou.

Per e Jeruzalem

XI 1 An ebestel hag ar vreudeur a oa o chom e bro Judea a glevas lavared o-doa ar bayaned resevet d’o zro Komz Doue. 2 Pa bignas Pèr da Jeruzalem e savas tabut etre an dud amdrohet hag eñ. 3 « Eet out, emezo, e ti tud diamdrohet ha ganto az-peus debret. » 3 Neuze Pèr a stagas adarre da gonta dezo an traou penn-da-benn : 5 « Me a oa e kêr Joppe o pedi, hag am-eus bet eur weledigez : evel eul lienenn vraz a-zistribill ouz he fevar horn o tiskenn euz an Neñv beteg ennon. 6 O para warni va daoulagad evid gweled petra oa, am-eus gwelet chatal pevarzroadeg, chatal gouez, ar re a stlej hag ar re a nij en oabl, 7 hag am-eus klevet eur vouez o lavared din : Alo, Pèr, laz ha debr. » 8 « Biken, Aotrou, emezon, morse em buez netra loudour pe zihlan n’eo bet eet em genou. » 9 Eur wech muioh, euz an Neñv, e lavaras ar vouez : « Ar pez e-neus Doue glanneet, ne da ket, te, da lavared eo dihlañ. » 10 Teir gwech e tegouezas kement-se, hag e oe savet peb tra a-nevez d’an Neñv.

11 D’an ampoent, setu ma tegouezas tri den en ti ma edon, degaset davedon euz Sezarea. 12 Lavared a reas ar Spered din mond ganto heb nehi. Ar c’hweh breur-mañ a zeuas d’am heul hag ez om antreet e ti an den-se. 13 Konta ’reas deom penaoz e-noa gwelet an êl o tond en e di da lavared dezañ : « Kas unan bennag da Joppe da gerhad Simon, lesanvet Pèr ; 14 eñ a lavaro dit ar homzou a zegaso ar zilvidigez dit ha da oll dud da diegez.

15 A-veh m’am-boa kemeret ar gaoz ma kouezas warno ar Spered Santel evel m’e-noa greet warnom-ni ivez er penn kenta. 16 Neuze e teuas din da zoñj ar pez e-noa lavaret an Aotrou : « Yann, emezañ, a vadezas en dour, med c’hwi a vo badezet er Spered Santel. » 17 Ha m’e-noa greet Doue dezo kenkoulz ha deom-ni, evid beza kredet en Aotrou Jezuz Krist, piou oan-me da helloud enebi ouz Doue ? » 18 War gement-se e siouleas ar re a oa o selaou hag e rentjont gloar da Zoue. « Setu, emezo, m’e-neus Doue greet d’ar bayaned cheñch buez evid kaoud ar vuez. »

19 Ar re a oa bet strewet, goude ar freuz savet diwar-benn Stevan, a oa eet beteg ar Fenisia, Chipr hag Antiokia, heb prezeg ar Gomz da zen ebed nemed d’ar Juzevien. 20 Lod anezo koulskoude, ginidig euz Chipr pe Ziren, en em gavet e Antiokia, a brezegas d’ar Hresianed ivez Kelou mad Jezuz an Aotrou. 21 Skoazellet e oant gand dorn an Aotrou, hag eun niver braz a dud a zeuas da gredi ha da drei a-du gand an Aotrou.

22 Ano a gement-se a zeuas beteg Iliz Jeruzalem hag e oe kaset Barnabas da Antiokia. 23 Pa zegouezas eno ha pa welas war al leh, al labour a ree gras Doue, e oe laouen hag e poanias warno da jom, a greiz kalon, fidel d’an Aotrou ; 24 rag eñ e-unan a oa eun den leal, karget euz ar Spered Santel ha leun a feiz. Eun niver braz a dud a zeuas evel-se da gredi en Aotrou. 25 Mond a reas Barnabas goudeze da Dars da glask Saul. 26 E gavoud a reas hag e zegas da Antiokia. Chom a rejont eno da labourad asamblez e-pad bloaz penn-da-benn, ha da gelenn eun niver braz a dud. E kêr Antiokia eo e oe roet evid ar wech kenta an ano a « Gristen » d’an diskibien.

27 D’ar mare-se e teuas profeded euz Jeruzalem da Antiokia. 28 Unan anezo, anvet Agabus, sklerijennet gand ar Spered Santel, a roas da anaoud e tirollfe heb dale war ar bed eun naonegez vraz, ar pez a c’hoarvezas da amzer Glaoda. 29 An diskibien a zivizas neuze kas eur zikour, peb hini hervez ar pez e-noa, d’ar vreudeur a oa o chom e bro Judea. 3 Greet e oa kement-se ; ar zikour a oe kaset, dre zaouarn Barnabas ha Saul, d’ar gozidi.

Heskinerez a-berz Herodez

XII 1 En amzer-se e teuas Herodez da heskina hiniennou euz an Iliz. 2 Lakaad a reas dibenna Jakez, breur Yann. 3 O weled e plije an dra-ze d’ar Juzevien, e lakeas kregi ivez e Pèr. Kement-se a zegouezas e deiziou ar bara-dihoell. 4 Lakaad a reas kregi ennañ, e daoler er prizon, ha pevar rummad, a bevar zoudard peb hini, a oe lakeet d’o ziwall. En e zoñj edo degas anezañ dirag ar bobl goude goueliou Pask. 5 Pèr a oa eta er prizon. Med an Iliz ne ehane ket da bedi Doue evitañ.

6 En noz a-raog ma tlee Herodez e zegas dirag ar bobl, Pèr, staget gand diou chadenn, a oa kousket etre daou zoudard ha gwardou a oa dirag an nor o tiwall ar prizon. 7 Ha setu, en eun taol, eh erruas êl an Aotrou hag e oe an toullbah karget a sklerijenn. An êl, o skei Pèr en e gostez, a zihunas anezañ en eur lavared : « Sav buan ! » Hag e kouezas ar chadennou euz e zaouarn. 8 « Lak da houriz ha da zandalennou », eme adarre an êl ; ar pez a reas. « Gwisk da vantell, emezañ, ha deus ganin ». 9 Pèr a yeas er-mêz d’e heul heb gouzoud e oa gwirion mad ar pez a oa greet gand an êl. Kredi a ree dezañ kaoud eur weledigez. 10 Treuzi a rejont ar post-gward kenta, hag an eil, hag e tegouezjont dirag an nor-houarn a zigor war kêr ; anezi heh-unan e tigoras dirazo. Mond a rejont er-mêz, ha kerzed beteg penn ar ru hag en eun taol ez eas an êl kuit dioutañ. 11 Neuze e teuas Pèr ennañ e-unan hag e lavaras : » En dro-mañ eh ouzom e-neus Doue degaset e êl ha va zennet a-dre zaouarn Herodez hag euz kement edo ar Juzevien o hortoz. »

12 Kavoud a reas e hent hag ez eas da di Vari, mamm da Yann, lesanvet Mark ; meur a hini oa eno o pedi. 13 Pa skoas ouz an nor-dal, e teuas eur vatez yaouank, heh ano Rode, da zelaou. 14 Anaoud a reas mouez Pèr, ha dioustu, leun a joa, e-leh digeri an nor, e teuas d’ar red d’an ti da lavared edo Pèr er-mêz e toull an nor. 15 « Te ’zo sod », emezo oll, med hi a zalhe mort outo ; « Neuze e êl eo », emezo. 16 Med kendelher a ree Pèr da skei, ha digoret e oe dezañ pelloh. Souezet maro e oent. 17 Dre eur zin euz e zorn e reas dezo tevel, hag e kontas penaoz e-noa Doue lakeet anezañ da zond er-mêz euz ar prizon. « It, emezañ c’hoaz, da gas ar helou da Jakez ha d’ar vreudeur », ha goude-ze ez eas kuit evid mond d’eul leh all.

18 Da houlou-deiz e oe trouz braz gand ar zoudarded : « Petra ’hellfe Pèr beza deuet da veza ? » 19 Herodez a reas ober enklask warnañ, med heb e gavoud. Goulennou a reas ouz ar gwardou hag e roas urz d’o lakaad d’ar maro. Goudeze e tiskennas da Zezarea hag e chomas eno eur pennadig.

20 Eun dizemgleo kasaüz a oa etre Herodez ha tud Tyr ha Sidon. Ar re-mañ en-em glevas evid dond dirazañ. Sikouret gand Blastus, kambellan ar roue, a-du ganto, e houlennjont ar peoh, rag bevañs o bro a zeue euz hini ar roue. 21 D’an deiz merket, Herodez, gwisket gantañ e zilhad a roue, a azezas war ar gador-varn, hag e-pad e brezegenn d’an dud, e youhe ar re-mañ dezañ : « Mouez eun doue eo, ha n’eo ket hini eun den. » 23 Raktal e oe skoet gand eun êl d’an Aotrou en abeg ma n’e-noa ket rentet gloar da Zoue. Mervel a reas, debret gand ar preñved. 24 War gresk ez ee Komz Doue, hag ivez niver ar gristenien. 25 Barnabas ha Saul, greet ganto o zervich, a zistroas euz Jeruzalem o tegas ganto Yann lesanvet Mark.

Paol ha Barnabas

XIII 1 An Iliz a oa e Antiokia a oa enni profeded ha kelennerien : Barnabas, Simeon, lesanvet Niger, Lusius a Ziren, Manaen, breur mager da Herodez an tetrark, ha Saul. 2 Eun devez, endra m’edont gand lidou an Aotrou, hag o yun, e lavaras ar Spered Santel : » Lakit din a-gostez Barnabas ha Saul evid al labour am-eus da fizioud enno. » 3 Neuze, goude beza pedet ha yunet hag astennet warno an daouarn, e lezjont anezo da vond. 4 Evel-se, o-daou, kaset e-giz misionerien gand ar Spered Santel, e tiskennjont e Seleusia hag ahano, dre vor, ez ejont da enez Chipr. 5 Pa oent degouezet e Salamina, eh embannjont Komz Doue e sinagogou ar Juzevien. Yann a oa ivez asamblez ganto evid o skoazella.

6 Treuzi a rejont an enezenn en he-fez beteg Pafos, hag e kavjont eur strobineller, profed war e veno, eur Juzeo e oa, Barjezus e ano, 7 unan euz an dud a veze o heulia ar prokonsul Serjius Paolus, hemañ eun den leun a furnez ; pedi a reas Barnabas ha Saul da zond davetañ : c’hoant e-noa kleved komz Doue. 8 Med Elimas, ar strobineller, – evel-se e hell beza intentet e ano , a enebe outo hag a glaske distrei ar prokonsul diouz ar feiz. 9 Neuze Saul, pe gentoh Paol, karget euz ar Spered Santel, a droas warnañ e zaoulagad, 10 hag a lavaras dezañ : « Te, korvigellet ma ’z out ha leun a fallagriez, mab an diaoul, enebour touet d’ar justis, ne ehani ket eta da zistresa heñchou eeun an Aotrou ? 11 Ha bremañ, setu dorn Doue a zo warnout. Dall e vezi, hag e-pad eur pennad ne weli ket zoken an heol. » Kerkent e kouezas warnañ damhoulou ha teñvalijenn, hag e troe warnañ e-unan da glask unan bennag d’e vleina. 12 O veza gwelet kement a oa c’hoarvezet, e teuas ar prokonsul d’ar feiz, ken estlammet oa bet gand kelennadurez an Aotrou.

13 Paol hag e dud a lestras e Pafos da baka Perge er Pamfilia. Neuze eo e kuiteas Yann anezo evid distrei da Jeruzalem. 14 Int-i, o tremen dre Berje, a zegouezas e Antiokia ar Pisidia. Da zeiz ar zabad ez ejont d’ar zinagog hag eh azezjont. 15 Goude ma oe lennet al Lezenn hag ar brofeded, mistri ar zinagog a gemennas dezo : « Breudeur, m’ho-peus eun dra bennag da lavared d’ar bobl, evid e frealzi, deuit da gaozeal. » 16 Paol a zavas, a reas eur zin gand e zorn hag a lavaras :

« Tud lsrael, emezañ, ha c’hwi, tud doujuz da Zoue, selaouit ahanon : 17 Doue or pobl Israel e-noa dibabet on tadou. Lakeet e-noa da greski niver an dud e-pad m’edont o veva e bro Ejipt, ha goudeze, dre nerz e vreh e-neus o zennet euz ar vro-se. 18 E-pad daou ugent vloaz e-neus maget anezo er goueleh. 19 Goudeze e-neus distrujet seiz poblad e bro Kanaan ha roet o douarou da dud Israel. 20 Kement-se oll a badas war-dro pevar hant hanter kant vloaz. Goudeze e roas dezo barnerien beteg ar profed Samuel. 21 Neuze o-deus goulennet eur roue, ha Doue e-neus roet dezo Saül, mab Kis, eun den euz meuriad Benjamin, a renas e-pad daou ugent vloaz. 22 Goude beza dilamet e garg digantañ, e roas Doue dezo David da roue, ha dezañ eo e-neus roet an testeni-mañ : » Kavet am-eus e David , mab da Jesse, eun den da blijoud din, hag a zento ouzin e peb tra. ». 23 Eñ eo an hini e-noa Doue prometet dezañ e savje euz e lignez da Israel eur Zalver, Jezuz. 24 A-raog e zonedigez, e-noa Yann embannet eur vadeziant a binijenn evid pobl Israel a-bez, 25 ha pa edo war-nes echui e amzer e lavare : « N’on ket an hini a gred deoh e vefen. Med o tond war va lerc’h emañ an hini n’on ket din da ziskoulma e zandalennou. »

26 Va breudeur, c’hwi, bugale Abraham, hag ar re a zo en o touez, doujuz da Zoue, deom-ni eo bet roet ar helou-se a zilvidigez. 27 Tud Jeruzalem hag o mistri o-deus dianavezet Jezuz, hag o kondaoni anezañ, o-deus sevenet komzou ar brofeded a vez lennet beb sabad. 28 Heb beza kavet gwir abeg ebed evid e lakaad d’ar maro, o-deus goulennet digand Pilat lakaad laza anezañ. 29 Ha p’o-doa sevenet kement a oa bet skrivet diwar e benn, e tiskennjont anezañ diouz ar hoad, d’e lakaad en eur bez. 30 Med Doue e-neus e adsavet a-douez ar re varo. 31 Hag e-pad meur a zevez e-neus en em ziskouezet d’ar re a oa pignet asamblez gantañ euz bro Halilea da Jeruzalem, int-i hag a zo bremañ testou dezañ dirag ar bobl.

32 Ni ivez a zegas deoh ar Helou mad-mañ : ar bromesa greet d’on tadou, 33 e-neus Doue peursevenet evidom-ni o bugale, p’e-neus savet Jezuz a varo da veo, evel m’eo skrivet en eil salm : « Va mab out-te, me hirio am-eus da engehentet », 34 ha m’e-neus Doue e zavet a-douez ar re varo, ne zeuio ket ken da goueza er vreinadurez ; an dra-ze end-eeun eo ar pez e-noa lavaret : « Me a roio deoh traou santel ha sur prometet da Zavid » ; 35 ha setu perag en eul leh all e lavar : « Ne lezi ket da zervicher da houzañv ar vreinadurez ». 36 Rag David, goude beza bet e doug e amzer servicher bolontez Doue, a zo eet e kousk ar maro, lakeet eo bet e-kichenn e dadou, ha gwelet e-neus ar vreinadurez. 37 An hini avad e-neus Doue adsavet da veo, n’e-neus ket gwelet ar vreinadurez.

38 Red eo deoh her gouzoud, breudeur, drezañ eo embannet deoh ar pardon euz ar pehejou, ya, euz an oll behejou ha ne heller ket beza justizet anezo dre Lezenn Voizez ; 39 ennañ avad eo roet a-grenn ar justis da gement hini e-neus feiz. 40 Taolit evez eta na zegouezfe ganeoh ar pez a zo bet lavaret gand ar brofeded : 41 « Sellit, c’hwi, an dud dicheg, bezit souezet ha tehit kuit, rag eun oberenn ez an da ober en hoh amzer na gredfeh ket enni ma vefe kontet deoh. » 42 Pa oent eet er-mêz e teujod da bedi Paol ha Barnabas da gomz, da geñver ar zabad war-lerh, diwar an traou-ze. 43 Pa oe eet an dud kuit, eun niver braz a Juzevien hag a brozelited azeulerien Doue a yeas da ambroug Paol ha Barnabas, hag ar re-mañ, dre o homzou, a alie anezo da jom fidel da hras Doue.

44 D’ar zabad war-lerh, kêr a-bez, koulz lavared, a zeuas da zelaou Komz an Aotrou. 45 O weloud ar bobl tud a oa, e fuloras ar Juzevien ha gwall responchou a rejont da gomzou Paol. 46 Hardiseet, Paol ha Barnabas a lavaras neuze : « Deoh-c’hwi da genta, eo e oa da veza kemennet Komz Doue, med peogwir ne fell ket deoh he degemered ha ma kav deoh n’hoh ket din euz ar vuez peurbaduz, ni bremañ a dro war-zu ar bayaned. 47 Rag kement-se e-neus gourhemennet deom an Aotrou : « Da lakeet am-eus evid sklerijenna ar bobl, evid ma kasi ar zilvidigez beteg penn ar bed. » 48 Pa glevas ar bayaned kement-se, e oent laouen braz hag e rentent gloar da Gomz an Aotrou ; dond a reas d’ar feiz ar re oll a oa merket evid ar vuez peurbaduz. 49 Evel-se Komz Doue en em skigne dre ar vro a-bez.

50 Med ar Juzevien a atizas gwragez a renk uhel a adore Doue, hag ivez pennou-meur euz kêr. Lakaad a rejont heskina Paol ha Barnabas, hag o has kuit euz o bro.

Paol ha Barnabas e Ikonium

XIV 1 En Ikonium e tegouezas kemend-all : mond a reas Paol ha Barnabas da zinagog ar Juzevien. Ken mad e oe o homzou, ma teuas kalz da gredi, Juzevien ha Gresianed. 2 Ar re avad euz ar Juzevien a oa chomet heb kredi a lakeas droukrañs da zevel e spered ar bayaned a-eneb ar vreudeur. 3 Koulskoude Paol ha Barnabas a jomas eno eur pennad. Hardiz e oant, rag an Aotrou a roe testeni, o lakaad anezo da ober, dre o daouam, sinou ha burzudou.

4 Disunvaniez a zavas etre tud kêr, lod a oa a-du gand ar Juzevien, lod all a-du gand an ebestel. 5 Payaned ha Juzevien a en em glevas gand o mistri evid gwallgas ha labeza an ebestel. 6 Ar re-mañ, o weled penaoz ez ee an traou, a yeas da glask repu er hêriou euz al Likaonia : Listr, Derbe, ha tro-war-dro. 7 Eno ivez eh embannent ar Helou-mad.

8 E Listr e oa eun den ha n’helle ket chom war e dreid, ampechet ma ’z oa abaoe m’oa ganet, morse n’e-noa kerzet. 9 Eun deiz p'edo o selaou Paol o komz, hemañ a zellas mad outañ, hag o weled e-noa feiz da gaoud ar pare, 10 e savas e vouez da lavared : « Sav sonn war da dreid ! » Lammed a reas an den, kerzed a ree.

11 O weled ar pez edo Paol o paouez ober, moueziou e Likaoneg a zavas da lavared : « An doueou deuet da veza heñvel ouz tud a zo diskennet en on touez ». 12 Barnabas a reent « Zeus » anezañ, hag « Hermes » euz Paol, peogwir eo eñ eo a veze o kaozeal. 13 Beleg an Doue « Zeus-rak-kêr » a lakeas degas tirvi ha kurunennou dirag doriou kêr, hag a-unan gand ar bobl, e felle dezañ kinnig eur zakrifis. 14 Pa glevjont kement-se, e rogas an ebestel Paol ha Barnabas o mantilli hag ez ejont a-benn-herr d’an dud en eur grial : 15 « O ! Oh ober petra emaoh aze ? emezo ; ni a zo tud tonket d’ar maro eveldoh. Ar Helou-mad a zegasom deoh eo ma tilezfeh ar zotoniou-se evid trei ouz an Doue beo, krouer an Neñv, an douar, ar mor ha kement a zo enno. 16 A-hed ar rummadou e-neuz lezet ar poblou payan da vond gand o hent o-unan, 17 heb paouez koulskoude da rei testeni dezañ e-unan oh ober vad, o tegas deoh euz an Neñv, glaoeier, amzer frouezuz ; o rei deoh magadurez a-leiz-kov ha levenez a-leiz-kalon. » 18 A-veh ma hellas ar homzou-se lakaad da zioulaad an dud, ha mired outo da ginnig eur zakrifis.

19 Neuze e tegouezas Juzevien, o tond euz Antiokia hag Ikonium. Ar re-mañ a zegasas an dud d’o menoz ; labezet e oe Paol ha stlejet er-mêz euz kêr ha dilezet ganto, o soñjal ez oa maro. 20 Med pa oe bodet an diskibien en-dro dezañ, e savas hag eh antreas e kêr. Antronoz gand Barnabas, ez eas da Zerbé. 21 Embannet o-doa ar Helou-mad e Derbe, ha greet eun niver braz a ziskibien, ha goude-ze e teujont war o hiz, dre Listr, Ikonium hag Antiokia. 22 Startaad a reent kalon an diskibien hag o alia a reent da zelher mad d’o feiz. « Red eo deom, emezo, gouzañv kalz trubuillou, evid antreal e rouantelez Doue. » 23 E peb lliz o-doa astennet o daouarn war ar gozidi, ha goude beza pedet ha yunet, o-doa fiziet anezo en Aotrou, an hini o-doa lakeet ennañ o feiz.

24 Treuzi a reont neuze dre vro Pisidia evid mond da vro Pamfilia. 25 Goude beza prezeget ar Gomz e Perjé, e tiskennjont da Atalia. 26 ha mond goudeze dre vor da Antiokia, ahano eo e oant deuet, hag eno e oent bet fiziet e gras Doue evit al labour kaset bremañ da benn. 27 A-veh degouezet, ha bodet ganto an Iliz, o-doa diskleriet dezo kement e-noa Doue greet drezo, ha penaoz o-doa digoret dor ar feiz d’ar bayaned. 28 Tremen a rejont eur pennad amzer gand an diskibien.

Tabut diwar-benn an amdroh

XV 1 Eun nebeud tud a ziskennas euz ar Judea evid klask kentelia ar vreudeur : « Ma ne fell ket deoh, emezo, beza amdrohet, hervez Lezenn Voizez, n’hellit ket beza salvet ». 2 Trouz ha tabut a zavas etre Paol, Barnabas hag int-i. Neuze e oe divizet ez afe Paol ha Barnabas hag eun nebeud re all, beteg Jeruzalem, da houlenn o ali digand an ebestel hag ar gozidi war ar gudenn se. 3 Pourvei a reas lliz Antiokia da gement a oa red evid o beach. Tremen a rejont dre ar Fenisia hag ar Samaria, en eur gonta e troe ar bayaned war-zu Doue, ar pez a lakee kalz a levenez e-touez ar vreudeur. 4 Pa oent degouezet e Jeruzalem, e oent degemeret gand an lliz, an ebestel hag ar gozidi, hag e kontjont dezo kement e-noa Doue greet drezo.

5 Tud deuet d’ar feiz euz rumm ar Farizianed a zeuas neuze da lavared e ranker amdroha ar bayaned, ha lakaad anezo da heulia Lezenn Voizez. 6 An ebestel hag ar gozidi a reas eur vodadenn da studia kenetrezo ar gudenn-se. 7 Med o veza ma teue an tabut da drenka, e savas Pèr da lavared : « Breudeur, emezañ, gouzoud a rit eo azaleg ar penn kenta, hag en ho touez, dre an dibab greet gand Doue, o-deus ar broiou payan klevet ganin-me Komz an Aviel, ha greet dezo testeni, o rei dezo, evel deom-ni, ar Spered Santel ; 9 heb ober kemm ebed etrezo ha ni, e-neus dre ar feiz, glanneet o halonou. 10 Neuze ’ta, perag beza dicheg e-keñver Doue, o lakaad war jouk an diskibien, eur yeo ha n’o-deus ket gellet on tadou dougenn, na ni kennebeud ? 11 Eur wech c’hoaz, dre hras an Aotrou Jezuz, her hredi a reom, eo ez om bet salvet eveldo o-unan. » 12 Sioul e chomas ar vodadenn a-bez, hag e oe selaouet Barnabas ha Paol o tisplega an oll zinou hag ar burzudou greet drezo gand Doue e-touez ar bayaned.

13 P’ho-doa ehanet, Jakez a lavaras d’e dro : « Breudeur, selaouit ahanom : 14 Simeon e-neus displeget deom eo fellet da Zoue azaleg ar penn-kenta, kemered a-douez ar bayaned eur bobl evid e ano ; 15 kement-se a zegoueze mad gand komzou ar brofeded, rag skrivet eo : goude-ze e teuin da adsevel teltenn David kouezet en he foull. An dismantrou anezi a adsavin hag e lakin anezi en e zav. 17 Neuze ar peurrest euz an dud a vo war glask euz an Aotrou gand an oll boblou payan a zoug va ano. Setu ar pez a lavar an Aotrou, eñ hag a gas da benn e vennadou 18 bet anavezet a oll-viskoaz. 19 D'am zoñj din-me eta ne ve ket mad deom samma ar re euz ar bayaned hag a dro ouz Doue, 20 med skriva da lavared dezo dioueri kement a zeu diwar azeulèrèz ar fals-doueou, an dizonestiz, ar hig chatal mouget hag ar gwad. 21 A rumm da rumm e-neus Moizez prezegerien e peb kêriadenn, peogwir e vez lennet da beb sabad er zinagogou. »

22 An ebestel hag ar gozidi a-unan gand an Iliz a-bez a zivizas neuze dibab en o zouez tud da gas da Antiokia asamblez gand Paol ha Barnabas : Jud, lesanvet Barsabas, ha Silas, o-daou galloudeg e-touez ar vreudeur. 23 Fiziet e oe enno al lizer-mañ : « An ebestel, ar gozidi hag ar vreudeur, d’ar vreudeur deuet a-douez ar bayaned hag a zo o chom e Antiokia, er Siria hag er Silisia, salud deoh ! 24 Klevet on-eus ez eus eet tud euz on touez deom-ni d’ho strafuilla gand o homzou heb beza bet urz ebed euz or perz, hag o-deus evel-se lakeet douetañs en ho spered. 25 Setu perag on-eus divizet, oll a-unan, dibab kannaded da gas davedoh gand or breudeur ker Paol ha Barnabas. 26 Tud int hag o-deus gouestlet o buez da zervich Jezuz Krist on Aotrou. 27 Kas a reom eta Jud ha Silas evid displega deoh dre o homzou ar memez tra. 28 Rag ar Spered Santel ha ni on-eus divizet chom heb lakaad samm all ebed warnoh nemed kement-mañ hag a zo red : 29 chom heb debri kig bet proved d’an idolou, heb eva gwad, heb debri kig chatal bet mouget, heb ober hudurnez. Diwallit ouz kement-se hag e reoh mad. Salud deoh. »

30 Ar re-mañ pa oent digouviet a ziskennas eta da Antiokia, hag eno e oe bodet an dud, evid rei dezo al lizer. 31 Laouen e oent, ha nerz-kalon a roe dezo kleved e lenn. 32 Jud ha Silas diouz o zu, peogwir ez oant profeded, a gomzas aliez d’ar vreudeur da gennerza anezo ha d’o skoazella. 33 E-pad eur pennad e chomjont eno, hag ar vreudeur a gimiadas diouto en eur reketi dezo ar peoh evid distrei war-zu ar re o-doa o degaset. 34 Silas a zivizas chom ha ne ’z eas kuit nemed Jud. 35 Paol ha Barnabas, avad, a jome e Antiokia ; gand meur a hini all e kelennent hag eh embannent kelou mad Komz an Aotrou.

36 Goude eur pennadig amzer e lavaras Paol da Varnabas : « Distroom ’ta da weled ar vreudeur e kement kêr on-eus roet enni da anaoud Komz an Aotrou ; ni a welo e peseurt stad emaint. 37 Barnabas e-noa c’hoant kas ivez ganto Yann, lesanvet Mark. 38 Paol avad ne felle ket dezañ kemered adarre eun den hag e-noa o huiteet er Pamfilia, ha n’e-noa ket eta kemeret perz en o labour. 39 Ken braz e teuas da veza an dizemgleo etrezo ma ’z ejont peb hini diouz e du. Barnabas a gemeras Mark gantañ hag a lestras war-zu enez Chipr. 40 Paol avad a gemeras gantañ Silas hag a guiteas, o veza bet fiziet gand ar vreudeur e gras an Aotrou. 41 En eur vond euz an eil tu d’egile dre vro Siria ha bro Silisia, Paol a gennerze an Ilizou.

Paol, Silas ha Timote

XVI 1 Degouezoud e reas evel-se e Derbe hag e Listr. Setu ez oa eno eun diskib anvet Timote, e vamm a oa eur Juzevez deuet d’ar feiz, e dad eur Gresian. 2 Brud vad e-noa e-touez ar vreudeur e Listr hag e Ikonium. 3 Paol e-noa c’hoant d’her has d’e heul. E gemered a reas, hag eh amdrohas anezañ, rag ar Juzevien a oa o chom en andread-se a ouie oll oa e dad eur Gresian. 4 E kement kêriadenn a veze gwelet ganto, Paol ha Silas a roe da anaoud ar reolennou bet divizet gand an ebestel ha kozidi Jeruzalem, hag e houlennent ma vefe sentet outo. 5 Startaad a ree eta muioh-mui ar feiz en Ilizou, hag e kreske an niver anezo euz an eil devez d’egile.

6 Treuzi a rejont ar Frijia ha bro ar Halated, rag miret oa bet outo, gand ar Spered Santel, mond da embann ar Gomz en Azia. 7 Pa oent degouezet war harzou ar Misia ; e klaskjont mond da Vitinia, med ar Spered Santel n’o lezas ket d’henn ober. 8 Treuzi a rejont neuze bro Misia ha diskenn e Troas. 9·Eun nozvez, Paol e-noe eur weledigez. Dirazañ, en e zav, ez oa eur Makedoniad hag a aspede anezañ : « Treuz d’ar Makedonia, deus war or zikour. ». 10 War-lerh ar weledigez e-noa bet Paol, on-eus raktal klasket an tu da vond d’ar Makedonia, rag kredi stard a reem e-noa Doue or galvet da vond di da embann ar Helou mad.

11 O veza lestret e Troas on-eus skoet war eeun da Zamotras, hag antronoz da Neapolis ; 12 ahano ez om eet da Filip, brasa kêr a oa e bro Makedonia, trevadenn roman. Chomet om eno eur pennad amzer. 13 Da zeiz ar zabad ez om eet er-mêz euz kêr, evid mond war ribl eur ster beteg eul leh a zoñje deom beza eul leh a bedenn. Eet war on azez, on eus komzet ouz ar merhed a oa eno bodet. 14 Unan anezo anvet Lidia, eur varhadourez moug euz kêr Tiatir hag a adore dija Doue, a zelaoue gand evez, rag an Aotrou e-noa digoret he halon evid ma vefe war evez ouz komzou Paol. 15 Pa oent bet badezet, hi ha tud he zi, e pedas ahanom evelhen : « peogwir ho-peus kredet am-eus feiz en Aotrou, deuit d’am zi da loja. » Red e oe deom senti outi.

16 Eun deiz m'edom o vond d’ar bedenn, eur vatez yaouank, e dalh eur spered a zivinèrèz a zeuas en arbenn deom ; dre he oraklou e houneze arhant braz d’he mistri. 17 Atao e veze war ol lerh da Baol ha deom-ni hag e youhe : « Ar wazed-mañ a zo servicherien d’an Doue uhel-meurbed, diskouez a reont deoh hent ar zilvidigez ». 18 E-pad meur a zevez e reas evel-se. Hegaset ganti, a-benn ar fin, Paol a zistroas war-zu enni hag a lavaras d’ar spered : « En ano Jezuz Krist, me a gemenn dit : deus er-mêz euz ar vaouez-mañ ». Ha raktal ez eas ar spered er-mêz.

19 He mistri avad, o weled o vond da fall ar fiziañs o-doa da hounid arhant, a bakas peg e Paol hag e Silas, hag o hasas ganto war ar blasenn vraz dirag mistri braz kêr. 20 Ha dirag ar bretored e lavarjont : « Ar wazed-mañ a zo o lakaad trouz en or hêr, Juzevien int. 21 Alia ’reont heulia reolennou a vuez ha ne hellom ket, ni Romaned ma ’z om, na degemered, nag heulia. » 22 Hag e tirollas ar bobl a-eneb dezo. Ar bretored a lakeas diframma o dilhad diwarno hag o skourjeza. 23 Goude beza roet kalz taoliou dezo, e taoljont anezo er prizon. Greet e oe d’ar gwardou teurel evez outo. 24 Ha peogwir e-noa resevet an urz-se, e taolas anezo en toull donna, o zreid stardet e pejou koad.

25 War-dro hanter-noz, Paol ha Silas a oa o pedi hag o kana meuleudi da Zoue hag ar brizonidi all a oa ouz o zelaou. 26 A greiz toud e oe eur seurt krén-douar, ma vrallas diazezou an ti-gward. Digeri a reas kerkent an oll dorojou ha terri Iiammou ar brizonidi. 27 O veza dihunet, ar gward a welas digor dorojou ar prizon, kavoud a ree dezañ oa tehet ar brizonidi. Tenna ’reas e gleze ; o vond d’en em Iaza edo. 28 Med Paol a zavas e vouez da grial dezañ : « Na ra droug ebed dit da-unan rag oll emaom amañ. » 29 Ar gward a houlennas goulou hag a yeas a-benn-herr en toullbah, hag en eur grena euz e oll izili, eh en em daolas e-harz treid Paol ha Silas. 30 O has a reas er-mêz hag e houlennas outo : « Aotrounez, petra am-eus da ober evid beza salvet ? » 31 Respont a rejont dezañ : « Bez feiz en Aotrou Jezuz hag e vezi salvet, te ha da dud. » 32 Neuze e rojont da anaoud Komz Doue dezañ ha d’ar re all a oa o chom en e di. 33 D'an eur-ze, end-eeun, e-kreiz an noz, ar gward o hasas da walhi o gouliou, ha goudeze, heb dale pelloh, e resevas ar vadeziant, eñ hag oll e dud. 34 Pedi a reas goudeze Paol ha Silas da vond d’e di ; eur pred a bourchasas dezo, hag eñ hag e famill a oe laouen asamblez o veza kredet e Doue.

35 Pa deuas an deiz, ar bretored a gasas liktored da lavared d’ar gward : « Laosk an dud-se da vond. » 36 Ar gward a roas kement-mañ da anaoud da Baol : « Ar bretored a gemenn din rei deoh ho frankiz ; it eta er-mêz ha kerzit e peoh. »

37 Paol avad a lavaras : « Lakeet o-deus or skourjeza dirag an oll heb barnedigez ebed, ni hag a zo sitoyan Rom, taolet o-deus ahanom er prizon, ha bremañ e fell dezo or has er-mêz dre guz ; n’ez aio ket an traou evel-se ; n’o-deus nemed dond o-unan d’or frankiza. » 38 Al liktored a yeas da lavared kement-se d’ar bretored ; ar re-mañ a grogas aon enno o kleved ez oant sitoyaned roman. 39 Dond a rejont da houlenn beza didamallet ; o frankiza a rejont, en eur bedi anezo da guitaad ar gêr. 40 Pa oant deuet er-mêz euz ar prizon, Paol ha Silas a yeas da Lidia ; gweled a rejont ar vreudeur evid rei kalon dezo. Hag ez ejont adarre pelloh.

Diesteriou e Salonika

XVII 1 O veza tremenet dre Amfipolis hag Apollonia, e tegouezjont e Tesalonika, el leh m’o doa ar Juzevien eur zinagog. 2 Evel m’oa boazet d’henn ober, Paol a yeas d’o havoud hag e-pad tri devez sabad diouz renk, e tivizas ganto ; 3 o tisplega ar Skrituriou e tiskoueze e oa red d’ar Mesiaz gouzañv ha sevel a-douez ar re varo, « hag, emezañ ar Mesiaz eo Jezuz, an hini end-eeun a embannan deoh. » 4 Lod euz ar Juzevien a zeuas da gredi, desevet gand Paol ha Silas, hag eveldo ivez kalz a Hresianed, prozelited hag eun niver braz a verhed a renk uhel.

5 Med ar Juzevien leun a gred, a zavas diwar plasennou kêr, eur vandenn hailloned da lakaad trouz da zevel e-touez ar bobl, ha dizurz e kêr. Mond a rejont neuze da di Jason, da glask Paol ha Silas a felle dezo degas dirag ar bobl. 6 O veza ma n’o-doa ket o havet, e tegasjont ganto Jason hag hiniennou euz ar vreudeur dirag ar bolitarked : « Amañ ema, emezo, en eur youhal forz, ar re o-deus lakeet freuz dre ar bed a-bez, 7 ha Jason e-neus roet degemer dezo ; ar re-ze a ya oll a-eneb urziou an impalaer ; lavared a reont ez eus eur roue all : Jezuz. 8 Strafuillet e oe ar bobl hag ivez ar bolitarked o kleved kement-all, 9 hag e oe red da Jason ha d’ar re all rei kred dezo a-raog o lezel da vond kuit.

10 Kerkent, e-kreiz an noz, e reas ar vreudeur dezo kuitaad evid mond da Bere. Pa oent degouezet ez ejont da zinagog ar Juzevien. 11 Ar re-mañ, sevennoh eged tud Tesalonika, a zegemeras ar Gomz gand kalz a volontez vad ha bemdez e sellent piz er Skrituriou evid gweled hag evel-se edo an traou e gwirionez. 12 Kalz anezo a zeuas da gredi hag ivez Gresianezed a renk uhel hag eun nebeud mad a wazed. 13 Med kerkent ha ma klevas Juzevien Tesalonika edo Paol e Bere ivez oh embann Komz Doue, e tegouezjont evid lakaad freuz ha fourgas eno ivez e-touez ar bobl. 14 Raktal ar vreudeur a lakeas Paol da vond kuit beteg ar mor, endra ma chome eno Silas ha Timote. 15 Ar re a oa oh ambroug Paol a yeas beteg Atena ha goudeze e teujont en-dro gand urz da lavared da Zilas ha da Dimote dond beteg ennañ kenta ma hellfent.

16 E-pad m'edo Paol ouz o gortoz e Atena, e-noe eur galonad o weled ar gêr-se gouestled d’ar fals-doueed. 17 Divizoud a ree eta er zinagog gand ar Juzevien hag ar prozelited, ha bemdez,. war al leur-gêr, gand ar re a zegoueze gantañ. 18 Dond a ree zoken filozofed, epikourianed ha stoisianed da gaozeal gantañ. Lod a lavare : « Petra e-neus c’hoant da lavared ar chaoker-se ? », ha lod all : « Hennez a dle beza prezeger doueed estren ». Paol, gwir eo, a brezege Jezuz hag an adsao da veo. 19 Kroget e oe ennañ d’e gas dirag an « Areopaj » – « Ha gouzoud a hellfem, emezo, petra eo ar gelennadurez nevez a zisplegez ? 20 Rag hegaset om gand da gomzou iskiz hag e fell deom eta gouzoud petra dalvezont ? » 21 Red eo henn lavared : an oll dud euz Atena ha kement estren a oa o chom eno ne reent euz o amzer nemed konta pe zelaou ar heleier nevesa.

22 Paol, en e zav e-kreiz an Areopaj, a lavaras : « Ateniz, emezañ, d’am zoñj din-me, c’hwi ho-peus, evel pa lavarfen, re a relijion. 23 Dre ma ’z an gand ruiou kêr e welan ho savaduriou sakr, ha zoken eun aoter skrivet warnañ « d’an Doue dianav ». An Doue a enorit eta heb e anaoud, me a zo o vond d’e gemenn deoh. 24 An Doue e-neus krouet ar bed ha kement a zo ennañ, eñ, mestr an Neñv hag an douar, n’ema ket o chom e templou savet gand an dud ; 25 Evid e zervich n’e-neus ket ezomm kennebeud euz daouarn tud, evel m'e-nefe ezomm euz tra pe dra, eñ hag a ro d’an oll buez, lusk hag an oll draou all. 26 Diwar eun den hebken e-neus krouet an oll boblou, evid pobla an douar a-bez, merket e-neus dezo da be vare dond hag e peleh beva, 27 evid klask Doue, ha marteze zoken e hellfent e gavoud dre zastorn eñ ha n’ema ket e gwirionez pell diouz peb hini ahanom, 28 rag ennañ on-eus bezañs, lusk ha buez., evel m’o-deus lavaret hiniennou euz ho parzed, rag ni a zo ivez euz e ouenn dezañ. 29 Neuze ’ta, peogwir ez om euz gouenn Doue, ne dleom ket soñjal e vefe an doueelez heñvel ouz aour, arhant pe varbr kizellet hervez ijin ha faltazi an den.

30 Ha Doue bremañ, heb delher kont euz an amzer ma oent dianaoudeg, a embann d’an dud o-deus oll hag e peb leh da jeñch buez. 31 Rag merket e-neus an deiz ma teuio da varn ar bed gand justis, dre an hini e-neus dibabet. An asur a gement-se e-neus roet d’an oll o sevel anezañ a-douez ar re varo. 32 O kleved ano euz adsao ar re varo, lod a reas goap, lod all a lavaras : « Ni da glevo war gement-se eun dro all bennag ». 33 Evel-se eo e kuiteas Paol anezo. 34 Lod koulskoude a jomas gantañ hag a zeuas d’ar feiz, evel Denez an Areopajad, hag eur vaouez anvet Damaris, ha re all c’hoaz ganto.

Diazezadur ar feiz e ker Gorint

XVIII 1 Pa guiteas Atena, Paol a yeas da Gorint. 2 Eno e tegouezas gand eur Juzeo anvet Akuila, ginidig euz ar Pont, hag e bried Prisilla, nevez deuet euz Rom, rag Glaoda e-noa kemennet d’an oll Juzevien o-doa da guitaad Rom. Paol o darempredas, 3 ha peogwir e-noa ar memez micher, – teltennerien e oant, – e teuas da jom ganto ha da labourad asamblez. 4 Da geñver peb sabad e tivize er zinagog hag e klaske degas d’ar feiz Juzevien ha Gresianed.

5 Med pa oe degouezet Silas ha Timote, deuet euz ar Makedonia, Paol ne reas mui nemed prezeg o tiskleria fraez dirag ar Juzevien e oa Jezuz ar Mesiaz. 6 Med ar re-mañ a zislavare hag a valloze ha setu perag Paol a hejas e zilhad hag a Iavaras dezo : « Ra gouezo ho kwad war ho penn ! Direbech on, hiviziken ez in daved ar bayaned ». 7 En eur vond kuit ez eas e ti eur prozelit anvet Titius Justus, a oa e di e-kichenn ar zinagog. 8 Krispus, rener ar zinagog, a gredas en Aotrou ha gantañ e oll dud ; hag eun niver braz a Gorintianed o selaou Paol, a zeuas d’ar feiz hag a oe badezet. 9 Eun nozvez, en eur weledigez, an Aotrou a lavaras da Baol : « Bez dineh, kendalh da brezeg, arabad dit tevel, 10 rag me a zo ganit ha den na grogo ennout evid ober droug dit, rag eun niver braz a dud er gêr-mañ a zo galvet da veza din. » 11 E-pad bloaz hanter e chomas Paol eno dalhmad o prezeg Komz Doue.

Paol dirag ar prokonsul Gallion

12 D'ar mare m'edo Gallion prokonsul en Akaia, e savas an oll Juzevien a-eneb Paol, hag e tegasjont anezañ dirag al lez-varn : 13 « An den-mañ, emezo, a zegas an dud da zervicha Doue en eun doare ha n’eo ket hervez al Lezenn ». 14· Paol a oa o vond da respont, pa lavaras Gallion d’ar Juzevien : « Ma vije bet ano euz eur gwall daol bennag, pe euz eun dra mezuz, am-befe degemeret ho klemm deoh, Juzevien, evel just. 15 Med peogwir e sav trouz etrezoh diwar-benn kelennadurez, geriou, diwar ho Lezenn deoh, an dra-ze a zell ouzoh. Ne fell ket din barn war draou evel-se. 16 Hag e kasas anezo er-mêz euz al lez-varn. 17 Neuze e teuas an oll da gregi e Sosten, rener ar zinagog. Kanna ’reJont anezañ dirag al lez-varn. Gallion avad ne gemeras tamm perz ebed e kement-se. 18 Paol a jomas c’hoaz eur pennad mad a amzer, e Korint ; goudeze e kuiteas ar vreudeur hag e kemeras al lestr evid mond d’ar Siria. Prisilla hag Akuila a oa asamblez gantañ. Eur gouestl e-noa greet ; setu perag e-noa lakeet touza e vleo e Sankrea.

Paol distro da Antiokia

19 Degouezoud a rejont e Efez. Eno e kimiadas diouz e genvreudeur. Eñ avat a yeas d’ar zinagog hag e tivizas gand ar Juzevien. 20 Goulennet e oe digantañ chom pelloh ganto, med ne asantas ket. 21 O huitaad a reas en ur lavared dezo : « Distrei a rin c’hoaz davedoh, mar plij gand Doue ». E Efez e lestras, 22 evid mond da zouara e Sezarea, pignad a reas da zaludi an lliz hag e tiskennas da Antiokia, 23 el leh ma chomas eur pennad amzer. Goudeze ez eas adarre en hent hag e welas bro Galatia ha bro Frijia an eil goude eben evid kalonekaad an oll ziskibien. 24 Eur Juzeo, anvet Apollos, ginidig euz Aleksandria, a oa degouezet e Efez ; eun den helavar e oa ha gwizieg war ar Skrituriou. 25 Desket oa bet dezañ Hent an Aotrou, ha gand eur galon virvidig e prezege hag e kelenne heb fazi war gement a zelle ouz Jezuz, daoust ma ne anaveze nemed badeziant Yann. 26 Gand hardisegez e stagas da brezeg er zinagog med p’o devoa e glevet Prisilla hag Akilaz a gemeras anezañ en e bart-e-unan evid diskouez dezañ sklerroh c’hoaz Hent Doue. 27 Hag o veza m'edo en e zoñj mond da Akaia, ar pez a gavas mad ar vreudeur, ar re-mañ a skrivas d’an diskibien evid ma rafent eun degemer mad dezañ. Pa oe degouezet, e oe, dre hras Doue eur zikour vad evid an dud fidel, 28 rag galloud e lavariou a zeue a-benn euz ar Juzevien dirag an oll, pa zeue dre ar Skrituriou da ziskouez oa Jezuz ar Mesias.

Diskibien Yann Vadezour e Efez

XIX 1 E-pad m'edo Apollos e Korint eo e tegouezas Paol e Efez. Tremenet e-noa dre horre ar vro. Kavoud a reas eno eun nebeud diskibien, 2 hag e houlennas outo : « Ha resevet ho-peus ar Spered Santel pa oah deuet d’ar feiz ? » – « Med, emezo dezañ, n’on-eus ket klevet zoken ober ano euz Spered Santel. » 3·Goulenn a reas Paol : « Peseurt badeziant ho-peus eta resevet ? » – « Badeziant Yann », emezo. 4 Ha Paol adarre : « Eur vadeziant evid cheñch buez eo a roe Yann, eñ a houlenne digand ar bobl kredi en hini a zeufe war e lerh, da lavared eo e Jezuz. » 5 E zelaou a rejont, hag e oent badezet en ano an Aotrou Jezuz. 6 Astenn a reas Paol e zorn warno, hag ar Spered Santel a ziskennas warno. Staga rejont da gomz e yezou ha da brofedi. 7 Bez’ ez oa anezo oll eun daouzeg gwaz bennag.

8 Mond a reas Paol d’ar zinagog, hag e-pad tri miz, gand hardisegez e tivizas diwar-benn Rouantelez Doue. Dalhmad e veze o klask degas d’ar feiz ar re anezo a veze ouz e zelaou. 9 Hag o veza ma teue eun nebeud anezo da galedi ha ma choment diskredig ha ma'z eent beteg gwall-gomz euz an Hent dirag an dud, Paol o dilezas hag e kemeras e ziskibien en o fart-o-unan evid divizoud ganto bemdez e ti-skol Tirannos. 10 Daou vloavez e padas an traou evel-se, ken na hellas pobl an Azia a-bez, Juzevien ha Gresianed, kleved Komz an Aotrou.

11 Ober a ree Doue dre zaouarn Paol burzudou dibaod, 12 ken na veze kemeret, evid o lakaad d’ar re glañv, mouchouerou ha lienajou o devoa stoket ouz e gorv. An dud-se neuze a gave ar pare, hag an droug sperejou a yee kuit. 13 Argaserien diaoulou, Juzeo, o vond hag o tond dre ar vro, a stagas, d’o zro, da hervel, war ar re o-doa droug sperejou, ano an Aotrou Jezuz. Lavared a reent : « Me ho ped dre ar Jezuz-se embannet gand Paol. » 14 Seiz mab d’eur beleg Juzeo, anvet Seva, a glaske ober evel-se. 15 An droug spered a respontas dezo : « Jezuz, me anavez anezañ, goûd a ouzon piou eo Paol, med piou oh-c’hwi ? » 16 Hag e saillas warno ken feulz an den dalhet gand an droug spered ma reas e vestr dezo oll, ha ma rankjont tehet euz an ti en noaz ha goloet a houliou. 17 An oll dud, e kêr Efez, Juzevien ha Gresianed, a glevas ano euz ar pez a oa c’hoarvezet, aon a groge enno oll, hag e oe meulet brazder an Aotrou Jezuz. 18 Kalz euz ar re o-devoa kredet a zeue da anzav a vouez uhel o zroiou fall. 19 Eun niver braz a dud, en em roet d’an achantouriez, a reas eur bern gand o leoriou evid o devi dirag an oll. Pa oe greet ar gont e oe gwelet ez oa anezo talvoudegez hanter kant mil pez arhant. 20 Evel-se, dre halloud an Aotrou, e teue ar Gomz da greski ha da greñvaad.

21 Diwar gement-se Paol a zivizas, er Spered, mond da Jeruzalem o tremen dre ar Makedonia hag an Akaia. Lavared a ree : pa vezin bet du-ze, e vo red din c’hoaz mond da Rom. 22 Kas a reas d’ar Makedonia daou euz e skoazellerien, Timote hag Erast. Eñ a-vad, a jomas eur pennadig en Azia.

23 D'ar mare-se eo e savas freuz braz awalh diwar-benn an Hent ; 24 rag eun orfebour, anvet Demetrius, a ree templou arhant da Artemiz, hag evel-se e lakee artizaned da gaoud gounidou braz. 25 Boda a reas an artizaned hag ar re o-doa eur vicher damheñvel, hag e lavaras : « Her gouzoud a rit, gwazed, mard emaom en on êz eo ablamour d’al labour-se, 26 hogen, gweled a rit pe gleved, n’eo ket hebken e Efez, med dre goulz lavared an Azia a-bez, e teu ar Paol-se da lakaad esmae en eur bern tud, o rei dezo da gredi, evel ma lavar, n’eo ket doueou an doueou a zeu euz a dre on daouarn. 27 N’eo ket hebken or micher eo a zo e riskl da veza taolet diskred warni, med templ an doueez vraz Artemiz a hellfe ivez beza dilezet ha buan awalh diskaret euz ar renk uhel, azeulet ma ’z eo e-touez an dud oll a zo en Azia ha dre ar bed a-bez ». 28 Ar homzou-se a lakeas an dud da fulori ha ne ehanent ket da youhal : « Braz eo Artemiz Efez ! » 29 Ar freuz en em skignas dre gêr a-bez, hag an dud a yeas diwar-herr, ha niveruz kenañ d’an teatr ;·en eur vond, e oe skrapet Kaius hag Aristark, kompagnuned da Baol. 30 Greet mad e-noa Paol e zoñj da vond d’ar vodadenn, med ne oe ket lezet gand an diskibien. 31 Aziarked euz e Vignoned, lod anezo, a lakeas ivez e zizalia da riskla mond d’an teatr.

32 Peb hini evel-just a youhe, med n’oa ket daou o youhal ar memez tra, dizurz a zavas er vodadenn ; an darn vrasa zoken ne ouient ket perag e oant bodet. 33 Euz a greiz an engroez, e kemennas tud da Aleksandr petra c’hoarveze, hag eñ, poulzet gand ar Juzevien, a ziskouezas gand e zorn e felle dezañ diskleria e venoz dirag an oll. 34 Pa oe gouezet e oa Juzeo e stagas an oll da youhal asamblez e-pad tost da ziv eur : « Braz eo Artemiz Efez ! » 35 Ar sekretour a zeuas a-benn da lakaad ar bobl da zioulaad. « Efezianed, emezañ, ha bez e vefe unan bennag ha ne ouesfe ket eo kêr Efez, kêr zantel an Artemiz vraz ha kêr an delwenn kouezet euz an Neñv ? 36 Peogwir eo sklêr ar respont, eo red deoh sioulaad ha diwall da fazia war an hent da gemer. 37 Degaset ho-peus amañ tud ha n’o-deus greet netra disakr ebed, na komzet dizoujuz a-eneb on doueez. 38 Ma sav trouz etre hini pe hini ha Demetrius hag ar vicherourien a ya de heul, breujou a zo, prokonsuled a zo, n’eus nemed mond dirag al lez-varn. 39 Ha ma klaskit eun dra all bennag, e vezo gwelet kement-se en eur vodadenn lezenneg. 40 E riskl emaom da veza tamallet da lakaad dispah ablamour d’or bodadenn greet ganeom hirio, rag n’eus abeg ebed da helloud diskleria or boa eun digarez vad evid ober ar vodadenn-mañ ha n’or befe da renta kont anezi, ne hellfem ket henn ober ». War-ze e tigouvias an dud.

Euz Efez da Droaz dre ar Gres hag ar Makedonia

XX 1 Echu ar freuz, e lakeas Paol e ziskibien da zond hag e kennerzas anezo. Goudeze e kimiadas diouto hag ez eas en hent da vond d’ar Vakedonia. 2 Goude beza tremenet dre ar broiou-se, e kemeras kalz a amzer evid kennerza ar vreudeur hag en em gavas er Grès. Tri miz e chomas eno. 3 Pa oe deuet ar poent dezañ da dreuzi ar mor evid mond d’ar Siria, en abeg ma’z oa Juzevien oh irienna a-eneb dezañ e tivizas distrei en-dro dre ar Vakedonia. 4 Ambrouget e oe gand Sopatros, mab Pirrus euz Bere, Aristark ha Sekundus euz an Desalonika, Gaius euz Bere ha Timote, hag ivez Trichika ha Trofima euz rann-vro an Azia. 5 Ar re-mañ hag a oa eet en or raog o-doa or gortozet e Troaz. 6 Ni avad, on-eus kuiteet Filip goude deiziou ar bara-dihoell hag on-eus lestret evid degouezoud ganto pemp devez goudeze, hag eno om chomet e-pad eur zizun.

Dasorhidigez Eutika e Troaz

7 D’an deiz kenta euz ar zizun, pa oam bodet evid terri ar bara, Paol hag a dlee kuitaad antronoz, a zivizas gand ar vreudeur ; astennet e-noa e gomz beteg war-dro hanter-noz ; 8 n’eo ket lampou a ree diouer er gambr uhel, el leh m'edom bodet. 9 Eur pôtr yaouank azezet war rizenn ar prenest en em roas da gousked-mort, endra ma kendalhe Paol da zivizoud. En e gousk e kouezas euz an trede estaj, ha pa oe klasket e zevel, ez oa maro. 10 Diskenn a reas neuze Paol, a-benn-herr ez eas davetañ hag e kemeras anezañ etre e zivreh. « Arabad eo deoh strafuilla, beo eo ». 11· Pignet en-dro, Paol a dorras ar bara, debri a reas ha delher da brezeg beteg goulou-deiz ; ha neuze ez eas kuit. 12 Ar pôtr avad a oe degaset beo d’ar gêr, ar pez a oe eur frealzidigez vraz.

Euz Troaz da Vilet

13 Ni a yeas kuit a-raog ar re all, hag on-eus lestret evid mond da Asos, e Ieh m’or-boa da gemered Paol, greet gantañ ar menoz da zond eno war e droad. 14 Pa oe en em gavet ganeom e Asos, ni on-eus e zegemeret er bourz evid mond da Vitilèn. 15 Ahano ez om eet antronoz, dre vor, beteg beza dirag Kio ; d’an eil antronoz on-eus treuzet war-zu Samos, ha peder eur war'n ugent diwezatoh, goude eun ehan e Trogilion, ez om degouezet e Milet. 16 Paol e-noa divizet tremen dirag Efez, gand aon da goll amzer en Azia ; n’e-noa ken mall nemed da erruoud e Jeruzalem, ma ve posubl, evid gouel ar Pantekost.

17 Euz Milet, Paol a halvas da zond davetañ kozidi lliz Efez. 18 Pa oent digouezet e lavaras dezo : « Goûd a ouzoh petra eo bet va darempredou ganeoh abaoe m’on degouezet en Azia. 19 Servichet am-eus an Aotrou gand eur galon izel, e-kreiz an daerou hag an trubuillou deuet din dre droiou-kamm ar Juzevien. 20 N’on bet morse lezireg war gement a helle ober vad deoh, er hontrol eo, prezeget am-eus, kelennet am-eus, koulz dirag an oll hag en ho tiez. 21 An testeni a roen a halve ar Juzevien koulz hag ar bayaned da jeñch buez, da drei ouz Doue ha da gaoud feiz e Jezuz an Aotrou. 22 Ha bremañ me, dalhet gand ar Spered, a zo en hent da vond da Jeruzalem. N’ouzon ket petra zeuin eno da veza. 23 Med, n’eus forz penaoz, ar Spered Santel a gemenn din, euz an eil gêr d’eben, ez eus chadennou ha trubuill ouz va gortoz. 24 Va buez va-unan, n’he-deus evidon talvoudegez ebed, klask a ran kas da benn va redadenn hag ar zervich bet fiziet ennon gand Jezuz an Aotrou : rei testeni da Aviel gras Doue. 25 Hiviziken, her gouzoud mad a ran, ne weloh mui va dremm, c’hwi oll hag am-eus tremenet en ho touez en eur embann ar Rouantelez. 26 Setu perag e hellan rei hirio an testeni-mañ : divlamm on euz gwad an oll. 27 Morse n’on ket bet lezireg ; er hontrol eo, mennad Doue en e bez am-eus roet deoh da anaoud.

28 Evesait warnoh hoh-unan ha war an dud a zo fiziet ennoh ; evito e-neus ar Spered Santel greet ahanoh episkobed evid beza pastored Iliz Doue, dasprenet gantañ dre e wad e-unan. 29 Gouzoud mad a ran e teuio en ho touez bleizi kriz pa vezin eet kuit, ha n’o-do damant ebed d’an dropell. 30 Euz ho touez zoken e savo tud, dezo komzou fallagr evid sacha ganto diskibien d’o heul. 31 Bezit war evez eta, dalhit soñj n’am-eus ehanet, noz-deiz e-pad tri bloaz, gand daerou, da guzulia peb hini ahanoh. 32 Ha bremañ e fizian ahanoh e Doue hag e komz e hras, gouest da zevel an Iliz ha da rei o hêrez d’ar re oll a zo santeleet. 33 N’am-eus c’hoanteet nag arhant nag aour, na dilhad den ebed. 34 An daouarn-mañ, her gouzoud a rit hoh-unan, o-deus pourveet da va ezommou ha da re va hompagnuned. 35 Henn diskouezet am-eus deoh dalhmad eo evel-se, o poania, eo e tleer dond war zikour an dud dinerz ha delher soñj euz ar homzou e-noa lavaret an Aotrou e-unan : « Brasoh levenez a vez o rei eged o reseo ». 36 Goude ar homzou-se, ez eas war e zaoulin, asamblez ganto oll, hag e pedas. 37 An oll neuze a zirollas da ouela, hag ez eent a-dro-vriad gand Paol evid pokad dezañ. 38 Glaharet e oant dreist oll ablamour m’o-doa e glevet o lavared ne welfent mui e zremm. Goudeze e oe ambrouget beteg al lestr.

Paol o pignad da Jeruzalem

XXI 1 P’or-boa gellet en em ziframma diouto ha mond en donvor, on-eus skoet eeun da Gos hag antronoz da Rod, hag ahano da Vatara. 2 O veza kavet eul lestr a oa war-nes loh da vond da Fenikia, ez om savet er bourz hag ez om eet er mor 3 Pa oem degouezet dirag enez Chipr e lezjom an enezenn e babourz evid ober hent war-zu ar Siria hag on-eus douaret e Tir, rag eno eo e-noa al lestr da ziskarga e lestrad marhadourez. 4 Seiz devez e oam chomet eno, rag diskibien or-boa kavet eno. Poulzet gand ar Spered Santel e lavare ar re-mañ da Baol chom heb pignad da Jeruzalem. 5 Pa oe echu ganeom on amzer da jom eno, ez om eet en hent hag e-keid ha ma ’z eem, e teuent oll d’on heul, gwragez ha bugale zoken, beteg er-mêz euz kêr. Eno, daoulinet war an aod, on-eus pedet. 6 P’or-boa kimiadet diouto, ez om savet er vag hag int-i a zo distroet d’ar gêr.

7 Ni avad on-eus treuzet ar mor azaleg Tir hag a zo degouezet e Ptolemais, hag eno, goude beza saludet ar vreudeur, ez om chomet eun devez asamblez ganto. 8 Antronoz ez ejom adarre en hent hag eh errujom e Sezarea. Mond a rejom da di Filip, an avieler, unan euz ar seiz, hag ez om chomet eno. 9 Peder merc’h e-noa, gwerhezed ha profedezed anezo. 10 E-pad an deveziou niveruz or-boa tremenet eno, e tegouezas eur profed anvet Agabus a oa o tond euz bro Judea. 11 Dond a reas d’or havoud ha kemered gouriz Paol, liamma ’reas ganti e dreid e-unan hag e zaouarn hag e tisklerias : « Setu petra lavar ar Spered : An den a zo ar houriz-mañ dezañ, setu aze penaoz e vo staget gand ar Juzevien ha lakeet etre daouarn ar bayaned. 12 O kleved kement-se, ni hag ar vreudeur euz kêr a bedas stard Paol da jom heb pignad da Jeruzalem. 13 Neuze e respontas deom : « Perag e ouelit hag e rannit din va halon ? Prest on-me, n’eo ket hebken da veza liammet med da vervel e Jeruzalem evid ano Jezuz an Aotrou ». 14 Ha peogwir n’hellem ket kaoud e asant, n’on-eus ket pouezet muioh warnañ : « Ra vo greet bolontez an Aotrou, a lavarem ». 15 E dibenn an deveziou-se, on eus greet or pourchasou hag ez om pignet da Jeruzalem. 16 Diskibien euz Sezarea, o vond di ivez asamblez ganeom, o-deus or haset da loja da di Mnason, ginidig euz enez Chipr, eun diskibl euz an deiziou kenta.

Paol ha Jakez e Jeruzalem

17 Pa zegouezjom e Jeruzalem e oe greet deom eun degemer laouen gand ar vreudeur. 18 Antronoz ez eas Paol ha ni da di Jakez ; ar gozidi a oa oll eno ivez. 19 P’e-noa o zaludet e tisplegas dre ar munut kement e-noa greet Doue e-touez ar bayaned dre e zervich. 20 Ar re a oa o selaou a rentas gloar da Zoue hag a lavaras da Baol : « Gweled a hellez, breur, ez eus a vilierou tud fidel e-touez ar Juzevien, hag oll emaint stard a-du gand al Lezenn, 21 Hogen, goûd a ouzom ar vrud a red diwar da benn : o teski emaout d’ar Juzevien a zo o veva e-touez ar bayaned, dilezel Moizez. Lavared a rez dezo chom heb amdroha ar vugale hag heb heulia ar reolennou. 22 Petra da ober ? A dra-zur e klevint emaout amañ. 23 Gra eta ar pez emaom o vond da lavared dit : pevar den on-eus amañ dalhet gand eur ouestl ; 24 kemer anezo ganit, bez glanneet asamblez ganto ha kemer ar mizou war da gont evid ma hellint lakaad touza o bleo hag eh intento an oll ne dalv netra ar pez o-deus klevet diwar da benn hag e chomez, te ivez, fidel d’al Lezenn. 25 Evid ar bayaned deuet da gredi, ni on-eus skrivet dezo ar pez on-eus divizet : en em vired euz ar hig bet kinniget e sakrifisou payan, euz ar gwad, ar hig bet mouget hag an hudurnez ». 26 En deiz warlerh e kemeras Paol gantañ ar wazed-se hag o kregi gand lidou ar hlanedigez, ez eas asamblez ganto d’an Templ evid lavared pe da zeiz, pa vo echu o hlanedigez, e vo kinniget ar brovadenn evid peb-hini anezo.

27 Ar seiz devez a oa o vond da echui pa zeuas Juzevien an Azia, hag o-doa e welet en Templ, da hisa ar bobl a-bez a-eneb dezañ, hag e pakjont krog ennañ. 28 Youhal a reent, « Tud Israel, sikour deom ! Hemañ eo an hini a stourm a-eneb or pobl, al Lezenn hag al leh-mañ, dre ar gelennadurez a ro e peb leh ha da beb den. Degaset e-neus Gresianed zoken en Templ ha disakreet evel-se al leh santel-mañ ». 29 Rag e welet o-doa, e kêr, asamblez gand Trofim a Efez hag e soñje dezo e-noa Paol e zegaset en Templ. 30 Kêr a-bez en em zavas, hag an dud en em vodas niveruz kenañ. Kroget e oe e Paol hag e oe stlejet er-mêz euz an templ, hag serret an dorojou raktal. 31 O klask e laza edod, pa zeuas ar helou-mañ da gomandant ar gohortenn : birvill a zo e Jeruzalem a-bez. 32 Raktal e vodas soudarded ha kantenerien hag e lakeas sailla war ar bobl. Pa oe gwelet ar homandant hag ar zoudarded e oe ehanet da skei gand Paol. 33 Neuze e tosteas outañ ar homandant, e krogas ennañ hag e roas urz d’e jadenna gand diou jadenn, ha goudeze e klaskas gouzoud piou e oa ha petra e-noa greet. 34 Med e-kreiz ar bobl, peb hini a youhe, hemañ eun dra, egile eun dra all. Ha peogwir ar homandant ne helle ket, ablamour d’ar jolori, gouzoud frêz ar pez a oa c’hoarvezet, e houlennas kas Paol er hastell-kreñv. 35 Pa oe degouezet hemañ war dereziou ar skalier e oe red d’ar zoudarded dougen anezañ, ken dirollet oa ar bobl, 36 rag ar bobl a-bez a yee d’e heul en eur youhal : « d’ar maro ! » 37 D’ar mare m’edod war-nes e lakaad da vond er hastell-kreñv, e lavaras Paol d’ar homandant : « ha posubl e ve din lavared eur ger dit ? » – « Te oar Gresianeg ? a respontas eñ. 38 N’eo ket te eta eo an Ejipsiad e-neus lakeet en deveziou-mañ pevar mil forban d’en em zevel ha da vond d’ar goueleh ? » 39 » Me, eme Baol, a zo eur Juzeo, euz Tarz, er Silisia, sitoian euz eur gêr ha n’eo ket brud a vank dezi, lez ahanon da gomz d’ar bobl ». 40 Aotreet e oe, ha Paol, en e zav war ar skalierou, a reas sin d’ar bobl gand e zorn. Sioul e chomas an oll, hag e komzas dezo en Hebreeg.

Paol o komz d’ar juzevien

XXII 1 « Breudeur ha tadou, selaouit eta a pez am-eus da lavared deoh evid en em zivenn ». 2 Sioulaad a reas c’hoaz an dud pa oe klevet Paol o komz dezo en Hebreeg : 3 « Juzeo on, ganet e Tarz, er Silisia, med amañ, er gêr-mañ, on bet savet, hag am-eus, desket e-harz treid Gamaliel, en eun doare striz, Lezenn on Tadou. Leun a feulz e oan evid Doue, evel ma’z oh oll hirio. 4 Heskinet am-eus an Hent-se, lakeet am-eus chadenna ha teurel er prizon gwazed ha merhed. 5 Ar beleg braz ha kuzul ar pennou-meur a-bez a hell beza test : diganto o-unan am-boa bet liziri evid or breudeur pa oan eet da Zamas evid degas da Jeruzalem, chadennet, ar re a oa, du-ze, ma vefent kastizet.

6 Kendelher a reen eta gand va hent ha tostaad ouz Damas pa ’zeuas a daol trumm, war-dro kreizteiz, eur sklerijenn vraz o tond euz an Neñv da skedi en-dro din. 7 Koueza a ris d’an douar hag e klevis eur vouez o lavared din : « Saul ! Saul ! perag am heskinez ? » 8 « Piou out ? » eme-ve, hag ar vouez adarre : « Me eo Jezuz an Nazarean, me eo a heskinez ». 9 Ar re a oa ganin a welas mad ar sklerijenn, med ne glevjont ket ar vouez a gomze ouzin. 10 Me a houlennas : « Petra am-eus da ober, Aotrou ? ». Hag e respontas an Aotrou din : « Sav en da zav ha kee da Zamas, hag eno e vo lavaret dit kement tra a zo merket dit da ober ». 11 Med o veza ma ne welen netra diwar goust sked ar sklerijenn-se, on bet renet gand dorn va henvreudeur evid mond da Zamas. 12 Bez e oa eno eun den devod, anvet Ananias, sentuz ouz al Lezenn, brud vad dezañ e-touez ar Juzevien : eno edo o chom. 13 Dond a reas d’am havoud, ha neuze e lavaras din : « Saul, va breur, ra zeuio dit en-dro ar gweled », ha kerkent e teuas din ar gweled, hag e welis anezañ. 14 Lavared a reas din : « Doue on tadou e-neus da zibabet evid anaoud e volontez, gweled an Hini just ha kleved e vouez dezañ. 15 Te a vezo test dezañ dirag an oll dud euz kement az-pezo gwelet ha klevet. 16 Perag gortoz pelloh ? Alo ! Reseo ar vadeziant, ha bez glanneet euz da behejou en eur bedi e Ano ».

17 Pa oen distroet da Jeruzalem, e-pad m’edon o pedi en templ, e tegouezas ganin beza gourzavet ; 18 hag e welis an Aotrou ; lavared a reas din : « Kuita buan Jeruzalem, rag ne zegemerint ket an testeni a roi din ». 19 « Med, Aotrou », eme-ve, « gouzoud mad a reont eo me eo a yee er zinagogou, evid lakaad teurel er prizon ha skourjeza ar re a gred ennout. 20 Ha pa oe skuillet gwad Stevan, eun test dit, me ivez a oa eno, a-du edon gand ar vuntrerien hag o tiwall o dilhad ». 21 Med lavared a reas din : « kerz, rag war-zu ar poblou payan pell-pell e kasin ahanout ».

22 Ar juzevien hag o-doa selaouet Paol beteg ar homzou-se, a stagas neuze da youhal forz : « Ra vo dilamet diwar an douar eur seurt den. Ne dle ket chom beo ». 23 Hag o veza ma youhent, ha ma hejent o mantilli, ha ma taolent poultrenn en êr, 24 komandant ar gohortenn a lakeas kas Paol er hastell-kreñv hag e vourrevia gand ar fouet evid gouzoud frêz perag ar youhadennou-se a eneb dezañ. 25 Pa edod o vond da astenn anezañ evid e skourjeza, e lavaras Paol d’ar hantener a oa diouz servich : « eur sitoian roman ha n’eo ket bet barnet zoken, daoust hag aotre ho-peus d’e skourjeza » ? 26 O veza klevet kement-se, ar hantener a yeas da gavoud komandant ar gohortenn evid rei kement-se dezañ da houzoud : « Petra edos o vond da ober, rag an den a zo sitoian roman ». 27 Ar homandant a zistroas da houlenn ouz Paol : « Lavar din ha gwir eo ez out sitoian roman ? – Ya, eme Baol ». 28 Ar homandant a lavaras c’hoaz : « Me, emezañ, am-eus ranket rei eur yalhad vad evid kaoud ar gwir-se. Ha me, eme Baol, am-eus anezañ abaoe m’on ganet ». 29 Ar re a oa o vond d’e vourrevia a lezas anezañ raktal. Ar homandant a oa kroget aon ennañ, o houzoud e-noa dalhet en ereou eur sitoian roman. 30 Antronoz, komandant ar gohortenn a c’hoanteas gouzoud heb douetañs ebed a betra oa tamellet Paol gand ar Juzevien, urz a roas da zijadenna anezañ ha da voda ar veleien vraz gand ar Huzul-meur a-bez ha diskenn Paol da vond dirazo.

Paol dirag ar Sanedrin

XXIII 1 Paol, e zaoulagad o para war ar Sanedrin, a zisklerias : « Breudeur, beteg-henn am-eus renet va buez dirag Doue gand eur goustiañs direbech ». 2 Med ar beleg meur Ananias a roas urz d’e skoazellerien da skei gantañ war e henou. Ha Paol dezañ neuze : 3 « Te eo a zo o vond da veza skoet gand Doue, moger gwennet, azezet out evid va bam hervez al Lezenn hag en desped d’al Lezenn e roez urz da skei ganin ». 4 « Taol evez, eme dezañ ar skoazellerien, gwall gomz a rez da veleg-meur Doue ». 5 « Ne ouien ket, breudeur, eme Baol, e oa eñ ar beleg-meur, rag skrivet eo : ne wallgomzi ket a-eneb mestr da bobl.

6 Goud a ouie ez oa dirazañ diou gostezenn hini ar Saduseaned hag hini ar Farizianed, neuze e youhas e-kreiz ar Huzul-meur : « Breudeur, farizian on, mab da farizianed ; ablamour d’am esperañs en adsao ar re varo da veo eo ez on degaset dirag al lezvarn ». 7 A-veh m’e-noa echu da ziskleria kement-se, ma savas dizemgleo etre Farizianed ha Saduseaned hag e oe disparti etre an dud. 8 Hervez ar Saduseaned, n’eus nag adsao da veo, nag elez, na spered, e-leh ar Farizianed a gelenn ez eus anezo. 9 Neuze e savas eur pez karnach. Hiniennou euz ar skribed diouz kostezenn ar Farizianed a zavas hag a zisklerias stard : « Ne gavom netra da rebech d’an den-mañ... ha m’e-nije komzet eur spered outañ pe eun êl 10 Hag o veza ma ’z ee an traou gwasoh gwaz, ar homandant, gand aon na ve draillet Paol ganto, a roas urz d’ar zoudarded da ziskenn evid e denna euz o zouez hag e gas a-nevez d’ar hastell-kreñv. 11 En noz war-lerh, an Aotrou a zeuas dirag Paol hag a lavaras dezañ : « Dalh mad ! rag emaout o paouez rei din testeni e Jeruzalem hag e ranki rei din ivez testeni e Rom.

12 Pa oe deuet an deiz, ar Juzevien a iriennas hag a douas chom heb debri nag eva ken n’o-defe lazet Paol. 13 Ouspenn daou ugent e oant o kemered perz en irienn-se. 14 Mond a rejont da weled ar veleien vraz hag ar gozidi hag e lavarjont dezo : « Touet on-eus, dre eul le meur, chom heb kemered tamm a-raog beza lazet Paol. 15 Neuze, diouz ho tu, a-unan gand ar Huzul-meur, kinnigit d’ar homandant e zegas deoh war zigarez ober gwelloh enklask war e gont, ha ni a zo prest d’e laza a-raog ma vo degouezet ». 16 Med mab c’hoar Paol a glevas ano euz ar stign edont oh antella ; mond a reas d’ar hastell-kreñv, antreal a reas e-barz ha rei kelou da Baol. 17 Gelver a reas Paol unan euz ar hantenerien ha lavared dezañ : « Kas ar pôtr yaouank-mañ d’ar homandant, eun dra bennag e-neus da lavared dezañ ». 18 Ar hantener a gemeras anezañ gantañ hag e gas d’ar homandant. « Ar prizoniad Paol, emezañ, e-neus va galvet, ha goulennet diganin degas dit ar pôtr yaouank-mañ ; eun dra bennag e-neus da lavared dit ». 19 Ar homandant a grogas en e zorn hag a yeas gantañ a gostez hag a houlennas outañ : « Petra az-peus da lavared din ? » 20 « Ar Juzevien, eme dezañ ar pôtr yaouank, a zo en em glevet evid goulenn diganit degas Paol warhoaz dirag ar Sanedrin, war zigarez ober sklerroh enklask diwar e benn. 21 Gand a ri, arabad dit fizioud enno ; ouspenn daou ugent e vezint, kuzet evid e spia ; touet o-deus chom heb dibri nag eva ken n’o-dezo e lazet ; prest int bremañ, ne hortozont nemed da asant ». 22 Ar homandant a zigouvias ar pôtr yaouank ; « Na lavar da zen ebed, a gemennas dezañ’ ez-peus diskuillet din an irienn-se.

Paol kaset da Zezarea

23 Gelver a reas neuze daou euz ar gantenerien, hag e lavaras dezo : « Grit ma vo prest da vond da Zezarea, kerkent ha nav eur diouz an noz, daou hant soudard, deg marheg ha tri-ugent ha daou hant skoazeller ; 24 ra vo prest kezeg ivez evid kas Paol yah ha dibistig da Felisius ar gouarnour. 25 Skriva ’reas eul lizer, kement-mañ a lavaras : 26 Klaodius Lisias, d’ar gouarnour mad meurbed, salud ! 27 Ar Juzevien o-doa kroget en den a gasan dit hag edont o vond d’e laza pa c’hoarvezis gand soudarded evid e denna diganto, rag edon o paouez kleved ez oa eur sitoian roman. 28 Felloud a ree din gouzoud a betra e oa tamallet, setu perag am-eus lakeet e zegas dirag ar Huzul meur. 29 Gweled am-euz ez oa tamallet dezañ e zizemgleo e-keñver traou euz o feiz, med heb na vefe netra hag a dalfe ar maro pe ar chadennou. 30 Kemennet eo bet din edod o pourchas eur gwall daol a-eneb an den-se. Kas a ran anezañ dit en eur gemenn d’e damallerien o-doa da zougenn klemm dirazout a-eneb dezañ. Salud !

31 Ar zoudarded a reas ar pez a oa bet gourhemennet dezo, hag e-pad an noz e kasjont Paol da Antipatris ; 32 Antronoz, ar zoudarded a lezas ar varheien da gendelher asamblez gantañ hag a zeuas war o giz d’ar hreñv-leh. 33 Kerkent ha ma oent degouezet e Sezarea, ar varheien a roas al lizer d’ar gouarnour hag a zegasas Paol dirazañ. 34 Ar gouarnour a lennas al lizer hag a houlennas euz peseurt rann-vro ez oa ginidig. Pa glevas ez oa euz ar Silisia : 35 « Me zelaouo ahanout, emezañ, pa vo degouezet amañ ivez ar re a zo ouz da damall ». Hag e roas urz da zelher anezañ e pretordi Herodez.

Prezegenn Tertullus

XXIV 1 Pemp devez goudeze e tiskennas ar beleg braz Ananias gand kozidi hag eun alvokad anvet Tertullus. Dougenn a rejont klemm dirag ar gouarnour a-eneb Paol. 2 Hemañ a oe galvet da zond, ha Tertullus a stagas evel-hen gand e damallou : « A drugarez dit ha da gement az-peus bet ar vadelez da adreiza evid ar bobl-mañ, eo e hellom beva e peoh. 3 E peb leh hag e peb amzer, Felisius mad meurbed, gand leun a anaoudegez e resevom ar madoberou-se. 4 Evid mired na jomin re bell da derri dit da benn, va frezegenn a vo berr. Bez, mar plij, ar vadelez da zelaou anezi gand da lealded brudet mad. 5 Deuet om da houzoud ez oa an den-se eur vosenn o lakaad freuz ha reuz e-touez oll Juzevien ar bed, eur penn-stourmer eo euz rann-gredenn an Nazareaned. 6 Klasket e-neuz zoken disakra an Templ, ha neuze on-eus lakeet harz warnañ. 8 Te hello, da-unan, oh ober goulennou outañ, gweled eo gwir an oll rebechou a reom dezañ. 9 Ar Juzevien a gavas mad e gomzou hag a lavaras edo an traou evel-se.

Prezegenn Paol dirag ar gouarnour

10 Ar gouarnour, gand eur zin, a bedas Paol da gaozeal. Paol a lavaras : « Goud a ouzon e lakeez ar justis da ren en or bro abaoe kalz a vloaveziou a zo. A galon vad eta ez an d’en em zidamall. 11 Ez eo dit her gouzoud, n’eus ket ouspenn daouzeg devez abaoe m’on pignet da Jeruzalem, evid adori. 12 Ha, nag en Templ, nag er zinagogou, nag e kêr n’e-neus kavet den ahanon o tabutal gand unan pe unan pe o lakaad freuz e-touez an dud. 13 An dud-mañ n’int ket gouest, tamm ebed, da ziskouez eo gwir an tamallou a reont din bremañ. 14 Setu amañ ar pez a anzavañ dit : e servich Doue on tadou emaon hervez an Hent a zo, diouz o zoñj dezo, eur rann-gredenn. Me ’gred e kement a zo skrivet el Lezenn hag er Brofeded. 15 An esperañs-mañ am-eus e Doue, hag ar re-mañ ivez a hortoz kemend-all, e vo eun adsao da veo evid ar re just hag evid ar beherien, 16 ha setu perag e klaskan, me ivez, delher dalhmad va houstiañs direbech dirag Doue ha dirag an dud. 17 Deuet e oan en-dro goude kalz a vloaveziou da zegas aluzennou ha provou da dud va bro, 18 Neuze eo e oen kavet en Templ e dibenn va glanidigez, n’oa nag engroez, na freuz... 19 Eun nebeud Juzevien euz an Azia hebken... Ar re-ze eo a dlefe beza deuet dirazout evid tamall ahanon, m’o-doa da vianna eun dra bennag da rebech din. 20 Pe neuze, n’o-deus ar re-mañ nemed lavared peseurt taol fall o-deus kavet pa oen galvet dirag ar sanedrin, 21 daoust hag e ve kement-mañ, am-boa youhet euz va zav en o-zouez : « ablamour da adsao ar re varo eo e teuan hirio dirazoh evid beza barnet ? » 22 Felisius hag a ouie mad-tre kement a zell ouz an Hent a apellas : « Me varno an dra-mañ, emezañ, pa vo diskennet amañ ar homandant Lisias ». 23 Urz a roas d’ar hantener da zelher Paol er prizon, med da veza mad outañ heb mired ouz hini ebed euz e dud da renta servich dezañ.

Paol er prizon

24 Eun nebeud deveziou goudeze, Felisius en em gavas asamblez gand Druzilla e bried, eur Juzevez anezi. Gelver a reas davetañ Paol, hag e selaouas anezañ : o komz euz ar feiz er Hrist Jezuz. 25 Med o veza ma troe o divizou war-zu ar justis, ar gwall youlou da reiza hag ar varnedigez da zond, Felisius, kroget aon ennañ, a lavaras da Baol : « Evid an dro-mañ en em denn kuit, me da halvo a-nevez eun dro all. » 26 Kendelher a ree koulskoude da esperoud e rofe Paol arhant dezañ, ha setu perag e lakee anezañ da zond d’e weled, aliez awalh zoken. 27 Daou vloaz goudeze, war-lerh Felisius e teuas Portius Festus hag hemañ, c’hoant dezañ plijoud d’ar Juzevien, a lezas Paol er prizon.

Paol dirag Festus. Apell da Zezar

XXV 1 Tri devez goude beza degouezet en e rann-vro, e pignas Festus euz Sezarea da Jeruzalem. 2 Ar veleien vraz ha pennou braz ar Juzevien a zeuas dirazañ da zougen klemm a-eneb Paol. 3 Dre drubardèrez e pedont hag e houlennont e-nefe ar vadelez da zegas Paol da Jeruzalem, med e gwirionez o zoñj a oa evel-se kavoud tro da ober eur gwall daol evid e laza e-pad e veach. 4 Festus a-vad a respontas eo e Sezarea edo Paol er prizon, hag ouspenn, n’eus forz penaoz, eñ a oa war-nez kuitaad. 5 « Ar re ahanoh eta, emezañ c’hoaz, hag o-defe da weled war gement-se, n’o-deus nemed diskenn asamblez ganin da Zezarea, ha ma ’z eus en den-se tra-pe-dra ha na vefe ket eeun, dezo da zougen klemm a-eneb dezañ ».

6 Festus ne jomas ket ganto ouspenn eun eiz pe zeg devez. Eur wech diskennet da Zezarea, ez eas, antronoz, d’al lézvarn hag e roas urz da zegas Paol. 7 Pa oe erruet Paol, ar Juzevien, diskennet euz Jeruzalem, en-dro dezañ, a reas dezañ eur bern tamallou grevuz, med n’oa anezo nemed tamallou goullo. 8 Paol a gendalhe d’en em zivenn : « N’am-eus greet torfed ebed, nag a-eneb Lezenn ar Juzevien, nag a-eneb an Templ, nag a-eneb an Impalaer ». 9 Gand ar c’hoant da veza deuet mad d’ar Juzevien, Festus a ginnigas kement-mañ da Baol : « A-du emaout da zevel da Jeruzalem evid ma vo barnet da brozez eno dirazon ? » 10 Med Paol a respontas : « Dirag lézvarn an impalaer emaon, aze eta eo e tlean beza barnet. Ar Juzevien, n’am-eus greet droug ebed dezo, her gouzoud a rez da-unan. 11 Ma ’z on kabluz e gwirionez, m’am-eus greet eun torfed bennag, din a varo, ne fell ket din tehed rag ar maro, med ma n’ez-euz nemed tamallou goullo gand ar re-mañ, n’e-neus den gwir d’am lakaad etre o daouarn. Ober a ran galv d’an Impalaer. 12 Festus a houlennas neuze o ali digand e guzulerien hag a respontas : « Greet az-peus galv d’an Impalaer, mond a ri dirag an Impalaer ».

Paol dirag Agripa

13 Eun nebeud deveziou goudeze, ar roue Agrippa ha Berenis, deuet da zaludi Festus, a zegouezas e Sezarea. 14 Ha peogwir e taleent eno eur pennad, Festus a gomzas d’ar roue diwar-benn Paol. « Amañ, emezañ, ez-eus eun den bet dalhet er prizon gand Felisius. 15 E-pad m’edon e Jeruzalem, ar veleien vraz ha kozidi ar Juzevien a zo deuet d’am havoud da zougenn klemm a-eneb dezañ ha goulenn ma ve kondaonet. 16 Respontet am-eus dezo n’oa ket kustum ar Romaned da rei eun den tamallet heb na vefe bet lakeet dirag e damallerien ha roet tro dezañ d’en em zivenn a-eneb an tamallou greet dezañ. 17 En em gavet int eta amañ, hag heb dale tamm, antronoz end-eeun, am-eus kemeret plas el lézvarn ha roet urz da zegas an den-se. 18 Pa oant bodet en-dro dezañ, an damallerien n’o-deus kavet da damall dezañ netra euz an traou grevuz edon o hortoz. 19 N’o-doa da rebech dezañ, n’ouzon ket petra diwar-benn o hredennou dezo ha dreist oll diwar-benn eun den anvet Jezuz hag a zo maro, med hervez Paol a zo beo atao. 20 O veza ma ne ouien ket penaoz dirouestla ar gudenn-se, am-eus kinniget dezañ mond da Jeruzalem evid beza barnet eno war gement-se, 21 Med Paol e-neus greet galv da varnedigez e veurded an Impalaer, ha me am-eus roet urz d’e zelher er prizon beteg ma vo kaset dirag an Impalaer ». 22 Neuze e lavaras Agripa da Festus : « Me am-eus c’hoant d’am zro kleved an den-se ». « Kerkent ha warhoaz e klevi anezañ », a oe respontet dezañ.

23 Antronoz e tegouezas Agripa ha Berenis, digoradur ganto ; antreal a rejont e sal al lézvarn, ganto ofiserien euz ar re uhella ha pennou braz kêr. Festus a roas urz da zegas Paol hag hemañ a oe degaset. 24 Festus a lavaras : « Roue Agripa, ha c’hwi oll hag a zo ganeom, gweled a rit an den-mañ ; pobl Israel a-bez a zo deuet d’am gweled diwar e benn, e Jeruzalem ha beteg amañ, en eur grial ne helled ket e lezel da veva pelloh. 25 Evidon-me, n’am-eus kavet er pez e-neus greet netra evid e varn d’ar maro, med peogwir n’am-eus netra resis da skriva diwar e benn d’ar mestr meur, am-eus e zegaset : dirazoh, dirazout-te dreist-oll, roue Agripa, evid ma hellin skriva dezañ war-lerh ar breudou-mañ. 27 Diskiant e ve, d’am zoñj din, kas eur prizonier heb na ve diskleriet an tamallou greet dezañ.

Prezegenn Paol dirag Agripa

XXVI 1 Agripa a lavaras da Baol : « Aotre az-peus da zivenn da gaoz ». 2 Neuze Paol a astennas e zorn hag evid en em zivenn a lavaras : « Eüruz on, Roue Agripa, da gaoud tro hirio d’en em zivenn dirazout euz an oll damallou 3 savet a-eneb din gand ar Juzevien, rag te a anavez mad o boazamañchou ha kement a zo leh a dabut etrezo. Bez eta ar vadelez d’am zelaou gand pasianted. 4 Azaleg va yaouankiz, al lodenn genta euz va buez, am-eus tremenet e Jeruzalem, e-touez tud va bro, an oll Juzevien a anavez anezi. 5 Abaoe pell ’zo e ouzont hag e hellont rei testeni a gement-se, da vianna ma fell dezo, am-eus bevet hervez ar pez strisa euz or relijion, e-giz farizian, 6 ha bremañ on degaset dirag al lézvarn, en abeg m’am-eus esperañs er bromesa greet gand Doue d’on tadou, 7 ar bromesa ema heb ehan, noz-deiz, dre o fedennou, an daouzeg meuriad, o hortoz ma vefe sevenet. En abeg d’an Esperañs-se eo, o Roue, ez on tamallet gand ar Juzevien. 8 Perag e soñjer en ho touez n’heller ket kredi e teu Doue da adsevel ar re varo ?

9 Evidon-me, a grede din, oa va dever stourm ar pez ma hellen ouz ano Jezuz an Nazarean. 10 Hag an dra-ze eo am-eus greet e Jeruzalem ; me va-unan am-eus taolet er prizon eun niver braz a zent, dre ar galloud roet din gand ar veleien vraz, hag am-eus roet va mouez evid o has d’ar maro. 11 En eur vond dre an oll zinagogou, ne ehanen ket da vernia warno kastiz war gastiz, evid o lakaad da vallozi, hag e va gwasa kounnar e reden war o lerh beteg ar hêriou estren. 12 Eun deiz edon war hent Damas, peb galloud ha peb kemennadurez am-boa bet digand ar veleien vraz ; 13 en hent edon, o Roue, pa welis o tond euz an Neñv, skedusoh eged an heol eur sklerijenn hag a hronnas ahanon-me hag ar re a ree hent ganin. 14 Oll ez-om kouezet d’an douar hag e klevis eur vouez o lavared din : « Saul ! Saul ! Perag e teuez d’am heskina ? Kalet eo dit rebarbi ouz ar broud. » 15 « Piou out, Aotrou ? » eme-ve. Hag an Aotrou a-nevez : « Jezuz on, me eo a heskinez ; 16 sav dres war da dreid, sed-amañ perag am-eus en em ziskouezet dit : te a zervicho da dest euz ar weledigez ahanon emaout o paouez kaoud hag euz ar re all az-pezo c’hoaz. 17 Da ziwall a ran dija diouz ar bobl ha diouz ar bayaned. War-zu enno eo e kasan ahanout 18 evid digeri dezo o daoulagad, o distrei euz an deñvalijenn d’ar sklerijenn, euz galloud Satan da Zoue, evid m’o dezo ar pardon euz o fehejou ha perz en hêrez gand ar zent dre ar feiz ennon. »

19 Azaleg neuze n’on ket bet difiziuz ouz ar weledigez-se deuet euz an Neñv. 20 Er hontrol eo, prezeget am-eus da genta da dud Damas ha da dud Jeruzalem, e bro Judea a-bez, ha goudeze d’ar poblou payan am-eus roet da anaoud e oa red dezo cheñch buez hag en em drei ouz Doue, en eur jeñch an oberou. 21 Kement-se eo ar penn-kaoz m’o-deus ar Juzevien kroget ennon, pa edon en Templ, ha klasket va laza. 22 Gand nerz Doue ouz va diwalL beteg henn e kendalhan eta da rei testeni dirag ar re vian hag ar re vraz. Ar brofeded ha Moizez o-doa diouganet ar pez a dlee erruoud ; ne lavaran ket muioh. 23 Ar Hrist e-neus gouzañvet, hag eñ, ar henta da veza savet a-douez ar re varo, a dlee embann ar sklerijenn d’ar Bobl ha d’ar bayaned. »

24 Aze e oa degouezet Paol gand e brezegenn pa lavaras Festus a vouez kreñv : « Na te a zo diskiant, Paol, gand da oll zeskadurez emaout o koll da benn. » 25 « N’on ket diskiant, Festus enoruz », eme Baol, « da gleved e roan komzou a wirionez hag a skiant vad. 26 Ar roue emaon o komz outañ gand hardisegez a anavez mad, a-dra-zur, an traou-se hag e kredan stard ne jom netra dianav evitañ, rag n’eo ket en eur horn douar bennag kuz ha distro eo bet degouezet an traou-se. 27 Ha kredi a rez er brofeded, roue Agripa ? Me oar e kredez enno. » 28 Neuze e lavaras Agripa da Baol : « C’hoaz eun nebeud hag e ri din da gredi az-peus greet eur hristen. » 29 « C’hoaz eun nebeud pe galz », eme Baol, « plijet gand Doue e teufes, n’eo ket te hebken med ar re oll a zo hirio ouz va zelaou heñvel poch ouzin-me,...heb ar jadennou a zougan ! » 30 Ar roue a zavas hag ivez ar gouarnour ha Berenis hag ar re o oa azezet en-dro dezo. 31 En eur guitaad, e komzent kenetrezo : « An den-se », emezo, « ne ra netra din a varo pe a jadennou. » 32 Agripa neuze da Festus : « An den-se a vije gellet frankiza paneved m’e-neus greet galv d’an Impalaer. »

En hent da vond da Rom

XXVII 1 Goude ma oe bet divizet on lestra evid mond d’an Italia, e oe fiziet Paol hag eun nebeud prizonidi all en eur hantener anvet Julius euz kohortenn Aogusta. 2 Pignet om neuze e bourz eul lestr euz Adramision war-nez loh da vond war-zu aochou an Azia, hag ez om eet er mor. Bez’ ez oa ganeom eur Makedonian euz Tesalonika, Aristark e ano. 3 Antronoz, e-pad eun ehan e Sidon, Julius, hag a oa hegarad e-keñver Paol, a roas aotre dezañ da vond da weled e vignoned ha da gaoud sikour diganto. 4 Ahano, eet er mor adarre, on-eus greet hent e gwasked enezenn Chipr, rag avel a-eneb or-boa. 5 Neuze e treuzjom ar mor a sko war ar Silisia hag ar Pamfilia, hag on-eus dilestret e Mir, el Lisia. 6 Ar hantener a gavas eno eul lestr euz Aleksandria a oa o vond d’an Italia hag a lakeas ahanom da zevel er bourz. 7 E-pad eun nebeud deveziou ez ejom gouestadig, ha n’eo ket heb poan e tegouezjom dirag Knid, hag o veza m’or boa avel a-benn on-eus tremenet izelloh eged enez Kreta, troet war-zu ar beg douar Salmone 8 ha p’or-boa tremenet dirazañ e tegouezjom en eul leh anvet Porziou-mad tost da gêr Lasaia.

9 Med eur pennad mad a amzer a oa tremenet ; mond er mor a zeue bremañ da veza riskluz, peogwir oa tremenet amzer ar yun. Paol a c’hoanteas lavared e zoñj : 10 « Mignoned, emezañ dezo, kavoud a ra din e tegouezo gaou braz o vond er mor, ha n’eo ket hebken gand al lestr hag al lestrad, med ivez ganeom-ni. 11 Ar hantener, koulskoude, e-noa muioh a fiziañs er habitenn hag e kannad ar paramantour eged er pez a gemenne Paol. 12 Ha peogwir n’oa ket ar porz euz ar re wella evid goañvi, an darn vrasa a oa a-du da zistrei er mor, gweled e vefe hag e hellfed tizoud Feniz, eur porz euz enez Kreta troet d’ar mervent ha d’ar walarn, ha goañvi eno.

Ar wall amzer

13 Eun êzennig a oa savet da c’hweza euz ar hreizteiz hag e soñje dezo e hellfent dond a-benn da zeveni o mennad ; an eor a oe savet hag e klaskjont mond a-hed aochou enez Greta. 14 Med raktal, koulz lavared, e tirollas warno, o tond euz an enezenn, eur gorventenn, an hini a anver « Eurakillon ». 15 Al lestr a yeas gand an avel, heb gelloud herzel outi, hag o lezel da vond ez eem gand red ar mor. 16 Gand tiz e tremenjom en izel d’eun enezennig anvet Klaoda, gellet on-eus koulskoude gand poan suja ar vagig. 17 P’or-boa savet anezi e rajom ar pez a hellem gand ar pez or-boa : kelhia al lestr gand kerdin, ha gand aon da vond da ober peñse war ar Sirtenn, lezel da gas an eor neuñv hag on-eus kendalhet evel-se da vond gand red ar mor. 18 Antronoz peogwir e kendalhem da veza gwall hejet gand ar wall-amzer e oe taolet fred er-mêz. 19 Ha d’an trede deiz, ar vartoloded gand o daouarn o-unan a ziskaras ar herdin. 20 Abaoe meur a zevez ne veze gwelet nag heol, na steredenn. Ar gorventenn a bade ken gwaz ha biskoaz. Kollet or-boa peb fiziañs da veza saveteet. 21 N’or-boa debret netra, pell a oa, pa zeuas Paol en e zav en o zouez da lavared dezo : « Gweled a rit, va mignoned, red e vefe bet deoh va zelaou : chom en enez Kreta kuit da gaoud ar gaou hag ar hollou on-eus bet. 22 Med bremañ e pedan ahanoh da jom kaloneg, rag hini ebed ahanoh ne gollo amañ e vuez, al lestr hebken a vo kollet ; 23 en noz-mañ, end-eeun, eun êl d’an Aotrou, an hini a zervichan a zo deuet dirazon, 24 hag e-neus lavaret din : « bez dienkrez, Paol, mond dirag an Impalaer a rankez ha Doue a ro dit dre hraz ivez buez ar re oll a zo war vor ganit ». 25 Bezit kaloneg eta, mignoned, fiziañs am-eus e Doue, an traou a yelo evel m’eo bet lavaret din ». 26 Steki a rankom war eun enezenn.

27 D’ar pevarzegved nozvez, ha ni kaset ha degaset gand youl ar mor Adriantel, war-dro hanter-noz, ar vartoloded a zeuas douetañs dezo, edom o tostaad ouz an douar en eun tu bennag ; 28 teurel a rejont ar zond hag e kavjont ugent gourhedad ; eet eun tammig pelloh e sondjont adarre hag e kavjont pemzeg, 29 Gand aon da veza taolet war eur garreg bennag e taoljont er mor peder eor ar penn-adreñv ; mall braz o-doa da weled an deiz o tond. 30 Med, war zigarez delher al lestr war an eoriou a-raog, ar vartoloded a glaske tehed euz al lestr hag a lakee ar vagig er mor. 31 Paol a lavaras neuze d’ar hantener ha d’ar zoudarded : « Ma ne jom ket an dud-se er bourz, c’hwi ne helloh ket beza saveteet. » 32 Neuze ar zoudarded o deus trohet kerdin ar vagig ha lezet anezi da vond. 33 Da hortoz an deiz, Paol a alias an oll da zebri, « Setu, emezañ, ar pevarzegved devez m’emaoh en anken, war yun, 34 kredit ahanon, debrit bremañ, evid ho silvidigez eo an dra-ze. Eur wech c’hoaz, hini ebed ahanoh ne gollo eur vlevenn euz e benn. » 35 War gement-se e kemeras bara hag en em roas da zebri. 36 An oll neuze, deuet nerz kalon dezo adarre, a zebras d’o zro. 37 Daou hant c’hwezeg ha tri ugent a oa ahanom en oll er bourz 38 P’o-doa torret o naon ; evid skañvaad ar vag e oe taolet ar gwiniz er mor.

39 Pa oe deuet an deiz, ar vartoloded ne anavezjont ket an douar, med gweled a rejont eun aod gand eur riblennad trêz, hag e tivizjont ma ve posubl dezo mond da steki eno. 40 Neuze o-deus lezet an eoriou da vond dre ar penn-a-raog, endra ma oe distaget ereou ar sturiou a-dreñv. Sevel a rejont neuze ar mizan-ballouin hag o-deus skoet war-zu an aod. 41 Med steki a rejont en eun drêzenn, al lestr a jomas sanket eno, ar penn-a-raog speg en trêz, e-keid ha ma oe distammet an diadreñv gand an tonnou. 42 Ar zoudarded a deuas dezo ar zoñj da laza ar brizonidi, gand aon na zeufent da dehed war neuñv. 43 Med ar hantener, c’hoant dezañ savetei Paol, a viras outo da zeveni o mennad ; d’ar re a ouie neuñv e roas urz da lammed en dour da genta ha da vond en douar. 44 Ar re all her grafe war bleñch pe goatachou all euz ar vag. Hag evel-se eo e tegouezjont oll en douar yah ha dibistig.

Paol en enez Malt

XXVIII 1 Pa oem e savete, on-eus gouezet oa Malt ano an enezenn. 2 Tud ar vro a zo bet hegarad evidom, evel ral a gaver. Greet o-doa eun tan braz ha pedet ahanom da dostaad outañ, rag deuet oa ar glao da goueza ha yen oa an amzer. 3 Paol e-noa dastumed eur vriad keuneud sêh, hag edo o teurel ar heuneud en tan pa grogas en e zorn eun naer a oa tehet a-raog ar gwrez. 4 P’o-doa gwelet al loen-stlej a istribill ouz e zorn, tud ar vro a lavare kenetrezo : « Heb douetañs ebed an den-se a zo eun torfedour, saveteet eo bet euz ar mor, med justis Doue ne lez ket anezañ da veva. » 5 Paol avad a hejas an naer en tan ha n’e-noe diêzamant ebed. 6 Int-i a oa o hortoz gweled anezañ o koeñvi pe o koueza maro-mik ; med goude beza gortozet hir amzer ha gwelet ne zegoueze gantañ droug ebed, e cheñchjont soñj hag e lavarjont : « Eun Doue eo. »

7 Demdost ahano ez oa douarou a oa d’an den a renk uhella a oa en enezenn, e ano Publius ; on degemeret e-noa ha roet repu deom, en eun doare hegarad e-pad tri devez. 8 E dad a oa d’ar mare-se war e wele, klañv gand an derzienn hag ar red-korv. Paol a yeas d’e weled, ha dre ar bedenn hag oh astenn warnañ e zaouarn e pareas anezañ. 9 Goudeze e teuas beteg ennañ oll glanvourien all an enezenn hag e oent pareet ivez. 10 Enoriou a beb seurt o-deus greet deom ha pa oem eet adarre er mor, o-doa pourveet d’on ezommou.

Euz enezenn Malt da Rom

11 Tri miz diwezatoh eo ez om eet adarre er mor e bourz eul lestr euz Aleksandria, e arouez a oa an « Dioskoured », goañvet e-noa en enezenn. 12 Dilestr a rejom e Sirakouz, evid tri devez ehan. 13 Ahano, en eur vond a-héd bord an douar, eh errujom e Reggio. Antronoz e c’hwezas an avel euz ar su hag e daou zeveziad e tegouezjom e Pouzol. 14 Eno e kavjom breudeur a bedas ahanom da dremen eur zizunvez ganto. Setu aze penaoz ez om eet da Rom. 15 Euz ar gêr-se e teuas en arbenn deom, beteg forum Appius hag an deir davarn, ar vreudeur o-doa klevet ez oam degouezet. Ouz o gweled, Paol a rentas gloar da Zoue. Fiziañs a zeuas dezañ en-dro. 16 Pa oem en em gavet e Rom e oe roet aotre da Baol da jom en e di e-unan gand eur zoudard evid e ziwall. 17 Tri devez war-lerh e pedas ar pennou braz euz ar Juzevien da zond davetañ. Pa oent degouezet e lavaras dezo : « Va breudeur, me, daoust n’am-eus greet netra a-eneb ar bobl, nag a-eneb al lezennou deuet deom digand on Tadou, a zo er prizon abaoe m’on bet lakeet e Jeruzalem etre daouarn ar Romaned. 18 Goude beza greet goulennou ouzin, e felle dezo rei din va frankiz, o veza ma n’oa netra war va hont hag a veritfe ar maro. 19 Med peogwir edo ar Juzevien a-eneb din, am-eus ranket gelver an Impalaer da varner, n’eo ket avad m’am-befe bet difiziañs euz tud va bro ; 20 setu perag am-eus goulennet ho kweled ha komz ganeoh, rag ablamour da Esperañs Israel eo e tougan ar chadennou-mañ ». 21 « Evidom-ni, emezo dezañ, n’on-eus resevet lizer ebed euz bro Judea diwar da benn ; hini ebed euz ar vreudeur a zegoueze amañ n’e-neus komzet deom euz eur skrid pe eur helou bennag a vefe fall evidout. 22 Med goulenn a reom a-vad klevoud ahanout o tisplega, te, da-unan, ar pez a zo en da zoñj, rag evid ar pez a zell ouz da dreuz-kredenn, ni a oar e kav avel a-benn dirazi e peb leh ».

23 Deiziet e oe ar vodadenn, hag e teujont niverusoh c’hoaz d’al leh m’edo o loja. Dre e gomzou e rente testeni da rouantelez Doue, hag euz ar mintin beteg an noz e klaskas o degas d’ar feiz en eur gomz euz Jezuz azaleg lezenn Voizez hag ar brofeded. 24 Lod a oe desevet gand ar pez a lavare, lod all ne felle ket dezo kredi. 25 Pa zeuas ar mare dezo da vond kuit, n’oant ket deuet c’hoaz d’en em gleved Paol ne lavaras netra muioh, nemed an dra-mañ : « Pegen gwir eo komzou ar Spered Santel pa lavare d’on Tadou dre ar profed Izaias :

26 Kee da gavoud ar bobl-se ha lavar dezi :
Kaer ho-po kleved, ne intentoh ket
Kaer ho-po selled, ne weloh ket
27 Rag kaledet eo kalon an dud er vro-se,
Pounner-glev int deuet da veza,
Mouchet o-deus o daoulagad,
Evid chom heb gweled gand o daoulagad
Heb kleved gand o diskouarn
Heb intent gand o halon
Heb trei ouz Doue,
Ha me a roio dezo ar pare. »

28 Red eo deoh gouzoud eo d’ar bayaned eo bet kaset ar zilvidigez. Int-i a zelaouo 29 Diwar ar C’homzou-ze, ez a ar Juzevien kuit, en eur rendael etrezo. 30 E-pad daou vloaz penn-da-benn e vevas Paol evel-se, diwar e goust e-unan hag e roe degemer da gement-hini a zeue d’e gavoud. 31 Embann a ree rouantelez Doue, gand hardisegez ha gand frankiz e kelenne kement a zelle ouz Jezuz Krist an Aotrou.

 

Oberou Ebestel | Pennad-kinnig | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28