Eskopti Kemper ha Leon RETERADURIOU 2012-2016

Eskopti Kemper ha Leon RETERADURIOU 2012-2016

« Kerzit ! Ho kas a ran ! »
Embann an aviel gand fiziañs

gand an Aotrou ’n Eskob Jean-Marie Le Vert (2007-2015)



“Ar peoc’h ra vezo ganeoc’h ! Evel ma’z on bet kaset gant an Tad, me ivez a gas ahanoc’h… Resevit ar Spered Santel” (Yann 20,21-22). Distaget eo bet ar c’homzou-se gant Hor Salver Jezus p’en em ziskouezas evit ar wech kenta war-lerc’h e Adsao : embannet e vezont da zeiz gouel ar Pantekost. Bez’ez int eun diverra eus ar pez eo galvet an oll gristenien da veza a-hed an oll amzer. Hirio an deiz, e resevomp anezo evel eur galv da zigemer an donezon-se eus ar Spered Santel, ha d’en em roi da veza kaset gant Hor Salver evid embann an Aviel war e lerc’h.

Télécharger les pièces jointes :



Reteraduriou 2012.2016cDiwar an embann-se eus an Aviel, e teu en Iliz unaniez ha levenez d’an dud. N’eo ket eul levenez diwar-c’horre ha berrbad, med eul levenez don na c’hell beza roet nemed gant Doue e-unan, eul levenez leun-barr (gw. 1 Yann 1,4), eul levenez o tifl uka eus an asur ma vezer ema gant Hor Salver Jezus hebken komzou ar vuhez peurbadus (gw. Yann 6,68). Dont a ra hol levenez eus an esperañs skuilhet en hor c’halon gant ar Spered Santel.
Beza kaset gant Hor Salver : e kement-se ema an eienenn eus ar pez a ginnigan deoc’h evid ar bloaveziou o tont.

 

War-lerc’h MISION 2012

5 Reteradur…
• …evid beva da heul Hor Salver hag evid kemer kalon da embann an Aviel en hon amzer !
• …en eur lakaad da greski ar garantez etre breudeur.
• …o kas war-raog an teir c’harg a zo a-ouenn eus buhez an iliz : aviela, santellaad, servicha.

Ouz piou e sell kement-se ?
• Ouz oll gatoliked eskopti Kemper ha Leon…
• …en o c’harg goude-se mont war-zu ar re a zo pelloc’h diouz ar feiz.

War hed pegeid amzer ?
• 2012-2015 : 3 bloaz evid lakaad peb tra en hent
• 2015-2016 : eur bloavez-eskopti evid trugarekaad, dindan lagad madelezus ar werc’hez Vari,
• da veza kendalc’het goude-se, rag tenn a ra ar reteraduriou da lod eus diazezou penna ar feiz.

Rank hor frankiz hag hor bolontez kemer perz : ahanomp-ni e tepant ma vo lakaet ar reteraduriou-se da dalvezoud ! Lakaad a ran anezo etre ho taouarn, diwar ar garg a abostol bet roet din pa’z on deuet da veza hoc’h eskob.
Emaoc’h o vont da reseo eun nerz, hini ar Spered Santel a ziskenno warnoc’h” (Oberou an Ebestel 1, 8). Mignoned ker, evel da zeiz ar Pantekost, e talc’h Spered Hor Salver da skuilha e zonezonou war an Iliz, evid ma vezimp kaset beteg ar wirionez en he fez. Ar memes Spered Santel eo a zigor deomp dor ar Skritur Sakr, hag ar ra ahanomp “kannaded” (a c’heller kaoud kred enno) eus Komzou ar Silvidigez (gw. 2 Korintidi 5, 20). Seul vui ma vezimp aketus da selaou Komzou Doue, seul welloc’h e c’hellimp gweled ema Mister ar Pantekost oc’h en em ziskouez hirio an deiz ivez e Iliz an Aotrou Doue, ha seul gwelloc’h a-se e c’hellimp beza kannaded a gement-se.
Greomp anaoudegez gant al levenez c’hweg ha frealzus a zeu d’an hini a embann an Aviel, evel sant Yann-Vazedour, an ebestel sant Pêr ha sant Paol, hag an ebestel all, hag an avielerien en em gavet e-leiz anezo, an eil re war-lerc’h ar re all a-hed istor an Iliz, en o zouez ar re deuet en hor Penn-Ar-Bed-ni amañ. Reketi a ran ma vo an embann-se levenez vras buhez peb hini ahanomp, e-kreiz ar bed hag en amzer m’emaomp enno, eur bed o klask eun dalvoudegez d’ar vuhez, gwech en anken, gwech en esperañs.
“Hag emaon-me ganeoc’h bemdez, beteg fin ar bed” (Maze 28, 20).

+ Yann-Vari Le Vert
Eskob Kemper ha Leon


1. Lakaad da ziwan breuriezigou kristen

“Pa vez daou pe dri bodet em ano, e vezan-me en o c’hreiz” (Maze 18, 20)
“Red eo d’ar re a zo e penn an traou war an dachenn mont a-du gant ar c’humuniezou bihan a Iliz eus an diaz, a vez greet anezo c’hoaz kumuniezou a vuhez, ma vo roet an tu d’an dud fidel a vo enno da gemenn kenetrezo Komzou Doue, ha da gas da benn oberou ar garantez ; bez’ ez eo ar breuriezou-se gwir zoareou da roi da anaoud an unaniez a Iliz ; bez’ ez int c’hoaz kalonou a avieladur, ereet a-unan gant o fastored” (Yann-Baol II, lizer-aspedi a abostol Laiked fidel ar C’hrist, niv. 26).

Goulenn a ran digant katoliked eskopti Kemper ha Leon sevel “Breuriezigou kristen”.
Bez’ e vo o c’harg selaou ha lodenna Komzou Doue ; pedi hag en em startaad er feiz kenetrezo ; roi sikour vad d’o nesa ha beza war evez evid kement-se. Testou e vezint eus eun Iliz digor he c’halon, ha tost da dud ar bed. Bez’ e vezint ereet kenetrezo dre liamm ar garantez, dreist-oll pa ’n em gavint asambles en iliz evid oferenn ar sul.
Er breuriezou e vo kavet tud a-unanou pe familhou, gwriziennet en eun dachennad, eur barrez da skwer, pe eur c’harter eus eur gêr, pe c’hoaz staget ouz eun emzao kristen pe eur gumuniez nevez.

2. Servicha er garantez : Diagoniez 2013

“Naon am-boa, hag ho-peus roet din da zebri ; sec’hed am-boa, hag ho-peus roet din da eva ; eun estrañjour e oan, hag ho-peus digemeret ahanon ; en noaz e oan, hag ho-peus lakaet dilhad en-dro din ; klañv e oan, hag oc’h deuet d’am gweled ; en toull e oan, hag ez oc’h deuet beteg ennon… Bewech m’ho-peus greet kement-se da unan eus ar re vihan-mañ, hag a zo breudeur din, din-me eo ho-peus her greet” (Maze 25, 36-43).

“Bez ’ez eo ar Garantez (evid an Iliz) eun doare-beza o tont eus he fenn-natur dezi hec’h-unan, ha ne c’hell ket troi kein dezi” (Benead XVI, Kelc’hlizer Doue zo Karantez, niv. 25).

• Goulenn a ran digant katoliked eskopti Kemper ha Leon ma kemerint poan, en o c’humuniez a Iliz, hag en eun doare efedus, o renta servij e oberou ar Garantez hag ar c’hengred. Dirag an dud paour a stumm nevez, dirag kement a dud gwan, ne c’heller ket lezel gant eun dornadig kristenien hebken ar garg da gas en-dro ar servij-se : bez ’ez eo hemañ eun dever evid an oll re a zo badezet ; bez ’ez eo ar servij-se eur merk, hag unan eus an troc’h kenta, eus buhez ar c’humuniezou kristen.

• Goulenn a ran ma vo savet eun “diagoniez” e peb deanelez. En he c’harg e vo kenurzia an oll oberou a garantez oc’h ober war-dro “an dud gloazet eus ar vuhez”, war-dro ar re reuzeudika, ar re zisterra. En he c’harg e vo c’hoaz kinnig oberou nevez diouz ma vo ezomm en he c’hornad, an oberou nevez-se o veza lod eus ar vuhez pastorel ordinal. Hi eo c’hoaz a zigoro kalon ar re a zo e karg eus ar bastorelez, evid ma vo an oll prederiet gant ar servij-se a vreudeur. Pa vo lakaet da ziwan kinnigadennou da geñver “Diagoniez 2013”, e klasko an diagoniezou lec’hel ober o mad anezo.

3. Digemer Sened-meur Vatikan II

“Nag a binvidigeziou bet roet deomp gant ar Sened-Meur Vatikan II en e reteraduriou ! […] Beb ma ’z a ar bloaveziou e-biou, ne goll ar skridou-se netra eus o zalvoudegez, nag eus o sked” (Yann-Baol II, Lizer a abostol E penn kenta ar milved nevez, niv. 57).

• Goulenn a ran ma vo lennet gant katoliked eskopti Kemper ha Leon, ha dreist-oll gant ar yaouankizou, skridou ar Sened-Meur Vatikan II, ha ma raint o mad anezo.
Hanter-kant vloaz zo, ez eo bet ar Sened-Meur-se eun digouezadenn dispar ; chom a ra, hirio an deiz, eur reteradur divrall evid buhez ha karg an Iliz. Bez ’e tleomp neuze derc’hel da denna gounid eus e frouez, eus al lañs roet gantañ, eus ar c’hras a zo anezañ.

• War eur dachenn ledannoc’h, reketiñ a ran e klasko an oll dud fidel kompren gwelloc’h bouedenn ar feiz katolik, evid mad o buhez kristen dezo o-unan, hag evid an testeni o-deus da roi en-dro dezo.

4. Beva en deanelez

“Aketus en em ziskoueze beza [kenta diskibien Jezus] da selaou kelennadurez en Ebestel, fidel d’ar garantez etre breudeur, da ranna ar bara, ha da bedi. […] An oll dud a feiz war-eun-dro e oa o feadra boutin kenetrezo […] mont a raent aketus d’an Templ hag e rannent ar bara […]. Meuli a raent Doue […] Ha bemdez e lakae Hor Salver Jezus diskibien nevez d’en em staga ouz kumuniez ar re a oa da veza salvet” (Oberou an Ebestel 2, 42-47).

Goulenn a ran digant ar bastored hag ar skipailhou pastorel ma vo kavet, e peb deanelez, meur a lec’h dibabet piz, ma vo lavaret, beb sul, oferenn ar sul, d’eun eur merket piz, ha pa vefe an oferenn-se evid meur a barrez.
Evid ma vo êsaet d’an oll kaoud an oferenn-sul, e c’halvan an oll dud fidel katolik a c’hell henn ober, da ginnig o skoazell d’ar re eo diês dezo diblas, ma vo roet an tu d’an oll evel-se da vont d’al lec’h ma ’z eus eun oferenn.

• Evid lakaad an Iliz da veza tostoc’h d’an oll, ha gwelloc’h anavezet gant an oll, e c’houlennan digant katoliked kement parrez ha kement karter a zo, ma vo buhezekoc’h o ilizou, en eur ober abadennou-pedi a-lies, anezo o-unan : kement-mañ d’eun deiz merket, war ar pemdez ha n’eo ket d’ar sul, ha d’an nebeuta eur wech da euriou na vezont ket euriou labour, ma c’hello evel-se dont da bedi ar muia ar gwella a dud.

• Goulenn a ran digant an eil re hag ar re all e karg eus ar bastorelez lakaad war-zao eur framm nevez e-keñver peb deanelez, evid ma vo al labour pastorel kaset en-dro muioc’h a-unvan.

• Goulenn a ran ma kemero perz katoliked an eskopti e oberou o c’humuniez a Iliz, ma vo buhezekoc’h houmañ, ha kement-se diouz ar pez a c’hellont ober, ha diouz o c’harismou.

5. Aviela dre ar gomz ha dre an ober, e kreiz ar bed

“Lavared a reas Jezus dezo ar c’homzou-mañ : “Roet eo bet din peb galloud e neñv ha war an douar. It eta, eus an oll vroadou grit diskibien, o vadezi anezo en ano an Tad, hag ar Mab, hag ar Spered-Santel, hag o teski dezo mired va oll c’hourc’hemennou. Ha setu emaon-me ganeoc’h-c’hwi da virviken, beteg fin ar bed” ” (Maze 28, 18-20).

“Hirio an deiz, muioc’h eged biskoaz, ez eo red da beb kristen kaoud eur spered misioner… Red eo kaoud testou nerzus, enno buhez nevez ar C’hrist, ken tud a-unanou, ken kumuniezou en eun ollad […] Aze ema ar brasa dalc’h, evid pez a sell ouz an Iliz en Europ, er milved nevez-mañ o tigori” (Yann-Baol II, Lizer-aspedi a abostol goude-sened An Iliz en Europ, niv. 49).

• Goulenn a ran digant katoliked eskopti Kemper ha Leon ma lakint don en o spered, pe donnoc’h c’hoaz, ema e karg peb hini anezo embann frêz ha splann an Aviel d’ar re en em gavont ganto, ha dreist peb tra, d’ar re a zo an tosta dezo.
Pedi a ran anezo ivez da lakaad da ziskenn en o c’hreiz kement a denn d’an avieladur nevez, ma vo lakaet an dud d’ober anaoudegez gant Hor Salver Jezus, eñ hag a zo “an Hent, ar Wirionez hag ar Vuhez” evid an oll dud.

• Goulenn a ran c’hoaz digant ar bersoned hag ar skipailhou pastorel roi lusk war daou du : da genta, sikour ar gristenien, ar re yaouank dreist-oll hag ar re hag a sant emaint o-unan evel tud a feiz “e-kreiz ar bed”, o sikour eta da veva gwelloc’h o c’harg a destou d’Hor Salver ; da eil, sevel mennadou evid embann frêz an Aviel, war gement tachenn a zo eus ar bastorelez.



Aotrou Doue hon Tad,
ahanoc’h e teu kement trugarez ha kement mad er bed-mañ.
Ho trugarekaad a reomp abalamour d’ar garantez ho-peus evid peb hini, hag evid ar Silvidigez a ginnigit d’an oll.

Kaset ho-peus beteg ennomp Ho Mab Jezus evel Salver nemetañ, evid sacha ahanomp warzu Ennoc’h.
Kaset omp gantañ bremañ da embann an Aviel !
Evel da zeiz ar Pantekost, skuilhit warnomp ar Spered a Wirionez hag a Beoc’h.
Ra ne vo lamet biken diganeomp E c’halloud a Frealzidigez !
Ra vo digaledet gantañ kement a zo reud, adtommet kement a zo yen, hag eeünet kement a zo kamm.

Grit eus Hoc’h Iliz ar sin o tiskouez ez oc’h beo e-kreiz ar bed hag o kared anezañ,
gant Tan tomm-bero Ho fealded.
Ra vo Hoc’h Iliz evid an oll, amañ e Penn-Ar-Bed, eur galon o pedi hag eur vammenn a garantez etre breudeur,
eur c’houlaouenn evid ar re a zo o klask Ahanoc’h en noz m’emaint enni,
eun Iliz laouen o veuli, o ranna, o servij,
eun unvaniez a garantez renevezet dalc’hmad.

Lakaad a reomp etre Ho taouarn an tachennou-labour digoret dirazomp
evid beza an avielerien kaloneg e-neus ar bed ezomm anezo.
Roit deomp plijadur an ene o pedi hag o veza maget gant ho Komzou santel.
Lakit ahanomp d’ober eun anaoudegez don gant gras hor badeziant,
ha da gredi pegen bras eo Ho kalloud o tont war sikour hor sempladurez.
Lakit ahanomp da gompren ar pez a c’houlennit diganeomp
evid beza testou leal eus Ho karantez en hon amzer.
Lakit ahanomp da deurel evez ouz ar re a zo en-dro deomp,
ha tost d’ar re a zo dindan ar bec’h, er glac’har, en dienez.
Grit ahanomp tud prest atao evid servij Hoc’h Iliz.
Roit deomp beleien, diagoned, paotred ha merc’hed gouestlet deoc’h,
an oll anezo o tigas deomp da soñj dalc’hmad eus an donezon a garantez m’eo Ho Mab.
Kargit ahanomp a skiant, a furnez hag a nerz
evid kas da benn Ho polontez.

O Gwerc’hez Vari, c’hwi hor Mamm m’e-neus greet an Aotrou Doue burzudou evidoc’h,
c’hwi m’eo bet ho puhez en he fez eur servij kaset da benn gant eur galon izel ha trugarezus,
pedit evidomp, pec’herien galvet da jeñch buhez.
Grit ma kemerimp perz e Karg ho Mab en deiz a hirio.
Hol lakit da gompren ne vez peurleuniet hor c’halon nemed gant karantez an Aotrou Doue hag an nesa,
ha roit ho sikour deomp evid embann anezi d’an oll.
Amen.

 

Liziri an Eskibien

  • Evid eun Iliz e mision…

    Evid eun Iliz e mision…

    Evid eun Iliz e mision… Lizer a Bastor an Aotrou ’n Eskob Lorañs Dognin Eskob Kemper ha Leon Meurz 2016 Mignoned ker, Abaoe m’on bet anvet da eskob Eskopti Kemper ha Leon, em-eus bet tro dija da gomz er mediaou ha dreist-oll, eveljust, e kerz al lidou am-eus renet abaoe

    Lire la suite...
  • Eskopti Kemper ha Leon RETERADURIOU 2012-2016

    Eskopti Kemper ha Leon RETERADURIOU 2012-2016

    Eskopti Kemper ha Leon RETERADURIOU 2012-2016 « Kerzit ! Ho kas a ran ! » Embann an aviel gand fiziañs gand an Aotrou ’n Eskob Jean-Marie Le Vert (2007-2015) “Ar peoc’h ra vezo ganeoc’h ! Evel ma’z on bet kaset gant an Tad, me ivez a gas ahanoc’h… Resevit ar Spered Santel” (Yann 20,21-22). Distaget

    Lire la suite...
  • Ma ouezfes Donezon Doue (2010)

    Ma ouezfes Donezon Doue (2010)

    Lizer a bastor an Aotrou ’n Eskob Jean-Marie Le Vert Eskob Kemper ha Leon (2007-2015) Roet da zeiz santel Pask 2010 Breudeur ha c’hoarezed ker, “Adsavet da veo eo ar C’hrist, adsavet eo e gwirionez !” Tregerni a ra hirio en Iliz hag er bed ar youhadenn goz-se a vintin Pask,

    Lire la suite...
  • Plas sevenadur hag yez Vreiz en on bodadegou a pedenn

    La place de la culture et de la langue bretonnes dans nos rassemblements de prières Au début de 2001, une commission Langue et culture bretonnes a été créée dans notre diocèse, en vue, notamment, de « promouvoir l’utilisation de la langue bretonne dans la vie de notre Église diocésaine là où

    Lire la suite...
  • Lizer a bastor 1996

    LIZER A BASTOR an Aotrou Klemant Guillon, eskob Kemper ha Leon diwarbenn an doare nevez da reñka an traou en eskopti (20 a viz ebrel 1996) 1. Pell ’zo dija (wardro eur bloaz hanter) e labourom da gempenn an traou en on eskopti. Kalz ahanoh o-deus roet an dourn evid

    Lire la suite...
  • 1
  • 2