An aviel hervez Sant Yann - Traduction H. Danielou

Index

Pennad eiz

Ar vaouez avoultrerez

1 Jezuz, eñ, a ya da Venez-an-Olived. 2 Da houlou deiz, e tistro d’an templ hag e teu davetañ ar bobl a-bez. Azeza a ra-eñ hag e krog d’o helenn. 3 Hogen, degas a ra dezañ ar skriverien hag ar farizianed eur vaouez bet tapet oh ober avoultriez. He lakaad a reont er hreiz 4 ha lavared dezañ : « Mestr, tapet eo bet ar vaouez-mañ e-kreiz ober avoultriez. 5 En e lezenn, e-neus Moizez gourhemennet deom meinata seurt merhed. Ha te, petra a lavarez ? » 6 Kement-se a lavaront evid e amproui ha kaoud abeg d’e damall. Hogen, stoui d’an traoñ a ra Jezuz, ha skriva gand e viz war an douar. 7 Pa gendalhont d’ober goulennou outañ, e sav-eñ e gein ha e lavar dezo : « An hini ahanoh a zo hep pehed, ra daolo outi ar mên kenta ! » 8 Hag eñ da stoui en-dro ha da skriva war an douar. 9 O veza klevet e gomzou, ez eont kuit, an eil war-lerh egile, hag ar re gosa da genta. Chom a ra e-unan, hag ar vaouez er hreiz. 10 Jezuz a zav hag a lavar dezi : « Maouez, peleh emaint ? Nikun anezo e-neus da gondaonet ? » – 11 « Nikun, Aotrou ! » emezi. Ha neuze e lavar Jezuz dezi : « Ganin-me, kennebeud, ne vi ket kondaonet. Kerz, hag adaleg bremañ, na beh ket mui. »

Gwir eo ma zesteni

12 Adarre eta e komz Jezuz dezo : « Me eo sklêrijenn ar bed, emezañ. Kement hini a zeuio war ma lerh, ne gerzo ket en deñvalijenn med bez’ e vo gantañ sklêrijenn ar vuhez. » 13 Neuze e lavar ar farizianed dezañ : « Te eo hag a ro testeni dit da-unan. N’eo ket gwirion da desteni. » 14 Respont a ra Jezuz, en eur lavared dezo : « Zoken ma roan testeni din ma-unan, eo gwirion ma zesteni ; rag gouzoud a ran euz peleh on deut ha da beleh emaon o vond. Med c’hwi n’ouzoh ket nag euz peleh e teuan ha na beleh ez an. 15 Barn a rit-c’hwi hervez ar horv. Me ne varnan den ebed, 16 pe ma varnan eo gwirion ma barnidigez, peogwir n’emaon ket ma-unan : bez’ ema ganin an hini m’on bet kaset gantañ, an Tad. 17 Rag skrivet eo en ho lezenn-deoh : “Gwirieg eo testeni daou zen”. 18 Test on-din ma-unan, hag an Tad m’on bet kaset gantañ a ro testeni din. » 19 Lavared a reont dezañ : « Peleh ema da Dad ? » Ha Jezuz da respont : « N’anavezit na me na ma Zad. M’am anavezfeh, eh anazvefeh ma Zad ive. » 20 Lavaret eo ar homzou-ze gantañ e Sal-an-Teñzor, en eur gelenn en templ. Ha den ebed ne grog ennañ, ablamour ne oa ket deut e eur c’hoaz.

« Me a zo euz an neh »

21 Lavared a ra c’hoaz dezo : « Mond a ran-me kuit, ha klask a reot war ma lerh, hag e varvot en ho pehed. D’al leh m’emaon o vond, ne hellit ket dond ». 22 Setu ma lavare ar Juzevien : « Daoust hag ema o vond d’en em laza, evitañ da lavared : “D’al leh m’emaon o vond, ne hellit ket dond” ? » 23 Hag eñ da respont dezo : « C’hwi a zo euz an traoñ, ha me euz an neh. C’hwi a zo euz ar bed-mañ, ha me n’on ket euz ar bed-mañ. 24 Lavaret em-eus deoh eta : en ho pehejou e varvot. Rag, ma ne gredit ket ez eo-me a zo, e varvot en ho pehejou. »

« Ober a ran atao ar pez a blij din »

25 Lavared a reont dezañ eta : « Te, piou out-te ? » Jezuz a respont dezo : « Ar pez a zisklêrian deoh abaoe ar penn kenta. 26 Diwarnoh em-eus kalz traou da zisklêria ha da varn. Med an hini m’on bet kaset gantañ a zo gwirion ha disklêria a ran d’ar bed ar pez am-eus klevet digantañ, an dra-ze a lavaran d’ar bed ». 27 Ne gomprenont ket ema o komz dezo euz e Dad. 28 Setu ma lavar Jezuz : « P’ho-po uhelleet mab an den, e ouezot neuze ez eo-me a zo. Ha ne roan netra euz ma ferz ma-unan, med ar pez e-neus an Tad kelennet din, an dra-ze a zisklêrian. 29 Hag an hini m’on bet kaset gantañ a zo ganin. N’e-neus ket ma lezet ma-unan, abalamour ma ran-me atao ar pez a blij dezañ. » 30 Pa ziskleir-eñ an oll draou-ze, e teu kalz anezo da gredi ennañ.

« Ar wirionez a roio deoh ar frankiz »

31 Neuze e lavar Jezuz d’ar Juzevien o-deus kredet ennañ : « Ma talhit d’am homzou, ma re-din, ez oh ma gwir ziskibien. 32 Anaoud a reot ar wirionez hag ar wirionez a roio deoh ar frankiz. » 33 Hag int da respont dezañ : « Diskennidi da Abraham om-ni ha da zen ebed n’om bet biskoaz sklaved. Penaoz e lavarez : “Libr e teuot da veza” ? » 34 Ha Jezuz da respont dezo : « Amen, amen, e lavaran deoh : kement hini a ra ar pehed a zo sklav d’ar pehed. 35 Hogen, ne jom ket ar sklav en ti evid atao, ar mab a-vad a jom eno evid atao. 36 Ma ’z oh dieubet gand ar Mab, neuze e viot libr e gwirionez.

37 Gouzoud a ran ez oh diskennidi da Abraham. Med klask a rit ma laza, peogwir ne ziskenn ket ma homzou ennoh. 38 Disklêria a ran ar pez am-eus bet gwelet e-kichenn an Tad. Ha c’hwi a ra ar pez ho-peus klevet gand ho tad. » 39 Hag int da respont : « Abraham, emezo, eo on tad. » Jezuz a lavar dezo : « Ma ’z oh mibien da Abraham, grit oberou Abraham ! 40 Hogen, emaoh bremañ o klask ma laza, me, an hini e-neus disklêriet deoh ar wirionez bet klevet ganin e-kichenn Doue. An dra-ze n’e-neus ket Abraham greet. 41 Ober a rit-c’hwi oberou ho tad. » Lavared a reont dezañ : « Ni n’om ket ganet diwar avoultriez, n’on-eus nemed eun tad : Doue ». 42 Jezuz a respont dezo : « Ma vije Doue ho tad, e karfeh ahanon, rag euz Doue on bet ganet hag on deut : n’eo ket euz ma ferz ma-unan e teuan, med gantañ eo on bet kaset. 43 Ne gomprenit ket ar pez a lavaran, perag ? Peogwir ne hellit ket kleved ma homzou. 44 C’hwi, an tad m’oh bet ganet anezañ eo an diaoul, hag e fell deoh heulia c’hoantidigeziou ho tad : lazer tud e oa hennez adaleg ar penn kenta, ha ne zalhe ket d’ar wirionez rag n’eus ket a wirionez ennañ. Pa lavar eur gaou, e komz euz ar pez a zo ennañ, peogwir eo gaouiad ha tad ar gaou. 45 Med ablamour ma lavaran ar wirionez, ne gredit ket ennon.

46 Piou en ho touez a hell proui ez on peher ? Ma lavaran ar wirionez, perag n’am hredit ket ? 47 Nep piou bennag a zo euz Doue a glev komzou Doue. Ma ne zelaouit ket, eo ablamour n’oh ket euz Doue. »

« A-raog Abraham ez on-me »

48 Respont a ra ar Juzevien dezañ, en eur lavared : « Daoust ha n’eo ket ar pez a lavarom ? Eur Zamaritan out-te hag eun diaoul a zo ganeoh. » 49 Ha Jezuz da respont : « Me, n’eus diaoul ebed ganin, med enori a ran ma Zad ha ma dismegañsi a rit-c’ hwi. 50 Me ne glaskan ket ma gloar : bez’ ez eus unan ouz he hlask ha barn a ra. 51 Amen, amen, e lavaran deoh : ma talh eun den d’am homzou, ne welo ket ar maro da viken. » 52 Lavared a ra ar Juzevien dezañ : « Bremañ e ouzom ez eus eun diaoul ganit : marvet eo bet Abraham hag ar brofeted ive, hag e lavarez-te : “Ma talh eun den d’am homzou, ne dañvo ket ar maro da viken”. 53 Daoust hag ez out-te brasoh eged on tad Abraham hag a zo bet marvet ? Hag ar brofeted ive a zo bet marvet ! Evid piou en em gemerez-te ? » 54 Respont a ra Jezuz : « Ma kanan-me gloar din ma-unan, n’eo ma gloar netra. Ma Zad eo a gan gloar din, hennez hag a lavarit diwar e benn : “On Doue eo”. 55 Ha n’e anavezit ket, med gouzoud a ran-me piou eo-eñ. Ma lavarfen deoh n’ouzon ket piou eo-eñ, e vefen eur gaouiad eveldoh, med gouzoud a ran piou eo ha derhel a ran d’e gomz.

56 Tridet e-neus Abraham, ho tad, o weled ma deiz-din ; e welet e-neus ha laouen-braz eo bet. » 57 Hag ar Juzevien da lavared dezañ eta : « N’out ket hanter-kant vloaz c’hoaz ha gwelet az-peus Abraham ? » 58 Jezuz a respont dezo : « Amen, amen, e lavaran deoh : a-raog ma vefe deut Abraham, eo-me a zo. » 59 Neuze e tastumont mein da vanna outañ. Jezuz a-vad a ya da guzad hag a guita an templ.

 


8/21