Trede sizunvez an Azvent

Trede sizunvez an Azvent

Euz ar 16 d’an 22 a viz Kerzu 2018

Trede sul an Azvent (C)

Lk 3, 10-18

10 En amzer-ze, tud e-leiz deuet da veza badezet gand Yann, a houlenne outañ :

— « Petra on-eus da ober ? »

11 Respont a ree Yann dezo :

— « An neb e-neus daou bez dillad, rei unan d’an hini n’e-neus ket, hag an neb e-neus peadra da zrebi, ober kemend-all ».

12 Dond a reas ive Publikaned (da lavared eo paotred an taillou) evid beza badezet, hag e lavarent dezañ :

— « Mestr, petra on-eus-ni da ober ? »

13 Hag e respontas dezo :

— « Na houlennit netra en tu all d’ar pez a zo merket deoh ober ».

14 Soudarded ive a houlenne outañ :

« Ha ni, petra on-eus da ober ? »

Hag eñ dezo :

— « Diwallit da wall-gas dén e-béd, pe da ziskuill e gaou, ha deoh da dremen gand ho pae ».

15 O veza m’edo ar bobl war héd, ha ma houlenne an oll o-unan en o diabarz, ha ne vije ket Yann-Vadezour ar Mesïaz, 16 e lavare Yann d’an oll :

— « Me eo gand dour e vadezan ahanoh, med ema o tond an hini a zo galloudusoh egedon, ha n’on ket din da ziskoulma lèrenn e zandalennou. Eñ ho padezo er Spered-Santel hag en tan. 17 En e zorn ema ar bal-wenta evid nêtaad e leuriad éd, ha dastum ar gwiniz en e hrignol. Ar pell a-vad, a vo taolet gantañ da zevi en eun tan na varv ket ».

18 Gand kalz a genteliou ar seurt-se, ha re all c’hoaz, eh embanne ar Helou Mad d’ar bobl.

Lun (overenn ar 17 a viz kerzu)

Mz 1, 1-17

1 Lignez Jezuz-Krist, mab da Zavid, mab da Abraham.
2 Tad eo bet Abraham da Izaag, Izaag, da Jakob, Jakob, da Juda ha d’e vreudeur.
3 Juda tad da Farez ha da Zara, dre ar vaouez Tamar. Farez tad da Esron, Esron, da Aram,
4 Aram tad da Aminadab, Aminadab, da Naason, Naason, da Zalmon.
5 Salmon tad da Vooz, dre ar vaouez Rahab, Booz tad da Obed, dre ar vaouez Ruth, hag Obed, da Jesse,
6 Jesse tad d’ar roue David, ha David, tad da Zalomon, dre an hini a oa bet gwrég Uri.
7 Salomon, tad da Roboam, Roboam, da Abiaz, Abiaz, da Asaf.
8 Asaf, tad da Jozafad, Jozafad, da Joram, Joram, da Oziaz,
9 Oziaz, da Joatam, Joatam, da Akaz, Akaz, da Ezekiaz,
10 Ezekiaz, da Vanase, Manase, da Amon, Amon, da Josiaz.
11 Joziaz, da Jekoniaz ha d’e vreudeur, da vare an harlu e Babilon.

12 Ha goude an harlu e Babilon, eo bet Jekoniaz, tad da Zalatiel, Salatiel, tad da Zorobabel.
13 Zorobabel, tad da Abiud, Abiud, da Eliakim, Eliakim, da Azor.
14 Azor, tad da Zadok, Sadok, da Akim, Akim, da Eliud,
15 Eliud da Eleazar, Eleazar, da Vatan, Matan, da Jakob,
16 Jakob tad da Jozef, pried Mari, an hini a zo bet mamm da Jezuz, anvet ar Hrist.

17 Bez’ ez eus eta pevarzeg rummad adaleg Abraham beteg David, pevarzeg adaleg David beteg an harlu e Babilon, ha pevarzeg adaleg an harlu e Babilon beteg ar Hrist.

Meurz (overenn an 18 a viz kerzu)

Mz 1, 18-24

18 Evel-henn en em gavas ganedigez Jezuz-Krist : dimezet e oa Mari, e vamm, da Jozef, med a-barz m’o-doa bevet asamblez, e c’hoarvezas ganti beza dougéréz, dre vertuz ar Spered-Santel.

19 Jozef, he fried, dén just anezañ, pa ne felle ket dezañ he dizenori, a lakeas en e benn dispartia diouti dre guz.

20 Trei a ree ar zoñjou-ze en e spered, pa zeuas eun êl d’an Aotrou da bara dirazañ e-kreiz e gousk, hag e lavaras dezañ :

— « Jozef, mab da Zavid, arabad dit kaoud aon o kemer Mari da bried en da di, rag euz ar Spered-Santel eo ar vuhez a zo diwanet enni.

21 « Genel a raio eur mab. Rei a ri dezañ an ano a Jezuz (da lavared eo : Salvi a ra an Aotrou), rag eñ eo a zalvo e bobl euz he fehejou ».

22 C’hoarvezoud a reas kement-se, evid ma teufe da wir ar pez e-noa lavaret an Aotrou dre vouez ar Profet :

23 « Setu ar Werhez o tond da veza dougéréz ; ha genel a raio eur mab a vo anvet Emmanuel, da lavared eo : « Doue ganeom ».

24 Goude beza savet euz e gousk, e reas Jozef evel m’e-noa lavaret El an Aotrou dezañ : kemer a reas e bried en e di.

Merher (overenn an 19 a viz kerzu)

Lk 1, 5-25

5 En amzer Herodez, roue Bro-Judea, e oa eur beleg anvet Zakarïaz, euz rummad Abia ; e wrég euz lignez Aaron a oa Elizabed heh ano.

6 O-daou, e oant just dirag Doue. Heulia a reent direbech oll lezennou ha gourhemennou an Aotrou.

7 N’o-doa ket a vugale, difrouez ma oa Elizabed, hag eet e oant o-daou war an oad.

8 Ha setu eun deiz e oa Zakarïaz oh ober war dro e garg a veleg dirag Doue, rag deuet e oa tro beleien e rummad d’hen ober. Hervez ar hiz miret gand ar veleien, e oe tennet ar zort ganto, hag evel-se, galvet eñ evid mond e santual an Aotrou, da lakaad ezañs da zevi.

10 Bez’ e oa ar bobl en he féz o pedi en diavêz, d’an eur ma oad o tevi an ezañs.

11 Dond a reas eun êl d’an Aotrou da bara dirag Zakarïaz, en e-zav en tu dehou da aoter an ezañs. 12 Strafuillet e oe Zakariaz ouz e weled, hag e oe spontet.

13 Med, lavared a reas an êl dezañ :

— « Arabad dit kaoud aon, Zakarïaz, rag selaouet eo bet da bedenn gand an Aotrou Doue. Rei a roio dit da wrég Elizabed eur mab, ha te a roio dezañ an ano a Yann. 14 Bez’ e vo evidout leh da gaoud joa ha levenez, hag e vo laouen kalz tud gand e hanedigez . 15 Rag braz e vo-eñ dirag an Aotrou. Ne evo ket a win, nag a voeson, rag azaleg korv e vamm, e vo karget gand ar Spered-Santel. 16 Lakaad a raio da zistrei ouz Doue kalz euz bugale Izrael. Kerzed a raio e-unan dirag an Aotrou, gantañ spered ha galloud Elïaz, evid distrei kalonou an tadou war-zu o bugale, ha lakaad an dud dizent war hent furnez an dud just, evid sevel d’an Aotrou eur bobl prest evitañ ».

18 Lavared a reas Zakariaz d’an êl :

— « Penaoz e ouezin eo gwir kement-se ? rag eun dén koz on, ha war an oad eo eet va gwrég ive ».

19 Respont a reas an êl :

— « Me eo Gabriel ; dalhmad e vezan dirag Doue. Kaset on bet da gomz ouzit, ha da gemenn dit ar helou mad-se. 20 Ha setu ma vezi dilavar, hep gelloud mui komz, beteg ar mare ma c’hoarvezo kement-se oll, ablamour n’az-peus ket kredet em homzou, hag a zeuio da wir d’o amzer ».

21 O hortoz Zakarïaz edo an dud, hag e oant souezet o weled e talee e diabarz ar zantual. 22 Pa zeuas er-mêz, ne oa ket evid komz outo. Intent a rejont, e-noa bet eur weledigez er zantual : Ober a ree sinou dezo, med mud e chome.

23 Echu gantañ e zeveziou-servich, ez eas d’ar gêr. 24 Eur pennad amzer goude-ze, e oa dougéréz e wrég.

E-pad pemp miz, e kuzas Elizabed he stad. Hag e lavare outi heh-unan : 25 « Setu ar péz e-neus greet an Aotrou em heñver ; plijet eo bet gantañ bremañ, teuler eur zell warnon, evid lakaad fin d’ar péz a oa eur véz evidon, dirag an oll dud ».

Yaou (overenn an 20 a viz kerzu)

Lk 1, 26-38

26 D’ar c’hwehved miz, e oe kaset an êl Gabriel gand Doue d’eur gêr a Vro-Halilea, anvet Nazared, 27 da gaoud eur plah yaouank dimezet d’eun den anvet Jozef, euz lignez David, hag e oa Mari ano ar plah yaouank.

28 Digouezet beteg enni, e lavaras an êl dezi :

— « Béz laouen, leun a hras ! Ema an Aotrou ganit ».

29 O kleved seurt komzou, e oe hi strafuillet braz. Klask gouzoud e oa petra a dalveze ar zalud-se.

30 Lavared a reas an êl dezi :

— « Na gemer ket aon, Mari, rag plijet out bet da Zoue. 31 Setu emaout o vond da veza dougéréz, hag e hani eur mab, hag e roi dezañ an ano a Jezuz. 32 Braz e vo, hag e vo anvet Mab da Vestr an Uhel-Meurbed. Trôn David e dad a vo roet dezañ gand an Aotrou Doue. 33 Roue e vo war lignez Jakob da viken, hag e rouantèlèz ne vo fin e-béd dezi ».

34 Lavared a reas Mari d’an êl :

— « Penaoz e c’hoarvezo kement-se, peogwir n’em-eus darempred gand gwaz e-béd ? »

35 Respont a reas an êl dezi :

— « Diskenn a raio ar Spered-Santel warnout, hag e vi goloet gand galloud Mestr an Uhel-Meurbed. Dre-ze, e vo santel ar hrouadur, hag e vo anvet Mab da Zoue. 36 Ha setu ema Elizabed da geniterv o tougen eur mab ive, daoust d’he oad, hag an hini a veze greet anezi ar « vaouez dizeh », setu ema gand he c’hwehved miz 37 Rag n’eus netra dreist galloud Doue. »

38 Lavared a reas Mari neuze :

— « Setu amañ servichéréz an Aotrou, ra hoarvezo ganin hervez da lavar ».

Hag ez eas an êl kuit diouti.

Gwener (overenn an 21 a viz kerzu)

Lk 1, 39-45

39 En amzer-ze, ez eas Mari buan en hent war-zu bro ar meneziou, d’eur gêr a Vro-Judea.

40 Mond a reas e-barz ti Zakariaz ha saludi Elizabed.

41 Kerkent ha ma klevas Elizabed salud Mari, e tridas he hrouadur en he hreiz, hag e oe karget Elizabed euz ar Spered-Santel. 42 Sevel a reas he mouez ha lavared :

— « Benniget out dreist an oll gwragez, ha benniget ar frouez euz da gorv. 43 Hag a beleh e teu din kement-mañ : Mamm va Aotrou o tond beteg ennon ? 44 Rag kerkent ha m’he-deus da vouez skoet va diskouarn, e-neus va hrouadur tridet em hreiz gand al levenez. 45 Eüruz an hini he-deus kredet e vo sevenet ar homzou lavaret dezi a-berz an Aotrou Doue ».

Sadorn (overenn an 22 a viz kerzu)

Lk 1, 46-56

46 Renta a reas Mari d’he zro gloar d’an Aotrou Doue, en eur lavared :

— « Kana a ra va ene meuleudi d’an Aotrou, 47 ha tridal a ra va spered e Doue va Zalver, 48 ablamour m’e-neus taolet e zellou war e zervichéréz dister.

« Diwar vremañ, e lavaro an oll dud, a rumm da rumm, ez on eüruz, 49 ken kaer eo ar burzudou e-neus greet evidon an Oll-Halloudeg, rag santel eo e ano.

50 « Skuilla a ra e vadèlèz, a rummad da rummad, war ar re a zouj dezañ.

51 « Diskouez a ra nerz e vreh, ha kas kuit an dud, lorh ganto en o halon.

52 « Diskar a ra ar rouaned diwar o zrôn, ha sevel uhel an dud izel.

53 « Rei a ra o gwalh d’ar re o-deus naon, ar re binvidig avad, e kas kuit hep netra.

54 « Rei a ra e skoazell da Izrael e vuia-karet, dre ma dalh soñj euz e vadèlèz ; 55 evel m’e-noa prometet d’on tadou-koz, e-keñver Abraham hag e lignez da viken ».

56 Chom a reas Mari neuze gand Elizabed war-dro tri miz, ha goude-ze e tistroas d’ar gêr.