An aviel hervez Sant Vaze - Traduction H. Danielou

Index

 Aviel Jezuz-Krist hervez Sant Vaze – Troet e brezoneg gand Herve Danielou, 2003

Pennad kenta

Adaleg Abraham beteg David

1 Leor orin Jezuz, Krist, mab da Zavid, mab da Abraham. 2 Abraham a oe tad da Izaak ; Izaak da Jakob ; Jakob da Juda ha d’e vreudeur. 3 Juda a oe tad da Farez ha Zara, euz Tamar ; Farez da Ezrom ; Ezrom da Aram ; Aram da Aminabad ; 4 Aminabad da Naason ; Naason da Zalmon ; 5 Salmon da Vooz, euz Rahab. Booz a oe tad da Obed, euz Ruth ; Obed da Jese ; 6 Jese da Zavid, ar roue.

Adaleg David beteg an harlu

David a oe tad da Zalomon, euz an hini a oe bet pried Uri ; 7 Salomon da Roboam ; Roboam da Abia ; Abia da Azaf ; 8 Azaf da Jozafat. Jozafat a oe tad da Joram ; Joram da Ozias ; 9 Ozias da Joatam ; Joatam da Akaz ; Akaz da Ezekiaz. 10 Ezekiaz a oe tad da Vanase ; Manase da Amos ; Amos da Jozias ; 11 Jozias da Jekonias ha d’e vreudeur, en amzer an harlu e Babilon.

Adaleg an harlu beteg Jezuz

12 Ha goude an harlu e Babilon, e oe Jekonias tad da Zalatiel ; Salatiel da Zorobabel ; 13 Zorobabel da Abioud ; Abioud da Eliakim ; Eliakim da Azor. 14 Azor a oe tad da Zadok ; Sadok da Akim ; Akim da Elioud ; 15 Elioud da Eleazar ; Eleazar da Vatan. Matan a oe tad da Jakob ; 16 Jakob da Jozef, pried Mari, an hini m’eo bet ganet anezi Jezuz, anvet Krist.

17 Setu an oll rummadou eta : pevarzeg rummad adaleg Abraham beteg David, pevarzeg rummad adaleg David beteg an harlu e Babilon, pevarzeg rummad adaleg an harlu e Babilon beteg ar Hrist.

Kemennadur da Jozef

18 Evel-henn eo bet orin Jezuz ar Hrist : Mari, e vamm, a oa danvez-pried da Jozef. A-raog beza bevet asamblez, en em gav-hi dougerez dre ar Spered Glan. 19 Jozef, he fried, a zo eun den direbech. Ne fell ket dezañ he dismegañsi ha divizoud a ra he has kuit dre guz. 20 P’ema o soñjal e kement-se, setu ma teu eun êl d’an Aotrou dirazañ, en e gousk, hag a lavar dezañ : « Jozef, mab da Zavid, bez dizaon o kemer ganit Mari da bried : ar vuhez a zo krouet enni a zeu euz ar Spered Glan. 21 Genel a raio eur mab. Roi a ri dezañ e ano : Jezuz, rag eñ eo a zalvo e bobl euz he fehejou. »

22 C’hoarvezet eo an oll draou-mañ evid ma vefe kaset da benn ar pez a zo bet lavaret gand an Aotrou, dre ar profet : 23 « Setu ma vo ar werhez dougerez, ha ma hano eur mab. Lakaad a raint dezañ e ano : “Emmanuel”, ar pez a vez troet : “Doue ganeom”. » 24 Dihunet Jozefeuz e gousk, e ra evel m’e-neus êl an Aotrou kemennet dezañ : kemer a ra e bried gantañ. 25 Ha n’he anavez ket a-raog ma lak-hi eur mab er bed. Roi a ra-eñ dezañ e ano : Jezuz.


Pennad daou

Ar vajed euz ar Zav-Heol

1 Jezuz o veza bet ganet e Betlehem-Jude, e amzer ar roue Herodez, setu ma erru majed euz ar Zav-Heol, e Jeruzalem. 2 Lavared a reont : « Peleh ema roue ar Juzevien, bet ganet nevez ’zo ? Rag gwelet on-eus e steredenn er Zav-Heol. Hag om deut da stoui dirazañ. »

3 O veza klevet kement-se, eo strafuillet ar roue Herodez, ha gantañ Jeruzalem a-abez. 4 Bodet gantañ an oll veleien-veur ha skriverien ar bobl, e houlenn diganto : « Peleh e tle ar Hrist beza ganet ? » 5 Lavared a reont : « E Betlehem-Jude, rag evel-henn eo bet skrivet gand ar profet : 6Ha te, Betlehem, douar Juda, n’out ket tamm ebed an disterra e-touez penn-kêriou Juda. Rag ahan out e teuio ar rener hag a vo mesaer war ma fobl Izrael”.

7 Gelver a ra neuze Herodez ar vajed dre guz, ha goulenn outo ar mare m’he-doa paret ar steredenn. 8 Hag ouz o has da Vetlehem, e lavar dezo : « It, grit eun enklask piz diwar-benn ar bugel. P’ho-po e gavet, roit kelou din, evid ma ’z in-me ive da stoui dirazañ. »

9 Klevet ar roue ganto, ez eont gand o hent. Ha setu ma ’z ee dirazo ar steredenn o-doa gwelet er Zav-Heol, beteg ma teu-hi da jom a-zav a-uh d’al leh m’ema ar bugel ennañ. 10 O weled ar steredenn, int karget gand eul levenez braz-tre. 11 Dond a reont en ti, ha gweled ar bugel gand Mari, e vamm. O koueza d’an douar, e stouont dirazañ. Hag o tigori o zeñzoriou, e kinnigom provou dezañ : aour, ezañs ha mir. 12 Kelaouet en o housk da jom heb mond en-dro da di Herodez, ez eont war-zu o bro dre eun hent all.

An dehadenn da Vro-Ejipt

13 Pa ’z int eet kuit, setu m’en em ziskouez eun êl d’an Aotrou dirag Jozef, en e gousk. Lavared a ra : « War-zao ! Kemer ar bugel hag e vamm ganit, ha teh da Vro-Ejipt. Chom eno beteg ma lavarin dit : rag ema Herodez o vond da glask ar bugel evide lakaad d’ar maro. »

14 Sevel a ra, kemer gantañ ar bugel hag e vamm, diouz an noz, hag en em denna da Vro-Ejipt. 15 Eno e chom beteg maro Herodez, evid ma vo teuio da wir ar homzou bet lavaret gand Doue dre ar profet : « Euz Bro-Ejipt em-eus galvet ma mab. »

Oll vugale Betlehem

16 Neuze, pa wel Herodez eo bet touellet gand ar vajed, ez a droug ruz ennañ. Kas a ra tud da laza an oll vugale, e Betlehem hag en douarou tro-war-dro, oadet a zaou vloaz pe nebeutoh, hervez ar mare e-noa goulennet merka spiz dezañ gand ar vajed.

17 Neuze eo deut da wir komzou Jeremi ar profet : 18 « Eur vouez a zo bet klevet e Rama, leñvadenn ha garmou niveruz : Rachel o ouela d’he bugale, ha ne fell ket dezi beza frealzet, rag n’eus ket mui anezo. »

An distro euz Bro-Ejipt

19 Goude maro Herodez, setu m’en em ziskouez da Jozef eun êl d’an Aotrou. 20 Lavared a ra dezañ : « War-zao ! Kemer ar bugel hag e vamm ganit, ha kee da zouar Izrael, rag maro eo ar re a glaske war-lerh buhez ar bugel. »

21 Sevel a ra, kemer gantañ ar bugel hag e vamm, ha dond da zouar lzrael. 22 O kleved ema Arkelauz o ren war Vro-Jude, e plas e dad Herodez, e-neus aon da vond di. Kelaouet en e gousk, ez a war-zu Bro-Halile, 23 ha dond a ra da jom en eur gêr anvet Nazared, evid ma teuio da wir ar homzou bet lavaret gand ar brofeted : « Nazorean e vo anvet. »


Pennad tri

Eur vouez er goueleh

1 En deiziou-ze en em ziskouez Yann, ar badezour, 2 o prezeg e goueleh Bro-Jude, en eur lavared : « Cheñchit buhez ! Rag tost ema rouantelez an neñv. » 3 Ya, eñ eo an hini bet komzet anezañ gand ar profet Izai, pa lavare : « Mouez an hini a zo o krial er goueleh : kempennit hent an Aotrou, lakit eeun e wenojennou. » 4 Ar Yann-se a zo gantañ eur pez-dillad reun kañval, hag eur gouriz ler en-dro d’e groaz-lez. E voued a zo lammikerezed ha mel gouez.

5 Neuze e teu d’e gaoud tud Jeruzalem, re Bro-Jude a-bez, ha re ar hornad a zo tro-dro d’ar Jourdan. 6 Badezet e oant gantañ er Stèr-Jourdan, en eur anzav o fehejou.

Penaoz distroi ouz Doue

7 Gweled a ra kalz farizianed ha saduseaned o tond d’e vadiziant, hag eñ da lavared dezo : « Gouenn naered ! Piou e-neus desket deoh tehed pell diouz ar gounnar a zo o tond ? 8 Taolit eta frouez o tiskouez eo gwirion ho keuz. 9 Ha n’it ket da lavared ennoh o-unan : “Abraham eo on-eus da dad”. Rag lavared a ran deoh : bez’ e hell Doue, euz ar vein-mañ, sevel bugale da Abraham. 10 Lakeet ema dija ar vouhal e gwriziou ar gwez : kement gwezenn na ro ket frouez mad a vo trohet eta, ha stlapet en tan. »

Yann a gemenn an hini a zo o tond

11 « Evidon-me, ho padezan en dour, evid ma cheñchot buhez. Med galloudusoh egedon eo an hini a zo o tond war ma lerh : n’on ket dign da denna e votou dezañ. Ho padezi a raio-eñ er Spered Glan hag en tan. 12 E bal-wenta gantañ en e zorn, ema o vond da gempenn al leur, ha da zastum ar greun en e hrignol ; ar pell a-vad a vo devet gantañ en tan na varv ket. »

Badiziant Jezuz

13 Neuze eh erru Jezuz, euz Bro-Halile d’ar Stèr-Jourdan, da gaoud Yann ha da veza badezet gantañ.14 Nah a ra Yann a-vad, en eur lavared dezañ : « Me eo am-eus ezomm da veza badezet ganit, ha te a zeu beteg ennon ! » 15 Jezuz a respont : « Laosk bremañ ! emezañ. Mad eo deom seveni peb justis evel-se. » Neuze e lez da ober.

16 Eur wech badezet, e sav Jezuz er-mêz euz an dour. Ha setu ma tigor an neñv ; gweled a ra Spered Doue o tiskenn, evel eur goulm, hag o tond warnañ. 17 Ha setu eur vouez, euz an neñv, o lavared : « Hemañ eo ma Mab, an hini muia-karet ; ennañ em-eus lakeet ma levenez. »


Pennad pevar

Daou-ugent devez er goueleh

1 Neuze eo douget Jezuz d’ar goueleh gand ar Spered, evid beza tentet gand an diaoul. 2 Yuni a ra e-pad daou-ugent devez ha daou-ugent nozvez. Naon e-neus goude-ze.

Tentet gand an diaoul

3 Tostaad a ra an tenter outañ, ha lavared dezañ : « Mar dout mab da Zoue, lavar ma teufe ar vein-mañ da veza bara. » 4 Respont a ra : « Skrivet eo, emezañ : “N’eo ket gand bara hepken e vevo mabden, med gand kement ger o tond euz genou Doue”. »

5 E gas a ra neuze an diaoul gantañ d’ar gêr zantel, e lakaad war lein an templ, 6 ha lavared dezañ : « Mard out mab da Zoue, en em daol d’an traoñ. Rag skrivet eo : “D’e êlez e hourhemenno evidout, ha da zougen a raint war o daouarn, gand aon na stoki da droad ouz eur mên”. » 7 Jezuz a lavar dezañ : « Skrivet eo c’hoaz : “Ne denti ket an Aotrou da Zoue !” »

8 E gas a ra an diaoul gantañ adarre war eur menez uhel-meurbed, o tiskouez dezañ oll rouanteleziou ar bed hag o gloar. 9 Hag e lavar dezañ : « An oll draou-ze a roin dit, ma kouezez da stoui dirazon. » 10 Neuze e lavar Jezuz dezañ : « Kerz kuit, Satan ! Rag skrivet eo : “Dirag da Zoue e stoui, ha ne adori nemetañ.” » 11 Hag an diaoul d’e lezel, ha setu ma tosta an êlez outañ, evid e zervicha.

Eur sklêrijenn vraz e Bro-Halile

12 Pa glev Jezuz eo bet taolet Yann er prizon, en em denn-eñ e Bro-Halile. 13 Kuitaad a ra Nazared ha dond da jom e Kafarnaom, war vord ar mor, e broiou Zabulon ha Neftali ; 14 evid ma vo sevenet komzou ar profet Izai : 15 « Douar Zabulon ha Douar Neftali, hent ar mor, d’an tu all d’ar Jourdan, Galile ar baianed ! 16 Ar bobl azezet en deñvalijenn a wel eur sklêrijenn vraz, hag war an dud azezet e bro ha skeud ar maro, e sav eur sklêrijenn. »

17 Adaleg neuze, e krog Jezuz da embann ha da lavared : « Cheñchit buhez ! Rag ema tost rouantelez an neñv. »

Pesketêrien-tud

18 O vale war vord Mor ar Galile, e wel-eñ daou vreur : Simon, anvet Pèr, hag Andreo, e vreur ; bez’ emaint o taoler eur roued, rag pesketêrien int. 19 Lavared a ra dezo : « Deuit war ma lerh, hag e rin pesketêrien-tud ahanoh. 20 Dioustu e laoskont o rouejou ha mond d’e heul.

21 O vond pelloh alese, e wel-eñ daou vreur all : Jakez, mab da Zebede, ha Yann, e vreur, en eur vag, gand o zad Zebede. O tidoulla o rouejou emaint. O helver a ra, 22 ha dioustu e tilezont o bag, hag ez eont d’e heul.

Embann a ra er zinagogennou

23 Foueta a ree Bro-Halile a-bez, evid kelenn er zinagogennou, embann kelou mad ar rouantelez, parea pep kleñved ha peb namm e-touez ar bobl. 24 Mond a ra e vrud dre Vro-Ziria a-bez. Diskouez a reont dezañ an oll dud kouezet eun droug warno, hag a zo gwasket gand poaniou ha kleñvejou a bep seurt : tud skoet gand an droug-spered, loarieg, seizet ; hag o farea a ra.

25 Ha mond a ra d’e heul pobladou-tud niveruz, euz Bro-Halile, euz an Deg-Kêr, euz Jeruzalem, hag euz an tu all d’ar Jourdan.


Pennad pemp

« Eüruz »

1 O weled an engroez, e pign-eñ war ar menez. Azeza a ra, hag e tosta e ziskibien outañ. 2 O tigori e henou, e stag d’o helenn, en eur lavared :

3 « Eüruz ar re a zo paour en o spered : dezo eo rouantelez an neñv !
4 Eüruz ar re a zo leun a zouster : hered e vint d’an douar !
5 Eüruz ar re a zo glaharet : frealzet e vint !
6 Eüruz ar re o-deus naon ha sehed a justis : o gwalh a gavint !
7 Eüruz ar re a zo trugarezuz : evito e vo trugarez !
8 Eüruz ar re a zo glan a galon : Doue a welint !
9 Eüruz ar re a zegas ar peoh : mibien Doue e vint anvet !
10 Eüruz ar re a zo heskinet en abeg d’ar justis : dezo eo rouantelez an neñv !
11 Eüruz oh-c’hwi pa viot kunujennet hag heskinet, pa vo lavaret bep seurt droug e gaou a-eneb deoh, en abeg din. 12 Bezit laouen, tridit, rag braz eo ho pae en neñv. Evel-se eo bet heskinet ganto ar brofeted, ar re a zo bet en ho raog. »

« Bez’ oh an holen »

13 « Holen an douar oh-c’hwi. Ma teu an holen da veza goular, gand petra e vo salet ? N’eo ket ken kreñv a-walh evid netra, nemed evid beza stlapet er-mêz ha breset gand an dud. »

« Bez’ oh sklêrijenn »

14 « Sklêrijenn ar bed oh-c’hwi. Ne helier ket kuza eur gêr bet savet e lein eur menez. 15 Ha n’elumer ket eul lamp evid e lakaad dindan ar boezell, med war ar hantolor ; ha lugemi a ra evid an oll re a zo en ti. 16 Ra lugemo evel-se ho sklêrijenn dirag an dud, evid ma welint hoh oberou mad, ha ma veulint ho tad hag a zo en neñv.

Seveni kentoh eged distruja

17 « Na gredit ket on deut da dorri al lezenn hag ar brofeted ; n’on ket deut d’o zorri med d’o zeveni. 18 Rag, amen, lavared a ran deoh : ken na vo tremenet an neñv hag an douar, ne dremeno ket eun i, eun tired nemetañ, euz al lezenn, ken na vo sevenet pep tra.

19 Evel-se, an neb a dorro unan euz ar gourhemennou-ze, e-touez ar re vihanna, hag a gelenno kemend-all d’an dud, hennez a vo anvet ar bihanna e rouantelez an neñv. An hini a raio hag a gelenno, hennez a vo anvet braz e rouantelez an neñv. »

Eur justis diouz an druill

20 « Rag lavared a ran deoh : ma n’eo ket ho justis dreist hini ar skriverien hag ar farizianed, ne antreot ket e rouantelez an neñv. »

Difacha da genta

21 « Klevet ho-peus ez eus bet lavaret d’ar gozidi : “Ne lazi ket ! An hini a lazo, a vo responteg dirag ar varn”. 22 Me a-vad a lavar deoh : peb den gand droug ennañ a-eneb e vreur, a vo responteg dirag ar varn. An hini a lavaro d’ e vreur : “Raka ! ”, a vo responteg dirag ar zanedrin, hag an hini a lavaro dezañ : “Pennsod !”, a vo responteg dirag jehenn an tan.

23 M’emaout eta o kinnig da brov war an aoter, ha ma teu soñj dit e-neus da vreur eun dra bennag a-eneb dit, 24 lez aze da brov, dirag an aoter, ha kerz da genta da zifacha diouz da vreur. Ha neuze, deus da ginnig da brov.

25 En em reñk gand da enebour, buan, e-keid ha m’emaout gantañ war an hent : evid na vi ket kaset gand an enebour dirag ar barner, ha gand ar barner dirag ar gward, ha na vi ket taolet en toull-bah. 26 Amen, lavared a ran dit : ne zeui ket er-mêz alese beteg m’az-po rentet ar hart gwenneg diweza. »

« An hini a zell ouz eur vaouez... »

27 « Klevet ho-peus ez eus bet lavaret : “Ne vi ket avoultrer”. 28 Me a-vad a lavar deoh : kement den a zell ouz eur vaouez gand ar c’hoant anezi, a zo dija avoultrer ganti en e galon. 29 Ma vez da lagad, an hini dehou, eur gwall-skoill evidout, lam-eñ kuit ha stlap-eñ pell diouzit ! Rag emzavoh eo dit e vefe kollet unan euz da izili eged na vefe taolet da gorv a-bez er jehenn.

30 Ha ma vez da zorn dehou eur gwall-skoill evidout, troh-eñ ha stlap-eñ pell diouzit. Rag emzavoh eo dit e vefe kollet unan euz da izili eged na yafe da gorv a-bez d’ar jehenn. »

« An hini a gas e wreg kuit »

31 « Ha lavaret ez eus bet : “An hini a gas e wreg kuit, a roio dezi eul lizer a dorr-dimezi”. 32 Me a-vad a lavar deoh : an hini a gas e wreg kuit, nemed na vefe eur falsdimezi, he lak da veza avoultrerez ; hag an hini a zimez gand eur vaouez dilezet, a zo avoultrer. »

« Na douit ket »

33 « Ha c’hoaz ! Klevet ho-peus ez eus bet lavaret d’on tud koz : “Ne dorri le ebed ; med roi a ri da leou d’an Aotrou !” 34 Me a-vad a lavar deoh : chomit hep toui tamm ebed. Na dre an neñv : tron eo da Zoue. 35 Na dre an douar : skabell eo evid e dreid. Na dre Jeruzalem : bez ’eo kêr ar Roue-Meur. 36 Na dre da benn, na dou ket kennebeud, rag ne hellez ket lakaad eur blevenn hepken anezañ da veza gwenn pe du. 37 Ra vo ho komz : “Ya ! Ya !”, “Nann ! Nann !” An traou ouspenn a zeu euz an Droug. »

« Na harzit ket ouz an den droug »

38 « Klevet ho-peus ez eus bet lavaret : “Lagad evid lagad” ha “dant evid dant”. 39 Me a-vad a lavar deoh : na harzit ket ouz an den droug. Med d’an den o skoi ganit war da jod dehou, tro ive an hini all. 40 D’an den a fell dezañ da gas d’al lez-varn ha kemer da zae gantañ, lez ive da vantell. 41 Gand an den a houlenn diganit ober eur mil-douar, kerz evid daou vil. 42 Ro d’an hini a houlenn diganit, ha d’an hini a fell dezañ ampresta diganit, na dro ket kein. »

« Karit hoh enebourien »

43 « Klevet ho-peus ez eus bet lavaret : “Kared a ri da nesa ha kasaad a ri da enebour.” 44 Me avad a lavar deoh : karit hoh enebourien, pedit evid ho heskinerien, 45 evid beza mibien ho Tad euz an neñv. Rag lakad a ra an heol da zevel war ar re fall ha war ar re vad, ar glao da goueza war ar re just ha war ar re direiz.

46 Ha ma karit ar re hag ho kar, peseurt gopr ho-po ? Daoust ha ne ra ket ar bublikaned kemend-all ? 47 Ma ne zaludit nemed ho preudeur, petra a rit ouspenn ? Daoust ha ne ra ket ar baianed kemend-all ? 48 C’hwi eta, bezit peurvad, evel m’eo peurvad ho Tad euz an neñv. »


Pennad c’hweh

« Na glaskit ket beza gwelet »

1 « Diwallit da veza just dirag an dud evid beza gwelet mad ganto. A-hend-all n’ho-po ket a hopr digand ho Tad euz an neñv. »

An aluzenn

2 « Pa roez an aluzenn eta, na zon ket an trompill dirazout, evel ma ra ar bilbouzed er zinagogennou hag er ruiou, evid beza meulet gand an dud. Amen, lavared a ran deoh : resevet o-deus o gopr.

3 Med te, pa roez an aluzenn, ra jomo da zorn kleiz heb anaoud ar pez a ra da zorn dehou, 4 evid ma vo da aluzenn eun dra guz. Ha da Dad, hag a wel an traou kuz, henn talvezo dit. »

Ar bedenn

5 « Pa bedit, na vezit ket e-giz ar bilpouzed, rag plijoud a ra dezo chom en o zao da bedi, er zinagogennou hag e korn ar plasennou, evid beza gwelet gand an dud. Amen, lavared a ran deoh : resevet o-deus o gopr.

6 Te a-vad, pa fell dit pedi, kee e-barz da gambr, prenn an nor, ha ped da Dad en eun doare kuz ; ha da Dad hag a wel an traou kuz, henn talvezo dit. »

« On Tad »

7 « Pa bedit, na randonit ket, evel ma ra ar baianed ; kredi a ra dezo e vint selaouet dre forz komzou. 8 Na vezit ket evelto eta : ho Tad a oar petra ho-peus ezomm, a-raog ma houlennot digantañ. 9 C’hwi eta, pedit evel-henn :

On Tad hag a zo en neñv, da ano bezet santelleet.
10 Da rouantelez deuet deom.
Da volontez bezet greet, evel en neñv war an douar ive.
11 Ro deom hirio or bara euz an deiz-mañ.
12 Dizamm on dleou deom, evel m’on-eus ive dizammet on dleourien.
13 N’on lez ket da goueza en tentadur, med on dieub diouz an droug”.

14 Rag, ma pardonit o fehejou d’an dud, e pardono deoh ive ho Tad a zo en neñv. 15 Med, ma ne bardonit ket d’an dud, ho Tad ne bardono ket ho mankou deoh kennebeud. »

Ar yun

16 « Pa rit yun, na vezit ket evel pilpouzed o fennou teñval ; diskouez a reont dremmou distruj, evid beza gwelet o yuni gand an dud. Amen, lavared a ran deoh : resevet o-deus o gopr.

17 Te a-vad, pa rez yun, lak c’hwez-vad war da benn, ha gwalh da zremm, 18 ma chomi heb beza gwelet o yuni gand an dud, med gand da Dad, en eun doare kuz. Ha da Dad, hag a wel an traou kuz, henn talvezo dit. »

« E-leh m’ema da denzor, eno ema da galon »

19 « Na zastumit ket teñzoriou evidoh, war an douar, e-leh ma tistruj tartouz ha skrigner, e-leh ma skrap ha ma toull al laeron. 20 Med dastumit teñzoriou evidoh en neñv, e-leh na zistruj na tartouz na skrigner, e-leh na doull ha na skrap al laeron. 21 Rag, e-leh m’ema da deñzor, eno e vo da galon ive ».

« Ma vez sklêr da lagad »

22 « Lamp da gorv eo da lagad. Ma vez sklêr da lagad eta, e vo sklêrijennet da gorv a-bez. 23 Ma vez fall da lagad a-vad, e vo teñval da gorv a-bez. Ha ma vez teñval eta ar sklêrijenn a zo ennout, pebez teñvalijenn ! »

Doue pe an arhant

24 « Den ebed ne hell servicha daou vestr : pe kasaad a raio unan ha kared egile, pe derhel a raio da unan ha dismegañsi egile. Ne hellit ket servicha Doue ha Mamon. »

« Bezit dineh »

25 « Setu perag e lavaran deoh : Bezit dineh evid ho puhez : petra debri, petra eva ? Hag evid ar horv : gand petra e wiska ? Daoust ha n’eo ket ar vuhez muioh eged ar boued, hag ar horv muioh eged an dillad ? 26 Sellit ouz laboused an neñv : ne hadont ket ha ne vedont ket, ne zastumont ket er grignolou. Hag o maga a ra ho Tad euz an neñv. Daoust ha ne dalvezit ket muioh egeto ?

27 Piou ahanoh a hell, dre forz tregasi, lakad eun ilinad ouspenn da hirder e vuhez ? 28 Hag evid an dillad, perag en em jala ? Sellit ouz lili ar pradou, ha penaoz e kreskont : ne labourant ket, ne nezont ket. 29 Me a lavar deoh a-vad penaoz Salomon zoken, e-kreiz e hloar, n’eo ket bet gwisket e-giz unan anezo. 30 Ma vez gwisket evel-se gand Doue geot ar parkeier, a zo beo hirio hag a vo taolet warhoaz en tan, pegement muioh a raio evidoh, tud o feiz dister !

31 Arabad en em jala eta, o lavared : “Petra debri ?” pe : “Petra eva ?” pe : “Gand petra en em wiska ?” 32 Rag an oll draou-ze eo ’z eus klask wamo gand ar baianed. Med gouzoud mad a ra ho Tad euz an neñv ho-peus ezomm anezo. 33 Klaskit da genta rouantelez Doue hag e justis : an oll draou-ze a vo roet deoh war ar marhad. 34 N’en em jalit ket eta evid warhoaz : warhoaz en em jalo evitañ e-unan. Da beb devez eo tra-walh e boan. »


Pennad seiz

« Na varnit ket »

1 « Na varnit ket, evid na viot ket barnet. 2 Rag gand ar varn a varnit ganti, e viot barnet. Ha gand ar muzul a vuzuillit gantañ, e viot muzuliet ».

Ar blouzenn hag an treust

3 « Perag e sellez ouz ar blouzenn a zo e lagad da vreur ? Ha ne welez ket an treust a zo en da lagad ? 4 Penaoz c’hoaz e hellez lavared d’az preur : “Lez, ma tennin ar blouzenn kuit euz da lagad”, pa ’z eus eun treust en da lagad-te ? 5 Pilpouz ! Tenn da genta an treust kuit euz da lagad ! Neuze e weli sklêr evid tenna ar blouzenn kuit euz lagad da vreur. »

Perlez dirag ar moh

6 « Arabad roi d’ar chas ar pez a zo santel. Na daolit ket ho perlez dirag ar moh, gand aon n’o bresfent gand o zreid, hag o troi kein, na zeuint d’ho tispenn. »

Goulennit

7 « Goulennit hag e vo roet deoh ! Klaskit hag e kavot ! Skoit hag e vo digoret deoh ! 8 Rag, piou bennag a houlenn, a reseo, piou bennag a glask, a gav, ha d’an hini a sko, e vo digoret.

9 Piou ahanoh, pa houlenn e vab bara digantañ, a roio dezañ eur mên ? 10 Pe c’hoaz, ma houlenn eur pesk, daoust hag e roio dezañ eun naer ? 11 Ma ouzoh-c’hwi eta – tud fall ma ’z oh – roi provou mad d’ho pugale, seul vui e roio ho Tad euz an neñv traou mad d’ar re a houlenn digantañ. »

Al lezenn aour

12 « Kement tra a fell deoh a rafe an dud evidoh, her grit-c’hwi evito : ya, kement-se eo al lezenn hag ar brofeted. »

An nor striz

13 « Deuit tre dre an nor striz : rag ledan eo an nor, ha frank an hent a gas da goll ! Ha kalz a zo o vond gantañ. 14 Pegen striz an nor, pegen enk an hent a gas d’ar vuhez ! Ha nebeud int ar re a zeu d’e gavoud. »

Ar wezenn hag he frouez

15 « Diwallit diouz ar falsprofeted : dond a reont davedoh dindan stumm deñved, med en diabarz, ez int bleizi, prest da skrapa. 16 Dre o frouez eo e vint anavezet ganeoh. Daoust hag e vez kutulliet rezin war ar spem ? pe fiez war an drez ? 17 Evel-se e taol peb gwezenn vad frouez brao ; eur wezenn vrein a-vad a daol frouez fall. 18 Ne hell ket eur wezenn vad taoler frouez fall, nag eur wezenn vrein taoler frouez brao. 19 Kement gwezenn na daol ket frouez brao a vez trohet ha stlapet d’an tan. 20 Evel-se, dre o frouez eo e vint anavezet ganeoh. »

Lavared hag ober

21 « N’eo ket peb den hag a lavar : “Aotrou ! Aotrou !”, a yelo e-barz rouantelez an neñv, med an neb a ra bolontez ma Zad a zo en neñv. 22 Kalz a lavaro, en deiz-se : “Aotrou ! Aotrou ! Daoust ha n’on-eus ket profetizet en da anao, taolet diaouled er-mêz en da ano, greet burzudou en da ano ?” 23 Ha neuze e lavarin dezo : “Biskoaz n’am-eus hoh anavezet. Kit pell diouzin, c’hwi hag a ra traou direiz” ! »

An daou di

24 « Evel-se, an neb a glev ma homzou hag o has da benn, a vo heñvel ouz eun den fur, bet savet eun ti gantañ war ar roh. 25 Kouezet eo ar glao, ruillet o-deus an douriou braz, c’hwezet o-deus an aveliou, hag int eet a-benn d’an ti-ze : n’eo ket kouezet hemañ, rag savet e oa bet war ar roh.

26 Hag an neb a glev ma homzou ha n’o has ket da benn, a zo heñvel ouz eun den sod hag e-neus savet e di war an trêz. 27 Kouezet eo ar glao, ruillet o-deus an douriou braz, c’hwezet odeus an aveliou, hag eo bet brallet an ti : kouezet eo hemañ ha braz an diskar anezañ. »

28 Hogen, pa echu Jezuz gand ar homzou-ze, e chom an dud sabatuet gand e gelennadurez : 29 rag kelenn a ra evel eun den o komz euz e berz eñ e-unan, ha n’eo ket evel ar skriverien.


Pennad eiz

An den lor glanneet

1 Diskenn a ra euz ar menez. Kalz tuda ya d’e heul. 2 Ha setu eun den lor o tostaad hag o stoui durazañ, en eur lavared : « Aotrou ! Ma fell dit, e hellez ma glannaad. 3 Astenn a ra Jezuz e zorn ha touch outañ, en eur lavared : « Felloud a ra din : bez glanneet ! » Dioustu eo glanneet e lorgnez. 4 Ha Jezuz da lavared : « Taol evez ! Na lavar da zen, med kerz d’en em ziskouez d’ar beleg, ha da ginnig ar prov bet gourhemennet gand Moizez : eun testeni e vo evid an dud. »

Feiz ar hantener

5 Edo oh antreal e Kafarnaom. Tostaad a ra eur hantener outañ 6 hag e erbedi : « Aotrou, emezañ, bez’ ema ma mevel war e wele, du-mañ, seizet hag o houzañv mil boan. » 7 Lavared a ra : « Mond a ran-me d’e barea. » 8 Respont a ra ar hantener : « Aotrou, emezañ, n’on ket din e teufes dindan ma zoenn. Med lavar eur ger hepken hag e vo pareet ma mevel. 9 Rag me, hag a zo eun den dindan halloud, ez eus soudarded dindannon. Lavared a ran da unan : “Kee !” hag ez a. D’unan all : “Deus !” hag e teu. D’am mevel : “Gra an dra-mañ !” hag her gra. »

10 Souezet eo Jezuz o kleved kement-se, ha lavared a ra d’ar re o veza ouz e heul : « Amen, her roi a ran deoh da houzoud : e den ebed en Izrael n’em-eus kavet seurt feiz. 11 Lavared a ran deoh : kalz a zeuio euz ar Zav-heol hag euz ar Huz-Heol d’azeza ouz taol, gand Abraham, lzaak ha Jakob, e rouantelez an neñv. 12 Med mibien ar rouantelez a vo taolet er-mêz, en deñvalijenn diavêz : eno e vo leñvadeg ha skrignadeg dent. » 13 Neuze e lavar Jezuz d’ar hantener : « Kee ! Evel m’az-peus kredet, ra vo greet dit ! » Pareet eo ar mevel d’an eur-ze.

Mamm-gaer Pèr

14 Dond a ra Jezuz beteg ti Pèr, ha kavoud mamm-gaer hemañ war he gwele, terzienn ganti. 15 Kemer a ra-eñ he dorn, hag ez a an derzienn kuit. Sevel a ra-hi, hag o zervicha.

16 Deut an abardaez, e tougont dirazañ kalz tud eet an diaoul enno. Kas a ra ar sperejou er-mêz, gand eur gomz, ha parea an oll re glañv, 17 evid seveni ar ger bet lavaret gand Izai : « Kemer a ra-eñ on drougou, samma a ra or hleñvejou. »

Evid mond da heul Jezuz

18 O weled e-leiz a dud en-dro dezañ, e kemenn Jezuz mond d’an tu all d’al lenn. 19 Eur skriver a dosta outañ, o lavared : « Mestr, mond a rin war da lerh, forz da beleh ez afes. » 20 Respont a ra Jezuz dezañ : « Al lern o-deus o zoullou, laboused an neñv o neiziou. Med mab an den n’e-neus leh ebed da ziskuiza e benn. »

21 Unan euz e ziskibien a lavar dezañ : « Aotrou ! Lez ahanon da vond da zouara ma zad, da genta. » 22 Respont a ra Jezuz dezañ : « Deus d’am heul ! Lez ar re varo da zouara o zud varo ! »

Sioullaad a ra ar barrad-amzer

23 Pignad a ra er vag, hag e ziskibien d’e heul. 24 Ha setu ma teu eur barrad-amzer war ar mor, ken m’eo goloet ar vag gand an tonnou. Med kousket eo-eñ.

25 Tostaad a reont, hag e zihuni, en eur lavared : « Aotrou ! On savete ! Kollet om ! » 26 Lavared a ra dezo : « Perag kaoud aon, tud dister o feiz ? » Neuze, en e zav, e hourdrouz an aveliou hag ar mor, ha setu eur halm-gwenn. 27 Souezet eo an dud hag e lavaront : « Peseurt den eo hemañ ken ma teu zoken an aveliou hag ar mor da zenti outañ ! »

Diaouled ha moh

28 Pa zegouez en tu all d’al lenn, e bro ar Hadarenianed, e teu davetañ daou zen eet diaouled enno, o tond er-mêz euz ar beziou. Ken fero int ma ne hell den ebed tremen dre an hent-se. 29 Ha setu m’en em lakont da grial : « Petra ahanom dit, emezo, mab da Zoue ? Ha deut out amañ, a-raog an amzer, d’on lakaad da houzañv ? »

30 Hogen, bez’ e oa, pell diouto, eur vandennad vraz a voh, o klask o boued. 31 E aspedi a ra an diaouled : « Ma on taolez er-mêz, emezo, or has er vandennad voh. » 32 Hag eñ da respont dezo : « It ! » Dond a reont er-mêz ha mond e-barz ar moh ; ha setu an tropell a-bez o tiruilla euz lein an tornaot, beteg ar mor. Mervel a reont en dour.

33 Tehed a ra kuit paotred ar moh, mond e kêr, ha kemenn pep tra c’hoarvezet diwar-benn an daou zen eet diaouled enno. 34 Ha setu ar gêr a-bez o tond war-zu Jezuz. Ouz e weled, e bedont da vond pell diouz o harzou.


Pennad nao

Pare eun den seizet

1 Pignad a ra er vag, ober an treiz ha dond d’e gêr. 2 Ha setu ma tegasent dezañ eun den seizet, astennet war eur gwele. Gwelet gantañ o feiz, e lavar Jezuz d’an den seizet : « Bez leun a fiziañs, ma faotr ! Pardonet eo da behejou dit. » 3 Med lod euz ar skriverien a lavar, enno o-unan : « Toui Doue a ra hemañ. »

4 Anaoud a ra Jezuz o zoñjennou, ha lavared : « Perag ar zoñjennou fall-se en ho kalon ? 5 E gwirionez, petra eo an êsa ? Lavared : “Pardonet eo da behejou dit”, pe lavared : “War-zao ! Ha bale” ? 6 Ahanta ! Evid ma ouzoh e-neus mab an den ar galloud war an douar da bardoni ar pehejou », e lavar d’an den seizet : « Sav en da zao ! Kemer da wele ha kerz d’ar gêr ! » 7 Sevel a ra, ha mond d’e di. 8 Gwelet kement-se gand ar boblad-tud, e sav doujañs enno. Gloar a rentont da Zoue a ro seurt galloud d’an dud.

Galvidigez Maze

9 O vond kuit alese, e wel Jezuz eun den, Maze e ano, azezet en e vureo-publikan. Lavared a ra dezañ : « Deus d’am heul ! » Sevel a ra, ha mond d’e heul. 10 Hogen, pa oa ouz taol en ti, setu ma teu kalz publikaned ha peherien. Mond a reont ouz taol gand Jezuz hag e ziskibien. 11 O weled kement-se, e lavar ar farizianed d’e ziskibien : « Perag ema ho mestr o tebri gand publikaned ha peherien ? »

12 Klevet ar gomz-se gantañ, e lavar Jezuz : « Ar re yah n’o-deus ket ezomm a vedisin, med ar re glañv. 13 Kit da zeski ar pez a dalv : “Trugarez eo emaon o klask ha n’eo ket sakrifisou”. Rag deut on-me da helver n’eo ket ar re just med ar beherien. »

« Ne yuner ket da zevez an eured »

14 Tostaad a ra neuze diskibien Yann outañ, hag int da lavared : « Ni hag ar farizianed a ra kalz yunou. Perag da ziskibien ne yunont ket. » 15 Jezuz a lavar dezo : « Daoust hag e hell tud an eured beza e glahar e-keid m’ema ar pried ganto ? Med dond a raio deiziou ma vo tennet ar pried diganto : neuze e yunint. »

« Tamm nevez ebed war eun dra goz »

16 « Ne vez gwriziet gand den ebed danvez nevez war eur pez-dillad koz. Rag sacha a ra an tamm nevez war ar pez-dillad, hag e teu ar rogadenn da veza gwasoh. »

« Ne laker ket gwin nevez e sehier-ler koz »

17 « Ne vez ket lakeet gwin nevez kennebeud e sehier-ler koz. A-hend-all e tarz ar zehier-ler, sur : skuillet ar gwin ha kollet ar zehier-ler. Med laket e vez ar gwin nevez e sehier-ler nevez, hag eo miret ar gwin hag ar zehier-ler. »

Pedenn eun den a renk uhel

18 Tra ma oa-eñ o tistaga ar homzou-ze, setu o tostaad outañ eun den a reñk uhel. Stoui a ra dirazañ, en eur lavared : « Ema ma merh o paouez mervel. Med deus da ober eul lakad dom warni hag e vevo-hi. » 19 Sevel a ra Jezuz ha mond d’e heul, asamblez gand e ziskibien.

Ar vaouez pareet

20 Ha setu eur vaouez hag a oa o koll gwad abaoe daouzeg vloaz. O tostaad outañ dre a-dreñv, e touch-hi ouz pempillenn e wiskamant. 21 Rag soñjal a ree, enni heh-unan : « Ma teuan a-benn da douch ouz e zillad hepmuiken, e vin saveteet. » 22 Distroi a ra Jezuz, ha lavared : « Bez leun a fiziañs, merh, gand da feiz out bet saveteet ! » Hag eo saveteet ar vaouez d’an eur-ze end-eeun.

Sevel a ra eur plah yaouank

23 En em gavet Jezuz e ti ar mestr, hag o weled ar hoarierien fleüt hag ar boblad-tud o veska, 24 e lavar-eñ : « It kuit, rag n’eo ket maro ar plahig : kousket eo. » Goap a reent anezañ. 25 Ha pa ’z eo taolet an dud er-mêz, ez a tre, e krog e dorn ar plahig, hag homañ da zevel. 26 Ar vrud euz kement-se a zo skignet dre ar vro-ze a-bez.

Pare daou zen dall

27 Mond a ra Jezuz kuit alese. O vond war e lerh, daou zen dall, forz kri ganta : « Az-pez truez ouzom, emezo, mab da Zavid ! » 28 Pa zegouez en ti, e tosta an daou zen dall outañ. Ha Jezuz da lavared dezo : « Kredi a rit e hellan ober an dra-ze ? » Respont a reont : « Ya, Aotrou ! »

29 Neuze e touch-eñ ouz o daoulagadou, en eur lavared : « Ra vo greet deoh hervez ho feiz ! » 30 Ha digoret eo o daoulagadou. O kemer eur êr rust, e lavar Jezuz dezo : « Diwallit na ouezo den ebed ! » 31 Med int, kerkent hag eet er-mêz, a skign e vrud er vro-ze a-bez.

Eun den mud a gomz

32 Pa ’z eont er-mêz, setu ma tegasont dezañ eun den mud, eet an diaoul ennañ. 33 Eur wech kaset an diaoul er-mêz, e stag an den mud da gomz. Souezet eo an dud, hag e lavaront : « Biskoaz n’eus bet gwelet seurt tra en Izrael. » 4 Lavared a ree ar farizianed a-vad : « Dre vestr an diaouled eo e kas-eñ an diaouled er-mêz. »

Mederien evid an eost

35 Bale a ree Jezuz dre an oll gêriou ha kêriadennou, evid kelenn en o zinagogennou, embann kelou mad ar rouantelez, parea pep klañvijenn ha peb gwander.

36 Hag o weled ar boblad-tud, eo fromet beteg don e galon en abeg dezo, rag skuiz hag asik int, e-giz deñved ha n’o-deus ket a vesaer. 37 Neuze e lavar-eñ d’e ziskibien : « Braz eo an eost, hag ar vederien nebeud anezo ! Goulennit eta digand mestr an eost ma lako mederien da vond er-mêz evid an eost. »


Pennad deg

An daouzeg abostol

1 Gelver a ra davetañ e zaouzeg diskib, hag e ro dezo galloud war ar sperejou dihlan, evid o kas er-mêz, hag evid parea pep kleñved ha peb gwander.

2 An daouzeg abostol, setu o ano : an hini kenta Simon, anvet Pèr, hag Andreo, e vreur ; Jakez, mab da Zebede, ha Yann, e vreur ; 3 Filip ha Berteleme, Tomaz ha Maze, ar publikan ; Jakez, mab da Alfe, ha Tadde ; 4 Simon ar Hananean ha Judaz Iskariot, an hini end-eeun e-neus e werzet.

Jezuz o kas an daouzeg

5 Kas a ra Jezuz an daouzeg-se, gand ar homzou-mañ : « N’it ket war heñchou ar baianed. N’antreit ket en eur gêr a Zamaritaned. 6 Med it kentoh war-zu an deñved kollet euz ti Izrael. 7 En eur vond, embannit ha lavarit : “Tost ema rouantelez an neñv”. 8 Pareit ar re vahagnet. Lakit ar re varo da zevel da veo. Glannait ar re lor. Kasit an diaouled kuit.

Roet ez eus bet deoh evid netra : roit evid netra. 9 Chomit heb klask kaoud aour nag arhant, na gwenneg ebed evid ho kouriz, 10 na bisah ebed evid an hent, na diou zae, na skasou, na baz ebed, rag reiz eo e vefe roet e voued d’ar micherour.

11 Ar gêr pe gêriadenn m’en em gavit enni, klaskit gouzoud piou a zo dign d’ho tegemer. Ha chomit en e di beteg ma ’z eot kuit. 12 En eur vond en ti, lavarit dezañ : “Peoh !” 13 Ma ’z eo dign an ti, ra zeuio ho peoh warnañ ! Ha ma n’eo ket, ra zeuio ho peoh warnoh en-dro !

14 Nep piou bennag n’ho tegemer ket, ha ne zelaou ket ho komzou, hejit poultrenn ho treid en eur zond e-mêz an ti-ze pe ar gêr-ze. 15 Amen, lavared a ran deoh : êsoh e vo deiz ar varn da houzañv evid Sodom ha Gomor eged evid ar gêr-ze ! 16 Setu m’ho kasan evel deñved e-kreiz ar bleizi. Bezit eta war evez evel naered, eeun a-vad evel koulmed. »

« Roet e viot »

17 « Diwallit diouz an dud : ho roi a raint d’al leziou-barn, hag ho foueta a raint er zinagogennou. 18 En abeg din-me, e viot kaset dirag gouarnourien ha rouaned, en testeni evito hag evid ar broiou. 19 Pa viot barnet, arabad deoh beza nehet : “Petra da lavared ? Ha penaoz ?” Rag kement-se : petra lavared, a vo roet deoh d’an eur-ze. 20 N’eo ket c’hwi hag a lavaro, med Spered ho Tad eo a gomzo ennoh.

21 Eur breur a roio e vreur d’ar maro, eun tad e vugel ; ar vugale en em zavo a-eneb o herent, hag o lakaio da vervel. 22 Kasoni a vago an oll ouzoh, en abeg d’am ano. Med an hini a zalho mad beteg ar fin, hennez a vo salvet.

Tehit

23 « Ma vezit heskinet ganto en eur gêr, tehit d’unan all. Amen, lavared a ran deoh : n’ho-po ket echuet gand kêriou Izrael ma vo deut mab an den en-dro.

Diskib ha mestr

24 « N’eus diskib ebed a-uh d’e vestr, na mevel ebed a-uh d’e aotrou. 25 Tra-walh eo d’an diskib dond da veza evel e vestr, ha d’ar mevel evel e aotrou. M’o-deus greet “Beelzeboul” euz mestr an ti, na pegement muioh e raint euz re e di ! »

« N’ho-pet ket aon »

26 « N’ho-pet ket aon razo ’ta : netra holoet ne jomo heb beza dizoloet, netra guzet ne jomo heb beza anavezet. 27 Ar pez a lavaran deoh en deñvalijenn, lavarit-eñ dindan lagad an heol. Ar pez a glevit e pleg ho skouarn, embannit-eñ war al leurennou-toenn.

28 N’ho-pet ket aon rag ar re a laz ar horv, ha ne hellont ket laza an ene. Ho-pet aon kentoh rag an hini a hell kas ene ha korv d’ar jehenn. 29 Daoust ha ne vez ket gwerzet daou filip evid eur gwenneg ? Ha ne gouez nikun anezo war an douar heb gouzoud d’ho Tad. 30 Evidoh, peb blevenn zoken euz ho penn a zo bet kontet. 31 N’ho-pet ket aon eta : talvoud a rit-c’hwi dreist eun nijad filiped.

32 Setu perag : nep piou bennag en em zisklêrio a-du ganin, dirag an dud, en em zisklêrin-me a-du gantañ ive, dirag ma Zad a zo en neñv. 33 Ha nep piou bennag am naho, dirag an dud, a vo nahet ganin ive, dirag ma Zad a zo en neñv. »

« An neb na gemer ket e groaz »

34 « Na gredit ket on deut da zegas ar peoh war an douar : n’on ket deut da zegas ar peoh med ar hleze. 35 Rag dond a ran da zispartia an den diouz e dad, ar verh diouz he mamm, ar vaouez diouz he mamm-gaer. 36 Ha tud e di e-no an den da enebourien.

37 Piou bennag agar e dad pe e vamm dreiston-me, n’eo ket dign ahanon. Piou bennag a gar e vab pe e verh dreiston-me, n’eo ket dign ahanon. 38 Hag an neb na gemer ket e groaz ha ne gerz ket war ma lerh, n’eo ket dign ahanon. 39 Piou bennag a gav e vuhez, he hollo. Piou bennag a goll e vuhez, abalamour din, he havo. »

« Piou bennag ho tegemer »

40 « Piou bennag ho tegemer, am degemer, ha piou bennag am degemer, a zegemer an hini m’on bet kaset gantañ. 41 An neb a zegemer eur profet, evel profet, a resevo gopr eur profet. Piou bennag a zegemer eun den just, evel den just, a resevo gopr eun den just. 4 Piou bennag a ro, dre ma ’z eo diskib din, eur werennad dour fresk hepken da eva da unan euz ar re vihan-mañ, amen, lavared a ran deoh : ne gollo ket e hopr. »


Pennad unneg

1 Hogen, echu gand Jezuz roi e gelennadurez d’e zaouzeg diskib, ez a kuit alese da gelenn ha da embann en o hêriou.

Diwar-benn Yann

2 En toull-bah, e kiev Y ann ano euz oberou ar Hrist. 3 Kas a ra e ziskibien da houlenn digantañ : « Ha bez’ out-te an hini o tond pe dao eo deom gortoz unan all ? » 4 Respont a ra Jezuz dezo : « It, emezañ, da gemenn da Yann ar pez a glevit hag a welit : 5 tud dall a wel ha tud kamm a vale ; tud lor a zo glanneet ha tud vouzar a glev ; tud varo a adsav, ha d’ar re baour eo embannet ar helou mad. 6 Eüruz an hini na vo ket gwall-skweriet en abeg din-me ! »

Komz a ra Jezuz diwar-benn Yann

7 P’ema ar re-mañ o vond kuit, e krog Jezuz da gomz diwar-benn Yann : « Piou oh eet da weled er goueleh ? Eur raosklenn hejet gand an avel ? 8 Med piou eta oh-chwi eet da weled ? Eun den gwisket gand dillad cheuh ? Setu m’ema an dud gwisket evel-se e paleziou ar rouaned. 9 Med petra oh eet da weled ? Eur profet ? Ya, ha lavared a ran deoh : muioh eged eur profet. 10 Diwar e benn eo ez eus bet skrivet : “Setu ma kasan ma hannad dirag da zremm ; kompeza a raio da hent dirazout”.

11 Amen, lavared a ran deoh : e-touez ar re bet ganet gand eur vaouez, n’eus savet den ebed brasoh eged Yann-Vadezour ; med brasoh egetañ eo an hini bihanna e rouantelez Doue. 12 Adaleg deiziou Yann-Vadezour beteg bremañ, e vez gwallgaset rouantelez an neñv, ha ne vez skrapet nemed gand ar re daer. 13 Rag diouganet o-deus an oll brofeted hag al lezenn, beteg Yann ; 14 ha m’ho-peus c’hoant da zegemer kement-mañ : eñ eo an Eliaz a oa da zond. 15 Ra glevo an neb e-neus diouskouarn da gleved !

« Bugale war ar blasenn

16 « Ouz piou keñveria ar rummad-tud-mañ ? Heñvel eo ouz bugale azezet war al leurgêr. Gelver a reont ar re all, 17 en eur lavared : “C’hoariet on-eus fleüt, ha n’ho-peus ket dañset. Kanet on-eus gwerziou, ha n’ho-peus ket leñvet”. 18 Ya ’vad ! Deut eo Yann hag e chomo heb debri nag eva, ha lavaret o-deus : “Eun diaoul a zo ennañ”. 19 Dond a ra mab an den, o tebri hag oh eva, hag e lavaront : “Setu eun den lonteg hag eun ever gwin, mignon d’ar bublikaned ha d’ar beherien”. Med reiz eo bet kavet ar Furnez dre heh oberou. »

Kêriou reuzeudig

20 Neuze e krog-eñ d’ober rebechou d’ar hêriou m’eo bet greet enno kement euz e vurzudou, dre ma n’o-deus ket cheñchet buhez : 21 « Siwaz dit-te, Korazin ! Siwaz dit-te, Betsaid ! Ma vefe bet greet, e Tir ha Sidon, ar burzudou bet greet en ho touez, pell-zo o-defe cheñchet buhez, sah ha ludu warno. 22 Setu ma lavaran deoh : evid Tir ha Sidon, e vo êsoh devez ar varn da houzañv eged evidoh-c’hwi. 23 Ha te, Kafarnaom, pignad a ri beteg an neñv ? Ne ri ket : diskenn a ri beteg an ivern. Rag, ma vefe bet greet e Sodom ar burzudou greet ennout, e vije anezi c’hoaz an deiz hirio. 24 Setu ma lavaran deoh : evid douar Sodom, e vo êsoh devez ar varn da houzañv eged evidoh. »

« En em ziskouez a rez d’ar re vihan »

25 En amzer-ze, e stag Jezuz da gomz, en eur lavared :

« Meuleudi dit, Tad, Aotrou an neñv hag an douar,
o veza ma kuzez an traou-mañ ouz ar ar re fur hag ouz ar re speredeg,
ha m’o diskouezez d’ar re vihanig.
26 Ya, Tad, setu aze an dibab greet gand da garantez.
27 Pep tra a zo bet lakeet din gand ma Zad, ha den ebed n’anavez ar Mab, nemed an Tad.
Den ebed n’anavez an Tad, nemed ar Mab, hag an neb a fell d’ar Mab henn diskulia dezañ. »

« Deuit davedon »

28 « Deuit beteg ennon, c’hwi oll hag a zo sammet dindan ar beh, ha ho tizamma a rin-me. 29 Kemerit ma yeo warnoh, ha bezit kelennet ganin, rag bez’ on leun a zouster hag izel a galon. 30 Ha kavoud a reot diskuiz d’hoh eneou. Rag êz eo ma yeo da zougen, ha skañv ma zamm. »

 


Pennad daouzeg

Mestr ar zabad

1 En amzer-ze, ez a Jezuz a-dreuz ar parkeier, da zeiz ar zabad. Naon o-deus e ziskibien, ha staga a reont da denna pennou-ed. 2 O weled kement-se, e lavar ar farizianed dezañ : « Setu da ziskibien oh ober ar pez n’eo ket aotreet da zeiz ar zabad. »

3 Lavared a ra dezo : « N’ho-peus ket lennet ar pez e-neus greet David ? Naon e-noa, hag ar re all gantañ : 4 penaoz eo eet tre e Ti-Doue, e-leh m’e-neus debret baraennou ar hinnig, ne oa ket aotre d’o debri, na dezañ na d’ar re all gantañ, med d’ar veleien hepken.5 N’ho-peus ket lennet, e-barz al lezenn, e vez torret ar zabad gand ar veleien, en templ, da zeiz ar zabad, hag int digabluz ? 6 Hogen, lavared a ran deoh : brasoh eged an templ a zo amañ. 7 Ma anavezfeh pez a dalv : “Trugarez a fell din kaoud ha n’eo ket sakrifisou”, ne gondaonfeh ket an dud digabluz. 8 Rag bez’ eo mab an den mestr war ar zabad zoken. »

An dorn dizehet

9 O vond kuit alese, e teu tre en o zinagogenn. 10 Bez ’ez eus eno eun den gand eun dorn dizehet. Goulenn a reont digantañ : « Daoust hag ez eus aotre da barea, da zeiz ar zabad ? » Kement-se evid gelloud e damall. 11 Lavared a ra dezo : « Lakom en ho touez eun den gand eun dañvadez hepken : ma kouez homañ en eun toull, da zeiz ar zabad, daoust ha ne grogo ket enni d’he zenna er-mêz ? 12 Pegement talvoudusoh eta eo eun den eged eun dañvadez. Setu perag ez eus aotre d’ober vad, da zeiz ar zabad. » 13 Neuze e lavar d’an den : « Astenn da zorn ! » E astenn a ra hag e teu da veza pareet, yah evel egile. 14 Med eur wech eet er-mêz, e kuzuill ar farizianed, an eil re gand ar re all, evid klask an doare d’e gas da goll.

O farea oll a ra

15 Klevet kement-se gantañ, ez a Jezuz kuit alese. Mond a ra katz tud d’e heul, hag e ro-eñ ar pare d’an oll anezo. 16 Ha gourdrouzet int gantañ, ma n’e ziskuliint ket. 17 Evid ma vo sevenet ar ger lavaret gand ar profet Izai :

18 « Setu ma zervicher, dibabet ganin, an hini dreist-karet ganin,
ma plijan ennañ gand ma oll ene.
Lakaad a rin ma Spered dajom warnañ.
Kemenn a raio ar gwir d’ar baianed
.
19 Ne dabuto ket, ne youho ket, ne vo ket klevet e vouez war al leurgêriou.
20 Ne dorro ket ar raosklenn vreset, ne vougo ket ar vouchenn o tivogedi c’hoaz,
ken n’e-no lakeet ar justis da veza treh
.
21 Ha lakaad a raio ar baianed o fiziañs en e ano. »

Eun den dall ha mud dre an droug-spered

22 Neuze e tegaser dezañ eun den, dall ha mud dre an droug-spered. E barea a ra, ha setu an den mud o komz hag o weled. 23 Souezet e oa an oll dud hag e lavarent : « Hennez, daoust ha n’eo ket eñ mab David ? »

Peb rouantelez disrannet

24 O kleved kement-se, e lavar ar farizianed : « Hennez ne daol an diaouled er-mêz nemed dre Veelzeboul, mestr an diaouled. » 25 Anaoud a ra Jezuz o zoñjennou, ha lavared dezo : « Kement rouantelez, disrannet enni heh-unan, a zeu da veza didud. Kement kêr ha kement tiegez, eet an dizunvaniez enno, ne hellint ket chom en o zao. 26 Ma vez taolet ar zatan er-mêz gand ar zatan, ez eo disrannet a-eneb dezañ e-unan : penaoz eta e talho e rouantelez ? 27 Ha ma taolan-me an diaouled er-mêz dre Veelzeboul, dre biou o zaol er-mêz ho mibien-c’hwi ? Evelse e vint, int-i o-unan, ho parnerien. 28 Med ma taolan an diaouled er-mêz dre Spered Doue, ahanta, neuze eo deut rouantelez Doue evidoh. »

An den kreñv hag al laer

29 « Pe hoaz, penaoz e hell unan bennag mond tre e-barz ti eun den kreñv ha skrapa e draou, ma ne vez ket kordennet an den kreñv gantañ ? Ha neuze e lako-eñ ar skrap war an ti. »

« An neb n’ema ket ganin »

30 « An neb n’ema ket ganin, a zo a-eneb din. An neb ne zastum ket ganin, a zo o strewi. »

Ar ger dizakr a-eneb ar Spered

31 « Setu perag e lavaran deoh : pardonet e vo d’an dud kement pehed, kement ger dizakr, med ar ger dizakr a-eneb ar Spered ne vo ket pardonet. 32 An neb a lavar eur gomz a-eneb mab an den, e vo pardonet an dra-ze dezañ. Med an neb a gomz a-eneb ar Spered, an hini Santel, ne vo ket pardonet kement-se dezañ, nag er bed-mañ nag en hini da zond.

Ar gomz a zo frouez ar galon

33 Lakit eur wezenn vad, ha mad e vo ar frouez. Lakit eur wezenn glañv, ha klañv e vo ar frouez. Rag diouz he frouez e vez anavezet ar wezenn. 34 Gouenn naered ! Penaoz e hellit lavared traou mad, fall ma ’z oh-c’hwi ? Rag komz a ra ar genou diwar leun-barr ar galon. 35 Tenna a ra an den mad traou mad euz e deñzor mad, hag an den fall traou fall euz e deñzor fall.

36 Setu perag e lavaran deoh : da zeiz ar varn, e rento an dud kont euz kement ger goullo distaget ganto. 37 Rag, diouz da gomzou eo e vi didamallet, ha diouz da gomzou e vi kondaonet. »

Sin Jonaz

38 Neuze e lavar dezañ lod euz ar skriverien hag euz ar farizianed : « Mestr, emezo, ni a garfe gweled eur zin greet ganeoh. » 39 Jezuz a respont dezo : « Rummad fall hag avoultrer ! Klask a ra eur zin ! Sin ebed ne ro roet dezañ, nemed hini ar profet Jonaz. 40 Rag, evel m’eo bet Jonaz e kov ar pesk braz, e-pad tri devez ha teir nozvez, evel-se e vo mab an den, e-pad tri devez ha teir nozvez, e kalon an douar.

41 Sevel a raio tud Niniv, da zeiz ar varn, a-eneb ar rummad-mañ, hag e kondaoni, rag cheñchet o-deus buhez dre brezegenn Jonaz. Ha setu amañ muioh eged Jonaz. 42 Ha dihuni a raio rouanez ar Hreisteiz, da zeiz ar varn, gand ar rummad-mañ, hag e gondaoni, rag deut eo-hi euz penn all ar bed da zelaou fumez Salomon. Ha setu amañ muioh eged Salomon. »

Seiz diaoul all gwasoh

43 « Eur wech eet e-mêz eun den, ez a ar spered dihlan du-mañ, du-hont, dre al lehiou dizehet, evid kaoud diskuiz, 44 Ha ne gav ket. Neuze e lavar : “Mond a rin en-dro d’am zi m’on deut er-mêz anezañ”. Dond a ra, hag e gavoud bet skarzet, skubet, fichet. 45 Neuze ez a da gemer seiz spered all droukoh egetañ : hag int, eet tre e-barz, a jom ennañ. Hag ema stad diweza an den-ze gwasoh eged an hini genta. Evel-se e vo ev id ar rummad-tud-mañ. »

Ma mamm ha ma breudeur

46 Bez’ ema c’hoaz o komz d’ar boblad, ha chomet eo e vamm hag e vreudeur er-mêz, o klask komz outañ. 47 Unan bennag a lavar dezañ : « Setu m’ema da vamm ha da vreudeur er-mêz, o klask komz ouzit. » 48 Respont a ra Jezuz d’an den-ze : « Piou, emezañ, eo ma mamm ? Piou eo ma breudeur ? » 49 Astenn a ra e zorn war-zu e ziskibien, ha lavared : « Setu ma mamm ha ma breudeur. 50 Rag an neb a ra bolontez ma Zad a zo en neñv, hennez eo a zo breur, c’hoar ha mamm din. »


Pennad trizeg

Kelennadurez e-kichenn al lenn

1 En deiz-se, deut Jezuz e-mêz an ti, e oa eet d’azeza e-kichenn ar mor. 2 Ken stank eo an dud dastumet en-dro dezañ, ma pign en eur vag. Azeza a ra enni, e-pad ma chom an oll dud war an aot. 3 Komz a ra dezo dre barabolennou, diwar-benn kalz traou.

Parabolenn an hader

Lavared a ra : « Setu an hader o vond er-mêz evid hada. 4 P’ema o hada, e kouez eul lodenn war vord an hent. Dond a ra al laboused hag eo debret ar greun ganto. 5 Lod all a gouez war ar veindraill, e-leh ma n’eus ket kalz a zouar : dioustu e tiwanont, dre ma n’eo ket don an douar. 6 Med a-boan m’eo savet an heol, eo rostet ar greun gantañ, ha dre ma n’o-deus ket a wriziou, ez int dizehet.

7 Eul lodenn all a gouez war ar spem. Ar spem a gresk hag he moug. 8 Lod all a gouez war an douar brao hag e roont frouez : unan kant, unan tri-ugent, unan all tregont. 9 An neb e-neus diouskouarn, ra glevo ! »

Perag parabolennou ?

10 Tostaad a ra an diskibien ha lavared dezañ : « Perag e komzez dre barabolennou ? » 11 Respont a ra dezo : « Deoh, emezañ, eo roet misteriou rouantelez an neñv da anaoud. Dezo n’eo ket greet. 12 Evel-se ema : an neb e-neus, e vo roet kalz dezañ ; an neb n’e-neus ket, e vo tennet digantañ zoken ar pez e-neus. 13 Gand se e komzan dezo dre barabolennou : rag selled a reont heb selled, ha kleved a reont heb kleved na kompren.

14 Hag evito eo sevenet profesi Izai, pa lavar-eñ :

Evid kleved, e klevot ha ne gomprenot ket.

Evid selled, e sellot ha ne welot ket.
15 Rag ponnerreet eo kalon an dud-se :
gand diouskouarn kaled e klevont hag o daoulagad a stankont,
gand aon na welfent gand o daoulagad,
na glevfent gand o diouskouarn
,

na gomprenfent gand o halon,
na vefe cheñchet o buhez,
ha n’o farefen
”.

16 Evidoh, eüruz ho taoulagad : gweled a reont ; eüruz ho tiouskouarn : kleved a reont. 17 Amen, lavared a ran deoh : kalz profeted ha tud just o-deus bet c’hoant da weled ar pez a zellit outañ, ha n’o-deus ket gwelet, da gleved ar pez a glevit ha n’o-deus ket klevet. »

Komprenit ar barabolenn

18 « C’hwi eta, selaouit parabolenn an hader. 19 Neb a glev komz ar rouantelez, heb he hompren, e teu an hini droug da skrapa ar pez a zo bet hadet en e galon : an den-ze eo bord an hent m’eo bet taolet an had warnañ. 20 Ar pez a zo hadet war ar veindraill eo an den a glev ar gomz hag he reseo dioustu gand levenez. 21 Hogen, n’e-neus ket a wriziou ennañ e-unan med hedro eo : ma teu enkrez pe heskinèrèz, en abeg d’ar gomz, e strebot dioustu.

22 An douar m’eo bet kouezet an had ennañ e-kreiz ar spem, eo an den a glev ar gomz, med, gand neh ar vuhez ha touell ar binvidigez, eo mouget ar gomz ha difrouez e teu homañ da veza. 23 An douar brao a gouez an had warnañ eo an den a glev ar gomz hag he hompren ; dougen a ra frouez ha roi : unan kant, unan tri-ugent, unan all tregont. »

Parabolenn an dreog

24 Kinnig a ra dezo eur barabolenn all : « Heñvel eo, emezañ, rouantelez an neñv ouz eun den o hada had brao en e bark. 25 Med e-pad ma kousk an dud, e teu e enebour : hada a ra dreog war-horre, e-touez an ed, ha mond kuit. 26 Ha pa ziwan ar geot hag e roont pennou-ed, e teu ive an dreog war-wel.

27 Tostaad a ra mevelien an ozah, ha lavared dezañ : « Mestr, daoust ha n’eo ket had brao az-peus hadet en da bark ? Penaoz eta ez eus dreog ? » 28 Respont a ra dezo : « Eun den enebour eo e-neus her greet. » Ar vederien a lavar : « C’hoant az-peus ez afem d’e zastum ? 29 Hag eñ da lavared : « Nann ! Gand aon na vefe disgwriziennet an ed gand an dreog. 30 Lezit da greski an eil hag egile, beteg an eost. Da vare an eost, e lavarin d’ar vederien : “Dastumit an dreog da genta, hag ereit-eñ e duilladou evid o devi. An ed a-vad, dastumit-eñ em grignol”. »

Ar hreunenn zezo

31 Eur barabolenn all a ginnig dezo : « Heñvel eo, emezañ, rouantelez an neñv ouz eur hreunenn zezo e-neus eun den kemeret da hada en e bark. 32 Bez’ eo ar vihanna e-touez an oll hadennou. Med, p’he-deus kresket, e vez-hi an hini vrasa e-touez ar plantennou : dond a ra da veza gwezenn, ken e teu laboused an neñv d’ober o neiziou war he skourrou. »

Ar goell

33 Eur barabolenn all a lavar-eñ dezo : « Heñvel eo rouantelez an neñv ouz ar goell kemeret gand eur vaouez ha kemmesket ganti e-barz tri muzuliad bleud, beteg ma sav an toaz a-bez. »

Pep tra dre barabolennou

34 Kement-se oll a lavar Jezuz d’ar boblad-tud, dre barabolennou. Ha ne lavare netra dezo, nemed dre barabolennou, 35 evid seveni komzou ar profet : “Digori a rin ma genou evid komz dre barabolennou, embann a rin traou kuzet abaoe krouidigez ar bed.” »

« Displeg deom ar barabolenn »

36 Lezel a ra-eñ an dud, ha dond d’an ti. E ziskibien a dosta outañ, en eur lavared : « Displeg deom parabolenn an dreog er park. 37 Respont a ra dezo : « Mab an den, emezañ, eo an hader mad. 38 Ar bed eo ar park ; mibien an droug eo an dreog ; 39 an diaoul eo an enebour hag e-neus e hadet ; fin ar bed eo an eost ; an êlez eo ar vederien. 40 Dres e-giz m’eo an dreog dastumet ha devet en tan, evel-se evoe fin ar bed. 41 Mab an den a gaso e êlez, ha dastum a raint e-mêz ar rouantelez an oll wall-skweriou hag oberourien an droug. 42 O zaoler a raint er fornez tan : eno e vo leñvadeg ha skrignadeg dent. 43 Neuze e lugemo ar re just, evel an heol, e rouantelez o Zad. An neb e-neus diouskouarn, ra glevo ! »

An teñzor, ar berlezenn, ar roued

44 « Heñvel eo rouantelez an neñv ouz eun teñzor kuzet er park. Kavet eo gand eun den : e guzad a ra, ha, leun a levenez, ez a da werza pep tra e-neus, ha da brena ar park-se.

45 Ha c’hoaz : heñvel eo rouantelez an neñv ouz eur marhadour o klask perlez kaer. 46 Kavoud a ra eur berlezenn talvouduz-tre : mond a ra da werza kement tra e-neus, ha d’he frena.

47 Ha c’hoaz : heñvel eo rouantelez an neñv ouz eur roued taolet er mor. Dastum a ra pesked a beb gouenn. 48 Pa vez leun, eo sachet ganto war an aot. Azeza a reont ha dastum ar re vrao e panerou. Ar re vrein a-vad a daolont kuit. 49 Evel-se e vo e fin ar bed : dond a raio an êlez er-mêz ; dispartia a raint ar re fall diouz kreiz ar re just, 50 hag o zaoler er fornez tan : eno e vo leñvadeg ha skrignadeg dent. »

Ar skriver deut da veza diskib ar rouantelez

51 « Komprenet ho-peus kement-se ? –Ya » a lavaront dezañ. 52 Respont a ra dezo : « Evel-se eo kement skriver, o houzoud diouz rouantelez an neñv, heñvel ouz eun den, eun ozah hag a denn traou koz ha traou nevez euz e deñzor. » 53 Echuet gantañ displega ar parabolennou-ze, ez a Jezuz kuit alese.

« Den ebed ne vez profet en e vro »

54 Dond a ra d’e vro. Kelenn a ree e genvroiz en o zinagogenn, ken e oant souezet. Hag int da lavared : « Euz peleh e teu dezañ ar furnez-se hag ar burzudou ? 55 Hennez, daoust ha n’eo ket eñ mab ar halvez ? Daoust ha ne vez ket greet Mari euz e vamm ? Hag e vreudeur : Jakez, Jozef, Simon ha Jud, 56 hag e hoarezed, daoust ha n’emaint ket oll en on touez ? Euz peleh eta e teu dezañ kement-se ? » 57 Ha bez’ eo-eñ eur skoill evito. Lavared a ra Jezuz dezo : « Ne vez eur profet heb enor nemed en e vro hag en e famill. » 58 Ne ra ket kalz burzudou eno, en abeg d’o diouer a feiz.


Pennad pevarzeg

Yann adsavet ?

1 War-dro an amzer-ze, e klev Herodez, an tetrark, komz euz Jezuz. 2 Lavared a ra d’e ofiserien : « Yann-Vadezour e rank beza hemañ ; adsavet eo bet a-douez ar re varo : gand se e kaver ennañ galloud ar burzudou. »

Yann en toullbah

3 Rag Herodez e-noa tapet krog e Yann, e chadennet, hag e daolet en toull-bah, ablamour da Herodiadez, gwref Filip, e vreur. 4 Peogwir e lavare Yann dezañ : « N’az-peus ket aotre d’he haoud da wreg. » 5 Ha c’hoant dezañ d’e laza, e-neus aon rag an dud, dre ma sellent ouz Yann evel ouz eur profet.

Penn Yann

6 Dond a ra deiz-ha-bloaz Herodez. Merh Herodiadez a goroll dirag an dud, hag a blij kalz d’Herodez, 7 ken na tou hemañ, dre le, roi dezi ar pez a houlenno-hi. 8 Poulzet gand he mamm : « Ro din, emezi, amañ war eur plad, penn Yann, ar badezour. » 9 Mantret eo an tetrark, med en abeg d’e le ha d’ar gouvidi, e kemenn ma vo roet dezi penn Yann, 10 hag e lak dibenna Yann en e doull-bah. 11 Degaset eo e benn war eur plad, ha roet d’ar plah yaouank : homañ e ro d’he mamm. 12 Diskibien Yann a zeu da gemer e gorv ha d’e zebelia. Dond a reont da gas kelou da Jezuz.

Mond a ra Jezuz kuit : an dud a ya d’e heul

13 O veza klevet kement-se, ez a Jezuz kuit alese, en eur vag, war-zu eul leh digenvez, en e bart e-unan. Kleved a ra ar bobl ano euz kement-se, ha mond d’e heul, war droad, euz ar hêriou. 14 O tond er-mêz, e wel-eñ eur boblad-tud niveruz. Trefuet eo evito, beteg don e galon : parea a ra o re vahagnet.

Pemp baraenn evid pemp mil den

15 Deut an abardaez, e tosta an diskibien outañ, en eur lavared : « Digenvez eo al leh-mañ, ha diwezad eo an eur dija. Kas an dud kuit, ma ’z aint d’ar hêriadennou da brena boued. » 16 Respont a ra Jezuz dezo : « N’o-deus ket ezomm da vond kuit. Roit-c’hwi dezo da zebri. » 17 Lavared a reont dezañ : « N’on-eus amañ nemed pemp baraenn ha daou besk – 18 Degasit-i din amañ », emezañ.

19 Lakaad a ra ar boblad-tud da astenn war ar geot. Kemer a ra ar pemp baraenn hag an daou besk. O veza savet e zellou war-zu an neñv, e vennig ar baraennou, o lodenn hag o ro d’e ziskibien, hag ar re-mañ d’an dud. 20 Debri a reont oll beteg o gwalh. Dastum a reont an tammou chamet da zilerh : daouzeg panerad leun. 21 Ar re o-deus debret a oa war-dro pemp mil den, heb konta ar merhed hag ar vugale.

Pedi a ra war ar menez

22 Raktal e lak e ziskibien da bignad er vag ha da vond en e raog d’an tu all, e-pad ma kasfe-eñ an dud kuit. 23 O veza kaset an dud kuit, e pign war ar menez da bedi, en e bart e-unan.

Bale a ra war ar mor

Deut an abardaez, e oa e-unan-penn eno. 24 Ar vag a oa dija pellig euz an aot, hejet-dihejet gand an tonnou, rag a-benn edo an avel. 25 D’ar pederved beill euz an noz, e teu daveto, ovale war ar mor. 26 E ziskibien a zo trevariet ouz e weled o vale war ar mor. Lavared a reont : « Eur spes eo ! » ha krial gand ar spont. 27 Kerkent e komz Jezuz dezo : « Fiziañs ! emezañ, me eo, bezit dizaon ! »

28 Neuze e komz Pèr outañ : « Aotrou, ma ’z eo te eo, kemenn din mond davedout war an dour ! » 29 Jezuz a lavar : « Deus ! » Diskenn a ra Pèr euz ar vag, ha hale war an dour evid mond war-zu Jezuz. 30 Med, o weled pegen kreñv eo an avel, e krog aon ennañ. Staga a ra da ziskenn hag eñ da hopal, en eur lavared : « Aotrou ! Salv ahanon ! » 31 Kerkent eh astenn Jezuz e zorn hag e krog ennañ. Lavared a ra dezañ : « Den dister e feiz, perag n’az-peus ket kredet ? » 32 Ha pa bignont er vag, eo torret an avel. Ar re a zo gantañ er vag a stou dirazañ, 33 en eur lavared : « Te a zo Mab da Zoue, e gwirionez. »

E Jenezared

34 Echui a reont an treiz, ha dond da zouara e Jenezared. 35 Tud al leh-mañ e anavez, ha kelou a gasont dre ar vro tro-dro. Degas a reont dezañ an oll re glañv, 36 hag e erbedi : nemed touch ouz pempillenn e vantell. Ha pareet eo kement hini a douch outi.


Pennad pemzeg

Hengoun ar gozidi

1 Tostaad a ra neuze ouz Jezuz farizianed ha skriverien euz Jeruzalem : 2 « Perag, emezo, e torr da ziskibien hengoun ar gozidi ? Rag ne walhont ket o daouarn pa gemeront boued. »

3 Respont a ra, ha lavared dezo : « Ha c’hwi, perag e torrit gourhemennou Doue, war zigarez ho kiziou koz deoh-c’hwi ? 4 Rag lavaret e-neus Doue : “Enor da dad ha da vamm” ha : “An neb a villig tad pe vamm, a varvo”. 5 Med lavared a rit-c’hwi : “An neb a lavar d’e dad pe d’e vamm : prov-da-Zoue eo al lodenn euz ma danvez a vefe talvouduz dit, 6 n’e-neus ket da enori e dad pe e vamm”. Kaset ho-peus komzou Doue da get, dre ho kiziou koz deoh-c’hwi.

7 Pilpouzed ! Brao e-neus Izai diouganet diwarnoh, o lavared : 8Ar bobl-mañ am enor, gand e ziweuz, med he halon a dro pell ahanon. 9 Goullo eo al lidou a rentont din. Ar henteliou a gelennont n’int nemed gourhemennou an dud”. »

« Ar pez a zaotr an den »

10 Gelver a ra an dud ha lavared dezo : « Klevit ha komprenit : 11 n’eo ket ar pez a ya er genou hag a zaotr an den, med ar pez a zeu e-mêz ar genou, an dra-ze eo a zaotr an den. »

12 Tostaad a ra neuze e ziskibien outañ ha lavared dezañ : « Gouzoud a rez eo bet feuket ar farizianed o kleved ar homzou-ze ? » 13 Respont a ra : « Pep plantenn, emezañ, ha n’eo ket bet plantet gand ma Zad euz an neñv, a vo disgwriziennet. 14 Laoskit-i ! Tud dall int, o heñcha tud dall. Pa vez eun den dall o heñcha eun den dall all, e kouezint o-daou en toull. »

15 Pèr a respont, o lavared dezañ : « Displeg deom ar barabolenn-ze – 16 Bremañ c’hoaz oh-c’hwi heb skiant, emezañ. 17 Ne welit ket penaoz e tiskenn er hov pep tra a ya er genou, hag e vez taolet er-mêz, er foz ? 18 Med euz ar galon e teu ar pez a ya e-mêz ar genou, hag an dra-ze eo a zaotr an den. 19 Rag, euz ar galon e teu komzou droug, muntrèrèz, avoultriez, gastaouèrèz, laeroñsi, falstesteniou, blasfemou. 20 Kement-se eo a zaotr an den. Med debri, heb beza gwalhet an daouarn, ne zaotr ket an den. »

Feiz eur baianez

21 Mond a ra Jezuz kuit ahano, ha dond tro-war-dro Tir ha Sidon. 22 Ha setu ma teu eur vaouez, eur Gananeanez euz ar vro-ze. Hopal a ra-hi, en eur lavared : « Bez truez ouzin, Aotrou, mab da Zavid ! Gwallgaset eo ma merh gand an droug-spered. » 23 Med ne respont-eñ ger ebed dezi. Tostaad a ra e ziskibien ha goulenn digantañ : « Kas-hi kuit, emezo, rag krial a ra war on lerh. »

24 Respont a ra-eñ a-vad : « N’on ket bet kaset, emezañ, nemed d’an deñved kollet euz ti Izrael. » 25 Med neuze e teu-hi da stoui dirazañ : « Aotrou ! emezi, ma zikour ! » 26 O respont dezi, e lavar-eñ : « N’eo ket brao kemer bara ar vugale hag e stlepel d’ar chas bihan. – 27 Ya, Aotrou, emezi, med debri a ra ar chas bihan bruzunou o koueza diwar daol o mistri. » Neuze e respont Jezuz : 28 « Maouez, emezañ, braz eo da feiz ! Ra vo greet dit hervez da hoant ! » Ha pareet eo he merh d’an eur-ze.

O farea a ra

29 O pellaad alese, e teu Jezuz war vord Mor ar Galile. Pignad a ra war ar menez hag azeza eno. 30 Pobladou-tud niveruz a dosta outañ, ganto tud kamm, dall, mahagnet, mud, ha kalz re all. O lakaad a reont e-harz dezañ, hag o farea a ra-eñ, 31 ken m’eo souezet an dud, pa welont re vud o komz, re vahagnet deut dibistig, re gamm o vale, re zall o selled. Meuli a reont Doue Izrael.

Seiz baraenn evid pevar mil den

32 Gelver a ra e ziskibien ha lavared : « Trefuet on, evid ar bobl, e don ma halon : abaoe tri devez emaint ganin ha n’o-deus netra da zebri. Ne fell ket din o has kuit war yun, gand aon na zemplfent en hent. » 33 An diskibien a lavar dezañ : « Penaoz or-befe-ni tra-walh a vara en eur goueleh evid roi o gwalh da gement a dud ? – 34 Ped baraenn a zo ganeoh ? » eme Jezuz. Respont a reont : « Seiz hag eun nebeud peskedigou. »

35 Kemenn a ra d’ar bobl azeza war an douar. 36 Ha kemeret gantañ ar zeiz baraenn hag ar pesked, e lavar eur bedenn a drugarez, e ra lodennou, o ro d’e ziskibien, hag e ziskibien d’ar bobl. 37 Debri a reont oll, beteg o gwalh. Gand an tammou chomet da zilerh, e tastumont seiz panerad leun. 38 Ar re o-deus debret a oa pevar mil den, hep konta ar merhed hag ar vugale. 39 Kas a ra kuit ar bobl, pignad er vag, ha dond da harzou Magadan.


Pennad c’hwezeg

Eur zin euz an neñv

1 Tostaad a ra ar farizianed hag ar zaduseaned. Evid e amproui, e houlennont digantañ diskouez dezo eur zin euz an neñv. 2 Jezuz a respont hag a lavar dezo : « Pa zeu an abardaez, e lavarit : “Amzer vrao, rag ruz eo an oabl !” 3 Ha diouz ar mintin : “Arne hirio, rag damruz eo an oabl, hag o vond da zu !” Liou an oabl a ouzoh anaoud, med sinou an amzer ne hellit ket ! 4 Rummad fallagr hag avoultrer ! Klask a ra eur zin ! ha sin ebed ne vo roet dezañ, nemed sin Jonaz. » O huitaad a ra, ha mond pelloh.

Goell ar farizianed

5 Mond a ra e ziskibien d’an tu all. Dizoñjet o-deus kemer baraennou ganto. 6 Jezuz a lavar dezo : « Sellit ! Diwallit diouz goell ar farizianed hag ar zaduseaned ! 7 « Prederia a reont enno o-unan, o lavared : « N’on-eus ket kemeret bara ! » 8 Jezuz a oar, hag e lavar : « Perag prederia, ennoh hoh-unan, dre n’ho-peus ket bara ? 9 Ne gomprenit ket c’hoaz ? N’ho-peus ket soñj euz ar pemp baraenn evid pemp mil den ? Ped panerad ho-peus dastumet ? 10 Hag ar zeiz baraenn evid pevar mil den ? Ped panerad ho-peus dastumet ? 11 Penaoz ne gomprenit ket ? N’eo ket diwar-benn bara em-eus lavaret deoh : diwallit diouz goell ar farizianed hag ar zaduseaned. » 12 Neuze e komprenont n’e-noa ket lavared diwall diouz goell ar bara, med diouz kelennadurez ar farizianed hag ar zaduseaned.

Pèr a lavar : “Te eo a zo ar Hrist”

13 Dond a ra Jezuz tro-dro da Zezare-Filip, hag ober goulennou ouz e ziskibien, en eur lavared : « Piou, eme an dud, eo mab an den ? » 14 Lavared a reont : « Lod : “Yann-Vadezour”. Lod all : “Eliaz”. Reou all : “Jeremi”, pe e unan euz ar brofeted. » 15 Lavared a ra-eñ dezo : « Ha c’hwi ! Piou a lavarit ez on-me ? » 16 Simon-Pèr a respont : « Te eo a zo ar Hrist, emezañ, Mab an Doue beo ! »

Jezuz a lavar : “Te a zo Pèr”

17 Jezuz a respont, o lavared dezañ : « Eüruz out-te, Simon, mab da Jonaz, rag n’eo ket ar hig nag ar gwad o-deus diskuliet dit kement-se, med ma Zad hag a zo en neñv. 18 Ha me a lavar dit : te a zo Pèr (Roh), ha war ar roh-se e savin ma Iliz, ha doriou an ivern ne vint ket kreñvoh egeti. 19 Roi a rin dit alhweziou rouantelez an neñv : kement a liammi war an douar a vo liammet en neñv ; kement a ziliammi war an douar a vo diliammet en neñv. » 20 Neuze e kemenn d’an diskibien chom heb lavared da zen ebed ez eo-eñ ar Hrist.

Kenta kemennadenn euz e basion

21 Adaleg neuze, e krog Jezuz da ziskouez d’e ziskibien e rank-eñ mond da Jeruzalem, gouzañv kalz a-berz ar gozidi, ar veleien-veur hag ar skriverien, beza lazet, ha d’an trede deiz, adsevel.

Pèr a zav e vouez

22 Pèr e denn gantañ a-gostez, hag e krog d’e hourdrouz, en eur lavared : « Doue ra viro, Aotrou ! Nann, ne hoarvezo ket an dra-ze ganit ! » 23 Distroi a ra-eñ ha lavared da Bèr : « Kerz a-dreñv din, satan ! Eur gwall-skoill out evidon : da venoziou n’int ket re Zoue med re an dud. »

Kemer da groaz

24 Neuze e lavar Jezuz d’e ziskibien : « Nep piou bennag a feil dezañ dond war ma lerh, r’en em naho e-unan, ra zougo e groaz, ha ra zeuio d’am heul ! 25 Ya ’vad, an hini a fell dezañ savetei e vuhez, he hollo. Med an hini a gollo e vuhez, en abeg din-me, he havo. 26 Ya ’vad, petra a dalvez d’eun den gounid ar bed a-bez, ma vez daonet e ene ? Pe c’hoaz, petra a roio eun den en eskemm d’e ene ? »

27 Rag, bez’ ema mab an den o tond e gloar e Dad, gand an êlez. Neuze e roio da bep hini hervez e oberou. 28 Amen, lavared a ran deoh : lod euz ar re-mañ ne danvaint ket ar maro araog beza gwelet mab an den o tond en e rouantelez. »


 

Pennad seiteg

Treuzneuziadur

1 C’hweh devez war-lerh, e kemer Jezuz gantañ : Pèr, Jakez, ha Yann, e vreur. O lakaad a ra da bignad war eur menez uhel, en eul leh distro. 2 Treuzneuziet eo-eñ dirazo : e zremm a sked evel an heol, e zillad a zeu da veza gwenn-kann e-giz ar sklêrijenn. 3 Ha setu : dond a ra dirazo Moizez hag Eliaz ; divizoud a reont gantañ.

4 O staga da gomz, e lavar Pèr da Jezuz : « Aotrou, brao eo deom beza amañ ! Ma fell dit, e savin teir deltenn : unan evidout, unan evid Moizez, hag unan evid Eliaz. » 5 Emañ c’hoaz o komz hag e teu eur goabrenn sklêrijennuz d’o goloi, hag euz kreiz ar goabrenn, e lavar eur vouez : « Hemañ eo ma Mab, ar muia-karet, en em blijoud a ran ennañ. Selaouit-eñ ! » 6 O kleved kement-se, e kouez an diskibien war o dremm, spontet-braz.

7 Jezuz a dosta hag a douch outo, en eur lavared : « Adsavit ! Bezit dizaon ! ». 8 Sevel a reont o zellou ha ne welont den ebed nemed Jezuz e-unan. 9 En eur ziskenn euz ar menez, e hourhemenn dezo, o lavared : « Da zen ebed na gomzit euz ar weledigez, a-raog ma tihuno mab an den a-douez ar re varo. »

« Deut eo Eliaz dija »

10 An diskibien a houlenn digantañ : « Perag, emezo, e lavar ar skriverien e tle Eliaz dond araog ? » 11 Respont a ra dezo : « Gwir eo, emezañ, e tle Eliaz dond evid adsevel pep tra. 12 Koulskoude, lavared a ran deoh : deut eo Eliaz dija, ha n’o-deus ket e anavezet. Med greet adeus gantañ e-giz m’eo bet fellet dezo, hag evel-se e houzañvo mab an den ganto ive. » 13 Neuze e kompren an diskibien eo Yann-Vadezour an hini e-neus komzet anezañ.

Ar bugel loarieg

14 Dond a reont war-zu ar bobl. Eun den a dosta, 15 a gouez war an daoulin dirazañ, en eur lavared : « Aotrou, az-pez truez ouz ma mab, rag loarieg eo, ha fall ez a an traou gantañ. Rag koueza a ra aliez en tan, hag aliez en dour. 16 E degaset em-eus d’az tiskibien, ha n’o-deus ket gellet e barea. » 17 Jezuz a respont : « O rummad difeiz ha fallagr ! emezañ. Beteg pegeid e vin ganeoh ? Beteg pegeid ho kouzañvin ? Degasit-eñ din amañ ! ». 18 Jezuz a hourdrouz an diaoul, hag hemañ a ya kuit diouz ar bugel : pareet eo adaleg an eur-ze.

19 Neuze e tosta e ziskibien ouz Jezuz. En distro, e lavaront dezañ : « Evid peseurt abeg n’on-eus ket ni gellet e gas kuit ? » 20 Lavared a ra dezo : « En abeg d’ho tiouer a feiz. Amen, lavared a ran deoh : m’ho-peus feiz, evel eur hreunenn zezo, e lavarot d’ar menez-mañ : “Kerz pelloh ahann, du-ze !” ha pellaad a raio ; ne vo netra dreist ho kalloud. »

Eil kemennadur euz e basion

21 E-pad m’emaint o vond en-dro da Vro-Halile, e lavar Jezuz dezo : « Mab an den a vo lakeet etre daouarn an dud. 23 E laza a raint, ha, d’an trede deiz, eh adsavo. » Dond a reont da veza trist-meurbed.

Taos an templ

24 Dond a reont da Gafarnaom. Tostaad a ra paotred taos an diou zrakm ouz Pèr, hag int da lavared dezañ : « Daoust ha ne bae ket ho mestr taos an diou zrakm ? » 25 Respont a ra : « Eo ! » Evel m’ema o tond d’an ti, e krog Jezuz da gomz da genta : « Petra, emezañ, a zoñjez, Simon ? Rouaned ar bed, diwar goust piou e kemeront taosou pe daillou ? Diwar goust o mibien pe diwar goust ar re all ? » 26 Respont a ra : « Diwar goust ar re all. »

Jezuz a respont dezañ : « Diskarget eo ar vibien eta ! 27 Arabad evelato beza eur gwall-skoill evito. Kerz d’ar mor ha taol an higenn ! Ar pesk kenta o sevel, pak-eñ, digor e veg dezañ hag e kavi eur stater. Kemer hemañ ha ro-eñ, evidon hag evidout. »


Pennad triweh

« Piou ’ta eo ar brasa ? »

1 D’ar mare-ze, e tosta an diskibien ouz Jezuz, en eur lavared : « Piou ’ta eo ar brasa e rouantelez an neñv ? » 2 Gelver a ra eur bugelig davetañ, hag e lakaad en o zouez. 3 Hag e lavar dezo : « Amen, emezon, ma ne jeñchit ket buhez, evid dond da veza e-giz bugale vihan, ne antreot ket e rouantelez an neñv. 4 An hini en em izella eta, evel ar bugelig-mañ, hennez eo ar brasa e rouantelez an neñv. 5 Nep piou bennag a zegemer eur bugelig em ano, me eo a zo degemeret gantañ. »

« An hini a vo eur gwall-skoill »

6 Nep piou bennag a vo eur gwall-skoill evid unan hepken euz ar re vihan-mañ a gred ennon, eo emzavoh dezañ e vefe staget eur rod-vilin en-dro d’e houzoug ha stlapet e strad ar mor.

7 Reuzeudig ar bed en abeg d’ar gwall-skoillou ! Red eo d’ar gwall-skoillou dond, med reuzeudig an den a zeu ar gwall-skoillou drezañ ! 8 Ma vez da zorn pe da droad eur gwall-skoill evidout, troh-eñ ha taol-eñ kuit, pell ahanout. Gwelloh eo dit antreal er vuhez, mogn pe gamm, eged beza stlapet en tan peurbaduz gand daou zorn ha daou droad.

9 Ha ma vez da lagad eur gwall-skoill evidout, lam-eñ kuit ha stlap-eñ pell ahanout. Gwelloh eo evidout antreal born er vuhez, eged beza taolet e jehenn an tan gand daou lagad.

10 Taolit evez da jom heb dismegañsi unan euz ar re vihan-mañ, rag lavared a ran deoh : ema o êlez en neñv o para atao war dremm ma Zad a zo en neñv.

An danvadez kollet

12 Petra a zoñjit ? M’e-neus eun den kant dañvadez, ha ma vefe kollet unan anezo, daoust ha ne zilezo ket an naonteg all ha pevar-ugent, war ar meneziou, evid mond da glask an hini gollet ? 13 Ha ma c’hoarvez gantañ he havoud, amen, lavared a ran deoh : laouenneet eo ganti muioh eged gand an naonteg ha pevar-ugent n’int ket bet kollet. 14 Evel-se ema gand bolontez ho Tad euz an neñv : na ’z afe da goll nikun euz ar re vihan-mañ ! »

« M’e-neus da vreur pehet »

15 « M’e-neus da vreur pehet, kerz, gra rebechou dezañ, etrezoh ho-taou hepken. Ma da zelaou, az-po gounezet da vreur. 16 Med ma ne zelaou ket, kemer ganit unan pe zaou all, “evid ma vo reñket pep tra dre desteni daou pe dri”. 17 Ma nah-eñ o zelaou, henn lavar d’an Iliz. Ha ma nah selaou an Iliz zoken, ra vo evidout e-giz ar paian hag ar publikan.

18 Amen, lavared a ran deoh : pep tra a liammot war an douar a vo liammet en neñv. Ha pep tra a ziliammot war an douar a vo diliammet en neñv. »

« Ma teu daou d’en em gleved »

19 « Ha c’hoaz ! Amen, lavared a ran deoh : ma teu daou ahanoh d’en em gleved, war an douar, evid goulenn tra pe dra, kement-se en em gavo ganto, a-berz ma Zad a zo en neñv. 20 Rag, al leh m’en em vod daou pe dri ennañ, eno e vezan en o zouez. »

Dilemel deg gwech ha tri-ugent seiz gwech

21 Tostaad a ra Pèr outañ, ha lavared dezañ : « Aotrou, ped gwech e peho ma breur a-eneb din hag e pardonin dezañ ? Beteg seiz gwech ? « 22 Jezuz a respont : « Ne lavaran ket beteg seiz gwech, med beteg deg gwech ha tri-ugent seiz gwech. »

An dleour didruez

23 « Setu perag eo rouantelez an neñv heñvel ouz eun den, eur roue, hag e fell dezañ renta e goñchou gand e zervicherien. 24 Pa ’z eo kroget d’henn ober, e tegaser dezañ unan hag a zle deg mil talant. 25 Dre ma n’e-n eus ket peadra da restaol, e kemenn an aotrou e lakad e gwerz, gand e wreg, e vugale ha kement e-neus, evid ma vo daskoret pep tra.

26 Ar zervicher eta, o koueza e-harz e dreid, a stou dirazañ, en eur lavared : “Bez madelezuz ouzin hag e restaolin pep tra dit”. 27 Piket eo aotrou ar zervicher-ze e don e galon : e ziliamma a ra, ha dilemel e zle digantañ.

28 En eur vond er-mêz, e kav ar zervicher-ze unan euz e geneiled a zlee dezañ kant dîner. Krogi a ra ennañ ha, prest d’e vouga, e lavar : “Restaol din ar pez a zleez”. 29 E geneil eta, o koueza e-harz e dreid, e aspede en eur lavared : “Bez madelezuz ouzin hag e restaolin dit”. 30 Ne fell ket dezañ, med mond a ra hag e daoler en toull-bah, beteg m’e-no restaolet e zle.

31 Gweled a ra e geneiled ar pez ’zo c’hoarvezet, ha glaharet-braz int gand kement-se. Dond a reont da lavared d’o aotrou kement a zo en em gavet. 32 E helver a ra e aotrou, ha lavared dezañ : “Servicher fall, dilamet em-eus da zle en e bez diganit, peogwir az-poa ma aspedet. 33 Daoust ha ne oa ket red dit ive kaoud truez ouz da geneil, evel m’em-eus bet-me truez ouzit ?” 34 E aotrou, kounnaret, e ro d’ar vourrevien, beteg ma vo restaolet e zle gantañ en e bez. 35 Evel-se e raio ma Zad euz an neñv evidoh, ma ne bardonit ket, pep hini ahanoh d’e vreur, a-greiz-kalon. »


Pennad naonteg

 

1 Hogen, p’ e-neus Jezuz echuet ar gomzou-ze, e kuita Bro-Halile.

Eur horv hepken

Dond a ra war harzou Bro-Jude, en tu all d’ar Jourdan. 2 Pobladou-tud niveruz a zeu d’e heul, hag o farea a ra eno.

3 Tostaad a ra ar farizianed outañ. Evid e denta, e lavaront : « Daoust hag e-neus eur gwaz aotre da gas kuit e wreg, evid forz peseurt abeg ? » 4 Respont a ra : « N’ho-peus ket lennet ? emezañ : “Er penn kenta e-neus ar hrouer o greet par ha parez.” 5 Ha lavaret e-neus : “En abeg da ze, e kuitaio ar gwaz e dad hag e vamm, hag en em stago ouz e wreg, hag e vint o-daou eur horv hepken.” 6 Evel-se n’emaint ket daou ken med eur horv hepken. Ar pez e-neus Doue unanet eta, arabad da zen ebed e zispartia. »

7 Lavared a reont dezañ : « Perag eta e-neus Moizez gourhemennet roi eul lizer torr-dimezi, ha kas kuit ? » 8 Respont a ra dezo : « En abeg d’ho kalon galed eo e-neus Moizez roet aotre deoh da gas kuit ho kwragez. Er penn kenta, ne oa ket an traou evel-se. 9 Lavared a ran deoh : nep piou bennag a gas kuit e wreg, nemed e vefe eur falsdimezi, hag a zimez gand unan all, a zo avoultrer. »

10 E ziskibien a lavar dezañ : « Mard ema evel-se stad eun den gand eur vaouez, n’eo ket emzao dimezi. » 11 Lavared a ra dezo : « An oll ne gomprenont ket ar gomz-se, med ar re nemeto m’eo bet roet dezo. 12 Bez’ ez eus lod na hellont ket dimezi, dre ma ’z int ganet evel-se euz korv o mamm ; bez’ ez eus lod bet lakeet evel-se gand an dud ; ha bez’ ez eus lod all en em lakeet evel-se en abeg da rouantelez Doue. An neb a hell intent, ra intento ! »

« Lezit ar vugale vihan »

13 Neuze e touger dirazañ bugale vihan, evid ma lako e zouarn wamo, ha ma pedo. An diskibien o gourdrouz, 14 med Jezuz ha lavared : « Lezit ar vugale vihan, na virit ket outo da zond beteg ennon ! Rag evid ar re heñvel outo eo rouantelez an neñv. » 15 Lakaad a ra e zaouarn wamo, ha mond kuit alese.

« Gwerz ha ro d’ar paour »

16 Ha setu eun den o tostaad outañ, en eur lavared : « Mestr, petra a vad a rin evid kaoud ar vuhez peurbaduz ? » 17 Lavared a ra dezañ : « Perag e rez goulennou ouzin diwar-benn ar mad ? N’eus nemed eur Mad. M’az-peus c’hoant d’antreal er vuhez, dalh d’ar gourhemennou. – 18 Pere ? » emezañ. Jezuz a respont : « Ar re-mañ : “Ne lazi ket. Ne ri ket avoultriez. Ne laeri ket. Ne ri ket fals-testeni. 19 Enor an tad hag ar vamm. Ha da nesa a gari, eveldout da-unan”. »

20 Lavared a ra an den yaouank dezañ : « An oll draou-ze am-eus dalhet. Petra a vank din c’hoaz ? » 21 Jezuz a respont dezañ : « M’az-peus c’hoant da veza peurvad, kerz, gwerz da beadra, ha ro d’ar re baour : eun teñzor az-po en neñv. Ha deus, bale war ma lerh ! « 22 Kleved a ra an den yaouank, ha mond kuit, du e benn, rag kalz madou e-noa.

Êsoh d’eur hañval

23 Jezuz a lavar d’e ziskibien : « Amen, emezon, diêz e vo d’eun den pinvidig antreal e-barz rouantelez an neñv. 24 Adarre e lavaran deoh : êsoh eo d’eur hañval tremen dre doull an nadoz eged d’eun den pinvidig an treal e-barz rouantelez Doue. »

25 O kleved kement-se, eo souezet an diskibien hag e lavaront : « Piou a hell beza salvet neuze ? » 26 O para e zellou warno, e respont Jezuz dezo : « Evid an dud, eo dreist o galloud. Evid Doue a-vad, n’eus netra dreist e halloud. »

« Dilezet on-eus-ni pep tra »

27 Hag o staga da gomz, e lavar Pèr dezañ : « Setu m’on-eus-ni dilezet pep tra, hag eet war da lerh. Petra e vo evidom neuze ? » 28 Respont a ra Jezuz dezo : « Amen, lavared a ran deoh : c’hwi hag a zo deut war ma lerh, da zevez renevezadur ar bed, pa azezo mab an den war e gador a hloar, e viot-c’hwi ive azezet war daouzeg kador, evid barn daouzeg rummad Izrael. 29 Nep piou bennag a lez tier, breudeur pe hoarezed, tad, mamm pe vugale, pe barkeier, en abeg d’am ano, a resevo meur a wech muioh, hag e-no ar vuhez peurbaduz da herez.

Micherourien an unnegved eur

30 « Kalz euz ar re genta a vo da ziweza, ha kalz euz ar re ziweza da genta ».


Pennad ugent

 

1 « Rag heñvel eo rouantelez an neñv ouz eun den, eur penn-tiegez, hag a ya er-mêz, diouz ar mintin, da hopra micherourien evid e winieg. 2 Ober a ra marhad gand ar vicherourien evid eun diner an devez, hag o has d’e winieg.

3 Dond a ra er-mêz d’an trede eur, ha gweled reou all chomet dibreder war el leur-gêr. 4 Dezo e lavar : “It, c’hwi ive d’ar winieg ; roi a rin deoh ar pez a zo just.” 5 Mo nd a reont. A darre ez a-eñ er-mêz d’ar c’hwehved ha d’an naved eur, hag e ra memez tra.

6 War-dro an unnegved eur, ez a c’hoaz er-mêz. Kavoud a ra reou all chomet aze, ha lavared dezo : “Perag e chomit aze dibreder, e-pad an deiz ?” 7 Respont a reont dezañ : “Dre ma n’eus bet den ebed d’on gopra.” Lavared a ra dezo : “lt, c’hwi ive, d’ar winieg”.

8 Deut an abardaez, e lavar aotrou ar winieg d’e verour : “Galv ar vicherourien, ha ro dezo o gopr, en eur grogi gand ar re ziweza, beteg ar re genta”. 9 Dond a ra re an unnegved eur, ha reseo peb unan beb a ziner. 10 Goude-ze e teu ar re genta : soñjal a reont e resevint muioh, ha peb unan anezo a resev an diner ive. 11 En eur reseo hemañ, e hrozmolont a-eneb d’ar penn-tiegez, 12 o lavared : “Ar re ziweza-mañ o-deus greet eun eurvez labour hep ken, hag o lakez par deom-ni hag on-eus douget samm an devez hag ar wrez”. 13 Respont a ra d’unan anezo : “Keneil, emezañ, ne ran ket gaou ouzit : daoust ha n’az-peus ket greet marhad ganin evid eun diner ? 14 Kemer da hini ha kerz ! C’hoant am-eus da roi da hemañ, an hini diweza, kement ha dit-te : 15 daoust ha n’em-eus ket aotre d’ober pez a garan gand ma madou ? Pe daoust hag eo fall da lagad en abeg ma ’z on mad ?” 16 Evel-se e vo ar re ziweza da genta, hag ar re genta da ziweza. »

Trede kemennadur euz e basion

17 War-nez pignad da Jeruzalem, e kemer Jezuz gantañ e ziskibien, o-unan, hag en eur ober hent, e lavar dezo : 18 « Setu ma pignom da Jeruzalem. Gwerzet e vo mab an den d’ar veleien-veur ha d’ar skriverien : kondaonet e vo ganto d’ar maro. 19 E werza a raint d’ar baianed, evid beza mezekeet, skourjezet ha staget ouz ar groaz. Ha, d’an trede deiz, eh adsavo. »

Mibien Zebede

20 Neuze e tosta outañ mamm mibien Zebede, gand he daou vab. Stoui a ra-hi evid goulenn eun dra digantañ. 21 Eñ a lavar dezi : « Petra a garfes kaoud ? » Respont a ra : « Lavar ma vo ar re-mañ, an daou vab-mañ-din, azezet en da rouantelez, unan en tu dehou dit hag unan en tu kleiz. »

22 Jezuz a respont : « N’ouzoh ket, emezañ, petra a houlennit. Ha bez’ e hellit eva ar haliriad emaon o vond da eva ? – Bez’ e hellom », emezo. 23 Lavared a ra dezo : « Ya, eva a reot ma haliriad. Med evid beza azezet en tu dehou din hag en tu kleiz, n’eo ket din-me her roi : bez’ e vo ar plasou-ze d’ar re m’int bet aozet evito gand ma Zad. » 24 O kleved kement-se eo taeret an deg a-eneb an daou vreur.

« Deut eo mab an den evid servicha »

25 O gelver a ra Jezuz, ha lavared : « Gouzoud a rit e ra priñsou ar broiou paian o mistri warno, hag e lak ar pennou-braz o galloud da goueza warno. 26 Ne vo ket evel-se en ho touez. Med nep piou bennag e-no c’hoant da veza braz, a vo ho servicher. 27 Ha nep piou bennag e-no c’hoant da veza da genta, a vo ho sklav. 28 E-giz mab an den : n’eo ket deut evid beza servichet med evid servicha, ha roi e vuhez evid dasprena kalz a dud. »

An daou zen dall euz Jeriko

29 Pa zeuont er-mêz euz Jeriko, ez a eur boblad-tud niveruz d’e heul. 30 Ha setu daou zen dall, azezet war vord an hent. Kleved a reont ema Jezuz o vond e-biou. Hag e youhont : « Az-pez truez ouzom, emezo, mab da Zavid ! » 31 An dud o gourdrouz, evid ma chomint peoh. Med kreñvoh c’hoaz e youhont, en eur lavared : « Az-pez truez ouzom, mab da Zavid ! »

32 Chom a ra Jezuz a-zao, o gelver, ha lavared : « Petra ho-peus c’hoant a rafen evidoh ? » 33 Respont a reont dezañ : « Aotrou ! Ra vo digoret on daoulagad ! » 34 Fromet e don e galon, e touch Jezuz ouzo malvennou : dioustu e welont. Ha mond a reont d’e heul.


Pennad unan warn-ugent

E Jeruzalem

1 P’emaint tost ouz Jeruzalem hag erruet e Betfaje, war Menez an Olivez, 2 e kas neuze Jezuz daou ziskib, en eur lavared dezo : « lt d’ar gêriadenn dirazoh. Kerkent e kavot eun azenez ouz ar stag, gand eun azenig en he hichenn ? Distagit ha degasit-i din. 3 Ha ma lavar unan bennag eun dra deoh, e respontot : “An aotrou e-neus ezomm anezo !” Ha dioustu e vint lezet da vond. » 4 C’hoarvezet eo kement-se evid ma teuio da wir komzou ar profet : 5 « Lavarit da verh Sion : setu da roue o tond beteg ennout, leun a zouster, pignet war eun azenig, ebeul d’al loen a zoug ar zamm. »

6 Mond a ra an diskibien hag ober evel m’e-neus Jezuz lavaret. 7 Degas a reont an azenez hag an azenig, ha lakaad o mantilli war o hein. Eñ a azez warno. 8 An dud, niveruz-meurbed, a astenn o mantilli war an hent. Re all a drohe skourrou euz ar gwez hag o lede war an hent. 9 Youhal a ra an dud o vond en e raog, e-giz ar re o tond war e lerh, hag e lavaront : « Hozanna da vab David ! Benniget an hini a zo o tond en ano an Aotrou ! Hozanna war an uheliou ! »

Kas a ra ar varhadourien kuit euz an templ

10 Pa ’z a tre e Jeruzalem, ema ar gêr leun a virvill, hag o lavared : « Piou eo hemañ ? » 11 Hag e lavare an dud : « Hennez eo Jezuz, ar profet euz Nazared, e Bro-Halile ! »

12 Mond a ra Jezuz d’an templ, ha kas er-mêz an oll re a zo o prena hag o werza en templ. Eilpennet eo gantañ taoliou an drokerien ha kadoriou ar varhadourien koulmed. 13 Lavared a ra dezo : « Skrivet eo : “Ma Zi a vo anvet Ti ar Bedenn”. Hag ober a rit-c’hwi gantañ eun toull laeron. »

« Hozanna da vab David »

14 Tostaad a ra outañ, en templ, tud dall ha tud kamm : o farea a ra. 15 Ar veleien-veur hag ar skriverien a wei an traou souezuz greet gantañ, hag ar vugale o youhal en templ hag o lavared : « Hozanna da vab David ! » Mond a ra droug enno, 16 hag e lavaront dezañ : « Kleved a rez ar pez a lavar ar re-ze ? » Ha Jezuz da respont dezo : « Ya ! N’ho-peus ket lennet biskoaz : “Euz genou ar vugale hag ar re a zo ouz ar vronn, em-eus tennet eur meuleudi” ? » 17 O lezel a ra, ha mond er-mêz euz kêr, war-zu Betani, da dremen an noz eno.

Ar wezenn fiez dizehet

18 Diouz ar mintin, o tond en-dro e kêr, e teu naon dezañ. 19 Gweled a ra eur wezenn-fiez tost d’an hent, ha mond beteg enni : ne gav netra nemed deliou enni. Hag eñ da lavared dezi : « Ra jomi hep taoler frouez, da virviken ! » Hag a-daol-trumm, e tizeh ar fiezenn. 20 O weled kement-se, e lavar an diskibien, souezet-braz : « Penaoz eo bet dizehet ar fiezenn, a-daol-trumm ? »

21 O respont dezo, e lavar Jezuz : « Amen, m’ho-peus feiz heb douetañs ebed, ne reot ket hepken ar pez a zo bet greet d’ar fiezenn, med d’ar menez-mañ e lavarot : “Bez lamet kuit alese ha taolet er mor !” hag e c’hoarvezo kement-se. 22 Pep tra a houlennot er bedenn, gand feiz, a vo roet deoh. »

« Digand piou az-peus bet ar galloud ? »

23 Dond a ra d’an templ. E-pad m’ema o kelenn, e tosta outañ ar veleien-veur ha kozidi ar bobl, hag e lavaront dezañ : « Dre beseurt galloud e rez kement-se ? Piou e-neus roet ar galloud-se dit ? 24 Respont a ra Jezuz dezo : « Goulenn a rin, emezañ, eun dra ive diganeoh, eur gomz hepken. Ma lavarit din, e lavarin-me deoh ive dre beseurt galloud e ran kement-se : 25 badiziant Yann, euz peleh e oa ? Euz an neñv pe euz an dud ? »

Med enno o-unan e soñjont kement-mañ : « Ma lavarom : “Euz an neñv”, e responto deom : “Perag neuze n’ho-peus ket kredet ennañ ?” 26 Med ma lavarom :’Euz an dud”... on-eus da gaoud aon rag ar bobl : selled a ra an oll dud ouz Yann evel ouz eur profet. » 27 Respont a reont : « N’ouzom ket. » Hag eñ da lavared dezo ive : « Me kennebeud, ne lavarin ket deoh dre beseurt galloud e ran kement-se. »

« Eun den e-noa daou vab »

28 « Med petra a zoñjit euz kement-mañ ? Eun den e-noa daou vab. O vond da gaoud an hini kenta, e lavar dezañ : “Paotr, kerz hirio da labourad er winieg !” 29 Respont a ra hemañ : “Ne fell ket din mond !” Goude-ze e teu keuz dezañ, ha mond a ra.

30 Eet da gaoud an hini all, an tad a lavar memez tra. Respont a ra hennez : “Mond a ran, Aotrou !” hag eñ chom heb mond. 31 Pehini euz an daou-ze e-neus greet bolontez an tad ? » Respont a reont : « An hini kenta. »

Jezuz a lavar dezo : « Amen, lavared a ran deoh : ar bublikaned hag ar zerhed a zo en ho raog e rouantelez Doue. 32 Rag deut eo Yann beteg ennoh, war eun hent a justis, ha n’ho-peus ket kredet ennañ. Med ar bublikaned hag ar zerhed o-deus-i kredet ennañ. Ha c’hwi, goude beza gwelet kement-se, n’ho-peus ket bet keuz, ha n’oh ket deut da gredi ennañ. »

Lazet ar mab gand ar winierien

33 « Klevit eur barabolenn all : eun den a oa penn-tiegez. Planta a ra eur winieg, lakaad eur gael en-dro dezi, kleuza eur waskell enni, ha sevel eun tour. He feurmi a ra da winierien, ha mond kuit da bell. 34 Pa ’z eo deut mare ar frouez, e kas servicherien d’ar winierien, evid kemer ar frouez anezi.. 35 Ar winierien a-vad a dap krog er zervicherien, a sko gand unan, a laz unan all, a veinat an trede. 36 Kas a ra c’hoaz servicherien all, niverusoh eged ar re genta, ha memez tra a reont ganto.

37 Goude-ze, e kas e vab beteg enno, en eur zoñjal : “Douja a raint ma mab.” 38 Med, o weled ar mab, e lavar ar winierien kenetrezo : “Hemañ eo ar pennher. Deom ! Lazom-eñ, hag an herez a vo deom !” 39 Krogi a reont ennañ, e daoler er-mêz euz ar winieg, hag e laza. 40 Ahanta ! Pa vo deut aotrou ar winieg, petra a raio d’ar winierien-ze ? » 41 Respont a reont : « An dud droug-se a lakaio d’ar maro, en eun doare didruez. Ar winieg a feurmo da winierien all, hag ar re-mañ a roio frouez dezañ d’ar mare mad. »

Ar mên-korn

42 Jezuz a lavar dezo : « N’ho-peus ket lennet biskoaz er Skrituriou : “Ar mên bet stlapet kuit gand ar zaverien, hennez eo a zo deut da veza ar mên-korn. Euz an Aotrou e teu an dra-ze, ha bamuz eo d’an daoulagad.” 43 Gand se e lavaran deoh : tennet e vo diganeoh rouantelez Doue ha roet d’eur vroad a roio frouez ganti. »

45 Pa glev ar veleien-veur hag ar skriverien e barabolennou, e ouzont ema o komz diwar o fenn. 46 Klask a reont tapoud krog ennañ, med aon o-deus rag ar bobl : homañ a zelle outañ evel eur profet.


Pennad daou warn-ugent

An dud kouviet d’ar pred

1 Krogi a ra Jezuz da gomz dezo, ha dre barabolennou adarre. 2 « Heñvel eo, emezañ, rouantelez an neñv ouz eun den, eur roue, oh ober eured e vab. 3 Kas a ra e zervicherien da bedi ar gouvidi d’an eured ; med ne felle ket d’ar re-mañ dond. 4 Adarre e kas-eñ servicherien all : “Lavarrit, emezañ, d’ar gouvidi : prest eo pep tra ; deuit d’an eured.”

5 Med chom a reont dizeblant, ha mond, unan d’ e bark, egile d’e genwerz. 6 Lod all a dap krog er zervicherien, evid o dismegañsi hag o laza. 7 En e gounnar, e kas ar roue e zoudarded da zistruja ar vuntrerien-ze, ha da zevi o hêr.

8 Neuze e lavar d’e zervicherien : “Prest eo an eured, med ne oa ket dign ar gouvidi. 9 It eta da benn an heñchou, ha pedit d’an eured an oll dud a gavot.” 10 Mond a ra ar zervicherien er-mêz war an heñchou, ha boda an oll dud a gavont, fall pe vad. Hag eo leun ar zal-eured gand ar gouvidi. »

Ar zae-eured

11 « Antreal a ra ar roue da zelled ouz ar gouvidi. Hag e wel eno eun den ha n’e-neus ket gwisket ar zae-eured. 12 Lavared a ra dezañ : “Ma migon, penaoz out-te deut tre aman heb kaoud eur zae-eured ?” Chom a ra-eñ mud. 13 Neuze e lavar ar roue d’e zervicherien : “Liammit dezañ e dreid hag e zaouarn, ha taolit-eñ er-mêz, en deñvalijenn diavêz ! Eno e vo leñvadeg ha skrignadeg dent.” 14 Rag kalz a zo galvet, med nebeud eo an dibabidi. »

« Rentit da Zezar »

15 Mond a ra neuze ar farizianed da guzulia kenetrezo, evid e baka en e gomzou. Kas a reont dezañ o diskibien, gand re an herodianed. 16 « Mestr, emezo, gouzoud a reom ez out gwirion, hag e kelennez hent Doue e gwirionez. Ne rez van gand den ebed, ha ne zellez ket ouz dremm an dud. 17 Lavar deom eta pehini eo da ali : daoust hag ez eus aotre da bêa an taillou da Zezar pe get ? » 18 Anaoud a ra Jezuz o fallentez : « Perag, emezañ, emaoh ouz ma zenti, pilpouzed ? 19 Diskouezit din ar pez-moneiz evid an taillou. » Diskouez a reont dezañ eun diner. 20 Eñ ha lavared dezo : « Skeudenn piou eo homañ ? Hag an enskrivadur ? » 21 Respont a reont : « Hini Sezar ! » Neuze e lavar-eñ dezo : « Rentit eta da Zezar ar pez a zo da Zezar ! Ha da Zoue ar pez a zo da Zoue ! » 22 Kleved a reont, ha souezet int. Ouz e lezel, ez eont kuit.

Ar zaduseaned hag an adsao

23 En deiziou-ze, e tosta outañ ar zaduseaned, ar re a lavar n’eus ket a adsao. 24 Goulennou a reont outañ : « Mestr, emezo, lavaret e-neus Moizez : “Ma varv unan bennag heb kaoud bugale, e timezo e vreur gand e wreg, hag e savo diskennidi d’e vreur.” 25 Hogen, bez’ e oa, en on touez, seiz breur. An hini kenta, goude beza bet dimezet, a varv heb diskennad ebed : lezel a ra e wreg d’e vreur. 26 Evel-se evid an eil hag an trede, ha beteg ar zeizved. 27 War-lerh an oll anezo, e varv ar vaouez. 28 Goude an adsao, da behini euz ar zeiz den e vo-hi gwreg ? Rag pep hini e-neus he bet da wreg. »

29 Respont a ra Jezuz dezo : « Fazia a rit, emezañ, dre ma n’anavezit nag ar Skrituriou na galloud Doue. 30 Rag, goude an adsao, ne gemerer na gwaz na gwreg, med bez’ e vezer evel an êlez en neñv. 31 Hag evid an adsao, n’ho-peus ket lennet ar homzou lavaret deoh a-berz Doue ? : 32Me eo Doue Abraham, Doue Izaak, Doue Jakob”. N’eo ket eñ Doue ar re varo med ar re veo. » 33 Ouz e gleved, e oa ar bobl sebezet gand e gelennadurez.

« Kared a ri »

34 Kleved a ra ar farizianed e-neus-eñ minellet ar zaduseaned. En em voda a reont asamblez, 35 hag unan anezo, eun den a lezenn, a ra goulennou outañ, evid e denti : 36 « Mestr, pehini eo ar brasa gourhemenn euz al lezenn ? » 37 Lavared a ra : « An Aotrou da Zoue a gari, gand da oll galon, gand da oll skiant : 38 setu aze ar brasa ha kenta gourhemenn. 39 Med an eil a zo heñvel outañ : “Da nesa a gari, eveldout da-unan.” 40 Ouz an daou hourhemenn-se eo stag al lezenn a-bez, hag ar brofeted. »

Mab da Zavid hag e Aotrou

41 Bodet eo ar farizianed, 42 hag ober a ra Jezuz goulennou outo : « Pehini eo, emezañ, hoh ali diwar-benn ar Hrist ? Da biou eo-eñ mab ? » Respont a reont : « Da Zavid ! » 43 Hag e lavar-eñ dezo : « Penaoz eta e-neus David, er Spered, e anvet “Aotrou” ? Rag lavared a ra : 44An Aotrou a lavar d’am Aotrou : azez en tu dehou-din, beteg ma lakain da enebourien dindan da dreid.” 45 Ma ’z eo anvet “Aotrou” gand David eta, penaoz eo-eñ e vab ? » 46 Nikun anezo ne bell respont eur ger dezañ, ha den ebed ne gred ober goulennou outañ, adaleg an deiz-se.


Pennad tri warn-ugent

« Diwallit diouz ar skriverien »

1 Neuze e komz Jezuz d’ar bobl ha d’e ziskibien, 2 o lavared : « War gador Voizez ema ar farizianed hag ar skriverien azezet. 3 Kement eta a lavaront, deoh d’henn ober ha d’her mired. Diouz o oberou a-vad na rit ket, rag int a lavar med ne reont ket. 4 Eren a reont sammou ponner, hag o lakaad war ziouskoaz an dud, med ne fell ket dezo, int o-unan, o diblas gand o biz. 5 O oll oberou a reont evid beza gwelet gand an dud. Rag ledannaad a reont o filakteriou, hag hirraad o pempillennou. 6 Kared a reont ar skaon a enor er prejou, ar hadoriou kenta er zinagogennou, 7 ar zaludou war al leurgêriou, ha beza anvet “rabbi” gand an dud. »

« N’ho-peus nemed eur mestr »

8 « Evidoh-c’hwi, na vezit ket anvet “rabbi”, rag n’ho-peus nemed eur mestr, ha breudeur oh-c’hwi, oll etrezoh. 9 N’anvit “tad” nikun ahanoh war an douar, rag n’ho-peus nemed eun Tad, hini an neñv. 10 Na vezit ket anvet “mestr”, rag n’ho-peus nemed eur mestr : ar Hrist. 11 An hini brasa en ho touez, ra vo servicher deoh ! 12 An hini en em lako uhel a vo izelleet, hag an hini en em izellaio a vo laket uhel. »

« Reuzeudig ! »

13 « Reuzeudig oh-c’hwi, skriverien ha farizianed ! Pilpouzed ! Prenna a rit rouantelez an neñv dirag an dud : rag c’hwi n’antreit ket e-barz, hag ar re a yafe e-barz n’o lezit ket da vond tre.

15 Reuzeudig oh-c’hwi, skriverien ha farizianed ! Pilpouzed ! Mond a rit war vor ha dre zouar seh, evid gounid eun diskib hepken ; ha pa zeu unan, e rit anezañ eur mab d’an ivern, diou wech gwasoh egedoh.

16 Reuzeudig oh-c’hwi, heñcherien dall ! Rag lavared a rit : “Toui dre ar zantual n’eo netra, med an hini a dou dre aour ar zantual a zo dalhet”. 17 Tud droch ha dall ! Pehini eta eo ar brasa : an aour pe ar zantual a vez santelleet an aour gantañ ? 18 Ha : “Toui dre an aoter n’eo netra, med an hini a dou dre ar prov hag a zo warni a zo dalhet”. 19 Tud dall ! Pehini eta eo ar brasa : ar prov pe an aoter a vez santelleet ar prov ganti ? 20 An neb eta a dou dre an aoter, a dou drezi ha dre gement a zo warni. 21 An neb a dou dre ar zantual, a dou drezañ ha dre an Hini a zo azezet ennañ. 22 Hag an neb a dou dre an neñv, a dou dre dron Doue, ha dre an Hini azezet warnañ.

23 Reuzeudig oh-c’hwi, skriverien ha farizianed ! Pilpouzed ! Pêa a rit an deog war ar vent, ar fanouill hag ar ho min, ha lezel ar pep pouezusa ’zo el lezenn : ar justis, an drugarez hag ar feiz. Red e oa ober kement-mañ, heb dilezel kement-se. 24 Heñcherien dall, o sila ar hwibuenn, hag o lonka ar hañval !

25 Reuzeudig oh-c’hwi, skriverien ha farizianed ! Pilpouzed ! Glannaad a rit an diavêz euz an hanaf hag euz ar skudell, med leun eo an diabarz a laeroñsi hag a zireisted. 26 Farizian dall ! Glanna ’ta diabarz an hanaf da genta, evid ma teuio an diavêz zoken da veza glan !

27 Reuzeudig oh-c’hwi, skriverien ha farizianed ! Pilpouzed ! Heñvel oh-c’hwi ouz beziou bet gwennet, hag a zeblant beza kaer euz an diavêz : o diabarz a-vad a zo leun a eskern re varo hag a bep seurt loustoni. 28 Evel-se evidoh : seblantoud a rit beza just euz an diavêz, evid an dud, med leun eo ho tiabarz a bilpousèrèz hag a fallagriez.

29 Reuzeudig oh-c’hwi, skriverien ha farizianed ! Pilpouzed ! Sevel a rit beziou d’ar brofeted, ha ficha beziou-meur an dud just ; 30 hag e lavarit : “M’or-bije bevet e deiziou on tadou, ne vefem ket bet a-du ganto evid skuilla gwad ar brofeted.” 31 Gand kement-se e roit testeni a-eneb deoh hoh-unan ez oh mibien da vuntrerien ar brofeted. 32 Ha c’hwi, karget ho-peus muzuliad ho tadou. »

« Laza hag heskina a reot »

33 « Naered ! Gouenn naered ! Penaoz e tehot pell diouz barn an ivem ? 34 Setu perag e kasan-me deoh profeted, tud fur ha skriverien. Lod anezo a lazot hag a stagot ouz eur groaz, lod all a skourjezot en ho sinagogennou hag a heskinot a gêr da gêr. 35 Evel-se e kouezo warnoh ar gwad just a-bez, bet skuillet war an douar, adaleg gwad Abel, an den just, beteg gwad Zakari, mab da Varaki, bet drouglazet ganeoh etre ar zantual hag an aoter. 36 Amen, lavared a ran deoh : kement-se a gouezo war ar rummad-mañ. »

« Jeruzalem ! Jeruzalem ! »

37 « Jeruzalem ! Jeruzalem ! Te hag a laz ar brofeted, hag a veinat ar re a zo kaset dit ! Ped gwech eo bet fellet din boda da vugale, e-giz eur yar o voda he foñsined dindan he diouaskell, ha n’eus ket fellet dit ! 38 Setu ma vo lezet ho ti digenvez evidoh. Rag lavared a ran deoh : n’am welot ket ken hiviziken, ken na lavarot : “Benniget an hini a zeu en ano an Aotrou !” »


Pennad pevar warn-ugent

Sinou ar fin

1 Deut er-mêz euz an templ, ez ee Jezuz gand e hent.Tostaad a ra e ziskibien outañ ha diskouez dezañ savaduriou an templ. 2 Respont a ra dezo : « Selled a rit, emezañ, ouz an oll draou-ze, neketa ? Amen, lavared a ran deoh : ne vo ket lezet mên war vên amañ, heb beza eilpennet. »

3 P’ema-eñ azezet war Venez an Olivez, e tosta e ziskibien outañ, en o fart o-unan. « Lavar deom, emezo, pevare e c’hoarvezo an traou-ze. Pehini e vo ar zin evid da zonedigez hag evid fin ar bed ? » 4 Respont a ra Jezuz dezo : « Diwallit, emezañ, na vefeh diheñchet gand den ebed. 5 Rag kalz a zeuio em ano hag a lavaro : “Me eo ar Hrist”, ha kalz tud a vo diheñchet ganto. 6 Emaoh o vond da gleved ano euz brezeliou ha trouziou-brezel : beillit ha bezit dizaon ! Rag red eo da gement-se erruoud. Med n’eo ket ar fin c’hoaz. 7 Rag sevel a raio broad a-eneb broad, rouantelez a-eneb rouantelez. Bez’ e vo meur a naonegez hag a gren-douar, hervez al lehiou. 8 An oll draou-ze a vo ar penn kenta euz poaniou ar gwilioud.

9 Neuze e viot gwasket ha lazet ganto, hag e viot kaseet gand an oll vroadou, en abeg d’am ano. 10 Kalz a gouezo neuze, en em werzo an eil egile, hag o-do kasoni an eil ouz egile. 11 Sevel a raio kalz falsprofeted, ha diheñcha eur bern tud. 12 Gand an direisted o vrasaad, e vo yenneeet karantez kalz tud. 13 Med an hini a zalho mad beteg ar penn, hennez a vo saveteet. 14 Embannet e vo kelou-mad ar rouantelez dre ar bed a-bez, e-giz eun testeni evid an oll vroadou. Ha neuze e teuio ar fin. »

Ar wallzismegañs euzuz

15 « Pa welot el leh santel ar wallzismegañs euzuz, bet embannet gand ar profet Daniel, ra gompreno an neb a lenn ! 16 Ra deho neuze tud Bro-Jude d’ar meneziou ! 17 An hini a vo war al leur-doenn, arabad dezañ diskenn da gemer tra pe dra en e di. 18 Hag an hini a vo er park, arabad dezañ dond war e giz da gemer e vantell. 19 Reuzeudig ar gwragez a vo o tougen pe o roi bronn, en deiziou-ze !

20 Pedit evid ma n’erruio ket ho tehadeg e-pad ar goañv pe d’ar zabad. 21 Rag bez’ e vo neuze eun anken ken braz ha ma n’eo ket bet c’hoarvezet adaleg penn kenta ar bed, ha ma ne hoarvezo ket mui. 22 Ma ne vije ket berreet an deiziou-ze, ne vefe saveteet den ebed. Med, en abeg d’an dibabidi, eo bet berreet an deiziou-ze. »

Falskristou ha falsprofeted

23 « Neuze, ma lavar unan bennag deoh : “Setu ar Hrist amañ !” pe : “Setu m’ema aze !” na gredit ket. 24 Rag sevel a raio falskristou ha falsprofeted. Roi a raint sinou ha burzudou braz, beteg diheñcha an dibabidi zoken, ma ve posubl. 25 Setu m’em-eus raglavaret deoh ! 26 Ma lavaront deoh eta : “Setu m’ema en dezerz !” n’it ket er-mêz, pe : “Setu m’ema en ti !” na gredit ket. 27 Rag, evel ma strink al luhedenn euz ar zav-heol, hag e sked beteg ar huz-heol, evel-se e vo donedigez mab an den. 28 Forz peleh e vo ar horv, eno en em vodo ar guped. »

Donedigez mab an den

29 « Dioustu war-lerh anken an deiziou-ze, an heol a deñvallaio, al loar ne roio ket he sklêrijenn ken, ar stered a gouezo euz an neñv, ha dibradet e vo galloudegeziou an neñvou. 30 Neuze en em ziskouezo sin mab an den e-barz an neñv.

Ha neuze e vo klemmadennou gand an oll veuriadou war an douar : gweled a raint mab an den o tond war goabrennou an neñv, gand galloudegez ha gloar. 31 Kas a raio e êlez gand o zrompill vraz ; ha boda a raint e zibabidi euz ar pevar avel, euz eur penn d’an neñv beteg ar penn all. »

Ar wezenn-fiez o kemenn an hañv

32 « Diwar ar wezenn-fiez deskit eur barabolenn : pa zeu dija he skourrou da veza glaz ha pa gresk he deliou, e ouzoh ema tost an hañv. 33 Evel-se, c’hwi ive, pa welot an oll draou-ze, gouezit ema-eñ tost, e toull an nor.

34 Amen, lavared a ran deoh : ne dremeno ket ar rummad-mañ heb na errufe an oll draou-ze. 35 Tremen a raio an neñv hag an douar, ma homzou a-vad, nann, ne dremenint ket ! 36 Evid an devez-se, an eur ? Den ebed ne oar, nag an êlez euz an neñv, nag ar Mab, den nemed an Tad, eñ e-unan. »

E-giz e deiziou Noe

37 « E-giz m’eo c’hoarvezet e deiziou Noe, evel-se e vo donedigez mab an den. 38 Rag bez’ edont, e deiziou an dour-beuz, o chervata hag oh eva, o kemer gwaz hag o kemer gwreg, beteg an deiz ma ’z eas Noe en arh. 39 N’o-deus gouezet netra a-raog m’eo deut an dour-beuz, ha m’int bet oll lamet kuit gantañ. Evel-se e vo donedigez mab an den.

Unan kemeret, egile lezet

40 « Neuze e vo daou zen er park : kemeret eo unan hag egile lezet. 41 Diou e vint o vala gand eur mên-milin : kemeret eo unan hag eben lezet. »

« Beillit ! Bezit war evez ! »

42 « Beillit eta ! N’ouzoh ket da beseurt devez e teuio hoh Aotrou. 43 Kompren a rit an dra-mañ : m’e-nije gouezet ar penn-tiegez da bed eure teufe al laer, e-nefe beillet ha n’e-nefe ket lezet toulla e di. 44 Setu perag, c’hwi ive, bezit prest : d’an eur na zofijit ket enni eo e teuio mab an den. »

Servicher leal pe fall

45 « Piou eta eo ar zervicher feal ha poelleg e-neus e aotrou lakeet e penn e diegez, evid roi dezo boued en amzer deread ? 46 Eüruz ar zervicher-ze hag a vo kavet war e labour gand e aotrou, pa zeuio hemañ. 47 Amen, lavared a ran deoh : e lakaad a raio e penn e oll draou.

48 Med, ma vez fall ar zervicher-ze, e lavaro e don e galon : “Dalea a ra ma mestr”, hag e krogo da skoi gand ar zervicherien all, da zebri ha da eva gand al lonkerien. 50 Dond a raio aotrou ar zervicher-ze d’an deiz n’ema ket o hortoz, d’an eur n’anavez ket. 51 E lemel a raio kuit, hag ober dezañ evel d’ar bilbouzed : eno e vo leñvadeg ha skrignadeg dent. »


Pennad pemp warn-ugent

An deg gwerhez

1 « Neuze e vo rouantelez an neñv heñvel ouz deg gwerhez, kemeret ganto o lampou evid mond er-mêz da ziambroug ar pried. 2 Hogen, pemp anezo a oa diboell ha pemp a oa fur. 3 Hag en eur gemer o lampou, ne femer ket ar re ziboell eoul ganto. 4 Ar re fur a-vad a gemer eoul e buredou, gand o lampou. 5 Dre ma oa dale gand ar pried, e krogont oll da voredi ha da gousked.

6 E-kreiz an noz e sav eun hopad : “Setu ar pried ! Kit er-mêz, en arbenn dezañ !” 7 Neuze e tihun an oll werhezed-se, hag e fardont o lampou. 8 Ar re ziboell a lavar d’ar re fur : “Roit deom lod euz hoh eoul : mervel a ra on lampou. 9 Ar re fur a respont : “Sur, emezo, ne vo ket tra-walh evidom hag evidoh. It kentoh da di ar varhadourien d’e brena evidoh.”

10 Mond a reont da brena, hag e tegouez ar pried. Ar re hag a zo prest a ya tre gantañ evid ar pred-eured, ha prennet an nor. 11 Goude-ze e teu ive ar gwerhezed all : “Aotrou, Aotrou, emezo, digor deom !” 12 Respont a ra-eñ : “Amen, emezañ, n’ouzon ket piou oh-c’hwi”. 13 Beillit eta ! N’ouzoh nag an deiz nag an eur. »

An talantou

14 « Evel eun den eta o vond kuit da bell : gelver a ra e zervicherien ha roi e vadou dezo. 15 Da unan e ro pemp talant, d’eun all daou, ha d’eun all unan : da bep hini hervez e ouiziegez. Ha mond a ra kuit da bell.

16 Dioustu e krog an hini e-neus bet pemp talant da ober ganta : gounid a ra pemp all. 17 Memez tra evid an hini e-neus bet daou : gounid a ra daou all. 18 Med mond a ra an hini e-neus resevet unan hepken d’ober eun toull en douar ha da guzad arhant e aotrou.

19 Goude kalz amzer, e teu aotrou ar zervicherien-ze, hag e rent e gont ganto. 20 Tostaad a ra an hini e-neus resevet pemp talant, ha degas pemp talant all : “Aotrou, emezañ, pemp talant az-peus roet din. Setu amañ pemp all bet gounezet ganin.” 21 E aotrou a lavar dezañ : “Brao-tre, servicher mad ha feal ! War nebeud a dra out bet fidel : e penn kalz traou e vi lakeet ganin. Deus tre e levenez da aotrou !”

22 Tostaad a ra ive an hini e-neus bet daou dalant : “Aotrou, emezañ, daou dalant az-peus roet din. Setu amañ daou all bet gounezet ganin.” 23 E aotrou a lavar dezañ : “Brao-tre, servicher mad ha feal ! War nebeud a dra out bet fidel : e penn kalz traou e vi lakeet ganin. Deus tre e levenez da aotrou !”

24 Ha tostaad a ra an hini e-neus resevet eun talant hepken. “Aotrou, emezañ, da anaoud a ran da veza eun den kaled : medi a rez e-leh ma n’az-peus ket hadet, dastum a rez e-leh ma n’az-peus ket strewet. 25 Aon am-eus bet, hag eet on da guzad da dalant en douar. Setu : ema ganit ar pez a zo dit.” 26 E aotrou a respont, en eur lavared dezañ : “Servicher fall ha lezireg ! Goud a rees e vedan e-leh ma n’em-eus ket hadet, e tastuman e-leh ma n’em-eus ket strewet. 27 Red e oa dit eta lakad ma arhant en eun ti-bank. Ha d’am distro am-befe kavet ar pez ’zo din, gand an interest diwarnañ. 28 Lamit eta an talant digantañ, ha roit-eñ d’an hini e-neus deg. 29 Rag roet e vo da gement hini e-neus, hag e-no ouspenn. Med digand an hini n’e-neus ket, e vo tennet ar pez e-neus zoken. 30 Hag ar zervicher didalvez, taolit-eñ er-mêz, en deñvalijenn ziavêz : eno e vo leñvadeg ha skrignadeg dent. »

« Deuit-c’hwi, tud benniget gand ma Zad ! »

31 « Pa zeuio mab an den, en e hloar, hag an oll êlez gantañ, eh azezo war e dron a hloar. 32 Hag an oll bobladou en em zastumo dirazañ. Disranna a raio an eil re diouz ar re all, evel ma tisrann ar mesaer an dañvadezed diouz ar bouhed. 33 Lakaad a raio an dañvadezed war e du dehou, hag ar bouhed war e du kleiz

34 Neuze e lavaro ar roue d’ar re war an tu dehou : “Deuit-c’hwi, tud benniget gand ma Zad ! Bezit hered d’ar rouantelez aozet evidoh, abaoe krouidigez ar bed ! 35 Rag naon am-eus bet hag ho-peus roet din da zebri, sehed am-eus bet hag ho-peus roet din da eva, estrañjour e oan hag ho-peus ma degemeret, 36 en noaz hag ho-peus ma gwisket, klañv hag ho-peus ma bizitet, bez’ e oan en toull-bah hag oh deut beteg ennon.”

37 Neuze ar re just a responto dezañ : “Aotrou, emezo, pevare on-eus-ni da welet o kaoud naon evid da vaga, pe o kaoud sehed evid roi dit da eva ? 38 Pevare on-eus da welet beza estrañjour evid da zegemer, pe en noaz evid da wiska ? 39 Pevare on-eus da welet klañv pe en toull-bah evid dond beteg ennout ?” 40 Ar roue a responto hag a lavaro dezo : “Amen, eme-ve deoh : dre m’ho-peus greet kement-se da unan euz ma breudeur, euz ar re vihanna a zo amañ, din eo ho-peus her greet.”

41 Neuze e lavaro d’ar re war an tu kleiz : “It pell diouzin, tud villiget, d’an tan peurbaduz, bet aozet evid an diaoul hag e êlez ! 42 Rag naon am-eus bet ha n’ho-peus ket roet din da zebri, sehed am-eus bet ha n’ho-peus ket roet din da eva, 43 bez’ e oan estrañjour ha n’ho-peus ket ma degemeret, en noaz ha n’ho-peus ket ma gwisket, klañv pe en toull-bah ha n’ho-peus ket ma bizitet.”

44 Respont a raint-i ive neuze : “Aotrou, emezo, pevare on-eus da welet o kaoud naon pe zehed, o veza estrañjour pe en noaz, klañv pe en toull-bah, ha n’on-eus ket da zervichet ?” 45 Neuze e responto dezo : “Amen, emezon, dre n’ho-peus ket greet kement-se da unan euz ar re-mañ, euz ar re vihanna, din kennebeud n’ho-peus ket her greet.” 46 Ha mond a raio ar re-mañ d’ar hastiz peurbaduz, med ar re just d’ar vuhez peurbaduz. »


Pennad c’hweh warn-ugent

Toastaad a ra gouel Pask

1 Hogen, pa echu Jezuz an oll gomzou-ze, e lavar d’e ziskibien : 2 « Gouzoud a rit e tegouez ar Pask a-benn daou zevez : gwerzet e vo mab an den evid beza staget ouz eur groaz. »

3 Neuze ar veleien-veur ha kozidi ar bobl en emvod e palez ar beleg-meur, Kaifaz e ano· 4 En em gleved a reont evid paka krog e Jezuz, dre widre, hag e laza. 5 Med lavared a reent : « Arabad henn ober e-pad ar gouel, gand aon na zavfe trouz e-touez ar bobl ! »

An olevadenn e Betani

6 Jezuz o veza e Betani, e ti Simon an den lor, 7 e tosta outañ eur vaouez, ganti eul lestr alabastr, leun a louzou-c’hwez-vad ker-ruz. E skuilla a ra war e benn, e-pad m’ema-eñ ouz taol. 8 O weled kement-se, eo kounnaret an diskibien : « Perag, emezo, seurt koll ? 9 Rag an dra-ze a helle beza gwerzet ker-tre, ha roet d’ar re baour. »

10 O houzoud kement-se, e lavar Jezuz dezo : « Perag hegasi ar vaouez-mañ ? Rag eun dra vad he-deus-hi greet evidon. 11 Peorien ho-po atao en ho touez. Med me ne vin ket atao ganeoh. 12 Rag, en eur daoler ar c’hwez-vad-se war ma horv, he-deus greet kement-se evid ma zebeliadur. 13 Amen, lavared a ran deoh : e kement leh ma vo embannet ennañ ar helou-mad-mañ, dre ar bed a-bez, e vo komzet euz ar pez he-deus-hi greet, evid derhel soñj anezi. »

Klask a ra Judaz an tu

14 Mond a ra neuze unan euz an daouzeg, Judaz Iskariot e ano, da gaoud ar veleien-veur : 15 « Petra, emezañ, ho-peus c’hoant da roi din ? Hag e roi a rain-me etre ho taouarn. » Poueza a reont tregont pez arhant dezañ. 16 Adaleg neuze, e klaske-eñ an tu d’e roi.

Aoza a reont ar Pask

17 Da zeiz kenta ar Bara-Dihoell, e tosta e ziskibien ouz Jezuz : « Peleh, emezo, ho-peus c’hoant e pourchasim an traou evidout, da zebri ar Pask ? » 18 Lavared a ra : « Kit e kêr, da di henn-mañ-henn, ha lavarit dezañ : “Tost eo ma amzer, eme ar mestr, en da di e ran ar Pask gand ma diskibien.” » 19 Ober a ra an diskibien evel m’e-neus Jezuz lavaret dezo, ha pourchas ar Pask.

« Unan ahanoh am roio »

20 Deut an abardaez, ema-eñ ouz taol gand an daouzeg. 21 E-pad m’emaint o tebri, e lavar dezo : « Amen, lavared a ran deoh : unan ahanoh am roio. » 22 Glaharet-braz, e krogont da lavared dezañ, pep hini d’e dro : « Daoust ha me eo, Aotrou ? » 23 Respont a ra : « An hini, emezañ, e-neus soubet e zorn ganin er plad, hennez am roio. 24 Mond a ra mab an den kuit, e-giz m’eo bet skrivet diwar e benn. Reuzeudig a-vad an den-ze m’eo roet mab an den drezañ ! An den-ze a oa gwelloh evitañ ma ne vefe ket bet ganet. » 25 Judaz, hag a zo o vond d’e roi, a respont, en eur lavared : « Daoust ha me eo, rabbi ? » Respont a ra-eñ dezañ : « Te, henn lavared a rez ! »

« Kement-man eo ma horv »

26 E-pad m’emaint o tebri, e kemer Jezuz bara, e vennig, e dorr, hag e ro d’e ziskibien, en eur lavared : « Kemerit ! Debrit ! Kement-mañ eo ma horv. » 27 Kemer a ra eur haliriad, lavared trugarez, ha roi dezo : « Evit oll anezañ, emezañ, 28 rag kement-mañ eo ma gwad, hini an emgleo, skuillet evid kalz tud, da bardoni ar pehejou. 29 Lavared a ran deoh : ne vin ket mui euz frouezenn-mañ ar winienn, beteg an deiz ma heh evin, nevez, e rouantelez ma Zad. »

« A-raog ma kano eur hillog »

30 Goude beza kanet ar zalmou, ez eont er-mêz, war-zu Menez an Olivez. 31 Neuze e lavar Jezuz dezo : « Streboti a reot oll, en abeg din, en noz-mañ. Rag skrivet eo : “Skoi a rin gand ar mesaer, hag e vo strewet dañvadezed an tropell.” 32 Med, goude beza adsavet, e vin en ho raog e Bro-Halile. » 33 Respont a ra Pèr : « Ma strebotfe an oll, emezañ, en abeg dit, biken ne strebotin-me. » 34 Jezuz a lavar dezañ : « Amen, dit e lavaran : en noz-mañ, a-raog ma kano eur hillog, az-po ma nahet teir gwech ! » 35 Ha Pèr da respont dezañ : « Petra bennag ma vefe red din mervel ganit, ne da nahin ket, sur ! » Hag an oll ziskibien a lavar ar memez tra.

E Jetsemani

36 Dond a ra Jezuz neuze ganto d’eun domani anvet Jetsemani. Lavared a ra d’e ziskibien : « Azezit amañ, e-pad ma ’z in pelloh da bedi. » 37 Kemer a ra gantañ Pèr hag an daou vab da Zebede, ha krogi a ra da veza trist ha leun a anken. 38 Neuze e lavar dezo : « Trist-meurbed eo ma ene, beteg mervel. Chomit amañ ha beillit ganin ! »

39 Mond a ra eun tammig pelloh, koueza, e dal gantañ ouz an douar, ha pedi, o lavared : « Ma Zad, ma ve posubl, ra dremeno ar haliriad-mañ pell diouzin ! Evelato, nann evel ma fell din-me, med evel ma fell dit-te ! » 40 Dond a ra beteg e ziskibien, hag o havoud kousket. Lavared a ra da Bèr : « Evel-se, n’ho-peus ket bet nerz a-walh da veilla ganin, e-pad eun eurvez nemetken ? 41 Beillit ha pedit, evid na gouezot ket en tentadur ! Birvidig eo ar spered, dinerz avad eo ar horv. »

42 Evid an eil gwech, ez a pelloh da bedi : « Ma Zad, emezañ, ma n’eo ket posubl e tremenfe an dra-mañ heb din e eva, ra vo greet da volontez ! » 43 Dond a ra en-dro hag o havoud kousket, rag ponnerreet e oa o daoulagad. 44 O lezel a ra, mond kuit adarre, ha pedi evid an trede gwech, en eur lavared ar memez komzou. 45 Neuze e teu war-zu e ziskibien hag e lavar dezo : « Bremañ, kouskit ha diskuizit ! Setu : tost eo an eur ma vo roet mab an den etre daouarn ar beherien... 46 Dihunit ! Deom ! Setu m’eo tost an hini hag am roio ! »

Pok Judaz

47 O komz ema-eñ c’hoaz pa zegouez Judaz, unan euz an daouzeg, ha gantañ eur boblad-tud niveruz o tougen klezeier ha bizier, euz perz ar veleien-veur ha kozidi ar bobl.

48 An hini hag a zo o vond d’e werza e-neus roet dezo eur zin, en eur lavared : « An hini a roin eur pok dezañ, hennez eo. Tapit krog ennañ ! » 49 Kerkent e tosta ouz Jezuz, en eur lavared : « Salud, rabbi ! » hag e ro eur pok dezañ. 50 Jezuz a lavar dezañ : « Ma mignon, evid an dra-ze emaout amañ ! » Tostaad a reont neuze, taoler o daouarn war Jezuz, ha tapoud krog ennañ.

An taol kleze

51 Ha setu unan euz ar re a zo gand Jezuz oh astenn e zorn, hag o tihouina e gleze. Skoi a ra gand servicher ar beleg-meur, ha troha dezañ beg e skouarn. 52 Neuze e lavar Jezuz dezañ : « Lak da gleze en e blas en-dro. Rag an oll hag a gemer ar hleze a vo kollet dre ar hleze. 53 Pe kavoud a ra dit ne hellan ket erbedi ma Zad ? Hag e kasfe din dioustu daouzeg strollad êlez. 54 Penaoz e vefe neuze sevenet ar skridou hag a lavar eo red d’an traou beza evel-se ? » 55 D’an eur-ze e lavar Jezuz d’ar bobl : « E-giz evid eun torfetour oh deut er-mêz, gand klezeier ha bizier, da dapoud krog ennon. Bemdez e oan azezet, o kelenn en templ, ha n’ho-peus ket tapet krog ennon. 56 Kement-mañ a hoarvez evid ma vo sevenet skridou ar brofeted. » E leze} a ra neuze an oll ziskibien, ha tehed a reont kuit.

E ti ar beleg-meur

57 Ar re o-deus tapet krog e Jezuz, e gas da di Kaifaz, ar beleg-meur, el leh m’eo bodet ennañ ar skriverien hag ar gozidi. 58 Pèr a ya war e lerh, a-bell, beteg porz ar beleg-meur. Ha mond a ra e-barz da azeza gand ar vevelien, evid gweled ar fin.

Tevel a ree

59 Ar veleien-veur hag ar zanhedrin a-bez a glaske eur falstesteni a-eneb Jezuz, evide lakaad d’ar maro. 60 Ne gavont tra ebed e-touez ar falstestou niveruz hag a dosta. 61 A-benn ar fin, e teu daou : « Hemañ, emezo, e-neus lavaret : “Bez’ e hellan distruja santual Doue, hag e lakaad en e zao, a-benn tri devez !” » 62 Sevel a ra ar beleg-meur ha lavared dezañ : « Ne respontez netra d’ar pez a desteniont a-eneb dit ? » 63 Med tevel a ree Jezuz.

« Ha bez’ out-te Mab Doue ? »

Hag e lavar ar beleg-meur dezañ : « Da aspedi a ran, dre an Doue beo : lavar deom ha te eo ar Hrist, Mab Doue ? » 64 Jezuz a respont dezañ : « Henn lavared a rez-te ! Koulskoude e lavaran deoh : hiviziken e welot mab an den, azezet en tu dehou d’ar Galloud, hag o tond war goabrennou an neñv. »

65 Neuze e rog ar beleg-meur e zillad, en eur lavared : « Blasfemet e-neus ! Peseurt ezomm oneus c’hoaz da gaoud testou ? Setu m’ho-peus klevet ar blasfem bremañ ! 66 Petra ’zoñjit c’hwi ? » Respont a reont : « Meritoud a ra ar maro ! »

« Gra da brofet ! »

67 Neuze e tufont war e veg, hag e roont skouarnadou dezañ. 68 E skourjeza a ra reou all, en eur lavared : « Gra da brofet evidom, Krist ! Piou e-neus skoet ganit ? »

Kana a ra eur hillog

69 Pèr a oa azezet en diavêz, er porz. Tostaad a ra eur vatez outañ : « Te ive, emezi, a oa gand Jezuz ar Galilean. » 70 Med naha a ra-eñ, dirag an oll, en eur lavared : « N’ouzon ket petra a lavarez ! » 71 Krogi a ra da vond er-mêz, war-zu an nor-borz. Unan all e wel hag hi da lavared d’ar re a zo eno : « Hemañ a oa gand Jezuz an Nazorean. » 72 Hag adarre e nah-eñ, en eur doui : « N’anavezan ket an den. » 73 Eun tammig goude, e tosta ar re a oa eno hag e lavaront da Bèr : « E gwirionez, te ive a zo en o zouez ; forz penaoz, gwerzet out dre da bouez-mouez ! » 74 Neuze e krog da doui gand mil malloz : « N’anavezan ket an den ! » Ha kerkent e kan eur hillog.

75 Ha dond a ra soñj da Bèr euz ar pez e-noa Jezuz lavaret : « A-raog ma kano eur hillog, az-po ma nahet teir gwech. » Mond a ra er-mêz, ha gouela c’hwero.


Pennad seiz warn-ugent

Kaset da Pilat

1 Deut ar mintin, en em vod an oll veleien-veur ha kozidi ar bobl, en eur huzul a-eneb Jezuz, evid e lakaad d’ar maro. 2 E liamma a reont, e gas ganto, hag e roi da Bilat, ar gouarnour.

Judaz a ya d’en em grouga

3 Neuze e wel Judaz, an hini hag e ro, eo Jezuz kondaonet. Deut keuz dezañ, e kas ar peziou arhant en-dro 4 d’ar veleien-veur ha da gozidi ar bobl : « Pehet em-eus, emezañ, en eur roi eur gwad divlam. » Lavared a reont : « Petra a ra an dra-ze deom-ni ? Dit eo da weled ! » 5 Stlepel a ra ar peziou arhant er zantual, tehed kuit, ha mond d’en em grouga.

6 Ar veleien-veur a gemer ar peziou arhant : « N’eus ket aotre, emezo, d’o zaoler e teñzor an templ, rag priz ar gwad int. » Kuzulia a reont kenetrezo, ha prena Park ar Poder, evid sebelia an dud estren. 8 Setu perag eo anvet ar park-se : Park ar Gwad, beteg hirio. 9 Neuze eo deut da wir komzou ar profet Jeremi : « Kemer a reont an tregont pez arhant, priz ar pez a oa-eñ bet istimet, istimet gand bugale Izrael, 10 hag o roi evid Park ar Poder, evel m’e-neus an Aotrou lavaret din. »

« Ha bez’ out-te roue ar Juzevien ? »

11 Lakeet eo Jezuz dirag ar gouarnour. Ober a ra ar gouarnour goulennou outañ : « Te, emezañ, ha bez’ out-te roue ar Juzevien ? » Respont a ra Jezuz : « Henn lavared a rez ! »

12 Tamallet eo gand ar veleien-veur hag ar gozidi, med ne responte netra.13 Neuze e lavar Pilat dezañ : « Ne glevez ket ? Ped testeni a zougont a-eneb dit ! » 14 Ne responte-eñ netra, ger ebed, ken m’eo souezet-braz ar gouarnour.

Barabaz

15 Da beb gouel, e oa ar gouarnour kustum da zieubi eur prizoniad d’an dud, an hini a felle dezo. 16 Bez’ o-doa neuze eur prizoniad brudet, Barabaz e ano. 17 En em voda a reont eta ; hag e lavar Pilat dezo : « Pehini a fell deoh e tieubin ? Barabaz pe Jezuz, anvet ar Hrist ? » 18 Rag gouzoud a ree e oa dre warizi o-doa e roet. 19 E-pad ma oa azezet war e gador-varn, e lak e wreg kemenn dezañ : « Ra vo netra, emezi, etrezout-te hag an den digabluz-se ! Rag gouzañvet em-eus kalz hirio, en eun huñvre, en abeg dezañ. »

« Ra vo staget ouz eur groaz ! »

20 Ar veleien-veur hag ar gozidi a lak an dud da houlenn Barabaz, ha da gas Jezuz da goll. 21 Komz a ra ar gouarnour, o lavared dezo : « Pehini euz an daou-mañ ho-peus c’hoant e tieubin deoh ? » Respont a reont : « Barabaz ! » 22 Ha Pilat da lavared dezo : « Petra ’ta a rin gand Jezuz, anvet ar Hrist ? » Respont a reont oll : « Ra vo staget ouz eur groaz ! – 23 Med, emezañ, peseurt droug eta e-neus-eñ greet ? » Youhal a reont muioh c’hoaz, en eur lavared : « Ra vo staget ouz eur groaz ! »

24 Gweled a ra Pilat n’eus netra d’ober, med ema kentoh an tousmah o sevel. Kemer a ra dour, gwalhi e zaouarn dirag ar bobl, ha lavared : « Divlam on e-keñver ar gwad-mañ. Deoh da weled ! » 25 Hag ar bobl a-bez da respont : « Ra vo e wad warnom, emezo, ha war or bugale ! » 26 Neuze e tieub Barabaz dezo, hag e ro Jezuz evid ma vo staget ouz eur groaz, goude e lakaad da veza skourjezet.

Ar gurunenn spern

27 Soudarded ar gouarnour a zegas Jezuz ganto neuze er pretordi, ha boda a reont ar gohortenn en he fez. 28 O veza e ziwisket, e taolont eur vantell ruz-moug warnañ. 29 Lakaad a reont war e benn eur gurunenn spem, plezet ganto, hag eur gorzenn en e zorn dehou. O koueza war o daoulin, e reont goap anezañ, en eur lavared : « Salud dit, roue ar Juzevien ! » 30 Tufa a reont warnañ, hag o kemer ar gorzenn, e skoont war e benn. 31 P’o-deus greet goap anezañ, e tiwiskont e vantell digantañ, hag e lakont e zillad warnañ.

Simon a Ziren

E gas a reont evid beza staget ouz ar groaz. 32 En eur vond er-mêz, e kavont eun den, euz Siren, anvet Simon. Hennez a gemeront, evid ma tougo kroaz Jezuz. 33 Dond a reont d’al leh anvet Golgota, da lavared eo Leh ar Glopenn, 34 ha gwin kemmesket gand bestl a roont dezañ da eva.

Jezuz ouz ar groaz

35 Goude beza e staget ouz ar groaz, e lodennont e zillad, en eur denna d’ar zort, 36 hag ez azezont eno evid evezia outañ. 37 Lakaad a reont e abeg-tamall, skrivet a-uh d’e benn : « Hemañ eo Jezuz, roue ar Juzevien. » 38 Neuze e stagont ouz eur groaz daou dorfetour gantañ, unan d’an tu dehou, unan all d’an tu kleiz.

39 E vallozi a ree an dremenidi, en eur heja o fenn : 40 « Te, emezo, hag a zistruj ar zantual hag e zav a-benn tri devez, en em zavete, te da-unan ! Mard out Mab da Zoue, diskenn neuze euz ar groaz ! » 41 Er memez mod, e ree ar veleien-veur goap anezañ. Gand ar skriverien hag ar gozidi, e lavarent : 42 « Reou all e-neus saveteet, ha ne hell ket en em zavetei, eñ e-unan ! Roue Izrael eo-eñ ? Ra ziskenno bremañ euz ar groaz hag e kredim ennañ ! 43 Lakeet e-neus e fiziañs e Doue : da hemañ d’e zieubi bremañ, ma ’z eo karet gantañ ! Rag lavaret e-neus : “Bez’ on-me Mab da Zoue.” » 44 An dorfetourien, staget ouz eur groaz en e gichenn, e gunujenne en eun doare heñvel.

Jezuz a varv war ar groaz

45 Adaleg ar c’hwehved eur, e tiskenn eun deñvalijenn war an douar a-bez, beteg an naved eur. 46 War-dro an naved eur, e laosk Jezuz eur griadenn vraz : « Eli ! Eli ! emezañ, lema sabachtani ? » pe c’hoaz : « Ma Doue ! Ma Doue ! Perag az-peuz ma dilezet ? »

47 Klevet eo gand ar re a zo eno hag e lavaront : « Hemañ a halv Eliaz. » 48 Dioustu e red unan anezo, e kemer eur spouenn, he leugn gand gwinegr, he lak en-dro d’eur gorzenn, hag e ro dezañ da eva. 49 Ar re all a lavar : « Lez ! Gwelom hag-eñ e teuio Eliaz d’e zavetei. » 50 Adarre e laosk Jezuz eur griadenn vraz, hag e rente spered.

51 Ha setu m’eo roget gouel ar zantual e daou damm, euz ar penn uhella beteg an traoñ. Krena a ra an douar, hag ar vein da faouta. 52 Ar beziou a zigor, hag adsavet ez eus kalz euz korvou ar zent eet da anaon. 53 Dond a reont er-mêz euz ar beziou, goude e adsao, antreal er gêr zantel, hag en em ziskouez da galz a dud.

54 Aon braz e-neus ar hantener hag ar re all a zo gantañ o tiwall Jezuz, pa welont ar hren-douar, hag an traou all c’hoarvezet. Lavared a reont : « E gwirionez e oa hemañ Mab da Zoue ! »

55 Bez’ e oa eno meur a vaouez o selled a-bell. Heuliet o-deus Jezuz adaleg Bro-Halile, evid e zervicha. 56 En o zouez : Mari-Madalen, Mari mamm da Jakez ha da Jozef, ha mamm mibien Zebede.

Ar beziadur

57 Deut an noz, e tegouez eun den pinvidig euz Aritmati, anvet Jozef. Eñ ive a zo deut da veza eun diskib da Jezuz. 58 Mond a ra da gaoud Pilat, ha goulenn korv Jezuz. Neuze e kemenn Pilat e roi dezañ. 59 Jozef a gemer ar horv, e bak en eul liñser hlan, 60 hag e lak en eur bez nevez, bet kleuzet gantañ en eur roh. Ruilla a ra eur mên braz dirag toull ar bez, ha mond kuit. 61 Bez’ e oa eno Mari-Madalen hag ar Vari all, azezet dirag ar bez.

Siellet eo ar mên

62 D’an devez war-lerh, goude an Aozidigez, en em vod ar veleien-veur hag ar farizianed e ti Pilat. 63 Lavared a reont : « Aotrou, deut ez eus soñj deom e-neus an toueller-ze lavaret, pa oa beo c’hoaz : “A-benn tri devez eh adsavin.” 64 Kemenn eta ma vo diwallet ar bez, en eun doare sur, beteg an trede deiz, gand aon na zeufe e ziskibien d’e laerez, ha da lavared d’ar bobl : “Adsavet eo a-douez ar re varo ! “An douelladenn-mañ a vefe gwasoh eged an hini genta. » 65 Respont a ra Pilat dezo : « Bez’ ho-peus gwarded ! Kit, diwallit ar bez, en eun doare sur, evel ma ouzoh ! » 66 Mond a reont ha diwall ar bez en eun doare sur : siellou a lakont war ar mên, ha gwarded dirazañ.


Pennad eiz warn-ugent

« Adsavet eo ! »

1 Goude ar zabad, da darz an deiz kenta euz ar zizun, e teu Mari-Madalen hag ar Vari all da weled ar bez. 2 Ha setu eur mell kren-douar, rag eun êl d’an Aotrou a ziskenn euz an neñv, a dosta, a ruill ar mên a-gostez, hag a azez warnañ. 3 E zoare a zo evel eul luhedenn, hag e zillad gwenn evel an erh. 4 Gand ar spont razañ, e krog ar warded da grena, hag e teuont da veza evel maro.

5 Komz a ra an êl d’ar merhed : « Evidoh, emezañ, bezit dizaon : goud a ran emaoh o klask Jezuz hag a zo bet staget ouz ar groaz. 6 N’ema ket amañ, rag adsavet eo, evel m’e-noa lavaret. Deuit ha gwelit al leh ma oa bet lakeet ennañ. 7 It buan da lavared d’e ziskibien : “Adsavet eo a-douez ar re varo ! Setu m’ema-eñ en ho raog e Bro-Halile : eno e vo gwelet ganeoh.” Setu : lavaret em-eus deoh. » 8 Kuitaad a reont buan ar bez, ha gand aon ha levenez vraz, e redont da gas kelou d’e ziskibien.

« Kit da gemenn d’am breudeur ! »

9 Ha setu m’en em gav Jezuz ganto, en eur lavared : « Salud deoh ! » Tostaad a reont outañ, krogi en e zreid, ha stoui dirazañ. 10 Neuze e lavar Jezuz dezo : « Bezit dizaon ! Kit da gemenn d’am breudeur mond da Vro-Halile : eno e vin gwelet ganto. »

Ar warded a resev arhant

11 E-pad m’emaint o vond, setu ma teu lod euz ar warded e kêr, da zegas kelou d’ar veleien-veur euz kement a zo bet c’hoarvezet. 12 Ar re-mañ en em vod gand ar gozidi, evid delher kuzul kenetrezo. Ha kalz arhant a roont d’ar warded, en eur lavared dezo : 13 « C’hwi a lavaro : “E ziskibien a zo deut e-kreiz an noz hag o-deus e laeret, pa oam-ni kousket.” 14 Ha ma vefe klevet an dra-ze gand ar gouarnour, e teufem a-benn d’e hounid, ha d’ho lakaad da veza dineh. » 15 Kemer a reont an arhant hag ober e-giz m’eo bet kelennet dezo. Hag en em skignet eo bet ar homzou-ze e-touez ar Juzevien, beteg bremañ.

« Bez’ emaon ganeoh »

16 Mond a ra an unneg diskib da Vro-Halile, war ar menez merket dezo gand Jezuz. 17 E weled a reont, ha stoui dirazañ. Med lod anezo a jom en entremar. 18 Jezuz a dosta hag a gomz dezo : « Peb galloud, emezañ, a zo bet roet din-me, en neñv ha war an douar. 19 It eta ! Grit diskibien gand an oll vroadou, ha badezit-i en ano an Tad, hag ar Mab, hag ar Spered Santel ! 20 Deskit dezo delher kement am-eus gourhemennet deoh ! Ha setu m’emaon-me ganeoh bemdez, beteg fin ar bed. »

 

  • 1
  • 2
  • 3
  • 4
  • 5
  • 6