An Testamant Nevez : eil lodenn – Troet e brezoneg gand « Kenvreuriez ar brezoneg » Eskopti Kemper ha Leon, 1988.

TIMOTE II.
Pennad-kinnig

Paol a zo moarvad e prizon e Rom, en amzer Neron, dilezet gand an oll, da vare e varnedigez evel Jezuz e vestr ; o hortoz ar maro ema ; kredi a ra dezañ stard e-neus greet mad ar garg fiziet ennañ e-touez kalz a drubuillou. E gortoz ema eta kaoud digand e Vestr, ar gurunenn a hloar. Amañ ez eus evel eul lizer testamant euz e berz. Aspedi a ra e genlabourer ken karet da jom fidel d’ar Hrist, da brezeg an Aviel heb ehan, da stourm ouz ar fals-doktored ha da gas da benn e vinistrèrèz en desped d’an avel a-benn.

Eil lizer da Dimote

I. ¹ Paol, abostol Jezuz Krist, dre volontez Doue, hervez ar bromesa a vuez a zo e Jezuz Krist, ² da Dimote va mab karet meurbed, gras, trugarez ha peoh, a-berz Doue an Tad hag a-berz Jezuz Krist on Aotrou.

³ Leun on a anaoudegez vad e keñver Doue a zervichan, war-lerh va zud koz, divlam va houstiañs, pa ran dalhmad, noz-deiz, ano ahanout em fedennou : ⁴ pa zeu da zoñj din en da zaerou, e teu c’hoant braz din da weled ahanout, evid beza leun a joa. ⁵ Dond a ran da zoñjal er feiz gwirion a zo ennout, feiz hag a veze dalhmad da genta e Loiza, da vamm goz hag Eunika da vamm, hag a zo, me ’zo sur, ennout te ivez. ⁶ Setu perag e tegasan dit da zoñj e rankez renevezi donezon Doue a zo ennout abaoe m’am-eus astennet va daouarn warnout. ⁷ Rag ar spered e-neus roet Doue deom n’eo ket eur spered a lentegez, med eur spered a nerz, a garantez, a furnez.

⁸ Arabad eo dit eta kaoud mez euz testeni an Aotrou, na mez ahanon-me a zo er prizon evitañ, med kemer da lod a boan evid an Aviel, gand nerz an Aotrou. ⁹ Or zaveteet e-neus hag or galvet dre eur halvadenn zantel, n’eo ket ablamour d’on oberou deom-ni, med ablamour d’e venoz ha d’e hras roet deom a oll-viskoaz e Jezuz ar Hrist ; ¹⁰ ha breman eo bet diskleriet splann dre ziskouezidigez or Zalver Jezuz Krist e-neus, eñ, distrujet ar maro ha lakeet da skedi ar vuez peurbaduz dre an Aviel ¹¹ ez on bet lakeet da embanner, da abostol ha da gelenner anezañ. ¹² Setu aze perag e houzañvan ar poaniou-ze, med n’am-eus ket a vez ganto, rag me a oar piou am-eus lakeet va feiz ennañ, ha sur on eo gouest da vired an teñzor fiziet ennon beteg an Deiz-se. ¹³ Renk da vuez war ar gelennadurez yac’h am-eus roet dit er feiz hag er garantez a zo e Jezuz Krist. ¹⁴ An teñzor kaer a zo bet fiziet ennom, mir anezañ gand sikour ar Spered Santel a zo o chom ennom.

¹⁵ Goûd a ouzout o-deus oll dud an Azia va dilezet, en o zouez Frigel hag Ermojel. ¹⁶ Ra skuillo an Aotrou e druez war famill Onezifor, rag aliez e-neus va frealzet, ha n’o-deus ket va jadennou greet mez dezañ. ¹⁷ Er hontrol eo, a-veh degouezet e Rom eo bet aketuz d’am hlask, hag e-neus kavet ahanon. ¹⁸ Ra zeuio an Aotrou da gaoud truez outañ d’an Deiz-se. Ha kement servich e-neus rentet din e Efez, te o anavez gwelloh eged n’eus forz piou.

Kemer da lod er boan

II. ¹ Te eta, va mab, kemer nerz er hras a zo er Hrist Jezuz. ² Ar gelennadurez az-peus klevet ganin dirag kalz a destou, ro anezi da anaoud da dud sur, a vezo ivez gouest da gelenn re all ; ³ Kemer da lod a boaniou, evel eur gwir zoudard da Jezuz-Krist : ⁴ Den ebed, o vond da zoudard, ne jom d’en em stroba gand traouachou ar bed, ma fell dezañ plijoud d’an hini e-neus enrollet anezañ.

⁵ Evel-se ivez, ne reseo ar gourener ar gurunenn, nemed ha stourmet e-nefe hervez ar reolennou. ⁶ D’ar houer a gemer poan e tle dond al lodenn genta a frouez. ⁷ Intent ar pez a lavaran, an Aotrou a roio dit da intent an oll draou-ze.

⁸ Dalh soñj euz Jezuz Krist adsavet a-douez ar re varo, ganet euz gouenn David hervez an Aviel a embannan. ⁹ Evitañ e houzañvan beteg beza chadennet evel eun torfedour. Komz Doue a-vad n’eo ket chadennet. ¹⁰ Setu perag e houzañvan peb tra evid ar re zibabet, evid m’o dezo int-i ivez ar zilvidigez a zo er Hrist Jezuz hag e hloar peurbaduz ; ¹¹ din a fiziañs eo ar gomz-mañ : « Ma varvom a-unan gantañ, a-unan gantañ e vevim ; ¹² ma houzañvom a-unan gantañ, a-unan gantañ e renim ; ma nahom anezañ, eñ ivez on naho. ¹³ Ma ne jomom ket fidel, eñ a jom fidel, rag ne hell ket en em zinah e-unan.

¹⁴ An oll draou-se a ziskouez sklêr dirag Doue eo red en em vired diouz rendaelou diwar-benn ger pe her, kement-se ne zervich da netra, nemed da goll ar re a zelaou anezo. ¹⁵ Laka da boan evid beza dirag Doue eun den amprouet, eur micherour ha n’e-neus ket da gaoud mez oh embann ar gomz a wirionez. ¹⁶ Evid ar homzou goullo ha disakr, diwall outo. Ar re a zo troet ganto a zeuio muioh-mui da veza difeiz ; ¹⁷ o homz a zo heñvel ouz ar hrign-beo a en em astenn. ¹⁸ Evel-se ema kont gand Himenea ha Filetos : pelleet o-deus diouz ar wirionez o lavared eo dija degouezet adsao ar re varo, hag evel-se e tiskaront o feiz da veur a hini. ¹⁹ Koulskoude, chom a ra divrall an diazez bet lakeet gand Doue, siellet eo gand ar gomz-mañ : « an Aotrou a anavez e dud », ha c’hoaz : « Ra deho diouz ar fallentez en neb a bed ano an Aotrou. »

²⁰ En eun ti braz ne vez ket hebken listri aour hag arhant, bez ’e vez ivez re goad ha re bri. Lod a zo evid eur zervich enoruz, lod all evid eur zervich disterroh. ²¹ An den a laka dilastez e goustians euz ar saotrajou-ze a zo eul lestr nobl, santelleet, talvouduz evid ar mestr, mad evid kement labour a zo ²² tro kein da youlou fall ar yaouankiz, klask ar justis, ar feiz, ar garantez, ar peoh gand ar re a bed an Aotrou a galon vad ²³ na jom ket da ranellad diwar-benn traou didalvez ha diboell, te a oar e tegasont rendaelou. ²⁴ Servicher Doue ne dle ket rendaela, med beza laouen ouz an oll, gouest da gelenn ha da houzañv enebiez ; ²⁵ gand dousder e tle kentelia an enebourien ; Doue, piou a oar, a raio dezo marteze cheñch buez evid anaoud ar wirionez, ²⁶ ha dond en o rezon vad, oh en em denna euz pejou an diaoul a zalhe anezo ereet ha sujet dezañ.

Tud difeiz an amzeriou diweza

III. ¹ Red eo dit gouzoud mad kement-mañ : en deiziou diweza e tegouezo mareou kriz. ² An dud a vo troet ganto o-unan, skraperien arhant e vezint, lorhuz, ourgouilluz, touerien Doue, disent ouz o zud, dihrad, disakr, ³ digalon, dihabask, droug-prezeger, direiz kriz, enebour d’ar mad, ⁴ divergont, trubard, dallet gand an ourgouill, gwelloh ganto plijaduriou eged Doue. ⁵ Da weled e chomint tud a relijion, med heb kaoud fiziañs ebed ken en he galloud. Tro da gein d’an dud-se ivez, ⁶ rag ar seurt tud-se eo ar re a ya en tiez da gemered en o rouejou merhedigou sammet a behejou, poulzet gand youlou a beb seurt, ⁷ dalhmad o teski, med heb gelloud morse dond da anaoud ar wirionez. ⁸ Hag evel ma ’h enebas Jannez ha Jambrez ouz Moizez, evel-se ivez an dud-se a eneb ouz ar wirionez, fallagr int a spered ha bresk a feiz. ⁹ Med ne ’z aint ket pelloh, rag sklêr eo o fallentez d’an oll, evel ma oe hini an daou-se.

¹⁰ Te a-vad, gand hast out deuet d’am heul er gelennadurez, en doare beva, er mennadou, er feiz, er basianted, er garantez, en nerz kalon, ¹¹ en heskinaduriou hag er poaniou am-eus bet da houzañv e Antiokia, e Ikonion, e Listr. ¹² Ya, kement hini a fell dezañ ren eur vuez devod e Jezuz Krist, a vezo gwallgaset. ¹³ An dud fallagr int-i, an douellerien a yelo war fallaad, o touella ar re all hag o veza touellet o-unan. ¹⁴ Te a-vad, dalh mad d’ar pez a zo bet desket dit ha degemeret ganit : gouzoud a rez gand piou out bet kelennet. ¹⁵ Abaoe da vugaleaj eh anavezez ar Skrituriou sakr, ar re a hell rei dit ar furnez a gas d’ar zilvidigez dre ar feiz e Jezuz Krist. ¹⁶ Ar Skritur Sakr a-bez a zo awenet gand Doue, talvouduz eo evid kelenn, evid divenn ar wirionez, diarbenn diouz an droug ha deski beva hervez ar justis. ¹⁷ Evel-se servicher Doue a zeu da veza pourvezet mad ; dezañ kement a zo red evid peb oberenn vad.

Embann ar Gomz

IV. ¹ Dirag Doue hag ar Hrist Jezuz, eñ hag a zeuio dizale da varn ar re veo hag ar re varo, e roan testeni euz e zonedigez hag e rouantelez. ² Embann ar gomz, pouez warni, pe e ve ar mare pe ne ve ket, divenn ar wirionez, gourdrouz, poagn da alia gand kalz a basianted hag hervez ar gelennadurez. ³ Rag eur poent a zeuio ha ne houzañvo mui an dud ar gelennadurez gwirion, med hcrvez o youlou hag hervez ar pez a blij dezo kleved e klaskint kelennerien dezo o-unan. ⁴ Stouva ’raint o diskouarn ouz ar wirionez evid trei war-zu sorhennou. ⁵ Te a-vad bez evezieg war beb tra, kemer poan, gra da labour a avieler, kas da benn da zervich, ⁶ rag me a zo dija kinniget e sakrifis hag erruet eo mare va zremenvan, ⁷ stourmet am-eus ar stourmad kaer, echuet va redadenn ha miret ar feiz. ⁸ A wel ema din dija kurunenn ar justis a roio din en deiz-se an Aotrou Krist, ar barner just, ha n’eo ket din-me hebken, med da gement hini e-no c’hoanteet e ziskouezadenn.

⁹ Hast a-fo dond davedon. ¹⁰ Rag dilezet e-neus Demas ahanon dre garantez evid ar bed-mañ. Eet eo eñ da Desalonika, Kresens d’ar Galatia, Tit d’an Dalmatia. ¹¹ N’eus ganin nemed Lukaz. Kemer Mark ha degas anezañ ganit rag priziuz eo din evid ar zervich. ¹² Tichik am-eus kaset da Efez. ¹³ Ar vantell am-boa lezet e Troas, e ti karpos, degas anezi din en eur zond hag ivez al leoriou, ar parchou dreist-oll. ¹⁴ Aleksandr, an teuzer arem, e-neus greet kalz a zroug din : ra vo roet dezañ, gand an Aotrou, hervez e oberou. ¹⁵ Te ivez, taol evez outañ, gwall enebet e-neus ouz or homzou. ¹⁶ En dro genta m’am-boa bet d’en em zivenn, n’oa deuet den d’am zikour, dilezet on bet gand an oll. Gand ma ne vo ket rebechet dezo kement-se ! ¹⁷ An Aotrou a-vad e-neus va zikouret ha va hennerzet, evid ma hellin prezeg an Aviel beteg penn, evid ma vo klevet gand an oll bayaned ; hag on bet tennet euz geol al leon. ¹⁸ An Aotrou a denno ahanon euz kement embregérèz fallagr hag am zaveteio evid e routantelez neñvel. Dezañ ar hloar da virviken ! Amen.

Saludou diweza

¹⁹ Salud Priska hag Akuilas hag ivez tiegez Onezifor. ²⁰ Erast a zo chomet e Korint. Lezet am-eus Trofim klañv e Milet. ²¹ Poagn da zond araog ar goañv. Eubul ha Prudens, Lin ha Klaodia, hag an oll vreudeur a zalud ahanout. ²² Ra vo an Aotrou gand da spered, ra vo ar hras ganeoh oll.