Salm 50

(heb. 51)

Doue a garantez, bez truez ouzin !
Jezuz, Mab Doue Salver, bez truez ouzin,
peher ma ’z on !

³ Truez ouzin, va Doue, hervez da garantez,
Ken trugarezuz ez out ma tilami va fehed diwarnon.
⁴ Gwalc’h ahanon euz va faot,
Neta ahanon euz va fehed.

⁵ Va fallagriez a anavezan,
Noz-deiz emañ dirazon va fehed.
⁶ A-eneb dit ha dit-te hepken, am-eus pehet ;
Ar pez a zo fall dirag da zaoulagad am-eus me greet.

Bez e vefe reiz da zetañsou,
Hag eeun da varnedigez.
⁷ Gwel : en droug ez on bet ganet,
Peher on bet konsevet gand va mamm.

⁸ Gwel : da wirionez a fell dit e don va c’halon ;
Kelenn din da furnez em diabarz.
⁹ Glana ahanon gand an izop hag e vezin glan,
Gwalc’h ahanon hag e vezin gwennoc’h eged an erc’h.

¹⁰ Ro din da gleved dudi ha levenez,
Hag e trido an eskern az-peus brevet.
¹¹ Distro da zremm euz va fehejou,
Ha dilam va oll fallagriez.

¹² Krou ennon, va Doue, eur galon dinamm,
Eur spered eeun ha nevez em diabarz,
¹³ Na zistaol ket ahanon euz dirazout,
Na zilam ket diganin da spered a zantelez.

¹⁴ Ro din adarre levenez da zilvidigez ;
Harp ahanon gand eur spered a nerz.
¹⁵ Kelenn a rin da henchou d’ar beherien ;
Hag an dud dizent a zistroio davedout.

¹⁶ Saveta ahanon euz ar gwad, Doue, va Doue Salver,
Ha va zeod a veulo gand nerz da justis.
¹⁷ Aotrou, digor va muzellou,
Ha va genou a embanno da veuleudi.

¹⁸ Ne blij ket dit ar zakrifisou,
Ma kinnigan dit unan e nahez anezañ.
¹⁹ Va zakrifis da Zoue : eur spered glaharet ;
Eur galon glaharet ha bruzunet, o Doue, na zispriji ket.

²⁰ Plijet ganez ober vad da Zion :
Adsao mogeriou Jeruzalem.
²¹ Neuze e plijo dit sakrifisou gwir : oll-loskadou ha kinnigou
Neuze tirvi yaouank a vo kinniget war da aoteriou.

En da garantez, Aotrou, dilam va fehed !