Salm 48

(Heb. 49)

« Eun den pinvidig a vo diêz braz dezañ antreal
e Rouantelez Doue. » (Mz 19.23)

I. An den pinvidig-mor ne bad ket !

² Klevit kement-mañ, oll boblou,
Selaouit mad, oll dud ar bed.

³ Koulz tud izel ha tud uhel,
A-unan tud pinvidig ha tud paour.

⁴ Va genou a ziskleir ar furnez,
Ha va c’halon a vouskan komzou a skiant vad.

⁵ Gand evez e selaouan eur barabolenn,
Ha war an delenn e tibunan va c’hudenn.

⁶ Perag em-befe aon en deiziou a reuz,
Pa vezan kelhiet gand fallagriez an drubarded ?

⁷ Fizia a reont en o madou,
Dre m’o-deus kalz a binvidigez e fougeont.

⁸ Ne c’hell ket eun den dasprena unan all,
Na paea da Zoue eun daspren.

⁹ Forz pegement e vefe paet evid eur vuhez,
Houmañ a ranko echui.

¹⁰ Ha beva a rafe da viken,
Heb gweled ar bez ?

¹¹ Mervel a ra an den fur,
ha mervel ar foll hag an diskiant,
O lezel o ’feadra gand reou all.

¹² Soñjal a reent e padfe o ziez da viken, *
O deumeurañs a oad da oad,
Hag o-doa lakeet o anoiou war zouarou.

¹³ An den pinvidig-mor ne bad ket,
Heñvel eo ouz al loened mud.

II. Da betra ’talu d’an den beza perhenn
d’ar bed a-bez,
ma teu da goll e ene ?

¹⁴ Setu planedenn an dud foll a lak o fiziañs enno o-unan,
Amzer da zond ar re en em blij en o c’homzou :

¹⁵ Emaint evel deñved e leur ar Sheol,
Kaset da beuri gand an Aotrou.

D’ar mintin e vo trec’h an dud just warno,
O skeudou a zo steuziet er Sheol, pell emañ o ’faleziou !

¹⁶ Med Doue a zaspreno va ene euz skilfou an iverniou,
Hag Eñ a gemero ahanon gantañ.

¹⁷ Bez dizaon pa binvidika an den,
Pa gresk al lorc’h en e di.

¹⁸ Rag pa varvo, ne gaso netra gantañ,
Ne ziskenno ket e vadou d’e heul.

¹⁹ E ene, keid ha ma veve, a vennige :
« Meulet out, peogwir ez a mad ganit. »

²⁰ Mond a ray da gaoud lignez e dadou
Ha ne welint biken mui ar sklerijenn.

²¹ An den en e lorc’h, ha ne gompren ket,
A zo heñvel ouz al loened mud.