Salm 33

(Heb. 34)

An neb a glask an Aotrou n’e-neus diouer
euz mad ebed !

² Me a vennigo an Aotrou e peb amzer,
Bepred e veuleudi em genou.
³ Va ene a lako e c’hloar en Aotrou :
Klevit, tud izel, ha bezit laouen !

⁴ Lavarit ganin braster an Aotrou,
Uhel-veulom e Ano asamblez.
⁵ Klasket am-eus an Aotrou, hag e-neus respontet ahanon,
Euz va oll spontou e-neus tennet ahanon.

⁶ Sellit outañ hag e viot sklerijennet,
Hag o tremm ne ruzio ket gand ar vez.
⁷ Eur paour-kêz a c’halv : an Aotrou a zelaou,
Hag euz e oll ankeniou e salv anezañ.

⁸ Kampa a ra ael an Aotrou
E-kichen ar re a zouj anezañ, d’o zavetei.
⁹ Tañvait ha gwelit pegen mad eo an Aotrou !
Eüruz an den en em c’houdor ennañ.

¹⁰ Doujit an Aotrou, c’hwi e zent :
N’eus ket a zienez evid ar re a zouj anezañ ;
¹¹ Al leonedigou o-deus dienez ha naon ;
An neb a glask an Aotrou n’e-neus diouer euz mad ebed.

           *

¹² Deuit, bugale, selaouit ahanon,
Doujañs an Aotrou a zeskin deoc’h.
¹³ Pehini eo an den a gar ar vuhez,
A garfe kaoud deiziou da weled an eürusted ?

¹⁴ Diwall da deod diouz an droug
Da vuzellou diouz ar c’homzou touelluz.
¹⁵ Distro diouz an droug, gra ar mad,
Klask ar peoc’h hag heuill anezañ.

¹⁶ Daoulagad an Aotrou evid an den just,
E ziskouarn evid e c’hopadennou,
¹⁷ Dremm an Aotrou a-eneb an dud fallagr,
Hag e falho o anoiou euz ar vro.

¹⁸ Pa c’halver, an Aotrou a glev,
Hag euz peb anken e vezer tennet ;
¹⁹ Tost emañ an Aotrou ouz an dud rannet o c’halon,
Savetei a ra ar sperejou glaharet.

²⁰ Poaniou e-leiz en-devez an den just,
Anezo oll e vez tennet gand an Aotrou.
²¹ An Aotrou a vir e oll eskern :
Hini ebed ne vo brevet.

²² Mervel a ra ar fallagr euz e zroug,
Enebourien an dud just a vo kastizet.
²³ Dasprena a ra an Aotrou buhez e zervicherien,
Kastiz ebed evid ar re a c’houdor ennañ.