Salm 30

(Heb.31)

I. En da justis, selaou ahanon, Aotrou !

² Ennout Aotrou am-eus goudor,
N’am-bo ket a vez biken !
En da justis, saveta ahanon,
³ Tro da skouarn etrezeg ennon, deus d’am zikour.

Bez evidon eur roc’h kreñv,
Kastell-kreñv va zilvidigez,
⁴ Rag va roc’h ha va c’hastell ez out,
Evid enor da Ano, ren hag heñch ahanon.

⁵ Va zenn euz ar roued kuzet ouzin,
Rag Te eo va minihi.
⁶ Etre da zaouarn e lakan va spered.
Va dasprenet ’peus, Te an Doue gwirion.

⁷ Kasaad a ran ar re a enor idolou didalvez :
Evidom-me, en Aotrou e fizian.
⁸ Tridal a ran gand al levenez
Da veza mignon dit.

Gwelet ’peus va reuzeudigez,
Hag anavezet anken va ene.

⁹ N’az-peus ket va lakeet etre daouarn an enebour,
Frankiz ’peus roet d’am zreid.

II. Evid da zervijer, ra sklerijenno da zremm !

¹⁰ Truez ouzin, va Doue
Rag nehet braz on.
Va lagad, va ene ha va c’hov
A zo krignet gand ar glahar.

¹¹ En dristidigez, ec’h echuan va buhez,
Ha va bloaveziou en hirvoudou.
Kollet eo va nerz ablamour d’am fehed,
Ha drastet eo va oll eskern.

¹² Dismegañset on gand va enebourien,
Ha gand va amezeien ouzpenn ;
Eur spont ez on evid va mignoned,
Pa welont ahanon er-mêz, e tehont.

¹³ Ankounac’heet on, evel eun den maro dizoñjet,
Evel eur pod torret ha taolet kuit.
¹⁴ Kleved a ran drougkomzou an dud :
« Eur spont tro-war-dro ! »
En em vodi ’reont da guzulia a-eneb din,
’Vid tenna diganin va buhez.

¹⁵ Me avad am-eus fiziañs ennout Aotrou,
Hag e lavaran : « Va Doue out ! »
¹⁶ Va amzeriou a zo etre da zaouarn,
Saveta ahanon euz va enebourien ha va heskinerien.

¹⁷ Lak sklaerder da zremm war da zervijer,
Ro din an trec’h dre vadelez.
¹⁸ Aotrou, n’am-bo ket a vez
Da veza pedet ahanout.

III. Meuleudi d’an Aotrou, a ra evidon burzudou a garantez !

²⁰ Pegen braz ar vadelez
A virez evid ar re a zouj ahanout,
A bourchasez evid ar re a glask goudor ennout
Dirag bugale an dud !

²¹ O c’huzad a rez gand da zremm
Pell diouz itrikou an dud ;
O c’huzad a rez en da deltenn,
Pell diouz tabut an teodou.

²² Benniget ra vezo an Aotrou,
E garantez evidom ’neus greet burzudou…
²³ Ha me a lavare em zrubuillou :
« Distaolet on a zirag da zoulagad. »

Med klevet ’peus mouez va ’fedenn,
Pa oan o krial warzu ennout.
²⁴ Karit an Aotrou, c’hwi e oll vignoned,
An Aotrou a ziwall an dud a feiz,

Med o fegement a ro, gand ar c’hampi,
D’ar re a ra an droug.

²⁵ Bezit kreñv ha kennerzit ho kalonou
C’hwi oll hag a esper en Aotrou.