Eizvetez Nedeleg

Euz ar 26 d’an 31 a viz Kerzu 2022

Lun 26 a viz Kerzu. Sant Stevan, kenta merzer. Gouel

Mz 10, 17-22

Lavared a ree Jezuz d’e ziskibien :

¹⁷ « Diwallit diouz an dud ! kas a raint ahanoh dirag al lezvarn. Skourjeza a raint ahanoh en o zinagogennou. ¹⁸ Kaset e vezot dirag ar gouarnourien hag ar rouaned, ablamour din. Eun testeni e vo kement-se evito, hag evid ar bayaned.

¹⁹ « Pa vezot evel-se laket etre o daouarn, na vezit ket nehet o klask petra lavared na penaoz lavared. Roet e vezo deoh da houzoud ar pez ho-po da lavared d’ar mare-ze. ²⁰ Ha n’eo ket c’hwi eo a gomzo, med Spered ho Tad eo a vo o komz ennoh.

²¹ « Kas a raio ar breur e vreur evid beza laket d’ar maro, hag an tad e grouadur, sevel a raio ar vugale a-eneb o zud, ha kas aneho d’ar maro.

²² « Kasoni o-do an oll ouzoh ablamour d’am ano ; an hini avad, a zalho beteg penn, hennez a vo saveteet ».

Meurz 27 a viz Kerzu. Sant Yann, abostol hag avieler. Gouel

Yn 20,2-8

D’an deiz kenta euz ar zizun, ² mond a ra d’ar réd Mari-Madalen da gaoud Simon-Pèr hag an diskib all, an hini a oa karet gand Jezuz, hag e lavar dezo :

— « Lamet eo bet an Aotrou euz ar béz, ha ne ouezom ket e-peleh eo bet lakeet ».

³ Neuze, ez eas Pèr asamblez gand an diskibl all da vond war-zu ar béz. ⁴ Redeg a reent o-daou a-unan, med buannoh eged Pèr e redas an diskib all, hag e tigouezas da genta er béz. ⁵ Soubla a reas ha gweled al lurennou ledet a-blad eno. Padal, ne ’z a ket tre e-barz ar béz.

⁶ D’e dro war e lerh, en em gav ive Simon-Pèr. Mond a ra e-barz ar béz, hag e wél al lurennou ledet a-blad, ⁷ hag al lienenn a oa bet en dro da benn Jezuz : ne oa ket houmañ gand al lurennou, med rollet en he fart en he flas.

⁸ Neuze eo ez eas an diskib all er barz ar béz d’e dro, an hini a oa digouezet da genta. Gweled a reas, hag e kredas.

Merher 28 a viz Kerzu
Gouel an Inosanted santel, merzerien

Mz 2, 13-18

¹³ Goude ma oa eet ar vajed kuit euz Betleem, setu eun êl d’an Aotrou o para dirag Jozef, dre e gousk, hag o lavared dezañ :

— « Sao en da zav, kemer ganit ar bugelig hag e vamm, ha teh buan da Vro Ejipt. Ha chom eno beteg ma lavarin dit, rag ema Herodez o vond da glask ar bugelig, evid e lakaad d’ar maro ».

¹⁴ Sevel a reas Jozef, hag e kreiz an noz e kemeras gantañ ar bugelig hag e vamm, hag en em dennas en Ejipt. ¹⁵ Chom a reas eno beteg maro Herodez, evid ma teuio da wir komz Doue, lavaret gand ar profet :

¹⁵ « Euz an Ejipt, em-eus galvet va mab ».

¹⁶ Neuze, o weled e oa bet touellet gand ar vajed, ez eas Herodez e kounnar ruz, hag e roas urz da laza oll baotredigou Betleem ha re an tro-war-droiou, a oa en tu-mañ da zaou vloaz : an oad-se eo a oa bet roet dezañ da anaoud gand ar vajed. ¹⁷ Dond a reas, neuze, da wir ar pez oa bet lavaret gand ar profet Jeremïaz :

¹⁸ « Klevet ez eus bet eur vouez e Rama,
« mouez eur vaouez o ouela hag o klemm e-leiz :
« Rachel eo, a zo o ouela d’he bugale,
« ha ne fell ket dezi beza frealzet
« rag n’eus mui anezo ».

Yaou 29 a viz Kerzu
(5ved devez en eizveted Nedeleg)

Lk 2, 22-35

²² Pa oe deuet ar mare merket gand Lezenn Voïzez, evid beza glanneet, e oe kaset Jezuz gand e dud da Jeruzalem, evid beza kinniget d’an Aotrou, ²³ hervez m’eo skrivet el Lezenn : « Pep paotr kenta-ganet zo da veza gouestlet d’an Aotrou ».

²⁴ Deuet e oant ive evid kinnig eur zakrifis, hervez m’eo skrivet e Lezenn an Aotrou : eur houblad turzunelled pe diou goulmig.

²⁵ Bez’ e oa, neuze, e Jeruzalem, eun den anvet Simeon, den just hag a zoujañs Doue. Gortoz a ree ar frealzidigez da zond evid pobl Izrael, hag e oa ar Spered-Santel warnañ.

²⁶ Roet e oa bet dezañ da anaoud gand ar Spered-Santel, ne welje ket ar maro a-raog beza gwelet Mesïaz an Aotrou.

²⁷ Poulzet gand ar Spered-Santel, e teuas d’an Templ, pa vedo tad ha mamm ar Mabig Jezuz o tigas anezañ evid ober en e-geñver kement a oa hervez al Lezenn. ²⁸ Kemer a reas Simeon ar hrouadur etre e zivreh, hag e veulas Doue en eur lavared :

²⁹ « Bremañ, ô Mestr, e hellez lezel da servicher
« da vond e peoh, hervez da lavar,
³⁰ « rag gwelet o-deus va daoulagad da zilvidigez,
³¹ « an hini bet kempennet ganit a-viskoaz,
war wél an oll vroiou :
³² « ar sklêrijenn a yelo war ar poblou payan
« hag a vo gloar Izrael da bobl ».

³³ Souezet e oa e dad hag e vamm, gand kement a glevent diwar e benn. ³⁴ Rei a reas Simeon e vennoz dezo, hag e lavaras da Vari, e vamm :

— « Setu m’ema ar hrouadur-mañ o kas da goll hag o kas da veza salvet kalz a dud en Izrael ; bez’ e vo eur zîn, hag a lakaio enebiez da zevel war e goust, ³⁵ ken na vo da galon dit-te treuzet gand eur hleze. Evel-se, e vo diskuliet ar zoñjou kuzet e kalon eur halz a dud ».

Gwener. Gouel ar Famill Zantel (A)

Mz 2, 13-15.19-23

¹³ Goude ma oa eet ar vajed kuit euz Betleem, setu eun êl d’an Aotrou o para dirag Jozef, dre e gousk, hag o lavared dezañ :

— « Sao en da zav, kemer ganit ar bugelig hag e vamm, ha teh buan da Vro Ejipt. Ha chom eno beteg ma lavarin dit, rag ema Herodez o vond da glask ar bugelig, evid kas anezañ d’ar maro ».

¹⁴ Sevel a reas Jozef, hag e kreiz an noz e kemeras gantañ ar bugelig hag e vamm, hag en em dennas en Ejipt. ¹⁵ Chom a reas eno beteg maro Herodez, evid lakaad da veza gwir komz Doue, lavaret gand ar profet :

¹⁵ « Euz an Ejipt, em-eus galvet va mab ».

¹⁹ Goude maro Herodez, setu m’en em ziskouezas eun êl d’an Aotrou da Jozef, dre e gousk, en Ejipt, hag e lavaras dezañ :

²⁰ — « Sav ! Kemer ganit ar bugel hag e vamm, ha kee da Vro-Izrael, rag maro eo ar re a glaske lemel e vuhez digand ar bugel ».

²¹ Sevel a reas Jozef, kemer gantañ ar bugel hag e vamm, ha dond en-dro da Vro-Izrael.

²² Med o kleved e oa Arkelaüz, roue Bro-Judea war-lerh e dad Herodez, e savas aon ennañ da vond di. Alïet dre e gousk, en em dennas e Bro-Halilea. ²³ Hag e teuas da jom en eur gêr anvet Nazared, evid ma teufe da wir kement a oa bet lavaret gand ar brofeted : « Nazarean a vo greet anezañ ».

Sadorn 31 a viz kerzu
(7ved devez en eizveted Nedeleg)

Yn 1,1-18

¹ Er penn kenta, e oa ar Verb,
hag ar Verb a oa gand Doue,
hag ar Verb a oa Doue.
² Er penn kenta, e oa gand Doue.
³ Drezañ eo bet greet pep tra,
hag heptañ n’eus bet greet netra.
⁴ Ennañ e oa ar vuhez,
hag ar vuhez a oa sklêrijenn an dud.
⁵ Lugerni a ra ar sklêrijenn e-kreiz an deñvalijenn,
hag an deñvalijenn n’he-deus ket dalhet anezi.
⁶ Bez’ e oe eun dén, kaset gand Doue,
Yann oa e ano.
⁷ Dond a reas evid beza test,
evid rei testeni d’ar Sklêrijenn,
ha ma teufe an oll da gredi drezañ.
⁸ An dén-ze ne oa ket ar Sklêrijenn,
med dond a ree evid rei testeni d’ar Sklêrijenn.
⁹ Dond a ree ar Sklêrijenn er bed, an hini wirion,
an hini a sklêrijenn pep dén.
¹⁰ Er béd e oa ar Verb, hag eo bet greet ar béd gantañ.
Ha n’eo ket bet anavezet gand ar béd.
¹¹ Deuet eo en e vro,
hag e dud n’o-deus ket digemeret anezañ.
¹² Med, d’ar re o-deus e zigemeret,
d’ar re a gréd en e ano,
e-neus roet galloud da zond da veza bugale da Zoue.
¹³ Ar re-ze n’int ket ganet euz ar gwad,
na diwar youl ar horv,
na diwar bolontez mab-dén,
med euz Doue eo, ez int ganet.
¹⁴ Hag ar Verb zo en em hreet dén,
ha deuet eo da jom en on-touez,
hag on-eus-ni gwelet e hloar,
ar gloar deuet dezañ digand e Dad,
dre ma’z eo ar Mab unganet,
leun a hras hag a wirionez.
¹⁵ Bez’ e ro Yann-Vadezour testeni diwar e benn,
o youhal a-bouez penn :
« Hemañ eo an hini am-eus lavaret diwar e benn :
« An hini a zo o tond war va lerh
« a zo eet bremañ e-biou din,
« rag em-raog e oa anezañ ».
¹⁶ Oll on-eus bet euz e leunder,
ha gras goude gras,
¹⁷ dre ma’z eo bet roet al Lezenn dre Voïzez,
med dre Jezuz-Krist eo deuet ar hras hag ar wirionez.
¹⁸ Doue, dén ebéd n’e-neus gwelet anezañ biskoaz.
Gand ar Mab unganet, hag a zo e kalon an Tad,
eo bet diskouezet anezañ.