Aviel Jezuz-Krist hervez Sant Vaze

Pennad 1

LIGNEZ JEZUZ-KRIST

¹ Lignez Jezuz-Krist, mab da Zavid, mab da Abraham.

² Abraham a oe tad da Izaag, Izaag da Jakob, Jakob da Juda ha d’e vreudeur.

³ Juda tad da Farez ha da Zara dre ar vaouez Tamar. Farez tad da Esron, Esron da Aram,

⁴ Aram tad da Aminadab, Aminadab da Naason, Naason da Zalmon.

⁵ Salmon tad da Vooz dre ar vaouez Rahab, Booz tad da Obed dre ar vaouez Ruth hag Obed da Jesse.

⁶ Jesse tad d’ar roue David, ha David, tad da Zalomon, dre an hini a oa bet gwrég da Uri.

⁷ Salomon, tad da Roboam, Roboam da Abiaz, Abiaz da Asaf.

⁸ Asaf, tad da Jozafad, Jozafad da Joram, Joram da Oziaz,

⁹ Oziaz da Joatam, Joatam da Akaz, Akaz da Ezekiaz,

¹⁰ Ezekiaz da Vanase, Manase da Amon, Amon da Josiaz.

¹¹ Joziaz da Jekoniaz ha d’e vreudeur, da vare an harlu e Babilon.

¹² Ha goude an harlu e Babilon, Jekoniaz, tad da Zalatiel, Salatiel, tad da Zorobabel.

¹³ Zorobabel, tad da Abiud, Abiud da Eliakim, Eliakim da Azor.

¹⁴ Azor, tad da Sadok, Sadok da Akim, Akim da Eliud,

¹⁵ Eliud da Éleàzar, Eleazar da Vatan, Matan da Jakob,

¹⁶ Jakob tad da Jozef, pried Mari, an hini a zo bet mamm da Jezuz anvet ar Hrist.

¹⁷ Bez’ ez eus eta pevarzeg rummad euz Abraham beteg David   [1], pevarzeg euz David beteg an harlu e Babilon, ha pevarzeg euz an harlu e Babilon beteg Ar Hrist.

GANEDIGEZ JEZUZ-KRIST

¹⁸ Evel-henn eh erruas ganedigez Jezuz-Krist: Mari, e vamm, a oa dimezet da Jozef, med a-barz m’o-doa bevet asamblez, e tigouezas dezi beza dougéréz dre vertuz ar Spered-Santel.

¹⁹ Jozef, he ’fried, dén just anezañ, pa ne ’felle ket dezañ he dizenori, a lakeas en e benn dispartia diouti dre guz.

²⁰ Trei a ree ar zoñjou-ze en e spered pa zeuas eun êl d’an Aotrou da bara dirazañ e-kreiz e gousk, hag a lavaras dezañ :

— « Josef, mab da Zavid, arabad dit kaoud aon o kemer Mari da bried en da di, rag euz ar Spered-Santel eo ar vuez a zo diwanet enni.

²¹ « Genel a raio eur mab ; te a roio dezañ an ano a Jezuz, rag en eo a zalvo e bobl euz he ’fehejou ».

²² « Kement-se a hoarvezas, evid ma teuje da wir ar pez e-noa lavaret an Aotrou dre vouez ar Profet :

²³ — « Setu ma vo ar Werhez dougéréz ha ma hano eur mab a vo anvet Emmanuel, da lavared eo « Doue ganeom ».

²⁴ Goude beza savet euz e gousk, e reas Jozef evel m’e-noa lavaret dezañ El an Aotrou : kemer a reas e bried en e di hag he mired a reas gwerhez, ²⁵ beteg m’he-doa laket er béd eur mab a roas dezañ an ano a Jezuz.