An aviel hervez Sant Vaze – Traduction H. Danielou

Aviel Jezuz-Krist hervez Sant Vaze – Troet e brezoneg gand Herve Danielou, 2003

Pennad kenta

Adaleg Abraham beteg David

¹ Leor orin Jezuz, Krist, mab da Zavid, mab da Abraham. ² Abraham a oe tad da Izaak ; Izaak da Jakob ; Jakob da Juda ha d’e vreudeur. ³ Juda a oe tad da Farez ha Zara, euz Tamar ; Farez da Ezrom ; Ezrom da Aram ; Aram da Aminabad ; ⁴ Aminabad da Naason ; Naason da Zalmon ; ⁵ Salmon da Vooz, euz Rahab. Booz a oe tad da Obed, euz Ruth ; Obed da Jese ; ⁶ Jese da Zavid, ar roue.

Adaleg David beteg an harlu

David a oe tad da Zalomon, euz an hini a oe bet pried Uri ; ⁷ Salomon da Roboam ; Roboam da Abia ; Abia da Azaf ; ⁸ Azaf da Jozafat. Jozafat a oe tad da Joram ; Joram da Ozias ; ⁹ Ozias da Joatam ; Joatam da Akaz ; Akaz da Ezekiaz. ¹⁰ Ezekiaz a oe tad da Vanase ; Manase da Amos ; Amos da Jozias ; ¹¹ Jozias da Jekonias ha d’e vreudeur, en amzer an harlu e Babilon.

Adaleg an harlu beteg Jezuz

¹² Ha goude an harlu e Babilon, e oe Jekonias tad da Zalatiel ; Salatiel da Zorobabel ; ¹³ Zorobabel da Abioud ; Abioud da Eliakim ; Eliakim da Azor. ¹⁴ Azor a oe tad da Zadok ; Sadok da Akim ; Akim da Elioud ; ¹⁵ Elioud da Eleazar ; Eleazar da Vatan. Matan a oe tad da Jakob ; ¹⁶ Jakob da Jozef, pried Mari, an hini m’eo bet ganet anezi Jezuz, anvet Krist.

¹⁷ Setu an oll rummadou eta : pevarzeg rummad adaleg Abraham beteg David, pevarzeg rummad adaleg David beteg an harlu e Babilon, pevarzeg rummad adaleg an harlu e Babilon beteg ar Hrist.

Kemennadur da Jozef

¹⁸ Evel-henn eo bet orin Jezuz ar Hrist : Mari, e vamm, a oa danvez-pried da Jozef. A-raog beza bevet asamblez, en em gav-hi dougerez dre ar Spered Glan. ¹⁹ Jozef, he fried, a zo eun den direbech. Ne fell ket dezañ he dismegañsi ha divizoud a ra he has kuit dre guz. ²⁰ P’ema o soñjal e kement-se, setu ma teu eun êl d’an Aotrou dirazañ, en e gousk, hag a lavar dezañ : « Jozef, mab da Zavid, bez dizaon o kemer ganit Mari da bried : ar vuhez a zo krouet enni a zeu euz ar Spered Glan. ²¹ Genel a raio eur mab. Roi a ri dezañ e ano : Jezuz, rag eñ eo a zalvo e bobl euz he fehejou. »

²² C’hoarvezet eo an oll draou-mañ evid ma vefe kaset da benn ar pez a zo bet lavaret gand an Aotrou, dre ar profet : ²³ « Setu ma vo ar werhez dougerez, ha ma hano eur mab. Lakaad a raint dezañ e ano : “Emmanuel”, ar pez a vez troet : “Doue ganeom”. » ²⁴ Dihunet Jozefeuz e gousk, e ra evel m’e-neus êl an Aotrou kemennet dezañ : kemer a ra e bried gantañ. ²⁵ Ha n’he anavez ket a-raog ma lak-hi eur mab er bed. Roi a ra-eñ dezañ e ano : Jezuz.

Pennad daou

Ar vajed euz ar Zav-Heol

¹ Jezuz o veza bet ganet e Betlehem-Jude, e amzer ar roue Herodez, setu ma erru majed euz ar Zav-Heol, e Jeruzalem. ² Lavared a reont : « Peleh ema roue ar Juzevien, bet ganet nevez ’zo ? Rag gwelet on-eus e steredenn er Zav-Heol. Hag om deut da stoui dirazañ. »

³ O veza klevet kement-se, eo strafuillet ar roue Herodez, ha gantañ Jeruzalem a-abez. ⁴ Bodet gantañ an oll veleien-veur ha skriverien ar bobl, e houlenn diganto : « Peleh e tle ar Hrist beza ganet ? » ⁵ Lavared a reont : « E Betlehem-Jude, rag evel-henn eo bet skrivet gand ar profet : ⁶ “Ha te, Betlehem, douar Juda, n’out ket tamm ebed an disterra e-touez penn-kêriou Juda. Rag ahan out e teuio ar rener hag a vo mesaer war ma fobl Izrael”.

⁷ Gelver a ra neuze Herodez ar vajed dre guz, ha goulenn outo ar mare m’he-doa paret ar steredenn. ⁸ Hag ouz o has da Vetlehem, e lavar dezo : « It, grit eun enklask piz diwar-benn ar bugel. P’ho-po e gavet, roit kelou din, evid ma ’z in-me ive da stoui dirazañ. »

⁹ Klevet ar roue ganto, ez eont gand o hent. Ha setu ma ’z ee dirazo ar steredenn o-doa gwelet er Zav-Heol, beteg ma teu-hi da jom a-zav a-uh d’al leh m’ema ar bugel ennañ. ¹⁰ O weled ar steredenn, int karget gand eul levenez braz-tre. ¹¹ Dond a reont en ti, ha gweled ar bugel gand Mari, e vamm. O koueza d’an douar, e stouont dirazañ. Hag o tigori o zeñzoriou, e kinnigom provou dezañ : aour, ezañs ha mir. ¹² Kelaouet en o housk da jom heb mond en-dro da di Herodez, ez eont war-zu o bro dre eun hent all.

An dehadenn da Vro-Ejipt

¹³ Pa ’z int eet kuit, setu m’en em ziskouez eun êl d’an Aotrou dirag Jozef, en e gousk. Lavared a ra : « War-zao ! Kemer ar bugel hag e vamm ganit, ha teh da Vro-Ejipt. Chom eno beteg ma lavarin dit : rag ema Herodez o vond da glask ar bugel evide lakaad d’ar maro. »

¹⁴ Sevel a ra, kemer gantañ ar bugel hag e vamm, diouz an noz, hag en em denna da Vro-Ejipt. ¹⁵ Eno e chom beteg maro Herodez, evid ma vo teuio da wir ar homzou bet lavaret gand Doue dre ar profet : « Euz Bro-Ejipt em-eus galvet ma mab. »

Oll vugale Betlehem

¹⁶ Neuze, pa wel Herodez eo bet touellet gand ar vajed, ez a droug ruz ennañ. Kas a ra tud da laza an oll vugale, e Betlehem hag en douarou tro-war-dro, oadet a zaou vloaz pe nebeutoh, hervez ar mare e-noa goulennet merka spiz dezañ gand ar vajed.

¹⁷ Neuze eo deut da wir komzou Jeremi ar profet : ¹⁸ « Eur vouez a zo bet klevet e Rama, leñvadenn ha garmou niveruz : Rachel o ouela d’he bugale, ha ne fell ket dezi beza frealzet, rag n’eus ket mui anezo. »

An distro euz Bro-Ejipt

¹⁹ Goude maro Herodez, setu m’en em ziskouez da Jozef eun êl d’an Aotrou. ²⁰ Lavared a ra dezañ : « War-zao ! Kemer ar bugel hag e vamm ganit, ha kee da zouar Izrael, rag maro eo ar re a glaske war-lerh buhez ar bugel. »

²¹ Sevel a ra, kemer gantañ ar bugel hag e vamm, ha dond da zouar lzrael. ²² O kleved ema Arkelauz o ren war Vro-Jude, e plas e dad Herodez, e-neus aon da vond di. Kelaouet en e gousk, ez a war-zu Bro-Halile, ²³ ha dond a ra da jom en eur gêr anvet Nazared, evid ma teuio da wir ar homzou bet lavaret gand ar brofeted : « Nazorean e vo anvet. »

Pennad tri

Eur vouez er goueleh

¹ En deiziou-ze en em ziskouez Yann, ar badezour, ² o prezeg e goueleh Bro-Jude, en eur lavared : « Cheñchit buhez ! Rag tost ema rouantelez an neñv. » ³ Ya, eñ eo an hini bet komzet anezañ gand ar profet Izai, pa lavare : « Mouez an hini a zo o krial er goueleh : kempennit hent an Aotrou, lakit eeun e wenojennou. » ⁴ Ar Yann-se a zo gantañ eur pez-dillad reun kañval, hag eur gouriz ler en-dro d’e groaz-lez. E voued a zo lammikerezed ha mel gouez.

⁵ Neuze e teu d’e gaoud tud Jeruzalem, re Bro-Jude a-bez, ha re ar hornad a zo tro-dro d’ar Jourdan. ⁶ Badezet e oant gantañ er Stèr-Jourdan, en eur anzav o fehejou.

Penaoz distroi ouz Doue

⁷ Gweled a ra kalz farizianed ha saduseaned o tond d’e vadiziant, hag eñ da lavared dezo : « Gouenn naered ! Piou e-neus desket deoh tehed pell diouz ar gounnar a zo o tond ? ⁸ Taolit eta frouez o tiskouez eo gwirion ho keuz. ⁹ Ha n’it ket da lavared ennoh o-unan : “Abraham eo on-eus da dad”. Rag lavared a ran deoh : bez’ e hell Doue, euz ar vein-mañ, sevel bugale da Abraham. ¹⁰ Lakeet ema dija ar vouhal e gwriziou ar gwez : kement gwezenn na ro ket frouez mad a vo trohet eta, ha stlapet en tan. »

Yann a gemenn an hini a zo o tond

¹¹ « Evidon-me, ho padezan en dour, evid ma cheñchot buhez. Med galloudusoh egedon eo an hini a zo o tond war ma lerh : n’on ket dign da denna e votou dezañ. Ho padezi a raio-eñ er Spered Glan hag en tan. ¹² E bal-wenta gantañ en e zorn, ema o vond da gempenn al leur, ha da zastum ar greun en e hrignol ; ar pell a-vad a vo devet gantañ en tan na varv ket. »

Badiziant Jezuz

¹³ Neuze eh erru Jezuz, euz Bro-Halile d’ar Stèr-Jourdan, da gaoud Yann ha da veza badezet gantañ.14 Nah a ra Yann a-vad, en eur lavared dezañ : « Me eo am-eus ezomm da veza badezet ganit, ha te a zeu beteg ennon ! » ¹⁵ Jezuz a respont : « Laosk bremañ ! emezañ. Mad eo deom seveni peb justis evel-se. » Neuze e lez da ober.

¹⁶ Eur wech badezet, e sav Jezuz er-mêz euz an dour. Ha setu ma tigor an neñv ; gweled a ra Spered Doue o tiskenn, evel eur goulm, hag o tond warnañ. ¹⁷ Ha setu eur vouez, euz an neñv, o lavared : « Hemañ eo ma Mab, an hini muia-karet ; ennañ em-eus lakeet ma levenez. »

Pennad pevar

Daou-ugent devez er goueleh

¹ Neuze eo douget Jezuz d’ar goueleh gand ar Spered, evid beza tentet gand an diaoul. ² Yuni a ra e-pad daou-ugent devez ha daou-ugent nozvez. Naon e-neus goude-ze.

Tentet gand an diaoul

³ Tostaad a ra an tenter outañ, ha lavared dezañ : « Mar dout mab da Zoue, lavar ma teufe ar vein-mañ da veza bara. » ⁴ Respont a ra : « Skrivet eo, emezañ : “N’eo ket gand bara hepken e vevo mabden, med gand kement ger o tond euz genou Doue”. »

⁵ E gas a ra neuze an diaoul gantañ d’ar gêr zantel, e lakaad war lein an templ, ⁶ ha lavared dezañ : « Mard out mab da Zoue, en em daol d’an traoñ. Rag skrivet eo : “D’e êlez e hourhemenno evidout, ha da zougen a raint war o daouarn, gand aon na stoki da droad ouz eur mên”. » ⁷ Jezuz a lavar dezañ : « Skrivet eo c’hoaz : “Ne denti ket an Aotrou da Zoue !” »

⁸ E gas a ra an diaoul gantañ adarre war eur menez uhel-meurbed, o tiskouez dezañ oll rouanteleziou ar bed hag o gloar. ⁹ Hag e lavar dezañ : « An oll draou-ze a roin dit, ma kouezez da stoui dirazon. » ¹⁰ Neuze e lavar Jezuz dezañ : « Kerz kuit, Satan ! Rag skrivet eo : “Dirag da Zoue e stoui, ha ne adori nemetañ.” » ¹¹ Hag an diaoul d’e lezel, ha setu ma tosta an êlez outañ, evid e zervicha.

Eur sklêrijenn vraz e Bro-Halile

¹² Pa glev Jezuz eo bet taolet Yann er prizon, en em denn-eñ e Bro-Halile. ¹³ Kuitaad a ra Nazared ha dond da jom e Kafarnaom, war vord ar mor, e broiou Zabulon ha Neftali ; ¹⁴ evid ma vo sevenet komzou ar profet Izai : ¹⁵ « Douar Zabulon ha Douar Neftali, hent ar mor, d’an tu all d’ar Jourdan, Galile ar baianed ! ¹⁶ Ar bobl azezet en deñvalijenn a wel eur sklêrijenn vraz, hag war an dud azezet e bro ha skeud ar maro, e sav eur sklêrijenn. »

¹⁷ Adaleg neuze, e krog Jezuz da embann ha da lavared : « Cheñchit buhez ! Rag ema tost rouantelez an neñv. »

Pesketêrien-tud

¹⁸ O vale war vord Mor ar Galile, e wel-eñ daou vreur : Simon, anvet Pèr, hag Andreo, e vreur ; bez’ emaint o taoler eur roued, rag pesketêrien int. ¹⁹ Lavared a ra dezo : « Deuit war ma lerh, hag e rin pesketêrien-tud ahanoh. ²⁰ Dioustu e laoskont o rouejou ha mond d’e heul.

²¹ O vond pelloh alese, e wel-eñ daou vreur all : Jakez, mab da Zebede, ha Yann, e vreur, en eur vag, gand o zad Zebede. O tidoulla o rouejou emaint. O helver a ra, ²² ha dioustu e tilezont o bag, hag ez eont d’e heul.

Embann a ra er zinagogennou

²³ Foueta a ree Bro-Halile a-bez, evid kelenn er zinagogennou, embann kelou mad ar rouantelez, parea pep kleñved ha peb namm e-touez ar bobl. ²⁴ Mond a ra e vrud dre Vro-Ziria a-bez. Diskouez a reont dezañ an oll dud kouezet eun droug warno, hag a zo gwasket gand poaniou ha kleñvejou a bep seurt : tud skoet gand an droug-spered, loarieg, seizet ; hag o farea a ra.

²⁵ Ha mond a ra d’e heul pobladou-tud niveruz, euz Bro-Halile, euz an Deg-Kêr, euz Jeruzalem, hag euz an tu all d’ar Jourdan.

Pennad pemp

« Eüruz »

¹ O weled an engroez, e pign-eñ war ar menez. Azeza a ra, hag e tosta e ziskibien outañ. ² O tigori e henou, e stag d’o helenn, en eur lavared :

³ « Eüruz ar re a zo paour en o spered : dezo eo rouantelez an neñv !
⁴ Eüruz ar re a zo leun a zouster : hered e vint d’an douar !
⁵ Eüruz ar re a zo glaharet : frealzet e vint !
⁶ Eüruz ar re o-deus naon ha sehed a justis : o gwalh a gavint !
⁷ Eüruz ar re a zo trugarezuz : evito e vo trugarez !
⁸ Eüruz ar re a zo glan a galon : Doue a welint !
⁹ Eüruz ar re a zegas ar peoh : mibien Doue e vint anvet !
¹⁰ Eüruz ar re a zo heskinet en abeg d’ar justis : dezo eo rouantelez an neñv !
¹¹ Eüruz oh-c’hwi pa viot kunujennet hag heskinet, pa vo lavaret bep seurt droug e gaou a-eneb deoh, en abeg din. ¹² Bezit laouen, tridit, rag braz eo ho pae en neñv. Evel-se eo bet heskinet ganto ar brofeted, ar re a zo bet en ho raog. »

« Bez’ oh an holen »

¹³ « Holen an douar oh-c’hwi. Ma teu an holen da veza goular, gand petra e vo salet ? N’eo ket ken kreñv a-walh evid netra, nemed evid beza stlapet er-mêz ha breset gand an dud. »

« Bez’ oh sklêrijenn »

¹⁴ « Sklêrijenn ar bed oh-c’hwi. Ne helier ket kuza eur gêr bet savet e lein eur menez. ¹⁵ Ha n’elumer ket eul lamp evid e lakaad dindan ar boezell, med war ar hantolor ; ha lugemi a ra evid an oll re a zo en ti. ¹⁶ Ra lugemo evel-se ho sklêrijenn dirag an dud, evid ma welint hoh oberou mad, ha ma veulint ho tad hag a zo en neñv.

Seveni kentoh eged distruja

¹⁷ « Na gredit ket on deut da dorri al lezenn hag ar brofeted ; n’on ket deut d’o zorri med d’o zeveni. ¹⁸ Rag, amen, lavared a ran deoh : ken na vo tremenet an neñv hag an douar, ne dremeno ket eun i, eun tired nemetañ, euz al lezenn, ken na vo sevenet pep tra.

¹⁹ Evel-se, an neb a dorro unan euz ar gourhemennou-ze, e-touez ar re vihanna, hag a gelenno kemend-all d’an dud, hennez a vo anvet ar bihanna e rouantelez an neñv. An hini a raio hag a gelenno, hennez a vo anvet braz e rouantelez an neñv. »

Eur justis diouz an druill

²⁰ « Rag lavared a ran deoh : ma n’eo ket ho justis dreist hini ar skriverien hag ar farizianed, ne antreot ket e rouantelez an neñv. »

Difacha da genta

²¹ « Klevet ho-peus ez eus bet lavaret d’ar gozidi : “Ne lazi ket ! An hini a lazo, a vo responteg dirag ar varn”. ²² Me a-vad a lavar deoh : peb den gand droug ennañ a-eneb e vreur, a vo responteg dirag ar varn. An hini a lavaro d’ e vreur : “Raka ! ”, a vo responteg dirag ar zanedrin, hag an hini a lavaro dezañ : “Pennsod !”, a vo responteg dirag jehenn an tan.

²³ M’emaout eta o kinnig da brov war an aoter, ha ma teu soñj dit e-neus da vreur eun dra bennag a-eneb dit, ²⁴ lez aze da brov, dirag an aoter, ha kerz da genta da zifacha diouz da vreur. Ha neuze, deus da ginnig da brov.

²⁵ En em reñk gand da enebour, buan, e-keid ha m’emaout gantañ war an hent : evid na vi ket kaset gand an enebour dirag ar barner, ha gand ar barner dirag ar gward, ha na vi ket taolet en toull-bah. ²⁶ Amen, lavared a ran dit : ne zeui ket er-mêz alese beteg m’az-po rentet ar hart gwenneg diweza. »

« An hini a zell ouz eur vaouez… »

²⁷ « Klevet ho-peus ez eus bet lavaret : “Ne vi ket avoultrer”. ²⁸ Me a-vad a lavar deoh : kement den a zell ouz eur vaouez gand ar c’hoant anezi, a zo dija avoultrer ganti en e galon. ²⁹ Ma vez da lagad, an hini dehou, eur gwall-skoill evidout, lam-eñ kuit ha stlap-eñ pell diouzit ! Rag emzavoh eo dit e vefe kollet unan euz da izili eged na vefe taolet da gorv a-bez er jehenn.

³⁰ Ha ma vez da zorn dehou eur gwall-skoill evidout, troh-eñ ha stlap-eñ pell diouzit. Rag emzavoh eo dit e vefe kollet unan euz da izili eged na yafe da gorv a-bez d’ar jehenn. »

« An hini a gas e wreg kuit »

³¹ « Ha lavaret ez eus bet : “An hini a gas e wreg kuit, a roio dezi eul lizer a dorr-dimezi”. ³² Me a-vad a lavar deoh : an hini a gas e wreg kuit, nemed na vefe eur falsdimezi, he lak da veza avoultrerez ; hag an hini a zimez gand eur vaouez dilezet, a zo avoultrer. »

« Na douit ket »

³³ « Ha c’hoaz ! Klevet ho-peus ez eus bet lavaret d’on tud koz : “Ne dorri le ebed ; med roi a ri da leou d’an Aotrou !” ³⁴ Me a-vad a lavar deoh : chomit hep toui tamm ebed. Na dre an neñv : tron eo da Zoue. ³⁵ Na dre an douar : skabell eo evid e dreid. Na dre Jeruzalem : bez ’eo kêr ar Roue-Meur. ³⁶ Na dre da benn, na dou ket kennebeud, rag ne hellez ket lakaad eur blevenn hepken anezañ da veza gwenn pe du. ³⁷ Ra vo ho komz : “Ya ! Ya !”, “Nann ! Nann !” An traou ouspenn a zeu euz an Droug. »

« Na harzit ket ouz an den droug »

³⁸ « Klevet ho-peus ez eus bet lavaret : “Lagad evid lagad” ha “dant evid dant”. ³⁹ Me a-vad a lavar deoh : na harzit ket ouz an den droug. Med d’an den o skoi ganit war da jod dehou, tro ive an hini all. ⁴⁰ D’an den a fell dezañ da gas d’al lez-varn ha kemer da zae gantañ, lez ive da vantell. ⁴¹ Gand an den a houlenn diganit ober eur mil-douar, kerz evid daou vil. ⁴² Ro d’an hini a houlenn diganit, ha d’an hini a fell dezañ ampresta diganit, na dro ket kein. »

« Karit hoh enebourien »

⁴³ « Klevet ho-peus ez eus bet lavaret : “Kared a ri da nesa ha kasaad a ri da enebour.” ⁴⁴ Me avad a lavar deoh : karit hoh enebourien, pedit evid ho heskinerien, ⁴⁵ evid beza mibien ho Tad euz an neñv. Rag lakad a ra an heol da zevel war ar re fall ha war ar re vad, ar glao da goueza war ar re just ha war ar re direiz.

⁴⁶ Ha ma karit ar re hag ho kar, peseurt gopr ho-po ? Daoust ha ne ra ket ar bublikaned kemend-all ? ⁴⁷ Ma ne zaludit nemed ho preudeur, petra a rit ouspenn ? Daoust ha ne ra ket ar baianed kemend-all ? ⁴⁸ C’hwi eta, bezit peurvad, evel m’eo peurvad ho Tad euz an neñv. »

Pennad c’hweh

« Na glaskit ket beza gwelet »

¹ « Diwallit da veza just dirag an dud evid beza gwelet mad ganto. A-hend-all n’ho-po ket a hopr digand ho Tad euz an neñv. »

An aluzenn

² « Pa roez an aluzenn eta, na zon ket an trompill dirazout, evel ma ra ar bilbouzed er zinagogennou hag er ruiou, evid beza meulet gand an dud. Amen, lavared a ran deoh : resevet o-deus o gopr.

³ Med te, pa roez an aluzenn, ra jomo da zorn kleiz heb anaoud ar pez a ra da zorn dehou, ⁴ evid ma vo da aluzenn eun dra guz. Ha da Dad, hag a wel an traou kuz, henn talvezo dit. »

Ar bedenn

⁵ « Pa bedit, na vezit ket e-giz ar bilpouzed, rag plijoud a ra dezo chom en o zao da bedi, er zinagogennou hag e korn ar plasennou, evid beza gwelet gand an dud. Amen, lavared a ran deoh : resevet o-deus o gopr.

⁶ Te a-vad, pa fell dit pedi, kee e-barz da gambr, prenn an nor, ha ped da Dad en eun doare kuz ; ha da Dad hag a wel an traou kuz, henn talvezo dit. »

« On Tad »

⁷ « Pa bedit, na randonit ket, evel ma ra ar baianed ; kredi a ra dezo e vint selaouet dre forz komzou. ⁸ Na vezit ket evelto eta : ho Tad a oar petra ho-peus ezomm, a-raog ma houlennot digantañ. ⁹ C’hwi eta, pedit evel-henn :

“On Tad hag a zo en neñv, da ano bezet santelleet.
¹⁰ Da rouantelez deuet deom.
Da volontez bezet greet, evel en neñv war an douar ive.
¹¹ Ro deom hirio or bara euz an deiz-mañ.
¹² Dizamm on dleou deom, evel m’on-eus ive dizammet on dleourien.
¹³ N’on lez ket da goueza en tentadur, med on dieub diouz an droug”.

¹⁴ Rag, ma pardonit o fehejou d’an dud, e pardono deoh ive ho Tad a zo en neñv. ¹⁵ Med, ma ne bardonit ket d’an dud, ho Tad ne bardono ket ho mankou deoh kennebeud. »

Ar yun

¹⁶ « Pa rit yun, na vezit ket evel pilpouzed o fennou teñval ; diskouez a reont dremmou distruj, evid beza gwelet o yuni gand an dud. Amen, lavared a ran deoh : resevet o-deus o gopr.

¹⁷ Te a-vad, pa rez yun, lak c’hwez-vad war da benn, ha gwalh da zremm, ¹⁸ ma chomi heb beza gwelet o yuni gand an dud, med gand da Dad, en eun doare kuz. Ha da Dad, hag a wel an traou kuz, henn talvezo dit. »

« E-leh m’ema da denzor, eno ema da galon »

¹⁹ « Na zastumit ket teñzoriou evidoh, war an douar, e-leh ma tistruj tartouz ha skrigner, e-leh ma skrap ha ma toull al laeron. ²⁰ Med dastumit teñzoriou evidoh en neñv, e-leh na zistruj na tartouz na skrigner, e-leh na doull ha na skrap al laeron. ²¹ Rag, e-leh m’ema da deñzor, eno e vo da galon ive ».

« Ma vez sklêr da lagad »

²² « Lamp da gorv eo da lagad. Ma vez sklêr da lagad eta, e vo sklêrijennet da gorv a-bez. ²³ Ma vez fall da lagad a-vad, e vo teñval da gorv a-bez. Ha ma vez teñval eta ar sklêrijenn a zo ennout, pebez teñvalijenn ! »

Doue pe an arhant

²⁴ « Den ebed ne hell servicha daou vestr : pe kasaad a raio unan ha kared egile, pe derhel a raio da unan ha dismegañsi egile. Ne hellit ket servicha Doue ha Mamon. »

« Bezit dineh »

²⁵ « Setu perag e lavaran deoh : Bezit dineh evid ho puhez : petra debri, petra eva ? Hag evid ar horv : gand petra e wiska ? Daoust ha n’eo ket ar vuhez muioh eged ar boued, hag ar horv muioh eged an dillad ? ²⁶ Sellit ouz laboused an neñv : ne hadont ket ha ne vedont ket, ne zastumont ket er grignolou. Hag o maga a ra ho Tad euz an neñv. Daoust ha ne dalvezit ket muioh egeto ?

²⁷ Piou ahanoh a hell, dre forz tregasi, lakad eun ilinad ouspenn da hirder e vuhez ? ²⁸ Hag evid an dillad, perag en em jala ? Sellit ouz lili ar pradou, ha penaoz e kreskont : ne labourant ket, ne nezont ket. ²⁹ Me a lavar deoh a-vad penaoz Salomon zoken, e-kreiz e hloar, n’eo ket bet gwisket e-giz unan anezo. ³⁰ Ma vez gwisket evel-se gand Doue geot ar parkeier, a zo beo hirio hag a vo taolet warhoaz en tan, pegement muioh a raio evidoh, tud o feiz dister !

³¹ Arabad en em jala eta, o lavared : “Petra debri ?” pe : “Petra eva ?” pe : “Gand petra en em wiska ?” ³² Rag an oll draou-ze eo ’z eus klask wamo gand ar baianed. Med gouzoud mad a ra ho Tad euz an neñv ho-peus ezomm anezo. ³³ Klaskit da genta rouantelez Doue hag e justis : an oll draou-ze a vo roet deoh war ar marhad. ³⁴ N’en em jalit ket eta evid warhoaz : warhoaz en em jalo evitañ e-unan. Da beb devez eo tra-walh e boan. »

Pennad seiz

« Na varnit ket »

¹ « Na varnit ket, evid na viot ket barnet. ² Rag gand ar varn a varnit ganti, e viot barnet. Ha gand ar muzul a vuzuillit gantañ, e viot muzuliet ».

Ar blouzenn hag an treust

³ « Perag e sellez ouz ar blouzenn a zo e lagad da vreur ? Ha ne welez ket an treust a zo en da lagad ? ⁴ Penaoz c’hoaz e hellez lavared d’az preur : “Lez, ma tennin ar blouzenn kuit euz da lagad”, pa ’z eus eun treust en da lagad-te ? ⁵ Pilpouz ! Tenn da genta an treust kuit euz da lagad ! Neuze e weli sklêr evid tenna ar blouzenn kuit euz lagad da vreur. »

Perlez dirag ar moh

⁶ « Arabad roi d’ar chas ar pez a zo santel. Na daolit ket ho perlez dirag ar moh, gand aon n’o bresfent gand o zreid, hag o troi kein, na zeuint d’ho tispenn. »

Goulennit

⁷ « Goulennit hag e vo roet deoh ! Klaskit hag e kavot ! Skoit hag e vo digoret deoh ! ⁸ Rag, piou bennag a houlenn, a reseo, piou bennag a glask, a gav, ha d’an hini a sko, e vo digoret.

⁹ Piou ahanoh, pa houlenn e vab bara digantañ, a roio dezañ eur mên ? ¹⁰ Pe c’hoaz, ma houlenn eur pesk, daoust hag e roio dezañ eun naer ? ¹¹ Ma ouzoh-c’hwi eta – tud fall ma ’z oh – roi provou mad d’ho pugale, seul vui e roio ho Tad euz an neñv traou mad d’ar re a houlenn digantañ. »

Al lezenn aour

¹² « Kement tra a fell deoh a rafe an dud evidoh, her grit-c’hwi evito : ya, kement-se eo al lezenn hag ar brofeted. »

An nor striz

¹³ « Deuit tre dre an nor striz : rag ledan eo an nor, ha frank an hent a gas da goll ! Ha kalz a zo o vond gantañ. ¹⁴ Pegen striz an nor, pegen enk an hent a gas d’ar vuhez ! Ha nebeud int ar re a zeu d’e gavoud. »

Ar wezenn hag he frouez

¹⁵ « Diwallit diouz ar falsprofeted : dond a reont davedoh dindan stumm deñved, med en diabarz, ez int bleizi, prest da skrapa. ¹⁶ Dre o frouez eo e vint anavezet ganeoh. Daoust hag e vez kutulliet rezin war ar spem ? pe fiez war an drez ? ¹⁷ Evel-se e taol peb gwezenn vad frouez brao ; eur wezenn vrein a-vad a daol frouez fall. ¹⁸ Ne hell ket eur wezenn vad taoler frouez fall, nag eur wezenn vrein taoler frouez brao. ¹⁹ Kement gwezenn na daol ket frouez brao a vez trohet ha stlapet d’an tan. ²⁰ Evel-se, dre o frouez eo e vint anavezet ganeoh. »

Lavared hag ober

²¹ « N’eo ket peb den hag a lavar : “Aotrou ! Aotrou !”, a yelo e-barz rouantelez an neñv, med an neb a ra bolontez ma Zad a zo en neñv. ²² Kalz a lavaro, en deiz-se : “Aotrou ! Aotrou ! Daoust ha n’on-eus ket profetizet en da anao, taolet diaouled er-mêz en da ano, greet burzudou en da ano ?” ²³ Ha neuze e lavarin dezo : “Biskoaz n’am-eus hoh anavezet. Kit pell diouzin, c’hwi hag a ra traou direiz” ! »

An daou di

²⁴ « Evel-se, an neb a glev ma homzou hag o has da benn, a vo heñvel ouz eun den fur, bet savet eun ti gantañ war ar roh. ²⁵ Kouezet eo ar glao, ruillet o-deus an douriou braz, c’hwezet o-deus an aveliou, hag int eet a-benn d’an ti-ze : n’eo ket kouezet hemañ, rag savet e oa bet war ar roh.

²⁶ Hag an neb a glev ma homzou ha n’o has ket da benn, a zo heñvel ouz eun den sod hag e-neus savet e di war an trêz. ²⁷ Kouezet eo ar glao, ruillet o-deus an douriou braz, c’hwezet odeus an aveliou, hag eo bet brallet an ti : kouezet eo hemañ ha braz an diskar anezañ. »

²⁸ Hogen, pa echu Jezuz gand ar homzou-ze, e chom an dud sabatuet gand e gelennadurez : ²⁹ rag kelenn a ra evel eun den o komz euz e berz eñ e-unan, ha n’eo ket evel ar skriverien.

Pennad eiz

An den lor glanneet

¹ Diskenn a ra euz ar menez. Kalz tuda ya d’e heul. ² Ha setu eun den lor o tostaad hag o stoui durazañ, en eur lavared : « Aotrou ! Ma fell dit, e hellez ma glannaad. ³ Astenn a ra Jezuz e zorn ha touch outañ, en eur lavared : « Felloud a ra din : bez glanneet ! » Dioustu eo glanneet e lorgnez. ⁴ Ha Jezuz da lavared : « Taol evez ! Na lavar da zen, med kerz d’en em ziskouez d’ar beleg, ha da ginnig ar prov bet gourhemennet gand Moizez : eun testeni e vo evid an dud. »

Feiz ar hantener

⁵ Edo oh antreal e Kafarnaom. Tostaad a ra eur hantener outañ ⁶ hag e erbedi : « Aotrou, emezañ, bez’ ema ma mevel war e wele, du-mañ, seizet hag o houzañv mil boan. » ⁷ Lavared a ra : « Mond a ran-me d’e barea. » ⁸ Respont a ra ar hantener : « Aotrou, emezañ, n’on ket din e teufes dindan ma zoenn. Med lavar eur ger hepken hag e vo pareet ma mevel. ⁹ Rag me, hag a zo eun den dindan halloud, ez eus soudarded dindannon. Lavared a ran da unan : “Kee !” hag ez a. D’unan all : “Deus !” hag e teu. D’am mevel : “Gra an dra-mañ !” hag her gra. »

¹⁰ Souezet eo Jezuz o kleved kement-se, ha lavared a ra d’ar re o veza ouz e heul : « Amen, her roi a ran deoh da houzoud : e den ebed en Izrael n’em-eus kavet seurt feiz. ¹¹ Lavared a ran deoh : kalz a zeuio euz ar Zav-heol hag euz ar Huz-Heol d’azeza ouz taol, gand Abraham, lzaak ha Jakob, e rouantelez an neñv. ¹² Med mibien ar rouantelez a vo taolet er-mêz, en deñvalijenn diavêz : eno e vo leñvadeg ha skrignadeg dent. » ¹³ Neuze e lavar Jezuz d’ar hantener : « Kee ! Evel m’az-peus kredet, ra vo greet dit ! » Pareet eo ar mevel d’an eur-ze.

Mamm-gaer Pèr

¹⁴ Dond a ra Jezuz beteg ti Pèr, ha kavoud mamm-gaer hemañ war he gwele, terzienn ganti. ¹⁵ Kemer a ra-eñ he dorn, hag ez a an derzienn kuit. Sevel a ra-hi, hag o zervicha.

¹⁶ Deut an abardaez, e tougont dirazañ kalz tud eet an diaoul enno. Kas a ra ar sperejou er-mêz, gand eur gomz, ha parea an oll re glañv, ¹⁷ evid seveni ar ger bet lavaret gand Izai : « Kemer a ra-eñ on drougou, samma a ra or hleñvejou. »

Evid mond da heul Jezuz

¹⁸ O weled e-leiz a dud en-dro dezañ, e kemenn Jezuz mond d’an tu all d’al lenn. ¹⁹ Eur skriver a dosta outañ, o lavared : « Mestr, mond a rin war da lerh, forz da beleh ez afes. » ²⁰ Respont a ra Jezuz dezañ : « Al lern o-deus o zoullou, laboused an neñv o neiziou. Med mab an den n’e-neus leh ebed da ziskuiza e benn. »

²¹ Unan euz e ziskibien a lavar dezañ : « Aotrou ! Lez ahanon da vond da zouara ma zad, da genta. » ²² Respont a ra Jezuz dezañ : « Deus d’am heul ! Lez ar re varo da zouara o zud varo ! »

Sioullaad a ra ar barrad-amzer

²³ Pignad a ra er vag, hag e ziskibien d’e heul. ²⁴ Ha setu ma teu eur barrad-amzer war ar mor, ken m’eo goloet ar vag gand an tonnou. Med kousket eo-eñ.

²⁵ Tostaad a reont, hag e zihuni, en eur lavared : « Aotrou ! On savete ! Kollet om ! » ²⁶ Lavared a ra dezo : « Perag kaoud aon, tud dister o feiz ? » Neuze, en e zav, e hourdrouz an aveliou hag ar mor, ha setu eur halm-gwenn. ²⁷ Souezet eo an dud hag e lavaront : « Peseurt den eo hemañ ken ma teu zoken an aveliou hag ar mor da zenti outañ ! »

Diaouled ha moh

²⁸ Pa zegouez en tu all d’al lenn, e bro ar Hadarenianed, e teu davetañ daou zen eet diaouled enno, o tond er-mêz euz ar beziou. Ken fero int ma ne hell den ebed tremen dre an hent-se. ²⁹ Ha setu m’en em lakont da grial : « Petra ahanom dit, emezo, mab da Zoue ? Ha deut out amañ, a-raog an amzer, d’on lakaad da houzañv ? »

³⁰ Hogen, bez’ e oa, pell diouto, eur vandennad vraz a voh, o klask o boued. ³¹ E aspedi a ra an diaouled : « Ma on taolez er-mêz, emezo, or has er vandennad voh. » ³² Hag eñ da respont dezo : « It ! » Dond a reont er-mêz ha mond e-barz ar moh ; ha setu an tropell a-bez o tiruilla euz lein an tornaot, beteg ar mor. Mervel a reont en dour.

³³ Tehed a ra kuit paotred ar moh, mond e kêr, ha kemenn pep tra c’hoarvezet diwar-benn an daou zen eet diaouled enno. ³⁴ Ha setu ar gêr a-bez o tond war-zu Jezuz. Ouz e weled, e bedont da vond pell diouz o harzou.

Pennad nao

Pare eun den seizet

¹ Pignad a ra er vag, ober an treiz ha dond d’e gêr. ² Ha setu ma tegasent dezañ eun den seizet, astennet war eur gwele. Gwelet gantañ o feiz, e lavar Jezuz d’an den seizet : « Bez leun a fiziañs, ma faotr ! Pardonet eo da behejou dit. » ³ Med lod euz ar skriverien a lavar, enno o-unan : « Toui Doue a ra hemañ. »

⁴ Anaoud a ra Jezuz o zoñjennou, ha lavared : « Perag ar zoñjennou fall-se en ho kalon ? ⁵ E gwirionez, petra eo an êsa ? Lavared : “Pardonet eo da behejou dit”, pe lavared : “War-zao ! Ha bale” ? ⁶ Ahanta ! Evid ma ouzoh e-neus mab an den ar galloud war an douar da bardoni ar pehejou », e lavar d’an den seizet : « Sav en da zao ! Kemer da wele ha kerz d’ar gêr ! » ⁷ Sevel a ra, ha mond d’e di. ⁸ Gwelet kement-se gand ar boblad-tud, e sav doujañs enno. Gloar a rentont da Zoue a ro seurt galloud d’an dud.

Galvidigez Maze

⁹ O vond kuit alese, e wel Jezuz eun den, Maze e ano, azezet en e vureo-publikan. Lavared a ra dezañ : « Deus d’am heul ! » Sevel a ra, ha mond d’e heul. ¹⁰ Hogen, pa oa ouz taol en ti, setu ma teu kalz publikaned ha peherien. Mond a reont ouz taol gand Jezuz hag e ziskibien. ¹¹ O weled kement-se, e lavar ar farizianed d’e ziskibien : « Perag ema ho mestr o tebri gand publikaned ha peherien ? »

¹² Klevet ar gomz-se gantañ, e lavar Jezuz : « Ar re yah n’o-deus ket ezomm a vedisin, med ar re glañv. ¹³ Kit da zeski ar pez a dalv : “Trugarez eo emaon o klask ha n’eo ket sakrifisou”. Rag deut on-me da helver n’eo ket ar re just med ar beherien. »

« Ne yuner ket da zevez an eured »

¹⁴ Tostaad a ra neuze diskibien Yann outañ, hag int da lavared : « Ni hag ar farizianed a ra kalz yunou. Perag da ziskibien ne yunont ket. » ¹⁵ Jezuz a lavar dezo : « Daoust hag e hell tud an eured beza e glahar e-keid m’ema ar pried ganto ? Med dond a raio deiziou ma vo tennet ar pried diganto : neuze e yunint. »

« Tamm nevez ebed war eun dra goz »

¹⁶ « Ne vez gwriziet gand den ebed danvez nevez war eur pez-dillad koz. Rag sacha a ra an tamm nevez war ar pez-dillad, hag e teu ar rogadenn da veza gwasoh. »

« Ne laker ket gwin nevez e sehier-ler koz »

¹⁷ « Ne vez ket lakeet gwin nevez kennebeud e sehier-ler koz. A-hend-all e tarz ar zehier-ler, sur : skuillet ar gwin ha kollet ar zehier-ler. Med laket e vez ar gwin nevez e sehier-ler nevez, hag eo miret ar gwin hag ar zehier-ler. »

Pedenn eun den a renk uhel

¹⁸ Tra ma oa-eñ o tistaga ar homzou-ze, setu o tostaad outañ eun den a reñk uhel. Stoui a ra dirazañ, en eur lavared : « Ema ma merh o paouez mervel. Med deus da ober eul lakad dom warni hag e vevo-hi. » ¹⁹ Sevel a ra Jezuz ha mond d’e heul, asamblez gand e ziskibien.

Ar vaouez pareet

²⁰ Ha setu eur vaouez hag a oa o koll gwad abaoe daouzeg vloaz. O tostaad outañ dre a-dreñv, e touch-hi ouz pempillenn e wiskamant. ²¹ Rag soñjal a ree, enni heh-unan : « Ma teuan a-benn da douch ouz e zillad hepmuiken, e vin saveteet. » ²² Distroi a ra Jezuz, ha lavared : « Bez leun a fiziañs, merh, gand da feiz out bet saveteet ! » Hag eo saveteet ar vaouez d’an eur-ze end-eeun.

Sevel a ra eur plah yaouank

²³ En em gavet Jezuz e ti ar mestr, hag o weled ar hoarierien fleüt hag ar boblad-tud o veska, ²⁴ e lavar-eñ : « It kuit, rag n’eo ket maro ar plahig : kousket eo. » Goap a reent anezañ. ²⁵ Ha pa ’z eo taolet an dud er-mêz, ez a tre, e krog e dorn ar plahig, hag homañ da zevel. ²⁶ Ar vrud euz kement-se a zo skignet dre ar vro-ze a-bez.

Pare daou zen dall

²⁷ Mond a ra Jezuz kuit alese. O vond war e lerh, daou zen dall, forz kri ganta : « Az-pez truez ouzom, emezo, mab da Zavid ! » ²⁸ Pa zegouez en ti, e tosta an daou zen dall outañ. Ha Jezuz da lavared dezo : « Kredi a rit e hellan ober an dra-ze ? » Respont a reont : « Ya, Aotrou ! »

²⁹ Neuze e touch-eñ ouz o daoulagadou, en eur lavared : « Ra vo greet deoh hervez ho feiz ! » ³⁰ Ha digoret eo o daoulagadou. O kemer eur êr rust, e lavar Jezuz dezo : « Diwallit na ouezo den ebed ! » ³¹ Med int, kerkent hag eet er-mêz, a skign e vrud er vro-ze a-bez.

Eun den mud a gomz

³² Pa ’z eont er-mêz, setu ma tegasont dezañ eun den mud, eet an diaoul ennañ. ³³ Eur wech kaset an diaoul er-mêz, e stag an den mud da gomz. Souezet eo an dud, hag e lavaront : « Biskoaz n’eus bet gwelet seurt tra en Izrael. » ⁴ Lavared a ree ar farizianed a-vad : « Dre vestr an diaouled eo e kas-eñ an diaouled er-mêz. »

Mederien evid an eost

³⁵ Bale a ree Jezuz dre an oll gêriou ha kêriadennou, evid kelenn en o zinagogennou, embann kelou mad ar rouantelez, parea pep klañvijenn ha peb gwander.

³⁶ Hag o weled ar boblad-tud, eo fromet beteg don e galon en abeg dezo, rag skuiz hag asik int, e-giz deñved ha n’o-deus ket a vesaer. ³⁷ Neuze e lavar-eñ d’e ziskibien : « Braz eo an eost, hag ar vederien nebeud anezo ! Goulennit eta digand mestr an eost ma lako mederien da vond er-mêz evid an eost. »

Pennad deg

An daouzeg abostol

¹ Gelver a ra davetañ e zaouzeg diskib, hag e ro dezo galloud war ar sperejou dihlan, evid o kas er-mêz, hag evid parea pep kleñved ha peb gwander.

² An daouzeg abostol, setu o ano : an hini kenta Simon, anvet Pèr, hag Andreo, e vreur ; Jakez, mab da Zebede, ha Yann, e vreur ; ³ Filip ha Berteleme, Tomaz ha Maze, ar publikan ; Jakez, mab da Alfe, ha Tadde ; ⁴ Simon ar Hananean ha Judaz Iskariot, an hini end-eeun e-neus e werzet.

Jezuz o kas an daouzeg

⁵ Kas a ra Jezuz an daouzeg-se, gand ar homzou-mañ : « N’it ket war heñchou ar baianed. N’antreit ket en eur gêr a Zamaritaned. ⁶ Med it kentoh war-zu an deñved kollet euz ti Izrael. ⁷ En eur vond, embannit ha lavarit : “Tost ema rouantelez an neñv”. ⁸ Pareit ar re vahagnet. Lakit ar re varo da zevel da veo. Glannait ar re lor. Kasit an diaouled kuit.

Roet ez eus bet deoh evid netra : roit evid netra. ⁹ Chomit heb klask kaoud aour nag arhant, na gwenneg ebed evid ho kouriz, ¹⁰ na bisah ebed evid an hent, na diou zae, na skasou, na baz ebed, rag reiz eo e vefe roet e voued d’ar micherour.

¹¹ Ar gêr pe gêriadenn m’en em gavit enni, klaskit gouzoud piou a zo dign d’ho tegemer. Ha chomit en e di beteg ma ’z eot kuit. ¹² En eur vond en ti, lavarit dezañ : “Peoh !” ¹³ Ma ’z eo dign an ti, ra zeuio ho peoh warnañ ! Ha ma n’eo ket, ra zeuio ho peoh warnoh en-dro !

¹⁴ Nep piou bennag n’ho tegemer ket, ha ne zelaou ket ho komzou, hejit poultrenn ho treid en eur zond e-mêz an ti-ze pe ar gêr-ze. ¹⁵ Amen, lavared a ran deoh : êsoh e vo deiz ar varn da houzañv evid Sodom ha Gomor eged evid ar gêr-ze ! ¹⁶ Setu m’ho kasan evel deñved e-kreiz ar bleizi. Bezit eta war evez evel naered, eeun a-vad evel koulmed. »

« Roet e viot »

¹⁷ « Diwallit diouz an dud : ho roi a raint d’al leziou-barn, hag ho foueta a raint er zinagogennou. ¹⁸ En abeg din-me, e viot kaset dirag gouarnourien ha rouaned, en testeni evito hag evid ar broiou. ¹⁹ Pa viot barnet, arabad deoh beza nehet : “Petra da lavared ? Ha penaoz ?” Rag kement-se : petra lavared, a vo roet deoh d’an eur-ze. ²⁰ N’eo ket c’hwi hag a lavaro, med Spered ho Tad eo a gomzo ennoh.

²¹ Eur breur a roio e vreur d’ar maro, eun tad e vugel ; ar vugale en em zavo a-eneb o herent, hag o lakaio da vervel. ²² Kasoni a vago an oll ouzoh, en abeg d’am ano. Med an hini a zalho mad beteg ar fin, hennez a vo salvet.

Tehit

²³ « Ma vezit heskinet ganto en eur gêr, tehit d’unan all. Amen, lavared a ran deoh : n’ho-po ket echuet gand kêriou Izrael ma vo deut mab an den en-dro.

Diskib ha mestr

²⁴ « N’eus diskib ebed a-uh d’e vestr, na mevel ebed a-uh d’e aotrou. ²⁵ Tra-walh eo d’an diskib dond da veza evel e vestr, ha d’ar mevel evel e aotrou. M’o-deus greet “Beelzeboul” euz mestr an ti, na pegement muioh e raint euz re e di ! »

« N’ho-pet ket aon »

²⁶ « N’ho-pet ket aon razo ’ta : netra holoet ne jomo heb beza dizoloet, netra guzet ne jomo heb beza anavezet. ²⁷ Ar pez a lavaran deoh en deñvalijenn, lavarit-eñ dindan lagad an heol. Ar pez a glevit e pleg ho skouarn, embannit-eñ war al leurennou-toenn.

²⁸ N’ho-pet ket aon rag ar re a laz ar horv, ha ne hellont ket laza an ene. Ho-pet aon kentoh rag an hini a hell kas ene ha korv d’ar jehenn. ²⁹ Daoust ha ne vez ket gwerzet daou filip evid eur gwenneg ? Ha ne gouez nikun anezo war an douar heb gouzoud d’ho Tad. ³⁰ Evidoh, peb blevenn zoken euz ho penn a zo bet kontet. ³¹ N’ho-pet ket aon eta : talvoud a rit-c’hwi dreist eun nijad filiped.

³² Setu perag : nep piou bennag en em zisklêrio a-du ganin, dirag an dud, en em zisklêrin-me a-du gantañ ive, dirag ma Zad a zo en neñv. ³³ Ha nep piou bennag am naho, dirag an dud, a vo nahet ganin ive, dirag ma Zad a zo en neñv. »

« An neb na gemer ket e groaz »

³⁴ « Na gredit ket on deut da zegas ar peoh war an douar : n’on ket deut da zegas ar peoh med ar hleze. ³⁵ Rag dond a ran da zispartia an den diouz e dad, ar verh diouz he mamm, ar vaouez diouz he mamm-gaer. ³⁶ Ha tud e di e-no an den da enebourien.

³⁷ Piou bennag agar e dad pe e vamm dreiston-me, n’eo ket dign ahanon. Piou bennag a gar e vab pe e verh dreiston-me, n’eo ket dign ahanon. ³⁸ Hag an neb na gemer ket e groaz ha ne gerz ket war ma lerh, n’eo ket dign ahanon. ³⁹ Piou bennag a gav e vuhez, he hollo. Piou bennag a goll e vuhez, abalamour din, he havo. »

« Piou bennag ho tegemer »

⁴⁰ « Piou bennag ho tegemer, am degemer, ha piou bennag am degemer, a zegemer an hini m’on bet kaset gantañ. ⁴¹ An neb a zegemer eur profet, evel profet, a resevo gopr eur profet. Piou bennag a zegemer eun den just, evel den just, a resevo gopr eun den just. ⁴ Piou bennag a ro, dre ma ’z eo diskib din, eur werennad dour fresk hepken da eva da unan euz ar re vihan-mañ, amen, lavared a ran deoh : ne gollo ket e hopr. »

Pennad unneg

¹ Hogen, echu gand Jezuz roi e gelennadurez d’e zaouzeg diskib, ez a kuit alese da gelenn ha da embann en o hêriou.

Diwar-benn Yann

² En toull-bah, e kiev Y ann ano euz oberou ar Hrist. ³ Kas a ra e ziskibien da houlenn digantañ : « Ha bez’ out-te an hini o tond pe dao eo deom gortoz unan all ? » ⁴ Respont a ra Jezuz dezo : « It, emezañ, da gemenn da Yann ar pez a glevit hag a welit : ⁵ tud dall a wel ha tud kamm a vale ; tud lor a zo glanneet ha tud vouzar a glev ; tud varo a adsav, ha d’ar re baour eo embannet ar helou mad. ⁶ Eüruz an hini na vo ket gwall-skweriet en abeg din-me ! »

Komz a ra Jezuz diwar-benn Yann

⁷ P’ema ar re-mañ o vond kuit, e krog Jezuz da gomz diwar-benn Yann : « Piou oh eet da weled er goueleh ? Eur raosklenn hejet gand an avel ? ⁸ Med piou eta oh-chwi eet da weled ? Eun den gwisket gand dillad cheuh ? Setu m’ema an dud gwisket evel-se e paleziou ar rouaned. ⁹ Med petra oh eet da weled ? Eur profet ? Ya, ha lavared a ran deoh : muioh eged eur profet. ¹⁰ Diwar e benn eo ez eus bet skrivet : “Setu ma kasan ma hannad dirag da zremm ; kompeza a raio da hent dirazout”.

¹¹ Amen, lavared a ran deoh : e-touez ar re bet ganet gand eur vaouez, n’eus savet den ebed brasoh eged Yann-Vadezour ; med brasoh egetañ eo an hini bihanna e rouantelez Doue. ¹² Adaleg deiziou Yann-Vadezour beteg bremañ, e vez gwallgaset rouantelez an neñv, ha ne vez skrapet nemed gand ar re daer. ¹³ Rag diouganet o-deus an oll brofeted hag al lezenn, beteg Yann ; ¹⁴ ha m’ho-peus c’hoant da zegemer kement-mañ : eñ eo an Eliaz a oa da zond. ¹⁵ Ra glevo an neb e-neus diouskouarn da gleved !

« Bugale war ar blasenn

¹⁶ « Ouz piou keñveria ar rummad-tud-mañ ? Heñvel eo ouz bugale azezet war al leurgêr. Gelver a reont ar re all, ¹⁷ en eur lavared : “C’hoariet on-eus fleüt, ha n’ho-peus ket dañset. Kanet on-eus gwerziou, ha n’ho-peus ket leñvet”. ¹⁸ Ya ’vad ! Deut eo Yann hag e chomo heb debri nag eva, ha lavaret o-deus : “Eun diaoul a zo ennañ”. ¹⁹ Dond a ra mab an den, o tebri hag oh eva, hag e lavaront : “Setu eun den lonteg hag eun ever gwin, mignon d’ar bublikaned ha d’ar beherien”. Med reiz eo bet kavet ar Furnez dre heh oberou. »

Kêriou reuzeudig

²⁰ Neuze e krog-eñ d’ober rebechou d’ar hêriou m’eo bet greet enno kement euz e vurzudou, dre ma n’o-deus ket cheñchet buhez : ²¹ « Siwaz dit-te, Korazin ! Siwaz dit-te, Betsaid ! Ma vefe bet greet, e Tir ha Sidon, ar burzudou bet greet en ho touez, pell-zo o-defe cheñchet buhez, sah ha ludu warno. ²² Setu ma lavaran deoh : evid Tir ha Sidon, e vo êsoh devez ar varn da houzañv eged evidoh-c’hwi. ²³ Ha te, Kafarnaom, pignad a ri beteg an neñv ? Ne ri ket : diskenn a ri beteg an ivern. Rag, ma vefe bet greet e Sodom ar burzudou greet ennout, e vije anezi c’hoaz an deiz hirio. ²⁴ Setu ma lavaran deoh : evid douar Sodom, e vo êsoh devez ar varn da houzañv eged evidoh. »

« En em ziskouez a rez d’ar re vihan »

²⁵ En amzer-ze, e stag Jezuz da gomz, en eur lavared :

« Meuleudi dit, Tad, Aotrou an neñv hag an douar,
o veza ma kuzez an traou-mañ ouz ar ar re fur hag ouz ar re speredeg,
ha m’o diskouezez d’ar re vihanig.
²⁶ Ya, Tad, setu aze an dibab greet gand da garantez.
27 Pep tra a zo bet lakeet din gand ma Zad, ha den ebed n’anavez ar Mab, nemed an Tad.
Den ebed n’anavez an Tad, nemed ar Mab, hag an neb a fell d’ar Mab henn diskulia dezañ. »

« Deuit davedon »

²⁸ « Deuit beteg ennon, c’hwi oll hag a zo sammet dindan ar beh, ha ho tizamma a rin-me. ²⁹ Kemerit ma yeo warnoh, ha bezit kelennet ganin, rag bez’ on leun a zouster hag izel a galon. ³⁰ Ha kavoud a reot diskuiz d’hoh eneou. Rag êz eo ma yeo da zougen, ha skañv ma zamm. »

Pennad daouzeg

Mestr ar zabad

¹ En amzer-ze, ez a Jezuz a-dreuz ar parkeier, da zeiz ar zabad. Naon o-deus e ziskibien, ha staga a reont da denna pennou-ed. ² O weled kement-se, e lavar ar farizianed dezañ : « Setu da ziskibien oh ober ar pez n’eo ket aotreet da zeiz ar zabad. »

³ Lavared a ra dezo : « N’ho-peus ket lennet ar pez e-neus greet David ? Naon e-noa, hag ar re all gantañ : ⁴ penaoz eo eet tre e Ti-Doue, e-leh m’e-neus debret baraennou ar hinnig, ne oa ket aotre d’o debri, na dezañ na d’ar re all gantañ, med d’ar veleien hepken.⁵ N’ho-peus ket lennet, e-barz al lezenn, e vez torret ar zabad gand ar veleien, en templ, da zeiz ar zabad, hag int digabluz ? ⁶ Hogen, lavared a ran deoh : brasoh eged an templ a zo amañ. ⁷ Ma anavezfeh pez a dalv : “Trugarez a fell din kaoud ha n’eo ket sakrifisou”, ne gondaonfeh ket an dud digabluz. ⁸ Rag bez’ eo mab an den mestr war ar zabad zoken. »

An dorn dizehet

⁹ O vond kuit alese, e teu tre en o zinagogenn. ¹⁰ Bez ’ez eus eno eun den gand eun dorn dizehet. Goulenn a reont digantañ : « Daoust hag ez eus aotre da barea, da zeiz ar zabad ? » Kement-se evid gelloud e damall. ¹¹ Lavared a ra dezo : « Lakom en ho touez eun den gand eun dañvadez hepken : ma kouez homañ en eun toull, da zeiz ar zabad, daoust ha ne grogo ket enni d’he zenna er-mêz ? ¹² Pegement talvoudusoh eta eo eun den eged eun dañvadez. Setu perag ez eus aotre d’ober vad, da zeiz ar zabad. » ¹³ Neuze e lavar d’an den : « Astenn da zorn ! » E astenn a ra hag e teu da veza pareet, yah evel egile. ¹⁴ Med eur wech eet er-mêz, e kuzuill ar farizianed, an eil re gand ar re all, evid klask an doare d’e gas da goll.

O farea oll a ra

¹⁵ Klevet kement-se gantañ, ez a Jezuz kuit alese. Mond a ra katz tud d’e heul, hag e ro-eñ ar pare d’an oll anezo. ¹⁶ Ha gourdrouzet int gantañ, ma n’e ziskuliint ket. ¹⁷ Evid ma vo sevenet ar ger lavaret gand ar profet Izai :

¹⁸ « Setu ma zervicher, dibabet ganin, an hini dreist-karet ganin,
ma plijan ennañ gand ma oll ene.
Lakaad a rin ma Spered dajom warnañ.
Kemenn a raio ar gwir d’ar baianed.
¹⁹ Ne dabuto ket, ne youho ket, ne vo ket klevet e vouez war al leurgêriou.
²⁰ Ne dorro ket ar raosklenn vreset, ne vougo ket ar vouchenn o tivogedi c’hoaz,
ken n’e-no lakeet ar justis da veza treh.
²¹ Ha lakaad a raio ar baianed o fiziañs en e ano. »

Eun den dall ha mud dre an droug-spered

²² Neuze e tegaser dezañ eun den, dall ha mud dre an droug-spered. E barea a ra, ha setu an den mud o komz hag o weled. ²³ Souezet e oa an oll dud hag e lavarent : « Hennez, daoust ha n’eo ket eñ mab David ? »

Peb rouantelez disrannet

²⁴ O kleved kement-se, e lavar ar farizianed : « Hennez ne daol an diaouled er-mêz nemed dre Veelzeboul, mestr an diaouled. » ²⁵ Anaoud a ra Jezuz o zoñjennou, ha lavared dezo : « Kement rouantelez, disrannet enni heh-unan, a zeu da veza didud. Kement kêr ha kement tiegez, eet an dizunvaniez enno, ne hellint ket chom en o zao. ²⁶ Ma vez taolet ar zatan er-mêz gand ar zatan, ez eo disrannet a-eneb dezañ e-unan : penaoz eta e talho e rouantelez ? ²⁷ Ha ma taolan-me an diaouled er-mêz dre Veelzeboul, dre biou o zaol er-mêz ho mibien-c’hwi ? Evelse e vint, int-i o-unan, ho parnerien. ²⁸ Med ma taolan an diaouled er-mêz dre Spered Doue, ahanta, neuze eo deut rouantelez Doue evidoh. »

An den kreñv hag al laer

²⁹ « Pe hoaz, penaoz e hell unan bennag mond tre e-barz ti eun den kreñv ha skrapa e draou, ma ne vez ket kordennet an den kreñv gantañ ? Ha neuze e lako-eñ ar skrap war an ti. »

« An neb n’ema ket ganin »

³⁰ « An neb n’ema ket ganin, a zo a-eneb din. An neb ne zastum ket ganin, a zo o strewi. »

Ar ger dizakr a-eneb ar Spered

³¹ « Setu perag e lavaran deoh : pardonet e vo d’an dud kement pehed, kement ger dizakr, med ar ger dizakr a-eneb ar Spered ne vo ket pardonet. ³² An neb a lavar eur gomz a-eneb mab an den, e vo pardonet an dra-ze dezañ. Med an neb a gomz a-eneb ar Spered, an hini Santel, ne vo ket pardonet kement-se dezañ, nag er bed-mañ nag en hini da zond.

Ar gomz a zo frouez ar galon

³³ Lakit eur wezenn vad, ha mad e vo ar frouez. Lakit eur wezenn glañv, ha klañv e vo ar frouez. Rag diouz he frouez e vez anavezet ar wezenn. ³⁴ Gouenn naered ! Penaoz e hellit lavared traou mad, fall ma ’z oh-c’hwi ? Rag komz a ra ar genou diwar leun-barr ar galon. ³⁵ Tenna a ra an den mad traou mad euz e deñzor mad, hag an den fall traou fall euz e deñzor fall.

³⁶ Setu perag e lavaran deoh : da zeiz ar varn, e rento an dud kont euz kement ger goullo distaget ganto. ³⁷ Rag, diouz da gomzou eo e vi didamallet, ha diouz da gomzou e vi kondaonet. »

Sin Jonaz

³⁸ Neuze e lavar dezañ lod euz ar skriverien hag euz ar farizianed : « Mestr, emezo, ni a garfe gweled eur zin greet ganeoh. » ³⁹ Jezuz a respont dezo : « Rummad fall hag avoultrer ! Klask a ra eur zin ! Sin ebed ne ro roet dezañ, nemed hini ar profet Jonaz. ⁴⁰ Rag, evel m’eo bet Jonaz e kov ar pesk braz, e-pad tri devez ha teir nozvez, evel-se e vo mab an den, e-pad tri devez ha teir nozvez, e kalon an douar.

⁴¹ Sevel a raio tud Niniv, da zeiz ar varn, a-eneb ar rummad-mañ, hag e kondaoni, rag cheñchet o-deus buhez dre brezegenn Jonaz. Ha setu amañ muioh eged Jonaz. ⁴² Ha dihuni a raio rouanez ar Hreisteiz, da zeiz ar varn, gand ar rummad-mañ, hag e gondaoni, rag deut eo-hi euz penn all ar bed da zelaou fumez Salomon. Ha setu amañ muioh eged Salomon. »

Seiz diaoul all gwasoh

⁴³ « Eur wech eet e-mêz eun den, ez a ar spered dihlan du-mañ, du-hont, dre al lehiou dizehet, evid kaoud diskuiz, ⁴⁴ Ha ne gav ket. Neuze e lavar : “Mond a rin en-dro d’am zi m’on deut er-mêz anezañ”. Dond a ra, hag e gavoud bet skarzet, skubet, fichet. ⁴⁵ Neuze ez a da gemer seiz spered all droukoh egetañ : hag int, eet tre e-barz, a jom ennañ. Hag ema stad diweza an den-ze gwasoh eged an hini genta. Evel-se e vo ev id ar rummad-tud-mañ. »

Ma mamm ha ma breudeur

⁴⁶ Bez’ ema c’hoaz o komz d’ar boblad, ha chomet eo e vamm hag e vreudeur er-mêz, o klask komz outañ. ⁴⁷ Unan bennag a lavar dezañ : « Setu m’ema da vamm ha da vreudeur er-mêz, o klask komz ouzit. » ⁴⁸ Respont a ra Jezuz d’an den-ze : « Piou, emezañ, eo ma mamm ? Piou eo ma breudeur ? » ⁴⁹ Astenn a ra e zorn war-zu e ziskibien, ha lavared : « Setu ma mamm ha ma breudeur. ⁵⁰ Rag an neb a ra bolontez ma Zad a zo en neñv, hennez eo a zo breur, c’hoar ha mamm din. »

Pennad trizeg

Kelennadurez e-kichenn al lenn

¹ En deiz-se, deut Jezuz e-mêz an ti, e oa eet d’azeza e-kichenn ar mor. ² Ken stank eo an dud dastumet en-dro dezañ, ma pign en eur vag. Azeza a ra enni, e-pad ma chom an oll dud war an aot. ³ Komz a ra dezo dre barabolennou, diwar-benn kalz traou.

Parabolenn an hader

Lavared a ra : « Setu an hader o vond er-mêz evid hada. ⁴ P’ema o hada, e kouez eul lodenn war vord an hent. Dond a ra al laboused hag eo debret ar greun ganto. ⁵ Lod all a gouez war ar veindraill, e-leh ma n’eus ket kalz a zouar : dioustu e tiwanont, dre ma n’eo ket don an douar. ⁶ Med a-boan m’eo savet an heol, eo rostet ar greun gantañ, ha dre ma n’o-deus ket a wriziou, ez int dizehet.

⁷ Eul lodenn all a gouez war ar spem. Ar spem a gresk hag he moug. ⁸ Lod all a gouez war an douar brao hag e roont frouez : unan kant, unan tri-ugent, unan all tregont. ⁹ An neb e-neus diouskouarn, ra glevo ! »

Perag parabolennou ?

¹⁰ Tostaad a ra an diskibien ha lavared dezañ : « Perag e komzez dre barabolennou ? » ¹¹ Respont a ra dezo : « Deoh, emezañ, eo roet misteriou rouantelez an neñv da anaoud. Dezo n’eo ket greet. ¹² Evel-se ema : an neb e-neus, e vo roet kalz dezañ ; an neb n’e-neus ket, e vo tennet digantañ zoken ar pez e-neus. ¹³ Gand se e komzan dezo dre barabolennou : rag selled a reont heb selled, ha kleved a reont heb kleved na kompren.

¹⁴ Hag evito eo sevenet profesi Izai, pa lavar-eñ :

“Evid kleved, e klevot ha ne gomprenot ket.

Evid selled, e sellot ha ne welot ket.
¹⁵ Rag ponnerreet eo kalon an dud-se :
gand diouskouarn kaled e klevont hag o daoulagad a stankont,
gand aon na welfent gand o daoulagad,
na glevfent gand o diouskouarn,

na gomprenfent gand o halon,
na vefe cheñchet o buhez,
ha n’o farefen”.

¹⁶ Evidoh, eüruz ho taoulagad : gweled a reont ; eüruz ho tiouskouarn : kleved a reont. ¹⁷ Amen, lavared a ran deoh : kalz profeted ha tud just o-deus bet c’hoant da weled ar pez a zellit outañ, ha n’o-deus ket gwelet, da gleved ar pez a glevit ha n’o-deus ket klevet. »

Komprenit ar barabolenn

¹⁸ « C’hwi eta, selaouit parabolenn an hader. ¹⁹ Neb a glev komz ar rouantelez, heb he hompren, e teu an hini droug da skrapa ar pez a zo bet hadet en e galon : an den-ze eo bord an hent m’eo bet taolet an had warnañ. ²⁰ Ar pez a zo hadet war ar veindraill eo an den a glev ar gomz hag he reseo dioustu gand levenez. ²¹ Hogen, n’e-neus ket a wriziou ennañ e-unan med hedro eo : ma teu enkrez pe heskinèrèz, en abeg d’ar gomz, e strebot dioustu.

²² An douar m’eo bet kouezet an had ennañ e-kreiz ar spem, eo an den a glev ar gomz, med, gand neh ar vuhez ha touell ar binvidigez, eo mouget ar gomz ha difrouez e teu homañ da veza. ²³ An douar brao a gouez an had warnañ eo an den a glev ar gomz hag he hompren ; dougen a ra frouez ha roi : unan kant, unan tri-ugent, unan all tregont. »

Parabolenn an dreog

²⁴ Kinnig a ra dezo eur barabolenn all : « Heñvel eo, emezañ, rouantelez an neñv ouz eun den o hada had brao en e bark. ²⁵ Med e-pad ma kousk an dud, e teu e enebour : hada a ra dreog war-horre, e-touez an ed, ha mond kuit. ²⁶ Ha pa ziwan ar geot hag e roont pennou-ed, e teu ive an dreog war-wel.

²⁷ Tostaad a ra mevelien an ozah, ha lavared dezañ : « Mestr, daoust ha n’eo ket had brao az-peus hadet en da bark ? Penaoz eta ez eus dreog ? » ²⁸ Respont a ra dezo : « Eun den enebour eo e-neus her greet. » Ar vederien a lavar : « C’hoant az-peus ez afem d’e zastum ? ²⁹ Hag eñ da lavared : « Nann ! Gand aon na vefe disgwriziennet an ed gand an dreog. ³⁰ Lezit da greski an eil hag egile, beteg an eost. Da vare an eost, e lavarin d’ar vederien : “Dastumit an dreog da genta, hag ereit-eñ e duilladou evid o devi. An ed a-vad, dastumit-eñ em grignol”. »

Ar hreunenn zezo

³¹ Eur barabolenn all a ginnig dezo : « Heñvel eo, emezañ, rouantelez an neñv ouz eur hreunenn zezo e-neus eun den kemeret da hada en e bark. ³² Bez’ eo ar vihanna e-touez an oll hadennou. Med, p’he-deus kresket, e vez-hi an hini vrasa e-touez ar plantennou : dond a ra da veza gwezenn, ken e teu laboused an neñv d’ober o neiziou war he skourrou. »

Ar goell

³³ Eur barabolenn all a lavar-eñ dezo : « Heñvel eo rouantelez an neñv ouz ar goell kemeret gand eur vaouez ha kemmesket ganti e-barz tri muzuliad bleud, beteg ma sav an toaz a-bez. »

Pep tra dre barabolennou

³⁴ Kement-se oll a lavar Jezuz d’ar boblad-tud, dre barabolennou. Ha ne lavare netra dezo, nemed dre barabolennou, ³⁵ evid seveni komzou ar profet : “Digori a rin ma genou evid komz dre barabolennou, embann a rin traou kuzet abaoe krouidigez ar bed.” »

« Displeg deom ar barabolenn »

³⁶ Lezel a ra-eñ an dud, ha dond d’an ti. E ziskibien a dosta outañ, en eur lavared : « Displeg deom parabolenn an dreog er park. ³⁷ Respont a ra dezo : « Mab an den, emezañ, eo an hader mad. ³⁸ Ar bed eo ar park ; mibien an droug eo an dreog ; ³⁹ an diaoul eo an enebour hag e-neus e hadet ; fin ar bed eo an eost ; an êlez eo ar vederien. ⁴⁰ Dres e-giz m’eo an dreog dastumet ha devet en tan, evel-se evoe fin ar bed. ⁴¹ Mab an den a gaso e êlez, ha dastum a raint e-mêz ar rouantelez an oll wall-skweriou hag oberourien an droug. ⁴² O zaoler a raint er fornez tan : eno e vo leñvadeg ha skrignadeg dent. ⁴³ Neuze e lugemo ar re just, evel an heol, e rouantelez o Zad. An neb e-neus diouskouarn, ra glevo ! »

An teñzor, ar berlezenn, ar roued

⁴⁴ « Heñvel eo rouantelez an neñv ouz eun teñzor kuzet er park. Kavet eo gand eun den : e guzad a ra, ha, leun a levenez, ez a da werza pep tra e-neus, ha da brena ar park-se.

⁴⁵ Ha c’hoaz : heñvel eo rouantelez an neñv ouz eur marhadour o klask perlez kaer. ⁴⁶ Kavoud a ra eur berlezenn talvouduz-tre : mond a ra da werza kement tra e-neus, ha d’he frena.

⁴⁷ Ha c’hoaz : heñvel eo rouantelez an neñv ouz eur roued taolet er mor. Dastum a ra pesked a beb gouenn. ⁴⁸ Pa vez leun, eo sachet ganto war an aot. Azeza a reont ha dastum ar re vrao e panerou. Ar re vrein a-vad a daolont kuit. ⁴⁹ Evel-se e vo e fin ar bed : dond a raio an êlez er-mêz ; dispartia a raint ar re fall diouz kreiz ar re just, ⁵⁰ hag o zaoler er fornez tan : eno e vo leñvadeg ha skrignadeg dent. »

Ar skriver deut da veza diskib ar rouantelez

⁵¹ « Komprenet ho-peus kement-se ? –Ya » a lavaront dezañ. ⁵² Respont a ra dezo : « Evel-se eo kement skriver, o houzoud diouz rouantelez an neñv, heñvel ouz eun den, eun ozah hag a denn traou koz ha traou nevez euz e deñzor. » ⁵³ Echuet gantañ displega ar parabolennou-ze, ez a Jezuz kuit alese.

« Den ebed ne vez profet en e vro »

⁵⁴ Dond a ra d’e vro. Kelenn a ree e genvroiz en o zinagogenn, ken e oant souezet. Hag int da lavared : « Euz peleh e teu dezañ ar furnez-se hag ar burzudou ? ⁵⁵ Hennez, daoust ha n’eo ket eñ mab ar halvez ? Daoust ha ne vez ket greet Mari euz e vamm ? Hag e vreudeur : Jakez, Jozef, Simon ha Jud, ⁵⁶ hag e hoarezed, daoust ha n’emaint ket oll en on touez ? Euz peleh eta e teu dezañ kement-se ? » ⁵⁷ Ha bez’ eo-eñ eur skoill evito. Lavared a ra Jezuz dezo : « Ne vez eur profet heb enor nemed en e vro hag en e famill. » ⁵⁸ Ne ra ket kalz burzudou eno, en abeg d’o diouer a feiz.

Pennad pevarzeg

Yann adsavet ?

¹ War-dro an amzer-ze, e klev Herodez, an tetrark, komz euz Jezuz. ² Lavared a ra d’e ofiserien : « Yann-Vadezour e rank beza hemañ ; adsavet eo bet a-douez ar re varo : gand se e kaver ennañ galloud ar burzudou. »

Yann en toullbah

³ Rag Herodez e-noa tapet krog e Yann, e chadennet, hag e daolet en toull-bah, ablamour da Herodiadez, gwref Filip, e vreur. ⁴ Peogwir e lavare Yann dezañ : « N’az-peus ket aotre d’he haoud da wreg. » ⁵ Ha c’hoant dezañ d’e laza, e-neus aon rag an dud, dre ma sellent ouz Yann evel ouz eur profet.

Penn Yann

⁶ Dond a ra deiz-ha-bloaz Herodez. Merh Herodiadez a goroll dirag an dud, hag a blij kalz d’Herodez, ⁷ ken na tou hemañ, dre le, roi dezi ar pez a houlenno-hi. ⁸ Poulzet gand he mamm : « Ro din, emezi, amañ war eur plad, penn Yann, ar badezour. » ⁹ Mantret eo an tetrark, med en abeg d’e le ha d’ar gouvidi, e kemenn ma vo roet dezi penn Yann, ¹⁰ hag e lak dibenna Yann en e doull-bah. ¹¹ Degaset eo e benn war eur plad, ha roet d’ar plah yaouank : homañ e ro d’he mamm. ¹² Diskibien Yann a zeu da gemer e gorv ha d’e zebelia. Dond a reont da gas kelou da Jezuz.

Mond a ra Jezuz kuit : an dud a ya d’e heul

¹³ O veza klevet kement-se, ez a Jezuz kuit alese, en eur vag, war-zu eul leh digenvez, en e bart e-unan. Kleved a ra ar bobl ano euz kement-se, ha mond d’e heul, war droad, euz ar hêriou. ¹⁴ O tond er-mêz, e wel-eñ eur boblad-tud niveruz. Trefuet eo evito, beteg don e galon : parea a ra o re vahagnet.

Pemp baraenn evid pemp mil den

¹⁵ Deut an abardaez, e tosta an diskibien outañ, en eur lavared : « Digenvez eo al leh-mañ, ha diwezad eo an eur dija. Kas an dud kuit, ma ’z aint d’ar hêriadennou da brena boued. » ¹⁶ Respont a ra Jezuz dezo : « N’o-deus ket ezomm da vond kuit. Roit-c’hwi dezo da zebri. » ¹⁷ Lavared a reont dezañ : « N’on-eus amañ nemed pemp baraenn ha daou besk – ¹⁸ Degasit-i din amañ », emezañ.

¹⁹ Lakaad a ra ar boblad-tud da astenn war ar geot. Kemer a ra ar pemp baraenn hag an daou besk. O veza savet e zellou war-zu an neñv, e vennig ar baraennou, o lodenn hag o ro d’e ziskibien, hag ar re-mañ d’an dud. ²⁰ Debri a reont oll beteg o gwalh. Dastum a reont an tammou chamet da zilerh : daouzeg panerad leun. ²¹ Ar re o-deus debret a oa war-dro pemp mil den, heb konta ar merhed hag ar vugale.

Pedi a ra war ar menez

²² Raktal e lak e ziskibien da bignad er vag ha da vond en e raog d’an tu all, e-pad ma kasfe-eñ an dud kuit. ²³ O veza kaset an dud kuit, e pign war ar menez da bedi, en e bart e-unan.

Bale a ra war ar mor

Deut an abardaez, e oa e-unan-penn eno. ²⁴ Ar vag a oa dija pellig euz an aot, hejet-dihejet gand an tonnou, rag a-benn edo an avel. ²⁵ D’ar pederved beill euz an noz, e teu daveto, ovale war ar mor. ²⁶ E ziskibien a zo trevariet ouz e weled o vale war ar mor. Lavared a reont : « Eur spes eo ! » ha krial gand ar spont. ²⁷ Kerkent e komz Jezuz dezo : « Fiziañs ! emezañ, me eo, bezit dizaon ! »

²⁸ Neuze e komz Pèr outañ : « Aotrou, ma ’z eo te eo, kemenn din mond davedout war an dour ! » ²⁹ Jezuz a lavar : « Deus ! » Diskenn a ra Pèr euz ar vag, ha hale war an dour evid mond war-zu Jezuz. ³⁰ Med, o weled pegen kreñv eo an avel, e krog aon ennañ. Staga a ra da ziskenn hag eñ da hopal, en eur lavared : « Aotrou ! Salv ahanon ! » ³¹ Kerkent eh astenn Jezuz e zorn hag e krog ennañ. Lavared a ra dezañ : « Den dister e feiz, perag n’az-peus ket kredet ? » ³² Ha pa bignont er vag, eo torret an avel. Ar re a zo gantañ er vag a stou dirazañ, ³³ en eur lavared : « Te a zo Mab da Zoue, e gwirionez. »

E Jenezared

³⁴ Echui a reont an treiz, ha dond da zouara e Jenezared. ³⁵ Tud al leh-mañ e anavez, ha kelou a gasont dre ar vro tro-dro. Degas a reont dezañ an oll re glañv, ³⁶ hag e erbedi : nemed touch ouz pempillenn e vantell. Ha pareet eo kement hini a douch outi.

Pennad pemzeg

Hengoun ar gozidi

¹ Tostaad a ra neuze ouz Jezuz farizianed ha skriverien euz Jeruzalem : ² « Perag, emezo, e torr da ziskibien hengoun ar gozidi ? Rag ne walhont ket o daouarn pa gemeront boued. »

³ Respont a ra, ha lavared dezo : « Ha c’hwi, perag e torrit gourhemennou Doue, war zigarez ho kiziou koz deoh-c’hwi ? ⁴ Rag lavaret e-neus Doue : “Enor da dad ha da vamm” ha : “An neb a villig tad pe vamm, a varvo”. ⁵ Med lavared a rit-c’hwi : “An neb a lavar d’e dad pe d’e vamm : prov-da-Zoue eo al lodenn euz ma danvez a vefe talvouduz dit, ⁶ n’e-neus ket da enori e dad pe e vamm”. Kaset ho-peus komzou Doue da get, dre ho kiziou koz deoh-c’hwi.

⁷ Pilpouzed ! Brao e-neus Izai diouganet diwarnoh, o lavared : ⁸ “Ar bobl-mañ am enor, gand e ziweuz, med he halon a dro pell ahanon. ⁹ Goullo eo al lidou a rentont din. Ar henteliou a gelennont n’int nemed gourhemennou an dud”. »

« Ar pez a zaotr an den »

¹⁰ Gelver a ra an dud ha lavared dezo : « Klevit ha komprenit : ¹¹ n’eo ket ar pez a ya er genou hag a zaotr an den, med ar pez a zeu e-mêz ar genou, an dra-ze eo a zaotr an den. »

¹² Tostaad a ra neuze e ziskibien outañ ha lavared dezañ : « Gouzoud a rez eo bet feuket ar farizianed o kleved ar homzou-ze ? » ¹³ Respont a ra : « Pep plantenn, emezañ, ha n’eo ket bet plantet gand ma Zad euz an neñv, a vo disgwriziennet. ¹⁴ Laoskit-i ! Tud dall int, o heñcha tud dall. Pa vez eun den dall o heñcha eun den dall all, e kouezint o-daou en toull. »

¹⁵ Pèr a respont, o lavared dezañ : « Displeg deom ar barabolenn-ze – ¹⁶ Bremañ c’hoaz oh-c’hwi heb skiant, emezañ. ¹⁷ Ne welit ket penaoz e tiskenn er hov pep tra a ya er genou, hag e vez taolet er-mêz, er foz ? ¹⁸ Med euz ar galon e teu ar pez a ya e-mêz ar genou, hag an dra-ze eo a zaotr an den. ¹⁹ Rag, euz ar galon e teu komzou droug, muntrèrèz, avoultriez, gastaouèrèz, laeroñsi, falstesteniou, blasfemou. ²⁰ Kement-se eo a zaotr an den. Med debri, heb beza gwalhet an daouarn, ne zaotr ket an den. »

Feiz eur baianez

²¹ Mond a ra Jezuz kuit ahano, ha dond tro-war-dro Tir ha Sidon. ²² Ha setu ma teu eur vaouez, eur Gananeanez euz ar vro-ze. Hopal a ra-hi, en eur lavared : « Bez truez ouzin, Aotrou, mab da Zavid ! Gwallgaset eo ma merh gand an droug-spered. » ²³ Med ne respont-eñ ger ebed dezi. Tostaad a ra e ziskibien ha goulenn digantañ : « Kas-hi kuit, emezo, rag krial a ra war on lerh. »

²⁴ Respont a ra-eñ a-vad : « N’on ket bet kaset, emezañ, nemed d’an deñved kollet euz ti Izrael. » ²⁵ Med neuze e teu-hi da stoui dirazañ : « Aotrou ! emezi, ma zikour ! » ²⁶ O respont dezi, e lavar-eñ : « N’eo ket brao kemer bara ar vugale hag e stlepel d’ar chas bihan. – ²⁷ Ya, Aotrou, emezi, med debri a ra ar chas bihan bruzunou o koueza diwar daol o mistri. » Neuze e respont Jezuz : ²⁸ « Maouez, emezañ, braz eo da feiz ! Ra vo greet dit hervez da hoant ! » Ha pareet eo he merh d’an eur-ze.

O farea a ra

²⁹ O pellaad alese, e teu Jezuz war vord Mor ar Galile. Pignad a ra war ar menez hag azeza eno. ³⁰ Pobladou-tud niveruz a dosta outañ, ganto tud kamm, dall, mahagnet, mud, ha kalz re all. O lakaad a reont e-harz dezañ, hag o farea a ra-eñ, ³¹ ken m’eo souezet an dud, pa welont re vud o komz, re vahagnet deut dibistig, re gamm o vale, re zall o selled. Meuli a reont Doue Izrael.

Seiz baraenn evid pevar mil den

³² Gelver a ra e ziskibien ha lavared : « Trefuet on, evid ar bobl, e don ma halon : abaoe tri devez emaint ganin ha n’o-deus netra da zebri. Ne fell ket din o has kuit war yun, gand aon na zemplfent en hent. » ³³ An diskibien a lavar dezañ : « Penaoz or-befe-ni tra-walh a vara en eur goueleh evid roi o gwalh da gement a dud ? – ³⁴ Ped baraenn a zo ganeoh ? » eme Jezuz. Respont a reont : « Seiz hag eun nebeud peskedigou. »

³⁵ Kemenn a ra d’ar bobl azeza war an douar. ³⁶ Ha kemeret gantañ ar zeiz baraenn hag ar pesked, e lavar eur bedenn a drugarez, e ra lodennou, o ro d’e ziskibien, hag e ziskibien d’ar bobl. ³⁷ Debri a reont oll, beteg o gwalh. Gand an tammou chomet da zilerh, e tastumont seiz panerad leun. ³⁸ Ar re o-deus debret a oa pevar mil den, hep konta ar merhed hag ar vugale. ³⁹ Kas a ra kuit ar bobl, pignad er vag, ha dond da harzou Magadan.

Pennad c’hwezeg

Eur zin euz an neñv

¹ Tostaad a ra ar farizianed hag ar zaduseaned. Evid e amproui, e houlennont digantañ diskouez dezo eur zin euz an neñv. ² Jezuz a respont hag a lavar dezo : « Pa zeu an abardaez, e lavarit : “Amzer vrao, rag ruz eo an oabl !” ³ Ha diouz ar mintin : “Arne hirio, rag damruz eo an oabl, hag o vond da zu !” Liou an oabl a ouzoh anaoud, med sinou an amzer ne hellit ket ! ⁴ Rummad fallagr hag avoultrer ! Klask a ra eur zin ! ha sin ebed ne vo roet dezañ, nemed sin Jonaz. » O huitaad a ra, ha mond pelloh.

Goell ar farizianed

⁵ Mond a ra e ziskibien d’an tu all. Dizoñjet o-deus kemer baraennou ganto. ⁶ Jezuz a lavar dezo : « Sellit ! Diwallit diouz goell ar farizianed hag ar zaduseaned ! ⁷ « Prederia a reont enno o-unan, o lavared : « N’on-eus ket kemeret bara ! » ⁸ Jezuz a oar, hag e lavar : « Perag prederia, ennoh hoh-unan, dre n’ho-peus ket bara ? ⁹ Ne gomprenit ket c’hoaz ? N’ho-peus ket soñj euz ar pemp baraenn evid pemp mil den ? Ped panerad ho-peus dastumet ? ¹⁰ Hag ar zeiz baraenn evid pevar mil den ? Ped panerad ho-peus dastumet ? ¹¹ Penaoz ne gomprenit ket ? N’eo ket diwar-benn bara em-eus lavaret deoh : diwallit diouz goell ar farizianed hag ar zaduseaned. » ¹² Neuze e komprenont n’e-noa ket lavared diwall diouz goell ar bara, med diouz kelennadurez ar farizianed hag ar zaduseaned.

Pèr a lavar : “Te eo a zo ar Hrist”

¹³ Dond a ra Jezuz tro-dro da Zezare-Filip, hag ober goulennou ouz e ziskibien, en eur lavared : « Piou, eme an dud, eo mab an den ? » ¹⁴ Lavared a reont : « Lod : “Yann-Vadezour”. Lod all : “Eliaz”. Reou all : “Jeremi”, pe e unan euz ar brofeted. » ¹⁵ Lavared a ra-eñ dezo : « Ha c’hwi ! Piou a lavarit ez on-me ? » ¹⁶ Simon-Pèr a respont : « Te eo a zo ar Hrist, emezañ, Mab an Doue beo ! »

Jezuz a lavar : “Te a zo Pèr”

¹⁷ Jezuz a respont, o lavared dezañ : « Eüruz out-te, Simon, mab da Jonaz, rag n’eo ket ar hig nag ar gwad o-deus diskuliet dit kement-se, med ma Zad hag a zo en neñv. ¹⁸ Ha me a lavar dit : te a zo Pèr (Roh), ha war ar roh-se e savin ma Iliz, ha doriou an ivern ne vint ket kreñvoh egeti. ¹⁹ Roi a rin dit alhweziou rouantelez an neñv : kement a liammi war an douar a vo liammet en neñv ; kement a ziliammi war an douar a vo diliammet en neñv. » ²⁰ Neuze e kemenn d’an diskibien chom heb lavared da zen ebed ez eo-eñ ar Hrist.

Kenta kemennadenn euz e basion

²¹ Adaleg neuze, e krog Jezuz da ziskouez d’e ziskibien e rank-eñ mond da Jeruzalem, gouzañv kalz a-berz ar gozidi, ar veleien-veur hag ar skriverien, beza lazet, ha d’an trede deiz, adsevel.

Pèr a zav e vouez

²² Pèr e denn gantañ a-gostez, hag e krog d’e hourdrouz, en eur lavared : « Doue ra viro, Aotrou ! Nann, ne hoarvezo ket an dra-ze ganit ! » ²³ Distroi a ra-eñ ha lavared da Bèr : « Kerz a-dreñv din, satan ! Eur gwall-skoill out evidon : da venoziou n’int ket re Zoue med re an dud. »

Kemer da groaz

²⁴ Neuze e lavar Jezuz d’e ziskibien : « Nep piou bennag a feil dezañ dond war ma lerh, r’en em naho e-unan, ra zougo e groaz, ha ra zeuio d’am heul ! ²⁵ Ya ’vad, an hini a fell dezañ savetei e vuhez, he hollo. Med an hini a gollo e vuhez, en abeg din-me, he havo. ²⁶ Ya ’vad, petra a dalvez d’eun den gounid ar bed a-bez, ma vez daonet e ene ? Pe c’hoaz, petra a roio eun den en eskemm d’e ene ? »

²⁷ Rag, bez’ ema mab an den o tond e gloar e Dad, gand an êlez. Neuze e roio da bep hini hervez e oberou. ²⁸ Amen, lavared a ran deoh : lod euz ar re-mañ ne danvaint ket ar maro araog beza gwelet mab an den o tond en e rouantelez. »

Pennad seiteg

Treuzneuziadur

¹ C’hweh devez war-lerh, e kemer Jezuz gantañ : Pèr, Jakez, ha Yann, e vreur. O lakaad a ra da bignad war eur menez uhel, en eul leh distro. ² Treuzneuziet eo-eñ dirazo : e zremm a sked evel an heol, e zillad a zeu da veza gwenn-kann e-giz ar sklêrijenn. ³ Ha setu : dond a ra dirazo Moizez hag Eliaz ; divizoud a reont gantañ.

⁴ O staga da gomz, e lavar Pèr da Jezuz : « Aotrou, brao eo deom beza amañ ! Ma fell dit, e savin teir deltenn : unan evidout, unan evid Moizez, hag unan evid Eliaz. » ⁵ Emañ c’hoaz o komz hag e teu eur goabrenn sklêrijennuz d’o goloi, hag euz kreiz ar goabrenn, e lavar eur vouez : « Hemañ eo ma Mab, ar muia-karet, en em blijoud a ran ennañ. Selaouit-eñ ! » ⁶ O kleved kement-se, e kouez an diskibien war o dremm, spontet-braz.

⁷ Jezuz a dosta hag a douch outo, en eur lavared : « Adsavit ! Bezit dizaon ! ». ⁸ Sevel a reont o zellou ha ne welont den ebed nemed Jezuz e-unan. ⁹ En eur ziskenn euz ar menez, e hourhemenn dezo, o lavared : « Da zen ebed na gomzit euz ar weledigez, a-raog ma tihuno mab an den a-douez ar re varo. »

« Deut eo Eliaz dija »

¹⁰ An diskibien a houlenn digantañ : « Perag, emezo, e lavar ar skriverien e tle Eliaz dond araog ? » ¹¹ Respont a ra dezo : « Gwir eo, emezañ, e tle Eliaz dond evid adsevel pep tra. ¹² Koulskoude, lavared a ran deoh : deut eo Eliaz dija, ha n’o-deus ket e anavezet. Med greet adeus gantañ e-giz m’eo bet fellet dezo, hag evel-se e houzañvo mab an den ganto ive. » ¹³ Neuze e kompren an diskibien eo Yann-Vadezour an hini e-neus komzet anezañ.

Ar bugel loarieg

¹⁴ Dond a reont war-zu ar bobl. Eun den a dosta, ¹⁵ a gouez war an daoulin dirazañ, en eur lavared : « Aotrou, az-pez truez ouz ma mab, rag loarieg eo, ha fall ez a an traou gantañ. Rag koueza a ra aliez en tan, hag aliez en dour. ¹⁶ E degaset em-eus d’az tiskibien, ha n’o-deus ket gellet e barea. » ¹⁷ Jezuz a respont : « O rummad difeiz ha fallagr ! emezañ. Beteg pegeid e vin ganeoh ? Beteg pegeid ho kouzañvin ? Degasit-eñ din amañ ! ». ¹⁸ Jezuz a hourdrouz an diaoul, hag hemañ a ya kuit diouz ar bugel : pareet eo adaleg an eur-ze.

¹⁹ Neuze e tosta e ziskibien ouz Jezuz. En distro, e lavaront dezañ : « Evid peseurt abeg n’on-eus ket ni gellet e gas kuit ? » ²⁰ Lavared a ra dezo : « En abeg d’ho tiouer a feiz. Amen, lavared a ran deoh : m’ho-peus feiz, evel eur hreunenn zezo, e lavarot d’ar menez-mañ : “Kerz pelloh ahann, du-ze !” ha pellaad a raio ; ne vo netra dreist ho kalloud. »

Eil kemennadur euz e basion

²¹ E-pad m’emaint o vond en-dro da Vro-Halile, e lavar Jezuz dezo : « Mab an den a vo lakeet etre daouarn an dud. ²³ E laza a raint, ha, d’an trede deiz, eh adsavo. » Dond a reont da veza trist-meurbed.

Taos an templ

²⁴ Dond a reont da Gafarnaom. Tostaad a ra paotred taos an diou zrakm ouz Pèr, hag int da lavared dezañ : « Daoust ha ne bae ket ho mestr taos an diou zrakm ? » ²⁵ Respont a ra : « Eo ! » Evel m’ema o tond d’an ti, e krog Jezuz da gomz da genta : « Petra, emezañ, a zoñjez, Simon ? Rouaned ar bed, diwar goust piou e kemeront taosou pe daillou ? Diwar goust o mibien pe diwar goust ar re all ? » ²⁶ Respont a ra : « Diwar goust ar re all. »

Jezuz a respont dezañ : « Diskarget eo ar vibien eta ! ²⁷ Arabad evelato beza eur gwall-skoill evito. Kerz d’ar mor ha taol an higenn ! Ar pesk kenta o sevel, pak-eñ, digor e veg dezañ hag e kavi eur stater. Kemer hemañ ha ro-eñ, evidon hag evidout. »

Pennad triweh

« Piou ’ta eo ar brasa ? »

¹ D’ar mare-ze, e tosta an diskibien ouz Jezuz, en eur lavared : « Piou ’ta eo ar brasa e rouantelez an neñv ? » ² Gelver a ra eur bugelig davetañ, hag e lakaad en o zouez. ³ Hag e lavar dezo : « Amen, emezon, ma ne jeñchit ket buhez, evid dond da veza e-giz bugale vihan, ne antreot ket e rouantelez an neñv. ⁴ An hini en em izella eta, evel ar bugelig-mañ, hennez eo ar brasa e rouantelez an neñv. ⁵ Nep piou bennag a zegemer eur bugelig em ano, me eo a zo degemeret gantañ. »

« An hini a vo eur gwall-skoill »

⁶ Nep piou bennag a vo eur gwall-skoill evid unan hepken euz ar re vihan-mañ a gred ennon, eo emzavoh dezañ e vefe staget eur rod-vilin en-dro d’e houzoug ha stlapet e strad ar mor.

⁷ Reuzeudig ar bed en abeg d’ar gwall-skoillou ! Red eo d’ar gwall-skoillou dond, med reuzeudig an den a zeu ar gwall-skoillou drezañ ! ⁸ Ma vez da zorn pe da droad eur gwall-skoill evidout, troh-eñ ha taol-eñ kuit, pell ahanout. Gwelloh eo dit antreal er vuhez, mogn pe gamm, eged beza stlapet en tan peurbaduz gand daou zorn ha daou droad.

⁹ Ha ma vez da lagad eur gwall-skoill evidout, lam-eñ kuit ha stlap-eñ pell ahanout. Gwelloh eo evidout antreal born er vuhez, eged beza taolet e jehenn an tan gand daou lagad.

¹⁰ Taolit evez da jom heb dismegañsi unan euz ar re vihan-mañ, rag lavared a ran deoh : ema o êlez en neñv o para atao war dremm ma Zad a zo en neñv.

An danvadez kollet

¹² Petra a zoñjit ? M’e-neus eun den kant dañvadez, ha ma vefe kollet unan anezo, daoust ha ne zilezo ket an naonteg all ha pevar-ugent, war ar meneziou, evid mond da glask an hini gollet ? ¹³ Ha ma c’hoarvez gantañ he havoud, amen, lavared a ran deoh : laouenneet eo ganti muioh eged gand an naonteg ha pevar-ugent n’int ket bet kollet. ¹⁴ Evel-se ema gand bolontez ho Tad euz an neñv : na ’z afe da goll nikun euz ar re vihan-mañ ! »

« M’e-neus da vreur pehet »

¹⁵ « M’e-neus da vreur pehet, kerz, gra rebechou dezañ, etrezoh ho-taou hepken. Ma da zelaou, az-po gounezet da vreur. ¹⁶ Med ma ne zelaou ket, kemer ganit unan pe zaou all, “evid ma vo reñket pep tra dre desteni daou pe dri”. ¹⁷ Ma nah-eñ o zelaou, henn lavar d’an Iliz. Ha ma nah selaou an Iliz zoken, ra vo evidout e-giz ar paian hag ar publikan.

¹⁸ Amen, lavared a ran deoh : pep tra a liammot war an douar a vo liammet en neñv. Ha pep tra a ziliammot war an douar a vo diliammet en neñv. »

« Ma teu daou d’en em gleved »

¹⁹ « Ha c’hoaz ! Amen, lavared a ran deoh : ma teu daou ahanoh d’en em gleved, war an douar, evid goulenn tra pe dra, kement-se en em gavo ganto, a-berz ma Zad a zo en neñv. ²⁰ Rag, al leh m’en em vod daou pe dri ennañ, eno e vezan en o zouez. »

Dilemel deg gwech ha tri-ugent seiz gwech

²¹ Tostaad a ra Pèr outañ, ha lavared dezañ : « Aotrou, ped gwech e peho ma breur a-eneb din hag e pardonin dezañ ? Beteg seiz gwech ? « ²² Jezuz a respont : « Ne lavaran ket beteg seiz gwech, med beteg deg gwech ha tri-ugent seiz gwech. »

An dleour didruez

²³ « Setu perag eo rouantelez an neñv heñvel ouz eun den, eur roue, hag e fell dezañ renta e goñchou gand e zervicherien. ²⁴ Pa ’z eo kroget d’henn ober, e tegaser dezañ unan hag a zle deg mil talant. ²⁵ Dre ma n’e-n eus ket peadra da restaol, e kemenn an aotrou e lakad e gwerz, gand e wreg, e vugale ha kement e-neus, evid ma vo daskoret pep tra.

²⁶ Ar zervicher eta, o koueza e-harz e dreid, a stou dirazañ, en eur lavared : “Bez madelezuz ouzin hag e restaolin pep tra dit”. ²⁷ Piket eo aotrou ar zervicher-ze e don e galon : e ziliamma a ra, ha dilemel e zle digantañ.

²⁸ En eur vond er-mêz, e kav ar zervicher-ze unan euz e geneiled a zlee dezañ kant dîner. Krogi a ra ennañ ha, prest d’e vouga, e lavar : “Restaol din ar pez a zleez”. ²⁹ E geneil eta, o koueza e-harz e dreid, e aspede en eur lavared : “Bez madelezuz ouzin hag e restaolin dit”. ³⁰ Ne fell ket dezañ, med mond a ra hag e daoler en toull-bah, beteg m’e-no restaolet e zle.

³¹ Gweled a ra e geneiled ar pez ’zo c’hoarvezet, ha glaharet-braz int gand kement-se. Dond a reont da lavared d’o aotrou kement a zo en em gavet. ³² E helver a ra e aotrou, ha lavared dezañ : “Servicher fall, dilamet em-eus da zle en e bez diganit, peogwir az-poa ma aspedet. ³³ Daoust ha ne oa ket red dit ive kaoud truez ouz da geneil, evel m’em-eus bet-me truez ouzit ?” ³⁴ E aotrou, kounnaret, e ro d’ar vourrevien, beteg ma vo restaolet e zle gantañ en e bez. ³⁵ Evel-se e raio ma Zad euz an neñv evidoh, ma ne bardonit ket, pep hini ahanoh d’e vreur, a-greiz-kalon. »

Pennad naonteg

¹ Hogen, p’ e-neus Jezuz echuet ar gomzou-ze, e kuita Bro-Halile.

Eur horv hepken

Dond a ra war harzou Bro-Jude, en tu all d’ar Jourdan. ² Pobladou-tud niveruz a zeu d’e heul, hag o farea a ra eno.

³ Tostaad a ra ar farizianed outañ. Evid e denta, e lavaront : « Daoust hag e-neus eur gwaz aotre da gas kuit e wreg, evid forz peseurt abeg ? » ⁴ Respont a ra : « N’ho-peus ket lennet ? emezañ : “Er penn kenta e-neus ar hrouer o greet par ha parez.” ⁵ Ha lavaret e-neus : “En abeg da ze, e kuitaio ar gwaz e dad hag e vamm, hag en em stago ouz e wreg, hag e vint o-daou eur horv hepken.” ⁶ Evel-se n’emaint ket daou ken med eur horv hepken. Ar pez e-neus Doue unanet eta, arabad da zen ebed e zispartia. »

⁷ Lavared a reont dezañ : « Perag eta e-neus Moizez gourhemennet roi eul lizer torr-dimezi, ha kas kuit ? » ⁸ Respont a ra dezo : « En abeg d’ho kalon galed eo e-neus Moizez roet aotre deoh da gas kuit ho kwragez. Er penn kenta, ne oa ket an traou evel-se. ⁹ Lavared a ran deoh : nep piou bennag a gas kuit e wreg, nemed e vefe eur falsdimezi, hag a zimez gand unan all, a zo avoultrer. »

¹⁰ E ziskibien a lavar dezañ : « Mard ema evel-se stad eun den gand eur vaouez, n’eo ket emzao dimezi. » ¹¹ Lavared a ra dezo : « An oll ne gomprenont ket ar gomz-se, med ar re nemeto m’eo bet roet dezo. ¹² Bez’ ez eus lod na hellont ket dimezi, dre ma ’z int ganet evel-se euz korv o mamm ; bez’ ez eus lod bet lakeet evel-se gand an dud ; ha bez’ ez eus lod all en em lakeet evel-se en abeg da rouantelez Doue. An neb a hell intent, ra intento ! »

« Lezit ar vugale vihan »

¹³ Neuze e touger dirazañ bugale vihan, evid ma lako e zouarn wamo, ha ma pedo. An diskibien o gourdrouz, ¹⁴ med Jezuz ha lavared : « Lezit ar vugale vihan, na virit ket outo da zond beteg ennon ! Rag evid ar re heñvel outo eo rouantelez an neñv. » ¹⁵ Lakaad a ra e zaouarn wamo, ha mond kuit alese.

« Gwerz ha ro d’ar paour »

¹⁶ Ha setu eun den o tostaad outañ, en eur lavared : « Mestr, petra a vad a rin evid kaoud ar vuhez peurbaduz ? » ¹⁷ Lavared a ra dezañ : « Perag e rez goulennou ouzin diwar-benn ar mad ? N’eus nemed eur Mad. M’az-peus c’hoant d’antreal er vuhez, dalh d’ar gourhemennou. – ¹⁸ Pere ? » emezañ. Jezuz a respont : « Ar re-mañ : “Ne lazi ket. Ne ri ket avoultriez. Ne laeri ket. Ne ri ket fals-testeni. ¹⁹ Enor an tad hag ar vamm. Ha da nesa a gari, eveldout da-unan”. »

²⁰ Lavared a ra an den yaouank dezañ : « An oll draou-ze am-eus dalhet. Petra a vank din c’hoaz ? » ²¹ Jezuz a respont dezañ : « M’az-peus c’hoant da veza peurvad, kerz, gwerz da beadra, ha ro d’ar re baour : eun teñzor az-po en neñv. Ha deus, bale war ma lerh ! « ²² Kleved a ra an den yaouank, ha mond kuit, du e benn, rag kalz madou e-noa.

Êsoh d’eur hañval

²³ Jezuz a lavar d’e ziskibien : « Amen, emezon, diêz e vo d’eun den pinvidig antreal e-barz rouantelez an neñv. ²⁴ Adarre e lavaran deoh : êsoh eo d’eur hañval tremen dre doull an nadoz eged d’eun den pinvidig an treal e-barz rouantelez Doue. »

²⁵ O kleved kement-se, eo souezet an diskibien hag e lavaront : « Piou a hell beza salvet neuze ? » ²⁶ O para e zellou warno, e respont Jezuz dezo : « Evid an dud, eo dreist o galloud. Evid Doue a-vad, n’eus netra dreist e halloud. »

« Dilezet on-eus-ni pep tra »

²⁷ Hag o staga da gomz, e lavar Pèr dezañ : « Setu m’on-eus-ni dilezet pep tra, hag eet war da lerh. Petra e vo evidom neuze ? » ²⁸ Respont a ra Jezuz dezo : « Amen, lavared a ran deoh : c’hwi hag a zo deut war ma lerh, da zevez renevezadur ar bed, pa azezo mab an den war e gador a hloar, e viot-c’hwi ive azezet war daouzeg kador, evid barn daouzeg rummad Izrael. ²⁹ Nep piou bennag a lez tier, breudeur pe hoarezed, tad, mamm pe vugale, pe barkeier, en abeg d’am ano, a resevo meur a wech muioh, hag e-no ar vuhez peurbaduz da herez.

Micherourien an unnegved eur

³⁰ « Kalz euz ar re genta a vo da ziweza, ha kalz euz ar re ziweza da genta ».

Pennad ugent

¹ « Rag heñvel eo rouantelez an neñv ouz eun den, eur penn-tiegez, hag a ya er-mêz, diouz ar mintin, da hopra micherourien evid e winieg. ² Ober a ra marhad gand ar vicherourien evid eun diner an devez, hag o has d’e winieg.

³ Dond a ra er-mêz d’an trede eur, ha gweled reou all chomet dibreder war el leur-gêr. ⁴ Dezo e lavar : “It, c’hwi ive d’ar winieg ; roi a rin deoh ar pez a zo just.” ⁵ Mo nd a reont. A darre ez a-eñ er-mêz d’ar c’hwehved ha d’an naved eur, hag e ra memez tra.

⁶ War-dro an unnegved eur, ez a c’hoaz er-mêz. Kavoud a ra reou all chomet aze, ha lavared dezo : “Perag e chomit aze dibreder, e-pad an deiz ?” ⁷ Respont a reont dezañ : “Dre ma n’eus bet den ebed d’on gopra.” Lavared a ra dezo : “lt, c’hwi ive, d’ar winieg”.

⁸ Deut an abardaez, e lavar aotrou ar winieg d’e verour : “Galv ar vicherourien, ha ro dezo o gopr, en eur grogi gand ar re ziweza, beteg ar re genta”. ⁹ Dond a ra re an unnegved eur, ha reseo peb unan beb a ziner. ¹⁰ Goude-ze e teu ar re genta : soñjal a reont e resevint muioh, ha peb unan anezo a resev an diner ive. ¹¹ En eur reseo hemañ, e hrozmolont a-eneb d’ar penn-tiegez, ¹² o lavared : “Ar re ziweza-mañ o-deus greet eun eurvez labour hep ken, hag o lakez par deom-ni hag on-eus douget samm an devez hag ar wrez”. ¹³ Respont a ra d’unan anezo : “Keneil, emezañ, ne ran ket gaou ouzit : daoust ha n’az-peus ket greet marhad ganin evid eun diner ? ¹⁴ Kemer da hini ha kerz ! C’hoant am-eus da roi da hemañ, an hini diweza, kement ha dit-te : ¹⁵ daoust ha n’em-eus ket aotre d’ober pez a garan gand ma madou ? Pe daoust hag eo fall da lagad en abeg ma ’z on mad ?” ¹⁶ Evel-se e vo ar re ziweza da genta, hag ar re genta da ziweza. »

Trede kemennadur euz e basion

¹⁷ War-nez pignad da Jeruzalem, e kemer Jezuz gantañ e ziskibien, o-unan, hag en eur ober hent, e lavar dezo : ¹⁸ « Setu ma pignom da Jeruzalem. Gwerzet e vo mab an den d’ar veleien-veur ha d’ar skriverien : kondaonet e vo ganto d’ar maro. ¹⁹ E werza a raint d’ar baianed, evid beza mezekeet, skourjezet ha staget ouz ar groaz. Ha, d’an trede deiz, eh adsavo. »

Mibien Zebede

²⁰ Neuze e tosta outañ mamm mibien Zebede, gand he daou vab. Stoui a ra-hi evid goulenn eun dra digantañ. ²¹ Eñ a lavar dezi : « Petra a garfes kaoud ? » Respont a ra : « Lavar ma vo ar re-mañ, an daou vab-mañ-din, azezet en da rouantelez, unan en tu dehou dit hag unan en tu kleiz. »

²² Jezuz a respont : « N’ouzoh ket, emezañ, petra a houlennit. Ha bez’ e hellit eva ar haliriad emaon o vond da eva ? – Bez’ e hellom », emezo. ²³ Lavared a ra dezo : « Ya, eva a reot ma haliriad. Med evid beza azezet en tu dehou din hag en tu kleiz, n’eo ket din-me her roi : bez’ e vo ar plasou-ze d’ar re m’int bet aozet evito gand ma Zad. » ²⁴ O kleved kement-se eo taeret an deg a-eneb an daou vreur.

« Deut eo mab an den evid servicha »

²⁵ O gelver a ra Jezuz, ha lavared : « Gouzoud a rit e ra priñsou ar broiou paian o mistri warno, hag e lak ar pennou-braz o galloud da goueza warno. ²⁶ Ne vo ket evel-se en ho touez. Med nep piou bennag e-no c’hoant da veza braz, a vo ho servicher. ²⁷ Ha nep piou bennag e-no c’hoant da veza da genta, a vo ho sklav. ²⁸ E-giz mab an den : n’eo ket deut evid beza servichet med evid servicha, ha roi e vuhez evid dasprena kalz a dud. »

An daou zen dall euz Jeriko

²⁹ Pa zeuont er-mêz euz Jeriko, ez a eur boblad-tud niveruz d’e heul. ³⁰ Ha setu daou zen dall, azezet war vord an hent. Kleved a reont ema Jezuz o vond e-biou. Hag e youhont : « Az-pez truez ouzom, emezo, mab da Zavid ! » ³¹ An dud o gourdrouz, evid ma chomint peoh. Med kreñvoh c’hoaz e youhont, en eur lavared : « Az-pez truez ouzom, mab da Zavid ! »

³² Chom a ra Jezuz a-zao, o gelver, ha lavared : « Petra ho-peus c’hoant a rafen evidoh ? » ³³ Respont a reont dezañ : « Aotrou ! Ra vo digoret on daoulagad ! » ³⁴ Fromet e don e galon, e touch Jezuz ouzo malvennou : dioustu e welont. Ha mond a reont d’e heul.

Pennad unan warn-ugent

E Jeruzalem

¹ P’emaint tost ouz Jeruzalem hag erruet e Betfaje, war Menez an Olivez, ² e kas neuze Jezuz daou ziskib, en eur lavared dezo : « lt d’ar gêriadenn dirazoh. Kerkent e kavot eun azenez ouz ar stag, gand eun azenig en he hichenn ? Distagit ha degasit-i din. ³ Ha ma lavar unan bennag eun dra deoh, e respontot : “An aotrou e-neus ezomm anezo !” Ha dioustu e vint lezet da vond. » ⁴ C’hoarvezet eo kement-se evid ma teuio da wir komzou ar profet : ⁵ « Lavarit da verh Sion : setu da roue o tond beteg ennout, leun a zouster, pignet war eun azenig, ebeul d’al loen a zoug ar zamm. »

⁶ Mond a ra an diskibien hag ober evel m’e-neus Jezuz lavaret. ⁷ Degas a reont an azenez hag an azenig, ha lakaad o mantilli war o hein. Eñ a azez warno. ⁸ An dud, niveruz-meurbed, a astenn o mantilli war an hent. Re all a drohe skourrou euz ar gwez hag o lede war an hent. ⁹ Youhal a ra an dud o vond en e raog, e-giz ar re o tond war e lerh, hag e lavaront : « Hozanna da vab David ! Benniget an hini a zo o tond en ano an Aotrou ! Hozanna war an uheliou ! »

Kas a ra ar varhadourien kuit euz an templ

¹⁰ Pa ’z a tre e Jeruzalem, ema ar gêr leun a virvill, hag o lavared : « Piou eo hemañ ? » ¹¹ Hag e lavare an dud : « Hennez eo Jezuz, ar profet euz Nazared, e Bro-Halile ! »

¹² Mond a ra Jezuz d’an templ, ha kas er-mêz an oll re a zo o prena hag o werza en templ. Eilpennet eo gantañ taoliou an drokerien ha kadoriou ar varhadourien koulmed. ¹³ Lavared a ra dezo : « Skrivet eo : “Ma Zi a vo anvet Ti ar Bedenn”. Hag ober a rit-c’hwi gantañ eun toull laeron. »

« Hozanna da vab David »

¹⁴ Tostaad a ra outañ, en templ, tud dall ha tud kamm : o farea a ra. ¹⁵ Ar veleien-veur hag ar skriverien a wei an traou souezuz greet gantañ, hag ar vugale o youhal en templ hag o lavared : « Hozanna da vab David ! » Mond a ra droug enno, ¹⁶ hag e lavaront dezañ : « Kleved a rez ar pez a lavar ar re-ze ? » Ha Jezuz da respont dezo : « Ya ! N’ho-peus ket lennet biskoaz : “Euz genou ar vugale hag ar re a zo ouz ar vronn, em-eus tennet eur meuleudi” ? » ¹⁷ O lezel a ra, ha mond er-mêz euz kêr, war-zu Betani, da dremen an noz eno.

Ar wezenn fiez dizehet

¹⁸ Diouz ar mintin, o tond en-dro e kêr, e teu naon dezañ. ¹⁹ Gweled a ra eur wezenn-fiez tost d’an hent, ha mond beteg enni : ne gav netra nemed deliou enni. Hag eñ da lavared dezi : « Ra jomi hep taoler frouez, da virviken ! » Hag a-daol-trumm, e tizeh ar fiezenn. ²⁰ O weled kement-se, e lavar an diskibien, souezet-braz : « Penaoz eo bet dizehet ar fiezenn, a-daol-trumm ? »

²¹ O respont dezo, e lavar Jezuz : « Amen, m’ho-peus feiz heb douetañs ebed, ne reot ket hepken ar pez a zo bet greet d’ar fiezenn, med d’ar menez-mañ e lavarot : “Bez lamet kuit alese ha taolet er mor !” hag e c’hoarvezo kement-se. ²² Pep tra a houlennot er bedenn, gand feiz, a vo roet deoh. »

« Digand piou az-peus bet ar galloud ? »

²³ Dond a ra d’an templ. E-pad m’ema o kelenn, e tosta outañ ar veleien-veur ha kozidi ar bobl, hag e lavaront dezañ : « Dre beseurt galloud e rez kement-se ? Piou e-neus roet ar galloud-se dit ? ²⁴ Respont a ra Jezuz dezo : « Goulenn a rin, emezañ, eun dra ive diganeoh, eur gomz hepken. Ma lavarit din, e lavarin-me deoh ive dre beseurt galloud e ran kement-se : ²⁵ badiziant Yann, euz peleh e oa ? Euz an neñv pe euz an dud ? »

Med enno o-unan e soñjont kement-mañ : « Ma lavarom : “Euz an neñv”, e responto deom : “Perag neuze n’ho-peus ket kredet ennañ ?” ²⁶ Med ma lavarom :’Euz an dud”… on-eus da gaoud aon rag ar bobl : selled a ra an oll dud ouz Yann evel ouz eur profet. » ²⁷ Respont a reont : « N’ouzom ket. » Hag eñ da lavared dezo ive : « Me kennebeud, ne lavarin ket deoh dre beseurt galloud e ran kement-se. »

« Eun den e-noa daou vab »

²⁸ « Med petra a zoñjit euz kement-mañ ? Eun den e-noa daou vab. O vond da gaoud an hini kenta, e lavar dezañ : “Paotr, kerz hirio da labourad er winieg !” ²⁹ Respont a ra hemañ : “Ne fell ket din mond !” Goude-ze e teu keuz dezañ, ha mond a ra.

³⁰ Eet da gaoud an hini all, an tad a lavar memez tra. Respont a ra hennez : “Mond a ran, Aotrou !” hag eñ chom heb mond. ³¹ Pehini euz an daou-ze e-neus greet bolontez an tad ? » Respont a reont : « An hini kenta. »

Jezuz a lavar dezo : « Amen, lavared a ran deoh : ar bublikaned hag ar zerhed a zo en ho raog e rouantelez Doue. ³² Rag deut eo Yann beteg ennoh, war eun hent a justis, ha n’ho-peus ket kredet ennañ. Med ar bublikaned hag ar zerhed o-deus-i kredet ennañ. Ha c’hwi, goude beza gwelet kement-se, n’ho-peus ket bet keuz, ha n’oh ket deut da gredi ennañ. »

Lazet ar mab gand ar winierien

³³ « Klevit eur barabolenn all : eun den a oa penn-tiegez. Planta a ra eur winieg, lakaad eur gael en-dro dezi, kleuza eur waskell enni, ha sevel eun tour. He feurmi a ra da winierien, ha mond kuit da bell. ³⁴ Pa ’z eo deut mare ar frouez, e kas servicherien d’ar winierien, evid kemer ar frouez anezi.. ³⁵ Ar winierien a-vad a dap krog er zervicherien, a sko gand unan, a laz unan all, a veinat an trede. ³⁶ Kas a ra c’hoaz servicherien all, niverusoh eged ar re genta, ha memez tra a reont ganto.

³⁷ Goude-ze, e kas e vab beteg enno, en eur zoñjal : “Douja a raint ma mab.” ³⁸ Med, o weled ar mab, e lavar ar winierien kenetrezo : “Hemañ eo ar pennher. Deom ! Lazom-eñ, hag an herez a vo deom !” ³⁹ Krogi a reont ennañ, e daoler er-mêz euz ar winieg, hag e laza. ⁴⁰ Ahanta ! Pa vo deut aotrou ar winieg, petra a raio d’ar winierien-ze ? » ⁴¹ Respont a reont : « An dud droug-se a lakaio d’ar maro, en eun doare didruez. Ar winieg a feurmo da winierien all, hag ar re-mañ a roio frouez dezañ d’ar mare mad. »

Ar mên-korn

⁴² Jezuz a lavar dezo : « N’ho-peus ket lennet biskoaz er Skrituriou : “Ar mên bet stlapet kuit gand ar zaverien, hennez eo a zo deut da veza ar mên-korn. Euz an Aotrou e teu an dra-ze, ha bamuz eo d’an daoulagad.” ⁴³ Gand se e lavaran deoh : tennet e vo diganeoh rouantelez Doue ha roet d’eur vroad a roio frouez ganti. »

⁴⁵ Pa glev ar veleien-veur hag ar skriverien e barabolennou, e ouzont ema o komz diwar o fenn. ⁴⁶ Klask a reont tapoud krog ennañ, med aon o-deus rag ar bobl : homañ a zelle outañ evel eur profet.

Pennad daou warn-ugent

An dud kouviet d’ar pred

¹ Krogi a ra Jezuz da gomz dezo, ha dre barabolennou adarre. ² « Heñvel eo, emezañ, rouantelez an neñv ouz eun den, eur roue, oh ober eured e vab. ³ Kas a ra e zervicherien da bedi ar gouvidi d’an eured ; med ne felle ket d’ar re-mañ dond. ⁴ Adarre e kas-eñ servicherien all : “Lavarrit, emezañ, d’ar gouvidi : prest eo pep tra ; deuit d’an eured.”

⁵ Med chom a reont dizeblant, ha mond, unan d’ e bark, egile d’e genwerz. ⁶ Lod all a dap krog er zervicherien, evid o dismegañsi hag o laza. ⁷ En e gounnar, e kas ar roue e zoudarded da zistruja ar vuntrerien-ze, ha da zevi o hêr.

⁸ Neuze e lavar d’e zervicherien : “Prest eo an eured, med ne oa ket dign ar gouvidi. ⁹ It eta da benn an heñchou, ha pedit d’an eured an oll dud a gavot.” ¹⁰ Mond a ra ar zervicherien er-mêz war an heñchou, ha boda an oll dud a gavont, fall pe vad. Hag eo leun ar zal-eured gand ar gouvidi. »

Ar zae-eured

¹¹ « Antreal a ra ar roue da zelled ouz ar gouvidi. Hag e wel eno eun den ha n’e-neus ket gwisket ar zae-eured. ¹² Lavared a ra dezañ : “Ma migon, penaoz out-te deut tre aman heb kaoud eur zae-eured ?” Chom a ra-eñ mud. ¹³ Neuze e lavar ar roue d’e zervicherien : “Liammit dezañ e dreid hag e zaouarn, ha taolit-eñ er-mêz, en deñvalijenn diavêz ! Eno e vo leñvadeg ha skrignadeg dent.” ¹⁴ Rag kalz a zo galvet, med nebeud eo an dibabidi. »

« Rentit da Zezar »

¹⁵ Mond a ra neuze ar farizianed da guzulia kenetrezo, evid e baka en e gomzou. Kas a reont dezañ o diskibien, gand re an herodianed. ¹⁶ « Mestr, emezo, gouzoud a reom ez out gwirion, hag e kelennez hent Doue e gwirionez. Ne rez van gand den ebed, ha ne zellez ket ouz dremm an dud. ¹⁷ Lavar deom eta pehini eo da ali : daoust hag ez eus aotre da bêa an taillou da Zezar pe get ? » ¹⁸ Anaoud a ra Jezuz o fallentez : « Perag, emezañ, emaoh ouz ma zenti, pilpouzed ? ¹⁹ Diskouezit din ar pez-moneiz evid an taillou. » Diskouez a reont dezañ eun diner. ²⁰ Eñ ha lavared dezo : « Skeudenn piou eo homañ ? Hag an enskrivadur ? » ²¹ Respont a reont : « Hini Sezar ! » Neuze e lavar-eñ dezo : « Rentit eta da Zezar ar pez a zo da Zezar ! Ha da Zoue ar pez a zo da Zoue ! » ²² Kleved a reont, ha souezet int. Ouz e lezel, ez eont kuit.

Ar zaduseaned hag an adsao

²³ En deiziou-ze, e tosta outañ ar zaduseaned, ar re a lavar n’eus ket a adsao. ²⁴ Goulennou a reont outañ : « Mestr, emezo, lavaret e-neus Moizez : “Ma varv unan bennag heb kaoud bugale, e timezo e vreur gand e wreg, hag e savo diskennidi d’e vreur.” ²⁵ Hogen, bez’ e oa, en on touez, seiz breur. An hini kenta, goude beza bet dimezet, a varv heb diskennad ebed : lezel a ra e wreg d’e vreur. ²⁶ Evel-se evid an eil hag an trede, ha beteg ar zeizved. ²⁷ War-lerh an oll anezo, e varv ar vaouez. ²⁸ Goude an adsao, da behini euz ar zeiz den e vo-hi gwreg ? Rag pep hini e-neus he bet da wreg. »

²⁹ Respont a ra Jezuz dezo : « Fazia a rit, emezañ, dre ma n’anavezit nag ar Skrituriou na galloud Doue. ³⁰ Rag, goude an adsao, ne gemerer na gwaz na gwreg, med bez’ e vezer evel an êlez en neñv. ³¹ Hag evid an adsao, n’ho-peus ket lennet ar homzou lavaret deoh a-berz Doue ? : ³² “Me eo Doue Abraham, Doue Izaak, Doue Jakob”. N’eo ket eñ Doue ar re varo med ar re veo. » ³³ Ouz e gleved, e oa ar bobl sebezet gand e gelennadurez.

« Kared a ri »

³⁴ Kleved a ra ar farizianed e-neus-eñ minellet ar zaduseaned. En em voda a reont asamblez, ³⁵ hag unan anezo, eun den a lezenn, a ra goulennou outañ, evid e denti : ³⁶ « Mestr, pehini eo ar brasa gourhemenn euz al lezenn ? » ³⁷ Lavared a ra : « An Aotrou da Zoue a gari, gand da oll galon, gand da oll skiant : ³⁸ setu aze ar brasa ha kenta gourhemenn. ³⁹ Med an eil a zo heñvel outañ : “Da nesa a gari, eveldout da-unan.” ⁴⁰ Ouz an daou hourhemenn-se eo stag al lezenn a-bez, hag ar brofeted. »

Mab da Zavid hag e Aotrou

⁴¹ Bodet eo ar farizianed, ⁴² hag ober a ra Jezuz goulennou outo : « Pehini eo, emezañ, hoh ali diwar-benn ar Hrist ? Da biou eo-eñ mab ? » Respont a reont : « Da Zavid ! » ⁴³ Hag e lavar-eñ dezo : « Penaoz eta e-neus David, er Spered, e anvet “Aotrou” ? Rag lavared a ra : ⁴⁴ “An Aotrou a lavar d’am Aotrou : azez en tu dehou-din, beteg ma lakain da enebourien dindan da dreid.” ⁴⁵ Ma ’z eo anvet “Aotrou” gand David eta, penaoz eo-eñ e vab ? » ⁴⁶ Nikun anezo ne bell respont eur ger dezañ, ha den ebed ne gred ober goulennou outañ, adaleg an deiz-se.

Pennad tri warn-ugent

« Diwallit diouz ar skriverien »

¹ Neuze e komz Jezuz d’ar bobl ha d’e ziskibien, ² o lavared : « War gador Voizez ema ar farizianed hag ar skriverien azezet. ³ Kement eta a lavaront, deoh d’henn ober ha d’her mired. Diouz o oberou a-vad na rit ket, rag int a lavar med ne reont ket. ⁴ Eren a reont sammou ponner, hag o lakaad war ziouskoaz an dud, med ne fell ket dezo, int o-unan, o diblas gand o biz. ⁵ O oll oberou a reont evid beza gwelet gand an dud. Rag ledannaad a reont o filakteriou, hag hirraad o pempillennou. ⁶ Kared a reont ar skaon a enor er prejou, ar hadoriou kenta er zinagogennou, ⁷ ar zaludou war al leurgêriou, ha beza anvet “rabbi” gand an dud. »

« N’ho-peus nemed eur mestr »

⁸ « Evidoh-c’hwi, na vezit ket anvet “rabbi”, rag n’ho-peus nemed eur mestr, ha breudeur oh-c’hwi, oll etrezoh. ⁹ N’anvit “tad” nikun ahanoh war an douar, rag n’ho-peus nemed eun Tad, hini an neñv. ¹⁰ Na vezit ket anvet “mestr”, rag n’ho-peus nemed eur mestr : ar Hrist. ¹¹ An hini brasa en ho touez, ra vo servicher deoh ! ¹² An hini en em lako uhel a vo izelleet, hag an hini en em izellaio a vo laket uhel. »

« Reuzeudig ! »

¹³ « Reuzeudig oh-c’hwi, skriverien ha farizianed ! Pilpouzed ! Prenna a rit rouantelez an neñv dirag an dud : rag c’hwi n’antreit ket e-barz, hag ar re a yafe e-barz n’o lezit ket da vond tre.

¹⁵ Reuzeudig oh-c’hwi, skriverien ha farizianed ! Pilpouzed ! Mond a rit war vor ha dre zouar seh, evid gounid eun diskib hepken ; ha pa zeu unan, e rit anezañ eur mab d’an ivern, diou wech gwasoh egedoh.

¹⁶ Reuzeudig oh-c’hwi, heñcherien dall ! Rag lavared a rit : “Toui dre ar zantual n’eo netra, med an hini a dou dre aour ar zantual a zo dalhet”. ¹⁷ Tud droch ha dall ! Pehini eta eo ar brasa : an aour pe ar zantual a vez santelleet an aour gantañ ? ¹⁸ Ha : “Toui dre an aoter n’eo netra, med an hini a dou dre ar prov hag a zo warni a zo dalhet”. ¹⁹ Tud dall ! Pehini eta eo ar brasa : ar prov pe an aoter a vez santelleet ar prov ganti ? ²⁰ An neb eta a dou dre an aoter, a dou drezi ha dre gement a zo warni. ²¹ An neb a dou dre ar zantual, a dou drezañ ha dre an Hini a zo azezet ennañ. ²² Hag an neb a dou dre an neñv, a dou dre dron Doue, ha dre an Hini azezet warnañ.

²³ Reuzeudig oh-c’hwi, skriverien ha farizianed ! Pilpouzed ! Pêa a rit an deog war ar vent, ar fanouill hag ar ho min, ha lezel ar pep pouezusa ’zo el lezenn : ar justis, an drugarez hag ar feiz. Red e oa ober kement-mañ, heb dilezel kement-se. ²⁴ Heñcherien dall, o sila ar hwibuenn, hag o lonka ar hañval !

²⁵ Reuzeudig oh-c’hwi, skriverien ha farizianed ! Pilpouzed ! Glannaad a rit an diavêz euz an hanaf hag euz ar skudell, med leun eo an diabarz a laeroñsi hag a zireisted. ²⁶ Farizian dall ! Glanna ’ta diabarz an hanaf da genta, evid ma teuio an diavêz zoken da veza glan !

²⁷ Reuzeudig oh-c’hwi, skriverien ha farizianed ! Pilpouzed ! Heñvel oh-c’hwi ouz beziou bet gwennet, hag a zeblant beza kaer euz an diavêz : o diabarz a-vad a zo leun a eskern re varo hag a bep seurt loustoni. ²⁸ Evel-se evidoh : seblantoud a rit beza just euz an diavêz, evid an dud, med leun eo ho tiabarz a bilpousèrèz hag a fallagriez.

²⁹ Reuzeudig oh-c’hwi, skriverien ha farizianed ! Pilpouzed ! Sevel a rit beziou d’ar brofeted, ha ficha beziou-meur an dud just ; ³⁰ hag e lavarit : “M’or-bije bevet e deiziou on tadou, ne vefem ket bet a-du ganto evid skuilla gwad ar brofeted.” ³¹ Gand kement-se e roit testeni a-eneb deoh hoh-unan ez oh mibien da vuntrerien ar brofeted. ³² Ha c’hwi, karget ho-peus muzuliad ho tadou. »

« Laza hag heskina a reot »

³³ « Naered ! Gouenn naered ! Penaoz e tehot pell diouz barn an ivem ? ³⁴ Setu perag e kasan-me deoh profeted, tud fur ha skriverien. Lod anezo a lazot hag a stagot ouz eur groaz, lod all a skourjezot en ho sinagogennou hag a heskinot a gêr da gêr. ³⁵ Evel-se e kouezo warnoh ar gwad just a-bez, bet skuillet war an douar, adaleg gwad Abel, an den just, beteg gwad Zakari, mab da Varaki, bet drouglazet ganeoh etre ar zantual hag an aoter. ³⁶ Amen, lavared a ran deoh : kement-se a gouezo war ar rummad-mañ. »

« Jeruzalem ! Jeruzalem ! »

³⁷ « Jeruzalem ! Jeruzalem ! Te hag a laz ar brofeted, hag a veinat ar re a zo kaset dit ! Ped gwech eo bet fellet din boda da vugale, e-giz eur yar o voda he foñsined dindan he diouaskell, ha n’eus ket fellet dit ! ³⁸ Setu ma vo lezet ho ti digenvez evidoh. Rag lavared a ran deoh : n’am welot ket ken hiviziken, ken na lavarot : “Benniget an hini a zeu en ano an Aotrou !” »

Pennad pevar warn-ugent

Sinou ar fin

¹ Deut er-mêz euz an templ, ez ee Jezuz gand e hent.Tostaad a ra e ziskibien outañ ha diskouez dezañ savaduriou an templ. ² Respont a ra dezo : « Selled a rit, emezañ, ouz an oll draou-ze, neketa ? Amen, lavared a ran deoh : ne vo ket lezet mên war vên amañ, heb beza eilpennet. »

³ P’ema-eñ azezet war Venez an Olivez, e tosta e ziskibien outañ, en o fart o-unan. « Lavar deom, emezo, pevare e c’hoarvezo an traou-ze. Pehini e vo ar zin evid da zonedigez hag evid fin ar bed ? » ⁴ Respont a ra Jezuz dezo : « Diwallit, emezañ, na vefeh diheñchet gand den ebed. ⁵ Rag kalz a zeuio em ano hag a lavaro : “Me eo ar Hrist”, ha kalz tud a vo diheñchet ganto. ⁶ Emaoh o vond da gleved ano euz brezeliou ha trouziou-brezel : beillit ha bezit dizaon ! Rag red eo da gement-se erruoud. Med n’eo ket ar fin c’hoaz. ⁷ Rag sevel a raio broad a-eneb broad, rouantelez a-eneb rouantelez. Bez’ e vo meur a naonegez hag a gren-douar, hervez al lehiou. ⁸ An oll draou-ze a vo ar penn kenta euz poaniou ar gwilioud.

⁹ Neuze e viot gwasket ha lazet ganto, hag e viot kaseet gand an oll vroadou, en abeg d’am ano. ¹⁰ Kalz a gouezo neuze, en em werzo an eil egile, hag o-do kasoni an eil ouz egile. ¹¹ Sevel a raio kalz falsprofeted, ha diheñcha eur bern tud. ¹² Gand an direisted o vrasaad, e vo yenneeet karantez kalz tud. ¹³ Med an hini a zalho mad beteg ar penn, hennez a vo saveteet. ¹⁴ Embannet e vo kelou-mad ar rouantelez dre ar bed a-bez, e-giz eun testeni evid an oll vroadou. Ha neuze e teuio ar fin. »

Ar wallzismegañs euzuz

¹⁵ « Pa welot el leh santel ar wallzismegañs euzuz, bet embannet gand ar profet Daniel, ra gompreno an neb a lenn ! ¹⁶ Ra deho neuze tud Bro-Jude d’ar meneziou ! ¹⁷ An hini a vo war al leur-doenn, arabad dezañ diskenn da gemer tra pe dra en e di. ¹⁸ Hag an hini a vo er park, arabad dezañ dond war e giz da gemer e vantell. ¹⁹ Reuzeudig ar gwragez a vo o tougen pe o roi bronn, en deiziou-ze !

²⁰ Pedit evid ma n’erruio ket ho tehadeg e-pad ar goañv pe d’ar zabad. ²¹ Rag bez’ e vo neuze eun anken ken braz ha ma n’eo ket bet c’hoarvezet adaleg penn kenta ar bed, ha ma ne hoarvezo ket mui. ²² Ma ne vije ket berreet an deiziou-ze, ne vefe saveteet den ebed. Med, en abeg d’an dibabidi, eo bet berreet an deiziou-ze. »

Falskristou ha falsprofeted

²³ « Neuze, ma lavar unan bennag deoh : “Setu ar Hrist amañ !” pe : “Setu m’ema aze !” na gredit ket. ²⁴ Rag sevel a raio falskristou ha falsprofeted. Roi a raint sinou ha burzudou braz, beteg diheñcha an dibabidi zoken, ma ve posubl. ²⁵ Setu m’em-eus raglavaret deoh ! ²⁶ Ma lavaront deoh eta : “Setu m’ema en dezerz !” n’it ket er-mêz, pe : “Setu m’ema en ti !” na gredit ket. ²⁷ Rag, evel ma strink al luhedenn euz ar zav-heol, hag e sked beteg ar huz-heol, evel-se e vo donedigez mab an den. ²⁸ Forz peleh e vo ar horv, eno en em vodo ar guped. »

Donedigez mab an den

²⁹ « Dioustu war-lerh anken an deiziou-ze, an heol a deñvallaio, al loar ne roio ket he sklêrijenn ken, ar stered a gouezo euz an neñv, ha dibradet e vo galloudegeziou an neñvou. ³⁰ Neuze en em ziskouezo sin mab an den e-barz an neñv.

Ha neuze e vo klemmadennou gand an oll veuriadou war an douar : gweled a raint mab an den o tond war goabrennou an neñv, gand galloudegez ha gloar. ³¹ Kas a raio e êlez gand o zrompill vraz ; ha boda a raint e zibabidi euz ar pevar avel, euz eur penn d’an neñv beteg ar penn all. »

Ar wezenn-fiez o kemenn an hañv

³² « Diwar ar wezenn-fiez deskit eur barabolenn : pa zeu dija he skourrou da veza glaz ha pa gresk he deliou, e ouzoh ema tost an hañv. ³³ Evel-se, c’hwi ive, pa welot an oll draou-ze, gouezit ema-eñ tost, e toull an nor.

³⁴ Amen, lavared a ran deoh : ne dremeno ket ar rummad-mañ heb na errufe an oll draou-ze. ³⁵ Tremen a raio an neñv hag an douar, ma homzou a-vad, nann, ne dremenint ket ! ³⁶ Evid an devez-se, an eur ? Den ebed ne oar, nag an êlez euz an neñv, nag ar Mab, den nemed an Tad, eñ e-unan. »

E-giz e deiziou Noe

³⁷ « E-giz m’eo c’hoarvezet e deiziou Noe, evel-se e vo donedigez mab an den. ³⁸ Rag bez’ edont, e deiziou an dour-beuz, o chervata hag oh eva, o kemer gwaz hag o kemer gwreg, beteg an deiz ma ’z eas Noe en arh. ³⁹ N’o-deus gouezet netra a-raog m’eo deut an dour-beuz, ha m’int bet oll lamet kuit gantañ. Evel-se e vo donedigez mab an den.

Unan kemeret, egile lezet

⁴⁰ « Neuze e vo daou zen er park : kemeret eo unan hag egile lezet. ⁴¹ Diou e vint o vala gand eur mên-milin : kemeret eo unan hag eben lezet. »

« Beillit ! Bezit war evez ! »

⁴² « Beillit eta ! N’ouzoh ket da beseurt devez e teuio hoh Aotrou. ⁴³ Kompren a rit an dra-mañ : m’e-nije gouezet ar penn-tiegez da bed eure teufe al laer, e-nefe beillet ha n’e-nefe ket lezet toulla e di. ⁴⁴ Setu perag, c’hwi ive, bezit prest : d’an eur na zofijit ket enni eo e teuio mab an den. »

Servicher leal pe fall

⁴⁵ « Piou eta eo ar zervicher feal ha poelleg e-neus e aotrou lakeet e penn e diegez, evid roi dezo boued en amzer deread ? ⁴⁶ Eüruz ar zervicher-ze hag a vo kavet war e labour gand e aotrou, pa zeuio hemañ. ⁴⁷ Amen, lavared a ran deoh : e lakaad a raio e penn e oll draou.

⁴⁸ Med, ma vez fall ar zervicher-ze, e lavaro e don e galon : “Dalea a ra ma mestr”, hag e krogo da skoi gand ar zervicherien all, da zebri ha da eva gand al lonkerien. ⁵⁰ Dond a raio aotrou ar zervicher-ze d’an deiz n’ema ket o hortoz, d’an eur n’anavez ket. ⁵¹ E lemel a raio kuit, hag ober dezañ evel d’ar bilbouzed : eno e vo leñvadeg ha skrignadeg dent. »

Pennad pemp warn-ugent

An deg gwerhez

¹ « Neuze e vo rouantelez an neñv heñvel ouz deg gwerhez, kemeret ganto o lampou evid mond er-mêz da ziambroug ar pried. ² Hogen, pemp anezo a oa diboell ha pemp a oa fur. ³ Hag en eur gemer o lampou, ne femer ket ar re ziboell eoul ganto. ⁴ Ar re fur a-vad a gemer eoul e buredou, gand o lampou. ⁵ Dre ma oa dale gand ar pried, e krogont oll da voredi ha da gousked.

⁶ E-kreiz an noz e sav eun hopad : “Setu ar pried ! Kit er-mêz, en arbenn dezañ !” ⁷ Neuze e tihun an oll werhezed-se, hag e fardont o lampou. ⁸ Ar re ziboell a lavar d’ar re fur : “Roit deom lod euz hoh eoul : mervel a ra on lampou. ⁹ Ar re fur a respont : “Sur, emezo, ne vo ket tra-walh evidom hag evidoh. It kentoh da di ar varhadourien d’e brena evidoh.”

¹⁰ Mond a reont da brena, hag e tegouez ar pried. Ar re hag a zo prest a ya tre gantañ evid ar pred-eured, ha prennet an nor. ¹¹ Goude-ze e teu ive ar gwerhezed all : “Aotrou, Aotrou, emezo, digor deom !” ¹² Respont a ra-eñ : “Amen, emezañ, n’ouzon ket piou oh-c’hwi”. ¹³ Beillit eta ! N’ouzoh nag an deiz nag an eur. »

An talantou

¹⁴ « Evel eun den eta o vond kuit da bell : gelver a ra e zervicherien ha roi e vadou dezo. ¹⁵ Da unan e ro pemp talant, d’eun all daou, ha d’eun all unan : da bep hini hervez e ouiziegez. Ha mond a ra kuit da bell.

¹⁶ Dioustu e krog an hini e-neus bet pemp talant da ober ganta : gounid a ra pemp all. ¹⁷ Memez tra evid an hini e-neus bet daou : gounid a ra daou all. ¹⁸ Med mond a ra an hini e-neus resevet unan hepken d’ober eun toull en douar ha da guzad arhant e aotrou.

¹⁹ Goude kalz amzer, e teu aotrou ar zervicherien-ze, hag e rent e gont ganto. ²⁰ Tostaad a ra an hini e-neus resevet pemp talant, ha degas pemp talant all : “Aotrou, emezañ, pemp talant az-peus roet din. Setu amañ pemp all bet gounezet ganin.” ²¹ E aotrou a lavar dezañ : “Brao-tre, servicher mad ha feal ! War nebeud a dra out bet fidel : e penn kalz traou e vi lakeet ganin. Deus tre e levenez da aotrou !”

²² Tostaad a ra ive an hini e-neus bet daou dalant : “Aotrou, emezañ, daou dalant az-peus roet din. Setu amañ daou all bet gounezet ganin.” ²³ E aotrou a lavar dezañ : “Brao-tre, servicher mad ha feal ! War nebeud a dra out bet fidel : e penn kalz traou e vi lakeet ganin. Deus tre e levenez da aotrou !”

²⁴ Ha tostaad a ra an hini e-neus resevet eun talant hepken. “Aotrou, emezañ, da anaoud a ran da veza eun den kaled : medi a rez e-leh ma n’az-peus ket hadet, dastum a rez e-leh ma n’az-peus ket strewet. ²⁵ Aon am-eus bet, hag eet on da guzad da dalant en douar. Setu : ema ganit ar pez a zo dit.” ²⁶ E aotrou a respont, en eur lavared dezañ : “Servicher fall ha lezireg ! Goud a rees e vedan e-leh ma n’em-eus ket hadet, e tastuman e-leh ma n’em-eus ket strewet. ²⁷ Red e oa dit eta lakad ma arhant en eun ti-bank. Ha d’am distro am-befe kavet ar pez ’zo din, gand an interest diwarnañ. ²⁸ Lamit eta an talant digantañ, ha roit-eñ d’an hini e-neus deg. ²⁹ Rag roet e vo da gement hini e-neus, hag e-no ouspenn. Med digand an hini n’e-neus ket, e vo tennet ar pez e-neus zoken. ³⁰ Hag ar zervicher didalvez, taolit-eñ er-mêz, en deñvalijenn ziavêz : eno e vo leñvadeg ha skrignadeg dent. »

« Deuit-c’hwi, tud benniget gand ma Zad ! »

³¹ « Pa zeuio mab an den, en e hloar, hag an oll êlez gantañ, eh azezo war e dron a hloar. ³² Hag an oll bobladou en em zastumo dirazañ. Disranna a raio an eil re diouz ar re all, evel ma tisrann ar mesaer an dañvadezed diouz ar bouhed. ³³ Lakaad a raio an dañvadezed war e du dehou, hag ar bouhed war e du kleiz

³⁴ Neuze e lavaro ar roue d’ar re war an tu dehou : “Deuit-c’hwi, tud benniget gand ma Zad ! Bezit hered d’ar rouantelez aozet evidoh, abaoe krouidigez ar bed ! ³⁵ Rag naon am-eus bet hag ho-peus roet din da zebri, sehed am-eus bet hag ho-peus roet din da eva, estrañjour e oan hag ho-peus ma degemeret, ³⁶ en noaz hag ho-peus ma gwisket, klañv hag ho-peus ma bizitet, bez’ e oan en toull-bah hag oh deut beteg ennon.”

³⁷ Neuze ar re just a responto dezañ : “Aotrou, emezo, pevare on-eus-ni da welet o kaoud naon evid da vaga, pe o kaoud sehed evid roi dit da eva ? ³⁸ Pevare on-eus da welet beza estrañjour evid da zegemer, pe en noaz evid da wiska ? ³⁹ Pevare on-eus da welet klañv pe en toull-bah evid dond beteg ennout ?” ⁴⁰ Ar roue a responto hag a lavaro dezo : “Amen, eme-ve deoh : dre m’ho-peus greet kement-se da unan euz ma breudeur, euz ar re vihanna a zo amañ, din eo ho-peus her greet.”

⁴¹ Neuze e lavaro d’ar re war an tu kleiz : “It pell diouzin, tud villiget, d’an tan peurbaduz, bet aozet evid an diaoul hag e êlez ! ⁴² Rag naon am-eus bet ha n’ho-peus ket roet din da zebri, sehed am-eus bet ha n’ho-peus ket roet din da eva, ⁴³ bez’ e oan estrañjour ha n’ho-peus ket ma degemeret, en noaz ha n’ho-peus ket ma gwisket, klañv pe en toull-bah ha n’ho-peus ket ma bizitet.”

⁴⁴ Respont a raint-i ive neuze : “Aotrou, emezo, pevare on-eus da welet o kaoud naon pe zehed, o veza estrañjour pe en noaz, klañv pe en toull-bah, ha n’on-eus ket da zervichet ?” ⁴⁵ Neuze e responto dezo : “Amen, emezon, dre n’ho-peus ket greet kement-se da unan euz ar re-mañ, euz ar re vihanna, din kennebeud n’ho-peus ket her greet.” ⁴⁶ Ha mond a raio ar re-mañ d’ar hastiz peurbaduz, med ar re just d’ar vuhez peurbaduz. »

Pennad c’hweh warn-ugent

Toastaad a ra gouel Pask

¹ Hogen, pa echu Jezuz an oll gomzou-ze, e lavar d’e ziskibien : ² « Gouzoud a rit e tegouez ar Pask a-benn daou zevez : gwerzet e vo mab an den evid beza staget ouz eur groaz. »

³ Neuze ar veleien-veur ha kozidi ar bobl en emvod e palez ar beleg-meur, Kaifaz e ano· ⁴ En em gleved a reont evid paka krog e Jezuz, dre widre, hag e laza. ⁵ Med lavared a reent : « Arabad henn ober e-pad ar gouel, gand aon na zavfe trouz e-touez ar bobl ! »

An olevadenn e Betani

⁶ Jezuz o veza e Betani, e ti Simon an den lor, ⁷ e tosta outañ eur vaouez, ganti eul lestr alabastr, leun a louzou-c’hwez-vad ker-ruz. E skuilla a ra war e benn, e-pad m’ema-eñ ouz taol. ⁸ O weled kement-se, eo kounnaret an diskibien : « Perag, emezo, seurt koll ? ⁹ Rag an dra-ze a helle beza gwerzet ker-tre, ha roet d’ar re baour. »

¹⁰ O houzoud kement-se, e lavar Jezuz dezo : « Perag hegasi ar vaouez-mañ ? Rag eun dra vad he-deus-hi greet evidon. ¹¹ Peorien ho-po atao en ho touez. Med me ne vin ket atao ganeoh. ¹² Rag, en eur daoler ar c’hwez-vad-se war ma horv, he-deus greet kement-se evid ma zebeliadur. ¹³ Amen, lavared a ran deoh : e kement leh ma vo embannet ennañ ar helou-mad-mañ, dre ar bed a-bez, e vo komzet euz ar pez he-deus-hi greet, evid derhel soñj anezi. »

Klask a ra Judaz an tu

¹⁴ Mond a ra neuze unan euz an daouzeg, Judaz Iskariot e ano, da gaoud ar veleien-veur : ¹⁵ « Petra, emezañ, ho-peus c’hoant da roi din ? Hag e roi a rain-me etre ho taouarn. » Poueza a reont tregont pez arhant dezañ. ¹⁶ Adaleg neuze, e klaske-eñ an tu d’e roi.

Aoza a reont ar Pask

¹⁷ Da zeiz kenta ar Bara-Dihoell, e tosta e ziskibien ouz Jezuz : « Peleh, emezo, ho-peus c’hoant e pourchasim an traou evidout, da zebri ar Pask ? » ¹⁸ Lavared a ra : « Kit e kêr, da di henn-mañ-henn, ha lavarit dezañ : “Tost eo ma amzer, eme ar mestr, en da di e ran ar Pask gand ma diskibien.” » ¹⁹ Ober a ra an diskibien evel m’e-neus Jezuz lavaret dezo, ha pourchas ar Pask.

« Unan ahanoh am roio »

²⁰ Deut an abardaez, ema-eñ ouz taol gand an daouzeg. ²¹ E-pad m’emaint o tebri, e lavar dezo : « Amen, lavared a ran deoh : unan ahanoh am roio. » ²² Glaharet-braz, e krogont da lavared dezañ, pep hini d’e dro : « Daoust ha me eo, Aotrou ? » ²³ Respont a ra : « An hini, emezañ, e-neus soubet e zorn ganin er plad, hennez am roio. ²⁴ Mond a ra mab an den kuit, e-giz m’eo bet skrivet diwar e benn. Reuzeudig a-vad an den-ze m’eo roet mab an den drezañ ! An den-ze a oa gwelloh evitañ ma ne vefe ket bet ganet. » ²⁵ Judaz, hag a zo o vond d’e roi, a respont, en eur lavared : « Daoust ha me eo, rabbi ? » Respont a ra-eñ dezañ : « Te, henn lavared a rez ! »

« Kement-man eo ma horv »

²⁶ E-pad m’emaint o tebri, e kemer Jezuz bara, e vennig, e dorr, hag e ro d’e ziskibien, en eur lavared : « Kemerit ! Debrit ! Kement-mañ eo ma horv. » ²⁷ Kemer a ra eur haliriad, lavared trugarez, ha roi dezo : « Evit oll anezañ, emezañ, ²⁸ rag kement-mañ eo ma gwad, hini an emgleo, skuillet evid kalz tud, da bardoni ar pehejou. ²⁹ Lavared a ran deoh : ne vin ket mui euz frouezenn-mañ ar winienn, beteg an deiz ma heh evin, nevez, e rouantelez ma Zad. »

« A-raog ma kano eur hillog »

³⁰ Goude beza kanet ar zalmou, ez eont er-mêz, war-zu Menez an Olivez. ³¹ Neuze e lavar Jezuz dezo : « Streboti a reot oll, en abeg din, en noz-mañ. Rag skrivet eo : “Skoi a rin gand ar mesaer, hag e vo strewet dañvadezed an tropell.” ³² Med, goude beza adsavet, e vin en ho raog e Bro-Halile. » ³³ Respont a ra Pèr : « Ma strebotfe an oll, emezañ, en abeg dit, biken ne strebotin-me. » ³⁴ Jezuz a lavar dezañ : « Amen, dit e lavaran : en noz-mañ, a-raog ma kano eur hillog, az-po ma nahet teir gwech ! » ³⁵ Ha Pèr da respont dezañ : « Petra bennag ma vefe red din mervel ganit, ne da nahin ket, sur ! » Hag an oll ziskibien a lavar ar memez tra.

E Jetsemani

³⁶ Dond a ra Jezuz neuze ganto d’eun domani anvet Jetsemani. Lavared a ra d’e ziskibien : « Azezit amañ, e-pad ma ’z in pelloh da bedi. » ³⁷ Kemer a ra gantañ Pèr hag an daou vab da Zebede, ha krogi a ra da veza trist ha leun a anken. ³⁸ Neuze e lavar dezo : « Trist-meurbed eo ma ene, beteg mervel. Chomit amañ ha beillit ganin ! »

³⁹ Mond a ra eun tammig pelloh, koueza, e dal gantañ ouz an douar, ha pedi, o lavared : « Ma Zad, ma ve posubl, ra dremeno ar haliriad-mañ pell diouzin ! Evelato, nann evel ma fell din-me, med evel ma fell dit-te ! » ⁴⁰ Dond a ra beteg e ziskibien, hag o havoud kousket. Lavared a ra da Bèr : « Evel-se, n’ho-peus ket bet nerz a-walh da veilla ganin, e-pad eun eurvez nemetken ? ⁴¹ Beillit ha pedit, evid na gouezot ket en tentadur ! Birvidig eo ar spered, dinerz avad eo ar horv. »

⁴² Evid an eil gwech, ez a pelloh da bedi : « Ma Zad, emezañ, ma n’eo ket posubl e tremenfe an dra-mañ heb din e eva, ra vo greet da volontez ! » ⁴³ Dond a ra en-dro hag o havoud kousket, rag ponnerreet e oa o daoulagad. ⁴⁴ O lezel a ra, mond kuit adarre, ha pedi evid an trede gwech, en eur lavared ar memez komzou. ⁴⁵ Neuze e teu war-zu e ziskibien hag e lavar dezo : « Bremañ, kouskit ha diskuizit ! Setu : tost eo an eur ma vo roet mab an den etre daouarn ar beherien… ⁴⁶ Dihunit ! Deom ! Setu m’eo tost an hini hag am roio ! »

Pok Judaz

⁴⁷ O komz ema-eñ c’hoaz pa zegouez Judaz, unan euz an daouzeg, ha gantañ eur boblad-tud niveruz o tougen klezeier ha bizier, euz perz ar veleien-veur ha kozidi ar bobl.

⁴⁸ An hini hag a zo o vond d’e werza e-neus roet dezo eur zin, en eur lavared : « An hini a roin eur pok dezañ, hennez eo. Tapit krog ennañ ! » ⁴⁹ Kerkent e tosta ouz Jezuz, en eur lavared : « Salud, rabbi ! » hag e ro eur pok dezañ. ⁵⁰ Jezuz a lavar dezañ : « Ma mignon, evid an dra-ze emaout amañ ! » Tostaad a reont neuze, taoler o daouarn war Jezuz, ha tapoud krog ennañ.

An taol kleze

⁵¹ Ha setu unan euz ar re a zo gand Jezuz oh astenn e zorn, hag o tihouina e gleze. Skoi a ra gand servicher ar beleg-meur, ha troha dezañ beg e skouarn. ⁵² Neuze e lavar Jezuz dezañ : « Lak da gleze en e blas en-dro. Rag an oll hag a gemer ar hleze a vo kollet dre ar hleze. ⁵³ Pe kavoud a ra dit ne hellan ket erbedi ma Zad ? Hag e kasfe din dioustu daouzeg strollad êlez. ⁵⁴ Penaoz e vefe neuze sevenet ar skridou hag a lavar eo red d’an traou beza evel-se ? » ⁵⁵ D’an eur-ze e lavar Jezuz d’ar bobl : « E-giz evid eun torfetour oh deut er-mêz, gand klezeier ha bizier, da dapoud krog ennon. Bemdez e oan azezet, o kelenn en templ, ha n’ho-peus ket tapet krog ennon. ⁵⁶ Kement-mañ a hoarvez evid ma vo sevenet skridou ar brofeted. » E leze} a ra neuze an oll ziskibien, ha tehed a reont kuit.

E ti ar beleg-meur

⁵⁷ Ar re o-deus tapet krog e Jezuz, e gas da di Kaifaz, ar beleg-meur, el leh m’eo bodet ennañ ar skriverien hag ar gozidi. ⁵⁸ Pèr a ya war e lerh, a-bell, beteg porz ar beleg-meur. Ha mond a ra e-barz da azeza gand ar vevelien, evid gweled ar fin.

Tevel a ree

⁵⁹ Ar veleien-veur hag ar zanhedrin a-bez a glaske eur falstesteni a-eneb Jezuz, evide lakaad d’ar maro. ⁶⁰ Ne gavont tra ebed e-touez ar falstestou niveruz hag a dosta. ⁶¹ A-benn ar fin, e teu daou : « Hemañ, emezo, e-neus lavaret : “Bez’ e hellan distruja santual Doue, hag e lakaad en e zao, a-benn tri devez !” » ⁶² Sevel a ra ar beleg-meur ha lavared dezañ : « Ne respontez netra d’ar pez a desteniont a-eneb dit ? » ⁶³ Med tevel a ree Jezuz.

« Ha bez’ out-te Mab Doue ? »

Hag e lavar ar beleg-meur dezañ : « Da aspedi a ran, dre an Doue beo : lavar deom ha te eo ar Hrist, Mab Doue ? » ⁶⁴ Jezuz a respont dezañ : « Henn lavared a rez-te ! Koulskoude e lavaran deoh : hiviziken e welot mab an den, azezet en tu dehou d’ar Galloud, hag o tond war goabrennou an neñv. »

⁶⁵ Neuze e rog ar beleg-meur e zillad, en eur lavared : « Blasfemet e-neus ! Peseurt ezomm oneus c’hoaz da gaoud testou ? Setu m’ho-peus klevet ar blasfem bremañ ! ⁶⁶ Petra ’zoñjit c’hwi ? » Respont a reont : « Meritoud a ra ar maro ! »

« Gra da brofet ! »

⁶⁷ Neuze e tufont war e veg, hag e roont skouarnadou dezañ. ⁶⁸ E skourjeza a ra reou all, en eur lavared : « Gra da brofet evidom, Krist ! Piou e-neus skoet ganit ? »

Kana a ra eur hillog

⁶⁹ Pèr a oa azezet en diavêz, er porz. Tostaad a ra eur vatez outañ : « Te ive, emezi, a oa gand Jezuz ar Galilean. » ⁷⁰ Med naha a ra-eñ, dirag an oll, en eur lavared : « N’ouzon ket petra a lavarez ! » ⁷¹ Krogi a ra da vond er-mêz, war-zu an nor-borz. Unan all e wel hag hi da lavared d’ar re a zo eno : « Hemañ a oa gand Jezuz an Nazorean. » ⁷² Hag adarre e nah-eñ, en eur doui : « N’anavezan ket an den. » ⁷³ Eun tammig goude, e tosta ar re a oa eno hag e lavaront da Bèr : « E gwirionez, te ive a zo en o zouez ; forz penaoz, gwerzet out dre da bouez-mouez ! » ⁷⁴ Neuze e krog da doui gand mil malloz : « N’anavezan ket an den ! » Ha kerkent e kan eur hillog.

⁷⁵ Ha dond a ra soñj da Bèr euz ar pez e-noa Jezuz lavaret : « A-raog ma kano eur hillog, az-po ma nahet teir gwech. » Mond a ra er-mêz, ha gouela c’hwero.

Pennad seiz warn-ugent

Kaset da Pilat

¹ Deut ar mintin, en em vod an oll veleien-veur ha kozidi ar bobl, en eur huzul a-eneb Jezuz, evid e lakaad d’ar maro. ² E liamma a reont, e gas ganto, hag e roi da Bilat, ar gouarnour.

Judaz a ya d’en em grouga

³ Neuze e wel Judaz, an hini hag e ro, eo Jezuz kondaonet. Deut keuz dezañ, e kas ar peziou arhant en-dro ⁴ d’ar veleien-veur ha da gozidi ar bobl : « Pehet em-eus, emezañ, en eur roi eur gwad divlam. » Lavared a reont : « Petra a ra an dra-ze deom-ni ? Dit eo da weled ! » ⁵ Stlepel a ra ar peziou arhant er zantual, tehed kuit, ha mond d’en em grouga.

⁶ Ar veleien-veur a gemer ar peziou arhant : « N’eus ket aotre, emezo, d’o zaoler e teñzor an templ, rag priz ar gwad int. » Kuzulia a reont kenetrezo, ha prena Park ar Poder, evid sebelia an dud estren. ⁸ Setu perag eo anvet ar park-se : Park ar Gwad, beteg hirio. ⁹ Neuze eo deut da wir komzou ar profet Jeremi : « Kemer a reont an tregont pez arhant, priz ar pez a oa-eñ bet istimet, istimet gand bugale Izrael, ¹⁰ hag o roi evid Park ar Poder, evel m’e-neus an Aotrou lavaret din. »

« Ha bez’ out-te roue ar Juzevien ? »

¹¹ Lakeet eo Jezuz dirag ar gouarnour. Ober a ra ar gouarnour goulennou outañ : « Te, emezañ, ha bez’ out-te roue ar Juzevien ? » Respont a ra Jezuz : « Henn lavared a rez ! »

¹² Tamallet eo gand ar veleien-veur hag ar gozidi, med ne responte netra.¹³ Neuze e lavar Pilat dezañ : « Ne glevez ket ? Ped testeni a zougont a-eneb dit ! » ¹⁴ Ne responte-eñ netra, ger ebed, ken m’eo souezet-braz ar gouarnour.

Barabaz

¹⁵ Da beb gouel, e oa ar gouarnour kustum da zieubi eur prizoniad d’an dud, an hini a felle dezo. ¹⁶ Bez’ o-doa neuze eur prizoniad brudet, Barabaz e ano. ¹⁷ En em voda a reont eta ; hag e lavar Pilat dezo : « Pehini a fell deoh e tieubin ? Barabaz pe Jezuz, anvet ar Hrist ? » ¹⁸ Rag gouzoud a ree e oa dre warizi o-doa e roet. ¹⁹ E-pad ma oa azezet war e gador-varn, e lak e wreg kemenn dezañ : « Ra vo netra, emezi, etrezout-te hag an den digabluz-se ! Rag gouzañvet em-eus kalz hirio, en eun huñvre, en abeg dezañ. »

« Ra vo staget ouz eur groaz ! »

²⁰ Ar veleien-veur hag ar gozidi a lak an dud da houlenn Barabaz, ha da gas Jezuz da goll. ²¹ Komz a ra ar gouarnour, o lavared dezo : « Pehini euz an daou-mañ ho-peus c’hoant e tieubin deoh ? » Respont a reont : « Barabaz ! » ²² Ha Pilat da lavared dezo : « Petra ’ta a rin gand Jezuz, anvet ar Hrist ? » Respont a reont oll : « Ra vo staget ouz eur groaz ! – ²³ Med, emezañ, peseurt droug eta e-neus-eñ greet ? » Youhal a reont muioh c’hoaz, en eur lavared : « Ra vo staget ouz eur groaz ! »

²⁴ Gweled a ra Pilat n’eus netra d’ober, med ema kentoh an tousmah o sevel. Kemer a ra dour, gwalhi e zaouarn dirag ar bobl, ha lavared : « Divlam on e-keñver ar gwad-mañ. Deoh da weled ! » ²⁵ Hag ar bobl a-bez da respont : « Ra vo e wad warnom, emezo, ha war or bugale ! » ²⁶ Neuze e tieub Barabaz dezo, hag e ro Jezuz evid ma vo staget ouz eur groaz, goude e lakaad da veza skourjezet.

Ar gurunenn spern

²⁷ Soudarded ar gouarnour a zegas Jezuz ganto neuze er pretordi, ha boda a reont ar gohortenn en he fez. ²⁸ O veza e ziwisket, e taolont eur vantell ruz-moug warnañ. ²⁹ Lakaad a reont war e benn eur gurunenn spem, plezet ganto, hag eur gorzenn en e zorn dehou. O koueza war o daoulin, e reont goap anezañ, en eur lavared : « Salud dit, roue ar Juzevien ! » ³⁰ Tufa a reont warnañ, hag o kemer ar gorzenn, e skoont war e benn. ³¹ P’o-deus greet goap anezañ, e tiwiskont e vantell digantañ, hag e lakont e zillad warnañ.

Simon a Ziren

E gas a reont evid beza staget ouz ar groaz. ³² En eur vond er-mêz, e kavont eun den, euz Siren, anvet Simon. Hennez a gemeront, evid ma tougo kroaz Jezuz. ³³ Dond a reont d’al leh anvet Golgota, da lavared eo Leh ar Glopenn, ³⁴ ha gwin kemmesket gand bestl a roont dezañ da eva.

Jezuz ouz ar groaz

³⁵ Goude beza e staget ouz ar groaz, e lodennont e zillad, en eur denna d’ar zort, ³⁶ hag ez azezont eno evid evezia outañ. ³⁷ Lakaad a reont e abeg-tamall, skrivet a-uh d’e benn : « Hemañ eo Jezuz, roue ar Juzevien. » ³⁸ Neuze e stagont ouz eur groaz daou dorfetour gantañ, unan d’an tu dehou, unan all d’an tu kleiz.

³⁹ E vallozi a ree an dremenidi, en eur heja o fenn : ⁴⁰ « Te, emezo, hag a zistruj ar zantual hag e zav a-benn tri devez, en em zavete, te da-unan ! Mard out Mab da Zoue, diskenn neuze euz ar groaz ! » ⁴¹ Er memez mod, e ree ar veleien-veur goap anezañ. Gand ar skriverien hag ar gozidi, e lavarent : ⁴² « Reou all e-neus saveteet, ha ne hell ket en em zavetei, eñ e-unan ! Roue Izrael eo-eñ ? Ra ziskenno bremañ euz ar groaz hag e kredim ennañ ! ⁴³ Lakeet e-neus e fiziañs e Doue : da hemañ d’e zieubi bremañ, ma ’z eo karet gantañ ! Rag lavaret e-neus : “Bez’ on-me Mab da Zoue.” » ⁴⁴ An dorfetourien, staget ouz eur groaz en e gichenn, e gunujenne en eun doare heñvel.

Jezuz a varv war ar groaz

⁴⁵ Adaleg ar c’hwehved eur, e tiskenn eun deñvalijenn war an douar a-bez, beteg an naved eur. ⁴⁶ War-dro an naved eur, e laosk Jezuz eur griadenn vraz : « Eli ! Eli ! emezañ, lema sabachtani ? » pe c’hoaz : « Ma Doue ! Ma Doue ! Perag az-peuz ma dilezet ? »

⁴⁷ Klevet eo gand ar re a zo eno hag e lavaront : « Hemañ a halv Eliaz. » ⁴⁸ Dioustu e red unan anezo, e kemer eur spouenn, he leugn gand gwinegr, he lak en-dro d’eur gorzenn, hag e ro dezañ da eva. ⁴⁹ Ar re all a lavar : « Lez ! Gwelom hag-eñ e teuio Eliaz d’e zavetei. » ⁵⁰ Adarre e laosk Jezuz eur griadenn vraz, hag e rente spered.

⁵¹ Ha setu m’eo roget gouel ar zantual e daou damm, euz ar penn uhella beteg an traoñ. Krena a ra an douar, hag ar vein da faouta. ⁵² Ar beziou a zigor, hag adsavet ez eus kalz euz korvou ar zent eet da anaon. ⁵³ Dond a reont er-mêz euz ar beziou, goude e adsao, antreal er gêr zantel, hag en em ziskouez da galz a dud.

⁵⁴ Aon braz e-neus ar hantener hag ar re all a zo gantañ o tiwall Jezuz, pa welont ar hren-douar, hag an traou all c’hoarvezet. Lavared a reont : « E gwirionez e oa hemañ Mab da Zoue ! »

⁵⁵ Bez’ e oa eno meur a vaouez o selled a-bell. Heuliet o-deus Jezuz adaleg Bro-Halile, evid e zervicha. ⁵⁶ En o zouez : Mari-Madalen, Mari mamm da Jakez ha da Jozef, ha mamm mibien Zebede.

Ar beziadur

⁵⁷ Deut an noz, e tegouez eun den pinvidig euz Aritmati, anvet Jozef. Eñ ive a zo deut da veza eun diskib da Jezuz. ⁵⁸ Mond a ra da gaoud Pilat, ha goulenn korv Jezuz. Neuze e kemenn Pilat e roi dezañ. ⁵⁹ Jozef a gemer ar horv, e bak en eul liñser hlan, ⁶⁰ hag e lak en eur bez nevez, bet kleuzet gantañ en eur roh. Ruilla a ra eur mên braz dirag toull ar bez, ha mond kuit. ⁶¹ Bez’ e oa eno Mari-Madalen hag ar Vari all, azezet dirag ar bez.

Siellet eo ar mên

⁶² D’an devez war-lerh, goude an Aozidigez, en em vod ar veleien-veur hag ar farizianed e ti Pilat. ⁶³ Lavared a reont : « Aotrou, deut ez eus soñj deom e-neus an toueller-ze lavaret, pa oa beo c’hoaz : “A-benn tri devez eh adsavin.” ⁶⁴ Kemenn eta ma vo diwallet ar bez, en eun doare sur, beteg an trede deiz, gand aon na zeufe e ziskibien d’e laerez, ha da lavared d’ar bobl : “Adsavet eo a-douez ar re varo ! “An douelladenn-mañ a vefe gwasoh eged an hini genta. » ⁶⁵ Respont a ra Pilat dezo : « Bez’ ho-peus gwarded ! Kit, diwallit ar bez, en eun doare sur, evel ma ouzoh ! » ⁶⁶ Mond a reont ha diwall ar bez en eun doare sur : siellou a lakont war ar mên, ha gwarded dirazañ.

Pennad eiz warn-ugent

« Adsavet eo ! »

¹ Goude ar zabad, da darz an deiz kenta euz ar zizun, e teu Mari-Madalen hag ar Vari all da weled ar bez. ² Ha setu eur mell kren-douar, rag eun êl d’an Aotrou a ziskenn euz an neñv, a dosta, a ruill ar mên a-gostez, hag a azez warnañ. ³ E zoare a zo evel eul luhedenn, hag e zillad gwenn evel an erh. ⁴ Gand ar spont razañ, e krog ar warded da grena, hag e teuont da veza evel maro.

⁵ Komz a ra an êl d’ar merhed : « Evidoh, emezañ, bezit dizaon : goud a ran emaoh o klask Jezuz hag a zo bet staget ouz ar groaz. ⁶ N’ema ket amañ, rag adsavet eo, evel m’e-noa lavaret. Deuit ha gwelit al leh ma oa bet lakeet ennañ. ⁷ It buan da lavared d’e ziskibien : “Adsavet eo a-douez ar re varo ! Setu m’ema-eñ en ho raog e Bro-Halile : eno e vo gwelet ganeoh.” Setu : lavaret em-eus deoh. » ⁸ Kuitaad a reont buan ar bez, ha gand aon ha levenez vraz, e redont da gas kelou d’e ziskibien.

« Kit da gemenn d’am breudeur ! »

⁹ Ha setu m’en em gav Jezuz ganto, en eur lavared : « Salud deoh ! » Tostaad a reont outañ, krogi en e zreid, ha stoui dirazañ. ¹⁰ Neuze e lavar Jezuz dezo : « Bezit dizaon ! Kit da gemenn d’am breudeur mond da Vro-Halile : eno e vin gwelet ganto. »

Ar warded a resev arhant

¹¹ E-pad m’emaint o vond, setu ma teu lod euz ar warded e kêr, da zegas kelou d’ar veleien-veur euz kement a zo bet c’hoarvezet. ¹² Ar re-mañ en em vod gand ar gozidi, evid delher kuzul kenetrezo. Ha kalz arhant a roont d’ar warded, en eur lavared dezo : ¹³ « C’hwi a lavaro : “E ziskibien a zo deut e-kreiz an noz hag o-deus e laeret, pa oam-ni kousket.” ¹⁴ Ha ma vefe klevet an dra-ze gand ar gouarnour, e teufem a-benn d’e hounid, ha d’ho lakaad da veza dineh. » ¹⁵ Kemer a reont an arhant hag ober e-giz m’eo bet kelennet dezo. Hag en em skignet eo bet ar homzou-ze e-touez ar Juzevien, beteg bremañ.

« Bez’ emaon ganeoh »

¹⁶ Mond a ra an unneg diskib da Vro-Halile, war ar menez merket dezo gand Jezuz. ¹⁷ E weled a reont, ha stoui dirazañ. Med lod anezo a jom en entremar. ¹⁸ Jezuz a dosta hag a gomz dezo : « Peb galloud, emezañ, a zo bet roet din-me, en neñv ha war an douar. ¹⁹ It eta ! Grit diskibien gand an oll vroadou, ha badezit-i en ano an Tad, hag ar Mab, hag ar Spered Santel ! ²⁰ Deskit dezo delher kement am-eus gourhemennet deoh ! Ha setu m’emaon-me ganeoh bemdez, beteg fin ar bed. »