Pennad pemp

Diaouled ha moh

¹ Mond a ra beteg an tu all d’ar mor, e bro ar Jerazenianed. ² Pa oa diskennet Jezuz euz ar vag, en em gav dirazañ dioustu, o tond euz ar beziou, eun den gantañ eur spered dihlan. ³ Ober a ra e annez er beziou. Ha gand eur jadenn zoken, ne hell den ebed ken e liamma. ⁴ O veza m’o-doa e liammet aliez, gand ereou ha chadennou, e-noa tarzet ar chadennou ha torret an ereou. Ha den n’e-neus an nerz d’e zuja. ⁵ Heb ehan, noz-deiz, er beziou hag er meneziou, ema o krial hag oh en em vloñsa gand mein.

⁶ O weled Jezuz euz a-bell, e tired hag e stou dirazañ. Hopal a ra ha lavared gand eur vouez kreñv : « Petra ’zo ahanout din, Jezuz, mab da Zoue, an Uhel-Meurbed ? ⁷ Da aspedi a ran, dre Zoue, n’am zrubuill ket ! » ⁸ Rag lavared a ree Jezuz dezañ : « Deus er-mêz, spered dihlan, e-mêz an den-ze ! » ⁹ Goulenn a ra digantañ : « Da ano-dit ? ». Hag eñ da respont dezañ : « Strollad eo ma ano, rag kalz emaom. »

¹⁰ E aspedi a ra da jom heb o has er-mêz euz ar vro. ¹¹ Ha bez’ e oa e-kichenn ar menez eur mell bandennad-voh o peuri. ¹² E aspedi a reont, en eur lavared : « Kas ahanom er moh, evid ma ’z afem enno. » ¹³ O lezel a ra da vond. Hag o tond er-mêz, ez a ar sperejou dihlan e-barz ar moh. Diruilla a ra an tropell euz lein an tornaod d’ar mor, war-dro daou vil anezo : beuzet int er mor.

¹⁴ O mesaerien a ya kuit da gas kelou da dud kêr ha da re ar mêziou. ¹⁵ Dond a reont da weled petra ’zo c’hoarvezet. Tostaad a reont ouz Jezuz ha selled ouz an den bet gantañ an droug-spered, azezet, gwisket, yah en e spered, eñ hag e-noa bet ar strollad. Hag aon a grog enno. ¹⁶ Ar re o-deus gwelet a gont dezo petra ’zo c’hoarvezet gand den e zroug-spered ha gand ar moh. ¹⁷ Ha krogi a reont da aspedi Jezuz da vond kuit euz o bro.

« Embann ar pez e-neus Doue greet evidout »

¹⁸ Pa bign Jezuz er vag, e houlenn digantañ an den e-noa bet an droug-spered mond d’e heul. ¹⁹ Jezuz n’e lez ket da zond med lavared a ra dezañ : « Kerz d’ar gêr, daved da dud, hag embann dezo ar pez e-neus an Aotrou greet evidout ha penaoz e-neus bet truez ouzit. » ²⁰ Mond a ra kuit ha krogi da embann, en Deg-Kêr, kement e-neus Jezuz greet evitañ. Ha souezet eo an oll dud.

Pedenn Jair

²¹ Goude m’e-neus Jezuz treizet gand ar vag, beteg an tu all, en em vod eur boblad-tud niveruz en e gichenn : bez’ ema war vord ar mor. ²² Ha dond a ra unan euz pennou-braz ar zinagogenn, Jair e ano. Ouz e weled, e kouez e-harz e dreid, ²³ hag e aspedi a ra kalz, en eur lavared : « Ma merh vihan a zo war he diwezadou. Deus da lakaad da zaouarn warni, evid ma vo saveteet ha ma vevo. » ²⁴ Mond a ra gantañ, hag eur boblad-tud niveruz a ya d’e heul, oh en em starda endro dezañ.

Ar vaouez pareet

²⁵ Eur vaouez he-doa eur holl-gwad, abaoe daouzeg vloaz. ²⁶ Ha kalz he-deus gouzañvet gand meur a vedisin ; dispignet he-deus heh oll beadra, hep tamm mad ebed : gwasoh ez a kentoh.

²⁷ O veza klevet ano euz Jezuz, e teu-hi e-touez an dud dre a-dreñv, hag e touch ouz e zillad. ²⁸ Rag lavared a ra-hi enni heh-unan : « Ma touchan ouz e wiskamant d’an nebeuta, e vin saveteet. » ²⁹ Dioustu eo dizehet he mammenn-wad hag anaoud a ra en he horv ema-hi pareet euz he droug.

³⁰ Kerkent e oar Jezuz, ennañ e-unan, ez eus sortiet eur galloud dioutañ. Distroi a ra daved an dud ha lavared : « Piou e-neus touchet ouzin ? » ³¹ Hag e ziskibien da respont dezañ : « Sell ! Ema an dud oh en em starda en-dro dit hag e lavarez : “Piou e-neus touchet ouzin ?” »

³² Med selled a ra tro-dro dezañ evid gweled an hini he-doa henn greet. ³³ Spontet hag o krena, dre ma oar-hi ar pez a oa c’hoarvezet ganti, e teu hag e kouez ar vaouez dirazañ, en eur lavared dezañ ar wirionez a-bez. ³⁴ Eñ a lavar dezi : « Merh, da feiz he-deus da zaveteet. Kerz e peoh ha bez pareet euz da zroug ! »

Adsevel a ra ar verh

³⁵ E-pad m’edo c’hoaz o komz, e teu tud euz ti penn ar zinagogenn da lavared : « Maro eo da verh. Perag skuiza c’hoaz ar mestr ? » ³⁶ Med Jezuz, o veza tapet o homzou, a lavar da vestr ar zinagogenn : « N’az-pet ket aon ! Kred, tra ken ! »

³⁷ Ne lez den ebed da zond gantañ, nemed Pèr, Jakez ha Yann, breur da Jakez. ³⁸ Dond a reont da di mestr ar zinagogenn, ha selled ouz ar cholori : gouela a reont ha krial forz hirvoudou. ³⁹ Antreal a ra ha lavared dezo : « Perag ober seurt cholori ha gouela ? Ar plahig n’eo ket maro, med kousket eo. » ⁴⁰ Ha goap a reont anezañ. Med eñ, o lakaad an oll er-mêz, a gemer gantañ tad ar plahig, he mamm hag ar re a oa gantañ, hag ez a d’al leh m’ema ar plahig ennañ. ⁴¹ Kemer a ra he dorn ha lavared dezi : « Talitha koum ! » ar pez a vez troet : « Plahig, me a lavar dit, war-zao ! « ⁴² Sevel a ra ar plahig dioustu ha bale, rag daouzeg vloaz e oa. Kerkent e chomont sabatuet gand eur spont braz. ⁴³ Kemenn a ra kalz dezo na ouezfe den ebed kement-se, ha lavared roi dezi da zebri.