Pennad unneg

Oh antreal e Jeruzalem

¹ Pa ’z int deut tost da Jeruzalem, war-dro Betfaje ha Betani, e-kichenn Menez-an-Olivez, e kas-eñ daou euz e ziskibien, ² hag e lavar dezo : « It beteg ar gêriadenn dirazoh ? Dioustu en eur vond-tre, e kavot eun azenig staget ha n’eus bet den ebed c’hoaz azezet warnañ. Distagit ha degasit-eñ. ³ Ma lavar unan bennag deoh : “Perag emaoh oh ober an dra-ze ?” respontit : “An Aotrou e-neus ezomm anezañ, hag e zegaso en-dro bremaig”. »

⁴ Mond a reont ha kavoud eun azenig, staget e-kichenn an nor, en diavêz war ar strêd. ⁵ E zistaga a reont. Ha lod euz ar re a zo aze a lavar dezo : « Petra emaoh oh ober, o tistaga an azenig-se ? » ⁶ Respont a reont evel m’e-neus Jezuz lavaret, ha lezet int da vond. ⁷ An azenig a zegasont da Jezuz hag e lakont o mantilli warnañ. Azeza a ra-eñ warnañ.

⁸ Kalz tud a led o mantilli war an hent, ha lod all bodou glaz, trohet ganto er parkeier. ⁹ Ar re a zo en e raog hag ar re o tond a-dreñv a youh :

« Hozanna ! Benniget an hini a zeu en ano Doue !
¹⁰ Benniget ar rouantelez o tond, hini on tad David !
Hozanna e barr an neñvou ! »

¹¹ Antreal a ra e Jeruzalem, hag e-barz an templ, en eur zelled ouz pep tra tro-war-dro. Diwezad eo dija an eur ha mond a ra er-mêz, war-zu Betani, gand an daouzeg.

Ar wezenn-fiez villiget

¹² D’an devez war-lerh, p’emaint o kuitaad Betani, e teu naon dezañ. ¹³ Gweled a ra eur wezenn-fiez, deliou dezi. Tostaad a ra : daoust ha ma kavfe eun dra bennag warni ? O tond e-kichenn, ne gav netra, rag n’eo ket mare ar fiez. ¹⁴ Ha komz a ra, o lavared : « Biken ken, ne zebro den ebed euz da frouez ! » Klevet eo ar homzou-ze gand an diskibien.

Kas a ra ar varhadourien e-mêz an templ

¹⁵ Dond a reont da Jeruzalem. O vond en templ, e krog-eñ da daoler er-mêz ar re a zo o werza hag o prena e-barz. Cheñch a ra penn da daoliou an drokerien ha da gadoriou ar werzerien-goulmed. ¹⁶ Ha ne lez den ebed da zougen tra-pe-dra dre an templ.

¹⁷ Kelenn a ra an dud ha lavared : « Daoust ha n’eo ket skrivet : “Anvet e vo ma Zi eun Ti a bedenn evid an oll vroadou” ? Ha c’hwi ho-peus greet toull al laeron anezañ ». ¹⁸ Ar veleien-veur hag ar skriverien a glev an dra-ze hag e klaskont penaoz e gas da goll. Med aon o-deus, rag skoet eo ar boblad-tud a-bez gand e gelennadurez. ¹⁹ Pa dostee an noz ez eent er-mêz euz kêr.

Ar wezenn-fiez dizehet

²⁰ D’ar mintin, en eur dremen dre eno, e welont ar wezenn-fiez, dizehet adaleg he gwriziou. ²¹ Dond a ra soñj da Bèr hag eñ da lavared : « Rabbi, sell ! Dizehet eo ar wezenn-fiez az-peus milliget. »

²² Respont a ra Jezuz, o lavared dezo : « Ho-pet feiz e Doue ! 23 Amen, lavared a ran deoh, an neb a lavarfe d’ar menez-mañ : “Bez dibradet ha taolet er mor !”, heb douetañs en e galon med o kredi e c’hoarvezo ar pez a lavar, e vo greet an dra-ze evitañ. ²⁴ Ha setu ma laran deoh : kement tra a houlennit en eur bedi, kredit ho-peus e resevet. Ha deoh e vo! »

Pedenn ha pardon

²⁵ « Ha pa vezit war-zav o pedi, m’ho-peus eun dra bennag a-eneb eun den, pardonit, evid ma vo pardonet deoh ive ho pehejou gand ho Tad a zo en neñv. ²⁶ Med, ma ne bardonit ket, c’hwi, ho Tad euz an neñv kennebeud ne bardono ket deoh ho pehejou. »

« Piou e-neus roet dit ar galloud-se ? »

²⁷ Dond a reont en-dro da Jeruzalem. P’ema o vale en templ, e teu davetañ ar veleien-veur, ar skriverien hag ar gozidi. ²⁸ Hag int da lavared dezañ : « Dre beseurt galloud e rez kement-mañ ? Pe c’hoaz, piou e-neus roet dit ar galloud d’ober kement-mañ ? »

²⁹ Jezuz a lavar dezo : « Ober a rin-me eur goulenn diganeoh, unan hepken, hag e lavarin deoh dre beseurt galloud e ran kement-mañ : ³⁰ badiziant Yann, ha bez’ e oa a-berz an neñv pe aberz an dud ? Respontit din. » ³¹ Prederia a reont kenetrezo, o soñjal : « Ma lavarom : “A-berz an neñv”, e lavaro : “Perag n’ho-peus ket kredet enni ?” ³² Med ma lavarom : “A-berz an dud” » … o-deus aon rag ar bobl, peogwir eo Yann kemeret evid eur profet gand an oll. ³³ Hag o respont da Jezuz, e lavaront : « N’ouzom ket. » Jezuz a lavar dezo : « Me kennebeud, ne lavarin ket deoh dre beseurt galloud e ran kement-mañ. »