Eil sizunvez war ar bloaz (B)

Euz ar 14 d’an 20 a viz Genver 2024

Eil sul war ar bloaz (B)

Yn 1, 35-42

³⁵ An deiz war-lerh, e oa Yann adarre er memez leh gand daou euz e ziskibien. ³⁶ O veza sellet ouz Jezuz o tond hag o vond, e lavaras :

— « Setu Oan Doue ».

³⁷ Kleved a reas an daou ziskib kement-se, ha mond da heul Jezuz. ³⁸ Distrei a reas Jezuz outo, hag en eur weled e oant o tond d’e heul, e lavaras :

— « Petra emaoh o klask ? »

Respont a rejont dezañ :

— « Rabbi ! (da lavared eo : Mestr), e peleh emaout o chom ? »

³⁹ Lavared a reas dezo :

— « Deuit ha gwelit ».

Mond a rejont gantañ hag e weljont e peleh e oa o chom, hag e chomjont gantañ en deiz-se. War-dro peder eur e oa.

⁴⁰ Bez’ e oa Andre, breur Simon-Pèr, unan euz an daou ziskib o-doa klevet Yann-Vadezour, hag eet neuze da heul Jezuz.

⁴¹ En em gaoud a reas da genta gand Simon e vreur, hag e lavaras dezañ :

— « Kavet on-eus ar Mesiaz (da lavared eo : ar Hrist). ⁴² Hag e kasas anezañ da gaoud Jezuz. O veza sellet outañ, e lavaras Jezuz :

— « Te eo Simon, mab da Yann ; bez’ e vo « Kefaz » da ano (da lavared eo : Pèr).

Lun

Mk 2, 18-22

¹⁸ Eun devez ma oa diskibien Yann hag ar Farizianed oh ober yun, e teuas tud da houlenn ouz Jezuz :

— « Perag ne yun ket da ziskibien dit-te, evel ma ra diskibien Yann ha re ar Farizianed ? »

¹⁹ Respont a reas Jezuz :

— « Daoust ha deread eo da gompagnuned an dén-nevez ober yun e-keid ha m’ema ganto ? Keid ha m’ema an dén-nevez ganto, n’eus tu e-béd dezo da ober yun.

²⁰ « Dond a raio eun amzer a-vad, ma vo lamet an dén-nevez diganto ; en deiz-se e raint yun.

²¹ « Ne zeu dén e-béd da beñselia eur gwiskamant koz gand eun tamm peñsel nevez ; a-hend-all, e sach ar peñsel nevez war an danvez koz hag e rog anezañ gwasoh.

²² « Pe c’hoaz, ne laka dén e-béd gwin nevez e seier-lèr koz. A-hend-all, gand ar gwin e teu ar zeier-lèr da darza ; kollet e vez ar gwin koulz hag ar zeier-lèr. Evid gwin nevez, seier-lèr nevez ».

Meurz

Mk 2, 23-28

²³ Eun devez sabat, e oa Jezuz o vond dre barkajou gwiniz. Ha dre ma’z eent, e kutuille e ziskibien pennou éd. ²⁴ Lavared a ree ar Farizianed :

— « Sell ’ta petra ema da ziskibien oh ober da zeiz ar zabat ! Eun dra difennet ».

²⁵ Respont a reas Jezuz dezo :

— « Ha n’ho-peus ket lennet morse ar pez a reas David, pa oa en diénéz ha naon dezañ, ha d’an dud a oa gantañ ?

²⁶ Mond a reas e ti Doue, en amzer ha ma oa Abiatar ar Beleg-Braz : drebi a reas baraennou ar hinnig, ha n’eus nemed ar veleien hag o-deus urz da zrebi anezo, hag e roas ive d’ar re a oa gantañ ».

²⁷ Lavared a ree Jezuz dezo c’hoaz :

— « Greet eo bet ar zabat evid an dud, ha n’eo ket an dud evid ar zabat ; ²⁸ Abalamour da-ze, eo Mab an Dén mestr war ar zabat zokén ».

Merher

Mk 3, 1-6

¹ Eur wech, ez eas Jezuz en eur zinagogenn. Bez’ e oa eno eun dén, dezañ eun dorn dizehet.

² War evez e oa an dud o klask gouzoud hag-eñ e rafe ar pare da zeiz ar zabat ; evid kaoud digarez da damall anezañ.

³ Lavared a reas Jezuz d’an dén dizeh e zorn :

— « Sao en da zav, amañ dirag an oll ».

⁴ Neuze, e lavaras d’an dud :

— « Hag aotre a zo d’eun deiz sabat da ober ar mad, pe da ober an droug ? da zavetei e vuhez da unan bennag, pe da laza anezañ ? »

Chom a reent sioul avad.

⁵ Neuze, o taoler warno eur zell a gounnar, e oe poaniet gand ar hriz ma oa o halon, hag e lavaras d’an dén :

— « Astenn da zorn ».

Henn astenn a reas, hag e teuas ar pare d’e zorn.

⁶ Eur wech eet er-mêz, en em glevas ar Farizianed gand ar re a-du gand Herodez a-eneb Jezuz, evid klask an tu da lakaad anezañ d’ar maro.

Yaou

Mk 3, 7-12

⁷ En em denna a reas Jezuz gand e ziskibien war bord ar mor. Deuet e oa d’e heul tud e-leiz euz Bro-Halilea, euz Bro-Judea ive, ⁸ hag euz Jeruzalem. Euz Bro-Idumea hag euz an tu all d’ar Jordan, euz tro-war-droiou Tir ha Sidon ive e teuas tud e-leiz beteg ennañ, diwar ar vrud euz kement a ree.

⁹ Goulenn a reas Jezuz digand e ziskibien delher eur vag prést evitañ, rag kement a dud a oa ma oa gwasket ganto. ¹⁰ Ken stank e oa an dud e-noa pareet, m’en em daole warnañ, evid touch outañ, ar re a oa taget gand kleñved pe gleñved.

¹¹ Pa welent anezañ, en em daole ar sperejou hudur, e-harz e dreid, hag e youhent :

— « Mab Doue out ».

¹² Med urz a roe dezo groñs da jom heb lakaad anezañ da veza anavezet gand dén e-béd.

Gwener

Mk 3, 13-19

¹³ Sevel a reas Jezuz war ar menez, hag e halvas ar re a felle dezañ. Dond a rejont d’e gaoud. ¹⁴ Dibab a reas daouzeg da jom gantañ, ha da veza kaset da brezeg, ¹⁵ gand ar galloud da argas an droug-sperejou.

¹⁶ Dibab a reas eta an daouzeg : Pèr, an ano roet gantañ da Zimon. ¹⁷ Jakez mab Zebede, ha Yann breur Jakez, anvet o-daou gantañ Boanergez, da lavared eo : paotred ar gurun. ¹⁸ Andre, Filip, Berteleme, Maze, Tomaz, Jakez mab Alfe, Simon ar gredeg, ¹⁹ ha Judaz Iskariot, hennez end-eün an hini a werzas Jezuz.

Sadorn

Mk 3, 20-21

²⁰ Dond a reas Jezuz d’ar gêr, hag adarre e oa leun a dud war e dro, ken na helle dén drebri eun tamm bara zokén.

²¹ Pa glevas tud e famill kement-se, e teujont beteg ennañ evid kas anezañ ganto, rag lavared a reent : « Kollet eo e benn gantañ ».