C’hwehved sizunvez warn-ugent war ar bloaz (B)

Euz an 29 a viz Gwengolo d’ar 5 a viz Here 2024

C’hwehved sul warn-ugent war ar bloaz (B)

Mk 9, 38-43.45.47-48

³⁸ Lavared a ree Yann, unan euz an Daouzeg, da Jezuz :

— « Mestr, gwelet on-eus eun dén o kas kuit an droug-sperejou en da ano ; harzet on-eus outañ, rag n’ema ket gand ar re a zo a-du ganeom ».

³⁹ Respont a reas Jezuz :

— « Arabad herzel outañ, rag an hini a ra eur burzud en va ano, ne hell ket lavared droug ouzin kerkent war-lerh. ⁴⁰ An hini n’ema ket a-eneb deom, a zo a-du ganeom ».

⁴¹ « Piou bennag a roio deoh da eva eur werennad dour, ablamour ma ’z oh diskibien d’ar Hrist, e gwirionez e lavaran deoh, ne gollo ket e rekompañs ».

⁴² « An hini a lak da behi unan bennag euz ar re vihan-mañ a gréd ennon, e vefe gwelloh staga ouz e houzoug eur mên-milin a vez lakeet da drei gand an azened, ha stlapa anezañ er mor.

⁴³ « Ha ma vez da zorn o tougenn ahanout d’ar pehed, troh anezañ, rag gwelloh eo dit antreal mogn er vuhez peurbaduz, kentoh eged koueza gand da zaou zorn er « jehenn », en tan na varv ket.

⁽⁴⁴⁾⁴⁵ Ma vez da droad o tougenn ahanout d’ar pehed, troh anezañ, rag gwelloh eo dit mond kamm d’ar vuhez peurbaduz, eged beza stlapet gand da zaou droad er « jehenn ».

⁽⁴⁶⁾⁴⁷ « Ha ma vez da lagad o tougenn ahanout d’ar pehed, tenn anezañ kuit, rag gwelloh eo dit mond born e Rouantèlèz Doue, eged beza stlapet gand da zaou lagad er « jehenn », ⁴⁸ el leh m’ema ar preñved na varvont ket hag an tan na zeu ket da vouga.

Lun

Lk 9, 46-50

⁴⁶ Sevel a reas trouz etre an diskibien evid gouzoud pehini anezo a oa ar brasa ?

⁴⁷ O houzoud petra a zoñjent, e kemeras Jezuz eur paotrig ; lakaad a reas anezañ en e-gichenn, ⁴⁸ hag e lavaras :

— « An neb a zigemer ar bugel-mañ em ano, am digemer, me va-unan. Hag an neb am digemer, a zigemer an hini on bet kaset gantañ. Rag an hini bihanna en ho-touez, hennez eo ar brasa ».

⁴⁹ Lavared a reas Yann, unan euz an Daouzeg, da Jezuz :

— « Mestr, gwelet on-eus eun dén o kas kuit droug-sperejou en da ano ; miret on-eus outañ da ober kement-se, peogwir ne zeu ket ganeom d’az heul ».

⁵⁰ Respont a reas Jezuz dezañ :

— « Na virit ket outañ : an neb n’ema ket a-eneb deoh, a zo a-du ganeoh ».

Meurz 1a a viz Here
Santez Tereza ar Mabig Jezuz

Mz 18, 1-4

¹ Tostaad a reas an diskibien ouz Jezuz, hag e lavarjont dezañ :

— « Piou ’ta eo ar brasa e Rouantèlèz Doue ? »

² Neuze, e halvas Jezuz eur bugelig ; lakaad a reas anezañ dirazo, ³ hag e tiskêrias :

— « E gwirionez, e lavaran deoh : ma ne jeñchit ket evid dond da veza heñvel ouz ar vugale, ne ’z eot ket e Rouantèlèz Doue. ⁴ Med an hini en em lakaio izel evel ar bugel-mañ, hennez eo ar brasa e Rouantèlèz Doue.

Meurz

Lk 9, 51-56

⁵¹ O veza ma oa o tostaad an amzer evid Jezuz da veza douget d’an Neñv, ez eas en hent, youl ennañ, war-zu Jeruzalem.

⁵² Kas a reas kannaded en e-raog. Mond a reas ar re-mañ en hent ha digouezoud en eur vourhadenn Samaritaned, evid reñka kement a oa réd. ⁵³ Med ne fellas ket da re-mañ digemer anezañ, abalamour ma oa o vond war-zu Jeruzalem.

⁵⁴ O kleved kement-se, e lavaras Jakez ha Yann, diskibien dezañ :

— « Aotrou, ma kerez, e roim urz d’an tan da ziskenn euz an neñv evid distruja anezo ».

⁵⁵ Trei a reas Jezuz war-zu enno, ha gourdrouz anezo. ⁵⁶ Hag ez ejont d’eur vourhadenn all.

Merher 2 a viz Here
An Êlez Santel

Mz 18,1-5.10

¹ Tostaad a reas an diskibien ouz Jezuz, hag e lavarjont dezañ :

— « Piou ’ta eo ar brasa e Rouantèlèz Doue ? »

² Neuze, e halvas Jezuz eur bugelig ; lakaad a reas anezañ dirazo, ³ hag e tiskêrias :

— « E gwirionez, e lavaran deoh : ma ne jeñchit ket evid dond da veza heñvel ouz ar vugale, ne ’z eot ket e Rouantèlèz Doue. ⁴ Med an hini en em lakaio izel evel ar bugel-mañ, hennez eo ar brasa e Rouantèlèz Doue. ⁵ Hag an hini a zigemer, em ano, eur bugel evel hemañ, a zigemer ahanon me va-unan.

¹⁰ « Diwallit da zisprizoud hini e-béd euz ar re vihan-mañ, rag, lavared a ran deoh : ema o êlez en Neñv o daoulagad o para dalhmad war va Zad hag a zo en Neñvou ».

Yaou

Lk 10, 1-12

¹ E touez e ziskibien, e tibabas Jezuz daouzeg ha tri-ugent all, hag e kasas anezo, daou-ha-daou, en e-raog, da vond e kement kêr ha kement leh m’ e-noa e-unan da vond enno. ² Lavared a reas dezo :

— « Braz eo an eost, med micherourien a zo nebeud anezo. Pedit eta mestr an eost, ma kaso micherourien da ober an eost.

— ³ « It en hent ; setu ma kasan ahanoh evel deñved e-touez bleizi. ⁴ Na gasit ganeoh na yalh, na sah, na sandalennou.

Arabad chom en hent da zaludi dén e-béd. ⁵ E kement ti ma ’z eot ennañ, lavarit da genta : Peoh d’an ti-mañ. ⁶ Ma ’z eus eno eun dén a beoh, e tiskenno ho peoh warnañ. Ma n’eus ket, e teuio deoh en-dro.

⁷ « Chomit er memez ti. Debrit hag evit euz ar péz a vo roet deoh, rag gounid a ra ar micherour e voneiz. Arabad deoh mond euz eun ti d’egile.

⁸ « E kement kêr ma ’z eot, hag ho-po enni digemer vad, debrit ar péz a vo kinniget deoh. ⁹ Roit ar pare d’ar re glañv a vo er gêr-ze, ha lavarit dezo : Deuet eo beteg ennoh Rouantèlèz Doue.

¹⁰ « Med e kement kêr ma ’z eot, ha ne vo ket greet digemer deoh, it war ar plasennou, ha lavarit d’an dud : ¹¹ « Ho poultrenn zokén, staget ouz on treid, a dennom kuit hag a laoskom ganeoh. Med intentit koulskoude : deuet eo tost ouzoh Rouantèlèz Doue ». ¹² Lavared a ran deoh : D’an deiz diweza, ne vo ket barnet ken kriz Sodom hag ar gêr-ze.

Gwener 4 a viz Here
Sant Frañsez a Asiz

Mz 11, 25-30

²⁵ En amzer-ze, e lavaras Jezuz :

— « Va Zad, Mestr an neñv hag an douar, meuleudi a roan dit : kement az-peus kuzet ouz an dud fur ha speredeg, zo bet roet ganit da anaoud d’ar re vihannig. ²⁶ Ya, va Zad, plijet eo bet dit ober evel-se.

²⁷ « Gand va Zad eo bet roet din kement a zo ; ne anavez dén ar Mab nemed an Tad, ha dén ne anavez an Tad nemed ar Mab, hag an hini a blij d’ar Mab rei dezañ da anaoud ».

²⁸ « Deuit d’am haoud, c’hwi hag a zo skuiz, c’hwi hag a blég dindan ho samm, ha me a roio deoh diskuiz.

²⁹ Kemerit warnoh va yeo. Deuit d’ar skol ganin, rag me zo dous hag izel a galon, ha c’hwi a gavo gras evidoh-c’hwi hoh-unan. ³⁰ Ya, êz eo va lezenn da heulia, ha skañv ar zamm a roan da zougenn ».

Gwener

Lk 10, 13-16

Lavared a ree Jezuz en eur gomz d’an daouzeg diskib ha tri-ugent :

¹³ « Gwaz-a-ze dit Korazaïn ! Gwaz-a-ze dit Betsaida ! Rag ma vije bet en em gavet e Tir hag e Sidon ar burzudou en em gavet en o touez, o-defe troet o halon ouz Doue abaoe pell ’zo, gwisket gand sehier hag azezet war al ludu.

¹⁴ « Ya, da Zeiz ar Varn, e vo skañfoh ar zetañs evid Tir ha Sidon, ha ma vo evidoh-c’hwi.

¹⁵ « Ha te, Kafarnaom, daoust ha savet e vezi beteg an Neñv ? Ne vezi ket, diskenn a ri beteg bro ar maro.

¹⁶ « An hini a zelaou ahanoh, me eo a zelaou ; an hini a ya a-eneb deoh, a-eneb din eo ez a ; hag an hini a ya a-eneb din, a-eneb d’an hini on bet kaset gantañ, eo ez a ».

Sadorn 5 a viz Here, Sant Maoriz, abad
Memor e Eskoptiou Kemper ha Sant-Brieg

Mz 7, 21-25

Bodet e ziskibien en-dro da Jezuz war ar menez, e lavare dezo :

²¹ « N’eo ket kement hini a lavar din : « Aotrou ! Aotrou ! » eo a yelo e Rouantèlèz an Neñvou, med an hini a ra bolontez va Zad a zo en neñvou.

²² « En deiz-se, e lavaro din kalz a dud : « Aotrou ! Aotrou ! daoust ha n’eo ket en da ano eo on-eus komzet ? ha n’eo ket en da ano eo on-eus kaset kuit an droug-sperejou ? ha n’eo ket en da ano eo on-eus greet kalz burzudou ? »

²³ « Disklêria a rin dezo neuze : « N’em-eus biskoaz anavezet ahanoh. Kit pell diouzin, c’hwi hag a ra an droug. ²⁴ Evel-se, ez eo heñvel an hini a zelaou va homzou hag a heuill anezo, ouz eun dén a skiant vad, savet ti gantañ war ar garreg. ²⁵ Deuet eo ar glao, diruillet o-deus ar stèriou, c’hwezet o-deus an aveliou war an ti gand kounnar. N’eo ket pilet en e boull, diazezet ma oa war ar roh.

Sadorn

Lk 10, 17-24

¹⁷ Laouen braz e teuas en-dro an daouzeg diskib ha tri-ugent, hag e lavarent :

— « Aotrou, plega deom a ra an diaouled o-unan en da ano ».

¹⁸ Lavared a reas Jezuz dezo :

— « Gweled a reen Satan o koueza euz an neñv evel eur flamm-tan. ¹⁹ Roet am-eus deoh galloud da vale war an naered hag ar hruged, ha da drehi oll nerz an enebour, heb na hellfe noazoud deoh.

²⁰ « Koulskoude, n’eo ket abalamour ma sent ouzoh ar sperejou eo ho-peus da veza laouen, med abalamour m’eo sknvet hoh ano en Neñvou ».

²¹ D’an ampoent, e tridas kalon Jezuz gand al levenez er Spered-Santel, hag e lavaras :

— « Va Zad, Mestr an neñv hag an douar, meuleudi a roan dit : kement az-peus kuzet ouz an dud fur ha speredeg, a zo bet roet ganit da anaoud d’ar re vihannig. Ya, va Zad, plijet eo bet dit ober evel-se.

²² « Gand va Zad eo bet roet din kement a zo ; ne anavez dén ar Mab nemed an Tad, ha dén ne anavez an Tad nemed ar Mab, hag an hini a blij d’ar Mab rei dezañ da anaoud ».

²³ O trei neuze war-zu e ziskibien, e lavaras dezo en o fart-o-unan :

— « Eüruz an daoulagad a wél ar péz a welit. ²⁴ Rag lavared a ran deoh : Stank eo bet ar brofeted hag ar rouaned o-deus bet c’hoant gweled kement a welit-c’hwi, ha n’o-deus ket gwelet, kleved kement a glevit, ha n’o-deus ket klevet ».