Gouel ar Zakramant ha naved sizunvez war ar bloaz (B)

Euz an 2 d’ar 8 a viz Mezeven 2024

Gouel ar Zakramant

Mk 14, 12-16.22-26 (B)

¹² Da zeiz kenta gouel ar Bara-Dihoell, ma veze lazet an Oan-Pask, e houlennas an diskibien outañ :

— « Peleh ez-peus c’hoant ez afem da bourchas kement a zo réd evid ma vo debret ar Pask ganit ? »

¹³ Kas a reas neuze daou euz e ziskibien, hag e lavaras dezo :

— « It beteg kêr ; en em gaoud a reot gand eun dén o tougen war e benn eur podad dour : ¹⁴ it d’e heul, hag e-barz an ti ma ’z aio ennañ, lavarit d’ar perhenn : « Lavared a ra ar Mestr kement-mañ evidout : E peleh ema ar zal ma hellin debri enni ar Pask gand va diskibien ? »

¹⁵ « Diskouez a raio deoh eur zal, war an neh, frank ha kempennet. Lakit aze evidom kement a zo réd ».

¹⁶ Mond a reas an diskibien kuit, hag ez eont e kêr. Kavoud a rejont pep tra evel ma oa bet lavaret dezo ; neuze e oe pourchaset ganto ar Pask.

²² E-pad ar préd, e kemeras Jezuz bara, hag o veza lavaret ar vennoz, e torras anezañ ha rei anezañ d’e ziskibien, en eur lavared :

— « Kemerit, va Horv eo kement-mañ ».

²³ Kemer a reas ive eur haliriad gwin. O veza lavaret ar vennoz, e roas anezañ dezo, hag oll eh evjont anezañ. ²⁴ Hag e lavaras dezo :

— « Va Gwad eo kement-mañ, gwad an Emgleo, skuillet evid e-leiz a dud. ²⁵ E gwirionez, e lavaran deoh, ne evin ket mui euz frouez ar winienn, beteg an deiz ma ’h evin anezañ, nevez, e Rouantèlèz Doue ».

²⁶ Goude beza kanet ar Zalmou, ez ejont da Venez an Olived.

Lun

Mk 12, 1-12

¹ Staga a reas Jezuz da gomz dre barabolennou d’ar Veleien-Vraz, d’ar Skribed ha d’ar Re Goz :

— « Planta eur winïeg a reas eun dén. Lakaad a reas eur harz en-dro dezi, kleuza enni eur presouar ha sevel eun tour. Goude-ze, e roas anezi diouz feurm da winierien hag ez eas da veaji.

² « Deuet ar mare, e kasas eur zervicher da gaoud ar winierien evid kaoud diganto e lod euz frouez ar winïeg. ³ Med kregi a reas ar re-mañ ennañ, skei gantañ ha kas anezañ kuit gand netra.

⁴ « Eur zervicher all a gasas dezo c’hoaz. Hemañ ive o-deus skoet gantañ war e benn ha dismeganset anezañ.

⁵ « Unan all a gasas c’hoaz, hag e oe lazet hemañ ganto ; ha goude, kalz re all ; lod a oe skoet ganto ha lod all lazet.

⁶ Chom a ree gantañ unan c’hoaz : e vab muia-karet. Kas a reas anezañ war-zu enno, e-giz kannad diweza, en eur lavared ennañ e-unan : « Douja a raint da va mab ».

⁷ « Lavared a reas a-vad ar winierien-ze kenetrezo :

— « Ar pennhér eo hemañ : deom dehi ! lazom anezañ, hag e vo an heritaj deom-ni ».

⁸ « Tapoud krog a rejont ennañ, laza anezañ, hag e oe stlapet ganto er-mêz euz ar winieg.

⁹ « Petra a raio mestr ar winieg ? Dond a raio, kas a raio ar winierien d’ar maro, ha fizioud ar winieg e tud all.

¹⁰ « N’ho-peus ket lennet ar pennad-mañ euz ar Skritur ?

« Deuet eo ar mên taolet kuit gand ar re a zave ti, da veza ar mên-korn : ¹¹kement-se eo labour an Aotrou, hag eun dra vurzuduz eo evidom-ni ! ».

¹² Klask a ree Pennou-Braz ar Bobl tapoud krog ennañ, med aon o-devoa rag an dud. Intentet mad o-doa e oa evito eo e-noa lavaret ar barabolenn-ze. Neuze en eur laosker anezañ, ez ejont kuit.

Meurz

Mk 12, 13-17

¹³ Kas a reas ar Veleien-Vraz, ar Skribed hag ar Re Goz lod euz Farizianed ha lod euz tud a-du gand Herodez, da gaoud Jezuz, evid tapoud anezañ war gomz pe gomz. ¹⁴ Deuet e oant da lavared dezañ :

— « Mestr, gouzoud a reom ez out eun dén gwirion ; ne rez forz euz dén e-béd, rag ne zellez ket ouz reñk an dud, med kelenn a rez hent Doue hervez ar wirionez. Hag aotre a zo, pe n’eus ket, da baea taillou da Zezar, an impalaer ? Daoust ha paea a rañkom, pe get ? »

¹⁵ Med Eñ, anad dezañ o zrubardèrèz, a lavaras dezo :

— « Perag emaoh o klask paka ahanon ? Diskouezit din eur péz-arhant ma welin ! »

¹⁶Diskouez a rejont unan dezañ. Neuze e lavaras Jezuz dezo :

— « Euz piou eo ar skeudenn hag al lizerennou ? »

— « Euz Sezar, emezo ».

¹⁷ Lavared a reas Jezuz dezo :

— « Rentit eta, da Zezar kement a zo da Zezar, ha da Zoue kement a zo da Zoue ».

Hag e choment souezet braz diwar e benn.

Merher

Mk 12, 18-27

¹⁸ Dond a ra Saduseaned da gaoud Jezuz (lavared a ra ar re-ze n’eus ket a adsao da veo). Hag e rejont ar goulenn-mañ outañ :

¹⁹— « Mestr, skrivet e-neus Moizez evidom kement-mañ : ma c’hoarvez da vreur unan bennag mervel en eur laosker e wrég, med heb bugel e-béd avad, e rañko eur breur dezañ dimezi gand an intañvez evid sevel lignez d’e vreur. ²⁰ Bez’ e oa seiz breur. Dimezi a reas ar henta hag e varvas dishèr. ²¹ Dimezi a reas an eil breur gand an intañvez hag e varvas hep lezel bugale kennebeud. An trede, kemend-all. ²² Ha ne laoskas, hini e-béd euz ar zeiz breur, bugel ebéd war e lerh. A-benn ar fin, war-lerh an oll, e varvas ive ar wrég. ²³ Da vare an adsao, pa adsavint a varo da veo, da behini anezo e vo-hi gwrég, peogwir o-deus bet anezi da wrég o zeiz ».

²⁴ Respont a reas Jezuz dezo :

— « Daoust ha n’oh ket dihenchet dre ma ne anavezit ket ar Skrituriou na galloud Doue ? ²⁵ Pa adsaver a varo da veo, ne gemerer na gwrég na gwaz, med heñvel e vezer ouz êlez en Neñvou.

²⁶ « Ha diwar-benn adsao ar re varo da veo, ha n’ho-peus ket lennet e leor Moizez, e pennad ar « bod-spern entanet », penaoz e-neus lavaret Doue dezañ : « Bez’ ez on-me Doue Abraham, Doue Izaag, Doue Jakob ? » ²⁷ N’eo ket Eñ Doue an dud varo, med Doue ar re veo. Dihenchet oh a-grenn ».

Yaou

Mk 12, 28b-34

²⁸ Tostaad a reas eur skrib ouz Jezuz, hag e houlennas outañ :

— « Pehini eo ar henta euz an oll hourhemennou ? »

²⁹ Respont a reas Jezuz :

— « An hini kenta eo : Selaou Izrael, an Aotrou on Doue, n’eus Aotrou e-béd nemetañ. ³⁰ Kared a ri an Aotrou da Zoue, a-greiz da galon, gand da oll ene, da oll spered ha da oll nerz.

³¹ Hag an eil eo hemañ : Kared a ri da nesa eveldout-te da unan. N’eus ket brasoh gourhemenn eged ar re-ze ».

³² Neuze, e lavaras ar skrib dezañ :

— « Mad-tre, Mestr ! Gwir eo ar péz az-peus lavaret : N’ez eus nemed eun Doue, ha n’eus hini all e-béd nemetañ. ³³ Kared anezañ a-greiz kalon gand an oll nerz hag an oll spered, ha kared an nesa eveldor an unan a dalv muioh eged an oll brovou ha sakrifisou ».

³⁴ O weled e-noa an dén-ze greet eur respont fur, e lavaras Jezuz dezañ :

— « N’emaout ket pell diouz Rouantèlèz Doue ».

Ha ne grede mui dén e-béd ober goulennou outañ.

Gwener
Gouel-meur Kalon-Zakr Jezuz

Yn 19, 31-37 (B)

³¹ Bez’ e oa derhent ar Pask (da lavared eo : ar gwener). Arabad neuze e chomfe ar horvou ouz ar groaz da zeiz ar zabat, hag e oa ar zabat-se unan braz. Rag-se e houlennas ar Juzevien digand Pilat ma vefe torret dezo o diwesker, ha ma vefent lammet kuit.

³² Mond a reas ar zoudarded da derri o diwesker d’an hini kenta ha goude-ze d’an eil, euz an daou a oa bet staget ouz ar groaz war eun dro gand Jezuz. ³³ Digouezet dirag Jezuz, o weled e oa dija maro, ne oe ket torret e ziwesker dezañ, ³⁴ med toulla a reas unan euz ar zoudarded e gostez da Jezuz, gand e hoaf ; ha raktal e teuas anezañ gwad ha dour.

³⁵ Testeni a ro a gement-se an hini e-neus gwelet, ha gwirion eo e desteni ; hennez a oar e lavar ar wirionez evid ma kredot, c’hwi ive. ³⁶ Rag, c’hoarvezet eo kement-se evid ma teufe da wir ar Skritur : « Askorn e-béd dezañ ne vo torret ». ³⁷ Ha c’hoaz en eul leh all, e lavar ar Skritur : « Selled a raint ouz an hini o-deus treuzet dezañ e gorv ».

Sadorn : Kalon dinamm Mari

Lk 2, 41-51

⁴¹ Bep ploaz, ez ee tud Jezuz da Jeruzalem, da geñver gouel Pask.

⁴² Deuet Jezuz d’e zaouzeg vloaz, ez ejont da Jeruzalem, evel kustum, evid ar gouel.

⁴³ Pa oe echu ar gouel, ez ejont gand an hent war-zu ar gêr. Med chom a reas o mab Jezuz e Jeruzalem, hep gouzoud d’e dud.

⁴⁴ Dre ma kredent edo gand ar re all euz ar gompagnunez, e rejont evel-se eun deveziad hent, araog klask war e lerh e-touez o herentiez hag o anaoudègèz. ⁴⁵ Pa ne gavent ket anezañ, e teujont war o hiz da Jeruzalem, evid klask anezañ.

⁴⁶ A-benn tri devez, e kavjont anezañ en Templ, azezet e-kreiz an Doktored, o selaou anezo hag oh ober goulennou outo. ⁴⁷ Souezet e chome kement hini a gleve anezañ gand e spered hag ar respontou a ree.

⁴⁸ Sebezet e oe e dud o weled anezañ, hag e lavaras e vamm dezañ :

— « Va mab, perag beza greet deom kement-se ? Setu ma oa da dad ha me, leun a enkrez, o klask war da lerh ».

⁴⁹ Lavared a reas dezo :

— « Perag beza klasket ahanon ? Ha ne ouieh ket, eo red din beza e ti va Zad ?»

⁵⁰ Med ne intentjont ket ar péz a lavare dezo.

⁵¹ Mond a reas Jezuz ganto, evid distrei da Nazared, hag e veze dalhmad sentuz outo.

Mired a ree e vamm kement-se oll en he halon.