Trede sizunvez an Azvent

Euz ar 13 d’an 19 a viz Kerzu 2020

Trede sul an Azvent (B)

Yn 1, 6-8. 19-28 (B)

⁶ Bez’ e oe eun dén, kaset gand Doue, Yann oa e ano.
⁷ Dond a reas evid beza test, evid rei testeni d’ar Sklêrijenn, ha ma teufe an oll da gredi drezañ.
⁸ An dén-ze ne oa ket ar Sklêrijenn, med dond a ree evid rei testeni d’ar Sklêrijenn.
¹⁹ Setu amañ testeni Yann-Vadezour, pa oe kaset d’e gaoud euz Jeruzalem, gand ar Juzevien, beleien ha levited da ober outañ ar goulenn-mañ :
— « Piou out-te? »
²⁰ Diskleria a reas, ne nahas ket, diskleria a reas :
— « N’eo ket me eo ar Hrist ».
²¹ Neuze, e houlennjont outañ :
— « Piou out ’ta ? Ha bez’ ez out Elïaz ? »
— « N’on ket », emezañ.
— « Ha bez’ ez out ar Profet, neuze ? »
— « N’on ket » emezañ.
²² Neuze, e lavarjont dezañ :
— « Piou out-te ? ma kasim respont d’ar re o-deus kaset ahanom. Petra a lavarez ahanout-te da-unan ? »
²³ — « Me, emezañ, eo mouez an dén o youhal en dezert : Kempennit an hent d’an Aotrou, evel m’eo bet lavaret gand ar profet Izaïaz ».
²⁴ Farizianed avad e oa lod euz ar re a oa bet kaset. ²⁵ Ober e rejont outañ ar goulenn-mañ c’hoaz :
— « Perag neuze e vadezez, ma n’out nag ar Hrist, nag Elïaz, nag ar Profet ? »
²⁶ Respont a reas Yann dezo :
— « Badezi en dour a ran-me, med en ho-touez, ema an hini ha n’anavezit ket, ²⁷ an hini a zeu war va lerh, ha n’on ket dîn da ziskoulma dezañ lèrenn e zandalennou ».
²⁸ Kement-se a hoarvezas e Betania, en tu all d’ar stèr Jordan, el leh m’edo Yann o vadezi.

Lun

Mz 21, 23-27

²³ Pa oe eet Jezuz e-barz an templ, ez eas beteg ennañ Priñsed ar Veleien ha Pennou-Braz ar bobl, e-pad m’edo o kelenn, hag e lavarjont dezañ : « A-berz peseurt galloud e rez-te kement-se ? Ha piou e-neus roet dit ar galloud-se ? »
²⁴ Respont a reas Jezuz :
— « Mond a ran me ive da ober ouzoh eur goulenn, unan hepkén ; ma roit respont din, e lavarin deoh d’am zro a-berz peseurt galloud e ran an dra-ze.
²⁵ « Badeziant Yann, euz peleh e teue ? Pe a-berz an dud, pe euz an neñv ? »
Soñjal a reent enno o-unan : ma lavarom euz an neñv, e lavaro deom : perag eta n’ho-peus ket kredet ennañ ? ²⁶ Ha ma lavarom a-berz an dud, on-eus da ziwall ouz ar bobl, rag an oll a gemer Yann evid eur profet.
²⁷ Neuze, e respontjont da Jezuz :
— « N’ouzom ket ».
— « Na me, eme Jezuz, ne lavarin ket deoh kennebeud, a-berz peseurt galloud e ran an dra-ze ».

Lun 14 kerzu Sant Yann a Groaz, beleg ha doktor

Lk 14, 25-33

²⁵ Bez’ e oa eur maread a dud oh ober hent gand Jezuz. Distrei a reas war-zu enno ha lavared dezo :
²⁶ –- « An néb a zeu d’am heul hep kared ahanon muioh eged e dad, e vamm, e wrég, e vugale, e vreudeur ha c’hoarezed, hag e vuhez e-unan zokén, hennez ne hell ket beza diskib din.
²⁷ « An hini ne zoug ket e groaz evid dond d’am heul, ne hell ket beza diskib din ».
²⁸ « Pehini ahanoh, c’hoant dezañ sevel eun tour, ne azez ket da genta da ober ar gont euz ar mizou, da weled ha peadra a-walh e-neus da gas al labour da benn ? ²⁹ Rag ma ra an diazez ha n’eo ket gouest da beurechui e labour, e vo greet goap anezañ gand kement hini a welo anezañ, o lavared : ³⁰ « Setu aze eun dén, staget gantañ da zevel eun tour, ha n’eo ket bet gouest da echui al labour ! »
³¹ « Pe c’hoaz : Peseurt roue, o vond da ober brezel d’eur roue all, ha ne azez ket da genta, evid gweled ha gouest eo, gand deg mil dén, da zelher penn ouz an hini a zeu dezañ gand ugent mil ? ³² Ma n’eo ket gouest, e-keid ha m’ema egile pell c’hoaz, e kas kannaded d’e gaoud evid goulenn digantañ ober ar peoh.
³³ « Evel-se eta, an néb piou bennag ahanoh ha ne zilez ket kement a zo dezañ, ne hell ket beza diskib din ».

Meurz

Mz 21, 28-32

Lavared a ree Jezuz d’ar Briñsed ar Veleien ha da Bennou-Braz ar bobl :
²⁸ — « Petra a zoñjit euz kement-mañ ? : Eun dén e-noa daou vab. Mond a reas da gaoud ar henta hag e lavaras dezañ : Va mab, kee da labourad hirio d’am gwinïeg ».
²⁹ Respont a reas :
— « Ne fell ket din ».
Med goudeze, savet keuz gantañ, ez eas.
³⁰ Mond a reas an tad da gaoud egile, hag e lavaras ar memez tra dezañ.
Respont a reas hemañ :
— « Mond a ran, Aotrou ! » Med n’ez eas ket.
³¹ — « Pehini anezo e-neus greet bolontez e dad ? »
Respont a rejont :
-- « An hini kenta ! »
Lavared a reas Jezuz dezo :
— « Mond a ra ar bublikaned hag ar merhed a vuhez skañv, en ho-raog e Rouantèlèz Doue. ³² Rag deuet eo Yann d’ho kaoud o veva hervez ar Justis, ha n’ho-peus ket kredet ennañ. Med, kredet o-deus ennañ ar bublikaned hag ar merhed a vuhez skañv. Ha c’hwi, goude beza gwelet ar pez ho-peus gwelet, n’oh ket deuet da jeñch buhez evid kredi ennañ ».

Merher

Lk 7, 18b-23

Gervel a reas Yann daou euz e ziskibien, hag e kasas anezo da gaoud or Zalver da houlenn outañ : « Daoust ha te eo an hini a rañk dond ? Pe unan all on-eus da hortoz ? »
²⁰ Digouezet e-kichenn Jezuz, e lavarjont dezañ :
— « Yann ar Badezour, e-neus kaset ahanom d’ho kaoud, evid goulenn ouzit : « Daoust ha te eo an hini a rañk dond, pe réd eo deom gortoz unan all ? »
²¹ D’ar mare-ze, e pareas Jezuz kalz a dud euz o hleñvejou, o foaniou, o droug-sperejou, hag e roas ar gweled da veur a zén dall.
²² Goude-ze, e respontas d’ar gannaded :
— « It da lavared da Yann petra ho-peus gwelet ha klevet : gweled a ra ar re zall, kerzed a ra ar re gamm, pareet eo ar re lor, kleved a ra ar re vouzar, adsevel a ra ar re varo da veo, hag ez eo prezeget d’ar beorien ar Helou Mad ; ²³ Hag eüruz an neb, ne vezin ket eur skoill evitañ ».

Yaou (overenn ar 17 a viz Kerzu)

Mz 1, 1-17

¹ Lignez Jezuz-Krist, mab da Zavid, mab da Abraham.
² Tad eo bet Abraham da Izaag, Izaag, da Jakob, Jakob, da Juda ha d’e vreudeur.
³ Juda tad da Farez ha da Zara, dre ar vaouez Tamar. Farez tad da Esron, Esron, da Aram,
⁴ Aram tad da Aminadab, Aminadab, da Naason, Naason, da Zalmon.
⁵ Salmon tad da Vooz, dre ar vaouez Rahab, Booz tad da Obed, dre ar vaouez Ruth, hag Obed, da Jesse,
⁶ Jesse tad d’ar roue David, ha David, tad da Zalomon, dre an hini a oa bet gwrég Uri.
⁷ Salomon, tad da Roboam, Roboam, da Abiaz, Abiaz, da Asaf.
⁸ Asaf, tad da Jozafad, Jozafad, da Joram, Joram, da Oziaz,
⁹ Oziaz, da Joatam, Joatam, da Akaz, Akaz, da Ezekiaz,
¹⁰ Ezekiaz, da Vanase, Manase, da Amon, Amon, da Josiaz.
¹¹ Joziaz, da Jekoniaz ha d’e vreudeur, da vare an harlu e Babilon.
¹² Ha goude an harlu e Babilon, eo bet Jekoniaz, tad da Zalatiel, Salatiel, tad da Zorobabel.
¹³ Zorobabel, tad da Abiud, Abiud, da Eliakim, Eliakim, da Azor.
¹⁴ Azor, tad da Zadok, Sadok, da Akim, Akim, da Eliud,
¹⁵ Eliud da Eleazar, Eleazar, da Vatan, Matan, da Jakob,
¹⁶ Jakob tad da Jozef, pried Mari, an hini a zo bet mamm da Jezuz, anvet ar Hrist.
¹⁷ Bez’ ez eus eta pevarzeg rummad adaleg Abraham beteg David, pevarzeg adaleg David beteg an harlu e Babilon, ha pevarzeg adaleg an harlu e Babilon beteg ar Hrist.

Gwener (overenn an 18 a viz Kerzu)

Mz 1, 18-24

¹⁸ Evel-henn en em gavas ganedigez Jezuz-Krist : dimezet e oa Mari, e vamm, da Jozef, med a-barz m’o-doa bevet asamblez, e c’hoarvezas ganti beza dougéréz, dre vertuz ar Spered-Santel.
¹⁹ Jozef, he fried, dén just anezañ, pa ne felle ket dezañ he dizenori, a lakeas en e benn dispartia diouti dre guz.
²⁰ Trei a ree ar zoñjou-ze en e spered, pa zeuas eun êl d’an Aotrou da bara dirazañ e-kreiz e gousk, hag e lavaras dezañ :
— « Jozef, mab da Zavid, arabad dit kaoud aon o kemer Mari da bried en da di, rag euz ar Spered-Santel eo ar vuhez a zo diwanet enni.
²¹ « Genel a raio eur mab. Rei a ri dezañ an ano a Jezuz (da lavared eo : Salvi a ra an Aotrou), rag eñ eo a zalvo e bobl euz he fehejou ».
²² C’hoarvezoud a reas kement-se, evid ma teufe da wir ar pez e-noa lavaret an Aotrou dre vouez ar Profet :
²³ « Setu ar Werhez o tond da veza dougéréz ; ha genel a raio eur mab a vo anvet Emmanuel, da lavared eo : « Doue ganeom ».
²⁴ Goude beza savet euz e gousk, e reas Jozef evel m’e-noa lavaret Êl an Aotrou dezañ : kemer a reas e bried en e di.

Sadorn (overenn an 19 a viz Kerzu)

Lk 1, 5-25

⁵ En amzer Herodez, roue Bro-Judea, e oa eur beleg anvet Zakarïaz, euz rummad Abia ; e wrég euz lignez Aaron a oa Elizabed heh ano.
⁶ O-daou, e oant just dirag Doue. Heulia a reent direbech oll lezennou ha gourhemennou an Aotrou.
⁷ N’o-doa ket a vugale, difrouez ma oa Elizabed, hag eet e oant o-daou war an oad.
⁸ Ha setu eun deiz e oa Zakarïaz oh ober war dro e garg a veleg dirag Doue, rag deuet e oa tro beleien e rummad d’hen ober. Hervez ar hiz miret gand ar veleien, e oe tennet ar zort ganto, hag evel-se, galvet eñ evid mond e santual an Aotrou, da lakaad ezañs da zevi.
¹⁰ Bez’ e oa ar bobl en he féz o pedi en diavêz, d’an eur ma oad o tevi an ezañs.
¹¹ Dond a reas eun êl d’an Aotrou da bara dirag Zakarïaz, en e-zav en tu dehou da aoter an ezañs. ¹² Strafuillet e oe Zakariaz ouz e weled, hag e oe spontet.
¹³ Med, lavared a reas an êl dezañ :
— « Arabad dit kaoud aon, Zakarïaz, rag selaouet eo bet da bedenn gand an Aotrou Doue. Rei a roio dit da wrég Elizabed eur mab, ha te a roio dezañ an ano a Yann. ¹⁴ Bez’ e vo evidout leh da gaoud joa ha levenez, hag e vo laouen kalz tud gand e hanedigez . ¹⁵ Rag braz e vo-eñ dirag an Aotrou. Ne evo ket a win, nag a voeson, rag azaleg korv e vamm, e vo karget gand ar Spered-Santel. ¹⁶ Lakaad a raio da zistrei ouz Doue kalz euz bugale Izrael. Kerzed a raio e-unan dirag an Aotrou, gantañ spered ha galloud Elïaz, evid distrei kalonou an tadou war-zu o bugale, ha lakaad an dud dizent war hent furnez an dud just, evid sevel d’an Aotrou eur bobl prest evitañ ».
¹⁸ Lavared a reas Zakariaz d’an êl :
— « Penaoz e ouezin eo gwir kement-se ? rag eun dén koz on, ha war an oad eo eet va gwrég ive ».
¹⁹ Respont a reas an êl :
— « Me eo Gabriel ; dalhmad e vezan dirag Doue. Kaset on bet da gomz ouzit, ha da gemenn dit ar helou mad-se. ²⁰ Ha setu ma vezi dilavar, hep gelloud mui komz, beteg ar mare ma c’hoarvezo kement-se oll, ablamour n’az-peus ket kredet em homzou, hag a zeuio da wir d’o amzer ».
²¹ O hortoz Zakarïaz edo an dud, hag e oant souezet o weled e talee e diabarz ar zantual. ²² Pa zeuas er-mêz, ne oa ket evid komz outo. Intent a rejont, e-noa bet eur weledigez er zantual : Ober a ree sinou dezo, med mud e chome.
²³ Echu gantañ e zeveziou-servich, ez eas d’ar gêr. ²⁴ Eur pennad amzer goude-ze, e oa dougéréz e wrég.
E-pad pemp miz, e kuzas Elizabed he stad. Hag e lavare outi heh-unan : ²⁵ « Setu ar péz e-neus greet an Aotrou em heñver ; plijet eo bet gantañ bremañ, teuler eur zell warnon, evid lakaad fin d’ar péz a oa eur véz evidon, dirag an oll dud ».