Euz an 12 d’an 18 a viz Du 2023
Komz a ree Jezuz d’e ziskibien diwar-benn e zonedigez ; lavared a ree ar barabolenn-mañ :
1 « Heñvel e vo Rouantèlèz Doue ouz dég plah yaouank pedet d’eur préd-eured, ha kemeret ganto lampeier evid mond da ziambroug an dén-nevez.
2 « Pemp anezo a oa dizoursi, ha pemp a oa fur. 3 Gand ar pemp dizoursi e oa eet o lampeier, med n’o-doa ket kaset eoul ganto. 4 Gand ar re fur avad e oa eet eoul e-barz podouigou, war eun dro gand o lampeier.
5 « O veza ma oa dale gand an dén-nevez, e teujont oll da voredi ha da gousked.
6 E-kreiz an noz, e savas eur hopadenn :
— « Setu an dén-nevez ! Kit er-mêz da ziambroug anezañ ! »
7 « Neuze, e tihunas an oll blahed yaouank, hag e krogjont da gempenn o lampeier. 8 Goulenn a reas ar re zizoursi digant ar re fur :
— « Roit deom ’ta euz hoh eoul, rag ema on lampeier-ni o vervel ».
9 « Respont a reas ar re fur dezo :
— « Ne raim ket, rag ne vefe biken tra-walh evidom hag evidoh. Kit kentoh da brena evidoh da di ar varhadourien ».
10 « En-dra ma oant o vond da brena, e tigouezas an dén-nevez. Ar re a oa prést a yeas tre gantañ er zal-eured, hag e oe serret an nor. 11 Diwezatoh, e teuas ive ar plahed all, hag e lavarjont :
— « Aotrou ! Aotrou ! digor deom ! »
12 « Med respont a reas dezo :
— « E gwirionez, e lavaran deoh : ne anavezan ket ahanoh ».
13 « Bezit war evéz eta, rag ne ouezit nag an deiz nag an eur ».
1 Lavared a ree Jezuz d’e ziskibien :
— « Ne heller ket miroud ma vefe gwall-skweriou ; med gwaz-a-ze d’an neb a zo penn-kaoz !
2 « Gwelloh e vefe dezañ e vije staget eur mên milin ouz e houzoug, hag e vefe stlapet er mor, kentoh eged beza eur skoill evid unan hepkén euz ar re vihan-mañ.
3 Taolit evez eta ! Ma teu da da vreur da ober eur pehed, gourdrouz anezañ, ha m’e-neus keuz, pardon dezañ. 4 Ma vank ouzit seiz kwech bemdez, ha ma tistro seiz kwech diouz reñk da gaoud ahanout en eur lavared : « Keuz am-eus », pardoni a ri dezañ ».
5 Lavared a reas an ebestel d’an Aotrou :
— « Laka da greski ennom ar feiz ! ».
6 Respont a reas an Aotrou :
— « Ma vefe ken braz ho feiz hag eur hreunenn zezo, e lavarfeh d’ar wezenn-vouar-mañ : « Diframm da wriziou, ha kee da blanta anezo er mor », hag e sentfe ouzoh ».
Lavared a ree Jezuz d’e ziskibien :
7 « Pehini ahanoh, dezañ eur zervicher bet oh arad, pe o vêsa al loened, a lavaro dezañ, pa vo distro euz ar park : « Deus buan ouz taol » ? 8 Daoust ha ne lavaro ket dezañ kentoh : « Aoz din va hoan, ha stard da houriz da zervicha ahanon, ken n’am-bo debret hag evet. Goude-ze, e helli debri, hag eva ».
9 « Daoust hag anaoudègèz vad e-no d’ar zervicher-ze evid beza sentet outañ ?
— 10 « Evel-se, c’hwi ive, greet ganeoh kemend a vo bet gourhemennet deoh, lavarit : « N’om nemed servicherien, o-deus greet nemed ar péz a rañkem ober ».
11 Bez’ e oa Jezuz oh ober hent da vond da Jeruzalem, hag e tremenas war harzou Bro-Zamaria ha Bro-Halilea.
12 Pa oa o tigouezoud en eur gêriadenn, e teuas dég dén lor en arbenn dezañ. Chom a rejont pellig a-walh dioutañ, hag hopal dezañ :
13 — « Mestr Jezuz, ho-pet truez ouzom ! ».
14 Kerkent ha ma welas Jezuz anezo, e lavaras dezo :
— « It d’en em ziskouez d’ar veleien ».
E-keid ha ma oant o vond, e tigouezas dezo beza pareet. 15 Unan anezo, o weled e oa pare, a zeuas war e giz en eur gana meuleudi da Zoue a vouez kreñv. 16 En em deurel a reas, e dal d’an douar, e-harz treid Jezuz, o trugarekaad anezañ. Hogen, eur Zamaritan e oa anezañ.
17 Lavared a reas Jezuz dezañ :
— « Daoust ha n’eo ket bet pareet an dég ? An nao all, e peleh emaint ? 18 N’eus ket bet eta nemed hemañ, eun estren anezañ, da zond en-dro da veuli Doue ».
19 Hag e lavaras dezañ :
— « Sav en da zav ha kerz : da feiz he-deus saveteet ahanout ».
20 Goulenn a reas ar Farizianed ouz Jezuz :
— « Pegoulz eta e teuio Rouantèlèz Doue ? »
Respont a reas dezo :
— « Ne zeu ket Rouantèlèz Doue evel eun dra êz da weled. 21 Ne vo ket lavaret : « Setu, amañ ema ! » pe : « Aze ema ! » Rag en ho-touez ema Rouantèlèz Doue ».
22 Lavared a reas c’hoaz d’e ziskibien :
— « Dond a raio eun amzer hag ho-po c’hoant gweled, pa ne vefe nemed unan euz deiziou Mab an Dén, ha ne vo ket gwelet ganeoh.
23 « Lavaret e vo deoh : « Setu, a-hont ema ! » pe « Setu, amañ ema ! » Arabad deoh mond, na redeg di. 24 Rag evel ma skéd eul luhedenn o tarza, euz an eil penn d’egile d’an oabl, evel-se e vo Mab an Dén da vare e Zeiz.
25 « Med en-araog, e rañko gouzañv poaniou kaled, ha beza distaolet gand ar rummad-mañ.
Lavared a ree Jezuz d’e ziskibien :
26 « Evel ma oe kont e amzer Noe, evel-se ive e vo e amzer Mab an Dén. 27 Bez’ e oa an dud o tebri, oh eva, o kemer gwrég, o kemer gwaz, beteg an deiz ma ’z eas Noe en arh, ha ma teuas an dour-beuz da zistruja anezo oll.
28 « Evel-se e oa ive e amzer Lot : debri, eva, prena, gwerza, planta, sevel tiez a ree an dud. 29 Med d’an deiz ma ’z eas Lot kuit euz Sodom, e kouezas euz an neñv eur gaouad-hlao a dan hag a zoufr a zistrujas anezo oll.
30 « Evel-se e vo kont ive d’an deiz m’en em ziskouezo Mab an Dén.
31 « D’an deiz-se, an hini a vo war al leur-doenn hag a vezo e draou en ti, arabad dezañ diskenn da gerhad anezo, hag an hini a vo er park, arabad dezañ kennebeud distrei war e giz. 32 Dalhit soñj euz gwrég Lot.
33 « An neb a glasko mired e vuhez a gollo anezi, hag an neb a gollo anezi, e vo miret gantañ.
34 « Lavared a ran deoh : En noz-se, e vo daou zén war eur gwele, unan a vo kemeret hag egile lezet. 35 Diou vaouez a vo o vala asamblez : unan a vo kemeret hag e-bén lezet ».
36 37 Neuze, e houlennas an diskibien outañ :
— « E peleh e vo eta, Aotrou ? »
Respont a reas :
— « El leh ma vo ar horv, eno ive en em vodo ar guped ».
1 Lavared a reas Jezuz d’e ziskibien eur barabolenn da gelenn ez eo red pedi dalhmad hep koll kalon :
-– 2 « Bez’ e oa, emezañ, en eur gêr bennag, eur barner ha ne oa ket ennañ tamm doujañs ebed evid Doue ; ne oa ket nehet kennebeud gand an dud.
3 « Bez’ e oa ive er gêr-ze, eun intañvez hag a zeue d’e gaoud o lavared : « Ro eur varnedigez din a-eneb va enebour ».
4 « E-pad hir amzer ne fellas ket dezañ. A-benn ar fin, e lavaras ennañ e-unan : « Daoust ma n’em-eus ket a zoujañs evid Doue, ha daoust ma n’on ket nehet gand an dud, 5 koulskoude, gand ar skuiz ma ’z on eet o kleved anezi, ez an da rei dezi he goulenn, gand aon na zalhfe da derri din va fenn ».
6 « Lavared a reas an Aotrou ouspenn :
— « Selaouit mad ar péz a lavar ar barner disleal-ze. Ha Doue ne rentfe ket justis d’an dud dibabet gantañ, a zo o youhal noz-deiz war-zu ennañ ? Hag ober a ra dezo gortoz ?
7 « Lavared a ran deoh : Ne vezo ket pell evid rei o gwir dezo. 8 Evelato, pa zistroio Mab an Dén, daoust ha kavoud a raio ar feiz war an douar ? »
16 Tostaad a reas eun dén ouz Jezuz o lavared dezañ :
— « Mestr, petra a vad am-eus da ober evid kaoud ar vuhez peurbaduz ? »
17 Respont a reas Jezuz dezañ :
— « Perag e rez goulennou ouzin diwar-benn ar péz a zo mad ? Doue eo an hini a zo mad, ha Doue hepkén ! M’az-peus c’hoant mond er vuhez, mir ar gourhemennou ».
18 — « Pere ? » emezañ.
Respont a reas Jezuz :
– « Ne lazi ket. Ne ri ket avoultriez. Ne laeri ket. Ne lavari ket falz-testeni. 19 Da dad ha da vamm a enori ; hag ive : da nesa a gari eveldout da-unan ».
20 Lavared a reas ar paotr yaouank dezañ :
— « Kement-se am-eus miret penn-da-benn. Petra a vank din c’hoaz ? »
21 Respont a reas Jezuz dezañ :
— « M’az-peus c’hoant beza parfet, kee, gwerz kemend a zo dit, ha ro anezañ d’ar re baour, hag ez-po eun teñzor en neñvou. Goude-ze, deus d’am heul ».
Attention, vous utilisez un navigateur peu sûr !