Trede sizunvez warn-ugent war ar bloaz (A)

Euz an 10 d’ar 16 a viz Gwengolo 2023

Trede sul warn-ugent war ar bloaz (A)

Mz 18, 15-20 (A)

Lavared a ree Jezuz d’e ziskibien :

¹⁵ « Ma teu da vreur dit da vankoud en da geñver, kee da rebech dezañ, etrezoh ho taou, te hag eñ hepkén. Ma selaou ahanout, ez-po gounezet da vreur. ¹⁶ Ma ne zelaou ket ahanout, kemer c’hoaz ganit eun dén all pe zaou, evid ma vo reñket an afer, war lavar daou pe dri dést.

¹⁷ « Ma ne fell ket dezañ selaou anezo, lavar ze d’an Iliz, ha ma ne fell ket dezañ selaou an Iliz kennebeud, ra vo evidout evel eur payan hag eur publikan.

¹⁸ « E gwirionez, e lavaran deoh : kement ho-po liammet war an douar, a vo liammet en Neñv, ha kement ho-po diliammet war an douar, a vo diliammet en Neñv.

¹⁹ « E gwirionez, e lavaran deoh adarre : ma teu da zaou ahanoh war an douar en em gleved evid goulenn eun dra bennag, e vezo roet dezo gand va Zad a zo en Neñvou. ²⁰ Rag pa vez daou pe dri bodet em ano, e vezan eno ganto ».

Lun

Lk 6, 6-11

⁶ Eun deiz sabat all, ez eas Jezuz d’ar zinagogenn, hag e stagas da gelenn. Bez’ e oa eno eun dén seizet e zorn dehou. ⁷ Selled a ree ar Skribed hag ar Farizianed gand evez ouz Jezuz, da weled hag ober a rafe eur pare da zeiz ar zabat, evid kaoud peadra da damall dezañ. ⁸ Anavezoud a ree Jezuz avad, o zoñjou. Lavared a reas d’an dén seizet e zorn :

— « Sav en da-zav, ha deus amañ e-kreiz ».

Sevel a reas, ha chom en e-zav.

⁹ Lavared a reas Jezuz dezo :

— « Goulenn a ran ouzoh : Hag aotre a zo, da zeiz ar zabat, da ober ar mad pe da ober an droug ? da zavetei eur vuhez pe da zistruja anezi ? »

¹⁰ Neuze, goude beza selled outo oll, tro-dro, e lavaras d’an dén :

— « Astenn da zorn ».

Ober a reas, ha pareet e oe e zorn.

¹¹ Evito avad, fuloret braz e oent, hag e komzent kenetrezo da weled petra e hellfent ober da Jezuz.

Meurz

Lk 6, 12-19

¹² En deiziou-ze, en em dennas Jezuz war ar menez da bedi, hag e tremenas an noz penn-da-benn o pedi Doue.

¹³ Deuet an deiz, e halvas e ziskibien, hag e tibabas daouzeg anezo, o rei dezo an ano a Ebestel : ¹⁴ Simon, a roas dezañ an ano a Bèr, Andre e vreur, Jakez, Yann, Filip, Berteleme, ¹⁵ Maze, Tomaz, Jakez mab Alfe, Simon, lesanvet ar « Greduz », ¹⁶ Jud, mab Jakez, ha Judaz Iskariot, an hini a yeas da drubard.

¹⁷ Diskennet ganto, e chomas a-zav en eul leh plên. Eno e oa e-leiz euz e ziskibien, hag eur maread a dud deuet euz Bro-Judea a-béz, euz Jeruzalem, hag euz arvor Tir ha Sidon.

¹⁸ Deuet e oant da gleved anezañ, ha da gaoud ar pare euz o hleñvejou ; pareet e veze ar re a oa gwasket gand sperejou hudur. Hag e klaske an oll touch outañ, rag dond a ree eun nerz anezañ, o rei dezo oll ar pare.

Merher

Lk 6, 20-26

Chomet e oa Jezuz a-zav er gompezenn, hag e oa e-leiz a dud en-dro dezañ.

²⁰ Neuze, o sevel e zaoulagad war-zu e ziskibien, e lavaras :

— « Eüruz oh, c’hwi ar re baour, rag deoh eo Rouantèlèz Doue.

²¹ « Eüruz oh, c’hwi hag ho-peus naon bremañ, rag ho kwalh a vo roet deoh.

« Eüruz oh, c’hwi hag a ouel bremañ, rag c’hoarzin a reot.

²² « Eüruz e vezit, p’o-devez an dud kas ouzoh, pa lakeont ahanoh er-mêz, pa ’z eo dismegañset ha distaolet hoh ano evel disprizuz, abalamour da Vab an Dén.

²³ « Bezit laouen en deiz-se, ha tridit gand ar joa, rag digoll kaer ho-peus da gaoud en Neñv.

« Evel-se ive, e ree o zadou-koz d’ar brofeted ».

²⁴ « Med gwaz-a-ze deoh, tud pinvidig, rag bez’ ho-peus dija ho frealzidigez !

²⁵ « Gwaz-a-ze deoh, c’hwi hag ho-peus ho kwalh bremañ, rag bez’ ho-po naon ! Gwaz-a-ze deoh, c’hwi hag a zo o c’hoarzin bremañ, rag doan ha daelou a vo ho lod !

²⁶ « Gwaz-a-ze deoh, pa vez an oll dud o komz brao diwar ho penn ! Rag evel-se e ree o zadou-koz d’ar falz-profeted ».

Yaou 14 a viz Gwengolo
Gouel ar Groaz Savet

Yn 3, 13-17

¹³ « Dén n’eo savet d’an Neñv, nemed an hini a zo diskennet euz an Neñv, Mab an Dén.

¹⁴ « Evel ma oe savet en uhel an naer arem gand Moïzez, en dezert, evel-se ive e rañko Mab an Dén beza savet en uhel, ¹⁵ evid m’e-no drezañ ar vuhez peurbaduz kement hini a gréd ennañ.

¹⁶ « Ken braz eo bet karantez Doue evid ar béd, m’e-neus roet e Vab unganet evid n’ez aio ket da goll kement hini a gred ennañ, med evid m’e-no ar vuhez peurbaduz.

¹⁷ « Rag Doue e-neus kaset e Vab er béd, n’eo ket evid barn ar béd, med evid ma vo salvet ar béd drezañ ».

Gwener 15 a viz Gwengolo
Gouel Seiz Glahar ar Werhez

Yn 19, 25-27

²⁵ E kichenn kroaz Jezuz, e oa e vamm, ha c’hoar e vamm, Mari, gwrég Kleofaz, ha Mari-Madalen.

²⁶ O weled e vamm, hag en he hichenn an diskib karet gantañ, e lavaras Jezuz dezi :

— « Maouez, setu amañ da vab ».

²⁷ Goude-ze, e lavaras d’an diskib :

— « Setu amañ da vamm ».

Hag diwar an eur-ze, e kemeras an diskib anezi en e di.

Pe : Lk 2, 33-35

³³ Souezet e oa e dad hag e vamm, gand kement a glevent diwar e benn. ³⁴ Rei a reas Simeon e vennoz dezo, hag e lavaras da Vari, e vamm :

— « Setu m’ema ar hrouadur-mañ o kas da goll hag o kas da veza salvet kalz a dud en Izrael ; bez’ e vo eur zîn, hag a lakaio enebiez da zevel war e goust, ³⁵ ken na vo da galon dit-te treuzet gand eur hleze. Evel-se, e vo diskuliet ar zoñjou kuzet e kalon eur halz a dud ».

Sadorn

Lk 6, 43-49

En amzer-ze, e lavare Jezuz d’e ziskibien :

⁴³ « N’eus ket a wezenn vad o rei frouez brein ; nag a wezenn o vreina o rei frouez mad.

⁴⁴ « Anavezet e vez pep gwezenn diouz he frouez : ne vez ket kutuillet fïez war ar spern, na rezin kennebeud war an dréz.

⁴⁵ « An dén mad a denn ar mad euz teñzor mad e galon ; hag an dén fall a denn ar fallentez euz e deñzor fall : rag euz ar galon eo e tarz ar homzou a zeu war ar muzellou.

⁴⁶ « Ha perag eh anvit ahanon : « Aotrou ! Aotrou ! » ha ne rit ket ar péz a lavaran ?

⁴⁷ « Mond a ran da ziskouez deoh ouz piou eo heñvel an hini a zo deuet war-zu ennon, hennez a zelaou va homzou hag a heuill anezo : ⁴⁸ Heñvel eo ouz eun dén o sevel ti : kleuzet e-neus, eet eo don, ha lakeet an diazez war ar roh. Pa ’z eo deuet an doureier braz, eo bet skoet an ti-ze gand ar froud, med n’e-neus ket gellet bralla anezañ, rag savet mad e oa bet.

⁴⁹ « An hini a-vad a zelaou va homzou ha ne zent ket outo a zo heñvel ouz eun dén savet e di gantañ war an douar, hep tamm diazez e-béd. Deuet eo ar froud da skei outañ, ha kerkent ez eo bet dizahet ; diskaret eo bet an ti-ze en e béz ».