Euz an 23 d’an 29 a viz Gouere 2023
24 Rei a reas Jezuz da gleved eur barabolenn all d’an dud :
— « Bez’ ez eo Rouantèlèz an Neñv heñvel ouz eun dén hadet greun mad gantañ en e bark. 25 Med e-pad ma oa kousket an dud, e teuas e enebour ; hada a reas dreog e-touez ar gwiniz, hag ez eas kuit.
26 « Pa greskas ar gwiniz, hag e teuas pennou enno, e tispakas ive an dreog.
27 Mond a reas servicherien ar mestr da lavared dezañ :
— « Mestr, daoust ha n’eo ket greun mad a oa bet hadet ganit en da bark ? Perag eta ez eus dreog ennañ ?»
28 Respont a reas dezo :
— « Eun enebour eo e-neus greet kement-se ».
Lavared a ra ar zervicherien dezañ :
— « Ha c’hoant az-peus ez afem da denna anezañ kuit ? »
29 Respont a ra :
— « Nann, n’it ket, gand aon na zeufeh, en eur denna an dreog, da denna ive ar gwiniz da heul. 30 Laoskit an eil hag egile da greski asamblez beteg an eost. Ha da vare an eost, e lavarin d’an eosterien : « Dastumit da genta an dreog hag erenit anezañ e hordennou evid beza devet ; ar gwiniz a-vad, digasit anezañ em grignol ».
31 Eur barabolenn all a roas Jezuz da gleved d’an dud :
— « Heñvel eo Rouantèlèz Doue ouz eur hreunenn zezo, e-neus eun dén kemeret hag hadet en e bark. 32 Ar bihanna euz an hajou eo. Med p’he-devez kresket, e vez ar brasa euz al legumachou. Sevel a ra da wezenn, ken ne teu al laboused an neñv da neizia en he skourrou ».
33 Eur barabolenn all a lavaras dezo :
— « Heñvel eo Rouantèlèz an Neñv ouz eun tamm goell, kemeret gand eur vaouez, ha sanket e tri vuzuliad bleud, beteg ma vo savet an toaz en e béz ».
34 Kement-se a lavare Jezuz dre barabolennou d’an dud, ha gwech e-béd ne gomze dezo nemed dre barabolennou.
35 Evel-se, e teue da wir ar gomz lavaret gand ar profet : « Komz a rin dre barabolennou, embann a rin traou kuzet abaoe ar penn kenta ».
36 Dilezet an dud gantañ, e teuas Jezuz d’ar gêr. Tostaad a reas e ziskibien outañ o lavared dezañ :
— « Displég deom frêz parabolenn an dreog er park ».
37 Respont a reas :
— « An hini a had ar greun mad eo Mab an Dén. 38 Ar park eo ar béd. Ar greun mad eo bugale ar Rouantèlèz. An dreog eo bugale an Droug. 39 An enebour hadet an dreog gantañ eo an diaoul. An eost eo fin ar béd. An eosterien eo an êlez.
40 « Evel ma vez tennet kuit an dreog da veza lakeet an tan, evel-se ive, e vo kont da fin ar béd. 41 Kaset e vo e êlez gand Mab an Dén, hag e vo tennet kuit ganto euz e Rouantèlèz, kement skwer fall ha kement dén a ra an droug ; 42 Taolet e vezint ganto e-kreiz an tan : eno e vo daelou ha skrignadeg dent. 43 Neuze, e skedo an dud santel evel an heol e Rouantèlèz o Zad. An neb e-neus diskouarn da gleved, ra glevo ! »
38 Lavared a reas lod euz ar skribed hag euz ar Farizianed da Jezuz :
— « Mestr, ni a garfe gweled eur zîn euz da berz ».
39 Respont a reas dezo :
— « Eur zîn a houlenn ar rummad droug hag avoultrer-mañ ; med sîn all e-béd ne vo roet dezañ, nemed sîn ar profet Jonaz. 40 « Rag, evel m’eo chomet Jonaz e kov ar pésk braz e-pad tri devez ha teir nozvez, evel-se e chomo Mab an Dén e korv an douar e-pad tri devez ha teir nozvez.
41 « Da zeiz ar varn, e savo tud Niniv war eun dro gand tud ar rummad-mañ, hag e kondaono anezo, rag troet o-deus o halon ouz Doue diwar prezegennou Jonaz, ha setu ma ’z eus amañ muioh eged Jonaz.
42 « Da zeiz ar varn, e savo rouanez ar Hreisteiz war eun dro gand tud ar rummad-mañ, hag e kondaono anezo, rag deuet eo euz penn pella an douar da zelaou furnez Salomon, ha setu ma ’z eus amañ muioh eged Salomon ».
20 Tostaad a reas ouz Jezuz mamm Jakez ha Yann, paotred Zebede, gand he bugale. Stoui a reas dirazañ evid ober outañ eur goulenn.
21 Lavared a reas Jezuz dezi :
— « Petra az-peus c’hoant ? »
Respont a reas :
— « Setu amañ va daou vab : gourhemenn ma vezint azezet, unan en tu dehou dit, hag egile en tu kleiz, en da rouantèlèz ».
22 Respont a reas Jezuz :
— « N’ouzoh ket petra emaoh o houlenn ! Ha gouest oh da eva ar haliriad ez an da eva ? »
— « Ya, emezo, gouest om ! »
23 Ha Jezuz dezo :
— « Va haliriad, eva a reot anezañ, med, beza azezet a-zehou pe a-gleiz din, me n’on ket evid an dra-ze. Roet e vo ar plasou-ze d’ar re e-neus va Zad kempennet anezo evito ».
24 O kleved kement-se, ez eas an dég all droug enno a-eneb an daou vreur.
Med gervel a reas Jezuz anezo, ha lavared dezo :
25 — « Gouzoud a ouezoh e ra renerien ar poblou payan o mistri warno, hag e lak ar pennou-braz-se o galloud da boueza warno.
26 Ganeoh a-vad, ne vo ket kont evel-se. Er hontrol, an hini ahanoh a glask beza braz en ho touez, ra vo ho servicher deoh. 27 Hag an hini ahanoh a glask beza ar henta, a vo sklav deoh.
28 « Evel-se, n’eo ket deuet Mab an Dén evid beza servichet, med evid servicha, ha rei e vuhez evel dasprén evid an dud ».
Lavared a ree Jezuz d’e ziskibien :
11« — Deoh-c’hwi eo roet da anaoud misteriou Rouantèlèz an neñv.
16 « Eüruz ho taoulagad, peogwir e welont, hag ho tiskouarn, peogwir e klevont. 17 E gwirionez, e lavaran deoh : c’hoant o-deus bet kalz a brofeted hag a dud santel da weled ar péz a welit, ha n’o-deus ket gwelet, da gleved ar péz a glevit, ha n’o-deus ket klevet ».
10 Tostaad a reas an diskibien ouz Jezuz, ha goulenn outañ :
— « Perag e komzez d’an dud dre barabolennou ? »
11 — « Deoh-c’hwi, emezañ, eo roet da anaoud misteriou Rouantèlèz an neñv, med d’ar re-mañ n’eo ket. 12 Roet e vo d’an neb e-neus, hag e vo puill-puill ar péz e-no ; an hini n’e-neus ket, e vo dilamet digantañ ar péz e-neus zokén. 13 Ma komzan dezo dre barabolennou, eo abalamour ma welont hep gweled, ha ma klevont hep kleved nag intent.
14 « Evel-se, e teu da wir evito komzou ar profet Izaïaz :
« Kaer ho-po kleved, ne intentot ket,
« kaer ho-po selled, ne welot ket.
15 « Poud eo deuet da veza spered an dud-se,
« stanket o-deus o diskouarn,
« serret o-deus o daoulagad,
« gand aon na zeufe o daoulagad da weled,
« o diskouarn da gleved,
« o spered da intent,
« o halon da drei ouz Doue,
« – hag e vint pareet ganin ».
16 « Evidoh-c’hwi, eüruz ho taoulagad, peogwir e welont, ho tiskouarn, peogwir e klevont. 17 E gwirionez, e lavaran deoh : c’hoant o-deus bet kalz a brofeted hag a dud santel da weled ar péz a welit, ha n’o-deus ket gwelet, da gleved ar péz a glevit, ha n’o-deus ket klevet ».
16 Mond a reas an unneg diskib da Vro-Halilea, beteg ar menez merket dezo gand Jezuz.
17 O weled anezañ, e stoujont dirazañ ; med lod anezo a jomas diskrédig. 18 Tostaad a reas Jezuz outo, hag e lavaras dezo :
— « Roet eo bet din pep galloud en neñv ha war an douar. 19 Kit eta ! An oll boblou, grit anezo diskibien din : roit dezo ar vadeziant, en ano an Tad, hag ar Mab, hag ar Spered-Santel. 20 Deskit dezo mired kement am-eus gourhemennet deoh. Ha setu m’emaon-me ganeoh a-héd an oll zeveziou beteg fin ar béd ».
38 E-pad ma oa Jezuz hag e ziskibien oh ober hent, e tigouezas dezañ mond en eur gêriadenn, hag e oe digemeret gand eur vaouez, Marta heh ano, en he zi.
39 Bez’ he-doa houmañ eur hoar, Mari heh ano : azezet e oa e-harz treid Jezuz, evid selaou e gomzou, 40 e-keid ha ma oa Marta oh ober war-dro an ti, prés warni e-leiz. Chom a reas a-zav, hag e lavaras :
— « Aotrou, ha n’out ket nehet o weled va hoar o lezel ahanon va-unan da ober ar zervich ? Lavar dezi ’ta, dond da zikour ahanon ».
41 Med, respont a reas an Aotrou dezi :
— « Marta ! Marta ! nehet out ha tregaset gand eur bern traou. Unan hepkén a zo ezomm anezañ. 42 Dibabet he-deus Mari al lodenn wella, ha ne vo ket lamet diganti ».
19 Deuet e oa kalz a Juzevien da weled Marta ha Mari, da ober dezo gourhemennou a gañv evid o breur.
20 Pa glevas Marta e oa Jezuz o tond, ez eas a-benn hent dezañ, e-keit ha ma chome Mari azezet en ti.
21 Lavared a reas Marta da Jezuz :
— « Aotrou, ma vijes bet amañ, ne vije ket marvet va breur. 22 Med bremañ c’hoaz, gouzoud a ran kement-se, petra bennag a houlenni digand Doue, a vo roet dit gantañ ».
23 Respont a reas Jezuz dezi :
— « Sevel a raio da vreur a varo da veo ».
24 — « Gouzoud a ran, a respont Marta, e savo da veo d’an deiz diweza, pa zavo da veo an oll dud varo ».
25 Lavared a reas Jezuz dezi :
— « Me eo an adsav da veo hag ar vuhez ; an neb a gréd ennon – ha pa vefe marvet – a vevo ; 26 ha kement hini a vév hag a gréd ennon, sur ne varvo ket da vikén. Ha kredi a rez kement-se ? »
27 — « Ya, Aotrou, emezi, kredi a ran ez out ar Hrist, Mab Doue, an hini a zo o tond er béd ».
Attention, vous utilisez un navigateur peu sûr !