Kalanna ha sizunvez araog Epifani

Euz ar 1a d’ar 7 a viz Genver 2023

Sul 1a genver 2023
Santez Mari, Mamm Doue (gouel-meur)

Lk 2, 16-21 (ABC)

¹⁶ Pa en em gavas ar bastored e Betleem, e kavjont Mari ha Jozef, hag ar hrouadur gourvezet el laouer.

¹⁷ Goude beza gwelet anezañ, e rojont da houzoud ar pez a oa bet diskleriet dezo diwar-benn ar hrouadur-ze. ¹⁸ Ha souezet e veze an oll re a gleve anezo, gand ar pez a veze kontet dezo gand ar bastored.

¹⁹ Derhel a ree Mari a-vad, en he halon, kement a hoarveze, hag a zoñje enno.

²⁰ En eur vond kuit, e rente ar bastored gloar ha meuleudi da Zoue, evid kement o-doa gwelet ha klevet, hervez ar pez a oa bet lavaret dezo.

²¹ D’an eizvzed devez war-lerh, e teuas ar mare da amdroha ar hrouadur, ha neuze e oe anvet Jezuz, ano bet roet dezañ gand an êl, a-raog ma oe douget e korv e vamm.

Lun 2 a viz genver

Yn 1, 19-28

¹⁹ Setu amañ testeni Yann-Vadezour, pa oe kaset d’e gaoud euz Jeruzalem, gand ar Juzevien, beleien ha levited da ober outañ ar goulenn-mañ :

— « Piou out-te ? »

²⁰ Diskeria a reas, ne nahas ket, diskleria a reas :

— « N’eo ket me eo ar Hrist ».

²¹ Neuze, e houlennjont outañ :

— « Piou out ’ta ? Ha bez’ ez out Elïaz ? »

— « N’on ket », emezañ.

— « Ha bez’ ez out ar Profet, neuze ? »

— « N’on ket », emezañ.

²² Neuze, e lavarjont dezañ :

— « Piou out-te ? ma kasim respont d’ar re o-deus kaset ahanom. Petra a lavarez ahanout-te da-unan ? »

²³ — « Me, emezañ, eo mouez an dén o youhal en dezert : Kempennit an hent d’an Aotrou, evel m’eo bet lavaret gand ar profet Izaïaz ».

²⁴ Farizianed avad, e oa lod euz ar re a oa bet kaset. ²⁵ Ober e rejont outañ ar goulenn-mañ c’hoaz :

— « Perag neuze e vadezez, ma n’out nag ar Hrist, nag Elïaz, nag ar Profet ? »

²⁶ Respont a reas Yann dezo :

— « Badezi en dour a ran-me, med en ho-touez, ema an hini ha n’anavezit ket, ²⁷ an hini a zeu war va lerh, ha n’on ket dîn da ziskoulma dezañ lèrenn e zandalennou ».

²⁸ Kement-se a hoarvezas e Betania, en tu all d’ar stèr Jordan, el leh m’edo Yann o vadezi.

Meurz 3 a viz genver

Yn 1, 29-34

²⁹ O weled Jezuz o tond war-zu ennañ, e lavaras Yann-Vadezour :

— « Setu Oan Doue, an hini a zilam pehed ar béd ! ³⁰ Hemañ eo an hini am-eus lavaret diwar e benn : « War va lerh e teu eun dén hag a zo eet e biou din, rag em-raog e oa anezañ ». ³¹ Ha me ne anavezen ket anezañ ; med deuet on da vadezi en dour evid ma vefe roet da Izrael da anaoud anezañ ».

³² Neuze e roas Yann an testeni-mañ :

— « Gwelet em-eus ar Spered, evel eur goulm, o tiskenn euz an Neñv, hag o chom warnañ. ³³ Ha ne anavezen ket anezañ, med an hini e oan bet kaset gantañ da vadezi en dour, e-noa lavaret din : « An hini a weli ar Spered o tiskenn hag o chom warnañ, hennez eo a vadez er Spered-Santel ».

³⁴ « Ya, gwelet em-eus, hag e roan an testeni-mañ : hennez eo Mab Doue ».

Merher 4 a viz genver

Yn 1, 35-42

³⁵ An deiz war-lerh, e oa Yann adarre er memez leh gand daou euz e ziskibien. ³⁶ O veza sellet ouz Jezuz o tond hag o vond, e lavaras :

— « Setu Oan Doue ».

³⁷ Kleved a reas an daou ziskib kement-se, ha mond da heul Jezuz. ³⁸ Distrei a reas Jezuz outo, hag en eur weled e oant o tond d’e heul, e lavaras :

— « Petra emaoh o klask ? »

Respont a rejont dezañ :

— « Rabbi ! (da lavared eo : Mestr), e peleh emaout o chom ? »

³⁹ Lavared a reas dezo :

— « Deuit ha gwelit ».

Mond a rejont gantañ hag e weljont e peleh e oa o chom, hag e chomjont gantañ en deiz-se. War-dro peder eur e oa.

⁴⁰ Bez’ e oa Andre, breur Simon-Pèr, unan euz an daou ziskib o-doa klevet Yann-Vadezour, hag eet neuze da heul Jezuz.

⁴¹ En em gaoud a reas da genta gand Simon e vreur, hag e lavaras dezañ :

— « Kavet on-eus ar Mesiaz (da lavared eo : ar Hrist). ⁴² Hag e kasas anezañ da gaoud Jezuz. O veza sellet outañ, e lavaras Jezuz :

— « Te eo Simon, mab da Yann ; bez’ e vo « Kefaz » da ano (da lavared eo : Pèr).

Yaou 5 a viz genver

Yn 1, 43-51

⁴³ Antronoz e lakeas Jezuz en e zoñj mond da Vro-Halilea. En em gavoud a ra gand Filip hag e lavar dezañ :

— « Deus d’am heul ».

⁴⁴ Hogen, Filip a oa euz Betsaida, kêr Andre ha Pèr. ⁴⁵ Mond a ra Filip da gavoud Natanael, hag e lavar dezañ :

— « An hini a zo bet skrivet diwar e benn gand Moizez el Lezenn ha gand ar Brofeted, kavet on-eus anezañ : Jezuz eo, mab Jozef euz Nazared ».

Respont a ra Natanael dezañ :

— ⁴⁶ Daoust hag euz Nazared e hell dond eun dra bennag a vad ? »

— « Deus hag e weli », eme Filip dezañ.

⁴⁷ Pa wél Jezuz Natanael o tond war-zu ennañ, e lavar diwar e benn :

— « Setu evid gwir eun Izraelad : n’eus netra faoz ennañ ».

⁴⁸ Goulenn a ra Natanael outañ :

— « A-beleh eh anavezez-te ahanon ? »

Respont a ra Jezuz dezañ :

— « Araog ma ’z out bet galvet gand Filip, pa oas dindan ar wezenn-fïez, em-eus gwelet ahanout ».

⁴⁹ Ha Natanael dezañ :

— « Rabbi, bez’ ez out Mab Doue ! Bez’ ez out Roue Izrael ! »

⁵⁰ Respont a ra Jezuz dezañ :

–-« Abalamour m’em-eus lavaret dit : « Gwelet em-eus ahanout dindan ar wezenn-fiez », e kredez ! Brasoh eged-se e weli. »

⁵¹ Hag e lavar c’hoaz :

— « E gwirionez, e gwirionez, e lavaran deoh : Gweled a reot an Neñv digor, hag Êlez Doue o sevel hag o tiskenn a-uz da Vab an Dén ».

Gwener 6 a viz genver

Mk 1, 7-11

⁷ En amzer-ze, eh embanne Yann-Vadezour en eur lavared :

— « Dond a ra war va lerh an hini a zo kreñvoh egedon, ha n’on ket dîn, en eur blega, da ziskoulma lèrenn e zandalennou. ⁸ Badezet em-eus-me ahanoh en dour ; gantañ avad e viot badezet er Spered-Santel ».

⁹ Hag en deiziou-ze, e teuas Jezuz euz Nazared, kêriadenn euz Bro-Halilea, hag e oe badezet gand Yann e stèr Jordan.

¹⁰ Kerkent ha ma teuas Jezuz er-mêz euz an dour, e welas an Neñv o tigeri hag ar Spered-Santel, evel eur goulm, o tiskenn warnañ. ¹¹ Hag e teuas eur vouez euz an Neñv o lavared : « Te eo va Mab muia kared, ennout e kavan va dudi ».

pe Lk 3,23-38

²³ Pa stagas Jezuz da brezeg, e oa war-dro tregont vloaz.
War ar péz a veze kredet, e oa mab da Josef, mab Héli
²⁴ mab Mazat, mab Levi,
mab Melki, mab Yannaï, mab Josef,
²⁵ Mab Mataziaz, mab Amos, mab Nahoum, mab Ezli, mab Nagaï,
²⁶ mab Maaz, mab Mataziaz,
mab Semein, mab Yozeh, mab Yoda,
²⁷ mab Yoanan, mab Resa,
mab Zorobabel, mab Salaziel, mab Neri,
²⁸ mab Melhi, mab Addi,
mab Kôsam, mab Elmadam, mab Er,
²⁹ mab Jezuz, mab Eliezer,
mab Yorim, mab Mazat, mab Levi,
³⁰ mab Simeon, mab Youda,
mab Josef, mab Yônam, mab Eliakim,
³¹ mab Melea, mab Menna,
mab Mataza, mab Nazam,
mab David,
³² mab Yese, mab Yobed, mab Booz,
mab Sala, mab Naason,
³³ mab Aminadab, mab Admin, mab Arni,
mab Ezrom, mab Farez, mab Youda,
³⁴ mab Jakob, mab Izaaq,
mab Abraham, mab Tara, mab Nahor,
³⁵ mab Serouk, mab Ragau,
mab Faleq, mab Eber, mab Sala,
³⁶ mab Kainam, mab Arfaksad,
mab Sem, mab Noé, mab Lameh,
³⁷ mab Mazousala, mab Enoh,
mab Yared, mab Maleleel, mab Kaïnam,
³⁸ mab Enoz, mab Sez,
mab Adam,
mab Doue.

Sadorn 7 a viz genver

Mz 5,17-19

Bodet e ziskibien en-dro da Jezuz war ar menez, e lavare dezo :

¹⁷ — « N’it ket da gredi ez on deuet da ziskar al Lezenn hag ar Brofeted : n’on ket deuet da ziskar anezo, med da beurechui anezo.

¹⁸ « Rag e gwirionez e lavaran deoh : keid ha ma pado an neñv hag an douar, na pik, na lizerenn ne vo lamet kuit diouz al Lezenn, ken na vo sevenet pep tra.

¹⁹ « An hini a dorro unan euz an disterra gourhemennou-ze, hag a zougo ar re all da ober kemend-all, a vo lakeet e-touez ar re zisterra e Rouantèlèz Doue. Med an hini a heuillo anezo hag a zougo ar re all da ober kemend-all, hennez a vo lakeet uhel e Rouantèlèz Doue.