Sizunvez kenta an Azvent (A)

Euz ar 27 a viz Du d’an 3 a viz Kerzu 2022

Sul kenta an Azvent (A)

Mz 24, 37-44

Komz a ree Jezuz gand e ziskibien diwar-benn e zonedigez : ³⁷ « Evel ma oe kont en amzer Noe, evel-se e vo ive pa zeuio Mab an dén.

³⁸ « En deiziou-ze, a-raog an dour-beuz, e oa an dud o tebri hag oh eva, o kemer gwrég hag o kemer gwaz, beteg an deiz ma ’z eas Noe en arh. ³⁹ N’o-doa an dud douetañs a netra, beteg m’ en em gavas an dour-beuz, ma oent oll lonket gantañ : bez’ e vo ive evel-se, pa zeuio Mab an Dén.

⁴⁰ « Bez’ e vo, neuze, daou zén er park : paket e vo unan, ha lezet egile. ⁴¹ Bez’ e vo diou vaouez o vala er vilin : paket e vo unan, ha lezet e-bén.

⁴² « Bezit war evez eta, rag n’ouzoh ket pe da zeiz e teuio hoh Aotrou.

⁴³ « Komprenit mad : m’e-nefe gouezet mestr an ti, da beseurt mare euz an noz e teufe al laer, e chomfe war héd, ha n’e lezfe ket toulla moger e di. ⁴⁴ Bezit prést eta, c’hwi ive, rag dond a raio Mab an Dén d’an eur na zoñj ket deoh ».

Lun

Mz 8, 5-11

⁵ O veza m’edo Jezuz o tigouezoud e Kafarnaom, e teuas eun ofiser d’e gaoud hag e reas outañ ar bedenn-mañ :

⁶ — « Aotrou, ema va zervicher war e wele, em zi, seizet e izili, ha diwaska a ra poaniou kriz ».

⁷ Lavared a reas Jezuz dezañ :

— « Mond a rin hag e parein anezañ ».

⁸ Respont a reas an ofiser :

— « Aotrou, n’on ket dîn e teufeh em zi, med lavarit eur gér hepkén hag e vo pare va zervicher. ⁹ Rag me a zo dindan galloud tud all, hag am-eus soudarded dindannon, hag e lavaran da unan mond hag ez a, da unan all dond hag e teu, d’am zervicher ober an dra-mañ-dra, hag e ra ».

¹⁰ O kleved kement-se, e oe estlammet Jezuz, hag e lavaras d’ar re a oa ouz e heul :

— « E gwirionez, e lavaran deoh, n’em-eus ket kavet eur seurt feiz e Bro-Izrael, ¹¹ ha lavared a ran deoh e teuio kalz tud euz ar Zao-Heol, hag euz ar Huz-Heol, hag a gemero plas ouz taol gand Abraham, Izaag ha Jakob, e Rouantèlèz Doue.

Meurz

Lk 10, 21-24

²¹ D’an ampoent, e tridas kalon Jezuz gand al levenez, er Spered-Santel, hag e lavaras :

— « Da veuli a ran, va Zad, Aotrou an Neñv hag an douar, ablamour m’az-peus kuzet an traou-ze ouz an dud desket ha speredeg, ha m’az-peus o roet da anaoud d’ar re vihannig. Ya, Tad, evel-se eo bet plijet ganit.

²² « Pep tra a zo bet roet din gand va Zad, ha den e-béd ne oar piou eo ar Mab, nemed an Tad, na kennebeud piou eo an Tad, nemed ar Mab, ha kement hini a zo plijet gand ar Mab henn diskleria dezañ ».

²³ O trei neuze war-zu e ziskibien, e lavaras dezo en o fart-o-unan :

— « Eüruz an daoulagad a wél ar pez a welit. ²⁴ Rag m’hel lavar deoh, stank eo bet ar brofeted hag ar rouaned o-defe karet gweled ar pez a welit, ha n’o-deus ket gwelet, kleved ar pez a glevit, ha n’o-deus ket klevet ».

Merher 30 a viz Du : Sant Andre

Mz 4,18-22 (d’an 30 a viz du)

¹⁸ O tremen a-héd ar Mor-Galilea, e welas Jezuz daou vreur : Simon, lesanvet Pèr, hag Andre e vreur, o taoler o rouejou er mor, rag pesketerien e oant.

¹⁹ Lavared a reas Jezuz dezo :

— « Deuit d’am heul hag e rin pesketerien tud ahanoh ».

²⁰ Ha raktal, dilezet ganto o rouejou, ez ejont d’e heul.

²¹ Pelloh, e welas daou vreur all : Jakez, mab da Zebede ha Yann e vreur, en o bag, gand Zebede o zad, o kempenn o rouejou.

²² Gelver a reas anezo, ha kerkent e tilezjont o bag hag o zad evid mond d’e heul.

Yaou 1a a viz Kerzu, Sant Tudual
Memor (gouel en eskopti Landreger gwechall)

Yn 10, 11-16 (d’ar 1a a viz kerzu)

Lavared a ree Jezuz d’ar Juzevien :

¹¹ « Me eo ar Pastor Mad.
Rei e vuhez evid e zeñved a ra ar Pastor Mad.
¹² « An hini n’eo nemed mevel avad,
n’eo ket eñ ar pastor :
pa n’eo ket an deñved e re dezañ :
ma wél ar bleiz o tond,
e tilez an deñved
hag e teh kuit.
Hag e vezont skrapet gand ar bleiz
a ra dezo mond amañ hag ahont.
¹³ « Tehel kuit a ra ar pastor-ze,
peogwir n’eo nemed mevel,
ha n’eo ket chalet gand an deñved.
¹⁴ « Me eo ar Pastor Mad.
Anaoud a ran va deñved,
hag anaoud ahanon a ra va deñved,
¹⁵ « evel ma’h anavez an Tad ahanon,
ha ma’h anavezan, me ive, an Tad.
Ha va buhez a roan evid va deñved.
¹⁶ « Deñved all am-eus c’hoaz,
ha n’emaint ket er park-deñved-mañ.
Ar re-ze ive am-eus da rén.
Kleved a raint va mouez,
ha ne vo nemed eun tropell
hag eur pastor hepkén ».

Yaou

Mz 7, 21.24-27

Bodet e ziskibien en-dro da Jezuz, e lavare dezo :

²¹ « N’eo ket o lavared din : « Aotrou ! Aotrou ! » eo ez eer e Rouantèlèz an neñv, med oh ober bolontez va Zad a zo en neñv.

²⁴ Evel-se, ez eo heñvel an hini a zelaou va homzou hag a heuill anezo, ouz eun dén a skiant-vad savet ti gantañ war ar garreg. ²⁵ Kouezet eo ar glao, dirollet eo an dour-beuz, c’hwezet o-deus gand kounnar an aveliou war an ti. N’eo ket kouezet en e boull, diazezet ma oa war ar roh.

²⁶ « Bez’ ez eo an dén a zelaou va homzou, ha na zent ket outo, heñvel ouz eun dén diskiant e-neus savet e di war an trêz. ²⁷ Deuet eo ar glao, savet eo an aveliou ha c’hwezet o-deus war an ti. Koueza a ra en e boull, hag e koll an dén pep tra ».

Gwener

Mz 9, 27-31

²⁷ O veza m’edo Jezuz o vond gand e hent, e teuas war e lerh daou zen dall en eur grial :

— « Bez truez ouzom, Mab da Zavid ! »

²⁸ Pa oe eet Jezuz en ti, e tosteas an daou zen dall outañ, hag e lavaras Jezuz dezo :

— « Ha kredi a rit, e hellan ober kement-se ? »

— « Ya, Aotrou, emezo ».

²⁹ Neuze, e touchas ouz o daoulagad en eur lavared :

— « Ra vo greet deoh hervez ho feiz ».

³⁰ Hag e tigoras raktal dezo o daoulagad. Med Jezuz, rust dezo :

— « Diwallit na ve gouezet kement-se gand dén e-béd ! »

³¹ Med a-veh er-mêz, e komzas ar re-mañ diwar e benn dre ar vro a-béz.

Sadorn

Mz 9, 35 – 10, 1.6-8

³⁵ Mond a ree Jezuz dre an oll gêriou ha kêriadennou, en eur gelenn er zinagogennou. Embann a ree Kelou Mad ar Rouantèlèz. Parea a ree pep kleñved ha pep langis.

³⁶ O weled ar bobl tud a oa dirazañ, e-noe Jezuz truez outo, rag skuiz ha fallgalonet e oant, evel deñved hep pastor.

³⁷ Neuze, e lavaras d’e ziskibien :

— « Braz eo an eost. An eosterien a-vad a zo nebeud anezo. Pedit eta mestr an eost, ma kaso eosterien d’e bark ».

¹ Gelver a reas neuze, e zaouzeg diskibl, hag e roas dezo galloud war an droug-sperejou, evid o has kuit ha rei ar pare euz n’eus forz peseurt kleñved pe zempladurez.

⁶ « It kentoh, emezañ, war-zu an deñved dianket euz pobl Izrael.

⁷ « Dre ma’z eot gand ho hent, roit da anaoud eo tostig Rouantèlèz Doue. ⁸ Roit ar pare d’ar re glañv, glannait an dud lor, roit ar vuhez d’ar re varo, argasit an droug-sperejou. Resevet ho-peus evid netra, roit evid netra ».