Naontegved sizunvez war ar bloaz (C)

Euz ar 7 d’an 13 a viz Eost 2022

Naontegved sul war ar bloaz (C)

Lk 12, 32-48

Lavared a ree Jezuz d’e ziskibien :

³² « N’ho-pet ket aon, tropell bihan, rag plijet eo bet d’ho Tad rei deoh ar Rouantèlèz.

³³ « Gwerzit ar péz a zo deoh, ha roit anezañ en aluzenn. Grit evidoh yalhou ha na uzint ket, eun teñzor hag a bado en Neñvou : eno, na dosta laer e-béd, na grign preñv e-béd. ³⁴ Rag el leh m’ema ho teñzor ganeoh, eno ive, ema ho kalon ».

³⁵ « Chomit en ho kwiskamant-servij, ho kouriz en-dro d’ho kroazlez, hag ho lampou war-elum. ³⁶ Bezit heñvel ouz tud o hortoz o mestr pa zistroio euz an eured, evid digeri dezañ kerkent ha ma tigouezo, ha ma skoio war an nor. ³⁷ Eüruz ar zervicherien a vo kavet dihun gand o mestr pa zistroio. E gwirionez, e lavaran deoh : lakaad a raio e houriz, hag ober dezo azeza ouz taol ; hag e vezint servichet gantañ an eil goude egile.

³⁸ « Ma teu dezañ distrei war-dro hanternoz, pe deir eur diouz ar mintin, ha ma kav anezo evel-se : eüruz an dud-se !

³⁹ « Gouzoud a rit er-vad : ma ouezfe mestr an ti da béd eur e teuio al laer, ne laoskfe ket toulla moger e di.

⁴⁰ « C’hwi ive, bezit prést : d’an eur na gav ket deoh, eo e teuio Mab an Dén ».

⁴¹ Neuze e lavaras Pèr :

— « Aotrou, evidom-ni eo e lavarez ar barabolenn-ze, pe evid an oll ?

⁴² Respont a reas an Aotrou :

— « Pehini eo ar merour féal ha fur a vo lakeet gand e vestr e penn e zervicherien, evid rei da bep hini, er poent, e lod gwiniz ? ⁴³ Eüruz ar zervicher-ze a vo kavet gand e vestr oh ober evel-se, pa zistroio. ⁴⁴ E gwirionez, e lavaran deoh : lakaad a raio anezañ da vestr war e oll vadou.

⁴⁵ « Med, ma lavar ar zervicher-ze ennañ e-unan : « Dalea a ra va mestr da zond », ha ma stag da skei gand ar vevelien hag ar mitizien, da zebri, da eva, ha d’en em vezvi, ⁴⁶ neuze, pa zigouezo ar mestr d’an devez n’ema ket e zervicher o hortoz, ha d’an eur ne oar ket, e kaso anezañ diwar e dro, hag e vo lakeet gantañ e-touez an dud difeiz.

⁴⁷ « Paka a raio kalz taoliou ar zervicher, hag a anavez bolontez e vestr, ha n’e-neus aozet netra, na greet hervez e volontez.

⁴⁸ « Med an hini ne anaveze ket e volontez, hag e-neus meritet kaoud taoliou, hennez ne bako nemed nebeud.

Goulennet e vo kalz digand an hini ez eus bet roet kalz dezañ ; goulennet e vo muioh digand an hini ez eus bet fiziet kalz ennañ ».

Lun

Mz 17, 22-27

²² Pa oa Jezuz asamblez gand an diskibien bodet e Bro-Halilea, e lavaras dezo :

— « Bez’ ema Mab an Dén o vond da veza lakeet etre daouarn an dud ; ²³ lazet e vo ganto, ha d’an trede deiz e savo a varo da veo ».

Glaharet braz e oent o kleved kement-se.

²⁴ Pa oant o tigouezoud e Kafarnaom, e teuas paotred a zastum an daou drakm evid an Templ da gaoud Pèr, hag e lavarjont dezañ :

— Paeet e vez an daou drakm gand ho mestr, neketa ? »

²⁵ — « Ya ’vad », emezañ.

Pa oe digouezet Pèr en ti, e stagas Jezuz da gomz da genta, o lavared :

— « Petra eo da zoñj, Simon ? Rouaned an douar, diwar goust piou e savont gwiriou pe taillou ? Diwar goust o bugale pe diwar goust an dud all ? »

²⁶ — « Diwar goust an dud all », emezañ.

— « Neuze ’ta, eme Jezuz, o-deus ar vugale diskarg anezo ? ²⁷ Koulskoude evid ma ne vo ket gwall-skweriet an dud-se, kerz d’ar mor, taol an higenn, kemer ar pesk kenta a grogo, ha digor e henou. Kavoud a ri ennañ eur péz a bevar drakm. Kemer anezañ ha ro anezañ evidon hag evidout-te ».

Meurz 9 a viz Eost
Gouel Santez Tereza-Benedikt a Groaz,
gwerhez ha merzéréz, ken-batronez Europa.

Mz 25, 1-13

Komz a ree Jezuz d’e ziskibien diwar-benn e zonedigez ; lavared a ree ar barabolenn-mañ :

¹ « Heñvel e vo Rouantèlèz Doue ouz dég plah yaouank pedet d’eur préd-eured, ha kemeret ganto lampeier evid mond da ziambroug an dén-nevez.

² « Pemp anezo a oa dizoursi, ha pemp a oa fur. ³ Gand ar pemp dizoursi e oa eet o lampeier, med n’o-doa ket kaset eoul ganto. ⁴ Gand ar re fur avad e oa eet eoul e-barz podouigou, war eun dro gand o lampeier.

⁵ « O veza ma oa dale gand an dén-nevez, e teujont oll da voredi ha da gousked.

⁶ E-kreiz an noz, e savas eur hopadenn :

— « Setu an dén-nevez ! Kit er-mêz da ziambroug anezañ ! »

⁷ « Neuze, e tihunas an oll blahed yaouank, hag e krogjont da gempenn o lampeier. ⁸ Goulenn a reas ar re zizoursi digant ar re fur :

— « Roit deom ’ta euz hoh eoul, rag ema on lampeier-ni o vervel ».

⁹ « Respont a reas ar re fur dezo :

— « Ne raim ket, rag ne vefe biken tra-walh evidom hag evidoh. Kit kentoh da brena evidoh da di ar varhadourien ».

¹⁰ « En-dra ma oant o vond da brena, e tigouezas an dén-nevez. Ar re a oa prést a yeas tre gantañ er zal-eured, hag e oe serret an nor. ¹¹ Diwezatoh, e teuas ive ar plahed all, hag e lavarjont :

— « Aotrou ! Aotrou ! digor deom ! »

¹² « Med respont a reas dezo :

— « E gwirionez, e lavaran deoh : ne anavezan ket ahanoh ».

¹³ « Bezit war evéz eta, rag ne ouezit nag an deiz nag an eur ».

Merher 10 a viz Eost
Sant Laorañs, diagon ha merzer. Gouel

Yn 12, 24-26

Eur pennadig amzer araog ar Pask, e lavare Jezuz d’e ziskibien :

²⁴ « E gwirionez, e gwirionez, e lavaran deoh : ma ne varv ket ar hreunenn winiz kouezet en douar, e chom e-unan penn ; ma varv a-vad, e toug frouez e-leiz.

²⁵ « An néb a gar e vuhez, a goll anezi ; an néb a zispriz anezi er béd-mañ, a viro anezi evid ar vuhez peurbaduz.

²⁶ « An néb e-neus c’hoant servicha ahanon, ra zeuio d’am heul ; hag el leh ma vezin, e vezo ive va zervicher. An hini a vo servicher din, a vo enoret gand va Zad ».

Yaou

Mz 18, 21-19, 1

²¹ Tostaad a reas Pèr ouz Jezuz evid goulenn outañ :

— « Aotrou, péd kwech, ma teu d’am breur mankoud ouzin, e rañkan pardoni dezañ ? Beteg seiz kwech ? »

²² Respont a reas Jezuz :

— « Ne lavaran ket dit beteg seiz kwech, med beteg deg-ha-tri-ugent kwech seiz kwech.

²³ « Rag e gwirionez, heñvel eo Rouantèlèz an Neñvou ouz eur roue hag a fellas dezañ urzia e gonchou gand e zervicherien.

²⁴ « Kroget e oa da urzia e gonchou, pa oe digaset dirazañ eun dén hag a oa dleour dezañ a zég mil talant.

²⁵ « O veza ma n’e-noa ket hemañ peadra da baea e zle, e roas ar mestr urz da werza anezañ, e wrég hag e vugale ha kement e-noa, evid kaoud evel-se an diskarg euz e zle.

²⁶ « Neuze, en em daolet ar zervicher e-harz e dreid, eh aspede e vestr en eur lavared :

— « Bez pasianted ganin, hag e paein kement a zlean dit ».

²⁷ « Kroget an druez er mestr, e lezas e zervicher da vond kuit en eur rei dezañ an diskarg euz e zle.

²⁸ « Med, a-boan eet er-mêz, e kavas hemañ unan euz e gompagnuned-labour, hag a oa dleour dezañ euz a gant diner. Tapoud a reas krog ennañ, ha gwaska war e houzoug beteg beza prést da vouga anezañ, en eur lavared :

— « Paee da zle ! »

²⁹ « Neuze, en em daolas ar zervicher e-harz e dreid en eur aspedi anezañ :

— « Bez pasianted ganin, hag e paein dit va dle en e-béz ».

³⁰ « Egile a-vad, ne fellas ket dezañ. Mond a reas da lakaad taoler anezañ er prizon, beteg m’e-nefe paeet e zle.

³¹ « O weled kement-se, e oe glaharet braz ar zervicherien all, hag e teujont da gonta d’o mestr kement a oa bet c’hoarvezet.

³² « Neuze, e lakeas e vestr gervel anezañ, hag e lavaras dezañ :

— « Servicher fallagr, kement ha ma oas dleour din, am-eus roet-me an diskarg anezañ dit, o veza m’az-poa aspedet ahanon. ³³ Daoust ha ne oa ket réd dit d’az-tro kaoud truez ouz da gompagnun, evel m’am-eus bet-me truez ouzit ? »

³⁴ « Ha fuloret braz, e lakeas ar mestr anezañ etre daouarn ar vourrevien, beteg m’e-nefe paeet e zle penn-da-benn.

³⁵ « Evel-se, e raio en ho-keñver va Zad hag a zo en Neñv, ma ne bardonit ket pep hini ahanoh d’e vreur, a-greiz ho kalon ».

19 ¹ P’e-noa Jezuz echu ar prezegennou-ze, e kuiteas Bro-Halilea hag ez eas da Vro-Judea, en tu all d’ar Jordan.

Gwener

Mz 19, 3-12

³ Tostaad a reas Farizianed ouz Jezuz evid paka anezañ en e gomzou ; goulenn a rejont outañ :

— « Daoust hag aotreet eo ar gwaz da gas e wrég kuit, diwar bep seurt digarez ?

⁴ Respont a reas Jezuz :

— « Daoust ha n’ho-peus ket lennet ? Er penn kenta, e reas Doue anezo gwaz ha maouez, ha lavaret : ⁵ « Rag-se, e kuitaio ar gwaz e dad hag e vamm, hag en em stago ouz e wrég, hag e teuint o-daou da veza eur horv kepkén ». ⁶ Evel-se, n’eus ket mui daou anezo, med eur horv kepkén. Arabad d’an dén eta dispartia ar péz a zo bet unanet gand Doue ».

⁷ Respont a reas ar Farizianed dezañ :

— « Perag eta, e-neus Moïzez roet urz da rei eur paper a dorr-dimezi, pa gaser kuit ar wrég ? »

⁸ Respont a reas Jezuz dezo :

— « Abalamour d’ar haledet m’eo ho kalon, e-neus Moizez roet an aotre deoh da gas kuit ho kwragez. Med er penn kenta, ne oa ket evel-se.

⁹ « Lavared a ran deoh avad : Kement hini a gas kuit e wrég, – nemed e vefe eur falz-dimezi, – hag a gemer unan all, a ra avoultriez ».

¹⁰ Lavared a reas an diskibien dezañ :

— « Mar d-ema evel-se stad ar gwaz e-keñver e wrég, eo gwelloh chom dizimez ».

¹¹ Respont a reas dezo :

— « N’eo ket an oll a intent kement-se, med hepkén ar re a zo roet dezo da intent.

¹² « Bez’ ez eus tud ha ne zimezont ket, rag ne hellont ket, o veza m’int bet ganet evel-se gand o mamm. Bez’ ez eus re all ha ne hellont ket dimezi, rag mahagnet int bet gand an dud. Ha bez’ ez eus re all hag a zo chomet dizimez abalamour da Rouantèlèz Doue. An hini a hell intent, ra intento ! ».

Sadorn

Mz 19, 13-15

¹³ Digaset e oe bugale da Jezuz, dezañ da astenn e zaouarn warno gand eur bedenn. Med kaset e oent buan diwar e dro gand an diskibien.

¹⁴ Lavared a reas Jezuz :

— « Laoskit ’ta ar vugale, na virit ket outo da zond d’am haoud, rag d’ar re a zo heñvel outo eo Rouantèlèz Doue ».

¹⁵ Ha goude beza astennet warno e zaouarn, ez eas kuit ahano.