Pevarzegved sizunvez war ar bloaz (C)

Euz an 3 d’an 9 a viz Gouere 2022

Pevarzegved sul war ar bloaz (C)

Lk 10, 1-12.17-20

¹ E touez e ziskibien, e tibabas Jezuz daouzeg ha tri-ugent all, hag e kasas anezo, daou-ha-daou, en e-raog, da vond e kement kêr ha kement leh m’e-noa e-unan da vond enno. ² Lavared a reas dezo :

— « Braz eo an eost, med micherourien a zo nebeud anezo. Pedit eta mestr an eost, ma kaso micherourien da ober an eost.

— ³ « It en hent ; setu ma kasan ahanoh evel deñved e-touez bleizi. ⁴ Na gasit ganeoh na yalh, na sah, na sandalennou.

Arabad chom en hent da zaludi dén e-béd. ⁵ E kement ti ma ’z eot ennañ, lavarit da genta : Peoh d’an ti-mañ. ⁶ Ma ’z eus eno eun dén a beoh, e tiskenno ho peoh warnañ. Ma n’eus ket, e teuio deoh en-dro.

⁷ « Chomit er memez ti. Debrit hag evit euz ar péz a vo roet deoh, rag gounid a ra ar micherour e voneiz. Arabad deoh mond euz eun ti d’egile.

⁸ « E kement kêr ma ’z eot, hag ho-po enni digemer vad, debrit ar péz a vo kinniget deoh. ⁹ Roit ar pare d’ar re glañv a vo er gêr-ze, ha lavarit dezo : Deuet eo beteg ennoh Rouantèlèz Doue.

¹⁰ « Med e kement kêr ma ’z eot, ha ne vo ket greet digemer deoh, it war ar plasennou, ha lavarit d’an dud : ¹¹ « Ho poultrenn zokén, staget ouz on treid, a dennom kuit hag a laoskom ganeoh. Med intentit koulskoude : deuet eo tost ouzoh Rouantèlèz Doue ». ¹² Lavared a ran deoh : D’an deiz diweza, ne vo ket barnet ken kriz Sodom hag ar gêr-ze.

¹⁷ Laouen braz e teuas en-dro an daouzeg diskib ha tri-ugent, hag e lavarent :

— « Aotrou, plega deom a ra an diaouled o-unan en da ano ».

¹⁸ Lavared a reas Jezuz dezo :

— « Gweled a reen Satan o koueza euz an neñv evel eur flamm-tan. ¹⁹ Roet am-eus deoh galloud da vale war an naered hag ar hruged, ha da drehi oll nerz an enebour, heb na hellfe noazoud deoh.

²⁰ « Koulskoude, n’eo ket abalamour ma sent ouzoh ar sperejou eo ho-peus da veza laouen, med abalamour m’eo skrivet hoh ano en Neñvou ».

Lun

Mz 9, 18-26

¹⁸ E keit ha ma oa Jezuz o komz ouz diskibien Yann-Vadezour, e tosteas outañ eun dén a reñk uhel, hag en eur stoui dirazañ, e lavaras dezañ :

— « Ema va merh o paouez mervel, med deus da astenn da zorn warni hag e vevo ».

¹⁹ Sevel a reas Jezuz ha mond d’e heul, e ziskibien asamblez gantañ.

²⁰ Ha setu eur vaouez, klañv gand ar holl-gwad abaoe daouzeg vloaz, a dosteas a-dreñv dezañ, hag a douchas ouz bevenn e vantell. ²¹ Rag lavared a ree enni he-unan : Ma teuan a-benn, netra nemed da douch ouz e vantell, e vezin saveteet.

²² Med Jezuz o tistrei hag o weled anezi, a lavaras :

— « Bez fiziañs, va merh, saveteet out bet gand da feiz ».

Ha kerkent e oe saveteet ar vaouez.

²³ Pa zigouezas Jezuz e ti an dén a reñk uhel, o weled ar fleüterien hag an dud, difred ganto, e lavaras dezo :

²⁴— « It er-mêz ! N’eo ket maro ar plahig ; kousket eo ».

Hag e reent goap anezañ. ²⁵ Pa oe lakeet an dud er-mêz, ez eas tre en ti. Kregi a reas e dorn ar plahig, hag e savas houmañ en he zav.

²⁶ Dre an takad a-béz, e redas ar vrud a gement-se.

Meurz

Mz 9, 32-38

³² Digaset e oe da Jezuz eun dén dalhet gand an droug-spered hag a oa mud. ³³ Eur wech kaset kuit an droug-spered, e stagas an hini mud da gaozeal. Estlammet e oe an dud, hag e lavarent :

— « Biskoaz n’eus bet gwelet kemend-all en Izrael ! ».

³⁴ Lavared a ree ar Farizianed avad :

— « Dre briñs an droug-sperejou eo e kas kuit an droug-sperejou ».

³⁵ Mond a ree Jezuz dre an oll gêriou ha kêriadennou, en eur gelenn en o zinagogennou. Embann a ree Kelou Mad ar Rouantèlèz. Parea a ree pep kleñved ha pep langis.

³⁶ O weled kement-se a dud a oa dirazañ, e-noe Jezuz truez outo, rag skuiz ha fallgalonet e oant, evel deñved hep pastor.

³⁷ Neuze, e lavaras d’e ziskibien :

— « Braz eo an eost. An eosterien a-vad a zo nebeud anezo. ³⁸ Pedit eta mestr an eost, ma kaso eosterien d’e bark ».

Merher

Mz 10, 1-7

¹ Gelver a reas Jezuz e zaouzeg diskib, hag e roas dezo galloud war an droug-sperejou evid kas anezo kuit, ha rei ar pare euz n’eus forz peseurt kleñved pe zempladurez.

² Setu amañ anoiou an daouzeg abostol : ar henta, Simon, anvet Pèr, hag Andre e vreur, Jakez mab Zebede, hag e vreur Yann, ³ Filip ha Berteleme, Tomaz ha Maze ar publikan, Jakez mab Alfe ha Tade, ⁴ Simon ar Greduz ha Judaz Iskariot, an hini end-eeün a werzas Jezuz.

⁵ Kas a reas Jezuz an daouzeg-se en hent en eur rei dezo ar gourhemennou-mañ :

– « Arabad deoh mond gand an hentchou a gas war-zu ar bayaned, ha chomit hep mond e kêriou ar Zamaritaned. ⁶ It kentoh war-zu an deñved dianket euz pobl Izrael. ⁷ Dre ma’z eot gand ho hent, embannit eo tostig-tost Rouantèlèz Doue ».

Yaou

Mz 10, 7-15

Lavared a ree Jezuz d’an daouzeg abostol :

⁷ « Dre ma ’z eot gand ho hent, roit da anaoud eo tostig Rouantèlèz Doue. ⁸ Roit ar pare d’ar re glañv, roit ar vuhez en-dro d’ar re varo, glannait an dud lor, kasit kuit an droug-sperejou. Resevet ho-peus evid netra, roit evid netra.

⁹ « Na gasit ganeoh nag aour nag arhant, na moneiz en ho kouriz, ¹⁰ na sah evid an hent, na diou vantell, na boutou, na baz, rag ar micherour eo dleet dezañ e voued.

¹¹ « Kement kêr ha kement kêriadenn ma ’z eot enno, goulennit piou a zo dîn da zigemer ahanoh, ha chomit eno beteg ma ’z eot kuit.

¹² « En eur vond tre en ti, saludit an dud a zo o chom ennañ. ¹³ Mar d-eo dîn an ti-ze, ra ziskenno ho peoh warnañ. Ma n’eo ket dîn avad, ra zistroio ho peoh warnoh ».

¹⁴ « Ma ne ’fell ket d’an dud digemered ahanoh, na selaou ho komzou, it er-mêz euz an ti-ze, pe euz ar gêr-ze, en eur heja ar boultrenn euz ho treid. ¹⁵ E gwirionez, e lavaran deoh, ne vezor ket ken rust, da zeiz ar Varn, e-keñver bro-Sodom ha Gomor, hag e-keñver ar gêr-ze ».

Gwener

Mz 10, 16-23

Lavared a ree Jezuz d’an daouzeg abostol :

¹⁶ « Setu ma kasan ahanoh evel deñved e-touez bleizi. Bezit eta war evez braz evel naered, ha didroidell a galon evel koulmed.

¹⁷ « Diwallit diouz an dud ! kas a raint ahanoh dirag al lezvarn, skourjeza a raint ahanoh en o zinagogennou. ¹⁸ Kaset e vezot dirag ar gouarnourien hag ar rouaned, abalamour din. Eun testeni e vo kement-se evito, hag evid ar bayaned.

¹⁹ « Pa vezot evel-se lakeet etre o daouarn, na vezit ket nehet o klask petra pe benaoz lavared. Roet e vezo deoh da houzoud ar péz ho-po da lavared d’ar mare-ze. ²⁰ Ha n’eo ket c’hwi eo a gomzo, med Spered ho Tad eo a vo o komz ennoh.

²¹ « Kas e vreur a raio ar breur evid beza lakeet d’ar maro, hag an tad, e grouadur, sevel a raio ar vugale a-eneb o zud, ha kas anezo d’ar maro.

²² « Kasoni o-do an oll ouzoh abalamour d’am ano ; an hini avad, a zalho beteg penn, hennez a vo saveteet.

²³ « Ma vez klasket war ho lerh e kêr pe gêr, tehit d’eur gêr all. E gwirionez, e lavaran deoh, n’ho-pezo ket greet tro kêriou Izrael, a-raog distro Mab an Dén ».

Sadorn

Mz 10, 24-33

Lavared a ree Jezuz d’an daouzeg abostol :

²⁴ « N’eo ket an diskib uhelloh eged e vestr, nag ar zervicher uhelloh eged e aotrou. ²⁵ Tra-walh eo d’an diskib beza par d’e vestr, ha d’ar zervicher beza par d’e aotrou. M’o-deus an dud greet Beelzeboul euz ar penn-tiègèz, petra ne lavarint ket euz e dud ?

²⁶ « Arabad kaoud aon rag an dud-se ; n’eus netra goloet ha na zeufe ket da veza dizoloet, netra kuzet ha na zeufe ket da veza anavezet.

²⁷ « Kement a lavaran deoh en deñvalijenn, lavarit anezañ er sklêrijenn ; kement a glevit e plég ho skouarn, embannit anezañ diwar an toennou.

²⁸ « Arabad kaoud aon rag ar re a laz ar horv, ha ne hellont ket laza an ene. Ho-pet aon kentoh ouz an hini a hell kas da goll ar horv koulz hag an ene er jehen.

²⁹ « Daoust ha ne vez ket gwerzet daou filip evid eur gwenneg ? Koulskoude, ne gouez hini anezo war an douar, heb asant ho Tad.

³⁰ « Ha c’hwi, kontet eo kement blevenn a zo war ho penn.³¹ Bezit dienkrez eta ; talvezoud a rit muioh eged oll filiped an neñv.

³² « Kement hini a zisklêrio dirag an dud beza a-du ganin, a vo disklêriet ganin-me ive dirag va Zad a zo en Neñv, beza a-du gantañ. ³³ Med kement hini am naho dirag an dud, a vo nahet ganin-me ive dirag va Zad a zo en Neñv ».