Salm 85

(Heb. 86)

Doue madelezuz, Doue a bardon,
bez truez ouzom, saveta ahanom !

¹ Tro da skouarn, Aotrou, respont din,
Rag paour ha reuzeudig ez on-me ;
² Diwall va buhez, va Doue, rag da vignon ez on,
Saveta da zervicher, pa fizian ennout.

³ Truez ouzin, Aotrou,
War-zu ennout e krian a-hed an deiz.
⁴ Laouenna kalon da zervicher,
Rag war-zu ennout Aotrou e savan va ene.

⁵ Te, va Aotrou, a zo mad hag a bardon,
Ha leun a vadelez e-keñver ar re a c’halv ahanout.
⁶ Selaou va fedenn, Aotrou,
Taol evez ouz va mouez oc’h aspedi.

⁷ D’an deiz a anken e c’halvan ahanout,
Ha Te a respont din.
⁸ N’eus ket eveldout e-touez an doueou,
Aotrou, N’eus ket a oberou evel da re.

⁹ An oll vroiou az-peus greet a zeuio da stoui dirazout,
Hag a rento gloar d’az Ano, Aotrou.
¹⁰ Rag Te zo braz, ha Te ra burzudou,
Te Doue, ha Te hepken.

¹¹ Kelenn din Aotrou da hent,
Ma kerzin en da wirionez ;
Peurunvan va c’halon,
Ma toujin da Ano.

¹² Da drugarekaad a ran, Aotrou va Doue, a-greiz va c’halon,
Hag e rentin gloar d’az Ano da viken.
¹³ Rag braz eo da garantez em c’heñver,
Tennet ’peus ahanon diouz puñs don ar maro.

¹⁴ Va Doue, pennou lorhuz a zo savet a-eneb din,
Eur bagad tud kriz a glask va buhez heb beza chalet ganit ;
¹⁵ Med Te Aotrou, Doue madelezuz ha trugarezuz,
Gouestad da gounnari, leun a garantez hag a wirionez,

¹⁶ Tro war-zu ennon, ha bez truez ouzin,
Ro da nerz d’az servicher, saveta mab da vatez.
¹⁷ Gra eun dra skeduz evidon,
           ma welo gand mez va enebourien
Ez eo Te Aotrou va skoazell ha va frealzidigez.

Laouenna kalon da zervicher, o va Doue,
pa zavan war-zu ennout va ene !