An Testamant Nevez : eil lodenn – Troet e brezoneg gand « Kenvreuriez ar brezoneg » Eskopti Kemper ha Leon, 1988.

YANN I. Pennad-kinnig

Gand an heveleb stumm-skriva evel an Aviel, Yann a glask degas ar gristenien a Azia-Izella da veva e kommuniez gand Doue. Evid an dra-ze e ranker beva ouz sklerijenn ar feiz ha trei kein d’ar pehed, o vired ar gourhemennou, oh en em ziwall ouz ar bed hag an antikristou ; red eo ive beva er garantez gand an nesa. Euz Doue e-unan eo e teu ar sklerijenn hag ar garantez ; eñ a zo sklerijenn, eñ a zo karantez. Dre ar homzou-se e ro Yann deom an diverra euz an diskuliadur euz a Zoue en e bez.

Kenta lizer Sant Yann

Kentlavar

I. ¹ Ar pez a oa anezañ abaoe ar penn kenta, ar pez on-eus klevet, ar pez o-deus gwelet on daoulagad, ar pez on-eus arvestet hag on-eus touchet gand on daouarn euz ar gomz a vuez, ² rag en em ziskouezet he-deus ar vuez, ha ni on-eus gwelet, a ro testeni hag a embann deoh ar vuez peurbaduz, a oa troet war-zu an Tad, hag he-deus en em ziskouezet deom. ³ Kement on-eus gwelet ha klevet a embannom deoh-hwi ivez, evid ma vefeh, c’hwi ivez, unanet ganeom. On unaniez deom-ni a zo unaniez gand an Tad ha gand e Vab Jezuz Krist. ⁴ Ha ni a skriv deoh an dra-ze, evid ma vo leun-barr on levenez.

Kerzed er sklerijenn dieubet euz ar pehed

⁵ Ha setu amañ ar gemennadurez on-eus klevet gantañ, hag a ziskuillom deoh : sklerijenn eo Doue, ha n’eus ennañ tres ebed a deñvalijenn. ⁶ Ma lavarom : « Unanet om gantañ », ha ni o kerzed en deñvalijenn, e lavarom gevier, ne reom ket ar wirionez. ⁷ Med ma kerzom er sklerijenn evel m’ema eñ er sklerijenn, ez om unanet kenetrezom ha gwad ar Hrist e Vab, a zo ouz or glannaad a beb pehed. ⁸ Ma lavarom n’on-eus ket a behed, e faziom ha n’ema ket ar wirionez ennom. ⁹ Ma’h anzavom or pehejou, fidel ha just evel ma ’z eo, e pardono deom, hag or glannaio a beb falloni. ¹⁰ Ma Javarom n’om ket peherien, e reom anezañ eur gaouiad, hag e gomz n’ema ket ennom.

II. ¹ Va bugaligou, skriva a ran deoh kement-mañ evid ma chomfeh heb pehi. Med ma tegouez da hini pe hini koueza er pehed, ni on-eus eun divennour dirag an Tad : Jezuz Krist, an hini a zo dibeh, eñ eo an hini lidlazet evid an digoll euz ar pehejou ha n’eo ket hebken euz or re, med ouspenn euz re ar bed a-bez.

Mired gourhemenn ar garantez

³ Gand an dra-mañ eh ouzom eh anavezom anezañ, ma talhom d’e hourhemennou. ⁴ An neb a lavar : « Me a anavez anezañ », ha na vir ket e hourhemennou, hennez a lavar gevier, ha n’ema ket ar wirionez ennañ. ⁵ Med an hini a vir e gomz e gwirionez, eo deuet da wir ar garantez ennañ. E kement-mañ eh ouzom mad emaom ennañ.

⁶ An hini a lavar chom ennañ a dle eñ kerzed dre an hent e-neus Jezuz Krist, eñ ivez, kerzed drezañ. ⁷ Va re-muia karet, n’eo ket eur gourhemenn nevez a skrivan deoh, med eur gourhemenn hag a zo anezañ abaoe pell ’zo ; abaoe ar penn-kenta ho-peus anezañ, hag ar gourhemenn ho-peus a-bell ’zo, eo ar gomz ho-peus klevet. ⁸ Koulskoude eur gourhemenn nevez eo a skrivan deoh -kement-se a zo gwir ennañ hag ennoh, peogwir e tremen an deñvalijenn hag e sked dija ar sklerijenn wirion. ⁹ An hini a lavar beza er sklerijenn, hag eñ kasoni dezañ ouz e vreur, a zo c’hoaz en deñvalijenn. ¹⁰ An hini a gar e vreur a zo er sklerijenn, ha n’eus netra ennañ d’e lakaad da streboti. ¹¹ An neb a-vad e-neus kas ouz e vreur a zo en deñvalijenn, ne oar ket da beleh ez a, peogwir eo dallet e zaoulagad gand an denvalijenn.

Feiz ar gristenien dirag ar bed

¹² Va bugaligou, skriva a ran deoh eo pardonet deoh ho pehejou ablamour d’e ano dezañ : Jezuz. ¹³ Deoh tadou e lavaran : anaoud a rit an hini a zo anezañ abaoe ar penn-kenta ; ha deoh yaouankizou e lavaran : treh oh d’ar Fallagr. ¹⁴ Deoh va bugaligou am-eus lavaret : c’hwi a anavez an Tad ; deoh, tadou am-eus lavaret : c’hwi a anavez an hini a zo abaoe ar penn-kenta ; c’hwi yaouankizou, am-eus lavaret deoh, c’hwi a zo kreñv, komz Doue a zo o chom ennoh, treh oh bet d’ar Fallagr. ¹⁵ Na garit ket ar bed, nag ar pez a zo er bed, an hini a gar ar bed, n’ema ket ennañ karantez an Tad ; ¹⁶ peogwir kement a zo er bed, youlou fall an natur, c’hoantegeziou an daoulagad, ar fiziañs ourgouilluz er binvidigez ne zeuont ket euz an Tad, med euz ar bed, ¹⁷ Hogen ar bed a dremen ha gantañ e c’hoantegeziou med an hini a ra bolontez Doue a jom da viken.

¹⁸ Va bugaligou, en eur ziweza emaom. Klevet ho-peus lavared ez eus eun Antikrist o tond, hogen, azaleg bremañ, meur a Antikrist a zo aze hag evel-se eh ouzom ema an eur ziweza. ¹⁹ Euz on touez deom eo ez int savet ; ma vijent bet euz on tud e vijent chomet ganeom. Med red e oa e vije diskouezet sklêr ne oant ket euz on tud-ni. ²⁰ C’hwi avad a zo bet olevet gand ar Zant hag oll eh ouzoh. ²¹ N’am-eus ket skrivet ne ouieh ket ar wirionez, med lavaret am-eus eh anavezit anezi ; ha, diwar ar wirionez ne zav netra hag a vefe gaou. ²² Ar gaouiad, piou eo ? nemed an hini a nah eo Jezuz Krist ar Hrist, hennez eo an Antikrist. ²³ An neb a nah ar Mab, n’ema ket kennebeud an Tad gantañ.

²⁴ Evidoh-hwi, ra jomo ennoh ar gemennadurez ho-peus klevet azaleg ar penn-kenta. Ma chom ennoh ar gemennadurez ho-peus klevet azaleg ar penn-kenta, c’hwi ivez a jomo er Mab hag en Tad, ²⁵ hag ar bromesa e-neus eñ greet deom eo ar vuez peurbaduz.

²⁶ Setu aze ar pez a felle din skriva deoh diwarbenn ar re a glask ho kas da goll. ²⁷ Evidoh-hwi an olevadur ho-peus resevet digantañ a jom ennoh ha n’ho peus ezomm ebed da veza kenteliet war beb tra gand an olevadur, – ha gwirion eo ha n’eo ket gevier –, peogwir e-neus ho kenteliet ; c’hwi a jom ennañ. ²⁸ Neuze ’ta, va bugaligou, chomit ennañ evid beza leun a asurañs, p’en em ziskouezo hag heb mez ebed pell dioutañ, da zeiz e zonedigez.

Beva hervez ar justis

²⁹ Peogwir eh ouzoh eo just Doue, diskleirit ivez eo ganet anezañ kement hini a vev hervez ar justis.

III. ¹ Gwelit eta pegen braz donezon eo bet karantez vraz an Tad evidom, beteg beza anvet bugale da Zoue, ha bez ’ez om ! Setu amañ perag n’hell ket ar bed anaoud anezañ : n’e-neus ket anavezet Doue. ² Va re muia-karet, bremañ dija ez om bugale da Zoue, med n’eo ket c’hoaz displeget splann ar pez a vezim, goûd a ouzom, p’en em ziskouezo, e vezim heñvel outañ, o veza ma welim anezañ evel m’ema. ³ Kement-hini e-neus eun heveleb esperañs e Doue, a zeu da veza glan evel m’eo glan eñ, Jezuz. ⁴ Kement-hini a beh a dorr al lezenn, rag pehi a zo terri al lezenn. ⁵ Med c’hwi a oar eo deuet Jezuz evid dilemel ar pehejou hag ennañ n’eus ket a behed.

⁶ An-neb-piou-bennag a ra e zemeurañs ennañ, ne beh ket. An neb a beh ne wel ket anezañ, ne anavez ket anezañ. ⁷ Va bugaligou, arabad eo da zen dond d’ho touella, an neb a vev hervez ar justis a zo just, evel m’eo just, eñ, Jezuz. ⁸ An neb a beh, a zo diwar an diaoul, peogwir an diaoul a zo peher abaoe ar penn-kenta. Setu amañ perag eo deuet Mab Doue da ziskar an diaoul. ⁹ An neb a zo ganet euz a Zoue, ne beh mui, rag chom a ra ennañ an hadenn anezañ ; n’hell ket mui pehi, peogwir eo ganet euz a Zoue. ¹⁰ Setu amañ penaoz e weler pere a zo bugale da Zoue, ha pere a zo bugale d’an diaoul : an neb n ’eo ket just n’eo ket a Zoue, na kennebeud an neb ne gar ket e vreur.

¹¹ Setu amañ ar gemennadurez ho-peus klevet abaoe ar penn-kenta : en em gared a dleom an eil egile. ¹² N’eo ket evel Kain a oa diwar ar Fallagr, hag a lazas e vreur ; ha perag e lazas anezañ ? Fall oa e oberou e keid ha ma oa just re e vreur. ¹³ Na vezit ket souezet, breudeur, m’e-neus ar bed kasoni ouzoh. ¹⁴ Ni a oar ez om tremenet euz ar maro d’ar vuez o veza ma karom or breudeur. An hini ne gar ket a jom er maro. ¹⁵ An neb e-neus kasoni ouz e vreur a zo eur muntrer ha c’hwi a oar, muntrer ebed ne jom gantañ ar vuez peurbaduz. ¹⁶ Hiviziken, eo evel-henn eh ouzoh petra eo ar garantez : Jezuz, eñ, e-neus roet e vuez evidom, ni a dle ivez rei or buez evid or breudeur. ¹⁷ An hini e-neus madou er bed-mañ, hag a wel e vreur en dienez, ma teu dezañ mouga ennañ peb truez, penaoz e chomfe ennañ karantez evid Doue ?

¹⁸ Va bugaligou, karantez a dleom kaoud, n’eo ket dre gomz, na diwar beg an teod, med dre ober hag er wirionez. ¹⁹ Setu amañ penaoz e vezim heb douetañs ebed er wirionez hag e lakim or houstiañs e peoh dirag Doue. ²⁰ Ma teu or houstiañs d’on tamall, Doue a zo brasoh eged or halon, hag anaoud a ra peb tra. ²¹ Va re-muia-karet, ma ne rebech or houstiañs netra deom, neuze ez om da Zoue gand asurañs hag e resevom digantañ petra bennag a houlenfem, ablamour ma virom e hourhemennou ha ma reom ar pez a blij dezañ. ²³ ha setu e hourhemenn : kredi stard e Jezuz Krist hag en em gared kenetrezom, evel m’e-neus gourhemennet deom. ²⁴ An neb a wir e hourhemennou a jom e Doue ha Doue ennañ, ha dre-ze eh ouzom ema o chom ennom dre ar Spered e-neus roet deom.

Merzoud ar sperejou dre ar feiz e Jezuz Krist

IV. ¹ Va re-muia-karet, arabad eo deoh kredi e n’eus forz pe brofed, med taolit evez war o frofesiou, evid gweled ha dond a reont euz a Zoue, rag kalz a fals-profeded a zo o redeg dre ar bed. ² Diwar an dra-mañ eh anavezit Spered Doue : kement hini a embann Jezuz Krist deuet en eur horv a zo euz a Zoue, ³ ha kement spered ha ne anzav ket ar Jezuz-se, n’eo ket euz a Zoue ; spered an Antikrist eo, ho-peus klevet embann ema o tond, hag azaleg bremañ ema er bed. ⁴ C’hwi va bugaligou hag a zo euz a Zoue a zo treh d’ar brofeded-se, rag m’eo brasoh an hini a zo o chom en ho touez eged an hini a zo er bed. ⁵ Int-i a zo euz ar bed, setu perag ema ganto komzou ar bed, hag e selaou ar bed anezo. ⁶ Ni avad, ni a zo euz a Zoue ; an hini a glask anaoud Doue a zelaou ahanom. Evel-se eo e reom an dibab etre ar spered a wirionez hag ar spered a fazi.

Ar garantez a zeu euz a Zoue

⁷ Va re muia-karet, en em garom an eil egile, rag euz a Zoue e teu ar garantez, ha kement hini e-neus karantez a zo ganet euz a Zoue hag a zeu da anaoud Doue. ⁸ An neb ne gar ket ne anavez ket Doue, rag Doue a zo karantez. ⁹ Setu perag eo deuet karantez Doue d’en em ziskouez en on touez ; e Vab muiakaret e-neus kaset er bed, deom da veva drezañ. ¹⁰ Amañ eo ema ar garantez : n’eo ket ni eo on-eus karet Doue, med eñ eo an hini e-neus karet ahanom, ha kaset e Vab da veza roet e sakrifis evid ar pardon euz ar pehejou. ¹¹ Va re muia-karet, peogwir e-neus Doue or haret evel-se, ni, d’on tro a dle kaoud karantez an eil evid egile. ¹² Doue, n’e-neus den gwelet anezañ biskoaz, med, m’en em garom an eil egile, ema Doue o chom ennon, hag e garantez a zo ennom en he haerra. ¹³ Gand an dra-mañ ez om sur emaom o chom ennañ, hag eñ o chom ennom : perz en e Spered e-neus roet deom. ¹⁴ Ha ni, p’on-eus gwelet gand on daoulagad, ni a zoug testeni e-neus an Tad kaset e Vab da veza Salver ar bed. ¹⁵ Kement-hini a ziskleir eo Jezuz Mab Doue, ema Doue o chom ennañ, hag eñ e Doue. ¹⁶ Ha ni a zo deuet da anaoud ervad, dre ar feiz, ar garantez e-neus Doue evidom. Karantez eo Doue ; an neb a zo o chom er garantez a zo o chom e Doue ha Doue a zo o chom ennañ. ¹⁷ Evel-henn e teu ar garantez da veza peurvad en on touez ; leun a fiziañs e hortozom deiz ar varn, rag evel m’ema eñ, Jezuz, evel-se emaom, ni ivez, er bed-mañ. ¹⁸ N’eus aon ebed er garantez, med ar garantez peurvad a daol an aon er mez, ha gand an aon ar hastiz hag an neb e-neus aon n’eo ket deuet d’eur garantez peurvad. ¹⁹ Ni avad on-eus karantez peogwir eñ eo e-neus or haret da genta. ²⁰ Ma lavar hini pe hini : « me a gar Doue », hag e-neus kasoni ouz e vreur, hennez a zo gaouiad, rag an hini ne gar ket e vreur hag a wel, ne hell ket kared Doue ha na wel ket. ²¹ Ha setu amañ ar gourhemenn on-eus bet digantañ : an neb a gar Doue, ra garo ivez e vreur.

Ar feiz e Doue gwriziennet er garantez

V. ¹ Kement hini a gred eo Jezuz ar Hrist, hennez a zo ganet euz a Zoue, ha kement-hini e-neus karantez evid an Tad, a gar ivez an hini a zo ganet anezañ. ² Anad eo deom e karom bugale Doue pa garom Doue ha pa virom e hourhemennou. ³ Rag an dra-mañ eo kared Doue : mired e hourhemennou, ha n’eo ket e hourhemennou eur zamm pounner, ⁴ peogwir kement-hini a zo ganet euz a Zoue, a zo treh d’ar bed hag ar pez e-neus greet deom beza treh d’ar bed, ar feiz an hini eo. ⁵ Piou eta eo an hini a zo treh d’ar bed, ma n’eo ket an hini a gred eo Jezuz Mab da Zoue. ⁶ Eñ eo Jezuz Krist, an hini a zo deuet dre an dour hag ar gwad, n’eo ket en dour hebken, med en dour hag er gwad, ha test eo ar Spered, rag ar wirionez memez eo ar Spered.

⁷ Tri a zo anezo o rei testeni : ⁸ ar Spered, an dour hag ar gwad, ha ne reont o zri nemed eun testeni hebken. ⁹ Ma tegemerom testeni an dud, testeni Doue a zo brasoh rag testeni Doue eo an hini e-neus roet diwarbenn e Vab. ¹⁰ An hini e-neus feiz e Mab Doue, e-neus ennañ e-unan an testeni-se ; an hini ne gred ket e Doue hennez a ra eur gaouiad anezañ, peogwir ne gred ket en testeni e-neus Doue roet d’e Vab, ¹¹ ha setu amañ an testeni-se : Doue e-neus roet deom ar vuez peurbaduz hag ar vuez-se a zo en e Vab. ¹² An neb e-neus ar Mab e-neus ar vuez, an neb n’e-neus ket Mab Doue n’e-neus ket ar vuez. ¹³ Skrivet am-eus deoh kement-se, evid rei deoh da anaoud ho-peus ar vuez peurbaduz, c’hwi hag a gred e ano Mab Doue. ¹⁴ Ar pez a ra deom beza en asur dirag Doue eo ma selaou ahanom pa vez or goulenn hervez e volontez. ¹⁵ Ha peogwir eh ouzom e selaou or goulennou, n’eus forz pere e vefent, eh ouzom ivez on-eus ar pez on-eus goulennet. ¹⁶ Ma wel hini pe hini e vreur oh ober eur pehed, eur pehed ha na gas ket d’ar maro, dezañ pedi, ha Doue a roio dezañ ar vuez, da vianna ma ne gas ket d’ar maro ar pehed e-neus greet. Eur pehed a zo hag a gas d’ar maro, n’eo ket diwarbenn hennez eo e houlennan pedi. ¹⁷ Kement fallagriez a zo pehed, med kement pehed ne gas ket d’ar maro. ¹⁸ Her gouzoud a reom an neb a zo ganet euz a Zoue ne beh mui, med ar Mab ganet a Zoue a ziwall anezañ hag an hini fallagr n’e-neus ket krog warnañ.

¹⁹ Her gouzoud a reom, ni a zo euz a Zoue, daoust m’ema ar bed a-bez dindan galloud ar Fallagr. Her gouzoud a reom eo deuet Mab Doue hag e-neus roet deom ar Spered evid anaoud an hini-gwirion, ha ni a zo en hini gwirion, en e Vab Jezuz Krist. Eñ eo an hini gwirion, eñ a zo Doue hag ar vuez peurbadel. ²¹ Va bugaligou, taolit evez na ’z afeh e servich ar fals-doueed.