An Testamant Nevez : eil lodenn – Troet e brezoneg gand « Kenvreuriez ar brezoneg » Eskopti Kemper ha Leon, 1988.

Pennad-kinnig

Ar sklav Onesim a zo tehet kuit euz ti e vestr Filemon. Degemeret eo bet gand Paol. Hemañ e-neus degaset anezañ d’ar feiz evel m’e-noa greet dija evid Filemon e-unan. Ha setu ma skriv al lizer-mañ, evid goulenn digand Filemon kaoud ar vadelez da zegemer Onesim, n’eo ket avad evel sklav, med evel eur breur hag e lavar dezañ, diwar hanter-her, rei e frankiz da Onesim.

Lizer da Filemon

¹ Paol, prizoniad Jezuz Krist, hag ar breur Timote, da Filemon, or henlabourer karet, ² da Apia or c’hoar, da Arkip or henstourmer, ha d’an Iliz en em vod en da di, ³ deoh gras ha peoh a-berz Doue on Tad hag a-berz Jezuz Krist an Aotrou.

⁴ Trugarekaad a ran va Doue oh ober dalhmad ano ahanout em fedennou ; ⁵ rag kleved a ran ano euz da garantez hag euz da feiz e-keñver an Aotrou Jezuz, hag e-keñver an oll zent. ⁶ Evel-se e vo frouezuz ar perz a gemerez er feiz, o tiskouez kement a hellom ober evid an Aotrou Krist. ⁷ Rag, kalz levenez ha frealzidigez am-eus bet ablamour d’az karantez, rag frealzet eo bet kalon ar zent drezout-te, breur. ⁸ Setu perag, goude kaoud er Hrist hardisegez da hourhemen dit da zever, ⁹ eo kentoh dre garantez e ran eur goulenn ouzit : ya, me Paol, hag a zo koz, ha bremañ ivez prizoniad Jezuz Krist, ¹⁰ a asped ahanout, evid va mab Onezim, an hini am-eus ganet er prizon. ¹¹ Didalvez eo bet evidout gwechall ha talvoudeg bremañ evidout-te hag evidon-me, ¹² kas a ran anezañ dit endro, eñ hag a zo evel va halon va-unan. ¹³ A galon vad am-bije dalhet anezañ ganin evid va zervicha en da blas, er prizon m’e-maon ablamour d’an Aviel.

¹⁴ Med, n’eo ket fellet din ober netra heb da asant evid n’e-nefe ket ar madober-se tres eun dra greet ganit dre red, med unan greet a galon vad. ¹⁵ Onezim marteze n’eo ket eet kuit diouzit evid eun nebeud amzer, nemed evid beza rentet dit da viken, ¹⁶ n’eo ket evel eur sklav, med evel kalz gwelloh eged eur sklav, evel eur breur karet meurbed. ¹⁷ Ken karet ganin ha na pegement muioh ganit, e-giz den, hag e-giz kristen. Setu eta, evel ma ’z on breur dit er feiz, gra dezañ an degemer az-pije greet din va-unan. ¹⁸ Ha m’e-nije greet gaou ouzit e doare pe zoare, mar deo dleour dit euz tra-pe-dra, laka an dra-ze din war va hont. ¹⁹ Me, Paol a skriv kement-mañ gand va dorn va-unan, me a baeo. Ha ne zegasan ket dit da zoñj out da-unan dleour em heñver, ha te eo an dle-ze. ²⁰ Ya, breur, gortoz a ran kement-se diouzit, ro d’am halon he frealzidigez en Aotrou Krist. ²¹ Gand fiziañs en da zentedigez, am-eus skrivet. Goûd a ouzon e ri muioh c’hoaz eged na lavaran. ²² War eun dro, pourchas din lojeiz, rag fiziañz am-eus, gand sikour ho pedennou, da veza rentet deoh. ²³ Epafras, prizoniad ganin e Jezuz Krist, ho salud ; ²⁴ hag ive Mark, Aristark, Demaz ha Lukaz va henlabourerien. Gras an Aotrou ra vo ganeoh !