An Testamant Nevez : eil lodenn – Troet e brezoneg gand « Kenvreuriez ar brezoneg » Eskopti Kemper ha Leon, 1988.

KOLOSIANED.
Pennad-kinnig

 En Azia-Izella, e Kolos dreist-oll, Juzevien ha payaned a veze dalhmad tabut ganto diwarbenn ar sperejou, ar « halloudegeziou euz an neñv », an êlez hag ar pouez o-devoa war blanedenn an dud ha war mister ar zilvidigez da dizoud. Paol a zegas da zoñj d’ar gristenien eo ar Hrist, e kement ha m’eo krouer hag Aotrou, adsavet da veo, a ren ar bed, a ro lusk d’an Iliz hag a ro buez da beb hini euz e izili. Eñ eo a dle peb kristen kemer skouer diwarnañ.

Lizer d’ar Golosianed

Saludou

I. ¹ Paol, abostol Jezuz Krist, dre volontez Doue hag ar breur Timote, ² d’ar zent a zo e Kolos, breudeur fidel er Hrist, gras ha peoh a-berz Doue on Tad. ³ Trugarekaad a reom Doue, Tad Or Zalver Jezuz Krist, o pedi anezañ heb ehan evidoh, ⁴ rag, klevet on-eus aber ano euz ho feiz e Jezuz Krist, hag euz ho karantez evid an all zent, ⁵ en abeg d’an esperañs a zo ouz ho kortoz en neñvou, an esperañs-se a zo bet embannet deoh dre gomz ar wirionez, an Aviel ⁶ a zo erruet beteg ennoh ; evel ma toug frouez ha ma kresk dre ar bed a-bez, evel-se ivez e ra en ho touez, abaoe an deiz m’ho-peus klevet hag anavezet e gwirionez gras Doue, ⁷ hervez ar gelennadurez roet deoh gand Epafras, or mignon hag or hompagnun er zervich ; eñ, hag a zo ministr fidel er Hrist en on leh, ⁸ e-neus displeget deom euz peseurt karantez oh karget gand ar Spered.

Ar bedenn evid an Iliz

⁹ Setu perag, ni ivez diouz on tu, azaleg an deiz m’on-eus klevet kement-se, ne ehanom ket da bedi evidoh. Goulenn a reom digand Doue ma vefeh peur-anaoudeg euz e volontez, leun a furnez hag a skiant speredel, ¹⁰ ma renfeh eur vuez din euz an Aotrou, o klask plijoud dezañ e peb tra ; c’hwi a reno neuze eur vuez troet d’ar mad ha frouezuz e peb doare hag a gresko dre an anaoudegez a Zoue. ¹¹ Kennerzet e vezoh, e peb doare, dre nerz e hloar ha douget evel-se da houzañv ha da zelher mad e peb doare.

Kan ar Hrist Mestr ar bed

¹² Gand levenez, trugarekait an Tad e-neus ho lakeet gouest da gaoud perz e lod ar zent er sklerijenn. ¹³ On diframmet e-neus euz galloud an deñvalijenn hag on degaset e rouantelez e vab karet, ¹⁴ ennañ on-eus an daspren, ar pardon euz ar pehejou, ¹⁵ eñ eo ar skeudenn euz an Doue na weler ket, ar henta ganet euz an oll grouadurien, ¹⁶ rag ennañ eo bet krouet peb tra, en neñv ha war an douar, an traou a weler hag an traou na weler ket : troniou, aotroneziou, beliou, galloudegeziou. Drezan hag evitañ eo krouet peb tra. ¹⁷ Eñ, a zo anezañ araog peb tra hag ennañ eo e kendalh peb tra da veza. ¹⁸ Eñ eo ar penn euz ar horv m’eo an Iliz. Ar penn kenta eo, ar henta ganet a-douez ar re varo, evid kaoud ar renk kenta e peb tra, ¹⁹ rag plijet eo gand Doue lakaad da jom ennañ al leunder a-bez, ha lakaad d’en em gleved drezañ hag evitañ an oll draou war an douar hag en neñv, o veza lakeet ar peoh dre ar gwad euz ar groat. ²¹ Ha c’hwi hag a oa gwechall tud estren hag enebourien dre ho kalon troet d’an oberou fall ; ²² setu m’e-neus bremañ Doue hoh adunvaniet e korv-den e Vab, dre e varo evid ma teufeh da veza dirazañ santel, direbech ha didamall. ²³ Med red eo e talfeh mort ha stard er feiz heb lezel da veza distaget diouz esperañs an Aviel, ho-peus klevet hag a zo bet embannet d’an oll grouadurien a zo dindan an neñvou, ha degouezet eo din-me, dond da vez a ar ministr euz an esperañs-se.

 Stourmad an abostol

²⁴ Er poaniou a houzañvan evidoh e kavan bremañ va levenez, hag ar pez a jom da houzañv evid peurleunia trubuillou Jezuz Krist, eo a zougan em horv va-unan evid e gorv dezañ, da lavared eo an Iliz. ²⁵ Anezi on deuet da veza ar ministr, dre ar garg e-neus fiziet ennon en ho keñver : peurembann penn-da-benn Komz Doue : ²⁶ ar mister dalhet kuz beteg henn, a hed-a-hed ar hanvejou, ha bremañ diskleriet d’ar zent, ²⁷ fellet eo dezañ rei da anaoud dezo peseurt teñzor a hloar eo ar mister-se e keñver ar bayaned, ar Hrist en ho touez, an esperañs euz ar hloar. ²⁸ Eñ eo a embannom o kuzulia peb hini, o kelenn peb hini, e peb furnez evid degas peb hini d’ar zantelez er Hrist. ²⁹ Evid kement-se e poanian, o stourm gand e nerz dezañ a zo e labour gallouduz ennom.

II. ¹ Rag felloud a ra din e oufeh pegent garo eo va stourmad evidoh, evid tud Laodise hag evid kement a re all ha n’o-deus morse va gwelet, me va-unan ; ² me a fell din e vefe evel-se kennerzet o halon ha ma vefent unanet ken stard er garantez ma teufent evel-se da dizoud en e oll binvidigeziou leunder ar spered hag an anaoudegez euz mister Doue : ar Hrist, ³ a zo kuzet ennañ oll deñzoriou ar furnez hag ar skiant. ⁴ Kement-se a lavaran evid mired na zeufe den d’ho touella gand komzou flour. ⁵ Rag n’emaon ket ganeoh a gorv, gwir eo, med a spered emaon ganeoh, laouen ouz ho kweled fidel d’ho karg ha stard en ho feiz e Jezuz Krist.

Peb tra en Aotrou Krist

⁶ Kendalhit eta gand hoh hent en Aotrou Krist, evel m’ho-peus resevet anezañ. ⁷ Bezit gwriziennet ha fountet ennañ, starteet evel-se er feiz evel m’eo bet kelennet deoh, ha leun-barr a anaoudegez vad. ⁸ Diwallit na zeufe den d’ho lakaad da fazia dre brederiouriez a zo eun douellèrèz goullo, hervez envor pobleg an dud, hervez galloudegeziou ar bed ha n’eo mui hervez ar Hrist. ⁹ Rag ennañ ema o chom e doare eur horv, oll leunder an doueelez. ¹⁰ Ha c’hwi ho-peus bet dreist ho kwalh gantañ, eñ hag a zo ar penn euz peb beli ha peb galloud.

¹¹ Ennañ oh bet amdrohet, eun amdroh ha n’e-neus ket bet dorn an den perz ebed ennan, hag e-neus tennet diwarnoh ho korv-natur, setu aze amdroh ar Hrist ; ¹² lakeet er bez a-unan gantañ d’ar Vadeziant, ennañ ivez ez oh bet adsavet a-douez ar re varo. ¹³ Ha c’hwi hag a oa maro ablamour d’o pehejou ha d’an diamdroh ma ’z oa ho korv, Doue e-neus roet buez deoh a-unan gantan : pardonet e-neus deom on oll behejou  ; ¹⁴ freuzet e-neus al lizer-dle a yee a-eneb deom gand e hourhemennou ha tennet e-neus anezan kuit, ha staget anezañ ouz ar groaz. ¹⁵ Diberhennet e-neus an Arheleziou hag ar hallouduziou ha diskouezet e-neus anezo da hoapèrèz an dud o stleja anezo gantañ e kerzadenn a enor ar groaz.

¹⁶ Neuze eta, arabad da zen barn ahanoh diwar-benn boued pe evach, diwarbenn eur gouel, pe al loar nevez, pe ar zabad ; n’eo kement-se nemed eur skeudenn euz ar pez a oa da zond, med ar wirionez a zeu euz ar Hrist. ¹⁸ Na lezit ket laerez an treh diganeoh gand tud en em blij e devosionou, e servich an êlez, a vev gand gweledigeziou hag o spered danvezel a ra dezo beza c’hwezet gand sorhennou. ¹⁹ Ne jomont ket unanet gand ar penn a denn anezañ ar horv a-bez, unanet gand e goublou hag e stagellou, ar hresk a ro Doue dezañ.

Frankiz an dud badezet

²⁰ Peogwir ez oh marvet gand ar Hrist da draou ar bed, perag plega da reolennou evel pa vefeh c’hoaz o veva er bed : arabad kemered, arabad tañva, arabad touch… ! ²² Ha kement-se evid traou hag a ya da netra dre ma vezont implijet ! Setu ar gourhemennou ha kelennaduriou an dud. ²³ Kaer o-deus kaoud eun doare a fumez, o relijion dezo o-unan o devosion hag o ferz da ziouered n’o-deus talvoudegez ebed, n’int mad nemed da blijoud d’ar horv.

III. ¹ Peogwir oh savet da veo a-unan gand ar Hrist, klaskit madou an neñv, el leh m’ema ar Hrist azezet en tu dehou da Zoue. ² En neñv ema ar pal da dizoud ha n’eo ket war an douar, ³ rag c’hwi a zo maro hag ho puez a zo kuzet, a-unan gand ar Hrist, e Doue. ⁴ P’en em ziskouezo ar Hrist, ho puez, neuze c’hwi ivez a vo gwelet gantañ e kreiz e hloar. ⁵ Lakit eta da vervel ennoh ar pez a zo euz an douar : gadaliez, hudurnez, youlou direiz, c’hoantegeziou fall hag ar skrapèrèz a zo eun idolèrèz. ⁶ Diwar gement-se e teu kounnar Doue war an dud difeiz. ⁷ Setu aze penaoz e veveh gwechall. Kement-se oa ho puez. ⁸ Bremañ eta, deoh-hwi ivez en em zistroba a gement-se : kounnar, buanegez, falloni, kunujennou, komzou louz deuet diwar ho muzellou. ⁹ Gaou ebed mui kenetrezoh, rag taolet ho-peus kuit diouzoh ho toareou koz da veva, ¹⁰ evid kemer doareou nevez an den renevezet e anaoudegez ar skeudenn euz e grouer.

¹¹ N’eus aze mui Gresian ha Juzeo, amdrohet ha diamdrohet, barbared ha Sited, sklaved ha tud frank, n’eus nemed ar Hrist, a zo peb tra e peb hini. ¹² Peogwir oh tud dibabet, santelleet, ha karet gand Doue, bezit eta truezuz, madelezuz, izel ha tener a galon, pasiañt. ¹³ En em houzañvit ha m’e-neus hini pe hini da glemm euz unan all bennag, pardonit an eil d’egile evel m’e-neus an Aotrou pardonet deoh grit ivez kemend-all. ¹⁴ Ha dreist peb tra lakit ennoh ar garantez, setu aze al liamm parfed. ¹⁵ Peoh or Zalver da ren en ho kalonou, d’ar peoh-se ez oh bet oll galvet en eur horv hebken, bezit leun a drugarez. ¹⁶ Ra vo komz ar Hrist o chom en ho touez gand e oll binvidigez, kentelit ha kuzulit an eil egile gand kalz a fumez. Kanit da Zoue en ho kalon hoh anaoudegez vad gand salmou, himnou ha kantikou speredel. ¹⁷ Ha kement a hellit lavared pe ober ra vo bepred en ano an Aotrou Jezuz, o trugarekaad drezañ Doue an Tad.

¹⁸ C’hwi gwragez, bezit doujuz d’ho priejou evel m’eo deread en Aotrou. ¹⁹ C’hwi gwazed, karit ho kwragez, na hegasit ket anezo. C’hwi bugale, sentit e peb tra ouz ho tud kement-se a zo plijuz d’an Aotrou. ²¹ Kerent, arabad eo deoh hegasi ho pugale gand aon na zeufent da fallgaloni. ²² C’hwi, sklaved sentit e peb tra ouz ho mistri euz an douar-man, servichit anezo, n’eo ket ablamour m’emaer war evez ahanoh, evel ma klaksfeh plijoud d’an dud, med gand eur galon zidro, o touja d’an Aotrou. ²³ Ho labour, n’eus forz pehini e vefe, grit anezañ a galon vad, evel pa vefe evid an Aotrou, ha n’eo ket evid an dud ; ²⁴ o houzoud ho-pezo digand an Aotrou an hêrez da hobr. Ar mestr eo ar Hrist, o servicha anezañ emaoh. ²⁵ An hini a zo disleal a vo paeet hervez e zislealded. Ne vez ket greet diouz dremm an dud.

 Aliou da beb hini

IV. ¹ Mistri bezit just ha leal e keñver ho sklaved, o houzoud ho-peus c’hwi eur mestr en neñvou. ² Kendalhit gand ar bedenn, chomit war evez, o trugarekaad. ³ War ar memez tro, pedit ivez evidom-ni, ma teuio Doue da zigeri eun nor evid or prezegèrèz, ma ’h embannin mister ar Hrist – m’emaom er prizon ablamour dezañ – ma ’h embannin anezañ evel m’eo red din henn ober. ⁵ Grit evid ar gwella evito an darempredou gand an dud digristen. ⁶ Ra vo ho komzou bepred hegarad, ha morse trenk, mad da respont da beb hini evel ma tere. ⁷ Kement tra diwar va fenn a vo kemennet deoh gand Tichik, ar breur karet, ar ministr leal, va hompagnun e servich an Aotrou. ⁸ E gaset am-eus deoh a-ratoz-kaer, evid rei deoh kelou ahanon ha kennerza ho kalon. ⁹ Onezim, ar breur fidel ha karet meurbed, a yelo gantañ. Unan ahanoh eo, kement a dremen aman a roio deoh da anaoud.

¹⁰ Ho saludi a ra Aristark, a zo er prizon asamblez ganin hag ivez Mark, kenderv Barnabaz ; resevet ho-peus kemennadurez diwar e benn : ma teu davedoh, grit degemer vad dezañ. ¹¹ Ho saludi a ra ivez Jezuz, an hini a anver Justus. N’eus nemeto e-touez ar Juzevien, o labourad ganin, evid rouantelez Doue. Eur frealzidigez int bet evidon. ¹² Epafras, ho kenvroad ho salud ivez. Ar zervicher-se da Jezuz Krist ne ehan ket da stourm evidoh dre ar bedenn, evid ma talhfeh da veza parfed ha da zenti penn-da-benn ouz peb bolontez Doue.

¹³ An testeni-man a roan dezañ : kalz a boan a gemer evidoh, evid tud Laodise, ha Seropolis. ¹⁴ Ho saludi a ra Lukaz, or mignon ar medesin, hag ivez Demas.

¹⁵ Saludit ar vreudeur euz Laodise, ha ivez Nimfa, hag an Iliz en em vod en e di ¹⁶ Pa vo bet lennet al lizer ganeoh, grit ma vo lennet ivez e Iliz Laodise. ¹⁷ Lavarit da Arkip : taol evez ouz ar ministrèrèz az-peus resevet en Aotrou evid henn ober penn-da-benn.

¹⁸ Ar zalud a zo skrivet gand va dorn va-unan. Dalhit soñj euz va jadennou. Ar hras ra vo ganeoh.