Pevare sizunvez war ar bloaz C

Euz ar 30 a viz Genver d’ar 5 a viz C’hwevrer 2022

Pevare sul war bloaz

Lk 4, 21-30 (C)

Bez’ e oa Jezuz e sinagogenn Nazared, hag eur wech lennet gantañ ar pennad tennet euz leor Izaïaz, ²¹ e lavaras d’e genvroiz :

— « Hirio eo kaset da benn ar homzou-ze euz ar Skritur emaoh o paouez kleved ».

²² Rentet e veze testeni dezañ gand an oll, ha bamet e oant gand ar homzou leun a hras a zeue euz e henou. Hag e lavarent :

— « Ha n’eo ket hemañ mab Jozef ? »

²³ Med lavared a reas Jezuz dezo :

— « Moarvad, emaoh o vond da lavared din ar hrennlavar : Medisin, ro ar pare dit da-unan ! Klevet on-eus pebez traou kaer az-peus greet e Kafarnaom ; gra kemend-all amañ en da vro ».

²⁴ Lavared a reas Jezuz ouspenn :

— « E gwirionez, e lavaran deoh : Profet e-béd ne vez digemeret mad en e vro. ²⁵ E gwirionez, e lavaran deoh : Bez’ e oa kalz intañvezed e Bro-Izrael, en amzer Elïaz, pa jomas kloz an oabl e-pad tri bloaz hanter, ha pa oe eur gernez vraz dre ar vro a-béz. ²⁶ Koulskoude, ne oe ket kaset Elïaz etrezeg hini e-béd anezo, med d’eun intañvez estren euz kêr Sarepta, e Bro-Zidon.

²⁷ « En amzer Elizeaz, e oa kalz tud lor en Izrael, hag hini e-béd anezo n’eo bet pareet, nemed Naaman ar Sirïad ».

²⁸ O kleved ar homzou-ze, ez ejont oll e fulor er zinagogenn. ²⁹ Sevel a rejont en o-zav, ha bounta anezañ er-mêz euz kêr. Kas a rejont anezañ beteg penn eun tarroz euz an dorgenn, m’eo savet kêr warnañ, evid stlepel anezañ d’an traoñ.

³⁰ Med, tremen a reas Jezuz dre o-zouez, hag ez eas gand e hent.

Lun

Mk 5, 1-20

¹ Digouezoud a reas Jezuz hag e ziskibien en tu all d’ar mor, e bro ar Jerazenianed.

² Pa oa Jezuz o tiskenn euz ar vag, e teuas en arbenn dezañ eun dén dalhet gand eur spered louz, o tond euz ar beziou. ³ Er beziou e oa o chom, ha ne helle mui dén e-béd staga anezañ gand eur jadenn zokén. ⁴ Rag aliez e oa bet staget gand hualou ha chadennou, med torret e oa bet gantañ ar chadennou, ha brevet an hualou, ha ne oa dén e-béd gouest da zond a-benn anezañ.

⁵ Noz ha deiz, e veze e-mesk ar beziou, pe war an torgennou, o youhal pe o tispenn e gorv gand mein.

⁶ O weled Jezuz a-ziabell, e tiredas hag e stouas dirazañ. ⁷ A vouez kreñv, e youhas :

— « Petra a glaskez ouzin, Jezuz, Mab Doue Uhel-Meurbéd ? Aspedi a ran ahanout, en ano Doue, ned-a ket da drubuilla ahanon ».

⁸ Rag Jezuz a lavare dezañ :

— « Kerz er-mêz euz an dén-ze, spered hudur ».

⁹ Goulenn a ree outañ :

— « Pe ano out ? »

— « Va ano, emezañ, eo bandennad, rag kalz a zo ahanom ».

¹⁰ Pedi hag aspedi a ree anezañ da jom hep kas anezo kuit euz ar vro. ¹¹ Eno e oa, diouz kostez ar menez, eur vandennad vraz a voh o klask o boued. ¹² Aspedi Jezuz a reas ar sperejou hudur en eur lavared :

— « Kas ahanom er moh, evid ma ’z aim enno ».

¹³ Aotre a roas Jezuz dezo, hag ez ejont er-mêz euz an dén evid mond e-barz ar moh, hag en em daolas ar vandennad er mor, diwar an tornaod. Eun daou vil bennag e oa anezo, hag ez int bet beuzet er mor.

¹⁴ Tehed a reas kuit ar re a oa o tiwall anezo, hag e oe kaset ar helou ganto e kêr ha war ar-mêz. Hag e teuas an dud da weled ar péz a oa c’hoarvezet.

¹⁵ Dond a reont beteg Jezuz, hag e welont, war e azez, an dén bet dalhet gand an droug-spered, gwisket, hag e skiant vad gantañ, eñ hag a oa bet an droug-spered bandennad ennañ. Hag e krogas ar spont enno.

¹⁶ Konta a reas ar re o-doa gwelet ar péz a oa c’hoarvezet gand an dén dalhet, ha diwar-benn ar moh. ¹⁷ Aspedi a rejont Jezuz da bellaad diouz o bro.

¹⁸ Pa oa Jezuz o pignad er vag, e oe pedet gand an hini a oa bet dalhet gand an droug-spered, da lezel anezañ da jom gantañ. ¹⁹ Ne roas ket Jezuz aotre dezañ, avad. Med lavared a reas :

— « Kee d’ar gêr da gaoud da dud, ha ro dezo da houzoud kement a zo bet greet gand an Aotrou Doue evidout, hag an drugarez diskouezet en da geñver gantañ ».

²⁰ Mond a reas kuit an dén, hag en em lakaad da embann e bro an Degkêr, kement a oa bet greet gand Jezuz evitañ, hag e oe sebezet an oll.

Meurz 1 a viz C’hwevrer,
Santez Berhed, abadez Kildare
Memor e Eskoptiou Kemper ha Sant-Brieg

Lk 10, 38-42

³⁸ E-pad ma oa Jezuz hag e ziskibien oh ober hent, e tigouezas dezañ mond en eur gêriadenn, hag e oe digemeret gand eur vaouez, Marta heh ano, en he zi.

³⁹ Bez’ he-doa houmañ eur hoar, Mari heh ano : azezet e oa e-harz treid Jezuz, evid selaou e gomzou, ⁴⁰ e-keid ha ma oa Marta oh ober war-dro an ti, prés warni e-leiz. Chom a reas a-zav, hag e lavaras :

— « Aotrou, ha n’out ket nehet o weled va hoar o lezel ahanon va-unan da ober ar zervich ? Lavar dezi ’ta, dond da zikour ahanon ».

⁴¹ Med, respont a reas an Aotrou dezi :

— « Marta ! Marta ! nehet out ha tregaset gand eur bern traou. Unan hepkén a zo ezomm anezañ. ⁴² Dibabet he-deus Mari al lodenn wella, ha ne vo ket lamet diganti ».

Meurz

Mk 5, 21-43

²¹ Treuzet adarre ar mor er vag gand Jezuz, ha dre ma oa tost ouz an aot, e oa eur bobl tud bodet en-dro dezañ.

²² Neuze, e teu beteg ennañ unan euz renerien ar zinagogenn, Jaïr e ano, hag o weled anezañ, e kouez d’an douar e-harz e dreid, ²³ o pédi stard anezañ en eur lavared :

— « Bez’ ema va merhig war he zremeñvan. Deus da astenn da zorn warni, ma vo pareet ha ma chomo beo ».

²⁴ Mond a reas Jezuz gantañ, ha kalz a dud d’e heul, ken ma oa gwasket ganto.

²⁵ Padal, e oa eur vaouez, klañv gand ar holl-gwad abaoe daouzeg vloaz. ²⁶ Kalz he-doa bet da houzañv a-berz e-leiz a vedisined. Dispignet e oa bet ganti kement a oa en he herz, hep kaoud gwellaenn e-béd, med kentoh o vond war wasaad.

²⁷ Klevet ganti ano euz Jezuz, e teuas e-touez an dud, a-dreñv dezañ, hag e touchas ouz e vantell.

²⁸ Lavared a ree dezi heh-unan :

— « Ha pa ne rafen nemed touch ouz e zillad, e vin pareet ».

²⁹ Ha kerkent, e torras ar holl-gwad enni, hag e santas en he horv e oa pareet euz he hleñved.

³⁰ Kerkent, e ouezas Jezuz e oa eet eur vertuz er-mêz anezañ. Distrei a reas war-zu an dud en eur houlenn :

— « Piou e-neus touchet ouz va dillad ? »

³¹ Lavared a ree e ziskibien dezañ :

— « Gweled a rez ez out gwasket gand e-leiz a dud, hag e houlennez piou e-neus touchet ouzit ? »

³² Med selled a ree Jezuz en-dro dezañ, evid klask gweled an hini he-doa greet kement-se. ³³ Neuze, en eur grena gand an aon, rag gouzoud a ouie petra a oa c’hoarvezet ganti, e teuas ar vaouez hag e kouezas e-harz e dreid, hag e lavaras dezañ ar wirionez penn-da-benn.

³⁴ Lavared a reas Jezuz dezi avad :

— « Va merh, da feiz he-deus saveteet ahanout. Kerz e peoh, ha bez pareet euz da gleñved ».

³⁵ E-pad ma oa c’hoaz o komz, e tigouezas tud euz ti ar rener-zinagogenn da lavared dezañ :

— « Maro eo da verh. Perag direnka c’hoaz ar Mestr ? »

³⁶ Med o veza klevet ar homzou-ze, e lavaras Jezuz d’ar rener-zinagogenn :

— « Arabad dit kaoud aon. Bez feiz nemetkén ».

³⁷ Ne roas aotre da zén e-béd da vond asamblez gantañ, nemed da Bèr, da Jakez ha da Yann breur Jakez. ³⁸ En em gaoud a reont e ti ar rener-zinagogenn. Gweled a ra Jezuz tud, o ouela hag o youhal forz, ha trouz braz ganto.

³⁹ Eet en ti, e lavar Jezuz dezo :

— « Perag e rit trouz, ha perag e ouelit ? N’eo ket maro ar plahig. Kousket eo ! »

⁴⁰ Ha goap a ree an dud anezañ. Med ober a ra dezo oll mond er-mêz ; kemer a ra gantañ tad ha mamm ar plahig, hag an diskibien deuet d’e heul, ha mond el leh ma oa ar plahig. ⁴¹ Kregi a ra en he dorn, hag e lavar dezi :

— « Talita koum ! da lavared eo : Plahig, me lavar dit : sao en da zav ! 

⁴² Kerkent e oa ar plahig en he-zav, hag e stagas da vale, rag daouzeg vloaz e oa. Kerkent ive, setu an dud-se er-mêz anezo o-unan, ken souezet e oant. ⁴³ Difenn stard a reas Jezuz outo na vefe gouezet kement-se gand dén e-béd, hag e lavaras rei dezi da zrebi.

Merher 2 a viz C’hwevrer, Gouel Jezuz kaset d’an Templ
(Gouel ar Chandelour)

Lk 2, 22-40

²² Pa oe deuet ar mare merket gand Lezenn Voïzez, evid beza glanneet, e oe kaset Jezuz gand e dud da Jeruzalem, evid beza kinniget d’an Aotrou, ²³ hervez m’eo skrivet el Lezenn : « Pep paotr kenta-ganet zo da veza gouestlet d’an Aotrou ».

²⁴ Deuet e oant ive evid kinnig eur zakrifis, hervez m’eo skrivet e Lezenn an Aotrou : eur houblad turzunelled pe diou goulmig.

²⁵ Bez’ e oa, neuze, e Jeruzalem, eun dén anvet Simeon, dén just hag a zoujañs Doue. Gortoz a ree ar frealzidigez da zond evid pobl Izrael, hag e oa ar Spered-Santel warnañ.

²⁶ Roet e oa bet dezañ da anaoud gand ar Spered-Santel, ne welje ket ar maro a-raog beza gwelet Mesïaz an Aotrou.

²⁷ Poulzet gand ar Spered-Santel, e teuas d’an Templ, pa vedo tad ha mamm ar Mabig Jezuz o tigas anezañ evid ober en e-geñver kement a oa hervez al Lezenn. ²⁸ Kemer a reas Simeon ar hrouadur etre e zivreh, hag e veulas Doue en eur lavared :

²⁹ « Bremañ, ô Mestr, e hellez lezel da servicher
« da vond e peoh, hervez da lavar,
³⁰ « rag gwelet o-deus va daoulagad da zilvidigez,
³¹ « an hini bet kempennet ganit a-viskoaz,
war wél an oll vroiou :
³² « ar sklêrijenn a yelo war ar poblou payan
« hag a vo gloar Izrael da bobl ».

³³ Souezet e oa e dad hag e vamm, gand kement a glevent diwar e benn. ³⁴ Rei a reas Simeon e vennoz dezo, hag e lavaras da Vari, e vamm :

— « Setu m’ema ar hrouadur-mañ o kas da goll, hag o kas da veza salvet kalz a dud en Izrael ; bez’ e vo eur zîn, hag a lakaio enebiez da zevel war e goust, ³⁵ ken na vo da galon dit-te treuzet gand eur hleze. Evel-se, e vo diskuliet ar zoñjou kuzet e kalon eur halz a dud ».

³⁶ Eno e oa ive eur brofetez : Anna, merh da Fanuel, euz rummad Azer. Oajet braz e oa. Goude beza bevet seiz vloaz gand he fried war lerh an dimezi, ³⁷ e oe intañvezet hag e oa d’ar mare-ze pevar bloaz ha pevar-ugent.

Ne guitee ket an Templ, o servicha Doue noz-deiz, er yun hag er bedenn.

³⁸ Digouezet d’an eur-ze end-eün, en em lakeas d’he zro da veuli Doue. Ha komz a ree euz ar bugel d’an oll dud a oa o hortoz silvidigez Jeruzalem.

³⁹ Eur wech echu ganto kement a oa da ober hervez Lezenn an Aotrou, ez ejont en-dro da Vro-Halilea, da Nazared o hêr. ⁴⁰ Hag e kreske ar bugel, nerz o tond dezañ ; leun e oa a furnez, ha gras Doue a oa warnañ.

Yaou

Mk 6, 7-13

⁷ Gelver a reas Jezuz an Daouzeg, hag e stagas da gas anezo daou-ha-daou, en eur rei dezo galloud war an droug-sperejou.

⁸ Gourhemenn a reas dezo kas netra all ganto nemed eur vaz : na tamm bara, na bisah, na moneiz en o gouriz.

⁹ — « Lakit en ho treid eur re zandalennou, ha na gemerit ket diou dunikenn ».

¹⁰ Lavared a ree dezo c’hoaz :

— « E kement leh ma ’z eot en eun ti, chomit eno beteg ma ’z eot kuit ahano. ¹¹ Ma ne vezit ket digemeret na selaouet e leh pe leh, it kuit en eur heja ar boultrenn diouz ho treid, ma vo kement-se eun testeni a-eneb dezo.

¹² Mond a rejont en hent, hag e prezegent d’an dud e oa réd dezo trei ouz Doue. ¹³ Kas a reent kuit diaoulou e-leiz, ha war galz a dud klañv, e skuillent beradou eoul santel, ma vezent pareet gantañ.

Gwener

Mk 6, 14-29

¹⁴ Kleved a reas ar roue Herodez ano euz Jezuz, rag brudet e oa deuet e ano da veza.

Lavaret e veze : « Yann ar Badezour eo, adsavet a-douez ar re varo, hag e labour ennañ ar galloud da ober burzudou ».

¹⁵ Lavaret e veze gand reou all : « Elïaz eo ». Lod all : « Eur profet eo, heñvel ouz unan euz or profeted ».

¹⁶ O kleved kement-se, e lavare Herodez : « Yann, an hini am-eus lakeet dibenna, hennez eo a zo adsavet da veo ».

¹⁷ Evid gwir, e-noa lakeet Herodez paka Yann ha chadenna anezañ er prizon, abalamour da Herodiadez : deuet e oa houmañ da veza gwrég da Herodez daoust ha ma oa pried d’e vreur Filip. ¹⁸ Lavared a ree Yann da Herodez : « N’az-peus ket ar gwir da zelher ganit gwrég da vreur ».

¹⁹ Kasoni he-doa eta Herodiadez outañ, hag he-doa c’hoant da gas anezañ d’ar maro, med ne helle ket, ²⁰ rag aon e-noa Herodez ouz Yann, o houzoud e oa eun dén just ha santel ; difenn a ree anezañ. P’e-neze klevet anezañ, e veze nehet braz, ha koulskoude e plije dezañ selaou anezañ.

²¹ Med digouezoud a reas eun dro vad, pa roas Herodez, da geñver e zeiz-ha-bloaz, eur bañvez d’e dud e karg, d’e ofïserien ha d’an dud a reñk uhel euz Bro-Halilea.

²² Dond a reas merh Herodiadez da zañsal, hag e plijas da Herodez ha d’e gouvidi. Neuze, e lavaras ar roue d’ar plah yaouank :

— « Goulenn diganin ar péz a gerez, hag e roin dit ».

²³ Hag e touas dezi :

— « Kement a houlenni diganin, a roin dit, ha pa vefe an hanter euz va rouantèlèz ».

²⁴ Mond a reas ar plah er-mêz, hag e lavaras d’he mamm :

— « Petra a houlennin ? »

Respont a reas hi :

— « Penn Yann, ar Badezour ».

²⁵ Gand mall, e tistroas ar plah yaouank da gaoud ar roue, hag e lavaras dezañ :

— « Felloud a ra din, e rofez din dioustu, war eur plad, penn Yann-Vadezour ».

²⁶ Rannet braz e oe kalon Herodez, med abalamour d’e le ha d’e gouvidi, ne fellas ket dezañ nah he goulenn outi.

²⁷ Dioustu, e kasas ar roue eur gward, gand an urz da zigas penn Yann. Mond a reas ar gward da zibenna Yann en e brizon. ²⁸ Digas a reas ar penn war eur plad, rei anezañ d’ar plah yaouank, hag ar plah yaouank a roas anezañ d’he mamm.

²⁹ Pa glevas diskibien Yann ar helou-ze, e teujont da gemer e gorv, hag e lakejont anezañ en eur béz.

Sadorn

Mk 6, 30-34

³⁰ Bodet en-dro da Jezuz, e tisplegas an ebestel dezañ kement o-doa greet ha kelennet. ³¹ Hag e lavaras Jezuz dezo :

— « Deuit en eul leh distro diouz an dud, evid diskuiza eun tammig ».

Ken stank e oa an dud o vond hag o tond en-dro dezo, ma n’o-doa ket zokén amzer da zebri. ³² Gand ar vag ez ejont kuit, da gaoud eul leh distro, evid beza en o fart o-unan.

³³ Med gwelet int bet o vond kuit, ha komprenet eo bet gand kalz a dud da beleh e oant o vond. War o zroad, e tiredjont di, euz an oll gêriou, hag e oent digouezet en o-raog.

³⁴ En eur ziskenn euz ar vag, e welas Jezuz tud e-leiz, hag e-noe truez outo, abalamour ma oant evel deñved, ha pastor e-béd da ober war o zro. Staga a reas neuze da gelenn anezo war galz a draou.