Daouzegved sizunvez war ar bloaz (B)

Euz an 23 d’an 29 a viz Mezeven 2024

Daouzegved sul war ar bloaz

Mk 4, 35-41 (B)

³⁵ En deiz-se, deuet ar pardaez-noz, e lavaras Jezuz d’e ziskibien :

— « Treizom da vond d’an tu all ».

³⁶ Goude beza lezet an dud, e kemerjont Jezuz ganto er vag, evel ma oa ; hag e oa bagou all ouz e heul.

³⁷ Sevel a reas neuze, eur barr avel diroll. Lammad a ree an tarziou er vag, beteg dezi beza karget a zour.

³⁸ Kousket e oa Jezuz avad, war an dorchenn, e penn-a-dreñv ar vag. Dihun a reont anezañ o lavared :

— « Mestr, kollet om ! ne ra netra kement-se dit ?

³⁹ Eur wech dihunet, e hourdrouzas an avel, hag e lavaras d’ar mor :

— « Chom sioul ! Ro peoh ! »

Ha terri a reas an avel, hag e renas eur peoh kaer.

⁴⁰ Neuze, e lavaras Jezuz dezo :

— « Perag kaoud aon evel-se ? N’ho-peus ket c’hoaz ar feiz ? »

⁴¹ Hag e krogas eur spont braz enno, hag e lavarent kenetrezo :

— « Piou ’ta eo hemañ, pa zent outañ koulz an avel hag ar mor ? »

Lun 24 a viz Mezeven
Gouel-Meur sant Yann-Vadezour

Lk 1, 57-66.80

⁵⁷ Deuet d’heh amzer, e lakeas Elizabed eur mab er béd. ⁵⁸ Klevet gand heh amezeien hag he herent e-noa an Aotrou Doue diskouezet e drugarez e keñver Elizabed, e rojont da houzoud e oant laouenn ganti.

⁵⁹ D’an eizved devez, e teujont da amdroha ar hrouadur, hag e felle dezo rei dezañ ano e dad : Zakarïaz.

⁶⁰ Lavared a reas e vamm, avad :

— « Nann, ne vo ket ; Yann a vo e ano ».

⁶¹ Med, lavared a reas ar re all dezi :

— « N’eus dén e-béd en da gerentiez, o tougenn an ano-ze ».

⁶² Neuze, e houlennjont ouz e dad, dre jestrou, pe ano e felle dezañ rei d’e vab. ⁶³ Goulennet gantañ eun daolennig, e skrivas warni : « Yann eo e ano ». Hag e oe souezet an oll.

⁶⁴ D’an ampoent, e tigoras e henou, hag e teuas e deod da veza distagellet : komz a ree ha meuli Doue.

⁶⁵ Skoet e oe neuze, gand an doujañs, an amezeien, ha dre veneziou Bro-Judea, e rede ar vrud euz ar péz a oa c’hoarvezet. ⁶⁶ Ha kement hini a gleve ano euz kement-se, o dalhe en o halon, hag a lavare :

— « Petra a zeuio ar bugelig-ze da veza ? »

Hag e gwirionez, e oa dorn Doue gantañ.

⁸⁰ Kreski a ree ar hrouadur ha digeri e spered. Mond a reas da jom en dezert beteg an deiz m’ en em ziskouezas da bobl Izrael.

Meurz

Mz 7, 6.12-14

Bodet e ziskibien en-dro da Jezuz war ar menez, e lavare dezo :

⁶ « Na roit ket d’ar chas ar péz a zo sakr, ha na daolit ket ho perlez d’ar moh, gand aon na zeufent da bresa anezo, ha da drei war-zu ennoh evid drailla ahanoh.

¹² « Kement ho-peus c’hoant eta, e rafe ar re all evidoh, grit kemend-all, c’hwi ive evito : setu aze ar péz a lavar al Lezenn hag ar Brofeted ».

¹³ « Kerzit tre dre an nor striz. Frank eo an nor, ledan eo an hent a gas da goll ; hag ez a e-leiz a dud dre an hent-se. ¹⁴ Med striz eo an nor, hag n’eo ket frank an hent a gas d’ar vuhez, ha n’int ket stank ar re a gav anezañ ».

Merher

Mz 7, 15-20

Bodet e ziskibien en-dro da Jezuz war ar menez, e lavare dezo :

¹⁵ « Diwallit ouz ar fals-profeted : dond a reont etrezeg ennoh gwisket evel deñved, nemed e vint bleizi kriz anezo en diabarz. ¹⁶ Diouz o frouez eh anavezot anezo. Daoust ha kutuillet e vez rezin war ar spern, pe fïez war an askol ?

¹⁷ Evel-se, e ro kement gwezenn vad frouez kaer, hag e ro kement gwezenn vrein frouez fall. ¹⁸ Ne hell ket eur wezenn vad dougenn frouez fall, nag eur wezenn vrein dougenn frouez kaer. ¹⁹ Kement gwezenn ha na zoug ket a frouez kaer a vez trohet ha taolet en tan. ²⁰ Diouz o frouez eta, eo eh anavezot anezo ».

Yaou

Mz 7, 21-29

Bodet e ziskibien en-dro da Jezuz war ar menez, e lavare dezo :

²¹ « N’eo ket kement hini a lavar din : « Aotrou ! Aotrou ! » eo a yelo e Rouantèlèz an Neñvou, med an hini a ra bolontez va Zad a zo en neñvou.

²² « En deiz-se, e lavaro din kalz a dud : « Aotrou ! Aotrou ! daoust ha n’eo ket en da ano eo on-eus komzet ? ha n’eo ket en da ano eo on-eus kaset kuit an droug-sperejou ? ha n’eo ket en da ano eo on-eus greet kalz burzudou ? »

²³ « Disklêria a rin dezo neuze : « N’em-eus biskoaz anavezet ahanoh. Kit pell diouzin, c’hwi hag a ra an droug. ²⁴ Evel-se, ez eo heñvel an hini a zelaou va homzou hag a heuill anezo, ouz eun dén a skiant vad, savet ti gantañ war ar garreg. ²⁵ Deuet eo ar glao, diruillet o-deus ar stèriou, c’hwezet o-deus an aveliou war an ti gand kounnar. N’eo ket pilet en e boull, diazezet ma oa war ar roh.

²⁶ « Heñvel eo avad an dén a zelaou va homzou hep senti outo, ouz eun dén diskiant e-neus savet e di war an trêz. ²⁷ Deuet eo ar glao, diruillet o-deus ar stèriou, savet eo an aveliou hag o-deus c’hwezet war an ti. Pilet eo bet an ti en e boull ha dizahet en e béz ».

²⁸ Echu gand Jezuz komz evel-se, e chome an dud skoet gand e gelennadurez. ²⁹ Rag kelenn a ree anezo evel eun dén galloud dezañ, ha n’eo ket evel o Skribed.

Gwener

Mz 8, 1-4

¹ Pa ziskennas Jezuz diwar ar menez, ez eas e-leiz a dud d’e heul. 2 Ha setu ma tosteas eun dén lor outañ, hag en eur stoui dirazañ, e lavaras :

— « Aotrou, ma kerez, e hellez parea ahanon ».

³ Oh astenn e zorn, e touchas Jezuz outañ en eur lavared :

— « Felloud a ra din, bez pareet ».

Ha kerkent e oe pareet euz al lorgnez.

⁴ Hag e lavaras Jezuz dezañ :

— « Selaou mad ahanon : na lavar netra da zén, med kee d’en em ziskouez d’ar beleg, ha kinnig ar prov gourhemennet gand Moizez : eun testeni e vo kement-se evid an dud ».

Sadorn 29 a viz Mezeven
Sant Pèr ha sant Paol, ebestel

Mz 16, 13-19

¹³ Deuet e oa Jezuz e korn-bro Sezare-Filip, hag e houlennas ouz e ziskibien :

— « Piou eo Mab an Dén, hervez lavar an dud ? »

¹⁴ Respont a rejont :

— « Evid lod eo Yann-Vadezour, evid re all, Eliaz, evid re all c’hoaz, Jeremiaz pe unan euz ar brofeted ».

¹⁵Lavared a reas Jezuz dezo :

– « Ha c’hwi, petra a lavarit ? Evidoh, piou ez on-me ? »

¹⁶ Respont a reas Simon-Pèr o lavared :

— « Te eo ar Hrist, Mab an Doue beo ! »

¹⁷ Respont a reas Jezuz o lavared dezañ :

— « Eüruz out, Simon, mab Yonaz, rag n’eo ket ar hig nag ar gwad eo o-deus roet dit da anaoud an dra-ze, med va Zad hag a zo en neñv. ¹⁸ Ha me a lavar dit : Te zo roh, ha war ar roh-se e savin va Iliz, ha ne vo biken galloudegeziou ar Maro treh dezi. ¹⁹ Dit e roin alhweziou Rouantèlèz an Neñv : kement az-po liammet war an douar, a vo liammet en neñv, ha kement az-po diliammet war an douar, a vo diliammet en neñv ».