Pemped sizunvez amzer Fask (B)

Euz an 28 a viz Ebrel d’ar 4 a viz Mae 2024

Pemped sul Fask

Yn 15, 1-8 (B)

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

¹ Me eo ar winienn wirion, ha va Zad eo ar gwiniennour. ² Lamet e vo kuit kement skourr ennon ha na zougo ket a frouez ; ha glaneet e vo gantañ kement hini a zougo frouez evid ma tougo muioh a frouez. ³ Glan oh-c’hwi diwar-vremañ, abalamour d’ar homzou am-eus lavaret deoh. Chomit ennon, ha me ennoh.

⁴ « Evel ma ne hell ket eur skourr distag diouz ar winienn dougenn frouez drezañ e-unan, c’hwi kennebeud, ma ne jomit ket ennon.

⁵ « Me eo ar winienn, c’hwi ar skourrou. Dougen a ra kalz a frouez an hini a jom ennon ha me ennañ, rag distag diouzin ne hellit ober netra.

⁶ « Stlapet e vo kuit an hini ne jom ket ennon evel ma vez greet d’eur skourr, hag e tizeho ; dastumet e vo, ha taolet en tan da zevi.

⁷ « Ma chomit ennon, ha ma chom va homzou ennoh, e houlennot ar péz ho-po c’hoant kaoud, hag e vo roet deoh.

⁸ « Kement-mañ eo a roio gloar d’an Tad : ma tougit frouez e-leiz, ha ma vezit diskibien din ».

Lun

Yn 14, 21-26

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

²¹ An hini a zalh d’am gourhemennou hag a vir anezo, hennez eo a gar ahanon, hag an hini a gar ahanon a vo karet gand va Zad ; ha diouz va zu, e karin-me anezañ, hag en em ziskouezin dezañ ».

²² Lavared a reas Jud dezañ (n’eo ket Judaz Iskariot) :

— « Petra zo kaoz, Aotrou, ma ’z ez d’en em ziskouez deom ha n’eo ket d’ar béd ? »

²³ Respont a reas Jezuz dezañ :

— « An hini a gar ahanon a zalho d’am Homz ha va Zad a garo anezañ ; dond a raim beteg ennañ, hag on demeurañs a raim ennañ.

²⁴ « An neb ne gar ket ahanon, ne vir ket va Homz. Hogen, ar homzou a glevit n’eo ket va re-me int, med re an Tad e-neus kaset ahanon.

²⁵ « Lavaret em-eus kement-mañ deoh e-pad m’emaon o chom ganeoh.

²⁶ « Ar Skoazeller, ar Spered-Santel, a vo kaset deoh euz va ferz ; rei a raio deoh kemennadurez war bep tra, ha digas deoh da zoñj euz kement am-eus lavaret deoh ».

Meurz

Yn 14, 27-31a

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

²⁷ « Ar peoh a laoskan ganeoh, va feoh a roan deoh ; n’eo ket evel ma ro ar béd eo e roan anezañ deoh. Na strafuill, na spont eta en ho kalon.

²⁸ « Klevet ho-peus diganin : « Mond a ran kuit hag e teuan en-dro d’ho kaoud ». Ma karfeh ahanon, e vefeh laouen abalamour ma ’z an da gaoud an Tad, rag brasoh egedon eo an Tad. ²⁹ Kement-se am-eus lavaret deoh bremañ, a-raog ma tigouezo, evid ma kredot pa zigouezo. ³⁰ Diwar vremañ, ne gomzin nemeur ganeoh, rag ema Priñs ar béd o tond. E gwirionez, n’e-neus galloud e-béd warnon. ³¹ Med red eo d’ar béd gouzoud e karan an Tad, hag e ran evel m’eo bet gourhemennet din gand an Tad ».

Merher 1 mae
Dedi iliz-veur Sant Kaourintin
Gouel en eskopti Kemper ha Leon

Mz 16, 13-19

¹³ Deuet Jezuz e korn-bro Sezare-Filip, e houlennas ouz e ziskibien :

— « Piou eo Mab an dén, diouz ar péz a lavar an dud ? »

¹⁴ Respont a rejont :

— « Evid lod eo Yann-Vadezour, evid re all, Elïaz, evid re all c’hoaz, Jeremïaz pe unan euz ar brofeted ».

¹⁵–« Ha c’hwi, emezañ dezo, petra a lavarit ? Evidoh, piou ez on-me ? »

¹⁶ Neuze, e respontas Simon-Pér en eur lavared :

— « Te eo ar Hrist, Mab an Doue beo-buezeg ! »

¹⁷ Respont a reas Jezuz gand ar homzou-mañ :

— « Eüruz out, Simon, mab da Yonaz, rag n’eo ket ar horv nag ar gwad eo o-deus roet dit da anaoud an dra-ze, med va Zad hag a zo en neñv. ¹⁸ Ha me a lavar dit : te zo roh, ha war ar roh-ze e savin va Iliz, ha ne vo ket galloud ar Maro treh dezi. ¹⁹ Rei a rin dit alhweziou Rouantèlèz an Neñv : kement az-po liammet war an douar, a vo liammet en neñv, ha kement az-po diliammet war an douar, a vo diliammet en neñv ».

Yaou

Yn 15, 9-11

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

⁹ « Evel m’e-neus va Zad karet ahanon, em-eus, me ive, karet ahanoh. Chomit em harantez. ¹⁰ Ma virit va gourhemennou, e chomot em harantez, evel ma choman-me e karantez va Zad en eur vired e hourhemennou. ¹¹ Kement-se am-eus lavaret deoh, evid ma vo va levenez ennoh, ha ma vo leun-barr ho levenez.

Gwener 3 a viz mae
Sant Filip ha sant Jakez, ebestel. Gouel

Yn 14, 6-14

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

⁶— « Bez ez on-me an hent, ar wirionez hag ar vuhez. N’ez a dén d’an Tad, nemed drezon-me.

⁷ « Peogwir eh anavezit ahanon, eh anavezit ive va Zad. Diwar-vremañ eh anavezit anezañ, hag ho-peus gwelet anezañ ».

⁸ Neuze, e lavaras Filip dezañ :

— « Aotrou, diskouez deom an Tad, hag e vo kement-se tra-walh evidom ».

⁹ Hag e lavaras Jezuz dezañ :

— « Keid-all zo emaon asamblez ganeoh, ha ne anavezez ket ahanon, Filip ?

An hini a wél ahanon, a wél an Tad. Penaoz e hellez-te lavared : « Diskouez deom an Tad ? » ¹⁰ Ha ne gredez ket emaon en Tad hag an Tad ennon ? Ar homzou a lavaran deoh, n’eo ket ahanon va-unan eo e lavaran anezo. An Tad, Eñ hag a zo ennon, a ra e oberou dezañ e-unan.

¹¹ « Kredit ahanon : Me a zo en Tad hag an Tad a zo ennon ; ha ma ne gredit ket ar péz a lavaran, kredit abalamour d’an oberou-ze.

¹² « Ya, e gwirionez, e lavaran deoh kement-mañ : piou bennag a gréd ennon a raio, eñ ive, an oberou a ran, ha re vrasoh zokén, peogwir ez an da gaoud va Zad.

¹³ « Ober a rin kement a houlennot em ano, hag evel-se, e vo roet gloar d’an Tad dre ar Mab. ¹⁴  Ma houlennit eun dra bennag em ano, e roin anezañ deoh ».

Sadorn

Yn 15, 18-21

D’an eur ma oa Jezuz o tremen euz ar béd-mañ d’e Dad, e lavare d’e ziskibien :

¹⁸ « M’e-neus ar béd kasoni ouzoh, e ouezot-c’hwi e-neus bet kasoni ouzin da genta.

¹⁹ « Ma vijeh euz ar béd, e-nije bet ar béd karantez ouz ar péz a vije dezañ. Med n’oh ket euz ar béd ; me eo am-eus dispartiet ahanoh diouz ar béd, ha setu perag e-neus ar béd kasoni ouzoh.

²⁰ « Dalhit soñj euz ar gomz am-eus lavaret deoh : n’eo ket ar zervicher brasoh eged e vestr. M’o-deus gwall-gaset ahanon, e vezot-c’hwi ive gwall-gaset ganto.

²¹ « Kement-se a raint deoh abalamour d’am ano, rag n’anavezont ket an hini e-neus kaset ahanon ».