Eil sizunvez amzer Fask (B)

Euz ar 7 d’an 13 a viz Ebrel 2023

Eil sul Fask, Sul an Drugarez

Yn 20, 19-31 (ABC)

Goude maro Jezuz e oa,¹⁹ d’an deiz kenta euz ar zizun, diouz an abardaez. Prennet e oa bet gand an diskibien doriou an ti ma oant ennañ, gand aon rag ar Juzevien.

Dond a reas Jezuz, hag e oa aze en e-zav en o-zouez.

Lavared a reas dezo :

— « Ar peoh ra vezo ganeoh ! »

²⁰ Goude ar homzou-ze, e tiskouezas dezo e zaouarn hag e gostez. O weled an Aotrou, e oe laouen-braz an diskibien.

²¹ A-nevez, e lavaras Jezuz dezo :

— « Ar peoh ra vezo ganeoh ! Evel m’e-neus va Zad kaset ahanon, e kasan-me ahanoh d’am zro ».

²² Distaget gantañ ar homzou-ze, e c’hwezas warno, hag e lavaras :

— « Resevit ar Spered-Santel. ²³ Ar re ho-po pardonet o fehejou dezo, e vint pardonet dezo ; hag ar re ho-po dalhet o fehejou outo, e vint dalhet ».

²⁴ Tomaz a-vad, unan euz an Daouzeg, lesanvet Didim (da lavared eo : gevell), ne oa ket ganto, pa oa deuet Jezuz.

²⁵ Lavared a reas an diskibien all dezañ :

— « Gwelet on-eus an Aotrou ! »

Med respont a reas Tomaz dezo :

— « Ma ne welan ket merk an tachou en e zaouarn, ma ne lakan ket va biz e toullou an tachou, ma ne lakan ket va dorn en e gostez, nann, ne gredin ket ! ».

²⁶ Eizteiz goude-ze, e oa adarre an diskibien en ti, hag e oa Tomaz asamblez ganto. Degouezoud a reas Jezuz, daoust d’an doriou beza prennet, hag e oa aze en o-zouez. Lavared a reas :

— « Ar peoh ra vezo ganeoh ! ».

²⁷ Da houde e lavaras da Domaz :

— « Lak da viz amañ, ha gwél va daouarn ; tosta da zorn, ha lak anezañ em hostez : paouez da veza diskredig, bez dén a feiz ».

²⁸ — « Va Aotrou ha va Doue ! » eme Tomaz dezañ.

²⁹ Lavared a reas Jezuz dezañ :

— « Abalamour m’az-peus gwelet ahanon, e kredez. Eüruz ar re a gred, hep beza gwelet ».

³⁰ Stank eo ar zînou all bet greet gand Jezuz dirag e ziskibien, ha n’int ket bet skrivet el leor-mañ. ³¹ Med skrivet eo bet ar re-mañ, deoh-c’hwi da gredi eo Jezuz ar Hrist, Mab Doue, hag e-sèr kredi, kaoud ar vuhez en e ano.

Gouel Maria Veurz
(Gouel Jezuz kemennet d’ar Werhez)

Gouel-Meur ar 25 a viz Meurz treuzkaset d’an 8 a viz Ebrel

Lk 1, 26-38

²⁶ D’ar c’hwehved miz, e oe kaset an êl Gabriel gand Doue d’eur gêr a Vro-Halilea, anvet Nazared, ²⁷ da gaoud eur plah yaouank dimezet d’eun den anvet Jozef, euz lignez David, hag e oa Mari ano ar plah yaouank.

²⁸ Digouezet beteg enni, e lavaras an êl dezi :

— « Béz laouen, leun a hras ! Ema an Aotrou ganit ».

²⁹ O kleved seurt komzou, e oe hi strafuillet braz. Klask gouzoud e oa petra a dalveze ar zalud-se.

³⁰ Lavared a reas an êl dezi :

— « Na gemer ket aon, Mari, rag plijet out bet da Zoue. ³¹ Setu emaout o vond da veza dougéréz, hag e hani eur mab, hag e roi dezañ an ano a Jezuz. ³² Braz e vo, hag e vo anvet Mab da Vestr an Uhel-Meurbed. Trôn David e dad a vo roet dezañ gand an Aotrou Doue. ³³ Roue e vo war lignez Jakob da viken, hag e rouantèlèz ne vo fin e-béd dezi ».

³⁴ Lavared a reas Mari d’an êl :

— « Penaoz e c’hoarvezo kement-se, peogwir n’em-eus darempred gand gwaz e-béd ? »

³⁵ Respont a reas an êl dezi :

— « Diskenn a raio ar Spered-Santel warnout, hag e vi goloet gand galloud Mestr an Uhel-Meurbed. Dre-ze, e vo santel ar hrouadur, hag e vo anvet Mab Doue. ³⁶ Ha setu ema Elizabed da geniterv o tougen eur mab ive, daoust d’he oad, hag an hini a veze greet anezi ar « vaouez dizeh », setu ema gand he c’hwehved miz. ³⁷ Rag n’eus netra dreist galloud Doue. »

³⁸ Lavared a reas Mari neuze :

— « Setu amañ servichéréz an Aotrou, ra hoarvezo ganin hervez da lavar ».

Hag ez eas an êl kuit diouti.

Meurz

Yn 3, 7-15

Lavared a ree Jezuz da Nikodem :

⁷ Ne d-a ket da veza souezet ma ’m-eus lavaret dit : « Red eo deoh beza ganet a-nevez ».

⁸ « C’hweza a ra an avel en tu ma kar : kleved a rez he mouez, med ne ouezez ket nag euz peleh e teu, na da beleh ez a. Evel-se ema kont gand kement dén a zo ganet euz ar Spered ».

⁹ Lavared a reas Nikodem d’e dro :

— « Penaoz e hell kement-se c’hoarvezoud ?

¹⁰ Respont a reas Jezuz dezañ :

— « Mestr-kelenner out en Izrael, ha n’ouzout ket an traou-ze ? ¹¹ E gwirionez, e gwirionez, e lavaran dit : Komz a reom euz ar péz a ouzom ; rei a reom testeni euz ar péz on-eus gwelet ; ha ne zegemerit ket on testeni. ¹² Ma ne gredit ket pa gomzan ouzoh euz traou an douar, penaoz e kredot pa gomzin ouzoh euz traou an Neñv ? ¹³ Rag dén n’eo savet d’an Neñv, nemed an hini a zo diskennet euz an Neñv, Mab an Dén.

¹⁴ « Evel ma oe savet en uhel an naer arem gand Moïzez, en dezert, evel-se ive e rañko Mab an Dén beza savet en uhel, ¹⁵ evid m’e-no drezañ ar vuhez peurbaduz kement hini a gréd ennañ ».

Merher

Yn 3, 16-21

Derhel a ree Jezuz da gomz ouz Nikodem :

¹⁶ « Ken braz eo bet karantez Doue evid ar béd, m’e-neus roet e Vab unganet evid n’ez aio ket da goll kement hini a gred ennañ, med evid m’e-no ar vuhez peurbaduz.

¹⁷ « Rag Doue e-neus kaset e Vab er béd, n’eo ket evid barn ar béd, med evid ma vo salvet ar béd drezañ. ¹⁸  An neb a gréd ennañ n’eo ket barnet ; an neb ne gréd ket ennañ a zo dija barnet, peogwir n’e-neus ket kredet en ano Mab unganet Doue.

¹⁹ « Ha setu ar Varnedigez : deuet eo ar sklêrijenn er béd, hag an dud o-deus kavet gwelloh an deñvalijenn kentoh eged ar sklêrijenn, abalamour ma oa fall o oberou.

²⁰ Rag kement hini a ra an droug e-neus kas ouz ar sklêrijenn : ne zeu ket er sklêrijenn, gand aon na vefe diskuliet e oberou. ²¹ Med an hini a ra ar wirionez, a zeu er sklêrijenn, evid ma vo anad ez eo e oberou greet e Doue ».

Yaou

Yn 3, 31-36

Hag e lavare Yann-Vadezour :

³¹ « An hini a zeu euz an Neh a zo a-uz d’an oll. An hini a zeu euz an douar e-neus da weled gand an douar, hag e komz euz traou an douar. An hini a zeu euz an Neñv a zo a-uz d’an oll ; ³² rei a ra testeni euz ar péz e-neus gwelet ha klevet, med ne ro dén digemer d’e desteni. ³³ Med an hini a zigemer e desteni a embann ez eo Doue ar gwirionez.

³⁴ Evid gwir, an hini a zo bel kaset gand Doue a lavar komzou Doue, abalamour ma ro Doue dezañ ar Spered hep konta.

³⁵ Karet eo ar Mab gand an Tad, ha e laka pep tra etre e zaouarn.

³⁶ An hini a gréd er Mab ema ar vuhez peurbaduz ennañ ; an hini na gréd ket er Mab ne welo ket ar vuhez ; med chom a ra kounnar Doue warnañ ».

Gwener

Yn 6, 1-15

¹ Eet e oa Jezuz en tu all da vor Galilea, anvet ive : lenn Tiberiad.

² War e lerh e teue e-leiz a dud, abalamour ma oa bet gwelet ganto ar zînou a ree war an dud klañv.

³ Sevel a reas Jezuz war ar menez, hag eh azezas eno, e ziskibien asamblez gantañ. ⁴ Tost a-vad, e oa ar Pask, gouel ar Juzevien. ⁵ Savet gantañ e zaoulagad, e welas Jezuz tud e-leiz o tond war-zu ennañ. Lavared a reas da Filip :

— « E peleh e hellfem prena bara evid rei dezo da zebri ? »

⁶ Komz a ree evel-se evid lakaad anezañ nehet, rag gouzoud a ouie mad-eñ petra e oa o vond da ober.

⁷ Respont a reas Filip :

— « Yalhad daou-hant deveziad labour ne vefe ket a-walh evid rei eun tammig bennag a vara da bep hini ».

⁸ Unan euz an diskibien, Andre, breur da Zimon-Pèr, a lavaras da Jezuz :

⁹ — « Bez’ ez eus amañ eur paotrig, pemp baraenn heiz ha daou besk gantañ. Med petra eo an dra-ze evid kement a dud ? »

¹⁰ Lavared a reas Jezuz dezo :

— « Lakait an dud da azeza ».

Founnuz e oa ar yeot en dachenn-ze. Azeza a rejont eta ; war-dro pemp mil gwaz a oa anezo.

¹¹ Neuze e kemeras Jezuz ar baraennou, ha goude beza lavaret ar bedenn a drugarez, e roas anezo d’an dud a oa azezet eno. Rei a reas pesked dezo ive, kement ha ma karent.

¹² P’o-doa bet o gwalh, e lavaras Jezuz d’e ziskibien :

— « Dastumit an tammou chomet en dilerh, ma ne ’z aio netra da goll ».

¹³ Dastum a rejont anezo, ha karga daouzeg panerad gand tammou ar pemp baraenn heiz chomet a zilerh an dud o-doa drebet.

¹⁴ O weled ar zîn bet greet gand Jezuz, e lavaras an dud :

— « Hemañ eo, e gwironez, ar profet a zo da zond er béd ».

¹⁵ Med gouzoud a ouie Jezuz e oant o tond da dapoud krog ennañ evid lakaad anezañ da veza o roue. Neuze, en em dennas e-unan-penn, war ar menez.

Sadorn

Yn 6, 16-21

Bez’ e oa goude burzud ar bara kresket.

¹⁶ Deuet an abardaez, e tiskennas diskibien Jezuz beteg ar mor. ¹⁷ Sevel a rejont en eur vag evid mond da Gafarnaom, en tu all d’ar mor. Deuet e oa dija an noz, ha ne oa ket deuet Jezuz c’hoaz beteg e ziskibien. ¹⁸ Kreñv-kenañ e c’hweze an avel, ha rust e oa ar mor. ¹⁹ Roeñvet o-doa an diskibien war hed pemp stad warn ugent pe dregont (da lavared eo : eur pemp kilometrad bennag), pa weljont Jezuz o vale war ar mor hag o tostaad ouz ar vag. Neuze e krogas aon enno.

²⁰ Lavared a reas Jezuz dezo :

— « Me eo, n’ho pet ket aon ken ! »

²¹ O vond da gemer anezañ er vag e oant, med kerkent e oe digouezet ar vag d’an douar, el leh ma oant o vond.