An Testamant Nevez : eil lodenn – Troet e brezoneg gand « Kenvreuriez ar brezoneg » Eskopti Kemper ha Leon, 1988.

 

Pennad-kinnig

Iliz kêr Filip e Makedonia a zo bet brudet bepred evid he zentidigez parfed, he harantez tener hag an troet ma ’zeo da renta servij da Baol, an hini e-neus he zavet. Diouz e du, an abostol a gave enni e levenez hag e frealzidigez : diganti, ha netra nemed diganti, eh asantas reseo sikouriou ha donezonou… Amañ e tiskouez kaoud fiziañs enni, ha karantez eviti, o rei dezi eun nebeud kuzuliou war an doare da ren ar vuez.

 

Lizer d’ar Filipianed

I. ¹ Paol ha Timote, servicherien da Jezuz Krist, d’an oll zent e Jezuz Krist a zo e Filip, gand o episkobed hag o diagoned, ² deoh, gras ha peoh a-berz Doue on Tad hag an Aotrou Jezuz Krist.

Grasou ha pedennou

³ Trugarekaad a ran va Doue, bewech ma teu da zoñj din ennoh, ⁴ e peb amzer, e peb pedenn, a galon laouen e pedan evidoh oll, ⁵ ablamour d’an unaniez ho-peus ganin en Aviel, azaleg an deiz kenta beteg bremañ. ⁶ Sur on a gement-mañ : an Hini e-neus boulhet ennoh al labour-se a gaso anezañ da benn beteg Deiz ar Zalver Jezuz. ⁷ Just eo din beza troet evel-se en ho keñver deoh oll, peo-gwir emaoh em halon, c’hwi hag a gemer oll perz er hras roet din, koulz pa vezan ar prizon ha pa vezan o tivenn hag o kennerza an Aviel. ⁸ Doue a zo test din, e karan ahanoh oll e kalon or Zalver Jezuz ; ⁹ ha setu amañ va fedenn : ma kresko muioh c’hoaz ho karantez, ha muioh-mui an anaoudegez euz ho feiz hag ar skiant evid deoh dibaba ar pez a zere ar gwella, ¹⁰ hag evel-se e vezoh divlam ha direbech a-benn Deiz or Zalver, ¹¹ leun ho taouarn euz ar frouez a justis a zeu deom dre Jezuz Krist, evid gloar ha meuleudi Doue.

Paol er prizon

¹² Me a fell din e ouezfeh kement-mañ, va breudeur : ar pez a zo degouezet ganin, a zo deuet da veza emsav evid kas an Aviel war araog ; ¹³ rag er pretordi a-bez, hag e kement leh all, eo sklêr bremañ, ez on ereet evid ar Hrist, ¹⁴ hag an darn vrasa euz ar vreudeur, kennerzet en Aotrou en-abeg d’am ereou, a embann dispont ar Gomz gand an hanter muioh a hardisegez. ¹⁵ Lod, gwir eo, her gra dre avi pe dre gevezèrèz, med re all a embann ar Hrist gand eur galon eeun. ¹⁶ Dre garantez eo e labour ar re-mañ. Goûd a ouzont emaon amañ evid divenn an Aviel. ¹⁷ Ar re all eo dre gevezèrèz eo eh ambannont ar Hrist. N’eo ket leal o menoz, soñjal a ra dezo laka ad c’hoaz da greski va foaniou er prizon. ¹⁸ An dra-ze ne ra netra, n’eus forz penaoz pe gand menoziou kuz pe gand lealded, embannet eo ar Hrist. Kement-se a ra din beza laouen ha kendelher a rin zoken da veza laouen. ¹⁹ Rag me a oar e troio an dra-ze d’am zilvidigez dre ho pedennou ha sikour Spered Jezuz Krist, ²⁰ hervez ar pez a vezen o hortoz stard hag hervez va esperañs, n’am bezo ket da ruzia gand ar vez, med gand eun hardisegez stard eo chomet va fiziañs bremañ evel atao, ha beo pe varo e vefen, brazder ar Hrist a vo roet da anaoud em horv ; ²¹ rag evidon-me, beva eo ar Hrist, ha mervel a zo eur gounid evidon. ²² Med neuze ma hellan, o chom da veva em horv er bed-mañ, ober eul labour talvouduz, n’ouzon ket petra da zibaba, ²³ rag etre an daou emaon : kared a rafen mond kuit euz ar bed-mañ, evid beza gand ar Hrist, rag kalz gwelloh eo an dra-ze. ²⁴ A-hend-all, ablamour deoh-hwi eo talvoudusoh e chomfen war an douar. ²⁵ Setu perag e kred stard din, goûd a ouzon e chomin, chom a rin en ho kichenn deoh oll evid hoh emsav hag evid levenez ho feiz, ²⁶ evid ma lakin-me da greski, o tistrei davedoh, ar hloar ho-peus e Jezuz Krist.

Kendelher gand ar stourmad

²⁷ Ha c’hwi, renit eur vuez din euz Aviel an Aotrou Krist, evid ma klevin, ma teuan davedoh pe ma ne zeuan ket, ma klevin ano, ha gouzoud e talhit stard er memez spered, o stourm asamblez, unanet a-galon, hervez feiz an Aviel. ²⁸ Heb beza lenteet e netra gand hoh enebourien, ar pez a vo evito eur zin sklêr ez int kollet ha c’hwi salvet, hag an dra-ze a zeu euz a Zoue, ²⁹ rag greet e-neus deoh ar hras, ablamour d’ar Hrist, n’eo ket hebken da gredi ennañ, med ivez da houzañv evitañ, o stourm, evel m’ho-peus va gweled o stourm, evel ma stourman hirio c’hoaz, her gouzoud a rit.

Unaniez ha izelegez

II. ¹ Ma ’z eus eta eur galv er Hrist, ma kaver frealzidigez er garantez, unaniez er Spered, hag eul lañs a garantez hag a drugarez ² neuze, lakit barr va levenez, oh en em gleved kenetrezoh, bezit eun heveleb karantez, eun heveleb kalon, klaskit an unaniez. ³ Na rit netra dre eur spered gwariziuz, netra dre lorhentez, med, izel a galon, prizit ar re all gwelloh egedoh, ⁴ peb hini, o telher kont, n’eo ket hebken anezañ e-unan, med ivez euz ar re all. ⁵ Bezit kenetrezoh, evel ma vezer er Hrist Jezuz, ⁶ eñ hag a zo e stad doueel, n’e-noa ket soñjet ez oa eur preiz da gregi ennañ, beza par da Zoue. ⁷ Er hontrol eo, dilezet e-neus peb tra, kemeret gantañ ar stad a sklav, o tenna da stad an dud ha, diouz e zoare anavezet evel eun den. ⁸ En em izelleet e-neus, o tond da veza sentuz beteg mervel ha mervel war eur groaz. ⁹ Setu perag e-neus Doue savet uhel anezañ ha roet dezañ an Ano a zo dreist peb ano, ¹⁰ evid ma plego peb glin da ano Jezuz, en neñvou, war an douar ha dindan an douar ¹¹ ma teuio peb teod da ziskleria ez eo Jezuz Krist an Aotrou evid gloar Doue an Tad.

Labour ar gristenien

¹² Setu eta, va re vuia karet, c’hwi hag a zo bet atao sentuz, sentit, n’eo ket hebken pa vezan war al leh, med kalz muioh bremañ pa n’emaon ket ganeoh. Gand doujañ hag en eur grena, poaniit gand ho silvidigez, ¹³ rag Doue eo a ra ennoh ar mennoud hag an oberia, hervez an hegarad m’eo evenoz. ¹⁴ grit peb tra heb grozmolad na tabutal, ¹⁵ evid beza direbech ha kaloneg, bugale dinamm da Zoue, e-kreiz eur rummad tud diroll ha dizonest, e skedoh en o zouez war ar bed evel eien a sklerijenn. ¹⁶ C’hwi hag a zo ganeoh ar gomz a vuez, va gloar eo evid deiz ar Hrist, peogwir n’am-bezo na redet, na kemeret poan en aner. ¹⁷ Ha goude ma vefe zoken skuillet va gwad e sakrifis hag er zervich euz ho feiz, an dra-ze a ra din beza laouen, ha laouen on asamblez ganeoh oll. ¹⁸ Evel-se, c’hwi ivez bezit laouen, ha laouen asamblez ganin.

Timote hag Epafrodit

¹⁹ Fiziañs am-eus, en Aotrou Jezuz, da gas deoh dizale Timote, evid beza frealzet, me ivez, gand ar heleier am-bo diwar ho penn. ²⁰ N’am-eus den all ebed hag a wel an traou evel ma ran, hag a gemer soursi gand kement a zell ouzoh. ²¹ Evito oll, o zraou o-unan, eo a gont ha n’eo ket re Jezuz Krist. ²² Eñ avad, c’hwi a oar, e-neus diskouezet a betra e oa gouest ; evel eur mab e-kichenn e dad, e-neus en em lakeet ganin e servich an Aviel. ²³ Eñ eo eta am-eus fiziañs da gas deoh, kerkent ha m’am-bo gwelet petra zeuan da veza. ²⁴ A-hend-all, e kredan stard en Aotrou, e teuin ivez dizale. ²⁵ Kouskoude, kavoud a ree din e ranken kas deoh Epafrodit, va breur, va hompagnun a labour hag a stourmad, degaset ganeoh evid va zervicha, pa edon en ezomm ; ²⁶ rag braz e oa e hoant da zistrei d’ho kweled oll hag enkrezet e oa, en abeg m’ho-poa klevet ez oa klañv. ²⁷ Gwir eo, klañv eo bet ha dare da vervel, med truez e-neus bet Doue outañ, ha n’eo ket hebken outan, med ouzin-me ivez, evid mired n’am-befe tristidigez war dristidigez. ²⁸ Hasta buan a ran eta da gas anezañ deoh en-dro ma vezoh laouen adarre ouz e weled, ha m’am-bo nebeutoh a dristidigez. ²⁹ Grit eta eur gwir degemer laouen dezañ en Aotrou ; grit stad ouz tud eveldañ, ³⁰ peogwir evid labour ar Hrist eo bet darbet dezañ mervel, risklet e-neus e vuez evid ober en ho leh ar pez n’helleh ket ober hoh-unan evid va zervicha.

III. ¹ Ha bremañ va breudeur, bezit laouen an Aotrou. Ne gavan ket diêz skriva deoh ar memez tra, ha dre-ze e vezoh-hwi starteet. ² Taolit evez ouz ar chas, taolit evez ouz al labourerien fall ! Taolit evez ouz ar re fals-amdrohet ; ³ rag ni eo ar re amdroh, ni hag a rent, a spered gloar, da Zoue, a laka or gloar e Jezuz Krist, ha ne lakom ket or fiziañs ennom on-unañ. ⁴ Koulskoude n’eo ket heb abeg e hellfen kaoud fiziañs ennon va-unan. Ma kred da unan bennag all kaoud fiziañs ennañ-e-unan, me avad a hell kalz muioh, me, ⁵ amdrohet d’an eizved devez, euz gouenn Israel, euz meuriad Benjamin, Hebread, mab da Hebreiz ; evid al Lezenn, eur Farizian, ⁶ evid ar gred, heskiner an Iliz, evid ar justis a gaver el Lezenn, deuet da veza direbech. ⁷ Hogen an oll draou-ze, gounidou evidon, me am-eus kemeret anezo evel diouer en-abeg d’ar Hrist. ⁸ Ya avad, kavoud a ra din eo kement tra koll, e keñver an uhella mad m’eo an anaoudegez euz Jezuz Krist va Aotrou, ablamour dezañ am-eus kollet peb tra, ha kement-se a zo loustoni d’am menoz,evid beza d’ar Hrist, ⁹ ha beza kavet ennañ, n’eo ket mui gand eur justis din-me, a zeu euz al Lezenn, med gand an hini a zeu dre ar feiz er Hrist, ar justis a zeu euz a Zoue, hag a zo harpet war ar feiz. ¹⁰ Ar pez a gont eo e anaoud, eñ, ha galloud e adsao da veo, hag an unaniez gantañ en e boaniou, ha dond da veza heñvel outañ en e varo ¹¹ evid degouezoud mar deo posubl en adsao a-douez ar re varo. ¹² N’eo ket m’am-befe bet dija an oll draou-ze pe ma vefen deuet da veza parfed, med va lans a gemeran evid kregi ennañ peogwir, me va-unan a zo bet kroget ennon gand ar Zalver Jezuz. ¹³ Nann, va breudeur, ne gav ket din am-befe c’hoaz paket peg ennañ, med eun dra hebken a gont : heb en em jala gand ar pez a zo a-dreñv din, med o skei euz va oll nerz war-zu ar pez a zo en araog, ¹⁴ e kemeran va lañs war-zu ar pal, war-zu ar priz on galvet gand Doue da gaoud e baradoz an Aotrou Krist. ¹⁵ Ni oll, ar re barfed, greom eta evel-se, ha ma teu deoh e tra pe dra, ober en eun doare all, war gement-se ivez, Doue ho sklerijenno. ¹⁶ Da hortoz, er stad m’emaom degouezet, kerzom gand ar memez hent.

¹⁷ Kemerit oll skouer diwarnon, ha sellit ervad ouz ar re a vev hervez ar skouer a gavit ennom. ¹⁸ Siwaz, meur a hini a zo, dre o buez, eve ma lavaren deoh aliez, ha bremañ henn lavaran c’hoaz, an dour em daoulagad, enebourien da groaz ar Zalver, ¹⁹ d’en em goll ez eont. O hov eo doue, o fouge a lakont en o mez, ha ne brizont nemed traou an douar-mañ. ²⁰ Ni avad, eo an nenv or gwir-vro ; ahano eo e hortozom da zond, evel Salver, Jezuz Krist on Aotrou, ²¹ a jeñcho, eñ, doare d’or horvou dister hag o lakaio par d’e gorv gloriuz, dre ar galloud e-neus da veza rener war beb-tra.

IV. ¹ Evel-se, va breudeur ker, c’hwi hag am-eus kement a vall da weled a-nevez, va levenez, va hurunenn, dalhit stard evelse en Aotrou Krist, c’hwi va re muia-karet. ² Evodia ha Sintika, o alia a ran d’en em gleved mad en Aotrou. ³ Ha te, kompagnun gwirion din, diganit e hou lennañ, deus war o zikour, rag poaniet o-deus evid an Aviel asamblez ganin ha gand Klemant hag oll ar re all hag o-deus kenlabouret ganin, o ano dezo a zo skrivet el levr a vuez. ⁴ Bezit bepred laouen en Aotrou or Zalver, ya, henn azlavared a ran : bezit laouen ⁵ ra vo anavezet ho madelez gand an oll. An Aotrou a zo tost. ⁶ Arabad eo beza enkrezet gand netra, med e peb degouez, a-bouez pedi hag aspedi, o trugarekaad, kasit ho koulennou dirag Doue, ⁷ ha peoh Doue, hag a zo dreist peb skiant, a ziwallo ho kalonou hag ho sperejou er Zalver Jezuz. ⁸ A-hent-all va breudeur : kement a zo gwir, kement a zo onest, kement a zo just, kement a zo glan, kement a zo din da veza karet hag enoret, kement a zo santel ha din da veza meulet, gand an oll draou-ze eo deoh trei ho spered. ⁹ Ar pez ho-peus desket ha resevet, ar pez ho-peus klevet euz va ferz ha gwelet ahanon oh ober, grit kemend-all hag an Doue a beoh a vo ganeoh.

¹⁰ Laouen braz on bet en Aotrou, o veza m’he-deus gellet pelloh ho karantez bleunia a-nevez evidon ; gwir eo, douget ez oah din, med n’ho-poa ket a dro d’henn diskouez. ¹¹ N’eo ket an dienez eo a ra din komz, rag desket am-eus en em denna euz n’eus forz pe-seurt stad. ¹² Gouzoud a ran beva en dienez ha beva en êzamant, goûd a·ouzon e peb degouez hag e peb doare kaoud va gwalh, hag ivez kaoud naon, beva gand kalz hag ivez gand re nebeud. ¹³ Ober a hellan peb tra en hini a ro nerz din. ¹⁴ Ha koulskoude, mad ho-peus greet o tond da gemer perz em dienez.

¹⁵ – Goûd a ouzoh, c’hwi Filipianed ; er penn kenta euz an Aviel, p’am-eus kuiteet ar Makedonia, Iliz all ebed n’he-doa va skoazellet, dre eur gont-red, nemedoh, ¹⁶ c’hwi, hag ho-poa e Tesalonika dija, degaset din, ha meur a wech, ar pez a ree diouer din. ¹⁷·N’eo ket ma vefen o klask provou, ar pez a glaskan eo, ma kresko ar frouez war ho kont deoh-hwi. ¹⁸ Ha neuze, etre va daouarn am-eus kement a zo red hag ouspenn zoken, awalh am-eus bremañ p’am-eus resevet ar pez e-neus Epafrodit roet din euz ho perz, provadenn a c’hwez vad, zakrifis kavet mad gand Doue ha plijuz dezañ, ¹⁹ ha va Doue a bourvezo gand largentez en eun doare dispar d’hoh oll ezonunou, hervez e binvidigez, en Aotrou Krist Jezuz. ²⁰ Da Zoue an Tad eta gloar da virviken. Amen.

²¹ Saludit e Jezuz Krist an oll zent. ²² Ar breudeur a zo ganin ho salud. An oll zent ho salud hag ar re euz ti Sezar. ²³ Ra vo gras an Aotrou Jezuz Krist gand ho spered.