Pennad naonteg

Zache

¹ Degouezet Jezuz tre e kêr – bez’ e oa war-nez treuzi Jeriko – ² setu eun den oh erruoud, Zache e ano. Edo e penn ar bublikaned ha pinvidig e oa. ³ Klask a ree gweled Jezuz ha gouzoud piou eo. Med ne helle ket, en abeg d’ar boblad-tud, rag bez’ e oa bihan a vent. ⁴ Redeg a ra en a-raog ha pignad war eur wezenn zikomor evid e weled, rag dre aze e tlefe tremen. ⁵ Ha pa zegouez war al leh-se, e sav Jezuz e zaoulagad hag e lavar dezañ : « Zache, diskenn buan, rag hirio eo red din chom en da di ». ⁶ Buan e tiskenn hag e degemer a ra gand levenez. ⁷ O weled kement-mañ, e hrozmol an oll dud : « Deut eo, emezo, da jom e ti eun den peher ».

⁸ En e zav, e lavar Zache d’an Aotrou : « Setu amañ an hanter euz ma madou, Aotrou ; her ro a ran d’ar beorien ; ha m’am-eus tennet eun dra bennag dre heg digand eun den, her roan dezañ en-dro peder gwech ». ⁹ Ha Jezuz neuze da lavared dezañ : « Hirio eo degouezet ar zilvidigez evid an ti-mañ, peogwir eo hemañ ive mab da Abraham. ¹⁰ Rag deut eo mab an den da glask ha da zavetei ar pez a oa kollet ».

An deg minenn

¹¹ P’emaint o selaou an traou-ze, e lavar-eñ eur barabolenn all ; kredi a reont, dre ma tostaont ouz Jeruzalem, ema rouantelez Doue o tond heb dale.

¹² Setu ma lavar : « Eun den a reñk uhel a ya kuit d’eur vro estren da reseo ar roueelez evitañ ha dond en-dro goude-ze. ¹³ Gelver a ra deg euz e zervicherien ha roi dezo deg minenn. Lavared a ra dezo : “Grit aferiou beteg ma distro”. ¹⁴ E genvroidi o-doa kasoni outañ. Kas a reont kannaded war e lerh da lavared : “Ne fell ket deom beza gouarnet gand hennez”.

¹⁵ Hogen, p’ema deut en-dro, goude beza resevet ar roueelez, e lak da veza galvet dirazañ ar zervicherien a oa bet roet arhant dezo, evid anaoud ar pez e-noa peb unan gounezet en e aferiou. ¹⁶ Dond a ra an hini kenta ha lavared : “Aotrou, da vinenn : deg minenn eo am-eus gounezet ganti”. ¹⁷ Lavared a ra : “Brao ! Servicher mad. Peogwir out bet feal evid kennebeud, kemer galloud war zeg kêr”.

¹⁸ Dond a ra an eil servicher : “Aotrou, emezañ, greet he-deus da vinenn pemp minenn all”. ¹⁹ Lavared a ra ive da hennez : “Te, ive, kemer galloud war bemp kêr”. ²⁰ Ha dond a ra an trede : “Aotrou, emezañ, setu amañ da vinenn. He lakeet am-oa a-gostez, en eun tamm lien. ²¹ Rag aon am-oa razout, peogwir out eun den kaled : kemer a rez ar pez n’az-peus ket lakeet ha medi ar pez n’az-peus ket hadet”. ²² Lavared a ra dezañ : “Diouz da gomzou eo e vi barnet ganin, servicher fall. Gouzoud a rees ez on-me eun den kaled, o kemer ar pez n’am-eus ket lakeet hag o medi ar pez n’am-eus ket hadet. ²³ Perag neuze n’az-peus roet ma arhant d’eun ti-bank ? Hag am-mefe-me, o tond en-dro, e adkavet gand an interest”. ²⁴ Ha lavared a ra d’ar re a zo e-kichenn : “Tennit e vinenn digantañ evid he roi d’an hini e-neus deg”. ²⁵ Respont a reont dezañ : “Aotrou, bez’ e-neus hennez deg minenn dija”– ²⁶ “Lavared a ran deoh : roet e vo d’an neb e-neus, med d’an neb n’e-neus ket e vo tennet digantañ ar pez e-neus zoken. ²⁷ A-hend-all, ma enebourien, ar re ne felle ket dezo beza gouarnet ganin, o degasit amañ ha trahit dezo o houzoug dirazon” ».

E Jeruzalem

²⁸ Goude beza lavared an traou-ze, ez a er penn a-raog, en eur zevel war-zu Jeruzalem. ²⁹ Hogen, p’ema o tostaad ouz Betfaje ha Betani, e-kichenn ar menez anvet Menez-an-Olivez, ³⁰ e kas daou ziskib en e raog, en eur lavared : « It beteg ar gêriadenn a zo dirazoh. En eur vond tre, e kavot eun azenig staget ha n’eus bet den ebed c’hoaz azezet warnañ. Distagit-eñ hag e degasit. ³¹ Ha ma houlenn unan bennag diganeoh : “Perag e zistagit ?” c’hwi a responto an dra-mañ : “An Aotrou e-neus ezomm anezañ” ».

³² Mond a ra an daou gannad ha kavoud an traou evel m’e-neus lavaret dezo. ³³ Pa zistagont an azenig, e lavare vistri dezo : « Perag e tistagit an azenig ? » ³⁴ Respont a reont : « An Aotrou e-neus ezomm anezañ. » ³⁵ E zegas a reont da Jezuz, taoler o mantili war an azenig ha lakaad Jezuz da bignad warnañ.

³⁶ Dre ma ’z a war-raog, e ledont o mantili war an hent. ³⁷ P’ema o tostaad ha dija o tiskenn Menez-an-Olivez, e krog pobl niveruz e ziskibien da veuli Doue a vouez uhel, evid an oll vurzudou bet gwelet ganto : « Benniget an hini, ar roue, a zeu en ano Doue. Peoh en neñv ! Ha gloar war al lehiou uhel ! » ³⁹ Lod euz ar farizianed, a-douez ar boblad-tud, a lavar dezañ : « Mestr, gourdrouz da ziskibien ». ⁴⁰ Respont a ra dezo : « Lavared a ran deoh, emezañ, ma tav ar re-mañ, e krio ar vein ».

Leñva a ra Jezuz war Jeruzalem

⁴¹ Pa ’z eo deut tost, o weled ar gêr, e leñv warni ⁴² hag e lavar : « M’az-pefe anavezet, en deiz-mañ, te ive, ar peoh o tostaad ! Med kuzet eo bremañ an dra-ze ouz da zaoulagad. ⁴³ Rag dond a raio warnout deveziou ma zavo da enebourien peulgaeou a-eneb dit ; lakaad a raint eur helh en-dro dit, taga ahanout a bep tu, ⁴⁴ ha skuba ahanout beteg an douar, te ha da vugale. Ne lezint ket mên war vên ennout, peogwir n’az-peus ket anavezet mare ar weladenn greet dit ».

Kas a ra ar werzerien e-mêz an templ

⁴⁵ Mond a ra e-barz an templ ha krogi da gas ar werzerien er-mêz. ⁴⁶ Lavared a ra dezo : « Skrivet eo : “Ma Zi a zo eun Ti a bedenn” hag eun toull-laeron ho-peus greet anezañ ». ⁴⁷ Bemdez edo o kelenn en templ. Klask a ra ar veleien-veur hag ar skriverien e gas da vond da goll, ha pennou-braz ar bobl ive. ⁴⁸ Med ne gavont ket petra e hellfent ober, rag, ouz e gleved, eo dedennet ar bobl a-bez gantañ.