Pennad trizeg

Sinou fin ar bed

¹ P’ema o tond er-mêz euz an templ, e lavar unan euz e ziskibien dezañ : « Mestr ! Sell ! Pebez mein ! Pebez savaduriou ! » ² Ha Jezuz da respont dezañ : « Selled a rez ouz ar zavaduriou braz-se ? Ne vo ket lezet amañ mên war vên heb beza distrujet ! »

³ Azezet e oa war Menez-an-Olivez, a-wel d’an templ. Pèr, Jakez, Yann hag Andreo a ree goulennou outañ, en o fart o-unan : ⁴ « Lavar deom pevare e c’hoarvezo an dra-ze ? Ha pe zin a vo pa zeuio kement-se da veza sevenet ? »

⁵ Krogi a ra Jezuz da lavared dezo : « Diwallit da veza touellet gand den ebed. ⁶ Rag dond a raio kalz em ano, o lavared : “Me eo !”. Ha kalz a vo touellet ganto. ⁷ Pa glevot ano euz brezeliou ha trouziou brezel, n’en em jalit ket : red eo da gement-se erruoud. Med n’eo ket c’hoaz ar fin. ⁸ Rag en em zevel a raio broad a-eneb broad, rouantelez a-eneb rouantelez. Bez’ e vo meur a gren-douar, e leh pe leh, ha meur a gernez. Penn kenta poaniou ar gwilioud e vo kement-se. »

« Roet e viot ganto »

⁹ « C’hwi, taolit evez ouzoh hoh-unan ! Roet e viot ganto d’ar zanedrin. Skoet e vo ganeoh er zinagogennou. Kaset e viot dirag gouarnourien ha rouaned, en abeg din, evel eun testeni evito. ¹⁰ Med red eo da genta embann ar helou mad d’an oll vroadou.

¹¹ Pa viot kaset ha roet ganto, n’en em jalit ket en a-raog, diwar-benn ar pez a lavarot. Med ar pez a vo roet deoh d’ar mare-ze, lavarit-eñ, rag n’eo ket c’hwi a gomzo, med ar Spered Santel. ¹² Eur breur a roio e vreur d’ar maro, eun tad e vugel. Bugale en em zavo a-eneb o herent hag o haso d’ar maro. ¹³ Kasaet e viot gand an oll dud, en abeg d’am ano. Medan hini a zalho mad beteg ar fin, hennez a vo salvet. »

Ar wallzismegañs spontuz

¹⁴ « Pa welot ar wallzismegañs spontuz o ren el leh na zle ket beza ennañ, ra gompreno an hini a lenn !… Neuze, ra deho war-zu ar meneziou ar re a zo e Bro-Jude ! ¹⁵ An neb a zo war al leurenn-doenn, arabad dezañ diskenn ha dond tre en ti da gemer tra-pe-dra e-barz. ¹⁶ Hag an neb a zo er park, arabad dezañ dond war e giz da gemer e vantell.

¹⁷ Gwaz-a-ze evid ar gwragez a vo o tougen pe o vaga en deiziou-ze ! ¹⁸ Pedit evid na hoarvezo ket kement-se e-pad ar goañv. ¹⁹ Rag bez’ e vo en deiziou-ze eur glahar euz ar seurt n’eus ket bet e bar dezañ, abaoe penn kenta ar grouidigez bet krouet gand Doue beteg bremañ, hag e-giz na vo ket mui. ²⁰ Ha ma ne vije ket bet an deiziou-ze berreet gand Doue, ne vefe saveteet den ebed. Med o berreet e-neus, ablamour d’ar re bet dibabet gantañ. »

Falskristou ha profeted faoz

²¹ « Neuze, ma lavar unan bennag deoh : “Sell, aman, ar Hrist ! Sell, aze ema !” na gredit ket. ²² Rag sevel a raio falskristou ha profeted faoz. Ober a raint sinou ha burzudou evid lakaad, ma ve posubl, an dibabidi da ziheñcha. ²³ Evidoh, taolit evez ! Raglavaret em-eus pep tra deoh. »

Donedigez mab an den

²⁴ « Med en deiziou-ze, goude seurt trubuill, e teuio an heol da deñvallaad. Al loar ne roio ket he sklerijenn ken. ²⁵ Ar stered en em lakaio da goueza euz an neñv, ha distardet e vo galloudou an neñvou.

²⁶ Neuze, e welint mab an den o tond er houmoul, gand kalz a halloud hag a hloar. ²⁷ Goude-ze, e kaso e êlez, e tastumo e zibabidi euz ar pevar avel, euz penn all an douar beteg penn all an neñv. »

Ar wezenn-fiez o tiglora he broñsou

²⁸ « Diwar ar wezenn-fiez deskit ar barabolenn-mañ : kerkent ha ma teu he skourrou da veza tener, ha ma kresk he deliou, e ouzoh ema tost an hañv. ²⁹ Evel-se, c’hwi ive, pa welot kement-se o c’hoarvezoud, gouezit ema-eñ tost, e toull an nor.

³⁰ Amen, lavared a ran deoh, ne dremeno ket ar rummad-mañ a-raog ma c’hoarvezo kement-se. ³¹ Tremen a raio an douar gand an neñv : ma homzou, nann, ne dremenint ket. ³² Evid an deiz-se, pe an eur ? Den ne oar, nag êlez an neñv nag ar Mab, n’eus nemed an Tad. »

Beillit

³³ « Bezit war evez ! Chomit dihun ! Rag n’ouzoh ket pegoulz e vo ar mare. ³⁴ Evel ma ’z eo evid eun den eet kuit da bell, lezet gantañ e di ha roet ar galloud d’e zervicherien, da bep hini e labour, ha d’ar porzier e-neus gourhemennet beilla.

³⁵ Beillit eta ! N’ ouzoh ket pevare e teuio mestr an ti : diwezad, pe e-kreiz an noz, pe pa gan ar hillog, pe diouz ar mintin. ³⁶ Gand aon na zeufe a-daol-trumm, ha n’ho kavfe kousket. ³⁷ Ar pez a lavaran deoh, henn lavared a ran d’an oll : « Beillit ! »