Pennad nao

¹ Hag e lavare-en dezo : « Amen, lavared a ran deoh : bez’ ez eus lod euz ar re a zo amañ ha ne dañvint ket ar maro a-raog beza gwelet rouantelez Doue o tond gand galloud. »

An treuzneuziadur

² C’hweh devez goude, e kemer gantañ Pèr, Jakez ha Yann. O lakaad a ra da bignad war eur menez uhel, en o fart o-unan. Treuzneuziet e teu da veza dirazo. ³ Dond a ra e zillad da veza skeduz ha gwenn-kann, kement ha ne hell kanner ebed war an douar o gwennaad evel-se.

⁴ Dirazo e tifluk Eliaz ha Moizez, hag e stagont da gomz gand Jezuz. ⁵ Ha Pèr da lavared da Jezuz : « Rabbi ! Mad eo deom beza amañ ! Savom teir deltenn : unan evidout, unan evid Moizez, unan evid Eliaz. » ⁶ Rag ne ouie ket petra respont : aon a oa kroget enno.

⁷ Dond a ra eur goumoulenn d’o holoi hag e teu eur vouez euz ar goumoulenn : « Hemañ eo ma Mab, an hini muia-karet : selaouit-eñ ! » ⁸ Hag a-daol-trumm, pa zellont tro-war-dro, ne welont den ebed, nemed Jezuz e-unan-penn ganto. ⁹ Pa ziskennont euz ar menez, e kemenn dezo chom heb konta da zen ebed ar pez o-deus gwelet, nemed pa vo bet mab an den adsavet a-douez ar re varo. ¹⁰ Delher a reont mad d’o ger, med breutadeg a zo kenetrezo diwar-benn petra eo : « Adsevel a-douez ar re varo. »

« Deut eo Eliaz dija »

¹¹ Goulenn a reont neuze digantañ, o lavared : « Perag e lavar ar skriverien e tle Eliaz dond da genta ? » ¹² Respont a ra dezo : « Gwir eo e teu Eliaz da genta, hag e vo pep tra adsavet gantañ. Ha penaoz eo bet skrivet diwar-benn mab an den e houzañvo kalz hag e vo kontet evel netra. ¹³ Med lavared a ran deoh ive : deut eo Eliaz dija, ha greet o-deus gantañ e-giz m’ o-doa c’hoant, hervez ar pez a zo bet skrivet diwar e benn. »

An den gand an droug-uhel hag e dalh an diaoul

¹⁴ Hag o vond daved an diskibien, e welont kalz tud en-dro dezo, ha skriverien o tivizoud ganto. ¹⁵ Dioustu eo-eñ gwelet gand ar boblad-tud. Sebezet int hag e redont davetañ d’e zaludi.

¹⁶ Goulenn a ra diganto : « Diwar-benn petra emaoh o tivizoud ganto ? » ¹⁷ Unan euz an dud a respont dezañ : « Mestr, degaset em-eus ma mab davedout : eur spered mud a zo gantañ. ¹⁸ Ha forz peleh ma krog ennañ, e daol war an douar : glaourenni a ra, skrignal ha dond da veza seh. Lavaret em-eus d’az tiskibien e gas er-mêz, med n’o-deus ket bet nerz a-walh. »

¹⁹ Respont a ra dezo, en eur lavared : « O rummad difeiz ! Beteg peur e vin en ho kichenn ? Beteg peur ho kouzañvin ? Degasit-eñ d’am hichenn ! »

²⁰ E zegas a reont dezañ. O weled Jezuz, e krog ar spered dioustu da heja ar bugel gand glizi : koueza a ra war an douar ha ruilla, o hlaourenni. ²¹ Goulenn a ra digand an tad : « Pegeid ’zo e c’hoarvez kement-se gantañ ? » Lavared a ra : « Abaoe e vugaleach. ²² Hag aliez ive e-neus e daolet en tan hag en dour, evid e zistruja. Med ma hellez, sikour-me ! Lez da galon da veza rannet evidom ! »

²³ Jezuz a lavar dezañ : « Ar “ma heliez”-se !… Posubl e vez pep tra evid an hini a gred. » ²⁴ Kerkent e youh tad ar bugel, en eur lavared : « Kredi a ran. Ro skoazell d’am diouer a feiz ! » ²⁵ O weled ema an dud o tostaad, e hourdrouz Jezuz ar spered dihlan hag e lavar dezañ : « Spered mud ha bouzar ! Me a hourhemenn dit : kerz er-mêz anezañ, ha n’a ket ken ennañ ! » ²⁶ Garmi a ra, ober kalz glizi dezañ da dond er-mêz. Deut eo da veza evel maro, ken e lavar kalz anezo : « Maro eo ! » ²⁷ Med Jezuz e zihun, en eur grogi en e zorn ; sevel a ra.

²⁸ Pa zegouez en ti, e houlenn e ziskibien digantañ, en o fart o-unan : « Perag n’om ket bet gouest d’e gas er-mêz ? » ²⁹ Lavared a ra dezo : « Ar ouenn-se ne hell beza kaset kuit gand netra nemed ar bedenn. »

Eil kemenn euz e basion

³⁰ O vond kuit alese, e foetont bro a-dreuz ar Galile, ha ne feil ket dezañ e oufe den an dra-ze, ³¹ rag kelenn a ree e ziskibien. Lavared a ree dezo : « Mab an den a vo roet etre daouarn an dud. E laza a raint, hag eur wech bet lazet, eh adsavo-eñ, goude tri devez. » ³² Int ne gomprenont ket e gomzou hag aon o-deus da houlenn outañ.

Piou an hini brasa ?

³³ Dond a reont beteg Kafarnaom. Erruet en ti, e houlenn-eñ diganto : « War an hent, peseurt divizou a oa kenetrezoh ? » ³⁴ Tevel a reont, rag tabutal o-doa greet etrezo en hent, evid gouzoud piou eo an hini brasa. ³⁵ Azeza a ra, gelver an daouzeg ha lavared dezo : « An neb e-neus c’hoant da veza da genta, ra vo an hini diweza e-touez an oll, ha servicher d’an oll ! »

³⁶ Hag o kemer eur bugelig, e lak en o hreiz. E vriata a ra ha lavared dezo : ³⁷ « An hini a zegemer unan euz ar re vihan-mañ em ano, me eo hag a zo degemeret gantañ. Hag an hini am degemer, n’eo ket me a zo degemeret gantañ med an hini e-neus ma haset. »

« An hini n’ema ket a-eneb deom a zo ganeom »

³⁸ Yann a lavar dezañ : « Mestr, gwelet on-eus eun den o kas diaouled er-mêz, en da ano, ha miret on-eus outañ, rag ne zeue ket d’on heul. » ³⁹ Med Jezuz a respont : « Na virit ket outañ. Rag n’eus den ebed a rafe eur burzud em ano hag a hellfe dioustu komz fall diwar ma fenn. ⁴⁰ An hini n’ema ket a-eneb deom a zo ganeom. »

Eur werennad dour

⁴¹ « Ya ! An hini a ro deoh eur werennad dour, en abeg m’emaoh d’ar Hrist, amen, lavared a ran deoh : ne gollo ket e hopr. »

« An neb a vo eur skoill… »

⁴² « An neb a vo eur skoill evid unan euz ar re vihan-man a gred ennon, e vefe gwelloh evitañ beza staget dezañ eur mên-milin-azen en-dro d’e houzoug ha beza stlapet er mor !

⁴³ Ma ’z eo da zorn eur skoill evidout, troh-eñ ! Rag mad eo dit antreal mogn er vuhez, kentoh eged beza stlapet, gand da zaou zorn, d’ar jehenn, d’an tan na varv ket. ⁴⁵ Ha ma ’z eo da droad eur skoill evidout, troh-eñ ! Rag mad eo dit antreal kamm er vuhez, kentoh eged beza stlapet, gand da zaou droad, er jehenn. »

⁴⁷ « Ha ma ’z eo da lagad eur skoill evidout, stlap-eñ kuit ! Rag mad eo dit antreal e rouantelez Doue gand eul lagad hepken, kentoh eged beza stlapet er jehenn, ⁴⁸ e-leh ma ne varv ket o freñv, ha ma ne ehan ket an tan. »

Tan ha holen

⁴⁹ « Rag pep hini a vo sallet gand an tan. ⁵⁰ Mad an holen ! Med ma teu an holen da veza dizall, gand petra e vo temzet ? Ho-pet holen ennoh hoh-unan, ha bezit e peoh kenetrezoh ! »