Pennad seiz

Hengoun ar gozidi

¹ En em voda a ra en-dro dezañ ar farizianed hag eun nebeud skriverien, deut euz Jeruzalem. ² Gweled a reont lod euz e ziskibien o tebri baraennou gand daouarn saotret, da lavared eo heb beza o gwalhet. ³ Rag ar farizianed hag an oll Juzevien ne zebront ket anez beza gwalhet o daouarn beteg an ilinou ; delher a reont an hengoun-ze euz ar gozidi. ⁴ Ha pa zistroont euz al leurgêr, ne zebront ket heb beza strinket dour warno o-unan. Bez’ ez eus kalz traou all o-deus degemeret, hag e talhont dezo : gwalhi hanafiou, podou ha listri arem.

⁵ Ar farizianed hag ar skriverien a houlenn digantañ : « Perag ne gerz ket da ziskibien hervez hengoun ar gozidi, hag e tebront bara gand daouarn saotred ? » ⁶ Lavared a ra dezo : « Brao e-neus diouganet Izai diwar ho penn, pilpouserien ! Evel m’e-neus skrivet : “Ar bobl-mañ am enor gand o diweuz, med pell e tro o halon diouzin. ⁷ Goullo eo al lidou a rentont din, hag ar henteliou a gelennont n’int nemed gourhemennou an dud !” ⁸ Lezel a rit-c’hwi gourhemennou Doue, ha delher da hiziou-koz an dud ! » ⁹ Hag e lavare-en c’hoaz : « Brao eh argasit gourhemennou Doue, evid delher da hiziou-koz an dud. ¹⁰ Rag lavaret e-neus Moizez : “Da dad ha da vamm a enori, hag an hini a valloz tad pe vamm a varvo”. ¹¹ C’hwi a-vad a ziskleir : “Ma lavar eun den d’e dad pe d’e vamm : ‘Qorban – da lavared eo : prof da Zoue – eo ar pez e-nefe gellet, e-touez ma danvez, beza talvouduz dit”, ¹² ne lezit ket an den-ze d’ober tra ken evid e dad pe evid e vamm. ¹³ Torri a rit komz Doue gand ho hengoun-deoh a zalhit a rummad da rummad. Hag ober a rit kalz traou all heñvel ! »

Ar pez a zaotr an den

¹⁴ Hag o veza galvet an dud dirazañ adarre, e lavar dezo : « Ma zelaouit oll ! Ha komprenit ! ¹⁵ N’eus netra euz diavêz an den hag a hell e zaotra, en eur vond ennañ. ¹⁶ Med ar pez a zeu er-mêz euz e ziabarz eo hag a zaotr an den. »

¹⁷ Pa ’z a d’an ti, pell diouz an dud, e ra e ziskibien eur goulenn outañ, diwar-benn ar barabolenn. ¹⁸ Lavared a ra dezo : « Setu ma chomit, c’hwi ive, hep kompren ! Ne welit ket ne hell ket eun den beza saotret gand ar pez a ya ennañ euz an diavêz ? ¹⁹ Rag an dra-ze ne ’z a ket en e galon med en e gov, hag er-mêz d’ar foz. » Diskleria a ree glan kement boued a zo. ²⁰ Med lavared a ra : « Ar pez a zeu er-mêz euz eun den, an dra-ze eo a zaotr an den. ²¹ Rag, euz an diabarz, euz kalon an den, e teu komzou droug, gastaouèrèz, laeroñsi, muntrèrèz, ²² avoultriez, c’hoantegez evid ar madou, fallagriez, gwidre, hudurnez, lagad fall, le-douet, brasoni, diskiantegez. ²³ An oll draou fall-se, o tond euz an diabarz, eo hag a zaotr an den. »

Feiz ar bayanez

²⁴ Alese e sav evid mond kuit war-zu douarou Tir. Antreal a ra en eun ti, ha n’e-neus ket c’hoant e vefe gouezet an dra gand den ebed, med ne hell ket en em guzad. ²⁵ Rag dioustu e tegouez hag e stou dirazañ eur vaouez bet klevet ganti komz diwar e benn ; he merh vihan a zo enni eur spered dihlan. ²⁶ Ar vaouez-se a zo gresianez, euz Bro-Ziri, ha fenisianez a ouenn. Goulenn a ra-hi digantañ kas an diaoul kuit euz he merh. ²⁷ Lavared a ra-eñ dezi : « Lez da genta roi o gwalh d’ar vugale. Rag n’eo ket brao kemer bara ar vugale hag e stlepel d’ar chas bihan. » ²⁸ Hi a respont hag a lavar dezañ : « Aotrou ! Med ar chas bihan zoken, dindan an daol, a zebr bruzunou ar vugale vihan. » ²⁹ Hag eñ da lavared dezi : « En abeg d’ar homzou-ze, kerz : eet eo an diaoul kuit er-mêz euz da verh. » ³⁰ Mond a ra-hi ha kavoud ar bugel taolet war ar gwele, hag an diaoul eet kuit.

Parea a ra eun den mud ha besteod

³¹ Adarre e teu er-mêz euz douarou Tir. Tremen a ra dre Zidon, war-zu Mor-ar-Galile, hag e-kreiz bro an Deg-Kêr. ³² Hag e tegasont dezañ eun den bouzar ha besteod. E aspedi a reont, evid ma lakaio e zorn warnañ.

³³ E gemer a ra, pell diouz ar boblad-tud, en diavêz, lakaad e vizied war e ziouskouarn, tufa ha touch ouz e deod. ³⁴ En eur zevel e zellou war-zu an neñv, e huanad hag e lavar dezañ : « Effata ! », da lavared eo : « Digor braz ! » ³⁵ Kerkent eo digoret e gleved, en em zistag liamm e deod, hag e komz en eun doare reiz.

³⁶ Gourhemenn a ra dezo chom hep komz da zen ebed. Med int, seul vui e hourhemenne dezo ha seul vui eh embannent hep paouez. ³⁷ Skoet-braz int hag e lavaront : « Brao e-neus greet pep tra ! Ar re vouzar a lak da gleved, hag ar re vud da gomz ! »